ຊີວິດຄລິດສະຕຽນ
ປັບປຸງຄວາມສາມາດໃນວຽກຮັບໃຊ້ຂອງເຮົາໃຫ້ດີຂຶ້ນ—ພ້ອມທີ່ຈະປັບປ່ຽນ
ເປັນຫຍັງຈຶ່ງສຳຄັນ: ຜູ້ຖືກເຈີມແລະແກະອື່ນເຊີນຄົນທຸກຊະນິດໃຫ້ມາ “ດື່ມນ້ຳທີ່ໃຫ້ຊີວິດ . . . ຟຣີໆ.” (ພນມ 22:17) ນ້ຳທີ່ໃຫ້ຊີວິດໝາຍເຖິງການຈັດກຽມທຸກຢ່າງຂອງພະເຢໂຫວາເພື່ອຊ່ວຍມະນຸດທີ່ເຊື່ອຟັງໃຫ້ພົ້ນຈາກບາບແລະຄວາມຕາຍ. ຖ້າເຮົາຢາກຊ່ວຍຄົນຈາກທຸກວັດທະນະທຳແລະທຸກສາສະໜາ ເຮົາຕ້ອງສະເໜີ “ຂ່າວດີທີ່ຈະຢູ່ຕະຫຼອດໄປ” ໃນແບບທີ່ເຂົ້າເຖິງຫົວໃຈຂອງແຕ່ລະຄົນ.—ພນມ 14:6
ສິ່ງທີ່ຄວນເຮັດ:
ເລືອກເລື່ອງແລະຂໍ້ພະຄຳພີທີ່ເຂົ້າເຖິງໃຈຄົນໃນເຂດປະກາດຂອງເຈົ້າ. ເຈົ້າອາດຈະໃຊ້ຕົວຢ່າງການສົນທະນາຫຼືເລືອກບາງວິທີທີ່ເຈົ້າເຄີຍໃຊ້ແລ້ວໄດ້ຜົນດີ. ມີເລື່ອງໃດແລະພະຄຳພີຂໍ້ໃດທີ່ຜູ້ຄົນມັກ? ມີຂ່າວຫຍັງທີ່ຜູ້ຄົນກຳລັງສົນໃຈ? ເລື່ອງໃດເໝາະກັບຜູ້ຊາຍຫຼືເລື່ອງໃດເໝາະກັບຜູ້ຍິງ?
ເມື່ອລົມກັບເຈົ້າຂອງເຮືອນໃຫ້ທັກທາຍແລະເຮັດຕາມທຳນຽມທີ່ຄົນສ່ວນຫຼາຍໃນເຂດຂອງເຈົ້າເຮັດ.—2ກຣ 6:3, 4
ໃຫ້ລຶ້ງເຄີຍກັບສິ່ງພິມແລະວິດີໂອທີ່ຢູ່ໃນກ່ອງເຄື່ອງມືສຳລັບການສອນຂອງເຮົາເພື່ອຈະເລືອກໃຊ້ຢ່າງເໝາະສົມເມື່ອເຈິຄົນທີ່ສະແດງຄວາມສົນໃຈ
ດາວໂຫຼດຂໍ້ມູນຕ່າງໆໃນພາສາຂອງຄົນທີ່ເຈົ້າອາດຈະເຈິໃນເຂດປະກາດ
ປັບເລື່ອງທີ່ຈະລົມໃຫ້ເຂົ້າກັບຄວາມຈຳເປັນຂອງເຈົ້າຂອງເຮືອນ. (1ກຣ 9:19-23) ຕົວຢ່າງເຊັ່ນ: ເຈົ້າຈະເວົ້າແນວໃດຖ້າເຈົ້າຂອງເຮືອນບອກວ່າຄົນທີ່ຮັກຫາກໍຕາຍຈາກໄປ?
ເບິ່ງວິດີໂອແລ້ວຕອບຄຳຖາມຕໍ່ໄປນີ້:
ຜູ້ປະກາດເລີ່ມລົມເລື່ອງຫຍັງກັບເຈົ້າຂອງເຮືອນ?
ເຈົ້າຂອງເຮືອນກຳລັງເຈິບັນຫາຫຍັງ?
ພະຄຳພີຂໍ້ໃດເໝາະທີ່ສຸດໃນສະຖານະການນີ້ ແລະຍ້ອນຫຍັງ?
ເຈົ້າຈະປັບວິທີເວົ້າແນວໃດເພື່ອດຶງດູດຄວາມສົນໃຈຄົນທີ່ຢູ່ໃນເຂດປະກາດຂອງເຈົ້າ?