ບົດຄວາມສຶກສາທີ 49
ເຮົາເຊື່ອວ່າການຄືນມາຈາກຕາຍຈະເກີດຂຶ້ນແທ້!
“ຂ້ອຍກໍມີຄວາມຫວັງໃນພະເຈົ້າຄື . . . ທັງຄົນດີແລະຄົນຊົ່ວຈະຄືນມາຈາກຕາຍ.”—ກຈກ. 24:15
ເພງ 151 ພະອົງຈະເອີ້ນ
ໃຈຄວາມສຳຄັນa
1-2. ຜູ້ຮັບໃຊ້ຂອງພະເຢໂຫວາມີຄວາມຫວັງທີ່ດີເລື່ອງຫຍັງ?
ຄວາມຫວັງເປັນເລື່ອງສຳຄັນຫຼາຍ. ບາງຄົນຫວັງວ່າຈະມີຊີວິດຄອບຄົວທີ່ມີຄວາມສຸກ ບາງຄົນຫວັງວ່າລູກຈະເປັນຄົນດີ ແລະບາງຄົນກໍຫວັງວ່າຈະເຊົາຈາກພະຍາດທີ່ຮ້າຍແຮງ. ເຮົາກໍຫວັງແບບນີ້ຄືກັນ ແຕ່ເຮົາກໍຫວັງຫຼາຍກວ່ານັ້ນເພາະເຮົາຫວັງວ່າຈະມີຊີວິດຕະຫຼອດໄປ ແລະຫວັງວ່າຄົນທີ່ເຮົາຮັກເຊິ່ງຕາຍໄປແລ້ວຈະກັບມາມີຊີວິດອີກ.
2 ອັກຄະສາວົກໂປໂລບອກວ່າ: “ຂ້ອຍກໍມີຄວາມຫວັງໃນພະເຈົ້າຄື . . . ທັງຄົນດີແລະຄົນຊົ່ວຈະຄືນມາຈາກຕາຍ.” (ກຈກ. 24:15) ໂປໂລບໍ່ແມ່ນຜູ້ດຽວທີ່ເວົ້າເຖິງຄວາມຫວັງເລື່ອງການຄືນມາຈາກຕາຍ ເພາະໂຢບກໍເວົ້າເລື່ອງນີ້ຄືກັນ. ລາວໝັ້ນໃຈວ່າພະເຈົ້າຈະຈື່ລາວ ແລະປຸກລາວໃຫ້ກັບມາມີຊີວິດອີກ.—ໂຢບ 14:7-10, 12-15
3. 1 ໂກຣິນໂທບົດ 15 ຊ່ອຍເຮົາແນວໃດ?
3 “ການຄືນມາຈາກຕາຍ” ເປັນສ່ວນໜຶ່ງຂອງ “ຮາກຖານ” ຫຼື “ຫຼັກຄຳສອນເບື້ອງຕົ້ນ” ຂອງຄລິດສະຕຽນ. (ຮຣ. 6:1, 2) ໂປໂລຂຽນເລື່ອງນີ້ໄວ້ໃນ 1 ໂກຣິນໂທບົດ 15. ສິ່ງທີ່ລາວຂຽນຕ້ອງໃຫ້ກຳລັງໃຈຄລິດສະຕຽນໃນສະໄໝນັ້ນແທ້ໆ. ແລະບົດນັ້ນຍັງໃຫ້ກຳລັງໃຈເຮົາ ແລະຊ່ອຍເຮົາໃຫ້ໝັ້ນໃຈຫຼາຍຂຶ້ນວ່າການຄືນມາຈາກຕາຍຈະເກີດຂຶ້ນແທ້.
4. ເປັນຫຍັງເຮົາຈຶ່ງໝັ້ນໃຈວ່າ ຄົນທີ່ເຮົາຮັກທີ່ຕາຍໄປຈະກັບມາມີຊີວິດອີກ?
4 ການຄືນມາຈາກຕາຍຂອງພະເຢຊູເຮັດໃຫ້ເຮົາໝັ້ນໃຈວ່າຖ້າຄົນທີ່ເຮົາຮັກຕາຍ ເຂົາເຈົ້າກໍຈະຖືກປຸກໃຫ້ກັບມາມີຊີວິດອີກ. ການຄືນມາຈາກຕາຍຂອງພະເຢຊູເປັນສ່ວນໜຶ່ງຂອງ “ຂ່າວດີ” ທີ່ໂປໂລປະກາດຢູ່ເມືອງໂກຣິນໂທ. (1 ກຣ. 15:1, 2) ເລື່ອງນີ້ສຳຄັນຫຼາຍເຖິງຂັ້ນວ່າຖ້າເຮົາບໍ່ເຊື່ອເລື່ອງການຄືນມາຈາກຕາຍ ຄວາມເຊື່ອຂອງເຮົາກໍບໍ່ມີປະໂຫຍດຫຍັງເລີຍ. (1 ກຣ. 15:17) ດັ່ງນັ້ນ ການຄືນມາຈາກຕາຍຂອງພະເຢຊູຈຶ່ງເຮັດໃຫ້ເຮົາເຊື່ອວ່າຈະມີການຄືນມາຈາກຕາຍ.
5-6. 1 ໂກຣິນໂທ 15:3, 4 ເຮັດໃຫ້ເຮົາໝັ້ນໃຈໃນເລື່ອງຫຍັງ?
5 ເມື່ອໂປໂລເວົ້າເຖິງການຄືນມາຈາກຕາຍ ລາວໄດ້ເວົ້າເຖິງສາມສິ່ງທີ່ສຳຄັນຄື: (1) “ພະຄລິດຍອມຕາຍເພື່ອໄຖ່ບາບໃຫ້ພວກເຮົາ” (2) ເພິ່ນ “ຖືກຝັງໄວ້” ແລະ (3) “ໃນມື້ທີສາມເພິ່ນກໍຖືກປຸກໃຫ້ຄືນມາຈາກຕາຍຕາມທີ່ບອກໄວ້ໃນພະຄຳພີ.”—ອ່ານ 1 ໂກຣິນໂທ 15:3, 4
6 ການທີ່ພະເຢຊູຕາຍ ຖືກຝັງ ແລະຖືກປຸກໃຫ້ຄືນມາມີຄວາມໝາຍແນວໃດສຳລັບເຮົາ? ຜູ້ພະຍາກອນເອຊາຢາບອກລ່ວງໜ້າວ່າ: ເມຊີອາຈະຖືກ “ພາເອົາໄປຈາກຜູ້ຄົນທີ່ມີຊີວິດຢູ່” ແລະ “ມີຄົນຈັດຫຼຸມສົບຂອງເພິ່ນໄວ້ກັບຄົນຊົ່ວ.” ແລ້ວເມຊີອາຈະເຮັດຫຍັງອີກ? ເອຊາຢາເວົ້າຕື່ມວ່າ: ເພິ່ນຈະ “ຮັບເອົາບາບຂອງຄົນຈຳນວນຫຼາຍ.” ພະເຢຊູກໍໄດ້ຮັບເອົາບາບຕອນທີ່ເພິ່ນເປັນຄ່າໄຖ່. (ເອຊາ. 53:8, 9, 12, ລ.ມ.; ມທ. 20:28; ຣມ. 5:8) ດັ່ງນັ້ນ ເມື່ອພະເຢຊູຕາຍ ຖືກຝັງ ແລະຖືກປຸກໃຫ້ຄືນມາເຮັດໃຫ້ເຮົາໝັ້ນໃຈວ່າໃນອະນາຄົດເຮົາຈະບໍ່ມີບາບແລະບໍ່ຕາຍ ແລະຈະໄດ້ເຫັນຄົນທີ່ເຮົາຮັກທີ່ຕາຍໄປແລ້ວໄດ້ກັບມາມີຊີວິດອີກ.
ຫຼັກຖານຈາກພະຍານຫຼາຍຄົນ
7-8. ອັນໃດຊ່ອຍໃຫ້ຄລິດສະຕຽນໝັ້ນໃຈວ່າພະເຢຊູຄືນມາຈາກຕາຍແທ້?
7 ຄວາມຫວັງເລື່ອງການຄືນມາຈາກຕາຍຂອງເຮົາຂຶ້ນຢູ່ກັບການຄືນມາຈາກຕາຍຂອງພະເຢຊູ. ດັ່ງນັ້ນເຮົາຕ້ອງໝັ້ນໃຈແທ້ໆວ່າພະເຢຊູຄືນມາຈາກຕາຍ. ເປັນຫຍັງເຮົາຈຶ່ງໝັ້ນໃຈວ່າພະເຢໂຫວາໄດ້ປຸກພະເຢຊູໃຫ້ຄືນມາຈາກຕາຍ?
8 ມີພະຍານຫຼາຍຄົນທີ່ເຫັນວ່າພະເຢຊູໄດ້ຄືນມາຈາກຕາຍ. (1 ກຣ. 15:5-7) ໂປໂລບອກວ່າ ພະຍານຄົນທຳອິດທີ່ເຫັນພະເຢຊູກໍຄືອັກຄະສາວົກເປໂຕ (ເກຟາ) ແລະພວກລູກສິດກຸ່ມໜຶ່ງກໍຢັ້ງຢືນວ່າ ເປໂຕໄດ້ເຫັນພະເຢຊູຄືນມາຈາກຕາຍແທ້. (ລກ. 24:33, 34) ນອກຈາກນັ້ນ ພວກອັກຄະສາວົກກໍໄດ້ເຫັນພະເຢຊູຫຼັງຈາກທີ່ເພິ່ນຄືນມາຈາກຕາຍ. ຈາກນັ້ນພະເຢຊູກໍ “ປາກົດຕົວຕໍ່ພີ່ນ້ອງຫຼາຍກວ່າ 500 ຄົນໃນເວລາດຽວກັນ” ເຊິ່ງອາດຈະເປັນເຫດການທີ່ເກີດຂຶ້ນໃນຄາລີເລ ເຊິ່ງບັນທຶກໄວ້ໃນມັດທາຍ 28:16-20. ພະເຢຊູຍັງໄດ້ “ປາກົດຕົວໃຫ້ຢາໂກໂບ” ຜູ້ເປັນນ້ອງຕ່າງພໍ່ຂອງເພິ່ນໄດ້ເຫັນເຊິ່ງຕອນນັ້ນລາວບໍ່ໄດ້ເຊື່ອວ່າພະເຢຊູເປັນເມຊີອາ. (ຢຮ. 7:5) ແຕ່ເມື່ອເຫັນພະເຢຊູ ລາວກໍເຊື່ອ. ຕໍ່ມາໃນປີ ຄ.ສ 55 ຕອນທີ່ໂປໂລຂຽນຈົດໝາຍນີ້ ພະຍານຫຼາຍຄົນທີ່ເຫັນພະເຢຊູຄືນມາຈາກຕາຍກໍຍັງມີຊີວິດຢູ່. ດັ່ງນັ້ນຖ້າມີໃຜສົງໄສໃນເລື່ອງນີ້ ກໍສາມາດໄປຖາມເຂົາເຈົ້າໄດ້.
9. ຕາມກິດຈະການ 9:3-5 ສິ່ງທີ່ເກີດຂຶ້ນກັບໂປໂລໃຫ້ຫຼັກຖານເພີ່ມເຕີມແນວໃດວ່າພະເຢຊູຄືນມາຈາກຕາຍ?
9 ຕໍ່ມາພະເຢຊູກໍປາກົດຕົວຕໍ່ໂປໂລ. (1 ກຣ. 15:8) ຕອນທີ່ໂປໂລ (ໂຊໂລ) ເດີນທາງໄປເມືອງດາມາກັດ ລາວກໍໄດ້ເຫັນແສງຈາກຟ້າແລະໄດ້ຍິນສຽງພະເຢຊູເວົ້າກັບລາວ. (ອ່ານກິດຈະການ 9:3-5) ສິ່ງທີ່ເກີດຂຶ້ນກັບໂປໂລເປັນຫຼັກຖານເພີ່ມອີກວ່າພະເຢຊູຄືນມາຈາກຕາຍແທ້ໆ.—ກຈກ. 26:12-15
10. ການທີ່ໂປໂລເຊື່ອວ່າພະເຢຊູຄືນມາຈາກຕາຍກະຕຸ້ນລາວໃຫ້ເຮັດຫຍັງແດ່?
10 ບາງຄົນສົນໃຈສິ່ງທີ່ໂປໂລເວົ້າເປັນພິເສດ ເພາະກ່ອນໜ້ານັ້ນລາວເຄີຍຂົ່ມເຫງຄລິດສະຕຽນ. ຫຼັງຈາກທີ່ໂປໂລເຊື່ອວ່າພະເຢຊູຄືນມາຈາກຕາຍ ລາວກໍເຮັດວຽກປະກາດເອົາແທ້ເອົາວ່າເພື່ອຊ່ອຍຄົນໃຫ້ເຂົ້າໃຈຄວາມຈິງ. ຕອນທີ່ລາວປະກາດເລື່ອງທີ່ພະເຢຊູຄືນມາຈາກຕາຍ ລາວທັງຖືກຂ້ຽນຕີ ຕິດຄຸກ ແລະເຮືອແຕກ. ໂປໂລໝັ້ນໃຈແທ້ໆວ່າພະເຢຊູຄືນມາຈາກຕາຍ. (1 ກຣ. 15:9-11; 2 ກຣ. 11:23-27) ລາວເຊື່ອເຖິງຂັ້ນວ່າຍອມສ່ຽງຊີວິດເພື່ອຈະປະກາດເລື່ອງນີ້. ຫຼັກຖານນີ້ເຮັດໃຫ້ເຈົ້າໝັ້ນໃຈວ່າ ພະເຢຊູໄດ້ຄືນມາຈາກຕາຍແທ້ແມ່ນບໍ? ຄັນຊັ້ນເລື່ອງນີ້ກໍເຮັດໃຫ້ເຈົ້າເຊື່ອຫຼາຍຂຶ້ນແມ່ນບໍວ່າຈະມີການຄືນມາຈາກຕາຍ?
ຄວາມເຊື່ອທີ່ຜິດໆ
11. ເປັນຫຍັງຄລິດສະຕຽນບາງຄົນໃນເມືອງໂກຣິນໂທຈຶ່ງມີຄວາມເຊື່ອຜິດໆເລື່ອງການຄືນມາຈາກຕາຍ?
11 ຄລິດສະຕຽນບາງຄົນໃນເມືອງໂກຣິນໂທມີຄວາມເຊື່ອຜິດໆເລື່ອງການຄືນມາຈາກຕາຍ. ບາງຄົນເຖິງຂັ້ນບອກວ່າ “ການຄືນມາຈາກຕາຍບໍ່ມີ.” ຍ້ອນຫຍັງ? (1 ກຣ. 15:12) ນັກປັດຊະຍາຄົນກຣີກທີ່ຢູ່ໃນເມືອງອາແຖນໄດ້ເວົ້າເຍີ້ຍເລື່ອງການຄືນມາຈາກຕາຍຂອງພະເຢຊູ. ເລື່ອງນີ້ເຮັດໃຫ້ຄລິດສະຕຽນບາງຄົນທີ່ຢູ່ໃນເມືອງໂກຣິນໂທກໍຄິດແບບນີ້ຄືກັນ. (ກຈກ. 17:18, 31, 32) ສ່ວນບາງຄົນກໍຄິດວ່າ ການຄືນມາຈາກຕາຍເປັນການປຽບທຽບຊື່ໆ. ເຂົາເຈົ້າຄິດວ່າຄົນທີ່ມີບາບກໍຄືກັບ “ຄົນຕາຍ” ແຕ່ເມື່ອມາເປັນຄລິດສະຕຽນກໍສ່ຳກັບວ່າ “ຄືນມາຈາກຕາຍແລ້ວ.” ແຕ່ບໍ່ວ່າຈະເປັນເຫດຜົນໃດ ເມື່ອບໍ່ເຊື່ອເລື່ອງການຄືນມາຈາກຕາຍ ຄວາມເຊື່ອນັ້ນກໍບໍ່ມີປະໂຫຍດ. ເພາະຖ້າພະເຢຊູບໍ່ຖືກປຸກໃຫ້ຄືນມາຈາກຕາຍ ກໍຈະບໍ່ມີການຈ່າຍຄ່າໄຖ່ ແລະເຮົາທຸກຄົນກໍຈະຍັງມີບາບຄືເກົ່າ. ດັ່ງນັ້ນຄົນທີ່ບໍ່ເຊື່ອເລື່ອງການຄືນມາຈາກຕາຍກໍບໍ່ມີຄວາມຫວັງຫຍັງເລີຍ.—1 ກຣ. 15:13-19; ຮຣ. 9:12, 14
12. ຕາມ 1 ເປໂຕ 3:18, 22 ການຄືນມາຈາກຕາຍຂອງພະເຢຊູຕ່າງຈາກການຄືນມາຈາກຕາຍຂອງຄົນກ່ອນໜ້ານີ້ແນວໃດ?
12 ໂປໂລຮູ້ດີວ່າ “ພະຄລິດຖືກປຸກໃຫ້ຄືນມາຈາກຕາຍ.” ແຕ່ການຄືນມາຈາກຕາຍຂອງພະເຢຊູດີກວ່າການຄືນມາຈາກຕາຍຂອງຄົນກ່ອນໜ້ານີ້ ຍ້ອນເຂົາເຈົ້າຖືກປຸກໃຫ້ຄືນມາຈາກຕາຍແລ້ວ ແຕ່ກໍຍັງຕ້ອງຕາຍອີກ. ໂປໂລບອກວ່າພະເຢຊູ “ເປັນຄົນທຳອິດທີ່ຖືກປຸກໃຫ້ຄືນມາຈາກຕາຍ.” ເປັນຄົນທຳອິດແນວໃດ? ກໍຍ້ອນວ່າພະເຢຊູເປັນຄົນທຳອິດທີ່ຖືກປຸກໃຫ້ມີຮ່າງກາຍສຳລັບສະຫວັນ ແລະເປັນຄົນທຳອິດທີ່ຖືກປຸກໃຫ້ໄປສະຫວັນ.—1 ກຣ. 15:20; ກຈກ. 26:23; ອ່ານ 1 ເປໂຕ 3:18, 22
ຄົນທີ່ “ຈະມີຊີວິດອີກ”
13. ໂປໂລສົມທຽບວ່າພະເຢຊູຕ່າງຈາກອາດາມແນວໃດ?
13 ການຕາຍຂອງຄົນຜູ້ໜຶ່ງຈະເຮັດໃຫ້ຫຼາຍລ້ານຄົນມີຊີວິດໄດ້ແນວໃດ? ໂປໂລໄດ້ໃຫ້ຄຳຕອບທີ່ຈະແຈ້ງໃນເລື່ອງນີ້. ລາວໄດ້ສົມທຽບສິ່ງທີ່ອາດາມເຮັດກັບມະນຸດແລະສິ່ງທີ່ພະເຢຊູເຮັດເພື່ອມະນຸດ. ໂປໂລບອກວ່າ: “ຄວາມຕາຍເກີດຂຶ້ນຍ້ອນມະນຸດຄົນດຽວ.” ເມື່ອອາດາມເຮັດບາບໂດຍບໍ່ເຊື່ອຟັງ ລາວໄດ້ເຮັດໃຫ້ຕົວເອງແລະລູກຫຼານຕ້ອງເຈິກັບຄວາມທຸກແລະຕ້ອງຕາຍ. ແຕ່ເມື່ອພະເຢໂຫວາປຸກພະເຢຊູໃຫ້ຄືນມາຈາກຕາຍ ເຮົາກໍມີຄວາມຫວັງທີ່ດີໃນອະນາຄົດ. “ການຄືນມາຈາກຕາຍກໍເກີດຂຶ້ນຍ້ອນມະນຸດຄົນດຽວ [ພະເຢຊູ] ຄືກັນ. ໂປໂລຍັງໃຫ້ເຫດຜົນອີກວ່າ: “ທຸກຄົນຕາຍຍ້ອນອາດາມ ແລະທຸກຄົນກໍຈະມີຊີວິດອີກຍ້ອນພະຄລິດ.”—1 ກຣ. 15:21, 22
14. ອາດາມຈະຖືກປຸກໃຫ້ຄືນມາຈາກຕາຍບໍ? ຂໍໃຫ້ອະທິບາຍ
14 ໂປໂລໝາຍຄວາມວ່າແນວໃດເມື່ອລາວເວົ້າວ່າ: “ທຸກຄົນ ຕາຍຍ້ອນອາດາມ”? ໂປໂລໝາຍຄວາມວ່າ ລູກຫຼານຂອງອາດາມໄດ້ຮັບບາບແລະເປັນຄົນບໍ່ສົມບູນແບບຈຶ່ງຕ້ອງຕາຍ. (ຣມ. 5:12) ອາດາມບໍ່ໄດ້ຈັດຢູ່ໃນກຸ່ມຄົນທີ່ “ຈະມີຊີວິດອີກ” ເພາະລາວເປັນຄົນທີ່ສົມບູນແບບແຕ່ຕັ້ງໃຈບໍ່ເຊື່ອຟັງພະເຈົ້າ. ດັ່ງນັ້ນລາວຈຶ່ງບໍ່ໄດ້ຮັບປະໂຫຍດຈາກຄ່າໄຖ່ຂອງພະຄລິດ. ອາດາມເປັນຄືກັບຜູ້ທີ່ “ລູກມະນຸດ” ຈະຕັດສິນວ່າເປັນ “ແບ້” ເຊິ່ງຈະ “ຖືກທຳລາຍຕະຫຼອດໄປ.” —ມທ. 25:31-33, 46; ຮຣ. 5:9
ພະເຢຊູເປັນຜູ້ທຳອິດທີ່ຖືກປຸກໃຫ້ຂຶ້ນໄປສະຫວັນ (ເບິ່ງຂໍ້ 15-16)b
15. “ທຸກຄົນ” ທີ່ຈະມີຊີວິດອີກໝາຍເຖິງໃຜ?
15 ໂປໂລບອກວ່າ “ທຸກຄົນກໍຈະມີຊີວິດອີກຍ້ອນພະຄລິດ.” (1 ກຣ. 15:22) ໂປໂລໄດ້ຂຽນຈົດໝາຍເຖິງຄລິດສະຕຽນຜູ້ຖືກເຈີມໃນເມືອງໂກຣິນໂທ ຜູ້ທີ່ຈະຖືກປຸກຄືນມາຈາກຕາຍແລ້ວໄປສະຫວັນ. ຄລິດສະຕຽນເຫຼົ່ານັ້ນ “ຖືກຊຳລະໃຫ້ບໍລິສຸດແລະເປັນລູກສິດຂອງພະຄລິດເຢຊູ” ແລະໂປໂລເວົ້າຕື່ມອີກວ່າເຂົາເຈົ້າເປັນ “ລູກສິດຂອງພະຄລິດທີ່ຕາຍໄປແລ້ວ.” (1 ກຣ. 1:2; 15:18; 2 ກຣ. 5:17) ໂປໂລໄດ້ຂຽນຈົດໝາຍອີກສະບັບໜຶ່ງວ່າ: ຄົນທີ່ “ເປັນອັນໜຶ່ງອັນດຽວກັບພະຄລິດໂດຍການຕາຍຄືກັບເພິ່ນ” ກໍຈະ “ເປັນອັນໜຶ່ງອັນດຽວກັບພະຄລິດໂດຍການຄືນມາຈາກຕາຍຄືກັບເພິ່ນ.” (ຣມ. 6:3-5) ພະເຢຊູຖືກປຸກໃຫ້ມີຮ່າງກາຍສຳລັບສະຫວັນແລະຂຶ້ນໄປສະຫວັນ. ດັ່ງນັ້ນທຸກຄົນທີ່ເປັນ “ລູກສິດຂອງພະຄລິດ” ເຊິ່ງກໍຄືຜູ້ຖືກເຈີມກໍຈະຖືກປຸກໃຫ້ມີຮ່າງກາຍສຳລັບສະຫວັນແລະຂຶ້ນໄປສະຫວັນຄືກັນ.
16. ເປັນຫຍັງໂປໂລຈຶ່ງເອີ້ນພະເຢຊູວ່າເປັນຄົນທຳອິດ?
16 ໂປໂລຂຽນວ່າພະເຢຊູ “ເປັນຄົນທຳອິດທີ່ຖືກປຸກໃຫ້ຄືນມາຈາກຕາຍ.” ຢ່າລືມວ່າຄົນອື່ນໆເຊັ່ນ: ລາຊະໂລກໍຖືກປຸກໃຫ້ຄືນມາຈາກຕາຍຢູ່ໃນໂລກນີ້ ແຕ່ພະເຢຊູເປັນຄົນທຳອິດ ທີ່ຖືກປຸກໃຫ້ຄືນມາຈາກຕາຍແລ້ວໄປສະຫວັນ. ນອກຈາກນັ້ນ ທີ່ໂປໂລບອກວ່າພະເຢຊູ “ເປັນຄົນທຳອິດ” ກໍໝາຍຄວາມວ່າຕ້ອງມີຄົນອື່ນທີ່ຖືກປຸກໃຫ້ຄືນມາຈາກຕາຍແລ້ວໄປສະຫວັນຄືກັນ. ພວກອັກຄະສາວົກແລະຄົນອື່ນໆ “ທີ່ເປັນລູກສິດຂອງພະຄລິດ” ຈະຂຶ້ນໄປສະຫວັນຕາມຫຼັງພະເຢຊູ. ແຕ່ເຂົາເຈົ້າກໍຈະຖືກປຸກໃຫ້ຄືນມາຈາກຕາຍແບບດຽວກັນກັບພະເຢຊູໃນເວລາທີ່ເໝາະສົມ.
17. ຜູ້ທີ່ເປັນ “ລູກສິດຂອງພະຄລິດ” ຈະຂຶ້ນໄປສະຫວັນຕອນໃດ?
17 ການຄືນມາຈາກຕາຍແລ້ວໄປສະຫວັນຂອງຄົນ “ທີ່ເປັນລູກສິດຂອງພະຄລິດ” ຍັງບໍ່ໄດ້ເກີດຂຶ້ນຕອນທີ່ໂປໂລຂຽນເລື່ອງນີ້ໄປຫາພີ່ນ້ອງໃນເມືອງໂກຣິນໂທ. ແຕ່ເລື່ອງນີ້ຈະເກີດຂຶ້ນໃນອະນາຄົດເພາະໂປໂລຂຽນວ່າ: “ຈະເປັນໄປຕາມລຳດັບຄື ພະຄລິດເປັນຄົນທຳອິດ ຈາກນັ້ນ ກໍແມ່ນຄົນຂອງພະຄລິດ ແລະຄົນເຫຼົ່ານີ້ຈະມີຊີວິດອີກໃນເວລາການປະທັບຂອງເພິ່ນ.” (1 ກຣ. 15:23; 1 ທຊ. 4:15, 16) ໃນທຸກມື້ນີ້ເຮົາກໍມີຊີວິດຢູ່ໃນໄລຍະ “ການປະທັບ” ຂອງພະເຢຊູ. ສະນັ້ນພວກອັກຄະສາວົກແລະຜູ້ຖືກເຈີມຄົນອື່ນໆທີ່ຕາຍໄປແລ້ວຕ້ອງລໍຖ້າການປະທັບຂອງພະເຢຊູເພື່ອຈະຂຶ້ນໄປສະຫວັນ ແລະເພື່ອຈະ “ເປັນອັນໜຶ່ງອັນດຽວກັບພະຄລິດໂດຍການຄືນມາຈາກຕາຍ.”
ໝັ້ນໃຈວ່າສິ່ງທີ່ເຈົ້າຫວັງຈະເກີດຂຶ້ນແທ້!
18. (ກ) ເປັນຫຍັງເຮົາຈຶ່ງເຂົ້າໃຈວ່ານອກຈາກການຄືນມາຈາກຕາຍຂອງຜູ້ທີ່ໄປສະຫວັນແລ້ວ ຍັງຈະມີການຄືນມາຈາກຕາຍຂອງອີກກຸ່ມໜຶ່ງ? (ຂ) ຕາມ 1 ໂກຣິນໂທ 15:24-26 ຈະເກີດຫຍັງຂຶ້ນໃນສະຫວັນ?
18 ແລ້ວຄລິດສະຕຽນທີ່ສັດຊື່ທີ່ບໍ່ມີຄວາມຫວັງໄປສະຫວັນເດ? ເຂົາເຈົ້າກໍມີຄວາມຫວັງທີ່ຈະຄືນມາຈາກຕາຍຄືກັນ. ຄຳພີໄບເບິນບອກວ່າໂປໂລແລະຄົນອື່ນໆທີ່ມີຄວາມຫວັງໄປສະຫວັນເປັນ “ກຸ່ມທຳອິດ ທີ່ໄດ້ຮັບການປຸກໃຫ້ຄືນມາຈາກຕາຍ.” (ຟລປ. 3:11) ນີ້ໝາຍຄວາມວ່າຈະມີອີກກຸ່ມໜຶ່ງທີ່ຈະຄືນມາຈາກຕາຍຄືກັນ. ເລື່ອງນີ້ກົງກັບສິ່ງທີ່ໂຢບເຊື່ອວ່າຈະເກີດຂຶ້ນກັບລາວໃນອະນາຄົດ. (ໂຢບ 14:15) “ຄົນຂອງພະຄລິດຈະມີຊີວິດອີກໃນເວລາການປະທັບຂອງເພິ່ນ” ໝາຍຄວາມວ່າເຂົາເຈົ້າຈະໄດ້ຢູ່ໃນສະຫວັນກັບພະເຢຊູຕອນທີ່ເພິ່ນມາທຳລາຍລັດຖະບານ ຜູ້ມີອຳນາດແລະຜູ້ມີລິດເດດທັງໝົດແລ້ວ ແລະ “ຄວາມຕາຍ” ເຊິ່ງກໍຄື “ສັດຕູໂຕສຸດທ້າຍ” ກໍຈະຖືກທຳລາຍ. ຜູ້ທີ່ຄືນມາຈາກຕາຍແລ້ວໄປສະຫວັນຈະບໍ່ຕາຍອີກເລີຍ. ແລ້ວຜູ້ທີ່ຄືນມາຈາກຕາຍທີ່ບໍ່ມີຄວາມຫວັງໄປສະຫວັນເດ ຈະເປັນແນວໃດ?—ອ່ານ 1 ໂກຣິນໂທ 15:24-26
19. ຜູ້ທີ່ບໍ່ມີຄວາມຫວັງໄປສະຫວັນມີຄວາມຫວັງຫຍັງ?
19 ແລ້ວຜູ້ທີ່ຄືນມາຈາກຕາຍທີ່ບໍ່ມີຄວາມຫວັງໄປສະຫວັນເດ ຈະເປັນແນວໃດ? ເຂົາເຈົ້າກໍມີຄວາມຫວັງຈາກຄຳເວົ້າຂອງໂປໂລທີ່ວ່າ: “ຂ້ອຍກໍມີຄວາມຫວັງຄື . . . ທັງຄົນດີແລະຄົນຊົ່ວຈະຄືນມາຈາກຕາຍ.” (ກຈກ. 24:15) ເຮົາຮູ້ຢູ່ແລ້ວວ່າຄົນຊົ່ວຈະບໍ່ໄດ້ຂຶ້ນສະຫວັນ. ດັ່ງນັ້ນຜູ້ທີ່ບໍ່ມີຄວາມຫວັງໄປສະຫວັນກໍມີຄວາມຫວັງທີ່ຈະຄືນມາຈາກຕາຍເພື່ອມີຊີວິດຢູ່ໃນໂລກ.
ເຮົາຈະໝັ້ນໃຈໃນອະນາຄົດຫຼາຍຂຶ້ນຖ້າເຮົາເຊື່ອເລື່ອງການຄືນມາຈາກຕາຍ (ເບິ່ງຂໍ້ 20)c
20. ເປັນຫຍັງເຮົາຈຶ່ງໝັ້ນໃຈເລື່ອງການຄືນມາຈາກຕາຍຫຼາຍຂຶ້ນ?
20 ເຫັນໄດ້ແຈ້ງວ່າ “ຈະມີການຄືນມາຈາກຕາຍ” ແລະຄົນທີ່ຄືນມາຈາກຕາຍໃນໂລກນີ້ກໍຈະມີຊີວິດຕະຫຼອດໄປ. ເຮົາເຊື່ອຄຳສັນຍານີ້ໄດ້. ຄວາມຫວັງນີ້ເຮັດໃຫ້ເຮົາມີກຳລັງໃຈເມື່ອຄິດເຖິງຄົນທີ່ເຮົາຮັກເຊິ່ງຕາຍໄປແລ້ວ. ເຂົາເຈົ້າຈະຖືກປຸກໃຫ້ຄືນມາຈາກຕາຍຕອນທີ່ພະຄລິດແລະຜູ້ທີ່ຂຶ້ນໄປສະຫວັນ “ປົກຄອງເປັນກະສັດ . . . ເປັນເວລາ 1.000 ປີ.” (ພນມ. 20:6) ເຮົາຈະໝັ້ນໃຈຫຼາຍຂຶ້ນຄືກັນວ່າ ຖ້າເຮົາຕາຍກ່ອນພະຄລິດເລີ່ມປົກຄອງ 1.000 ປີ ເຮົາກໍຈະຖືກປຸກໃຫ້ຄືນມາຈາກຕາຍຄືກັນ ແລະ “ພວກເຮົາໝັ້ນໃຈວ່າຄວາມຫວັງນັ້ນຈະເປັນຈິງແນ່ນອນ.” (ຣມ. 5:5) ຄວາມຫວັງນີ້ເຮັດໃຫ້ເຮົາເຂັ້ມແຂງແລະມີຄວາມສຸກທີ່ຈະຮັບໃຊ້ພະເຢໂຫວາຕໍ່ໄປ. ແຕ່ເຮົາຍັງຈະໄດ້ຮຽນເລື່ອງອື່ນອີກຈາກ 1 ໂກຣິນໂທບົດ 15 ໃນບົດຄວາມຕໍ່ໄປ.
ເພງ 147 ຄຳສັນຍາເລື່ອງຊີວິດຕະຫຼອດໄປ
a 1 ໂກຣິນໂທບົດ 15 ເນັ້ນເຖິງເລື່ອງການຄືນມາຈາກຕາຍ. ເປັນຫຍັງຄຳສອນນີ້ຈຶ່ງສຳຄັນຕໍ່ເຮົາ ແລະເປັນຫຍັງເຮົາຈຶ່ງໝັ້ນໃຈວ່າພະເຢຊູຄືນມາຈາກຕາຍ? ໃນບົດຄວາມນີ້ຈະຕອບຄຳຖາມເຫຼົ່ານີ້ ແລະຄຳຖາມທີ່ສຳຄັນອື່ນໆກ່ຽວກັບການຄືນມາຈາກຕາຍ.
b ຄຳອະທິບາຍຮູບພາບ: ພະເຢຊູເປັນຜູ້ທຳອິດທີ່ຂຶ້ນໄປສະຫວັນ. (ກຈກ. 1:9) ລູກສິດບາງຄົນຈະຢູ່ໃນສະຫວັນນຳເພິ່ນຄື: ໂທມາ ຢາໂກໂບ ລີເດຍ ໂຢຮັນ ມາຣີ ແລະໂປໂລ.
c ຄຳອະທິບາຍຮູບພາບ: ເມຍຂອງພີ່ນ້ອງຄົນໜຶ່ງ ເຊິ່ງເຂົາເຈົ້າຮັບໃຊ້ນຳກັນມາຫຼາຍປີໄດ້ຕາຍປະ. ແຕ່ພີ່ນ້ອງຄົນນັ້ນຍັງຮັບໃຊ້ພະເຢໂຫວາຕໍ່ໆໄປຢ່າງສັດຊື່ເພາະລາວໝັ້ນໃຈວ່າເມຍຈະຄືນມາຈາກຕາຍ.