ຊີວິດຄລິດສະຕຽນ
ວິທີຊ່ວຍເຫຼືອຫຼັງໄພພິບັດ
ໃນທຸກມື້ນີ້ໄພທຳມະຊາດມີຫຼາຍຂຶ້ນເລື້ອຍໆ. ເມື່ອເກີດເຫດການແບບນີ້ ວຽກບັນເທົາທຸກຈຶ່ງຈຳເປັນຕ້ອງໄດ້ຮັບການຈັດກຽມເປັນຢ່າງດີແລະຕ້ອງມີການປະສານງານຢ່າງມີປະສິດທິພາບ. ດັ່ງນັ້ນຄະນະກຳມະການປົກຄອງໄດ້ຈັດໃຫ້ມີພະແນກບັນເທົາທຸກໃນແຕ່ລະສຳນັກງານສາຂາ.
ເມື່ອພີ່ນ້ອງໃນພະແນກບັນເທົາທຸກຮູ້ວ່າມີໄພທຳມະຊາດ ເຂົາເຈົ້າກໍຈະຕິດຕໍ່ກັບຜູ້ດູແລທ້ອງຖິ່ນທັນທີເພື່ອເບິ່ງວ່າພີ່ນ້ອງທີ່ຢູ່ຫັ້ນຕ້ອງການຄວາມຊ່ວຍເຫຼືອຫຍັງແດ່. ຖ້າຢູ່ບ່ອນນັ້ນເສຍຫາຍຫຼາຍຈົນພີ່ນ້ອງບໍ່ສາມາດຊ່ວຍເຫຼືອຕົວເອງໄດ້ ສຳນັກງານສາຂາກໍຈະແຕ່ງຕັ້ງພີ່ນ້ອງຊາຍບາງຄົນທີ່ມີຄຸນສົມບັດໃຫ້ເປັນຜູ້ນຳໜ້າໃນວຽກບັນເທົາທຸກ. ພີ່ນ້ອງຊາຍທີ່ຖືກແຕ່ງຕັ້ງອາດຈະຂໍໃຫ້ພີ່ນ້ອງອາສາສະໝັກມາຊ່ວຍແລະຂໍສິ່ງຈຳເປັນບາງຢ່າງ ຫຼືເຂົາເຈົ້າອາດຈະຊື້ສິ່ງທີ່ຈຳເປັນເພື່ອແຈກຢາຍໃຫ້ພີ່ນ້ອງໃນທ້ອງຖິ່ນນັ້ນ.
ເມື່ອເຮັດແບບນີ້ກໍມີຂໍ້ດີຫຼາຍຢ່າງ ຍ້ອນວ່າຖ້າພີ່ນ້ອງຊ່ວຍຕາມວິທີຂອງຕົວເອງອາດຈະເຮັດໃຫ້ວຽກຊ້ຳກັນຫຼືເກີດຄວາມສັບສົນແລະໃຊ້ເງິນຫຼືເຄື່ອງຂອງທີ່ພີ່ນ້ອງບໍລິຈາກໂດຍບໍ່ຈຳເປັນ.
ພີ່ນ້ອງທີ່ຖືກແຕ່ງຕັ້ງຈະກຳນົດວ່າຈະໃຊ້ເງິນບໍລິຈາກເທົ່າໃດແລະໃຊ້ອາສາສະໝັກຈັກຄົນເພື່ອຊ່ວຍໃນວຽກບັນເທົາທຸກ. ເຂົາເຈົ້າອາດຈະຮູ້ຈັກກັບເຈົ້າໜ້າທີ່ໃນທ້ອງຖິ່ນເພື່ອຊ່ວຍໃຫ້ເຮັດວຽກບັນເທົາທຸກໄດ້ໄວຂຶ້ນ ດັ່ງນັ້ນຂໍໃຫ້ເຮົາຢ່າຊ່ວຍເຫຼືອພີ່ນ້ອງຕາມວິທີຂອງເຮົາໂດຍການລະດົມທຶນ ສົ່ງເຄື່ອງບັນເທົາທຸກຫຼືເດີນທາງໄປບ່ອນທີ່ໄດ້ຮັບຜົນກະທົບ ເວັ້ນເສຍແຕ່ວ່າເຮົາຖືກຂໍໃຫ້ເຮັດແບບນັ້ນ.
ຍ້ອນເຮົາຮັກພີ່ນ້ອງເຮົາຈຶ່ງຢາກຊ່ວຍເຂົາເຈົ້າເມື່ອເກີດໄພພິບັດ. (ຮຣ 13:16) ແລ້ວເຮົາຈະເຮັດແບບນັ້ນໄດ້ແນວໃດ? ສິ່ງສຳຄັນທີ່ເຮົາສາມາດເຮັດໄດ້ແມ່ນ ການອະທິດຖານເພື່ອພີ່ນ້ອງທີ່ປະສົບໄພທຳມະຊາດແລະເພື່ອພີ່ນ້ອງທີ່ໄປຊ່ວຍເຂົາເຈົ້າ. ນອກຈາກນັ້ນ ເຮົາຍັງສາມາດບໍລິຈາກເງິນເພື່ອວຽກງານທົ່ວໂລກ. ພາຍໃຕ້ການຊີ້ນຳຂອງຄະນະກຳມະການປົກຄອງ ສຳນັກງານສາຂາຮູ້ດີວ່າຈະໃຊ້ເງິນບໍລິຈາກເພື່ອຊ່ວຍເຫຼືອພີ່ນ້ອງຢູ່ບ່ອນໃດແລະຖ້າເຮົາຢາກມີສ່ວນຮ່ວມໃນວຽກນີ້ ເຮົາສາມາດຂຽນໃບສະໝັກເປັນອາສາສະໝັກຊ່ວຍພະແນກອອກແບບ/ກໍ່ສ້າງທ້ອງຖິ່ນ (DC-50).
ເບິ່ງວິດີໂອນ້ຳຖ້ວມໃຫຍ່ໃນເບຣຊິນ ແລ້ວຕອບຄຳຖາມຕໍ່ໄປນີ້:
ເຈົ້າປະທັບໃຈຈຸດໃດເມື່ອເຫັນວ່າພະຍານພະເຢໂຫວາຈັດກຽມວຽກບັນເທົາທຸກຕອນທີ່ເກີດນ້ຳຖ້ວມໃຫຍ່ໃນເບຣຊິນປີ 2020?