ໃຫ້ພະເຢໂຫວາຊີ້ນຳເຈົ້າເລື່ອງການດື່ມເຄື່ອງດື່ມມຶນເມົາ
ພະເຢໂຫວາໃຫ້ຂອງຂວັນທີ່ມີຄ່າຫຼາຍຢ່າງກັບພວກເຮົາ ເຊິ່ງລວມເຖິງອິດສະຫຼະໃນການຕັດສິນໃຈ. ໜ້າສົນໃຈທີ່ຄຳພີໄບເບິນບອກວ່າເຫຼົ້າແວງກໍເປັນຂອງຂວັນຈາກພະເຈົ້າ. ພະຄຳພີຂໍ້ໜຶ່ງບອກວ່າ: “ອາຫານເຮັດໃຫ້ອາລົມດີ ເຫຼົ້າແວງເຮັດໃຫ້ມ່ວນຊື່ນ.” (ຜູ້ປ. 10:19; ເພງ. 104:15, ລ.ມ) ແຕ່ເຈົ້າກໍອາດສັງເກດເຫັນວ່າ ບາງຄົນກໍມີບັນຫາເລື່ອງການດື່ມເຄື່ອງດື່ມມຶນເມົາ. ນອກຈາກນັ້ນ ຄົນໃນໂລກກໍຄິດເຫັນບໍ່ຄືກັນໃນເລື່ອງການດື່ມເຄື່ອງດື່ມມຶນເມົາ. ຄັນຊັ້ນ ຄລິດສະຕຽນຈະຊອກຫາຄຳແນະນຳທີ່ສະຫຼາດກ່ຽວກັບເລື່ອງນີ້ໄດ້ຈາກໃສ?
ບໍ່ວ່າເຮົາຈະຢູ່ປະເທດໃດຫຼືມີວັດທະນະທຳແບບໃດ ເຮົາຄວນຄິດແບບດຽວກັບພະເຢໂຫວາ ແລະຕັດສິນໃຈໂດຍອາໄສຄຳແນະນຳທີ່ມາຈາກເພິ່ນສະເໝີ. ການເຮັດແບບນີ້ຈະເຮັດໃຫ້ເຮົາມີຊີວິດທີ່ມີຄວາມສຸກຫຼາຍຂຶ້ນ.
ເຈົ້າອາດເຫັນວ່າຫຼາຍຄົນໃນໂລກນີ້ມັກດື່ມເຄື່ອງດື່ມມຶນເມົາຫຼາຍ. ບາງຄົນດື່ມຍ້ອນຢາກຮູ້ສຶກຜ່ອນຄາຍ. ບາງຄົນດື່ມຍ້ອນຢາກລືມບັນຫາ. ສ່ວນບາງຄົນກໍດື່ມຍ້ອນຢາກເຮັດໃຫ້ຄົນອື່ນເຫັນວ່າໂຕເອງເປັນຜູ້ໃຫຍ່ແລ້ວຫຼືເພື່ອໃຫ້ຄົນອື່ນເຫັນວ່າໂຕເອງເກັ່ງ.
ແຕ່ພວກເຮົາທີ່ເປັນຄລິດສະຕຽນມີຄຳແນະນຳທີ່ດີຈາກພະເຢໂຫວາພະເຈົ້າທີ່ຮັກເຮົາ ເຊັ່ນ: ເພິ່ນຊ່ວຍເຮົາໃຫ້ເຫັນຜົນເສຍຫຼາຍຢ່າງຂອງການດື່ມເຄື່ອງດື່ມມຶນເມົາຫຼາຍເກີນໄປ. ເຮົາອ່ານເລື່ອງນີ້ໄດ້ຈາກສຸພາສິດ 23:29-35 ເຊິ່ງເວົ້າເຖິງສະພາບຂອງຄົນເມົາແລະຜົນເສຍທີ່ຕາມມາ.a ພີ່ນ້ອງແດນນຽວທີ່ຢູ່ເອີຣົບເລົ່າໃຫ້ຟັງວ່າຊີວິດລາວເປັນແນວໃດຕອນທີ່ລາວຍັງບໍ່ໄດ້ເປັນພະຍານພະເຢໂຫວາ. ລາວບອກວ່າ: “ຕອນນັ້ນຂ້ອຍເມົາແທ້ເມົາວ່າ ຂ້ອຍຈຶ່ງເຮັດສິ່ງທີ່ບໍ່ດີຫຼາຍຢ່າງ ເຊິ່ງເຮັດໃຫ້ຂ້ອຍເສຍໃຈຈົນຮອດທຸກມື້ນີ້.”
ຄລິດສະຕຽນຈະໃຊ້ອິດສະຫຼະໃນການເລືອກໃນແບບທີ່ສະຫຼາດໄດ້ແນວໃດເພື່ອຈະຫຼີກລ່ຽງຜົນເສຍຫາຍຈາກການດື່ມເຄື່ອງດື່ມມຶນເມົາ? ສິ່ງທີ່ຊ່ວຍເຮົາໄດ້ກໍຄື: ເຮົາຕ້ອງຮູ້ວ່າພະເຢໂຫວາຄິດແນວໃດໃນເລື່ອງນີ້ ໃຫ້ຄິດຄືກັບເພິ່ນ ແລະເຮັດຕາມທີ່ເພິ່ນແນະນຳ.
ໃຫ້ເຮົາມາເບິ່ງນຳກັນວ່າຄຳພີໄບເບິນເວົ້າແນວໃດກ່ຽວກັບການດື່ມເຄື່ອງດື່ມມຶນເມົາ ແລະເຫດຜົນທີ່ບາງຄົນດື່ມ.
ຄຳພີໄບເບິນເວົ້າແນວໃດກ່ຽວກັບການດື່ມເຄື່ອງດື່ມມຶນເມົາ?
ຄຳພີໄບເບິນບໍ່ໄດ້ຕຳໜິການດື່ມພໍປະມານ. ຄຳພີໄບເບິນບອກວ່າການດື່ມເຫຼົ້າແວງເຮັດໃຫ້ມີຄວາມສຸກ. ຂໍ້ຄຳພີໜຶ່ງບອກວ່າ: “ໄປກິນອາຫານຢ່າງມີຄວາມສຸກແລະກິນເຫຼົ້າແວງດ້ວຍໃຈທີ່ເບີກບານ.” (ຜູ້ປ. 9:7, ລ.ມ) ພະເຢຊູກໍດື່ມເຫຼົ້າແວງຄືກັນ ແລະຜູ້ຮັບໃຊ້ຂອງພະເຢໂຫວາຄົນອື່ນໆກໍດື່ມເຫຼົ້າແວງຄືກັນ.—ມທ. 26:27-29; ລກ. 7:34; 1ຕມ. 5:23
ຄຳພີໄບເບິນບອກຢ່າງຈະແຈ້ງວ່າການດື່ມພໍປະມານກັບການເມົາເຫຼົ້າຕ່າງກັນ. ຄຳພີໄບເບິນບອກວ່າ: “ຢ່າເມົາເຫຼົ້າ.” (ອຟຊ. 5:18) ແລະຍັງເວົ້າອີກວ່າ: “ຄົນຂີ້ເຫຼົ້າ . . . ຈະບໍ່ມີສ່ວນໃນການປົກຄອງຂອງພະເຈົ້າ.” (1ກຣ. 6:10) ເຫັນໄດ້ແຈ້ງວ່າພະເຢໂຫວາຕຳໜິການເມົາເຫຼົ້າ. ດັ່ງນັ້ນ ແທນທີ່ຈະເຮັດຕາມຄົນໃນໂລກນີ້ ໃຫ້ເຮົາເຮັດສິ່ງທີ່ພະເຢໂຫວາພໍໃຈ.
ບາງຄົນອາດຈະເວົ້າວ່າ: ‘ຂ້ອຍດື່ມຫຼາຍສ່ຳໃດກໍບໍ່ເມົາ.’ ແຕ່ການຄິດແບບນີ້ເປັນອັນຕະລາຍຫຼາຍ. ຄຳພີໄບເບິນບອກຢ່າງຈະແຈ້ງວ່າຄົນທີ່ “ຕິດເຫຼົ້າ” ບໍ່ວ່າຈະເປັນຜູ້ຊາຍຫຼືຜູ້ຍິງອາດເຮັດສິ່ງທີ່ບໍ່ດີ ຫຼືອາດເຮັດຜິດຮ້າຍແຮງຕໍ່ພະເຢໂຫວາແລະທຳລາຍສາຍສຳພັນຂອງລາວກັບເພິ່ນ. (ຕຕ. 2:3; ສຸພາ. 20:1) ພະເຢຊູເຕືອນວ່າຄົນທີ່ “ດື່ມຫຼາຍໂພດ” ຈະບໍ່ໄດ້ເຂົ້າໂລກໃໝ່. (ລກ. 21:34-36) ຄັນຊັ້ນ ອັນໃດຈະຊ່ວຍຄລິດສະຕຽນບໍ່ໃຫ້ດື່ມຫຼາຍເກີນໄປແລະໄດ້ຮັບຜົນເສຍຫາຍຮ້າຍແຮງ?
ຄິດເບິ່ງວ່າເປັນຫຍັງຈຶ່ງດື່ມ ດື່ມຕອນໃດ ແລະດື່ມຫຼາຍໜ້ອຍສ່ຳໃດ?
ເຮົາບໍ່ຄວນເອົາຄວາມຄິດຂອງຄົນໃນວັດທະນະທຳດຽວກັນມາຕັດສິນວ່າເຮົາຄວນດື່ມຫຼືບໍ່ດື່ມ ແລະດື່ມຫຼາຍໜ້ອຍສ່ຳໃດ. ຄລິດສະຕຽນໄດ້ເຮັດສິ່ງທີ່ພະເຢໂຫວາພໍໃຈໃນເລື່ອງການກິນແລະດື່ມ. ຄຳພີໄບເບິນເຕືອນເຮົາວ່າ: “ບໍ່ວ່າພວກເຈົ້າຈະກິນ ຈະດື່ມ ຫຼືຈະເຮັດຫຍັງກໍຕາມ ໃຫ້ພວກເຈົ້າເຮັດທຸກສິ່ງໃນແບບທີ່ເຮັດໃຫ້ພະເຈົ້າໄດ້ຮັບການຍ້ອງຍໍສັນລະເສີນ.” (1ກຣ. 10:31) ໃຫ້ເຮົາມາເບິ່ງຄຳຖາມແລະຫຼັກການບາງຢ່າງໃນຄຳພີໄບເບິນນຳກັນ.
ຂ້ອຍດື່ມຍ້ອນຢາກໃຫ້ຄົນອື່ນມັກ ແລະບໍ່ຢາກຖືກເຍາະເຍີ້ຍບໍ? ອົບພະຍົບ 23:2 ບອກວ່າ: “ຫ້າມເຮັດຕາມຄົນສ່ວນໃຫຍ່ທີ່ເຮັດບໍ່ດີ.” ໃນຂໍ້ນີ້ພະເຢໂຫວາເຕືອນຄົນອິດສະຣາເອນບໍ່ໃຫ້ເຮັດຕາມຄົນທີ່ເຮັດໃຫ້ເພິ່ນບໍ່ພໍໃຈ. ຄຳເຕືອນນີ້ກໍໃຊ້ກັບພວກເຮົາໃນທຸກມື້ນີ້ໄດ້ຄືກັນ. ຖ້າເຮົາຍອມໃຫ້ໂຕເອງເຮັດຕາມຄວາມຄິດຂອງຄົນອື່ນໃນເລື່ອງການດື່ມເຄື່ອງດື່ມມຶນເມົາແລະຕັດສິນໃຈຄືກັບເຂົາເຈົ້າ ໃນທີ່ສຸດເຮົາກໍຈະເຊົາເຮັດຕາມມາດຕະຖານຂອງພະເຢໂຫວາແລະເຮັດໃຫ້ສາຍສຳພັນຂອງເຮົາກັບເພິ່ນໄດ້ຮັບຄວາມເສຍຫາຍ.—ຣມ. 12:2
ຂ້ອຍດື່ມຍ້ອນຢາກໃຫ້ຄົນອື່ນເບິ່ງວ່າຂ້ອຍເກັ່ງບໍ? ໃນບາງວັດທະນະທຳການດື່ມຫຼາຍແລະດື່ມເລື້ອຍໆເປັນເລື່ອງທຳມະດາແລະຫຼາຍຄົນກໍເຮັດແບບນັ້ນ. (1ປຕ. 4:3) ແຕ່ຂໍໃຫ້ສັງເກດ 1 ໂກຣິນໂທ 16:13 ກະຕຸ້ນເຮົາໃຫ້ເຮັດຫຍັງ? ຂໍ້ນັ້ນບອກວ່າ: “ໃຫ້ພວກເຈົ້າຕື່ນຕົວສະເໝີ ມີຄວາມເຊື່ອທີ່ໝັ້ນຄົງ ມີໃຈກ້າ ແລະເຂັ້ມແຂງ.” ເຄື່ອງດື່ມມຶນເມົາເຮັດໃຫ້ຄົນເຮົາເຂັ້ມແຂງໄດ້ແທ້ໆບໍ? ບໍ່ແມ່ນ. ການດື່ມເຄື່ອງດື່ມມຶນເມົາເຮັດໃຫ້ຄົນເຮົາຄວບຄຸມຄວາມຄິດແລະການກະທຳໄດ້ຍາກ. ແທນທີ່ການດື່ມຫຼາຍໆຈະສະແດງວ່າຄົນນັ້ນເກັ່ງຫຼືເຂັ້ມແຂງ ແຕ່ພັດສະແດງວ່າຄົນນັ້ນອ່ອນແອ. ໃນເອຊາຢາ 28:7 ບອກວ່າຄົນທີ່ຍ່າງຫຼົງທາງຍ້ອນເຫຼົ້າແວງຈະເຮັດສິ່ງຕ່າງໆແບບບໍ່ຖືກຕ້ອງ.
ຄວາມເຂັ້ມແຂງແທ້ມາຈາກພະເຢໂຫວາແລະກ່ຽວຂ້ອງກັບການຕື່ນຕົວສະເໝີແລະມີຄວາມເຊື່ອທີ່ໝັ້ນຄົງ. (ເພງ. 18:32, ລ.ມ) ນີ້ໝາຍຄວາມວ່າພວກເຮົາທີ່ເປັນຄລິດສະຕຽນຕ້ອງຫຼີກລ່ຽງສິ່ງທີ່ເປັນອັນຕະລາຍ ແລະເຮົາຕ້ອງຕັດສິນໃຈໃນແບບທີ່ບໍ່ສົ່ງຜົນເສຍຕໍ່ສາຍສຳພັນຂອງເຮົາກັບພະເຢໂຫວາ. ຕອນທີ່ພະເຢຊູຢູ່ໃນໂລກນີ້ ເພິ່ນສະແດງຄວາມເຂັ້ມແຂງແບບນີ້ແຫຼະ. ຫຼາຍຄົນນັບຖືພະເຢຊູຍ້ອນເພິ່ນເປັນຄົນກ້າຫານແລະຕັ້ງໃຈທີ່ຈະເຮັດສິ່ງທີ່ຖືກຕ້ອງ.
ຂ້ອຍດື່ມຍ້ອນຢາກໜີບັນຫາບໍ? ຜູ້ຂຽນປຶ້ມຄຳເພງໄດ້ຮັບການດົນໃຈໃຫ້ຂຽນວ່າ: “ເມື່ອລູກອຸກໃຈຫຼາຍ ພະອົງ [ພະເຢໂຫວາ] ກໍປອບໃຈລູກ.” (ເພງ. 94:19, ລ.ມ) ຖ້າຕອນນີ້ເຈົ້າຕ້ອງຮັບມືກັບບັນຫາທີ່ໜັກໆຂໍໃຫ້ເພິ່ງພະເຢໂຫວາ ບໍ່ໃຫ້ເພິ່ງເຄື່ອງດື່ມມຶນເມົາ. ວິທີໜຶ່ງກໍຄືອະທິດຖານຫາພະເຢໂຫວາໃຫ້ຫຼາຍຂຶ້ນ. ນອກຈາກນັ້ນ ພີ່ນ້ອງຫຼາຍຄົນຮູ້ສຶກວ່າການຂໍຄຳແນະນຳຈາກພີ່ນ້ອງທີ່ມີຄວາມເຊື່ອເຂັ້ມແຂງກໍຊ່ວຍໄດ້ຫຼາຍແທ້ໆ. ບາງຄົນອາດຄິດວ່າການດື່ມເຄື່ອງດື່ມມຶນເມົາຈະເຮັດໃຫ້ໜີບັນຫາໄດ້ ແຕ່ແທ້ໆແລ້ວມັນແຮ່ງເຮັດໃຫ້ເຮົາບໍ່ຢາກເຮັດໃນສິ່ງທີ່ຖືກຕ້ອງ. (ໂອ. 4:11) ແດນນຽວທີ່ເວົ້າເຖິງກ່ອນໜ້ານີ້ບອກວ່າ: “ຂ້ອຍກັງວົນແລະຮູ້ສຶກຜິດຫຼາຍ. ຂ້ອຍຈຶ່ງດື່ມເພື່ອຈະລືມບັນຫາເຫຼົ່ານັ້ນ. ແຕ່ແຮ່ງຂ້ອຍດື່ມ ບັນຫາກໍແຮ່ງຫຼາຍຂຶ້ນ. ເຮັດໃຫ້ຂ້ອຍບໍ່ເຫຼືອໃຜແລະໝົດຄວາມນັບຖືຕໍ່ໂຕເອງ.” ອັນໃດຊ່ວຍແດນນຽວໃຫ້ຮັບມືກັບບັນຫາໄດ້? ລາວບອກວ່າ: “ເມື່ອຂ້ອຍມີບັນຫາຂ້ອຍຕ້ອງເພິ່ງພະເຢໂຫວາ ບໍ່ແມ່ນເພິ່ງເຄື່ອງດື່ມມຶນເມົາ. ການເພິ່ງພະເຢໂຫວາເຮັດໃຫ້ຂ້ອຍຮັບມືກັບບັນຫາເຫຼົ່ານັ້ນໄດ້.” ບໍ່ວ່າເຮົາຈະຢູ່ໃນສະພາບທີ່ບໍ່ດີສ່ຳໃດ ພະເຢໂຫວາກໍຊ່ວຍເຮົາໄດ້.—ຟລປ. 4:6, 7; 1ປຕ. 5
ຖ້າເຈົ້າດື່ມເຄື່ອງດື່ມມຶນເມົາ ໃຫ້ກວດສອບເບິ່ງໂຕເອງໂດຍໃຊ້ຄຳຖາມເຫຼົ່ານີ້: ‘ໝູ່ຫຼືຄອບຄົວເປັນຫ່ວງຂ້ອຍບໍຕອນທີ່ຂ້ອຍດື່ມເຄື່ອງດື່ມມຶນເມົາ?’ ຖ້າແມ່ນ ກໍອາດສະແດງວ່າເຈົ້າກຳລັງມີບັນຫາໂດຍບໍ່ຮູ້ໂຕ. ‘ຂ້ອຍເລີ່ມດື່ມຫຼາຍຂຶ້ນເລື້ອຍໆບໍ?’ ຕອນນີ້ເຈົ້າອາດຍັງບໍ່ຕິດເຫຼົ້າ ແຕ່ຖ້າເຈົ້າດື່ມຫຼາຍຂຶ້ນເລື້ອຍໆເຈົ້າອາດເປັນຄົນຕິດເຫຼົ້າກໍໄດ້. ‘ຖ້າບໍ່ໄດ້ດື່ມ 2-3 ມື້ ຂ້ອຍອົດໄດ້ບໍ?’ ຖ້າອົດບໍ່ໄດ້ກໍສະແດງວ່າເຈົ້າອາດຕິດເຫຼົ້າແລ້ວ ແລະເຈົ້າອາດຈະຕ້ອງໄດ້ຂໍຄວາມຊ່ວຍເຫຼືອເພື່ອຈະເຊົາຕິດເຫຼົ້າ.
ຄລິດສະຕຽນບາງຄົນເລືອກທີ່ຈະບໍ່ດື່ມ ຍ້ອນຄິດວ່າການດື່ມເຄື່ອງດື່ມມຶນເມົາເຮັດໃຫ້ເກີດບັນຫາຫຼາຍຢ່າງຕາມມາ. ສ່ວນບາງຄົນບໍ່ດື່ມຍ້ອນວ່າມັນບໍ່ແຊບ. ຖ້າໝູ່ຂອງເຈົ້າບໍ່ດື່ມ ເຈົ້າກໍຄວນນັບຖືການຕັດສິນໃຈຂອງລາວແລະບໍ່ເວົ້າໃຫ້ລາວ.
ວິທີໜຶ່ງທີ່ເຈົ້າເຮັດໄດ້ກໍຄື ການຕັ້ງກົດກັບໂຕເອງ. ຄລິດສະຕຽນບາງຄົນອາດກຳນົດວ່າລາວຈະດື່ມຫຼາຍໜ້ອຍສ່ຳໃດຫຼືດື່ມດຸປານໃດ ດື່ມອາທິດລະເທື່ອ ຫຼືດື່ມໜ້ອຍໜຶ່ງຕອນທີ່ກິນເຂົ້າ. ບາງຄົນກຳນົດວ່າຈະດື່ມເຄື່ອງດື່ມມຶນເມົາບາງຊະນິດເທົ່ານັ້ນ ເຊັ່ນ: ດື່ມແຕ່ເຫຼົ້າແວງຫຼືເບຍ ແຕ່ຈະບໍ່ດື່ມເຫຼົ້າ ບໍ່ວ່າຈະເປັນເຫຼົ້າລ້າໆຫຼືປະສົມກັບສິ່ງອື່ນ. ຖ້າລາວຕັ້ງກົດທີ່ຊັດເຈນແບບນີ້ ລາວກໍຈະເຮັດຕາມໄດ້ງ່າຍຂຶ້ນ. ຄລິດສະຕຽນທີ່ມີຄວາມເຊື່ອເຂັ້ມແຂງບໍ່ຕ້ອງກັງວົນວ່າຄົນອື່ນຈະຄິດແນວໃດທີ່ລາວຕັ້ງກົດແລະເຮັດຕາມຢ່າງເຄັ່ງຄັດ.
ຕອນທີ່ເຮົາຕັດສິນໃຈວ່າຈະດື່ມຫຼືບໍ່ດື່ມ ເຮົາຕ້ອງຄິດເຖິງຄົນອື່ນນຳ. ໂຣມ 14:21 ບອກວ່າ: “ດີທີ່ສຸດຖ້າຈະບໍ່ກິນຊີ້ນ ຫຼືດື່ມເຫຼົ້າແວງ ຫຼືເຮັດສິ່ງໜຶ່ງສິ່ງໃດທີ່ເຮັດໃຫ້ຄວາມເຊື່ອຂອງພີ່ນ້ອງອ່ອນລົງ.” ເຈົ້າຈະເຮັດຕາມຄຳແນະນຳໃນຂໍ້ນີ້ໄດ້ແນວໃດ? ໃຫ້ສະແດງຄວາມຮັກຕໍ່ພີ່ນ້ອງ. ຖ້າເຈົ້າຮູ້ສຶກວ່າການດື່ມເຄື່ອງດື່ມມຶນເມົາຈະເຮັດໃຫ້ບາງຄົນບໍ່ສະບາຍໃຈ ຄວາມຮັກຈະຊ່ວຍເຈົ້າບໍ່ໃຫ້ຄິດວ່າເຈົ້າມີສິດທີ່ຈະດື່ມ. ການເຮັດແບບນີ້ສະແດງວ່າເຈົ້ານັບຖືຄວາມຮູ້ສຶກຂອງຄົນອື່ນ ແລະບໍ່ຄິດເຖິງແຕ່ຜົນປະໂຫຍດຂອງໂຕເອງ.—1ກຣ. 10:24
ນອກຈາກນັ້ນ ຄລິດສະຕຽນຄວນເຊື່ອຟັງກົດໝາຍບ້ານເມືອງໃນເລື່ອງການດື່ມເຄື່ອງດື່ມມຶນເມົາ ເຊັ່ນ: ອາດມີກົດໝາຍທີ່ບອກວ່າຫ້າມດື່ມຖ້າອາຍຸບໍ່ຮອດກຳນົດ ຫ້າມດື່ມແລ້ວຂັບລົດຫຼືເຮັດວຽກຄວບຄຸມເຄື່ອງຈັກ.—ຣມ. 13:1-5
ພະເຢໂຫວາໃຫ້ຂອງຂວັນທີ່ດີຫຼາຍຢ່າງກັບເຮົາ ແລະໜຶ່ງໃນນັ້ນກໍຄືອິດສະຫຼະໃນການຕັດສິນໃຈ. ເຮົາສາມາດໃຊ້ຂອງຂວັນນີ້ຕອນທີ່ເຮົາເລືອກວ່າຈະກິນຫຍັງຫຼືດື່ມຫຍັງ. ຂໍໃຫ້ເຮົາສະແດງໃຫ້ເຫັນວ່າ ເຮົາເຫັນຄ່າອິດສະຫຼະນີ້ໂດຍໃຊ້ມັນເຮັດສິ່ງທີ່ພະເຢໂຫວາພໍ່ຂອງເຮົາທີ່ຢູ່ໃນສະຫວັນພໍໃຈ.
a ສູນຄວບຄຸມແລະປ້ອງກັນພະຍາດຢູ່ສະຫະລັດອາເມຣິກາລາຍງານວ່າ ຄົນທີ່ດື່ມເຄື່ອງດື່ມມຶນເມົາຫຼາຍໆມີຄວາມສ່ຽງທີ່ຈະຂ້າຄົນອື່ນ ຂ້າໂຕເອງ ລ່ວງລະເມີດທາງເພດ ທຳຮ້າຍຮ່າງກາຍຄູ່ຂອງໂຕເອງ ເຮັດຜິດສິນລະທຳທາງເພດ ແລະຫຼຸລູກ.