ບົດຄວາມສຶກສາທີ 39
ສະແດງໃຫ້ເຫັນວ່າເຈົ້າເຂັ້ມແຂງໂດຍເປັນຄົນອ່ອນໂຍນ
“ທາດຂອງຜູ້ເປັນນາຍບໍ່ຄວນຜິດຖຽງກັບຜູ້ໃດ ແຕ່ຕ້ອງສຸພາບອ່ອນໂຍນຕໍ່ທຸກຄົນ.”—2ຕມ. 2:24
ເພງ 120 ຮຽນແບບຄວາມອ່ອນໂຍນຂອງພະຄລິດ
ໃຈຄວາມສຳຄັນa
1. ໝູ່ຢູ່ບ່ອນເຮັດວຽກຫຼືຢູ່ໂຮງຮຽນອາດຖາມເຮົາເລື່ອງຫຍັງ?
ເຈົ້າຮູ້ສຶກຢ້ານບໍຖ້າໝູ່ຢູ່ບ່ອນເຮັດວຽກຫຼືຢູ່ໂຮງຮຽນຖາມເລື່ອງຄວາມເຊື່ອຂອງເຈົ້າ? ພວກເຮົາສ່ວນຫຼາຍຮູ້ສຶກຢ້ານ. ແຕ່ຄຳຖາມນີ້ອາດຈະຊ່ວຍເຮົາໃຫ້ເຂົ້າໃຈວ່າເຂົາເຈົ້າຄິດແນວໃດຫຼືເຊື່ອແນວໃດແທ້ໆແລະອາດເປີດໂອກາດໃຫ້ເຮົາໄດ້ບອກເຂົາເຈົ້າເລື່ອງຂ່າວດີ. ແຕ່ບາງເທື່ອເຂົາເຈົ້າຖາມອາດເປັນຍ້ອນວ່າເຂົາເຈົ້າບໍ່ມັກຫຼືຢາກຖຽງກັບເຮົາ. ເລື່ອງນີ້ບໍ່ແປກ ຍ້ອນເຂົາເຈົ້າອາດຈະໄດ້ຍິນຂໍ້ມູນທີ່ບໍ່ແມ່ນຄວາມຈິງກ່ຽວກັບຄວາມເຊື່ອຂອງເຮົາ. (ກຈກ. 28:22) ນອກຈາກນັ້ນ ຍ້ອນເຮົາຢູ່ໃນ “ສະໄໝສຸດທ້າຍ” ເຊິ່ງຫຼາຍຄົນ “ບໍ່ຍອມຜູ້ໃດ” ແລະເປັນຄົນ “ໂຫດຮ້າຍ.”—2ຕມ. 3:1, 3
2. ເປັນຫຍັງເຮົາຕ້ອງເປັນຄົນອ່ອນໂຍນ?
2 ເຈົ້າອາດສົງໄສວ່າ: ‘ຂ້ອຍຈະເປັນຄົນໃຈເຢັນແລະອ່ອນໂຍນໄດ້ແນວໃດເມື່ອມີຄົນຢາກຖຽງກັບຂ້ອຍເລື່ອງຄວາມເຊື່ອ?’ ສິ່ງໃດຈະຊ່ວຍເຈົ້າໄດ້? ຄວາມອ່ອນໂຍນຊ່ວຍໄດ້. ຄົນອ່ອນໂຍນຈະບໍ່ໃຈຮ້າຍງ່າຍ ແຕ່ຈະພະຍາຍາມຄວບຄຸມໂຕເອງເມື່ອເຈິກັບຄວາມຜິດຫວັງຫຼືຄວາມບໍ່ແນ່ນອນ. (ສຸພາ. 16:32) ເຈົ້າອາດຮູ້ສຶກວ່າບໍ່ງ່າຍເລີຍທີ່ຈະເປັນຄົນອ່ອນໂຍນ ແລ້ວເຈົ້າຈະເປັນຄົນອ່ອນໂຍນຫຼາຍຂຶ້ນໄດ້ແນວໃດ? ແລະເຈົ້າຈະຕອບດ້ວຍຄວາມອ່ອນໂຍນແນວໃດເມື່ອມີຄົນຢາກຖຽງກັບເຈົ້າເລື່ອງຄວາມເຊື່ອ? ຖ້າເຈົ້າເປັນພໍ່ແມ່ ເຈົ້າຈະຊ່ວຍລູກແນວໃດໃຫ້ອະທິບາຍຄວາມເຊື່ອດ້ວຍຄວາມອ່ອນໂຍນ? ໃຫ້ເຮົາມາເບິ່ງເລື່ອງນີ້ນຳກັນ.
ເຈົ້າຈະເປັນຄົນອ່ອນໂຍນຫຼາຍຂຶ້ນໄດ້ແນວໃດ?
3. ເປັນຫຍັງຈຶ່ງເວົ້າໄດ້ວ່າຄວາມອ່ອນໂຍນແມ່ນຄວາມເຂັ້ມແຂງ ບໍ່ແມ່ນຄວາມອ່ອນແອ? (2 ຕີໂມທຽວ 2:24, 25)
3 ຄົນທີ່ອ່ອນໂຍນແມ່ນຄົນທີ່ເຂັ້ມແຂງ ບໍ່ແມ່ນຄົນອ່ອນແອ. ຍ້ອນລາວຕ້ອງພະຍາຍາມຫຼາຍແທ້ໆທີ່ຈະໃຈເຢັນຕອນທີ່ເຈິເລື່ອງທີ່ເຮັດໃຫ້ເຄັ່ງຕຶງ. ຄວາມອ່ອນໂຍນເປັນຜົນຢ່າງໜຶ່ງທີ່ເກີດຈາກພະລັງຂອງພະເຈົ້າ. (ຄລຕ. 5:22, 23) ບາງເທື່ອຄຳພາສາກຣີກທີ່ແປວ່າ “ຄວາມອ່ອນໂຍນ” ໃຊ້ເພື່ອພັນລະນາກ່ຽວກັບມ້າປ່າທີ່ຖືກລ້ຽງໃຫ້ເຊື່ອຟັງ. ເຖິງວ່າມ້າປ່າຈະເຊື່ອຟັງ ແຕ່ມັນກໍແຂງແຮງ. ແລ້ວເຮົາເດ ເຮົາຈະເປັນຄົນທີ່ອ່ອນໂຍນແລະໃນເວລາດຽວກັນກໍເປັນຄົນທີ່ເຂັ້ມແຂງໄດ້ແນວໃດ? ເຮົາບໍ່ສາມາດເຮັດແບບນັ້ນໄດ້ດ້ວຍກຳລັງຂອງໂຕເອງ. ເຮົາຕ້ອງອະທິດຖານຂໍພະລັງບໍລິສຸດຈາກພະເຈົ້າ. ຂໍໃຫ້ເພິ່ນຊ່ວຍເຮົາໃຫ້ມີຄຸນລັກສະນະນີ້. ຈາກປະສົບການຂອງຫຼາຍຄົນສະແດງໃຫ້ເຫັນວ່າເປັນໄປໄດ້ທີ່ເຮົາຈະເປັນຄົນອ່ອນໂຍນ. ຕົວຢ່າງເຊັ່ນ: ພີ່ນ້ອງຫຼາຍຄົນໄດ້ຕອບແບບອ່ອນໂຍນເມື່ອມີຄົນເຮັດໃຫ້ເຂົາເຈົ້າໃຈຮ້າຍ. ການເຮັດແບບນີ້ເຮັດໃຫ້ຄົນທີ່ສັງເກດເຫັນຮູ້ສຶກດີຕໍ່ພະຍານພະເຢໂຫວາ. (ອ່ານ 2 ຕີໂມທຽວ 2:24, 25) ເຮົາຈະເຮັດໃຫ້ຄວາມອ່ອນໂຍນເປັນຄວາມເຂັ້ມແຂງໄດ້ແນວໃດ?
4. ເຮົາຮຽນຫຍັງຈາກອີຊາກເລື່ອງຄວາມໃຈເຢັນ?
4 ໃນຄຳພີໄບເບິນມີຫຼາຍເລື່ອງທີ່ສະແດງໃຫ້ເຫັນວ່າຄວາມອ່ອນໂຍນເປັນຄຸນລັກສະນະທີ່ສຳຄັນ. ໃຫ້ເຮົາມາເບິ່ງເລື່ອງຂອງອີຊາກ. ຕອນທີ່ລາວຕັ້ງຖິ່ນຖານຢູ່ເກລາໃນເຂດຂອງພວກຟີລິດສະຕີນ ເຂົາເຈົ້າໄດ້ອິດສາລາວແລະຖົມນ້ຳສ້າງທີ່ຄົນຮັບໃຊ້ຂອງພໍ່ລາວໄດ້ຂຸດໄວ້. ແທນທີ່ອີຊາກຈະຕໍ່ສູ້ເພື່ອຮັກສານ້ຳສ້າງໄວ້ ລາວໄດ້ຍ້າຍໄປຢູ່ບ່ອນອື່ນແລະຂຸດນ້ຳສ້າງໃໝ່. (ປຖກ. 26:12-18) ແຕ່ພວກຟີລິດສະຕີນກໍຍັງມາບອກວ່ານ້ຳສ້າງນັ້ນເປັນຂອງເຂົາເຈົ້າ. ເຖິງຈະເປັນແນວນັ້ນ ແຕ່ອີຊາກກໍຍັງໃຈເຢັນ. (ປຖກ. 26:19-25) ສິ່ງໃດຊ່ວຍອີຊາກໃຫ້ໃຈເຢັນ ເຖິງວ່າມີຄົນຕັ້ງໃຈເຮັດໃຫ້ລາວໃຈຮ້າຍ? ລາວຄືຊິເຮັດຕາມຕົວຢ່າງຂອງອັບຣາຮາມພໍ່ຂອງລາວທີ່ແກ້ໄຂບັນຫາແບບໃຈເຢັນ ແລະເຮັດຕາມຕົວຢ່າງຂອງຊາຣາແມ່ຂອງລາວທີ່ມີ “ໃຈທີ່ສະຫງົບແລະອ່ອນໂຍນ.”—1ປຕ. 3:4-6; ປຖກ. 21:22-34
5. ມີຕົວຢ່າງຫຍັງທີ່ສະແດງໃຫ້ເຫັນວ່າ ພໍ່ແມ່ທີ່ເປັນຄລິດສະຕຽນສາມາດຊ່ວຍລູກໃຫ້ເປັນຄົນອ່ອນໂຍນໄດ້?
5 ເຈົ້າທີ່ເປັນພໍ່ແມ່ ຂໍໃຫ້ໝັ້ນໃຈວ່າເຈົ້າສາມາດຊ່ວຍລູກໃຫ້ເປັນຄົນອ່ອນໂຍນໄດ້. ໃຫ້ເຮົາມາເບິ່ງປະສົບການຂອງແມັກເຊັນອາຍຸ 17 ປີ. ລາວຖືກເຍາະເຍີ້ຍຕອນທີ່ຢູ່ໂຮງຮຽນແລະຢູ່ເຂດປະກາດ. ພໍ່ແມ່ຂອງລາວໄດ້ພະຍາຍາມຊ່ວຍລາວໃຫ້ເປັນຄົນອ່ອນໂຍນ. ເຂົາເຈົ້າບອກວ່າ: “ຕອນນີ້ແມັກເຊັນເຂົ້າໃຈແລ້ວວ່າ ເປັນເລື່ອງງ່າຍທີ່ຈະຕອບໂຕ້ດ້ວຍຄວາມໃຈຮ້າຍຫຼືໃຊ້ຄວາມຮຸນແຮງ. ແຕ່ຄົນທີ່ເຂັ້ມແຂງແທ້ໆຈະຄວບຄຸມໂຕເອງໄດ້.” ເປັນຕາດີໃຈແທ້ໆທີ່ຕອນນີ້ແມັກເຊັນຮຽນຮູ້ທີ່ຈະເປັນຄົນອ່ອນໂຍນ.
6. ການອະທິດຖານຊ່ວຍເຮົາໃຫ້ສະແດງຄວາມອ່ອນໂຍນຫຼາຍຂຶ້ນໄດ້ແນວໃດ?
6 ເຮົາຈະເຮັດແນວໃດຖ້າມີຄົນເຮັດໃຫ້ເຮົາໃຈຮ້າຍ? ຜູ້ນັ້ນອາດເວົ້າໃສ່ຮ້າຍຊື່ຂອງພະເຈົ້າຫຼືດູຖູກຄຳພີໄບເບິນ. ເຮົາຄວນອະທິດຖານຂໍພະລັງບໍລິສຸດຈາກພະເຢໂຫວາເພື່ອຊ່ວຍເຮົາໃຫ້ມີສະຕິປັນຍາທີ່ຈະຕອບເຂົາເຈົ້າໃນແບບທີ່ອ່ອນໂຍນໄດ້. ແລ້ວຖ້າເຮົາບໍ່ໄດ້ຕອບເຂົາເຈົ້າໃນແບບທີ່ອ່ອນໂຍນເດ ເຮົາຄວນເຮັດແນວໃດ? ໃຫ້ເຮົາອະທິດຖານເຖິງພະເຢໂຫວາກ່ຽວກັບເລື່ອງນັ້ນແລະຄິດວ່າເຮົາຈະຕອບໃນແບບທີ່ອ່ອນໂຍນໄດ້ແນວໃດໃນເທື່ອຕໍ່ໄປ. ແລ້ວພະເຢໂຫວາຈະໃຫ້ພະລັງບໍລິສຸດກັບເຮົາເພື່ອຊ່ວຍເຮົາໃຫ້ຄວບຄຸມໂຕເອງແລະຕອບໃນແບບທີ່ອ່ອນໂຍນ.
7. ການຈື່ຂໍ້ພະຄຳພີຊ່ວຍເຮົາແນວໃດເມື່ອມີຄົນເຮັດໃຫ້ໃຈຮ້າຍ? (ສຸພາສິດ 15:1, 18)
7 ໃນຄຳພີໄບເບິນ ມີຂໍ້ຄຳພີຫຼາຍຂໍ້ທີ່ຊ່ວຍເຮົາໃຫ້ຄວບຄຸມຄຳເວົ້າໄດ້ເມື່ອມີຄົນເຮັດໃຫ້ເຮົາໃຈຮ້າຍ. ພະລັງບໍລິສຸດຂອງພະເຈົ້າຈະຊ່ວຍເຮົາໃຫ້ຈື່ຂໍ້ຄຳພີເຫຼົ່ານັ້ນທີ່ເຮົາໄດ້ອ່ານໃນຄຳພີໄບເບິນ. (ຢຮ. 14:26) ຕົວຢ່າງເຊັ່ນ: ໃນສຸພາສິດມີຫຼັກການຫຼາຍຂໍ້ທີ່ຊ່ວຍເຮົາໃຫ້ເປັນຄົນອ່ອນໂຍນແລະຍັງຊ່ວຍເຮົາໃຫ້ເຫັນວ່າເປັນຫຍັງຈຶ່ງເປັນເລື່ອງທີ່ດີທີ່ເຮົາຈະໃຈເຢັນເມື່ອຢູ່ໃນສະຖານະການທີ່ເຄັ່ງຕຶງ.—ອ່ານສຸພາສິດ 15:1, 18; ສຸພາ. 10:19; 17:27; 21:23; 25:15
ການມີຄວາມເຂົ້າໃຈຊ່ວຍເຮົາແນວໃດໃຫ້ເປັນຄົນອ່ອນໂຍນ?
8. ເປັນຫຍັງເຮົາຄວນຄິດເຖິງເຫດຜົນທີ່ຄົນຖາມເລື່ອງຄວາມເຊື່ອຂອງເຮົາ?
8 ການມີຄວາມເຂົ້າໃຈຈະຊ່ວຍເຮົາໃຫ້ເປັນຄົນອ່ອນໂຍນໄດ້ຄືກັນ. (ສຸພາ. 19:11) ຄົນທີ່ມີຄວາມເຂົ້າໃຈຈະຄວບຄຸມໂຕເອງໄດ້ເມື່ອມີຄົນມາສໍ້ເລື່ອງຄວາມເຊື່ອຂອງລາວ. ບາງເທື່ອເຮົາກໍບໍ່ຮູ້ແທ້ໆວ່າຄົນທີ່ຖາມມີເຈຕະນາຫຍັງ. ດັ່ງນັ້ນ ກ່ອນທີ່ເຮົາຈະຕອບ ໃຫ້ເຮົາຄິດດີໆວ່າເປັນຫຍັງລາວຈຶ່ງຖາມແບບນັ້ນ?—ສຸພາ. 16:23
9. ກີເດໂອນສະແດງຄວາມເຂົ້າໃຈແລະຄວາມອ່ອນໂຍນແນວໃດຕອນທີ່ລາວຕອບພວກຜູ້ຊາຍຈາກຕະກູນເອຟຣາອິມ?
9 ໃຫ້ເຮົາມາເບິ່ງວິທີທີ່ກີເດໂອນຕອບພວກຜູ້ຊາຍໃນຕະກູນເອຟຣາອິມ. ເຂົາເຈົ້າໃຈຮ້າຍໃຫ້ກີເດໂອນຫຼາຍທີ່ບໍ່ໄດ້ຊວນເຂົາເຈົ້າໄປຕໍ່ສູ້ກັບສັດຕູຂອງອິດສະຣາເອນ. ເຮົາບໍ່ຮູ້ເຫດຜົນແທ້ໆວ່າເປັນຫຍັງເຂົາເຈົ້າຈຶ່ງໃຈຮ້າຍຫຼາຍປານນັ້ນ. ອາດຈະເປັນຍ້ອນເຂົາເຈົ້າຄຽດບໍ? ເປັນໄປໄດ້. ບໍ່ວ່າຈະຍ້ອນເຫດຜົນຫຍັງກີເດໂອນພະຍາຍາມເຂົ້າໃຈຄວາມຮູ້ສຶກຂອງເຂົາເຈົ້າແລະຕອບເຂົາເຈົ້າດ້ວຍຄວາມອ່ອນໂຍນ. ຜົນເປັນແນວໃດ? ຄຳພີໄບເບິນບອກວ່າ: “ເມື່ອກີເດໂອນເວົ້າແນວນັ້ນ ເຂົາເຈົ້າກໍໃຈເຢັນລົງ.”—ຜຕສ. 8:1-3
10. ເຮົາຄວນຕອບແນວໃດຖ້າມີຄົນຖາມເລື່ອງຄວາມເຊື່ອຂອງເຮົາ? (1 ເປໂຕ 3:15)
10 ບາງເທື່ອໝູ່ຢູ່ໂຮງຮຽນຫຼືຢູ່ບ່ອນເຮັດວຽກອາດຖາມເຮົາກ່ຽວກັບມາດຕະຖານດ້ານສິນລະທຳໃນຄຳພີໄບເບິນ. ເຮົາຕ້ອງພະຍາຍາມອະທິບາຍກັບເຂົາເຈົ້າວ່າເປັນຫຍັງມາດຕະຖານໃນຄຳພີໄບເບິນຈຶ່ງດີທີ່ສຸດ ແຕ່ໃນເວລາດຽວກັນເຮົາກໍຕ້ອງນັບຖືຄວາມຄິດເຫັນຂອງເຂົາເຈົ້ານຳ. (ອ່ານ 1 ເປໂຕ 3:15) ດັ່ງນັ້ນ ແທນທີ່ເຮົາຈະຄິດວ່າເຂົາເຈົ້າຖາມຍ້ອນຢາກຫາເລື່ອງຫຼືຢາກທົດລອງເຮົາ ໃຫ້ເຮົາຄິດວ່າຄຳຖາມຂອງລາວຊ່ວຍເຮົາໃຫ້ຮູ້ຈັກລາວຫຼາຍຂຶ້ນ. ບໍ່ວ່າຄົນທີ່ຖາມຈະມີເຫດຜົນຫຍັງ ເຮົາກໍພະຍາຍາມທີ່ຈະຕອບແບບອ່ອນໂຍນ. ຄຳຕອບຂອງເຮົາອາດເຮັດໃຫ້ລາວກັບໄປຄິດວ່າສິ່ງທີ່ລາວເຊື່ອມີເຫດຜົນບໍ. ເຖິງວ່າລາວຈະຖາມແບບເຍາະເຍີ້ຍແລະບໍ່ມີມາລະຍາດ ເຮົາກໍຄວນຕອບລາວແບບອ່ອນໂຍນສະເໝີ.—ຣມ. 12:17
ເຈົ້າຈະຕອບໄດ້ດີກວ່າຖ້າເຈົ້າຄິດກ່ອນວ່າເປັນຫຍັງລາວຈຶ່ງຢາກໃຫ້ເຈົ້າສະຫຼອງວັນເກີດກັບລາວ (ເບິ່ງຂໍ້ 11-12)
11-12. (ກ) ກ່ອນທີ່ຈະຕອບຄຳຖາມ ເຮົາຄວນຄິດເຖິງເລື່ອງຫຍັງ? (ເບິ່ງຮູບ) (ຂ) ການເຮັດແບບນີ້ຈະເປີດໂອກາດໃຫ້ເຮົາໄດ້ລົມກັບຄົນອື່ນຫຼາຍຂຶ້ນໄດ້ແນວໃດ?
11 ຂໍໃຫ້ຄິດເຖິງສະຖານະການຕໍ່ໄປນີ້. ສົມມຸດວ່າໝູ່ຢູ່ບ່ອນເຮັດວຽກຖາມວ່າ: ‘ເປັນຫຍັງເຈົ້າບໍ່ສະຫຼອງວັນເກີດ?’ ໃຫ້ຄິດວ່າລາວຖາມແບບນັ້ນອາດຈະເປັນຍ້ອນລາວສົງໄສວ່າພະຍານພະເຢໂຫວາບໍ່ເຮັດອີ່ຫຍັງແບບມ່ວນໆເລີຍບໍ? ຫຼືລາວອາດຄິດວ່າການທີ່ເຮົາບໍ່ສະຫຼອງວັນເກີດຈະເຮັດໃຫ້ເຮົາບໍ່ສາມັກຄີກັບໝູ່ແລະທຳລາຍບັນຍາກາດໃນບ່ອນເຮັດວຽກບໍ? ຖ້າເປັນແບບນັ້ນ ເຮົາກໍອາດຈະຊ່ວຍລາວໃຫ້ກັງວົນໜ້ອຍລົງໂດຍຂອບໃຈລາວທີ່ເປັນຫ່ວງໝູ່ທີ່ເຮັດວຽກນຳກັນ ແລະເຮັດໃຫ້ລາວໝັ້ນໃຈວ່າເຮົາເອງກໍຢາກສ້າງບັນຍາກາດທີ່ດີໃນບ່ອນເຮັດວຽກ. ການເຮັດແບບນີ້ອາດຈະເຮັດໃຫ້ເຮົາມີໂອກາດລົມກັບລາວເລື່ອງທີ່ຄຳພີໄບເບິນບອກກ່ຽວກັບການສະຫຼອງວັນເກີດ.
12 ເຮົາອາດໃຊ້ວິທີຄ້າຍໆກັນເມື່ອມີຄົນຖາມເລື່ອງທີ່ອາດເຮັດໃຫ້ເກີດຄວາມຂັດແຍ່ງກັນ ເຊັ່ນ ໝູ່ຢູ່ໂຮງຮຽນອາດເວົ້າວ່າສິ່ງທີ່ພະຍານພະເຢໂຫວາຄິດກ່ຽວກັບເລື່ອງການຮັກເພດດຽວກັນນັ້ນບໍ່ຖືກ. ລາວເວົ້າແບບນັ້ນອາດເປັນຍ້ອນວ່າລາວເຂົ້າໃຈຜິດກ່ຽວກັບພະຍານພະເຢໂຫວາບໍ? ລາວອາດຈະມີໝູ່ຫຼືມີພີ່ນ້ອງທີ່ເປັນຄົນຮັກເພດດຽວກັນບໍ? ຫຼືລາວອາດຈະຄິດວ່າເຮົາຊັງຄົນຮັກເພດດຽວກັນບໍ? ບໍ່ວ່າຈະເປັນຍ້ອນຫຍັງ ເຮົາຕ້ອງເຮັດໃຫ້ລາວໝັ້ນໃຈວ່າເຮົາຮັກທຸກຄົນແລະເຮົາຮູ້ວ່າທຸກຄົນມີສິດທີ່ຈະເລືອກໃຊ້ຊີວິດຂອງໂຕເອງ.b (1ປຕ. 2:17) ຖ້າເຮົາເຮັດແບບນັ້ນ ເຮົາກໍມີໂອກາດໄດ້ລົມກັບລາວກ່ຽວກັບປະໂຫຍດຂອງການເຮັດຕາມມາດຕະຖານດ້ານສິນລະທຳໃນຄຳພີໄບເບິນ.
13. ເມື່ອເຈົ້າເຈິຄົນທີ່ເວົ້າວ່າຄົນທີ່ເຊື່ອເລື່ອງພະເຈົ້າເປັນພວກງົມງວາຍ ເຈົ້າຈະຊ່ວຍລາວແນວໃດ?
13 ຖ້າເຮົາເຈິກັບຄົນທີ່ບໍ່ເຫັນດີກັບຄວາມເຊື່ອຂອງເຮົາ ເຮົາບໍ່ຄວນສະຫຼຸບເອົາເອງວ່າເຮົາຮູ້ທຸກຢ່າງກ່ຽວກັບສິ່ງທີ່ລາວເຊື່ອ. (ຕຕ. 3:2) ຕົວຢ່າງເຊັ່ນ: ຖ້າໝູ່ຢູ່ໂຮງຮຽນບອກວ່າພວກທີ່ເຊື່ອເລື່ອງຂອງພະເຈົ້າເປັນພວກງົມງວາຍ ເຮົາຄວນສະຫຼຸບເອົາເອງບໍວ່າລາວເຊື່ອວິວັດທະນາການແລະມີຄວາມຮູ້ຫຼາຍກ່ຽວກັບເລື່ອງນັ້ນ? ທີ່ຈິງແລ້ວ ທີ່ລາວບອກວ່າພວກທີ່ເຊື່ອເລື່ອງພະເຈົ້າເປັນພວກງົມງວາຍ ລາວອາດເວົ້າຕາມຄົນອື່ນຊື່ໆ. ແທນທີ່ຈະພະຍາຍາມຖຽງກັບລາວເລື່ອງວິວັດທະນາການ ເຮົາຄວນໃຫ້ຂໍ້ມູນລາວເພື່ອໃຫ້ລາວຄິດກ່ຽວກັບເລື່ອງນີ້ຫຼາຍຂຶ້ນ. ເຮົາອາດຈະໃຫ້ລາວເບິ່ງຂໍ້ມູນໃນເວັບໄຊ jw.org ກ່ຽວກັບຫຼັກຖານທີ່ວ່າພະເຈົ້າສ້າງສິ່ງຕ່າງໆໃນທຳມະຊາດ. ບໍ່ແນ່ໄດ໋ ເມື່ອລາວໄດ້ອ່ານບົດຄວາມຫຼືເບິ່ງວິດີໂອໃນເວັບໄຊ ລາວອາດຈະຢາກລົມກັບເຈົ້າຫຼາຍຂຶ້ນກໍໄດ້. ການທີ່ເຮົານັບຖືຄວາມຄິດເຫັນຂອງຄົນອື່ນອາດເຮັດໃຫ້ລາວຢາກຮູ້ຈັກຄຳພີໄບເບິນຫຼາຍຂຶ້ນ.
14. ນີວໃຊ້ເວັບໄຊຂອງເຮົາແນວໃດເພື່ອຊ່ວຍໝູ່ບໍ່ໃຫ້ເຂົ້າໃຈຜິດກ່ຽວກັບພະຍານພະເຢໂຫວາ?
14 ໄວລຸ້ນຄົນໜຶ່ງທີ່ຊື່ນີວໃຊ້ເວັບໄຊຂອງເຮົາເພື່ອຊ່ວຍຄົນອື່ນບໍ່ໃຫ້ເຂົ້າໃຈຜິດກ່ຽວກັບພະຍານພະເຢໂຫວາ. ລາວບອກວ່າ: “ໝູ່ຄົນໜຶ່ງເວົ້າວ່າ ຂ້ອຍບໍ່ເຊື່ອໃນວິທະຍາສາດເຊິ່ງເປັນເລື່ອງທີ່ເປັນຄວາມຈິງຍ້ອນຂ້ອຍເຊື່ອຄຳພີໄບເບິນເຊິ່ງເປັນເລື່ອງທີ່ແຕ່ງຂຶ້ນມາ.” ນອກຈາກນັ້ນ ໝູ່ຜູ້ນີ້ຍັງບໍ່ຍອມໃຫ້ນີວອະທິບາຍເລື່ອງຄວາມເຊື່ອຂອງໂຕເອງ. ເມື່ອເປັນແບບນັ້ນ ນີວຈຶ່ງໃຫ້ໝູ່ເບິ່ງເວັບໄຊ jw.org ໃນສ່ວນ “ວິທະຍາສາດກັບຄຳພີໄບເບິນ.” ຈາກນັ້ນ ນີວກໍສັງເກດວ່າໝູ່ຜູ້ນີ້ເຂົ້າໄປເບິ່ງເວັບໄຊແທ້ໆແລ້ວນີວກໍມີໂອກາດໄດ້ລົມກັບໝູ່ເລື່ອງຕົ້ນກຳເນີດຂອງຊີວິດ. ເຈົ້າເອງກໍອາດຈະປະສົບຄວາມສຳເລັດແບບນີ້ໄດ້ຄືກັນ.
ກຽມນຳກັນເປັນຄອບຄົວ
15. ພໍ່ແມ່ຈະຊ່ວຍລູກແນວໃດໃຫ້ຮູ້ວິທີຕອບແບບອ່ອນໂຍນຕອນທີ່ຖືກໝູ່ຢູ່ໂຮງຮຽນຖາມຫຼືເວົ້າບໍ່ດີກ່ຽວກັບຄວາມເຊື່ອ?
15 ພໍ່ແມ່ສາມາດສອນລູກໃຫ້ຮູ້ວິທີຕອບແບບອ່ອນໂຍນໄດ້ຕອນທີ່ຖືກໝູ່ຢູ່ໂຮງຮຽນຖາມຫຼືເວົ້າບໍ່ດີກ່ຽວກັບຄວາມເຊື່ອຂອງລູກ. (ຢກບ. 3:13) ພໍ່ແມ່ບາງຄົນຈະໃຊ້ເວລາຕອນທີ່ນະມັດສະການປະຈຳຄອບຄົວຝຶກຊ້ອມກັບລູກ. ເຂົາເຈົ້າອາດຈະເວົ້າເລື່ອງທີ່ຄົນຢູ່ໂຮງຮຽນຈະຖາມ ແລ້ວກໍລົມກັບລູກວ່າຈະຕອບຄຳຖາມເຫຼົ່ານັ້ນແນວໃດດີ. ຫຼັງຈາກນັ້ນ ພໍ່ແມ່ກໍຈະສາທິດໃຫ້ລູກເບິ່ງແລະສອນລູກນຳວ່າຈະເວົ້າແບບອ່ອນໂຍນແລະເປັນຕາຟັງໄດ້ແນວໃດ.—ເບິ່ງຂອບ “ການຝຶກຊ້ອມນຳກັນຊ່ວຍຄອບຄົວຂອງເຈົ້າໄດ້.”
16-17. ການຝຶກຊ້ອມນຳກັນຈະຊ່ວຍລູກທີ່ເປັນໄວລຸ້ນແນວໃດ?
16 ການຝຶກຊ້ອມນຳກັນເປັນຄອບຄົວຈະຊ່ວຍໃຫ້ລູກໝັ້ນໃຈໃນສິ່ງທີ່ເຂົາເຈົ້າເຊື່ອແລະອະທິບາຍໃຫ້ຄົນອື່ນຟັງໄດ້. ສິ່ງໜຶ່ງທີ່ຊ່ວຍໄດ້ແມ່ນ ບົດຄວາມຊຸດ “ໜຸ່ມສາວຖາມວ່າ” ແລະສ່ວນທີ່ຊື່ວ່າ “ຝຶກຄວາມຄິດສຳລັບໄວລຸ້ນ” ໃນເວັບໄຊ jw.org. ສອງສ່ວນນີ້ອອກແບບມາເພື່ອຊ່ວຍໄວລຸ້ນໃຫ້ໝັ້ນໃຈໃນຄວາມເຊື່ອຫຼາຍຂຶ້ນແລະຊ່ວຍເຂົາເຈົ້າໃຫ້ກຽມຄຳຕອບເປັນຄຳເວົ້າຂອງໂຕເອງໄດ້. ຖ້າໝົດຄອບຄົວໃຊ້ 2 ສ່ວນນີ້ໃນການນະມັດສະການປະຈຳຄອບຄົວນຳກັນ ທຸກຄົນກໍຈະຮູ້ວິທີອະທິບາຍຄວາມເຊື່ອໃນແບບທີ່ອ່ອນໂຍນແລະເປັນຕາຟັງ.
17 ໄວລຸ້ນຄົນໜຶ່ງທີ່ຊື່ມັດທິວບອກວ່າ ການຝຶກຊ້ອມນຳກັນເປັນຄອບຄົວຊ່ວຍລາວໄດ້ຫຼາຍແທ້ໆ. ຕອນທີ່ນະມັດສະການປະຈຳຄອບຄົວ ລາວກັບພໍ່ແມ່ຈະຄົ້ນຄວ້າເລື່ອງທີ່ໝູ່ໃນຫ້ອງມັກຖາມ. ລາວເລົ່າວ່າ: “ຂ້ອຍກັບພໍ່ແມ່ຈະຄິດເຖິງສິ່ງທີ່ໝູ່ອາດຈະຖາມ ແລະເຮົາຈະຄົ້ນຄວ້ານຳກັນແລະຝຶກຊ້ອມວ່າຈະຕອບແນວໃດດີ. ການເຮັດແບບນີ້ຊ່ວຍຂ້ອຍໃຫ້ເຫັນເຫດຜົນແຈ້ງຂຶ້ນວ່າເປັນຫຍັງຂ້ອຍຈຶ່ງເຊື່ອແບບນັ້ນ ແລະເຮັດໃຫ້ຂ້ອຍຮູ້ສຶກໝັ້ນໃຈແລະຮູ້ສຶກງ່າຍຂຶ້ນທີ່ຈະຕອບຄົນອື່ນແບບອ່ອນໂຍນ.”
18. ຕາມໂກໂລຊາຍ 4:6 ອັນໃດເປັນສິ່ງທີ່ສຳຄັນ?
18 ເຖິງວ່າເຮົາຈະອະທິບາຍຢ່າງຈະແຈ້ງແລະມີເຫດຜົນ ແຕ່ກໍບໍ່ແມ່ນທຸກຄົນຢາກຟັງເຮົາ. ສິ່ງທີ່ຈະຊ່ວຍເຮົາໄດ້ແມ່ນ ເຮົາຕ້ອງເວົ້າໃນແບບທີ່ເປັນຕາຟັງແລະອ່ອນໂຍນ. (ອ່ານໂກໂລຊາຍ 4:6) ການເວົ້າເຖິງຄວາມເຊື່ອຂອງເຮົາກັບຄົນອື່ນອາດສົມທຽບຄືກັບການໂຍນໝາກບານ. ເຮົາອາດຈະໂຍນຄ່ອຍໆຫຼືໂຍນແຮງໆກໍໄດ້. ຖ້າເຮົາໂຍນຄ່ອຍໆຄົນທີ່ຮັບກໍຈະຮັບໄດ້ງ່າຍກວ່າແລະອາດຈະຫຼິ້ນກັບເຮົາຕໍ່. ຄ້າຍຄືກັນ ຖ້າເຮົາອະທິບາຍຄວາມເຊື່ອແບບທີ່ເປັນຕາຟັງແລະອ່ອນໂຍນ ຄົນທີ່ລົມກັບເຮົາກໍອາດຈະຟັງເຮົາຫຼາຍຂຶ້ນແລະຢາກລົມກັບເຮົາຕໍ່. ແຕ່ກໍເປັນໄປໄດ້ທີ່ເຮົາຈະເຈິຄົນທີ່ດູຖູກຄວາມເຊື່ອຂອງເຮົາຫຼືລົມກັບເຮົາຍ້ອນຢາກເອົາຊະນະຊື່ໆ. ຖ້າເປັນແບບນັ້ນ ເຮົາກໍບໍ່ຈຳເປັນຕ້ອງລົມກັບລາວຕໍ່. (ສຸພາ. 26:4) ແຕ່ກໍມີໜ້ອຍຄົນທີ່ເປັນແບບນັ້ນ ຄົນສ່ວນຫຼາຍອາດຢາກຟັງເຮົາຖ້າເຮົາເວົ້າແບບອ່ອນໂຍນ.
19. ອັນໃດຄວນເຮັດໃຫ້ເຮົາຢາກສະແດງຄວາມອ່ອນໂຍນຕອນທີ່ອະທິບາຍເລື່ອງຄວາມເຊື່ອຂອງເຮົາ?
19 ເຮົາເຫັນແລ້ວວ່າຖ້າເຮົາພະຍາຍາມເປັນຄົນອ່ອນໂຍນ ເຮົາຈະໄດ້ຮັບປະໂຫຍດຫຼາຍແທ້ໆ. ໃຫ້ເຈົ້າຂໍຄວາມເຂັ້ມແຂງຈາກພະເຢໂຫວາເພື່ອເຈົ້າຈະອ່ອນໂຍນໄດ້ຕອນທີ່ມີຄົນເວົ້າໃຫ້ເຈົ້າຫຼືມີຄົນຖາມເລື່ອງທີ່ອາດເຮັດໃຫ້ເກີດຄວາມຂັດແຍ້ງກັນ. ໃຫ້ຈື່ໄວ້ວ່າ ເຖິງວ່າຈະມີຄວາມຄິດທີ່ບໍ່ກົງກັນ ແຕ່ຖ້າເຈົ້າເປັນຄົນອ່ອນໂຍນເຈົ້າກໍຈະຊ່ວຍບໍ່ໃຫ້ເກີດການຜິດຖຽງກັນ. ນອກຈາກນັ້ນ ຖ້າເຈົ້າຕອບແບບອ່ອນໂຍນແລະດ້ວຍຄວາມນັບຖື ເຈົ້າກໍອາດຈະຊ່ວຍໃຫ້ຄົນທີ່ມາຖາມເຈົ້າເບິ່ງພະຍານພະເຢໂຫວາແລະຄວາມຈິງໃນຄຳພີໄບເບິນໃນແບບທີ່ດີຂຶ້ນ. ໃຫ້ “ພ້ອມຢູ່ສະເໝີທີ່ຈະອະທິບາຍ” ເລື່ອງຄວາມເຊື່ອຂອງເຈົ້າແລະໃຫ້ “ເຮັດຢ່າງສຸພາບແລະດ້ວຍຄວາມນັບຖືຈາກໃຈ.” (1ປຕ. 3:15) ຂໍໃຫ້ເຈົ້າພະຍາຍາມສະແດງໃຫ້ຄົນອື່ນເຫັນວ່າເຈົ້າເຂັ້ມແຂງໂດຍເປັນຄົນອ່ອນໂຍນ.
ເພງ 88 ຂໍໃຫ້ເຮົາຮູ້ທາງຂອງພະອົງ
a ບົດຄວາມນີ້ມີຄຳແນະນຳທີ່ດີທີ່ຈະຊ່ວຍເຮົາໃຫ້ອະທິບາຍຄວາມເຊື່ອແບບອ່ອນໂຍນຕອນທີ່ມີຄົນຖາມຫຼືເຮັດໃຫ້ເຮົາໃຈຮ້າຍ.
b ເບິ່ງຄຳແນະນຳທີ່ດີກ່ຽວກັບເລື່ອງນີ້ໃນບົດຄວາມ “ຄຳພີໄບເບິນເວົ້າແນວໃດກ່ຽວກັບການຮັກຮ່ວມເພດ?” ໃນຕື່ນເຖີດ! ປີ 2016 ສະບັບທີ 4. (ພາສາໄທ)
c ເຈົ້າສາມາດເຂົ້າໄປເບິ່ງຂໍ້ມູນດີໆໃນບົດຄວາມຊຸດ “ໜຸ່ມສາວຖາມວ່າ” ແລະສ່ວນທີ່ຊື່ວ່າ “ຄຳຖາມທີ່ພົບເລື້ອຍໆກ່ຽວກັບພະຍານພະເຢໂຫວາ” ໃນເວັບໄຊ jw.org. (ພາສາໄທ)