ບົດຄວາມສຶກສາທີ 41
ເພງທີ 108 ຄວາມຮັກທີ່ໝັ້ນຄົງຂອງພະເຈົ້າ
ພະເຢໂຫວາມີຄວາມຮັກທີ່ໝັ້ນຄົງ
“ໃຫ້ຂອບໃຈພະເຢໂຫວາ ຍ້ອນເພິ່ນດີແທ້ໆ. ເພິ່ນມີຄວາມຮັກທີ່ໝັ້ນຄົງຕະຫຼອດໄປ.”—ພສ. 136:1
ຈຸດສຳຄັນ
ການທີ່ເຮົາເຂົ້າໃຈວ່າຄວາມຮັກຂອງພະເຢໂຫວາເປັນຄຳສອນພື້ນຖານຢ່າງໜຶ່ງໃນຄຳພີໄບເບິນຈະຊ່ວຍເຮົາໃຫ້ຕໍ່ສູ້ກັບຄວາມທໍ້ໃຈໄດ້ເມື່ອເຈິກັບບັນຫາ.
1-2. ເມື່ອເຈິບັນຫາ ເຮົາອາດຮູ້ສຶກແນວໃດ?
ໃຫ້ນຶກພາບວ່າເຮືອລຳໜຶ່ງກຳລັງເຈິພາຍຸ. ຄື້ນໃຫຍ່ໆໃນທະເລຊັດໃສ່ເຮືອໄກວໄປໄກວມາ. ຖ້າບໍ່ມີຄົນໃນເຮືອໂຍນສະໝໍລົງໄປ ເຮືອກໍຈະຖືກຄື້ນຊັດໄປຊັດມາ. ສະໝໍເຮືອເປັນສິ່ງທີ່ສຳຄັນຫຼາຍຍ້ອນມັນຈະຊ່ວຍຍຶດເຮືອໄວ້ຕອນທີ່ເຈິພາຍຸ.
2 ຕອນທີ່ເຈົ້າເຈິກັບບັນຫາໜັກໆໃນຊີວິດ ເຈົ້າອາດຮູ້ສຶກວ່າໂຕເອງເປັນຄືກັບເຮືອລຳນັ້ນທີ່ຖືກຄື້ນຊັດໄປຊັດມາ. ອາລົມຂອງເຈົ້າຈະຂຶ້ນໆລົງໆ. ມື້ໜຶ່ງເຈົ້າອາດໝັ້ນໃຈວ່າພະເຢໂຫວາຮັກແລະພ້ອມທີ່ຈະຊ່ວຍເຫຼືອເຈົ້າ. ແຕ່ອີກມື້ໜຶ່ງເຈົ້າອາດສົງໄສວ່າເພິ່ນເຫັນບໍວ່າເຈົ້າກຳລັງເຈິກັບຫຍັງຢູ່. (ພສ. 10:1; 13:1) ຕອນທີ່ໝູ່ປອບໃຈເຈົ້າ ເຈົ້າອາດຮູ້ສຶກດີຂຶ້ນໄລຍະໜຶ່ງ. (ສພສ. 17:17; 25:11) ແຕ່ຕໍ່ມາເຈົ້າກໍອາດກັບມາສົງໄສອີກ. ເຈົ້າອາດເຖິງຂັ້ນສົງໄສວ່າພະເຢໂຫວາບໍ່ຮັກເຈົ້າແລ້ວແລະເຈົ້າບໍ່ມີຄ່າສຳລັບເພິ່ນ. ຄັນຊັ້ນ ເຈົ້າຈະຮູ້ສຶກໝັ້ນຄົງຄືກັບເຮືອທີ່ຖືກສະໝໍຍຶດໄວ້ແນວໃດຕອນທີ່ເຈິບັນຫາ? ເວົ້າອີກແບບໜຶ່ງກໍຄື ເຈົ້າຈະໝັ້ນໃຈຢູ່ສະເໝີໄດ້ແນວໃດວ່າພະເຢໂຫວາຮັກເຈົ້າແລະຈະຊ່ວຍເຈົ້າແທ້ໆ?
3. (ກ) ເພງສັນລະເສີນ 31:7 ແລະ 136:1 ສອນຫຍັງເຮົາກ່ຽວກັບຄວາມຮັກແລະຄວາມຮັກທີ່ໝັ້ນຄົງຂອງພະເຢໂຫວາ? (ຂ) ເປັນຫຍັງເຮົາຈຶ່ງເວົ້າໄດ້ວ່າພະເຢໂຫວາເປັນຕົວຢ່າງທີ່ດີທີ່ສຸດໃນການສະແດງຄວາມຮັກແບບນີ້? (ເບິ່ງຮູບນຳ)
3 ຕອນທີ່ເຈິບັນຫາ ວິທີໜຶ່ງທີ່ເຈົ້າຈະຮູ້ສຶກໝັ້ນຄົງຄືກັບເຮືອທີ່ຖືກສະໝໍຍຶດໄວ້ແມ່ນໃຫ້ຈື່ໄວ້ວ່າພະເຢໂຫວາມີຄວາມຮັກທີ່ໝັ້ນຄົງ. (ອ່ານເພງສັນລະເສີນ 31:7; 136:1) ຄຳວ່າ “ຄວາມຮັກທີ່ໝັ້ນຄົງ” ເປັນຄວາມຮັກທີ່ຜູກພັນເລິກເຊິ່ງແລະຍາວນານທີ່ຄົນໜຶ່ງມີຕໍ່ອີກຄົນໜຶ່ງ. ພະເຢໂຫວາເປັນຕົວຢ່າງທີ່ດີທີ່ສຸດໃນການສະແດງຄວາມຮັກທີ່ໝັ້ນຄົງ. ທີ່ຈິງ ຄຳພີໄບເບິນບອກວ່າພະເຢໂຫວາ “ມີຄວາມຮັກທີ່ໝັ້ນຄົງຫຼາຍທີ່ສຸດ.” (ອພຍ. 34:6, 7) ຄຳພີໄບເບິນຍັງເວົ້າເຖິງພະເຢໂຫວາວ່າ: “ພະອົງມີຄວາມຮັກທີ່ໝັ້ນຄົງຫຼາຍຕໍ່ທຸກຄົນທີ່ຮ້ອງຫາພະອົງ.” (ພສ. 86:5) ພະຄຳພີ 2 ຂໍ້ນີ້ເວົ້າເຖິງເລື່ອງຫຍັງ? ພະເຢໂຫວາຈະບໍ່ປະບໍ່ຖິ້ມຜູ້ຮັບໃຊ້ທີ່ສັດຊື່ຂອງເພິ່ນ. ຖ້າເຈົ້າຈື່ໄວ້ສະເໝີວ່າພະເຢໂຫວາມີຄວາມຮັກທີ່ໝັ້ນຄົງ ເຈົ້າກໍຈະເປັນຄືກັບເຮືອທີ່ຖືກສະໝໍຍຶດໄວ້ຕອນທີ່ເຈິກັບບັນຫາໜັກໆ.—ພສ. 23:4
ຄືກັບທີ່ສະໝໍເຮືອຍຶດເຮືອໄວ້ຕອນທີ່ເຈິພາຍຸ ການທີ່ເຮົາໝັ້ນໃຈວ່າພະເຢໂຫວາຮັກເຮົາຈະຊ່ວຍເຮົາໃຫ້ຮູ້ສຶກໝັ້ນຄົງຕອນທີ່ເຈິບັນຫາ (ເບິ່ງຂໍ້ 3)
ໃຫ້ຈື່ໄວ້ວ່າຄວາມຮັກຂອງພະເຢໂຫວາເປັນຄຳສອນພື້ນຖານໃນຄຳພີໄບເບິນ
4. ຂໍໃຫ້ຍົກຕົວຢ່າງວ່າຄຳສອນພື້ນຖານໃນຄຳພີໄບເບິນມີຫຍັງແດ່ ແລະເປັນຫຍັງເຮົາຈຶ່ງເຊື່ອຄຳສອນເຫຼົ່ານັ້ນ?
4 ຕອນທີ່ເຈິບັນຫາ ອີກວິທີໜຶ່ງທີ່ເຈົ້າຈະຮູ້ສຶກໝັ້ນຄົງຄືກັບເຮືອທີ່ຖືກສະໝໍຍຶດໄວ້ແມ່ນໃຫ້ຈື່ໄວ້ວ່າຄວາມຮັກຂອງພະເຢໂຫວາເປັນຄຳສອນພື້ນຖານໃນຄຳພີໄບເບິນ. ເມື່ອເຈົ້າໄດ້ຍິນຄຳວ່າ “ຄຳສອນພື້ນຖານ” ໃນຄຳພີໄບເບິນ ເຈົ້າຄິດເຖິງເລື່ອງຫຍັງ? ເຈົ້າອາດຈະຄິດເຖິງຄຳສອນທີ່ເຈົ້າໄດ້ຮຽນໃນຄຳພີໄບເບິນ. ຕົວຢ່າງເຊັ່ນ: ເຈົ້າໄດ້ຮຽນວ່າພະເຈົ້າຊື່ເຢໂຫວາ ພະເຢຊູເປັນລູກຂອງພະເຈົ້າ ຄົນຕາຍແລ້ວບໍ່ຮູ້ສຶກຫຍັງ ໂລກຈະເປັນສວນທີ່ງາມໆ ແລະມະນຸດຈະມີຊີວິດຕະຫຼອດໄປ. (ພສ. 83:18; ປຍຈ. 9:5; ຢຮ. 3:16; ພນມ. 21:3, 4) ເມື່ອເຈົ້າເຊື່ອວ່າຄຳສອນເຫຼົ່ານີ້ເປັນຄວາມຈິງກໍບໍ່ມີຫຍັງເຮັດໃຫ້ເຈົ້າຫວັ່ນໄຫວໄດ້. ເປັນຫຍັງຈຶ່ງເປັນແບບນັ້ນ? ຍ້ອນເຈົ້າເຂົ້າໃຈວ່າຄຳສອນເຫຼົ່ານີ້ມີຫຼັກຖານຢືນຢັນວ່າເປັນຄວາມຈິງ. ໃຫ້ເຮົາມາເບິ່ງວ່າການຈື່ໄວ້ວ່າຄວາມຮັກຂອງພະເຢໂຫວາເປັນຄຳສອນພື້ນຖານໃນຄຳພີໄບເບິນຈະຊ່ວຍເຮົາແນວໃດໃຫ້ເອົາຊະນະຂໍ້ສົງໄສທີ່ວ່າພະເຢໂຫວາບໍ່ຮັກຫຼືບໍ່ສົນໃຈວ່າເຮົາກຳລັງເຈິກັບບັນຫາຫຍັງຢູ່.
5. ຂໍໃຫ້ອະທິບາຍວ່າເຮົາຈະເຊົາເຊື່ອຄຳສອນຕົວະໄດ້ແນວໃດ?
5 ເມື່ອເຈົ້າເລີ່ມຮຽນຄຳພີໄບເບິນ ອັນໃດຊ່ວຍເຈົ້າໃຫ້ເຊົາເຊື່ອຄຳສອນຕົວະ? ສິ່ງທີ່ໄດ້ຊ່ວຍເຈົ້າແມ່ນການເອົາສິ່ງທີ່ສາສະໜາຂອງເຈົ້າສອນມາສົມທຽບກັບສິ່ງທີ່ຄຳພີໄບເບິນສອນ. ຕົວຢ່າງເຊັ່ນ: ສົມມຸດວ່າເຈົ້າເຄີຍເຊື່ອວ່າພະເຢຊູເປັນພະເຈົ້າ ແຕ່ເມື່ອໄດ້ຮຽນຄຳພີໄບເບິນເຈົ້າກໍຖາມໂຕເອງວ່າ: ‘ຄຳສອນນີ້ຖືກແທ້ໆບໍ?’ ຫຼັງຈາກເບິ່ງຂໍ້ຄຳພີຕ່າງໆເຈົ້າກໍໄດ້ຄຳຕອບວ່າພະເຢຊູບໍ່ແມ່ນພະເຈົ້າ. ຈາກນັ້ນ ແທນທີ່ຈະເຊື່ອຄຳສອນຕົວະທີ່ເຈົ້າເຄີຍເຊື່ອ ເຈົ້າກໍເຊື່ອໃນສິ່ງທີ່ຄຳພີໄບເບິນສອນທີ່ວ່າ ພະເຢຊູເປັນ “ຜູ້ທຳອິດທີ່ຖືກສ້າງກ່ອນທຸກສິ່ງ” ແລະເປັນ “ລູກຄົນດຽວຂອງພະເຈົ້າ.” (ກລຊ. 1:15; ຢຮ. 3:18) ແນ່ນອນວ່າຄຳສອນຕົວະບາງເລື່ອງອາດ “ຝັງຮາກເລິກ” ແລະເຊົາເຊື່ອໄດ້ຍາກ. (2ກຣ. 10:4, 5) ແຕ່ຫຼັງຈາກເຈົ້າຮຽນຄວາມຈິງໃນຄຳພີໄບເບິນແລ້ວ ເຈົ້າກໍຈະບໍ່ເຊື່ອເລື່ອງຄຳສອນຕົວະອີກ.—ຟລປ. 3:13
6. ເປັນຫຍັງເຈົ້າຈຶ່ງໝັ້ນໃຈວ່າພະເຢໂຫວາ “ມີຄວາມຮັກທີ່ໝັ້ນຄົງຕະຫຼອດໄປ”?
6 ເຈົ້າສາມາດເຮັດຄ້າຍໆກັນໄດ້ໃນສິ່ງທີ່ຄຳພີໄບເບິນສອນກ່ຽວກັບຄວາມຮັກຂອງພະເຢໂຫວາ. ຕອນທີ່ເຈິບັນຫາ ຖ້າເຈົ້າເລີ່ມສົງໄສໃນຄວາມຮັກຂອງພະເຢໂຫວາ ໃຫ້ຖາມໂຕເອງວ່າ: ‘ຂ້ອຍຄິດແບບນີ້ຖືກແລ້ວບໍ?’ ໃຫ້ສົມທຽບສິ່ງທີ່ເຈົ້າສົງໄສກ່ຽວກັບຄວາມຮັກຂອງພະເຢໂຫວາກັບສິ່ງທີ່ຂຽນໄວ້ໃນເພງສັນລະເສີນ 136:1 ເຊິ່ງເປັນຂໍ້ຄຳພີຫຼັກຂອງບົດນີ້. ເປັນຫຍັງພະເຢໂຫວາຈຶ່ງເວົ້າເຖິງຄວາມຮັກຂອງເພິ່ນວ່າ “ໝັ້ນຄົງ”? ເປັນຫຍັງໃນເພງສັນລະເສີນບົດ 136 ບົດດຽວຈຶ່ງມີຄຳວ່າ “ເພິ່ນມີຄວາມຮັກທີ່ໝັ້ນຄົງຕະຫຼອດໄປ” ຕັ້ງ 26 ເທື່ອ? ຄືກັບທີ່ເຮົາໄດ້ເບິ່ງມາແລ້ວ ຄວາມຮັກທີ່ໝັ້ນຄົງທີ່ພະເຢໂຫວາມີຕໍ່ຜູ້ຮັບໃຊ້ຂອງເພິ່ນເປັນຄຳສອນພື້ນຖານໃນຄຳພີໄບເບິນເຊິ່ງຄືກັບຄຳສອນພື້ນຖານອື່ນໆໃນຄຳພີໄບເບິນທີ່ເຈົ້າໄດ້ເຊື່ອ. ຄວາມຄິດທີ່ວ່າພະເຢໂຫວາບໍ່ຮັກເຈົ້າແລ້ວແລະເຈົ້າບໍ່ມີຄ່າສຳລັບເພິ່ນບໍ່ແມ່ນຄວາມຈິງ. ໃຫ້ເຈົ້າປະຕິເສດຄວາມຄິດແບບນັ້ນຄືກັບທີ່ເຈົ້າໄດ້ປະຕິເສດຄຳສອນຕົວະອື່ນໆ.
7. ໃຫ້ຍົກຕົວຢ່າງຂໍ້ຄຳພີບາງຂໍ້ທີ່ເຮັດໃຫ້ເຮົາໝັ້ນໃຈວ່າພະເຢໂຫວາຮັກເຮົາ.
7 ໃນຄຳພີໄບເບິນມີຂໍ້ຄຳພີຫຼາຍຂໍ້ທີ່ເຮັດໃຫ້ເຮົາໝັ້ນໃຈວ່າພະເຢໂຫວາຮັກເຮົາ. ຕົວຢ່າງເຊັ່ນ: ພະເຢຊູເວົ້າກັບລູກສິດຂອງເພິ່ນວ່າ: “ພວກເຈົ້າມີຄ່າຫຼາຍກວ່ານົກກະຈອກຫຼາຍໂຕລວມກັນ.” (ມທ. 10:31) ພະເຢໂຫວາເວົ້າກັບປະຊາຊົນຂອງເພິ່ນວ່າ: “ເຮົາຈະເຮັດໃຫ້ເຈົ້າເຂັ້ມແຂງແລະເຮົາຈະຊ່ວຍເຈົ້າ. ເຮົາຈະໃຊ້ມືຂວາຂອງເຮົາທີ່ເຮັດສິ່ງທີ່ຖືກຕ້ອງຈັບເຈົ້າໄວ້ແໜ້ນໆ.” (ອຊຢ. 41:10) ຂໍໃຫ້ສັງເກດວ່າຄຳເວົ້າເຫຼົ່ານີ້ໜັກແໜ້ນຫຼາຍແທ້ໆ. ພະເຢຊູບໍ່ໄດ້ເວົ້າວ່າ: ‘ພວກເຈົ້າອາດຈະມີຄ່າຫຼາຍກວ່າ’ ແລະພະເຢໂຫວາກໍບໍ່ໄດ້ເວົ້າວ່າ: ‘ເຮົາອາດຈະຊ່ວຍເຈົ້າ’ ແຕ່ພະເຢຊູເວົ້າວ່າ: “ພວກເຈົ້າມີຄ່າຫຼາຍກວ່າ” ແລະພະເຢໂຫວາເວົ້າວ່າ: “ເຮົາຈະຊ່ວຍເຈົ້າ.” ຕອນທີ່ເຈິບັນຫາ ຖ້າເຈົ້າສົງໄສວ່າພະເຢໂຫວາຮັກເຈົ້າຫຼືບໍ່ ຂໍ້ຄຳພີເຫຼົ່ານີ້ບໍ່ພຽງແຕ່ຊ່ວຍເຈົ້າໃຫ້ຮູ້ສຶກວ່າພະເຢໂຫວາຮັກເຈົ້າ ແຕ່ຍັງເຮັດໃຫ້ເຈົ້າໝັ້ນໃຈວ່າເພິ່ນຮັກເຈົ້າແທ້ໆ. ຂໍ້ຄຳພີ 2 ຂໍ້ນີ້ເວົ້າຄວາມຈິງ. ຖ້າເຈົ້າອະທິດຖານຫາພະເຢໂຫວາກ່ຽວກັບສິ່ງທີ່ເຈົ້າສົງໄສແລະຄິດຕຶກຕອງກ່ຽວກັບຂໍ້ຄຳພີເຫຼົ່ານີ້ ເຈົ້າກໍຈະສາມາດເວົ້າແບບດຽວກັບທີ່ຢູ່ໃນ 1 ໂຢຮັນ 4:16 ທີ່ວ່າ: “ພວກເຮົາຮູ້ແລະເຊື່ອໝັ້ນວ່າພະເຈົ້າຮັກພວກເຮົາ.”a
8. ເຈົ້າຈະເຮັດແນວໃດຖ້າບາງເທື່ອເຈົ້າຍັງສົງໄສວ່າພະເຢໂຫວາຮັກເຈົ້າຫຼືບໍ່?
8 ຖ້າບາງເທື່ອເຈົ້າຍັງສົງໄສວ່າພະເຢໂຫວາຮັກເຈົ້າຫຼືບໍ່ ໃຫ້ເຈົ້າສົມທຽບຄວາມຮູ້ສຶກຂອງເຈົ້າກັບສິ່ງທີ່ເຈົ້າຮູ້ກ່ຽວກັບພະເຢໂຫວາ. ຄວາມຮູ້ສຶກເປັນສິ່ງທີ່ເຊື່ອຖືບໍ່ໄດ້ຍ້ອນມັນປ່ຽນໄປປ່ຽນມາຕະຫຼອດ ແຕ່ຄວາມຈິງປ່ຽນແປງບໍ່ໄດ້. ຄວາມຮັກຂອງພະເຢໂຫວາທີ່ເວົ້າເຖິງໃນຄຳພີໄບເບິນເປັນຄວາມຈິງ. ຖ້າເຮົາບໍ່ເຊື່ອວ່າພະເຢໂຫວາຮັກເຮົາ ເຮົາກໍກຳລັງເບິ່ງຂ້າມຄວາມຮັກຂອງພະເຢໂຫວາເຊິ່ງເປັນຄຸນລັກສະນະທີ່ສຳຄັນທີ່ສຸດຂອງເພິ່ນ.—1ຢຮ. 4:8
ໃຫ້ຄິດຕຶກຕອງວ່າພະເຢໂຫວາ ‘ຮັກເຈົ້າ’
9-10. ໃນໂຢຮັນ 16:26, 27 ເມື່ອພະເຢຊູເວົ້າວ່າ “ພະເຈົ້າຜູ້ເປັນພໍ່ຮັກພວກເຈົ້າ” ເພິ່ນກຳລັງເວົ້າເລື່ອງຫຍັງ? (ເບິ່ງຮູບນຳ)
9 ເຮົາສາມາດຮຽນຮູ້ຫຼາຍຂຶ້ນກ່ຽວກັບຄວາມຮັກຂອງພະເຢໂຫວາໂດຍເບິ່ງຈາກຄຳເວົ້າຂອງພະເຢຊູທີ່ເວົ້າກັບພວກລູກສິດ. ເພິ່ນເວົ້າກັບເຂົາເຈົ້າວ່າ: “ພະເຈົ້າຜູ້ເປັນພໍ່ຮັກພວກເຈົ້າ.” (ອ່ານໂຢຮັນ 16:26, 27) ພະເຢຊູເວົ້າແບບນີ້ບໍ່ແມ່ນເພື່ອໃຫ້ພວກລູກສິດຮູ້ສຶກດີ. ທີ່ຈິງ ແວດບົດຂອງຂໍ້ຄຳພີນີ້ພະເຢຊູບໍ່ໄດ້ເວົ້າເຖິງຄວາມຮູ້ສຶກຂອງພວກລູກສິດ ແຕ່ເພິ່ນກຳລັງເວົ້າກັບເຂົາເຈົ້າເລື່ອງການອະທິດຖານ.
10 ພະເຢຊູຫາກໍບອກພວກລູກສິດວ່າເຂົາເຈົ້າຄວນອະທິດຖານໃນນາມຂອງເພິ່ນ ບໍ່ແມ່ນອະທິດຖານຫາເພິ່ນ. (ຢຮ. 16:23, 24) ນີ້ເປັນເລື່ອງສຳຄັນທີ່ເຂົາເຈົ້າຕ້ອງຮູ້. ຫຼັງຈາກພະເຢຊູຟື້ນຄືນມາຈາກຕາຍ ພວກລູກສິດອາດຢາກອະທິດຖານຫາເພິ່ນຍ້ອນເຂົາເຈົ້າຖືວ່າເພິ່ນເປັນໝູ່ຂອງເຂົາເຈົ້າ. ເຂົາເຈົ້າອາດຈະຄິດວ່າຍ້ອນພະເຢຊູຮັກເຂົາເຈົ້າຫຼາຍເພິ່ນຄືຊິຢາກໃຫ້ເຂົາເຈົ້າອະທິດຖານຫາເພິ່ນ ແລ້ວເພິ່ນກໍຈະໄປຂໍພະເຢໂຫວາພໍ່ຂອງເພິ່ນໃຫ້ຊ່ວຍເຂົາເຈົ້າ. ແຕ່ພະເຢຊູບອກວ່າເຂົາເຈົ້າບໍ່ຄວນຄິດແບບນັ້ນ. ຍ້ອນຫຍັງ? ຍ້ອນພະເຢຊູບອກເຂົາເຈົ້າວ່າ: “ພະເຈົ້າຜູ້ເປັນພໍ່ຮັກພວກເຈົ້າ.” ນີ້ສະແດງວ່າພະເຢຊູກຳລັງສອນວ່າພະເຢໂຫວາເອງທີ່ຢາກຟັງຄຳອະທິດຖານຂອງເຂົາເຈົ້າ. ຄວາມຈິງນີ້ເປັນຄຳສອນພື້ນຖານໃນຄຳພີໄບເບິນເລື່ອງການອະທິດຖານ. ໃຫ້ຄິດເບິ່ງວ່າເລື່ອງນີ້ໝາຍເຖິງຫຍັງສຳລັບເຈົ້າ. ຈາກການຮຽນຄຳພີໄບເບິນ ເຈົ້າໄດ້ຮູ້ຈັກແລະຮັກພະເຢຊູ ແລະເຂົ້າມາເປັນລູກສິດຂອງເພິ່ນ. (ຢຮ. 14:21) ຄືກັບພວກລູກສິດໃນສະຕະວັດທຳອິດ ເຈົ້າສາມາດອະທິດຖານຫາພະເຢໂຫວາດ້ວຍຄວາມໝັ້ນໃຈຍ້ອນເຈົ້າຮູ້ວ່າ ‘ພະເຈົ້າຜູ້ເປັນພໍ່ຮັກເຈົ້າ.’ ທຸກເທື່ອທີ່ເຈົ້າອະທິດຖານ ເຈົ້າກໍສະແດງໃຫ້ເຫັນວ່າເຈົ້າເຊື່ອໃນຄຳເວົ້ານີ້.—1ຢຮ. 5:14
ເຈົ້າສາມາດອະທິດຖານຫາພະເຢໂຫວາດ້ວຍຄວາມໝັ້ນໃຈຍ້ອນເຈົ້າຮູ້ວ່າ ‘ພະເຈົ້າຜູ້ເປັນພໍ່ຮັກເຈົ້າ’ (ເບິ່ງຂໍ້ 9-10)b
ໃຫ້ຮູ້ວ່າອັນໃດທີ່ເຮັດໃຫ້ເຈົ້າສົງໄສ
11. ເປັນຫຍັງຊາຕານຈຶ່ງດີໃຈຖ້າເຮົາສົງໄສວ່າພະເຢໂຫວາຮັກເຮົາຫຼືບໍ່?
11 ອັນໃດອາດເຮັດໃຫ້ເຮົາສົງໄສວ່າພະເຢໂຫວາຮັກເຮົາຫຼືບໍ່? ເຈົ້າອາດຕອບວ່າຊາຕານເຮັດໃຫ້ເຮົາຄິດແບບນັ້ນ ສ່ວນໜຶ່ງກໍເປັນແບບນັ້ນແທ້. ຊາຕານ “ຊອກຫາເຫຍື່ອທີ່ມັນຈະກັດກິນໄດ້” ແລະມັນຈະດີໃຈຫຼາຍຖ້າເຮົາສົງໄສວ່າພະເຢໂຫວາຮັກເຮົາຫຼືບໍ່. (1ປຕ. 5:8) ທີ່ຈິງ ຄວາມຮັກຂອງພະເຢໂຫວາກະຕຸ້ນເພິ່ນໃຫ້ຈັດກຽມຄ່າໄຖ່ ແຕ່ຊາຕານຢາກໃຫ້ເຮົາຄິດວ່າເຮົາບໍ່ສົມຄວນທີ່ຈະໄດ້ຮັບປະໂຫຍດຈາກຄ່າໄຖ່ນີ້. (ຮຣ. 2:9) ແຕ່ໃຜຈະດີໃຈຖ້າເຮົາສົງໄສວ່າພະເຢໂຫວາຮັກເຮົາຫຼືບໍ່? ຊາຕານຫັ້ນແຫຼະ. ໃຜຈະດີໃຈຖ້າເຮົາທໍ້ໃຈຫຼາຍຈົນເຊົາຮັບໃຊ້ພະເຢໂຫວາ? ກໍແມ່ນຊາຕານ. ມັນຢາກໃຫ້ເຮົາຄິດວ່າພະເຢໂຫວາບໍ່ຮັກເຮົາ ແຕ່ຄວາມຈິງບໍ່ໄດ້ເປັນແນວນັ້ນ. ຊາຕານຫັ້ນແຫຼະທີ່ພະເຢໂຫວາບໍ່ຮັກ. “ກົນອຸບາຍ” ຢ່າງໜຶ່ງທີ່ຊາຕານມັກໃຊ້ຫຼາຍທີ່ສຸດແມ່ນມັນພະຍາຍາມເຮັດໃຫ້ເຮົາຮູ້ສຶກວ່າພະເຢໂຫວາບໍ່ຮັກແລະບໍ່ຍອມຮັບເຮົາ. (ອຟຊ. 6:11) ເມື່ອຮູ້ແລ້ວວ່າຊາຕານສັດຕູຂອງເຮົາພະຍາຍາມເຮັດແບບນີ້ ເຮົາກໍແຮ່ງຢາກຕັ້ງໃຈຫຼາຍຂຶ້ນທີ່ຈະ “ຕໍ່ຕ້ານມານຮ້າຍ.”—ຢກບ. 4:7
12-13. ເປັນຫຍັງບາບທີ່ເຮົາໄດ້ຮັບມາອາດເຮັດໃຫ້ເຮົາສົງໄສວ່າພະເຢໂຫວາຮັກເຮົາຫຼືບໍ່?
12 ຍັງມີອີກສິ່ງໜຶ່ງທີ່ເຮັດໃຫ້ເຮົາສົງໄສວ່າພະເຢໂຫວາຮັກເຮົາຫຼືບໍ່. ສິ່ງນັ້ນແມ່ນບາບທີ່ເຮົາໄດ້ຮັບມາຈາກອາດາມກັບເອວາ. (ພສ. 51:5; ຣມ. 5:12) ບາບທຳລາຍສາຍສຳພັນທີ່ມະນຸດມີກັບພະເຈົ້າແລະມັນຍັງທຳລາຍຄວາມຄິດ ຄວາມຮູ້ສຶກ ແລະຮ່າງກາຍຂອງເຮົານຳ.
13 ບາບເຮັດໃຫ້ເຮົາມີຄວາມຮູ້ສຶກໃນແງ່ລົບ ມັນເຮັດໃຫ້ເຮົາຮູ້ສຶກຜິດ ຢ້ານ ບໍ່ໝັ້ນຄົງ ແລະອາຍ. ເຮົາອາດຮູ້ສຶກແບບນີ້ເມື່ອເຮົາເຮັດຜິດ ແຕ່ຄວາມຮູ້ສຶກເຫຼົ່ານີ້ກໍເກີດຂຶ້ນໄດ້ຄືກັນຍ້ອນເຮົາເປັນຄົນບໍ່ສົມບູນແບບເຊິ່ງບໍ່ໄດ້ເປັນໄປຕາມທີ່ພະເຢໂຫວາສ້າງມະນຸດໃນຕອນທຳອິດ. (ຣມ. 8:20, 21) ຄືກັບທີ່ລົດຕີນຮົ່ວບໍ່ສາມາດແລ່ນໄປໄດ້ສະດວກ ເຮົາທີ່ເປັນຄົນບໍ່ສົມບູນແບບກໍບໍ່ສາມາດຄິດ ຮູ້ສຶກ ແລະເຮັດຄືກັບຄົນທີ່ສົມບູນແບບໄດ້. ສະນັ້ນຈຶ່ງບໍ່ແປກທີ່ບາງເທື່ອເຮົາສົງໄສວ່າພະເຢໂຫວາຮັກເຮົາຫຼືບໍ່. ຕອນໃດທີ່ຮູ້ສຶກແບບນັ້ນ ເຮົາຄວນຈື່ໄວ້ວ່າພະເຢໂຫວາ “ຍິ່ງໃຫຍ່ແລະສົມຄວນໄດ້ຮັບຄວາມນັບຖື. . . . ພະອົງມີຄວາມຮັກທີ່ໝັ້ນຄົງຕໍ່ຄົນທີ່ຮັກພະອົງແລະເຮັດຕາມຄຳສັ່ງຂອງພະອົງ.”—ນຮຢ. 1:5
14. ການຄິດຕຶກຕອງກ່ຽວກັບຄ່າໄຖ່ຊ່ວຍເຮົາແນວໃດໃຫ້ໝັ້ນໃຈວ່າພະເຢໂຫວາຮັກເຮົາ? (ໂຣມ 5:8) (ເບິ່ງຂອບ “ໃຫ້ລະວັງ ‘ແຮງຊັກຈູງຂອງບາບ’” ນຳ)
14 ບາງເທື່ອເຮົາອາດຮູ້ສຶກວ່າເຮົາບໍ່ສົມຄວນທີ່ຈະໄດ້ຮັບຄວາມຮັກຈາກພະເຢໂຫວາ. ກະແມ່ນແທ້ທີ່ເຮົາບໍ່ສົມຄວນໄດ້ຮັບຄວາມຮັກຈາກເພິ່ນ ຍ້ອນແນວນີ້ແຫຼະຈຶ່ງເຮັດໃຫ້ຄວາມຮັກຂອງພະເຢໂຫວາພິເສດຫຼາຍແທ້ໆ. ເຮົາບໍ່ໄດ້ເຮັດຫຍັງທີ່ສົມຄວນໄດ້ຮັບຄວາມຮັກຈາກພະເຢໂຫວາ ແຕ່ເພິ່ນກໍຈັດກຽມໃຫ້ມີຄ່າໄຖ່ເພື່ອເພິ່ນຈະຍົກໂທດຄວາມຜິດຂອງເຮົາໄດ້. ເພິ່ນຈັດກຽມແບບນີ້ກໍຍ້ອນເພິ່ນຮັກເຮົາ. (1ຢຮ. 4:10) ໃຫ້ເຮົາຈື່ໄວ້ນຳວ່າພະເຢຊູມາໂລກນີ້ເພື່ອຊ່ວຍຄົນບາບ ເພິ່ນບໍ່ໄດ້ມາເພື່ອຊ່ວຍຄົນສົມບູນແບບ. (ອ່ານໂຣມ 5:8) ໃນພວກເຮົາບໍ່ມີໃຜທີ່ຈະເຮັດທຸກຢ່າງໄດ້ດີສົມບູນແບບ ແລະພະເຢໂຫວາກໍບໍ່ໄດ້ຄາດໝາຍໃຫ້ເຮົາເຮັດແບບນັ້ນ. ເມື່ອເຮົາເຂົ້າໃຈວ່າບາບເຮັດໃຫ້ເຮົາສົງໄສວ່າພະເຢໂຫວາຮັກເຮົາຫຼືບໍ່ ເຮົາກໍແຮ່ງຕັ້ງໃຈຫຼາຍຂຶ້ນທີ່ຈະຕໍ່ສູ້ກັບຄວາມຄິດແບບນີ້.—ຣມ. 7:24, 25
ເລືອກທີ່ຈະພັກດີສະເໝີ
15-16. ຖ້າເຮົາພັກດີຕໍ່ພະເຢໂຫວາສະເໝີ ເຮົາສາມາດໝັ້ນໃຈໃນເລື່ອງໃດ ແລະຍ້ອນຫຍັງ? (2 ຊາມູເອນ 22:26)
15 ພະເຢໂຫວາຢາກໃຫ້ເຮົາຕັດສິນໃຈຢ່າງຖືກຕ້ອງໂດຍເລືອກທີ່ຈະ “ສັດຊື່ຕໍ່ເພິ່ນສະເໝີ.” (ພບຍ. 30:19, 20) ຖ້າເຮົາເຮັດແບບນັ້ນ ເຮົາກໍໝັ້ນໃຈໄດ້ວ່າພະເຢໂຫວາກໍຈະສັດຊື່ພັກດີຕໍ່ເຮົາ. (ອ່ານ 2 ຊາມູເອນ 22:26) ເມື່ອເຮົາພັກດີຕໍ່ພະເຢໂຫວາ ເຮົາກໍໝັ້ນໃຈໄດ້ວ່າເພິ່ນຈະຊ່ວຍເຮົາໃຫ້ຜ່ານບັນຫາຕ່າງໆໃນຊີວິດໄດ້.
16 ຄືກັບທີ່ເຮົາໄດ້ຮຽນມາແລ້ວ ເຮົາມີເຫດຜົນຫຼາຍຢ່າງທີ່ເຮັດໃຫ້ເຮົາຮູ້ສຶກໝັ້ນຄົງຄືກັບເຮືອທີ່ຖືກສະໝໍຍຶດໄວ້. ຕອນທີ່ເຮົາເຈິກັບບັນຫາ ເຮົາຮູ້ວ່າພະເຢໂຫວາຮັກເຮົາແລະຈະຊ່ວຍເຫຼືອເຮົາ. ເລື່ອງນີ້ເປັນຄຳສອນພື້ນຖານໃນຄຳພີໄບເບິນ. ຖ້າເຮົາສົງໄສວ່າພະເຢໂຫວາຮັກເຮົາຫຼືບໍ່ ໃຫ້ເຮົາຄິດຕຶກຕອງໃນສິ່ງທີ່ເຮົາຮູ້ກ່ຽວກັບຄວາມຮັກຂອງພະເຢໂຫວາແທນທີ່ຈະຄິດເຖິງຄວາມຮູ້ສຶກຂອງເຮົາໃນຕອນນັ້ນ. ໃຫ້ເຮົາໝັ້ນໃຈສະເໝີໃນຄຳສອນພື້ນຖານໃນຄຳພີໄບເບິນທີ່ວ່າ ພະເຢໂຫວາມີຄວາມຮັກທີ່ໝັ້ນຄົງຕະຫຼອດໄປ.
ເພງທີ 159 ສັນລະເສີນພະເຢໂຫວາ
a ຕົວຢ່າງອື່ນໆຢູ່ໃນພະບັນຍັດ 31:8 ເພງສັນລະເສີນ 94:14 ແລະເອຊາຢາ 49:15
b ຄຳອະທິບາຍຮູບ: ພີ່ນ້ອງຊາຍຄົນໜຶ່ງອະທິດຖານຂໍພະເຢໂຫວາໃຫ້ຊ່ວຍລາວເບິ່ງແຍງເມຍທີ່ເຈັບປ່ວຍ ໃຫ້ໃຊ້ຈ່າຍເງິນຢ່າງສະຫຼາດ ແລະໃຫ້ສອນລູກສາວໃຫ້ຮັກພະເຢໂຫວາ.