ເລືອກຮັບໃຊ້ພະເຢໂຫວາ

ຖ້າເຈົ້າເປັນຜູ້ປະກາດທີ່ຍັງບໍ່ໄດ້ຮັບບັບເຕມາແລະອາຍຸຍັງນ້ອຍຫຼືເປັນນັກສຶກສາຄຳພີໄບເບິນ ເຈົ້າມີເປົ້າໝາຍທີ່ຈະຮັບບັບເຕມາບໍ? ເປັນຫຍັງເຈົ້າຄວນຢາກຮັບບັບເຕມາ? ການອຸທິດຕົວແລະຮັບບັບເຕມາເປັນຈຸດເລີ່ມຕົ້ນຂອງການມີສາຍສຳພັນທີ່ພິເສດກັບພະເຢໂຫວາ. (ເພງ 91:1) ການອຸທິດຕົວແລະຮັບບັບເຕມາຍັງຊ່ວຍເຈົ້າໃຫ້ລອດນຳ. (1ປຕ 3:21) ເຈົ້າຈະກ້າວໜ້າຈົນຮອດຂັ້ນຕອນເຫຼົ່ານີ້ໄດ້ແນວໃດ?

ເຈົ້າຕ້ອງໝັ້ນໃຈວ່ານີ້ແມ່ນຄວາມຈິງ. ເມື່ອເຈົ້າມີຂໍ້ສົງໄສ ໃຫ້ຄົ້ນຄວ້າເລື່ອງນັ້ນ. (ຣມ 12:2) ເບິ່ງວ່າມີຫຍັງທີ່ເຈົ້າຕ້ອງປ່ຽນແປງ ແລະເຮັດຕາມນັ້ນຍ້ອນຢາກໃຫ້ພະເຢໂຫວາພໍໃຈ. (ສຸພາ 27:11; ອຟຊ 4:23, 24) ອະທິດຖານຂໍໃຫ້ເພິ່ນຊ່ວຍຢູ່ເລື້ອຍໆ. ໃຫ້ໝັ້ນໃຈວ່າພະເຢໂຫວາຈະເຮັດໃຫ້ເຈົ້າເຂັ້ມແຂງແລະສະໜັບສະໜູນເຈົ້າດ້ວຍພະລັງບໍລິສຸດຂອງເພິ່ນ. (1ປຕ 5:10, 11) ຄວາມພະຍາຍາມຂອງເຈົ້າຈະຄຸ້ມຄ່າ. ການຮັບໃຊ້ພະເຢໂຫວາເປັນຊີວິດທີ່ດີທີ່ສຸດ!—ເພງ 16:11

ເບິ່ງວິດີໂອເສັ້ນທາງສູ່ການຮັບບັບເຕມາ ແລ້ວຕອບຄຳຖາມຕໍ່ໄປນີ້:

ບາງຄົນຕ້ອງເອົາຊະນະອຸປະສັກຫຍັງແດ່ເພື່ອຈະຮັບບັບເຕມາໄດ້?
ເຈົ້າຕ້ອງເຮັດຫຍັງແດ່ເພື່ອຈະມີຄວາມເຊື່ອຫຼາຍຂຶ້ນຈົນຢາກອຸທິດຕົວໃຫ້ພະເຢໂຫວາ?
ອັນໃດກະຕຸ້ນບາງຄົນໃຫ້ເຮັດສິ່ງທີ່ຈຳເປັນເພື່ອຈະຮັບບັບເຕມາໄດ້?
ຄົນທີ່ເລືອກຮັບໃຊ້ພະເຢໂຫວາໄດ້ຮັບພອນຫຍັງ?
ການອຸທິດຕົວແລະຮັບບັບເຕມາໝາຍເຖິງຫຍັງ?

ໃນຕອນທ້າຍຂອງຄຳບັນຍາຍຮັບບັບເຕມາ ຜູ້ບັນຍາຍຈະຂໍໃຫ້ຜູ້ທີ່ຈະຮັບບັບເຕມາຢືນຂຶ້ນແລະຕອບຄຳຖາມສອງຂໍ້ຕໍ່ໄປນີ້ດ້ວຍສຽງດັງໆແລະຈະແຈ້ງ:

ເຈົ້າໄດ້ກັບໃຈຈາກບາບ ອຸທິດຕົວໃຫ້ພະເຢໂຫວາ ແລະຍອມຮັບວິທີທີ່ເພິ່ນຊ່ວຍເຈົ້າໃຫ້ລອດໂດຍທາງພະເຢຊູຄລິດບໍ?

ການທີ່ເຈົ້າຮັບບັບເຕມາສະແດງວ່າເຈົ້າເປັນພະຍານພະເຢໂຫວາຄົນໜຶ່ງທີ່ຮັບໃຊ້ຮ່ວມກັບອົງການຂອງພະເຢໂຫວາ ເຈົ້າເຂົ້າໃຈແບບນັ້ນບໍ?

ຄຳຕອບຢືນຢັນສຳລັບຄຳຖາມສອງຂໍ້ນີ້ເປັນການ “ປະກາດຢ່າງເປີດເຜີຍ” ວ່າ ຜູ້ຂໍຮັບບັບເຕມາເຊື່ອໃນຄ່າໄຖແລະອຸທິດຕົວໃຫ້ພະເຢໂຫວາແບບບໍ່ມີເງື່ອນໄຂ.—ຣມ 10:9, 10