ບົດຄວາມສຶກສາທີ 10
ຄວາມຮັກແລະຄວາມຮູ້ບຸນຄຸນຕໍ່ພະເຢໂຫວາຈະກະຕຸ້ນເຈົ້າໃຫ້ຮັບບັບເຕມາ
“ມີຫຍັງທີ່ເຮັດໃຫ້ຂ້ອຍຮັບບັບເຕມາບໍ່ໄດ້?”—ກຈກ. 8:36
ເພງ 37 ຮັບໃຊ້ພະເຢໂຫວາສຸດຊີວິດ
ໃຈຄວາມສຳຄັນa
1-2. ຕາມກິດຈະການ 8:27-31, 35-38 ສິ່ງໃດກະຕຸ້ນໃຫ້ຂ້າລາສະການຊາວເອທິໂອເປຍຮັບບັບເຕມາ?
ເຈົ້າຢາກຮັບບັບເຕມາເພື່ອເຂົ້າມາເປັນລູກສິດຂອງພະຄລິດບໍ? ຄວາມຮັກແລະຄວາມຮູ້ບຸນຄຸນໄດ້ກະຕຸ້ນຫຼາຍຄົນໃຫ້ເລືອກແບບນັ້ນ. ຂໍໃຫ້ມາເບິ່ງຕົວຢ່າງຂອງຂ້າລາສະການຄົນໜຶ່ງທີ່ຮັບໃຊ້ລາຊີນີເອທິໂອເປຍນຳກັນ.
2 ຫຼັງຈາກທີ່ຂ້າລາສະການຊາວເອທິໂອເປຍເຂົ້າໃຈສິ່ງທີ່ພະຄຳພີບອກໄວ້ວ່າລາວຕ້ອງເຮັດຫຍັງ ລາວກໍຮັບບັບເຕມາທັນທີ. (ອ່ານກິດຈະການ 8:27-31, 35-38) ອັນໃດກະຕຸ້ນລາວໃຫ້ເຮັດແບບນັ້ນ? ລາວເຫັນຄ່າພະຄຳພີ. ເຮົາເຫັນເລື່ອງນີ້ໄດ້ຈາກຕອນທີ່ລາວເດີນທາງຈາກເມືອງເຢຣູຊາເລັມກັບໄປເອທິໂອເປຍ ລາວອ່ານຂໍ້ຄວາມຈາກປຶ້ມເອຊາອີ ແລະເມື່ອຟີລິບມາເວົ້າກັບລາວ ລາວກໍຮູ້ຄຸນຄ່າຕໍ່ສິ່ງທີ່ພະເຢຊູເຮັດເພື່ອລາວ. ແຕ່ເປັນຫຍັງຂ້າລາສະການຄົນນີ້ຈຶ່ງເດີນທາງໄປເມືອງເຢຣູຊາເລັມ? ກໍຍ້ອນລາວຮັກພະເຢໂຫວາ. ເຮົາຮູ້ໄດ້ແນວໃດ? ເພາະລາວຫາກໍໄປນະມັດສະການພະເຢໂຫວາຢູ່ຫັ້ນ. ລາວໄດ້ຖິ້ມສາສະໜາທີ່ນັບຖືມາຕັ້ງແຕ່ເກີດແລະເຂົ້າຮ່ວມກັບຊາດດຽວທີ່ອຸທິດຕົວໃຫ້ພະເຈົ້າອົງທ່ຽງແທ້. ຍ້ອນລາວຮັກພະເຢໂຫວາ ລາວຈຶ່ງຕັດສິນໃຈເຮັດອີກຢ່າງໜຶ່ງທີ່ສຳຄັນຄື ຮັບບັບເຕມາແລະເຂົ້າມາເປັນລູກສິດຂອງພະຄລິດ.—ມທ. 28:19
3. ສິ່ງໃດອາດຂັດຂວາງຄົນໜຶ່ງບໍ່ໃຫ້ຮັບບັບເຕມາ? (ເບິ່ງຂອບ “ຫົວໃຈຂອງຂ້ອຍເປັນດິນປະເພດໃດ?”)
3 ຄວາມຮັກທີ່ມີຕໍ່ພະເຢໂຫວາສາມາດກະຕຸ້ນເຈົ້າໃຫ້ຮັບບັບເຕມາ. ແຕ່ຄວາມຮັກກໍອາດຂັດຂວາງເຈົ້າບໍ່ໃຫ້ຮັບບັບເຕມາໄດ້ຄືກັນ. ເປັນແບບນັ້ນໄດ້ແນວໃດ? ເຈົ້າອາດຮັກຄອບຄົວແລະໝູ່ທີ່ບໍ່ໄດ້ເຊື່ອໃນພະເຢໂຫວາຫຼາຍແທ້ໆ ແລະເຈົ້າອາດກັງວົນວ່າ ຖ້າເຈົ້າຮັບບັບເຕມາ ພວກເຂົາຈະຊັງເຈົ້າ. (ມທ. 10:37) ຫຼືເຈົ້າອາດມັກເຮັດສິ່ງທີ່ພະເຢໂຫວາກຽດຊັງ ແລະເຈົ້າອາດຮູ້ສຶກວ່າຍາກທີ່ຈະເຊົາເຮັດສິ່ງເຫຼົ່ານັ້ນ. (ເພງ. 97:10) ຫຼືເຈົ້າອາດໃຫຍ່ມາກັບປະເພນີທີ່ສະຫຼອງບຸນຕ່າງໆເຊິ່ງກ່ຽວຂ້ອງກັບສາສະໜາປອມ ແລະເຈົ້າອາດມັກການສະຫຼອງບຸນເຫຼົ່ານັ້ນທີ່ເຄີຍເຮັດໃນອະດີດ. ນີ້ອາດເປັນເລື່ອງຍາກທີ່ເຈົ້າຈະເຊົາເຮັດຕາມປະເພນີທີ່ພະເຢໂຫວາບໍ່ພໍໃຈ. (1 ກຣ. 10:20, 21) ດັ່ງນັ້ນ ເຈົ້າຕ້ອງຖາມຕົວເອງວ່າ “ໃຜຫຼືສິ່ງໃດທີ່ຂ້ອຍຮັກຫຼາຍທີ່ສຸດ?”
ເຮົາຄວນຮັກໃຜຫຼາຍທີ່ສຸດ?
4. ເຫດຜົນສຳຄັນທີ່ສຸດທີ່ເຮັດໃຫ້ເຈົ້າຢາກຮັບບັບເຕມາແມ່ນຫຍັງ?
4 ເຈົ້າມີຫຼາຍສິ່ງຫຼາຍຢ່າງທີ່ຈະຮັກແລະສຳນຶກບຸນຄຸນຕໍ່ພະເຢໂຫວາ. ຕົວຢ່າງເຊັ່ນ: ເຖິງແມ່ນວ່າກ່ອນສຶກສາກັບພະຍານພະເຢໂຫວາ ເຈົ້າອາດຮູ້ຄຸນຄ່າໃນຄຳພີໄບເບິນຫຼາຍຢູ່ແລ້ວ ແລະເຈົ້າກໍອາດຮັກພະເຢຊູຫຼາຍ. ຕອນນີ້ເຈົ້າໄດ້ມາຮູ້ຈັກພະຍານພະເຢໂຫວາ ແລ້ວເຈົ້າກໍມັກຄົບຫາກັບພວກເຂົາ. ແຕ່ການຮັກສິ່ງດີໆເຫຼົ່ານີ້ບໍ່ແມ່ນເຫດຜົນຫຼັກທີ່ເຮັດໃຫ້ເຈົ້າຢາກອຸທິດຕົວໃຫ້ພະເຢໂຫວາແລະຮັບບັບເຕມາ. ເຫດຜົນສຳຄັນທີ່ສຸດທີ່ເຮັດໃຫ້ເຈົ້າຢາກຮັບບັບເຕມາກໍຄື ເຈົ້າຮັກພະເຢໂຫວາພະເຈົ້າ. ເມື່ອເຈົ້າຮັກພະເຢໂຫວາຫຼາຍກວ່າສິ່ງອື່ນໆ ເຈົ້າກໍຈະບໍ່ຍອມໃຫ້ໃຜຫຼືສິ່ງໃດກໍຕາມມາຂັດຂວາງເຈົ້າບໍ່ໃຫ້ຮັບໃຊ້ພະເຢໂຫວາ. ຄວາມຮັກທີ່ເຈົ້າມີຕໍ່ພະເຢໂຫວາຈະກະຕຸ້ນເຈົ້າໃຫ້ຮັບບັບເຕມາແລະຍັງຈະຊ່ວຍເຈົ້າໃຫ້ສັດຊື່ຕໍ່ພະອົງຕໍ່ໆໄປຫຼັງຈາກຮັບບັບເຕມາແລ້ວ.
5. ເຮົາຈະສຶກສາຫຍັງໃນບົດຄວາມນີ້?
5 ພະເຢຊູບອກວ່າເຮົາຕ້ອງຮັກພະເຢໂຫວາສຸດຫົວໃຈ ສຸດຊີວິດ ສຸດຄວາມຄິດ ແລະສຸດກຳລັງຂອງເຮົາ. (ມຣກ. 12:30) ເຮົາຈະຮັກແລະນັບຖືພະເຢໂຫວາຢ່າງສຸດຫົວໃຈໄດ້ແນວໃດ? ຖ້າເຮົາຄິດເບິ່ງວ່າພະເຢໂຫວາຮັກເຮົາຫຼາຍສ່ຳໃດ ນີ້ກໍຈະກະຕຸ້ນເຮົາໃຫ້ຮັກພະອົງຫຼາຍຂຶ້ນ. (1 ຢຮ. 4:19) ໃນບົດຄວາມນີ້ ເຮົາຈະສຶກສາຄຳແນະນຳທີ່ຈະຊ່ວຍເຮົາໃຫ້ຮັກພະອົງຫຼາຍຂຶ້ນ ແລະເຮົາຍັງຈະມາເບິ່ງວ່າ ເຮົາຈະຮູ້ສຶກແນວໃດແລະຈະເຮັດຫຍັງເມື່ອເຮົາພັດທະນາຄວາມຮັກທີ່ສຳຄັນທີ່ສຸດນີ້.b
6. ຕາມໂຣມ 1:20 ວິທີໜຶ່ງທີ່ເຈົ້າສາມາດຮຽນຮູ້ກ່ຽວກັບພະເຢໂຫວາໄດ້ແມ່ນຫຍັງ?
6 ຮຽນຮູ້ເລື່ອງພະເຢໂຫວາຈາກສິ່ງທີ່ພະອົງສ້າງ. (ອ່ານໂຣມ 1:20; ພນມ. 4:11) ລອງຄິດຕຶກຕອງເຖິງຍການອອກແບບຕົ້ນໄມ້ໃບຫຍ້າແລະສັດສາວາສິ່ງ ແລະຮຽນຮູ້ບາງສ່ວນກ່ຽວກັບຮ່າງກາຍຂອງເຈົ້າ ເຈົ້າຈະເຫັນວ່າພະເຢໂຫວາມີສະຕິປັນຍາຫຼາຍແທ້ໆ. (ເພງ. 139:14) ແລະລອງຄິດເຖິງພະລັງງານທີ່ພະອົງເອົາໃສ່ໃນດວງຕາເວັນເບິ່ງດຸ ນີ້ເປັນພຽງດາວດວງໜຶ່ງໃນຫຼາຍໆຕື້ດວງ.c (ເອຊາ. 40:26) ເມື່ອເຈົ້າຄິດຕຶກຕອງກ່ຽວກັບສິ່ງທີ່ພະອົງສ້າງຫຼາຍເທົ່າໃດ ເຈົ້າກໍແຮ່ງຈະຮູ້ສຶກນັບຖືພະອົງຫຼາຍຂຶ້ນ. ແນວໃດກໍຕາມ ການຮູ້ວ່າພະເຢໂຫວາມີສະຕິປັນຍາແລະມີພະລັງອຳນາດຫຼາຍເປັນພຽງສ່ວນໜຶ່ງໃນການປູພື້ນຖານສາຍສຳພັນຂອງເຈົ້າກັບພະອົງ. ແຕ່ເພື່ອຈະເສີມສ້າງຄວາມຮັກຕໍ່ພະເຢໂຫວາໃຫ້ເຂັ້ມແຂງ ເຈົ້າກໍຕ້ອງຮູ້ຈັກພະອົງໃຫ້ຫຼາຍຂຶ້ນ.
7. ເພື່ອຈະຮັກພະເຢໂຫວາຫຼາຍຂຶ້ນ ເຈົ້າຕ້ອງໝັ້ນໃຈໃນເລື່ອງຫຍັງ?
7 ເຈົ້າຕ້ອງໝັ້ນໃຈວ່າພະເຢໂຫວາຮັກເຈົ້າຫຼາຍແທ້ໆ. ເຈົ້າຮູ້ສຶກວ່າເປັນເລື່ອງຍາກບໍທີ່ຈະເຊື່ອວ່າພະເຢໂຫວາຜູ້ສ້າງຟ້າສະຫວັນແລະໂລກຈະສັງເກດເບິ່ງເຈົ້າ? ຖ້າເປັນແນວນັ້ນ ຂໍໃຫ້ຈື່ວ່າພະອົງ “ບໍ່ໄດ້ຢູ່ໄກຈາກພວກເຮົາແຕ່ລະຄົນເລີຍ.” (ກຈກ. 17:26-28) ພະອົງ “ລອງເບິ່ງໃຈ” ຫຼືກວດເບິ່ງຫົວໃຈທຸກຄົນ ແລະພະອົງກໍສັນຍາກັບເຈົ້າຄືກັບທີ່ດາວິດໄດ້ບອກໂຊໂລໂມນວ່າ: “ຖ້າເຈົ້າຊອກຫາພະອົງ ພະອົງຈະໃຫ້ເຈົ້າພົບພະອົງ.” (1 ຂ່າວ. 28:9) ທີ່ຈິງ ເຫດຜົນທີ່ເຈົ້າໄດ້ສຶກສາຄຳພີໄບເບິນໃນຕອນນີ້ກໍຍ້ອນພະເຢໂຫວາໄດ້ “ຊັກຊວນເຈົ້າ” ຄືກັບທີ່ພະອົງໄດ້ບອກໄວ້. (ຢເຣ. 31:3) ແຮ່ງເຈົ້າເຂົ້າໃຈສິ່ງທີ່ພະເຢໂຫວາເຮັດເພື່ອເຈົ້າຫຼາຍເທົ່າໃດ ເຈົ້າກໍແຮ່ງຈະຮັກພະອົງຫຼາຍຂຶ້ນເທົ່ານັ້ນ.
8. ເຈົ້າຈະສະແດງໃຫ້ເຫັນແນວໃດວ່າເຈົ້າເຫັນຄ່າຄວາມຮັກຂອງພະເຢໂຫວາ?
8 ວິທີ່ໜຶ່ງທີ່ເຈົ້າສະແດງວ່າເຫັນຄ່າຄວາມຮັກຂອງພະເຢໂຫວາກໍຄື ລົມກັບພະອົງໂດຍການອະທິດຖານ. ເຈົ້າຈະຮັກພະເຢໂຫວາຫຼາຍຂຶ້ນເມື່ອລົມກັບພະອົງກ່ຽວກັບຄວາມກັງວົນຂອງເຈົ້າ ແລະຂອບໃຈພະອົງສຳລັບສິ່ງດີຕ່າງໆທີ່ພະອົງເຮັດເພື່ອເຈົ້າ. ເມື່ອເຈົ້າເຫັນວ່າພະອົງຕອບຄຳອະທິດຖານ ສາຍສຳພັນຂອງເຈົ້າກັບພະອົງກໍແຮ່ງແໜ້ນແຟ້ນຂຶ້ນ. (ເພງ. 116:1) ແລະເຈົ້າຈະໝັ້ນໃຈວ່າພະອົງເຂົ້າໃຈເຈົ້າແທ້ໆ. ແຕ່ເພື່ອຈະໃກ້ຊິດກັບພະເຢໂຫວາຫຼາຍຂຶ້ນ ເຈົ້າຕ້ອງເຂົ້າໃຈວ່າພະອົງຕ້ອງການຫຍັງຈາກເຈົ້າ ພະອົງຄິດແນວໃດ ມັກຫຍັງ ຫຼືບໍ່ມັກຫຍັງ. ມີວິທີດຽວທີ່ເຈົ້າຈະຮູ້ໄດ້ກໍຄືໂດຍການສຶກສາຄຳພີໄບເບິນພະຄຳຂອງພະອົງ.
ການສຶກສາຄຳພີໄບເບິນເປັນວິທີທີ່ດີທີ່ສຸດທີ່ຊ່ວຍເຮົາໃຫ້ໃກ້ຊິດພະເຈົ້າແລະຮູ້ວ່າພະອົງຕ້ອງການຫຍັງຈາກເຮົາ (ເບິ່ງຂໍ້ 9)d
9. ເຈົ້າຈະສະແດງໃຫ້ເຫັນແນວໃດວ່າເຈົ້າເຫັນຄຸນຄ່າຄຳພີໄບເບິນ?
9 ຮຽນຮູ້ທີ່ຈະເຫັນຄຸນຄ່າຄຳພີໄບເບິນພະຄຳຂອງພະເຈົ້າ. ມີພຽງຄຳພີໄບເບິນເທົ່ານັ້ນທີ່ບອກຄວາມຈິງກ່ຽວກັບພະເຢໂຫວາແລະຈຸດປະສົງຂອງພະອົງທີ່ມີຕໍ່ເຈົ້າ. ເຈົ້າຈະສະແດງໃຫ້ເຫັນແນວໃດວ່າເຈົ້າເຫັນຄຸນຄ່າຄຳພີໄບເບິນ? ໂດຍອ່ານຄຳພີໄບເບິນທຸກມື້ ກຽມບົດຮຽນທີ່ຈະສຶກສາຢ່າງດີ ແລະເອົາສິ່ງທີ່ໄດ້ຮຽນໄປນຳໃຊ້. (ເພງ. 119:97, 99; ຢຮ. 17:17) ເຈົ້າມີຕາຕະລາງການອ່ານພະຄຳພີສ່ວນຕົວບໍ? ແລະເຈົ້າໄດ້ເຮັດຕາມຕາຕະລາງນັ້ນບໍ? ຂໍເຮັດໃຫ້ແນ່ໃຈວ່າເຈົ້າໄດ້ອ່ານຄຳພີໄບເບິນທຸກມື້.
10. ສິ່ງໜຶ່ງທີ່ເຮັດໃຫ້ຄຳພີໄບເບິນເປັນປຶ້ມທີ່ພິເສດຫຼາຍແມ່ນຫຍັງ?
10 ສິ່ງໜຶ່ງທີ່ເຮັດໃຫ້ຄຳພີໄບເບິນເປັນປຶ້ມທີ່ພິເສດຫຼາຍຄື ມີບັນທຶກຂອງພະຍານຮູ້ເຫັນກ່ຽວກັບພະເຢຊູ. ຄຳພີໄບເບິນເປັນບັນທຶກດຽວທີ່ຖືກຕ້ອງເຊິ່ງອະທິບາຍກ່ຽວກັບສິ່ງທີ່ພະເຢຊູເຮັດເພື່ອເຈົ້າ. ເມື່ອເຈົ້າຮຽນສິ່ງທີ່ພະເຢຊູເວົ້າແລະເຮັດ ເຈົ້າກໍຈະຢາກມີສາຍສຳພັນທີ່ດີກັບເພິ່ນ.
11. ເຈົ້າຈະຮຽນຮູ້ທີ່ຈະຮັກພະເຢໂຫວາໄດ້ແນວໃດ?
11 ຮຽນຮູ້ທີ່ຈະຮັກພະເຢຊູ ແລ້ວເຈົ້າຈະຮັກພະເຢໂຫວາຫຼາຍຂຶ້ນ. ຍ້ອນຫຍັງ? ຍ້ອນພະເຢຊູສະທ້ອນໃຫ້ເຫັນຄຸນລັກສະນະຕ່າງໆຂອງພະເຢໂຫວາພໍ່ຂອງເພິ່ນໄດ້ຢ່າງສົມບູນແບບ. (ຢຮ. 14:9) ດັ່ງນັ້ນ ເມື່ອເຈົ້າໄດ້ຮຽນຮູ້ກ່ຽວກັບພະເຢຊູຫຼາຍເທົ່າໃດ ເຈົ້າກໍແຮ່ງຈະຮູ້ຈັກພະເຢໂຫວາແລະຮູ້ບຸນຄຸນພະອົງຫຼາຍຂຶ້ນ. ຂໍໃຫ້ຄິດເຖິງຄວາມເຫັນອົກເຫັນໃຈທີ່ພະເຢຊູສະແດງຕໍ່ຄົນທີ່ຄົນອື່ນມັກດູຖູກ ເຊັ່ນ: ຄົນທຸກຍາກ ຄົນເຈັບປ່ວຍ ແລະຄົນດ້ອຍໂອກາດ. ນອກຈາກນັ້ນ ລອງຄິດເບິ່ງວ່າຕອນທີ່ເຈົ້າເຮັດຕາມຄຳແນະນຳຂອງພະເຢຊູ ແລ້ວຊີວິດຂອງເຈົ້າດີຂຶ້ນແນວໃດ.—ມທ. 5:1-11; 7:24-27
12. ເມື່ອເຈົ້າຮຽນຮູ້ກ່ຽວກັບພະເຢຊູ ເຈົ້າອາດຖືກກະຕຸ້ນໃຫ້ເຮັດຫຍັງ?
12 ເຈົ້າຄືຊິຮັກພະເຢຊູຫຼາຍຂຶ້ນ ຖ້າເຈົ້າຄິດຕຶກຕອງເຖິງການເສຍສະລະຂອງເພິ່ນທີ່ເຮັດໃຫ້ເຮົາທຸກຄົນໄດ້ຮັບການໃຫ້ອະໄພບາບ. (ມທ. 20:28) ເມື່ອເຈົ້າຮູ້ວ່າພະເຢຊູ ເຕັມໃຈຕາຍເພື່ອເຈົ້າ ເຈົ້າອາດຮູ້ສຶກຖືກກະຕຸ້ນໃຫ້ກັບໃຈແລະຂໍພະເຢໂຫວາຍົກໂທດໃຫ້ເຈົ້າ. (ກຈກ. 3:19, 20; 1 ຢຮ. 1:9) ແລະແຮ່ງເຈົ້າຮັກພະເຢຊູແລະພະເຢໂຫວາຫຼາຍເທົ່າໃດ ເຈົ້າກໍແຮ່ງຢາກຢູ່ກັບຄົນທີ່ຮັກພວກເພິ່ນຄືກັນ.
13. ພະເຢໂຫວາໄດ້ຈັດກຽມຫຍັງໃຫ້ເຈົ້າ?
13 ຮຽນຮູ້ທີ່ຈະຮັກຄອບຄົວຂອງພະເຢໂຫວາ. ຄອບຄົວແລະໝູ່ເກົ່າຂອງເຈົ້າທີ່ບໍ່ໄດ້ເຊື່ອຖືພະເຢໂຫວາອາດບໍ່ເຂົ້າໃຈວ່າເປັນຫຍັງເຈົ້າຈຶ່ງຢາກອຸທິດຊີວິດໃຫ້ພະອົງ. ພວກເຂົາອາດເຖິງຂັ້ນຕໍ່ຕ້ານເຈົ້າ. ແຕ່ພະເຢໂຫວາຈະຊ່ວຍເຈົ້າໂດຍຈັດກຽມໃຫ້ເຈົ້າມີພີ່ນ້ອງຊາຍຍິງໃນປະຊາຄົມເຊິ່ງເປັນຄືກັບຄອບຄົວ. ຖ້າເຈົ້າຢູ່ໃກ້ຊິດກັບຄອບຄົວດ້ານຄວາມເຊື່ອນີ້ ເຈົ້າຈະໄດ້ຮັບຄວາມຮັກແລະການຊ່ວຍເຫຼືອທີ່ຈຳເປັນ. (ມຣກ. 10:29, 30; ຮຣ. 10:24, 25) ເມື່ອເຖິງເວລາ ຄົນໃນຄອບຄົວຂອງເຈົ້າກໍອາດຈະເຂົ້າມາຮັບໃຊ້ພະເຢໂຫວາແລະໃຊ້ຊີວິດຕາມມາດຕະຖານຂອງພະອົງຄືກັນ.—1 ປຕ. 2:12
14. ຕາມ 1 ໂຢຮັນ 5:3 ການເຮັດຕາມມາດຕະຖານຂອງພະເຢໂຫວາເຮັດໃຫ້ເຈົ້າຮູ້ສຶກແນວໃດ?
14 ຮຽນຮູ້ທີ່ຈະນັບຖືແລະເຮັດຕາມມາດຕະຖານຂອງພະເຢໂຫວາ. ກ່ອນທີ່ຈະມາຮູ້ຈັກພະເຢໂຫວາ ເຈົ້າອາດຕັ້ງມາດຕະຖານເອົາເອງວ່າອັນໃດຖືກອັນໃດຜິດ ແຕ່ຕອນນີ້ເຈົ້າກໍເຫັນວ່າມາດຕະຖານຂອງພະເຢໂຫວາດີກວ່າຫຼາຍ. (ເພງ. 1:1-3; ອ່ານ 1 ໂຢຮັນ 5:3) ຂໍໃຫ້ຄິດກ່ຽວກັບຄຳແນະນຳທີ່ຄຳພີໄບເບິນໃຫ້ຜູ້ເປັນຜົວ ເມຍ ພໍ່ແມ່ ແລະລູກ. (ອຟຊ. 5:22–6:4) ເມື່ອເຈົ້າເຮັດຕາມຄຳແນະນຳນີ້ ເຈົ້າເຫັນບໍວ່າຄອບຄົວຂອງເຈົ້າມີຄວາມສຸກຫຼາຍຂຶ້ນ? ເມື່ອເຈົ້າເຮັດຕາມຄຳແນະນຳກ່ຽວກັບການເລືອກໝູ່ ນິດໄສຂອງເຈົ້າດີຂຶ້ນບໍ? ແລະເຈົ້າຮູ້ສຶກມີຄວາມສຸກຫຼາຍຂຶ້ນບໍ? (ສຸພາ. 13:20; 1 ກຣ. 15:33) ແນ່ນອນ ຄຳຕອບຂອງຄຳຖາມເຫຼົ່ານັ້ນກໍຄື ແມ່ນແລ້ວ.
15. ເຈົ້າຈະເຮັດແນວໃດຖ້າເຈົ້າຢາກຮູ້ວິທີໃຊ້ຫຼັກການໃນຄຳພີໄບເບິນ?
15 ບາງເທື່ອເຈົ້າອາດຮູ້ສຶກວ່າຍາກທີ່ຈະຮູ້ວ່າຈະໃຊ້ຫຼັກການໃນຄຳພີໄບເບິນແນວໃດ. ນີ້ເປັນເຫດຜົນທີ່ພະເຢໂຫວາໃຊ້ອົງການຂອງພະອົງຈັດໃຫ້ມີສື່ແລະປຶ້ມຕ່າງໆທີ່ອະທິບາຍຄຳພີໄບເບິນ ເຊິ່ງຈະຊ່ວຍເຈົ້າໃຫ້ແຍກອອກວ່າອັນໃດຖືກອັນໃດຜິດ. (ຮຣ. 5:13, 14) ເມື່ອເຈົ້າອ່ານແລະສຶກສາສິ່ງເຫຼົ່ານີ້ ເຈົ້າກໍຈະເຫັນວ່າຄຳແນະນຳນັ້ນໃຊ້ໄດ້ດີ ແລະໄດ້ຮັບປະໂຫຍດແທ້ ແລະເຈົ້າກໍອາດຮູ້ສຶກຢາກເຂົ້າມາໃນອົງການຂອງພະເຢໂຫວາ.
16. ພະເຢໂຫວາໄດ້ຈັດລະບຽບປະຊາຊົນຂອງພະອົງແນວໃດ?
16 ຮຽນຮູ້ທີ່ຈະຮັກແລະສະໜັບສະໜູນອົງການຂອງພະເຢໂຫວາ. ພະເຢໂຫວາໄດ້ຈັດລະບຽບປະຊາຊົນຂອງພະອົງໃຫ້ຢູ່ໃນປະຊາຄົມຕ່າງໆ ແລະໃຫ້ພະເຢຊູ ລູກຊາຍຂອງພະອົງເປັນຜູ້ນຳພວກເຂົາ. (ອຟຊ. 1:22; 5:23) ພະເຢຊູໄດ້ແຕ່ງຕັ້ງພີ່ນ້ອງຊາຍທີ່ຖືກເຈີມກຸ່ມນ້ອຍໆກຸ່ມໜຶ່ງໃຫ້ເປັນຜູ້ນຳໃນການຈັດຕັ້ງວຽກງານທີ່ເພິ່ນຕ້ອງການເຮັດໃນທຸກມື້ນີ້. ພະເຢຊູເວົ້າເຖິງຜູ້ຖືກເຈີມກຸ່ມນີ້ວ່າເປັນ “ທາດທີ່ສັດຊື່ແລະສຸຂຸມ” ແລະໜ້າທີ່ຮັບຜິດຊອບຂອງພວກເຂົາກໍຄືຊ່ວຍເຈົ້າໃຫ້ໃກ້ຊິດພະເຈົ້າແລະປົກປ້ອງສາຍສຳພັນຂອງເຈົ້າກັບພະອົງ. (ມທ. 24:45-47) ວິທີໜຶ່ງທີ່ທາດສັດຊື່ແລະສຸຂຸມເບິ່ງແຍງເຈົ້າກໍຄື ໂດຍເຮັດໃຫ້ໝັ້ນໃຈວ່າພີ່ນ້ອງຊາຍທີ່ມີຄຸນສົມບັດເປັນຜູ້ດູແລສາມາດຊີ້ນຳແລະປົກປ້ອງເຈົ້າໄດ້. (ເອຊາ. 32:1, 2; ຮຣ. 13:17; 1 ປຕ. 5:2, 3) ຜູ້ດູແລເຕັມໃຈທີ່ຈະເຮັດສຸດຄວາມສາມາດເພື່ອເຈົ້າ ໃຫ້ກຳລັງໃຈເຈົ້າ ແລະຊ່ວຍເຈົ້າໃຫ້ໃກ້ຊິດກັບພະເຢໂຫວາຫຼາຍຂຶ້ນ. ແຕ່ໜຶ່ງໃນສິ່ງທີ່ສຳຄັນທີ່ສຸດທີ່ພວກເຂົາເຮັດໄດ້ເພື່ອເຈົ້າກໍຄື ຊ່ວຍເຈົ້າສອນຄົນອື່ນໃຫ້ຮຽນຮູ້ກ່ຽວກັບພະເຢໂຫວາ.—ອຟຊ. 4:11-13
17. ຕາມໂຣມ 10:10, 13, 14 ເປັນຫຍັງເຮົາຈຶ່ງບອກຄົນອື່ນກ່ຽວກັບເລື່ອງພະເຢໂຫວາ?
17 ຊ່ວຍຄົນອື່ນໃຫ້ຮັກພະເຢໂຫວາ. ພະເຢຊູສັ່ງຜູ້ຕິດຕາມເພິ່ນໃຫ້ໄປສອນຄົນອື່ນເລື່ອງພະເຢໂຫວາ. (ມທ. 28:19, 20) ເຈົ້າອາດເຮັດຕາມຄຳສັ່ງນັ້ນຍ້ອນຮູ້ສຶກວ່າມັນເປັນໜ້າທີ່. ແຕ່ເມື່ອເຈົ້າຮັກພະເຢໂຫວາຫຼາຍຂຶ້ນ ເຈົ້າຈະຮູ້ສຶກຄືກັບອັກຄະສາວົກເປໂຕແລະໂຢຮັນທີ່ບອກວ່າ: “ພວກເຮົາບໍ່ສາມາດເຊົາເວົ້າເລື່ອງທີ່ໄດ້ເຫັນແລະໄດ້ຍິນນັ້ນ.” (ກຈກ. 4:20) ຖ້າເຮົາສາມາດຊ່ວຍຄົນໃຫ້ເຂົ້າມາຮັກພະເຢໂຫວາ ເຮົາຈະມີຄວາມສຸກຫຼາຍແທ້ໆ. ລອງນຶກພາບເບິ່ງວ່າຟີລິບຮູ້ສຶກມີຄວາມສຸກຫຼາຍສ່ຳໃດເມື່ອລາວໄດ້ຊ່ວຍຊາວເອທິໂອເປຍໃຫ້ຮຽນຮູ້ຄວາມຈິງໃນພະຄຳພີແລະຮັບບັບເຕມາ. ເມື່ອເຈົ້າຮຽນແບບຟີລິບແລະເຊື່ອຟັງຄຳສັ່ງຂອງພະເຢຊູທີ່ໃຫ້ປະກາດ ເຈົ້າກໍສະແດງໃຫ້ເຫັນວ່າເຈົ້າຢາກເປັນພະຍານພະເຢໂຫວາ. (ອ່ານໂຣມ 10:10, 13, 14) ເມື່ອເຖິງຈຸດນັ້ນ ເຈົ້າກໍອາດຖາມຄຳຖາມດຽວກັບຊາວເອທິໂອເປຍທີ່ວ່າ: “ມີຫຍັງທີ່ເຮັດໃຫ້ຂ້ອຍຮັບບັບເຕມາບໍ່ໄດ້?”—ກຈກ. 8:36
18. ເຮົາຈະຮຽນຫຍັງໃນບົດຄວາມຕໍ່ໄປ?
18 ເມື່ອເຈົ້າຕັດສິນໃຈຮັບບັບເຕມາ ເຈົ້າກໍກຳລັງເຮັດການຕັດສິນໃຈທີ່ສຳຄັນທີ່ສຸດໃນຊີວິດ. ເນື່ອງຈາກການຮັບບັບເຕມາເປັນບາດກ້າວທີ່ສຳຄັນ ດັ່ງນັ້ນ ເຈົ້າຕ້ອງຄິດຢ່າງຄັກແນ່ວ່າການຮັບບັບເຕມາກ່ຽວຂ້ອງກັບຫຍັງ ເຊັ່ນ: ເຈົ້າຕ້ອງຮູ້ຫຍັງແດ່ກ່ຽວກັບການຮັບບັບເຕມາ? ເຈົ້າຕ້ອງເຮັດຫຍັງກ່ອນແລະຫຼັງຮັບບັບເຕມາ? ບົດຄວາມຕໍ່ໄປຈະຕອບຄຳຖາມເຫຼົ່ານີ້.
ເພງ 2 ຊື່ຂອງພະອົງຄືເຢໂຫວາ
a ບາງຄົນທີ່ຮັກພະເຢໂຫວາບໍ່ແນ່ໃຈວ່າພວກເຂົາພ້ອມຫຼືບໍ່ທີ່ຈະຮັບບັບເຕມາແລະເຂົ້າມາເປັນພະຍານພະເຢໂຫວາ. ເຈົ້າຮູ້ສຶກແບບນີ້ບໍ? ບົດຄວາມນີ້ຈະຊ່ວຍເຈົ້າໃຫ້ຄິດເຖິງບາງສິ່ງທີ່ເຈົ້າສາມາດເຮັດໄດ້ເພື່ອຊ່ວຍເຈົ້າໃຫ້ຮັບບັບເຕມາ.
b ແຕ່ລະຄົນບໍ່ຄືກັນ ດັ່ງນັ້ນ ບາງຄົນອາດບໍ່ໄດ້ໃຊ້ຄຳແນະນຳຕາມລຳດັບທີ່ສະເໜີໃນບົດຄວາມນີ້.
c ເບິ່ງຕົວຢ່າງເພີ່ມເຕີມ ໃນຈຸນລະສານມີຜູ້ສ້າງສິ່ງທີ່ມີຊີວິດບໍ? ແລະຕົ້ນກຳເນີດຊີວິດ—ຫ້າຄຳຖາມທີ່ໜ້າຄິດ (ພາສາໄທ).
d ຄຳອະທິບາຍຮູບພາບ: ພີ່ນ້ອງຍິງຄົນໜຶ່ງໃຫ້ແຜ່ນພັບກັບຜູ້ຍິງຄົນໜຶ່ງທີ່ລາວພົບຕອນຊື້ເຄື່ອງ.