ບົດຄວາມສຶກສາທີ 19
ເຮົາຈະໝັ້ນໃຈໃນຄຳສັນຍາຂອງພະເຢໂຫວາເລື່ອງໂລກໃໝ່ຫຼາຍຂຶ້ນໄດ້ແນວໃດ?
“ມີຫຍັງທີ່ [ພະເຢໂຫວາ] ເວົ້າແລ້ວ ແລະບໍ່ໄດ້ເຮັດບໍ?”—ຈຊບ. 23:19
ເພງ 142 ຍຶດໝັ້ນກັບຄວາມຫວັງຂອງເຮົາ
ໃຈຄວາມສຳຄັນa
1-2. ຕອນທີ່ເຮົາລໍຖ້າໂລກໃໝ່ມາເຮົາຕ້ອງເຮັດຫຍັງ?
ເຮົາຂອບໃຈພະເຢໂຫວາທີ່ເພິ່ນສັນຍາວ່າຈະມີໂລກໃໝ່. (2ປຕ. 3:13) ເຖິງວ່າເຮົາຈະບໍ່ຮູ້ວ່າໂລກໃໝ່ຈະມາເມື່ອໃດແທ້ໆ ແຕ່ຫຼັກຖານຫຼາຍຢ່າງທີ່ເກີດຂຶ້ນໃນໂລກນີ້ສະແດງວ່າເຮົາບໍ່ຕ້ອງຖ້າອີກດົນ.—ມທ. 24:32-34, 36; ກຈກ. 1:7
2 ບໍ່ວ່າເຮົາຈະເປັນພະຍານມາດົນສ່ຳໃດແລ້ວເຮົາທຸກຄົນຕ້ອງພະຍາຍາມເຮັດໃຫ້ໂຕເອງມີຄວາມເຊື່ອຫຼາຍຂຶ້ນໃນຄຳສັນຍາເລື່ອງໂລກໃໝ່. ຍ້ອນຫຍັງ? ກໍຍ້ອນວ່າເຖິງເຮົາຈະມີຄວາມເຊື່ອເຂັ້ມແຂງ ແຕ່ມັນອາດຈະບໍ່ໄດ້ເປັນແບບນັ້ນຕະຫຼອດ ເພາະຄວາມເຊື່ອສາມາດອ່ອນລົງໄດ້. ໂປໂລບອກວ່າການຂາດຄວາມເຊື່ອເປັນ “ບາບທີ່ຮັດຕົວພວກເຮົາໄດ້ງ່າຍ.” (ຮຣ. 12:1) ດັ່ງນັ້ນ ເພື່ອບໍ່ໃຫ້ຄວາມເຊື່ອຂອງເຮົາອ່ອນລົງ ເຮົາຕ້ອງຄິດທົບທວນເປັນປະຈຳກ່ຽວກັບຫຼັກຖານຕ່າງໆທີ່ເຮັດໃຫ້ໝັ້ນໃຈວ່າໂລກໃໝ່ຈະມາໄວໆນີ້ແນ່ນອນ.—ຮຣ. 11:1
3. ເຮົາຈະເບິ່ງຫຍັງໃນບົດຄວາມນີ້?
3 ໃນບົດຄວາມນີ້ເຮົາຈະມາເບິ່ງ 3 ວິທີທີ່ຈະຊ່ວຍໃຫ້ເຮົາໝັ້ນໃຈຫຼາຍຂຶ້ນໃນຄຳສັນຍາຂອງພະເຢໂຫວາເລື່ອງໂລກໃໝ່ຄື: (1) ຄິດຕຶກຕອງເລື່ອງຄ່າໄຖ່ (2) ຄິດກ່ຽວກັບພະລັງອຳນາດຂອງພະເຢໂຫວາ (3) ເຮັດກິດຈະກຳຂອງຄລິດສະຕຽນເປັນປະຈຳ. ນອກຈາກນັ້ນ ເຮົາຈະມາເບິ່ງວ່າພະເຢໂຫວາເວົ້າແນວໃດກັບຮາບາກຸກ ເຊິ່ງຈະຊ່ວຍໃຫ້ເຮົາມີຄວາມເຊື່ອທີ່ເຂັ້ມແຂງຂຶ້ນ. ກ່ອນອື່ນໃຫ້ເຮົາມາເບິ່ງວ່າຕອນໃດແດ່ທີ່ເຮົາຕ້ອງມີຄວາມເຊື່ອເຂັ້ມແຂງ ແລະໝັ້ນໃຈຫຼາຍຂຶ້ນໃນຄຳສັນຍາຂອງພະເຢໂຫວາເລື່ອງໂລກໃໝ່.
ຕອນໃດແດ່ທີ່ເຮົາຕ້ອງມີຄວາມເຊື່ອເຂັ້ມແຂງ
4. ເຮົາຕ້ອງມີຄວາມເຊື່ອທີ່ເຂັ້ມແຂງເມື່ອຕັດສິນໃຈເລື່ອງຫຍັງແດ່?
4 ທຸກມື້ນີ້ເຮົາຕ້ອງມີຄວາມເຊື່ອທີ່ເຂັ້ມແຂງໃນການຕັດສິນໃຈບາງເລື່ອງ ເຊັ່ນ: ການເລືອກໝູ່ ການພັກຜ່ອນຢ່ອນໃຈ ການສຶກສາ ການແຕ່ງດອງ ການມີລູກ ແລະເລື່ອງວຽກອາຊີບ. ດັ່ງນັ້ນ ເຮົາຕ້ອງຖາມໂຕເອງວ່າ: ‘ສິ່ງທີ່ຂ້ອຍເລືອກສະແດງວ່າຂ້ອຍໝັ້ນໃຈບໍວ່າໂລກຊົ່ວນີ້ຈະຢູ່ອີກບໍ່ດົນ? ແລະໂລກໃໝ່ໃກ້ຈະມາແລ້ວບໍ? ຫຼືຂ້ອຍຄືກັບຄົນທົ່ວໄປທີ່ເຊື່ອວ່າອີກບໍ່ດົນກໍຈະຕາຍ?’ (ມທ. 6:19, 20; ລກ. 12:16-21) ຖ້າເຮົາໝັ້ນໃຈວ່າອີກບໍ່ດົນໂລກໃໝ່ຈະມາເຮົາຈະຕັດສິນໃຈເລື່ອງຕ່າງໆໄດ້ດີທີ່ສຸດ.
5-6. ເປັນຫຍັງເຮົາຕ້ອງມີຄວາມເຊື່ອທີ່ເຂັ້ມແຂງຕອນທີ່ເຈິບັນຫາ? ຂໍໃຫ້ຍົກຕົວຢ່າງ.
5 ນອກຈາກນັ້ນ ເຮົາຕ້ອງມີຄວາມເຊື່ອທີ່ເຂັ້ມແຂງຕອນທີ່ເຈິກັບບັນຫາ ເຊັ່ນ: ເຮົາອາດຕ້ອງເຈິການຂົ່ມເຫງ ມີບັນຫາສຸຂະພາບຮ້າຍແຮງ ຫຼືບັນຫາອື່ນໆທີ່ເຮັດໃຫ້ເຮົາທໍ້ໃຈ. ຕອນທຳອິດເຮົາອາດຮູ້ສຶກວ່າອົດທົນໄດ້. ແຕ່ຖ້າບັນຫານັ້ນຍືດເຍື້ອແລະບໍ່ໝົດໄປຈັກເທື່ອເຊິ່ງຫຼາຍເທື່ອກໍມັກຈະເປັນແບບນັ້ນ. ເຮົາກໍຕ້ອງມີຄວາມເຊື່ອທີ່ເຂັ້ມແຂງເພື່ອຈະອົດທົນແລະຮັບໃຊ້ພະເຢໂຫວາຢ່າງມີຄວາມສຸກຕໍ່ໆໄປໄດ້.—ຣມ. 12:12; 1ປຕ. 1:6, 7
6 ໃນຊ່ວງທີ່ເຈິບັນຫາເຮົາອາດຮູ້ສຶກວ່າໂລກໃໝ່ທີ່ພະເຢໂຫວາສັນຍາໄວ້ອີກດົນບໍຈຶ່ງຈະມາ. ແຕ່ນີ້ໝາຍຄວາມວ່າເຮົາມີຄວາມເຊື່ອທີ່ອ່ອນລົງບໍ? ບໍ່ແມ່ນ. ໃຫ້ເຮົາຄິດເຖິງຕົວຢ່າງປຽບທຽບນີ້. ໃນຍາມຮ້ອນ ອາກາດກໍຮ້ອນຕິດຕໍ່ກັນຫຼາຍອາທິດ ເຮົາອາດຮູ້ສຶກວ່າເປັນຫຍັງລະດູໜາວຄືບໍ່ມາຮອດຈັກເທື່ອ. ແຕ່ເຮົາກໍຮູ້ວ່າຈັກໜ້ອຍມັນກໍຈະມາແນ່ນອນ. ຄ້າຍຄືກັນ ຕອນທີ່ເຮົາເຈິບັນຫາແລະຮູ້ສຶກທໍ້ໃຈຫຼາຍ ເຮົາອາດຮູ້ສຶກ ວ່າໂລກໃໝ່ຢູ່ໄກເກີນໄປ ເປັນຫຍັງຄືບໍ່ມາຈັກເທື່ອ. ແຕ່ຖ້າເຮົາມີຄວາມເຊື່ອທີ່ເຂັ້ມແຂງເຮົາກໍຮູ້ ວ່າຄຳສັນຍາທັງໝົດຂອງພະເຢໂຫວາຈະເປັນຈິງແລະໂລກໃໝ່ຈະມາແນ່ນອນ. (ເພງ. 94:3, 14, 15; ຮຣ. 6:17-19) ຖ້າເຮົາໝັ້ນໃຈແບບນີ້ ເຮົາກໍຈະໃຫ້ການນະມັດສະການພະເຢໂຫວາສຳຄັນທີ່ສຸດໃນຊີວິດບໍ່ວ່າຈະເກີດຫຍັງຂຶ້ນກໍຕາມ.
7. ເຮົາຕ້ອງລະວັງຄວາມຄິດແບບໃດ?
7 ໃຫ້ເຮົາມາເບິ່ງອີກເລື່ອງໜຶ່ງທີ່ເຮົາຕ້ອງມີຄວາມເຊື່ອທີ່ເຂັ້ມແຂງ. ຕອນທີ່ເຮົາປະກາດ ຫຼາຍຄົນທີ່ເຮົາລົມນຳຮູ້ສຶກວ່າ “ຂ່າວດີ” ເລື່ອງໂລກໃໝ່ມັນດີເກີນໄປທີ່ຈະເປັນຈິງ. (ມທ. 24:14; ເອເຊກ. 33:32) ເຮົາຕ້ອງລະວັງທີ່ຈະບໍ່ໃຫ້ຄວາມຄິດຂອງເຂົາເຈົ້າມີຜົນຕໍ່ເຮົາແລະເພື່ອຈະເຮັດແບບນັ້ນໄດ້ເຮົາຕ້ອງເຮັດໃຫ້ຄວາມເຊື່ອຂອງເຮົາເຂັ້ມແຂງຂຶ້ນ. ໃຫ້ເຮົາມາເບິ່ງ 3 ວິທີທີ່ຈະຊ່ວຍເຮົາໄດ້.
ຄິດຕຶກຕອງເລື່ອງຄ່າໄຖ່
8-9. ການຄິດຕຶກຕອງເລື່ອງຄ່າໄຖ່ມີຜົນຕໍ່ຄວາມເຊື່ອຂອງເຮົາແນວໃດ?
8 ວິທີໜຶ່ງທີ່ເຮົາຈະມີຄວາມເຊື່ອເຂັ້ມແຂງຂຶ້ນໄດ້ກໍຄືການຄິດຕຶກຕອງເລື່ອງຄ່າໄຖ່. ຄ່າໄຖ່ເຮັດໃຫ້ເຮົາໝັ້ນໃຈວ່າຄຳສັນຍາທຸກຢ່າງຂອງພະເຈົ້າຈະເປັນຈິງ. ເມື່ອເຮົາຄິດດີໆວ່າເປັນຫຍັງພະເຢໂຫວາຈຶ່ງໃຫ້ມີຄ່າໄຖ່ແລະເພິ່ນຕ້ອງເສຍສະລະຫຼາຍຂະໜາດໃດ. ນີ້ຈະເຮັດໃຫ້ເຮົາໝັ້ນໃຈຫຼາຍຂຶ້ນໃນຄຳສັນຍາຂອງພະເຈົ້າເລື່ອງຊີວິດຕະຫຼອດໄປໃນໂລກໃໝ່ທີ່ດີກວ່າວ່າຈະຕ້ອງເກີດຂຶ້ນແທ້ໆ. ເປັນຫຍັງເຮົາຈຶ່ງເວົ້າແບບນັ້ນໄດ້?
9 ໃຫ້ຄິດເບິ່ງວ່າພະເຢໂຫວາຕ້ອງເສຍສະຫຼະຫຍັງແດ່? ເພິ່ນສົ່ງລູກຊາຍສຸດທີ່ຮັກຂອງເພິ່ນເຊິ່ງເປັນຜູ້ທີ່ເພິ່ນສະໜິດທີ່ສຸດມາເກີດຢູ່ເທິງໂລກເພື່ອເປັນມະນຸດທີ່ສົມບູນແບບ. ຕອນທີ່ພະເຢຊູຢູ່ເທິງໂລກ ເພິ່ນຕ້ອງເຈິຄວາມລຳບາກຫຼາຍຢ່າງແລະຕໍ່ມາເພິ່ນກໍຕ້ອງທົນທຸກແລະຕາຍດ້ວຍຄວາມເຈັບປວດ. ພະເຢໂຫວາຍອມສະລະສິ່ງທີ່ມີຄ່າຫຼາຍແທ້ໆ. ດັ່ງນັ້ນ ເພິ່ນຈະບໍ່ມີທາງຍອມໃຫ້ລູກຊາຍຂອງເພິ່ນຕ້ອງມາເຈັບປວດທໍລະມານແລະຕາຍເພື່ອໃຫ້ເຮົາມີຊີວິດທີ່ດີພຽງແຕ່ຊ່ວງເວລາສັ້ນໆເທົ່ານັ້ນ. (ຢຮ. 3:16; 1ປຕ. 1:18, 19) ຖ້າພະເຢໂຫວາຍອມສະລະສິ່ງທີ່ມີຄ່າຫຼາຍຂະໜາດນີ້ ເພິ່ນກໍຕ້ອງເຮັດໃຫ້ຊີວິດຕະຫຼອດໄປໃນໂລກໃໝ່ເກີດຂຶ້ນແທ້ຢ່າງແນ່ນອນ.
ຄິດເຖິງພະລັງອຳນາດຂອງພະເຢໂຫວາ
10. ຕາມທີ່ຂຽນໄວ້ໃນເອເຟໂຊ 3:20 ມີຫຍັງແດ່ທີ່ພະເຢໂຫວາເຮັດໄດ້?
10 ວິທີທີສອງທີ່ຈະຊ່ວຍໃຫ້ເຮົາມີຄວາມເຊື່ອທີ່ເຂັ້ມແຂງຂຶ້ນໄດ້ກໍຄື ການຄິດເຖິງພະລັງອຳນາດຂອງພະເຢໂຫວາ. ເພິ່ນມີພະລັງອຳນາດທີ່ຈະເຮັດທຸກຢ່າງທີ່ເພິ່ນສັນຍາໄວ້ເປັນຈິງເຖິງວ່າມະນຸດຄິດວ່າຄຳສັນຍາເລື່ອງຊີວິດຕະຫຼອດໄປໃນໂລກໃໝ່ເບິ່ງຄືວ່າເປັນໄປບໍ່ໄດ້. ແຕ່ພະເຢໂຫວາເປັນພະເຈົ້າທີ່ມີພະລັງອຳນາດສູງສຸດ. ເພິ່ນຈະເຮັດທຸກສິ່ງຕາມທີ່ເພິ່ນສັນຍາໄວ້. (ໂຢບ 42:2; ມຣກ. 10:27) ດັ່ງນັ້ນ ເຮົາຈຶ່ງບໍ່ແປກໃຈຖ້າພະເຢໂຫວາຈະສັນຍາເລື່ອງທີ່ເປັນຕາເຫຼືອເຊື່ອ.—ອ່ານເອເຟໂຊ 3:20
11. ຂໍໃຫ້ຍົກຕົວຢ່າງຄຳສັນຍາຂອງພະເຈົ້າທີ່ມະນຸດເບິ່ງຄືວ່າເປັນໄປບໍ່ໄດ້ຈັກເລື່ອງໜຶ່ງ. (ເບິ່ງຂອບ “ຄຳສັນຍາທີ່ໜ້າເຫຼືອເຊື່ອບາງເລື່ອງທີ່ເກີດຂຶ້ນແທ້.”)
11 ໃຫ້ເຮົາມາເບິ່ງຄຳສັນຍາບາງເລື່ອງທີ່ພະເຢໂຫວາສັນຍາໄວ້ກັບຜູ້ຮັບໃຊ້ຂອງເພິ່ນໃນອະດີດເຊິ່ງເບິ່ງຄືວ່າບໍ່ມີວັນຈະເປັນໄປໄດ້. ເພິ່ນຮັບຮອງກັບອັບຣາຮາມແລະຊາຣາວ່າເຂົາເຈົ້າຈະມີລູກຊາຍຕອນທີ່ມີອາຍຸຫຼາຍແລ້ວ. (ປຖກ. 17:15-17) ນອກຈາກນັ້ນ ເພິ່ນຍັງບອກກັບອັບຣາຮາມວ່າແຜ່ນດິນການາອານຈະເປັນຂອງລູກຫຼານຂອງລາວ. ໃນຫຼາຍປີທີ່ຊາວອິດສະຣາເອນເຊິ່ງກໍຄືລູກຫຼານຂອງອັບຮາຮາມທີ່ເປັນທາດໃນເອຢິບເບິ່ງຄືວ່າຄຳສັນຍາຂອງເພິ່ນບໍ່ມີທາງຈະເປັນຈິງໄດ້. ແຕ່ໃນທີ່ສຸດ ມັນກໍເກີດຂຶ້ນແທ້. ຕໍ່ມາ ພະເຢໂຫວາບອກກັບເອລີຊາເບັດຕອນທີ່ອາຍຸຫຼາຍແລ້ວວ່າລາວຈະມີລູກ ແລະຫຼັງຈາກນັ້ນ ເພິ່ນກໍບອກກັບມາຣີສາວບໍລິສຸດວ່າລາວຈະມີລູກຊາຍເຊິ່ງເປັນລູກຂອງພະເຈົ້າ. ແລະເມື່ອເລື່ອງນີ້ເກີດຂຶ້ນຕາມທີ່ພະເຢໂຫວາບອກໄວ້ ນີ້ກໍເຮັດໃຫ້ຄຳສັນຍາອີກເລື່ອງໜຶ່ງທີ່ເພິ່ນສັນຍາໄວ້ເມື່ອຫຼາຍພັນປີກ່ອນໃນສວນເອເດນເກີດຂຶ້ນແທ້ຄືກັນ.—ປຖກ. 3:15
12. ໂຢຊວຍ 23:14 ແລະ ເອຊາຢາ 55:10, 11 ຊ່ວຍເຮົາໃຫ້ໝັ້ນໃຈແນວໃດກ່ຽວກັບພະລັງອຳນາດຂອງພະເຢໂຫວາ?
12 ເຮົາຈະໝັ້ນໃຈໃນພະລັງອຳນາດຂອງພະເຢໂຫວາທີ່ຈະເຮັດໃຫ້ໂລກໃໝ່ເປັນຈິງໄດ້ໂດຍການຄິດເຖິງຄຳສັນຍາທີ່ເພິ່ນໃຫ້ໄວ້ກັບຜູ້ຮັບໃຊ້ຂອງເພິ່ນແລະວິທີທີ່ເພິ່ນເຮັດໃຫ້ຄຳສັນຍາເຫຼົ່ານັ້ນເກີດຂຶ້ນແທ້. (ອ່ານໂຢຊວຍ 23:14; ເອຊາຢາ 55:10, 11) ການມີຄວາມເຊື່ອທີ່ເຂັ້ມແຂງຈະຊ່ວຍກຽມເຮົາໃຫ້ພ້ອມທີ່ຈະຊ່ວຍຄົນອື່ນໃຫ້ຮູ້ວ່າຄຳສັນຍາເລື່ອງໂລກໃໝ່ບໍ່ໄດ້ເປັນແຕ່ຄວາມຝັນ. ພະເຢໂຫວາເອງບອກກ່ຽວກັບຟ້າສະຫວັນໃໝ່ແລະໂລກໃໝ່ວ່າ: “ຄຳເວົ້າທັງໝົດນີ້ເຊື່ອຖືໄດ້ແລະເປັນຄວາມຈິງ.”—ພນມ. 21:1, 5
ເຮັດກິດຈະກຳຂອງຄລິດສະຕຽນເປັນປະຈຳ
ການປະຊຸມຂອງຄລິດສະຕຽນ
ການປະຊຸມຂອງຄລິດສະຕຽນຊ່ວຍເຮົາແນວໃດໃຫ້ມີຄວາມເຊື່ອທີ່ເຂັ້ມແຂງຂຶ້ນ? (ເບິ່ງຂໍ້ 13)
13. ການປະຊຸມຂອງຄລິດສະຕຽນເຮັດໃຫ້ຄວາມເຊື່ອຂອງເຮົາເຂັ້ມແຂງຂຶ້ນໄດ້ແນວໃດ? ຂໍໃຫ້ອະທິບາຍ.
13 ວິທີທີສາມທີ່ຈະຊ່ວຍໃຫ້ເຮົາມີຄວາມເຊື່ອເຂັ້ມແຂງຂຶ້ນໄດ້ກໍຄືການເຮັດກິດຈະກຳຂອງຄລິດສະຕຽນເປັນປະຈຳ ເຊັ່ນ ໃຫ້ເຮົາຄິດເຖິງປະໂຫຍດທີ່ເຮົາຈະໄດ້ຮັບຈາກການປະຊຸມປະຈຳປະຊາຄົມ. ພີ່ນ້ອງຍິງຄົນໜຶ່ງທີ່ຊື່ແອນນາb ທີ່ຮັບໃຊ້ເຕັມເວລາມາຫຼາຍສິບປີບອກວ່າ: “ການປະຊຸມເປັນຄືກັບສະໝໍເຮືອທີ່ເຮັດໃຫ້ຂ້ອຍມີຄວາມເຊື່ອໝັ້ນຄົງ. ເຖິງວ່າຜູ້ນຳສ່ວນອາດມີຂໍ້ຈຳກັດໃນການສອນຫຼືບໍ່ໄດ້ຊ່ວຍຂ້ອຍໃຫ້ເຂົ້າໃຈສິ່ງໃໝ່ໆ ແຕ່ໃນການປະຊຸມຂ້ອຍໄດ້ຍິນບາງຢ່າງຈາກສ່ວນຂອງລາວທີ່ຊ່ວຍໃຫ້ຂ້ອຍເຂົ້າໃຈຄຳພີໄບເບິນຫຼາຍຂຶ້ນເຊິ່ງເຮັດໃຫ້ຂ້ອຍມີຄວາມເຊື່ອເຂັ້ມແຂງຂຶ້ນ.” ເຮົາເອງກໍໄດ້ຮັບປະໂຫຍດຄືກັນຈາກຄວາມຄິດເຫັນຂອງຄົນອື່ນໆທີ່ເຂົ້າຮ່ວມປະຊຸມກໍຈະຊ່ວຍເຮົາໃຫ້ມີຄວາມເຊື່ອເຂັ້ມແຂງນຳ.—ຣມ. 1:11, 12; 10:17
ວຽກປະກາດ
ວຽກປະກາດຊ່ວຍເຮົາແນວໃດໃຫ້ມີຄວາມເຊື່ອທີ່ເຂັ້ມແຂງຂຶ້ນ? (ເບິ່ງຂໍ້ 14)
14. ການທີ່ເຮົາໄປປະກາດເປັນປະຈຳຈະຊ່ວຍໃຫ້ເຮົາມີຄວາມເຊື່ອທີ່ເຂັ້ມແຂງຂຶ້ນໄດ້ແນວໃດ?
14 ເຮົາຍັງເຮັດໃຫ້ຄວາມເຊື່ອເຂັ້ມແຂງຂຶ້ນໂດຍການໄປປະກາດ ເປັນປະຈຳ. (ຮຣ. 10:23) ພີ່ນ້ອງຍິງຄົນໜຶ່ງທີ່ຊື່ບາບາຣາເຊິ່ງຮັບໃຊ້ພະເຢໂຫວາຫຼາຍກວ່າ 70 ປີບອກວ່າ: “ການປະກາດຊ່ວຍໃຫ້ຂ້ອຍມີຄວາມເຊື່ອທີ່ເຂັ້ມແຂງຂຶ້ນແທ້ໆ. ແຮ່ງຂ້ອຍເວົ້າກັບຄົນອື່ນເລື່ອງຄຳສັນຍາດີໆຂອງພະເຢໂຫວາ ຄວາມເຊື່ອຂອງຂ້ອຍກໍແຮ່ງເພີ່ມຂຶ້ນ.”
ການສຶກສາສ່ວນຕົວ
ການສຶກສາສ່ວນຕົວຊ່ວຍເຮົາແນວໃດໃຫ້ມີຄວາມເຊື່ອທີ່ເຂັ້ມແຂງຂຶ້ນ? (ເບິ່ງຂໍ້ 15)
15. ການສຶກສາສ່ວນຕົວຈະຊ່ວຍເຮົາໃຫ້ມີຄວາມເຊື່ອທີ່ເຂັ້ມແຂງຂຶ້ນໄດ້ແນວໃດ? (ເບິ່ງຮູບພາບ)
15 ການສຶກສາສ່ວນຕົວເປັນກິດຈະກຳອີກຢ່າງໜຶ່ງຂອງຄລິດສະຕຽນທີ່ຊ່ວຍເຮົາໃຫ້ມີຄວາມເຊື່ອທີ່ເຂັ້ມແຂງຂຶ້ນ. ພີ່ນ້ອງຍິງຄົນໜຶ່ງທີ່ຊື່ຊູຊານບອກວ່າ: ການສຶກສາສ່ວນຕົວ ຊ່ວຍລາວໄດ້ຫຼາຍແທ້ໆ. ລາວບອກວ່າຂ້ອຍຈະໃຊ້ວັນອາທິດເພື່ອກຽມຫໍສັງເກດການ. ສ່ວນວັນຈັນກັບວັນອັງຄານຂ້ອຍກໍຈະກຽມການປະຊຸມກາງອາທິດ. ສ່ວນມື້ທີ່ເຫຼືອຂ້ອຍຈະສຶກສາສ່ວນຕົວເລື່ອງອື່ນໆຕາມທີ່ຂ້ອຍວາງແຜນໄວ້. ຊູຊານເຮັດຕາມຕາຕະລາງການສຶກສາແບບນີ້ສະເໝີ ຄວາມເຊື່ອຂອງລາວກໍເລີຍເຂັ້ມແຂງຂຶ້ນ. ພີ່ນ້ອງຍິງທີ່ຊື່ໄອຣິນ ເຊິ່ງຮັບໃຊ້ຢູ່ສຳນັກງານໃຫຍ່ມາຫຼາຍສິບປີບອກວ່າ “ການສຶກສາສ່ວນຕົວເລື່ອງຄຳພະຍາກອນໃນຄຳພີໄບເບິນຊ່ວຍລາວໃຫ້ມີຄວາມເຊື່ອທີ່ເຂັ້ມແຂງຂຶ້ນ. ລາວເວົ້າວ່າ: “ຂ້ອຍຮູ້ສຶກງຶດຫຼາຍແທ້ໆທີ່ຮູ້ວ່າຄຳພະຍາກອນຂອງພະເຢໂຫວາເປັນຈິງແມ່ນແຕ່ໃນລາຍລະອຽດທີ່ນ້ອຍທີ່ສຸດ.”c
“ຈະເກີດຂຶ້ນແນ່ນອນ”
16. ການທີ່ພະເຢໂຫວາຮັບຮອງກັບຮາບາກຸກມີຜົນແນວໃດກັບເຮົາໃນທຸກມື້ນີ້? (ເຮັບເຣີ 10:36, 37)
16 ຜູ້ຮັບໃຊ້ຂອງພະເຢໂຫວາຫຼາຍຄົນລໍຖ້າຈຸດຈົບຂອງໂລກຊົ່ວມາດົນແລ້ວ. ບາງຄົນຮູ້ສຶກວ່າເປັນຫຍັງຍັງບໍ່ມາຈັກເທື່ອ. ພະເຢໂຫວາຮູ້ວ່າຜູ້ຮັບໃຊ້ຂອງເພິ່ນຮູ້ສຶກແນວໃດເຊິ່ງເຫັນໄດ້ຈາກຄຳເວົ້າຂອງເພິ່ນທີ່ຮັບຮອງກັບຜູ້ພະຍາກອນຮາບາກຸກວ່າ: “ນິມິດນີ້ຈະເກີດຂຶ້ນຕາມເວລາທີ່ກຳນົດໄວ້. ມັນຈະມາໄວໆແລະຈະເກີດຂຶ້ນແນ່ນອນ. ເຖິງຈະເບິ່ງຄືວ່າມາຊ້າ ແຕ່ກໍໃຫ້ຕັ້ງໃຈລໍຖ້າເພາະມັນຈະມາແນ່ນອນ! ມັນຈະບໍ່ມາຊ້າເລີຍ!” (ຮບກ. 2:3, ລ.ມ.) ພະເຢໂຫວາສັນຍາເພື່ອໃຫ້ຮາບາກຸກໝັ້ນໃຈຄົນດຽວເທົ່ານັ້ນບໍ? ຫຼືຄຳເວົ້ານີ້ໃຊ້ກັບເຮົາໃນທຸກມື້ນີ້ໄດ້ນຳ? ຄຳສັນຍານີ້ໃຊ້ກັບເຮົາໃນທຸກມື້ນີ້ໄດ້ ຍ້ອນໂປໂລໄດ້ຮັບການດົນໃຈໃຫ້ຂຽນເຖິງພີ່ນ້ອງຄລິດສະຕຽນທີ່ກຳລັງຖ້າໃຫ້ໂລກໃໝ່ມາ. (ອ່ານເຮັບເຣີ 10:36, 37) ເຮົາໝັ້ນໃຈວ່າເຖິງຄຳສັນຍາທີ່ພະເຢໂຫວາຈະຊ່ວຍເຮົາໃຫ້ລອດເບິ່ງຄືວ່າຍັງບໍ່ມາຈັກເທື່ອ ແຕ່ “ມັນຈະມາແນ່ນອນມັນຈະບໍ່ມາຊ້າເລີຍ!”
17. ພີ່ນ້ອງຍິງຄົນໜຶ່ງເຮັດຕາມຄຳແນະນຳທີ່ພະເຢໂຫວາໃຫ້ກັບຮາບາກຸກແນວໃດ?
17 ຜູ້ຮັບໃຊ້ຂອງພະເຢໂຫວາຫຼາຍຄົນເຮັດຕາມຄຳແນະນຳຂອງເພິ່ນທີ່ບອກວ່າ “ໃຫ້ຕັ້ງໃຈລໍຖ້າ” ແລະບາງຄົນກໍລໍຖ້າມາຫຼາຍສິບປີແລ້ວ. ຕົວຢ່າງເຊັ່ນ ພີ່ນ້ອງຍິງທີ່ຊື່ຣູອິດສ໌ ເລີ່ມຮັບໃຊ້ພະເຢໂຫວາຕັ້ງແຕ່ປີ 1939. ລາວບອກວ່າ: “ຕອນນັ້ນຂ້ອຍຄິດວ່າວັນອາມາເຄໂດນຈະມາກ່ອນທີ່ຂ້ອຍຈະຈົບມັດທະຍົມປາຍ. ແຕ່ມັນບໍ່ໄດ້ເປັນແບບນັ້ນເລີຍ! ຕະຫຼອດຫຼາຍປີທີ່ຜ່ານມາ ສິ່ງທີ່ຊ່ວຍຂ້ອຍໄດ້ຫຼາຍກໍຄືການອ່ານເລື່ອງກ່ຽວກັບຜູ້ຮັບໃຊ້ຂອງພະເຈົ້າທີ່ອົດທົນລໍຖ້າ ເຊັ່ນ: ໂນອາ ອັບຣາຮາມ ໂຢເຊັບ ແລະຄົນອື່ນໆທີ່ອົດທົນລໍຖ້າຈົນກວ່າຈະໄດ້ເຫັນຄຳສັນຍາຂອງພະເຢໂຫວາສຳເລັດເປັນຈິງ. ການເຊື່ອຢູ່ສະເໝີວ່າຄຳສັນຍາຂອງພະເຢໂຫວາຈະຕ້ອງເປັນຈິງແນ່ນອນ ເຮັດໃຫ້ຂ້ອຍກັບພີ່ນ້ອງຄົນອື່ນໆໝັ້ນໃຈວ່າໂລກໃໝ່ໃກ້ເຂົ້າມາແລ້ວ.” ຜູ້ຮັບໃຊ້ຄົນອື່ນໆຂອງພະເຢໂຫວາກໍເຫັນດີກັບຄຳເວົ້ານີ້!
18. ການສັງເກດສິ່ງທີ່ພະເຢໂຫວາສ້າງຊ່ວຍເຮົາແນວໃດໃຫ້ມີຄວາມເຊື່ອເຂັ້ມແຂງຂຶ້ນວ່າໂລກໃໝ່ຈະມາແນ່ນອນ?
18 ກໍແມ່ນຢູ່ວ່າຕອນນີ້ໂລກໃໝ່ຍັງບໍ່ມາ. ແຕ່ໃຫ້ຄິດເຖິງບາງຢ່າງທີ່ເຮົາເຫັນໃນຕອນນີ້ກ່ອນ ເຊັ່ນ: ດວງດາວຫຼາຍດວງທີ່ຢູ່ເທິງຟ້າ ຕົ້ນໄມ້ ສັດຕ່າງໆລວມເຖິງມະນຸດ. ບໍ່ມີໃຜສົງໄສວ່າສິ່ງທັງໝົດນີ້ເປັນພຽງພາບລວງຕາຫຼືເປັນສິ່ງທີ່ບໍ່ມີຢູ່ແທ້ ເຖິງວ່າກ່ອນໜ້ານີ້ສິ່ງທັງໝົດນີ້ຍັງບໍ່ມີ. ແຕ່ເມື່ອພະເຢໂຫວາສ້າງ ມັນກໍມີຢູ່ແທ້. (ປຖກ. 1:1, 26, 27) ຄ້າຍຄືກັນ ພະເຢໂຫວາຕັ້ງໃຈທີ່ຈະເຮັດໃຫ້ມີໂລກໃໝ່ ແລະເພິ່ນຈະເຮັດໃຫ້ເລື່ອງນີ້ເກີດຂຶ້ນແທ້ແນ່ນອນ. ໃນໂລກໃໝ່ຜູ້ຄົນຈະມີໂອກາດໄດ້ຊີວິດຕະຫຼອດໄປແລະມີສຸຂະພາບທີ່ດີສົມບູນແບບ. ເມື່ອຮອດເວລາທີ່ພະເຢໂຫວາກຳນົດໄວ້ ໂລກໃໝ່ກໍຈະເກີດຂຶ້ນແທ້ຄືກັບເອກະພົບຫຼືສິ່ງຕ່າງໆທີ່ຢູ່ອ້ອມໂຕເຮົາມີຢູ່ແທ້.—ອຊຢ. 65:17; ພນມ. 21:3, 4
19. ເຮົາຈະເຮັດໃຫ້ຄວາມເຊື່ອຂອງເຮົາເຂັ້ມແຂງຂຶ້ນໄດ້ແນວໃດ?
19 ຕອນນີ້ໃຫ້ເຮົາໃຊ້ທຸກໂອກາດທີ່ເຮົາມີເພື່ອເຮັດໃຫ້ຄວາມເຊື່ອຂອງເຮົາເຂັ້ມແຂງຂຶ້ນໂດຍເຫັນຄ່າເລື່ອງຄ່າໄຖ່ ຄິດເຖິງພະລັງອຳນາດຂອງພະເຈົ້າ ແລະເຮັດກິດຈະກຳຂອງຄລິດສະຕຽນເປັນປະຈຳ. ຖ້າເຮົາເຮັດແບບນີ້ ເຮົາກໍຈະເປັນໜຶ່ງໃນ “ຄົນທີ່ໄດ້ຮັບສິ່ງທີ່ພະເຈົ້າສັນຍາເປັນລາງວັນເພາະເຮົາມີຄວາມເຊື່ອແລະຄວາມອົດທົນ.”—ຮຣ. 6:11, 12; ຣມ. 5:5
ເພງ 139 ນຶກພາບເມື່ອທຸກສິ່ງກາຍເປັນສິ່ງໃໝ່
a ຫຼາຍຄົນໃນທຸກມື້ນີ້ບໍ່ເຊື່ອໃນຄຳສັນຍາໃນຄຳພີໄບເບິນກ່ຽວກັບໂລກໃໝ່. ເຂົາເຈົ້າຄິດວ່າມັນເປັນພຽງຄວາມຝັນ ມັນດີເກີນໄປທີ່ຈະເປັນຄວາມຈິງ. ແຕ່ເຮົາໝັ້ນໃຈວ່າຄຳສັນຍາຂອງພະເຢໂຫວາທຸກຂໍ້ຈະເປັນຈິງແນ່ນອນ. ເພື່ອທີ່ເຮົາທຸກຄົນຈະໝັ້ນໃຈເລື່ອງນີ້ໄດ້ເຮົາຕ້ອງເຮັດໃຫ້ຄວາມເຊື່ອຂອງເຮົາເຂັ້ມແຂງຂຶ້ນເລື້ອຍໆ. ເຮົາຈະເຮັດແບບນັ້ນໄດ້ແນວໃດ? ໃນບົດຄວາມນີ້ຈະບອກເຮົາ.
b ຊື່ສົມມຸດ
c ເຮົາສາມາດອ່ານບົດຄວາມກ່ຽວກັບຄຳພະຍາກອນໃນຄູ່ມືຄົ້ນຄວ້າສຳລັບພະຍານພະເຢໂຫວາ ປີ 2019 ໃນຫົວຂໍ້ “ຄຳພີໄບເບິນ” ຫົວເລື່ອງ “ຄຳພະຍາກອນ.” ຕົວຢ່າງເຊັ່ນ: ເບິ່ງບົດຄວາມທີ່ຊື່ວ່າ “ມີໃຜຮູ້ອະນາຄົດບໍ?” ໃນຫໍສັງເກດການສະບັບ 1 ພຶດສະພາ 2014 (ພາສາໄທ)