ຂ້ອຍຄວນເຊົາຂັບລົດບໍ?
ເຈົ້າຂັບລົດມາຫຼາຍສິບປີແລ້ວ ແລະເຈົ້າມັກທີ່ມີລົດເປັນຂອງໂຕເອງແລະຂັບໄປຫັ້ນໄປນີ້ຢ່າງອິດສະຫຼະ. ແຕ່ໝູ່ແລະຄົນໃນຄອບຄົວເປັນຫ່ວງເລື່ອງຄວາມປອດໄພຂອງເຈົ້າ ແລະເຂົາເຈົ້າຢາກໃຫ້ເຈົ້າເຊົາຂັບລົດ. ເຈົ້າບໍ່ເຂົ້າໃຈເຫດຜົນວ່າເປັນຫຍັງເຂົາເຈົ້າຈຶ່ງເປັນຫ່ວງ.
ເຈົ້າກຳລັງເຈິກັບສະຖານະການຄ້າຍຄືກັນນີ້ບໍ? ຖ້າແມ່ນ ອັນໃດຈະຊ່ວຍເຈົ້າໃຫ້ຕັດສິນໃຈວ່າຄວນຂັບລົດຕໍ່ໄປຫຼືບໍ່?
ໃນບາງປະເທດ ເມື່ອຄົນທີ່ຂັບລົດມີອາຍຸກາຍທີ່ກົດໝາຍກຳນົດໄວ້ແລະຢາກຕໍ່ໃບຂັບຂີ່ ລາວຕ້ອງໄດ້ໃຫ້ທ່ານໝໍກວດເບິ່ງສຸຂະພາບກ່ອນຫຼືຕ້ອງໄດ້ຮັບອະນຸຍາດຈາກທ່ານໝໍກ່ອນ. ພະຍານພະເຢໂຫວາທີ່ຢູ່ໃນປະເທດເຫຼົ່ານີ້ຕ້ອງເຮັດຕາມກົດໝາຍ. (ຣມ. 13:1) ເຖິງວ່າປະເທດທີ່ເຈົ້າຢູ່ບໍ່ມີກົດໝາຍແບບນີ້ ແຕ່ກໍມີຄຳແນະນຳຕ່າງໆທີ່ຈະຊ່ວຍເຈົ້າໃຫ້ຮູ້ວ່າເຈົ້າຍັງຂັບລົດໄດ້ຢ່າງປອດໄພຫຼືບໍ່.
ປະເມີນຄວາມສາມາດໃນການຂັບລົດຂອງເຈົ້າ
ໃນເວັບໄຊຂອງສະຖາບັນຜູ້ສູງອາຍຸແຫ່ງຊາດ (NIA) ຢູ່ປະເທດອາເມຣິກາແນະນຳໃຫ້ຜູ້ສູງອາຍຸຖາມໂຕເອງວ່າ:
ຂ້ອຍອ່ານປ້າຍສັນຍານຈາລະຈອນໄດ້ຍາກຫຼືຕາຂ້ອຍເບິ່ງບໍ່ເຫັນແຈ້ງຕອນກາງຄືນບໍ?
ຂ້ອຍຍັງສາມາດປິ່ນໜ້າໄປເບິ່ງກະຈົກທາງຂ້າງ ເງີຍຫົວເບິ່ງກະຈົກຫຼັງ ແລະກົ້ມກວດເບິ່ງຈຸດຕ່າງໆຂອງລົດທີ່ແນມບໍ່ເຫັນໄດ້ບໍ?
ຂ້ອຍຍັງຕອບສະໜອງໄດ້ໄວຢູ່ບໍ ເຊັ່ນ: ສາມາດປ່ຽນຈາກຢຽບຄັນເລັ່ງໄປຢຽບເບກທັນທີ?
ຂ້ອຍຂັບລົດຊ້າຫຼາຍຈົນເຮັດໃຫ້ການຈາລະຈອນຕິດຂັດບໍ?
ບໍ່ດົນມານີ້ ຂ້ອຍເກືອບເກີດອຸບັດຕິເຫດຫຼາຍເທື່ອບໍ ຫຼືລົດຂອງຂ້ອຍມີຮອຍຂູດແລະບຸ້ມຍ້ອນຂັບລົດໄປຕຳບາງຢ່າງບໍ?
ຂ້ອຍເຄີຍຖືກຕຳຫຼວດເອີ້ນໃຫ້ຈອດບໍຍ້ອນວິທີທີ່ຂ້ອຍຂັບລົດ?
ຂ້ອຍເຄີຍຫຼັບໃນຕອນຂັບລົດບໍ?
ຕອນນີ້ຂ້ອຍກິນຢາບາງຢ່າງທີ່ມີຜົນຕໍ່ການຂັບລົດບໍ?
ໝູ່ຫຼືຄົນໃນຄອບຄົວເລີ່ມເປັນຫ່ວງທີ່ຂ້ອຍຂັບລົດບໍ?
ຖ້າເຈົ້າຕອບວ່າແມ່ນ 1 ຫຼື 2 ຂໍ້ ເຈົ້າອາດຕ້ອງປັບປ່ຽນບາງຢ່າງ. ຕົວຢ່າງເຊັ່ນ: ເຈົ້າອາດຕ້ອງຂັບລົດໜ້ອຍລົງໂດຍສະເພາະຕອນກາງຄືນ. ໃຫ້ກວດເບິ່ງໂຕເອງເປັນໄລຍະໆເລື່ອງການຂັບລົດ. ເຈົ້າອາດຖາມຄອບຄົວຫຼືໝູ່ວ່າເຈົ້າຂັບລົດເປັນແນວໃດ. ນອກຈາກນັ້ນ ເຈົ້າອາດຮຽນຂັບລົດອີກເພື່ອຈະຮູ້ວິທີຂັບລົດໃຫ້ປອດໄພຫຼາຍຂຶ້ນ. ແຕ່ຖ້າເຈົ້າຕອບວ່າແມ່ນຫຼາຍຂໍ້ ຄືຊິດີກວ່າທີ່ເຈົ້າຈະເຊົາຂັບລົດ.a
ເຮັດຕາມຫຼັກການໃນຄຳພີໄບເບິນ
ມັນອາດຍາກທີ່ຈະເບິ່ງວ່າເຈົ້າຂັບລົດບໍ່ເກັ່ງຄືກັບແຕ່ກີ້ ແລະການລົມກັນວ່າເຈົ້າຈະບໍ່ໄດ້ຂັບລົດອີກຕໍ່ໄປກໍເປັນເລື່ອງທີ່ຮັບໄດ້ຍາກ. ຫຼັກການໃນຄຳພີໄບເບິນຈະຊ່ວຍເຈົ້າແນວໃດໃຫ້ເບິ່ງສະຖານະການຕາມຄວາມເປັນຈິງແລະຕັດສິນໃຈຢ່າງຖືກຕ້ອງ? ໃຫ້ເຮົາເບິ່ງຫຼັກການ 2 ຢ່າງນຳກັນ.
ເປັນຄົນຈຽມໂຕ. (ສພສ. 11:2) ເມື່ອອາຍຸຫຼາຍຂຶ້ນ ຕາເຮົາກໍບໍ່ເຫັນແຈ້ງ ຫູກໍບໍ່ໄດ້ຍິນຄັກ ກ້າມເນື້ອກໍອ່ອນເພຍ ແລະປະຕິກິລິຍາຕອບສະໜອງກໍຊ້າລົງ. ຕົວຢ່າງເຊັ່ນ: ບາງຄົນເມື່ອອາຍຸຫຼາຍຂຶ້ນກໍເຊົາຫຼິ້ນກິລາບາງຢ່າງຍ້ອນຮູ້ວ່າຖ້າຫຼິ້ນຈະເຮັດໃຫ້ເຂົາເຈົ້າບາດເຈັບໄດ້ງ່າຍ. ຫຼັກການທີ່ຄ້າຍໆກັນນີ້ກໍໃຊ້ກັບການຂັບລົດໄດ້ຄືກັນ. ເມື່ອຮອດຈຸດໃດຈຸດໜຶ່ງ ຄົນທີ່ຈຽມໂຕຈະຮູ້ວ່າຄວນເຊົາຂັບລົດເພື່ອຄວາມປອດໄພຂອງລາວເອງ. (ສພສ. 22:3) ເມື່ອມີຄົນສະແດງຄວາມເປັນຫ່ວງ ຄົນທີ່ຈຽມໂຕກໍພ້ອມທີ່ຈະຟັງ.—ສົມທຽບກັບ 2 ຊາມູເອນ 21:15-17
ເຮົາບໍ່ຢາກເຮັດໃຫ້ໃຜບາດເຈັບຫຼືເສຍຊີວິດ. (ພບຍ. 22:8) ເມື່ອຄົນຂັບລົດບໍ່ສາມາດຂັບລົດຢ່າງປອດໄພ ລົດທີ່ລາວຂັບກໍຈະເປັນອາວຸດທີ່ທຳຮ້າຍຫຼືຂ້າຄົນອື່ນ. ຄົນທີ່ຍັງຂັບລົດຕໍ່ໄປທັງໆທີ່ຂັບບໍ່ໄດ້ແລ້ວກໍເຮັດໃຫ້ໂຕເອງແລະຄົນອື່ນສ່ຽງຊີວິດ ແລະຖ້າລາວເຮັດໃຫ້ຜູ້ໃດຜູ້ໜຶ່ງບາດເຈັບຫຼືເສຍຊີວິດ ລາວຕ້ອງຮັບຜິດຊອບ.
ຖ້າເຈົ້າຮູ້ສຶກວ່າຍາກທີ່ຈະຕັດສິນໃຈວ່າຄວນເຊົາຂັບລົດຫຼືບໍ່ ຢ່າຄິດວ່າຖ້າເຈົ້າເຊົາຂັບລົດເຈົ້າຈະເສຍສັກສີແລະຄົນອື່ນຈະບໍ່ເຫັນຄ່າເຈົ້າ. ພະເຢໂຫວາຮັກເຈົ້າຍ້ອນເຈົ້າມີຄຸນລັກສະນະທີ່ດີຫຼາຍຢ່າງເຊິ່ງລວມເຖິງຄວາມຈຽມໂຕ ຄວາມຖ່ອມ ແລະຄິດຫາຄວາມປອດໄພຂອງຄົນອື່ນ. ເພິ່ນສັນຍາວ່າຈະຊ່ວຍເຈົ້າແລະໃຫ້ກຳລັງໃຈເຈົ້າ. (ອຊຢ. 46:4) ພະເຢໂຫວາຈະບໍ່ປະບໍ່ຖິ້ມເຈົ້າ. ສະນັ້ນ ໃຫ້ເຈົ້າອະທິດຖານຂໍໃຫ້ເພິ່ນຊ່ວຍເຈົ້າໃຫ້ມີສະຕິປັນຍາແລະເຂົ້າໃຈຫຼັກການທີ່ຢູ່ໃນຄຳພີໄບເບິນເພື່ອຈະຕັດສິນໃຈໄດ້ວ່າເຈົ້າຄວນເຊົາຂັບລົດຫຼືບໍ່.
a ສຳລັບຂໍ້ມູນເພີ່ມເຕີມ ໃຫ້ເບິ່ງບົດຄວາມ “ອຸບັດຕິເຫດທາງລົດ—ເຈົ້າປອດໄພບໍ?” ໃນຕື່ນເຖີດ! 8 ກັນຍາ 2002. (ພາສາໄທ)