ຊີວິດຄລິດສະຕຽນ

ສະແດງຄວາມຮັກໃນຄອບຄົວ

ຄວາມຮັກແມ່ນກາວທີ່ເຮັດໃຫ້ຄອບຄົວຜູກພັນກັນ. ຖ້າບໍ່ມີຄວາມຮັກ ຄອບຄົວກໍຈະບໍ່ເປັນໜຶ່ງດຽວກັນແລະບໍ່ຮ່ວມມືກັນ. ຜົວ ເມຍ ແລະພໍ່ແມ່ຈະສະແດງຄວາມຮັກໃນຄອບຄົວໄດ້ແນວໃດ?

ຜົວທີ່ມີຄວາມຮັກຈະຄິດເຖິງຄວາມຕ້ອງການ ຄວາມຄິດ ແລະຄວາມຮູ້ສຶກຂອງເມຍ. (ອຟຊ 5:28, 29) ລາວຈະຈັດຫາສິ່ງຈຳເປັນທາງດ້ານຮ່າງກາຍແລະດ້ານຄວາມເຊື່ອ ລວມທັງຈັດໃຫ້ມີການນະມັດສະການປະຈຳຄອບຄົວເປັນປະຈຳ. (1ຕມ 5:8) ເມຍທີ່ມີຄວາມຮັກຈະເຊື່ອຟັງຜົວແລະ ‘ນັບຖືຜົວຈາກໃຈ.’ (ອຟຊ 5:22, 33; 1ປຕ 3:1-6) ຜົວເມຍຕ້ອງເຕັມໃຈໃຫ້ອະໄພກັນ. (ອຟຊ 4:32) ພໍ່ແມ່ທີ່ມີຄວາມຮັກຈະສົນໃຈລູກແຕ່ລະຄົນແລະສອນເຂົາເຈົ້າໃຫ້ຮັກພະເຢໂຫວາ. (ບັນຍັດ 6:6, 7; ອຟຊ 6:4) ລູກເຈິບັນຫາຫຍັງແດ່ຢູ່ໂຮງຮຽນ? ເຂົາເຈົ້າຮັບມືແນວໃດເມື່ອຖືກໝູ່ກົດດັນ? ເມື່ອຄອບຄົວສະແດງຄວາມຮັກຕໍ່ກັນ ທຸກຄົນກໍຈະຮູ້ສຶກໝັ້ນຄົງແລະປອດໄພ.

ເບິ່ງວິດີໂອສະແດງຄວາມຮັກສະເໝີໃນຄອບຄົວ ແລ້ວຕອບຄຳຖາມຕໍ່ໄປນີ້:

ຜົວທີ່ມີຄວາມຮັກຈະເບິ່ງແຍງແລະໃສ່ໃຈເມຍແນວໃດ?
ເມຍທີ່ມີຄວາມຮັກຈະນັບຖືຜົວຈາກໃຈແນວໃດ?
ພໍ່ແມ່ທີ່ມີຄວາມຮັກຈະຊ່ວຍລູກໃຫ້ຮັກຄຳສອນຂອງພະເຈົ້າແນວໃດ?

ຂໍ້ຄວນລະວັງກ່ຽວກັບເຕັກໂນໂລຊີ

ອຸປະກອນເອເລັກໂຕຣນິກສາມາດເຮັດໃຫ້ເຮົາເສຍເວລາທີ່ຄວນໃຊ້ກັບຄອບຄົວໄປໄດ້ງ່າຍໆ. ພໍ່ແມ່ອາດກຳນົດເວລາໃນການໃຊ້ອຸປະກອນເອເລັກໂຕຣນິກຂອງໂຕເອງແລະຂອງລູກນຳ. ນອກຈາກນັ້ນ ພໍ່ແມ່ຕ້ອງເບິ່ງວ່າລາວຈະອະນຸຍາດໃຫ້ລູກຕິດຕໍ່ກັບຄົນອື່ນທາງອອນລາຍຫຼືບໍ່ແລະຕິດຕໍ່ກັບໃຜ.