ວິທີສຶກສາສ່ວນຕົວໃຫ້ມ່ວນແລະໄດ້ຮັບປະໂຫຍດຫຼາຍຂຶ້ນ

ໂຢຊວຍອ່ານກົດໝາຍຂອງພະເຈົ້າ ກຳແພງເມືອງເຢລິໂກຖືກທຳລາຍ ແຕ່ເຮືອນຂອງລາຫາບຍັງມີສະພາບດີທີ່ຄືເກົ່າ ໂຢຊວຍຍົກມືຂຶ້ນເທິງຟ້າເພື່ອອະທິດຖານ

ໂຢຊວຍຕ້ອງນຳຊາດອິດສະລາແອນເຂົ້າໄປໃນແຜ່ນດິນທີ່ພະເຈົ້າສັນຍາ. ນີ້ເປັນເລື່ອງທີ່ຍາກແທ້ໆ. ແຕ່ພະເຢໂຫວາເສີມກຳລັງແລະໃຫ້ກຳລັງໃຈລາວໂດຍບອກວ່າ: “ຈົ່ງຊູແຮງຕົວຂຶ້ນແລະຈົ່ງຕັ້ງໝັ້ນຄົງຢູ່.” ພະອົງບອກໂຢຊວຍວ່າຖ້າລາວອ່ານແລະເຊື່ອຟັງກົດໝາຍ ລາວກໍຈະຕັດສິນໃຈໄດ້ຢ່າງສະຫຼາດແລະປະສົບຜົນສຳເລັດ.—ໂຢຊວຍ 1:7, 8

ເຮົາຢູ່ໃນ “ຊ່ວງເວລາວິກິດທີ່ມີແຕ່ຄວາມຫຍຸ້ງຍາກລຳບາກ” ດັ່ງນັ້ນຈຶ່ງເຮັດໃຫ້ເຮົາໃຊ້ຊີວິດຢ່າງຍາກລຳບາກ. (2 ຕີໂມເຕ 3:1, ລ.ມ.) ຖ້າເຮົາຢາກປະສົບຜົນສຳເລັດຄືກັບໂຢຊວຍ ເຮົາຕ້ອງເຮັດຕາມຄຳແນະນຳທີ່ພະເຢໂຫວາໃຫ້ກັບລາວ. ເຮົາຕ້ອງອ່ານຄຳພີໄບເບິນທຸກໆມື້ແລະໃຊ້ສິ່ງທີ່ໄດ້ຮຽນຮູ້ເພື່ອຊ່ວຍເຮົາໃຫ້ຕັດສິນໃຈຢ່າງສະຫຼາດ.

ການສຶກສາສ່ວນຕົວເປັນເລື່ອງທີ່ສຳຄັນຫຼາຍ ແຕ່ບາງຄົນກໍບໍ່ຮູ້ວິທີທີ່ຈະສຶກສາ ຫຼືອາດຮູ້ສຶກບໍ່ມ່ວນ. ເມື່ອເຈົ້າເບິ່ງຂອບ “ລອງເຮັດຕາມຄຳແນະນຳເຫຼົ່ານີ້” ເຈົ້າຈະເຫັນເຄັດລັບທີ່ຈະຊ່ວຍໃຫ້ເຈົ້າຮູ້ສຶກມ່ວນແລະໄດ້ຮັບປະໂຫຍດກັບການສຶກສາສ່ວນຕົວຫຼາຍຂຶ້ນ.

ຜູ້ຂຽນພະທຳຄຳເພງບອກວ່າ: “ຂໍຊ່ອຍຂ້ານ້ອຍໃຫ້ທຽວໄປໃນທາງແຫ່ງຂໍ້ຄຳສັ່ງທັງຫຼາຍຂອງພະອົງ ເຫດວ່າຂ້ານ້ອຍຊອບໃຈໃນການນັ້ນ.” (ຄຳເພງ 119:35) ເຈົ້າກໍສາມາດມ່ວນກັບການສຶກສາຄຳພີໄບເບິນໄດ້ຄືກັນ. ແຮ່ງເຈົ້າສຶກສາຫຼາຍ ເຈົ້າກໍແຮ່ງຈະພົບຂໍ້ຄິດດີໆຫຼາຍຢ່າງ.

ເຖິງວ່າເຈົ້າບໍ່ໄດ້ເປັນຜູ້ນຳປະເທດຊາດຄືກັບໂຢຊວຍ ແຕ່ເຈົ້າເອງກໍມີບັນຫາໃນຊີວິດຄືກັນ. ດັ່ງນັ້ນ ຂໍໃຫ້ເຈົ້າສຶກສາສ່ວນຕົວແລະເຊື່ອຟັງພະຄຳຂອງພະເຈົ້າຄືກັບໂຢຊວຍ ແລ້ວເຈົ້າຈະຕັດສິນໃຈເລື່ອງຕ່າງໆຢ່າງສະຫຼາດແລະປະສົບຜົນສຳເລັດ.

ລອງເຮັດຕາມຄຳແນະນຳເຫຼົ່ານີ້

ອະທິດຖານກ່ອນສຶກສາ. ຄຳພີໄບເບິນບອກໃຫ້ຮູ້ວ່າພະເຢໂຫວາຄິດແນວໃດ ແລະຂຽນຂຶ້ນເພື່ອປະໂຫຍດຂອງເຮົາ. ດັ່ງນັ້ນ ເມື່ອເຈົ້າອ່ານຄຳພີໄບເບິນ ໃຫ້ເຈົ້າຂໍພະເຢໂຫວາຊ່ວຍເຈົ້າເຂົ້າໃຈສິ່ງທີ່ອ່ານ ຈື່ເລື່ອງນັ້ນ ແລະນຳມາໃຊ້ເພື່ອຈະຕັດສິນໃຈເລື່ອງຕ່າງໆໃນຊີວິດໄດ້ຢ່າງຖືກຕ້ອງ.—ເອເຊດຣາເຊ 7:10
ຖາມຕົວເອງ. ຕອນທີ່ເຈົ້າອ່ານຄຳພີໄບເບິນຫຼືໜັງສືຕ່າງໆຂອງອົງການ. ຕົວຢ່າງ: ‘ເລື່ອງນີ້ບອກຫຍັງຂ້ອຍກ່ຽວກັບພະເຢໂຫວາ? ເລື່ອງນີ້ກ່ຽວຂ້ອງກັບເລື່ອງຫຼັກໃນຄຳພີໄບເບິນແນວໃດ? ຂ້ອຍຈະໃຊ້ເລື່ອງນີ້ເພື່ອຊ່ວຍຄົນອື່ນແນວໃດ?’
ຄິດຕຶກຕອງຕອນທີ່ສຶກສາ. ໃນຕອນທີ່ເຈົ້າສຶກສາໃຫ້ຢຸດຄິດບຶດໜຶ່ງເພື່ອຄິດຕຶກຕອງ. ໃຫ້ຖາມຕົວເອງວ່າ: ‘ເລື່ອງນີ້ເຮັດໃຫ້ຂ້ອຍຮູ້ສຶກແນວໃດ? ເປັນຫຍັງມັນຈຶ່ງເຮັດໃຫ້ຂ້ອຍຮູ້ສຶກແບບນັ້ນ? ເລື່ອງນີ້ກ່ຽວຂ້ອງແນວໃດກັບສິ່ງທີ່ເຄີຍເກີດຂຶ້ນກັບຂ້ອຍ ສິ່ງທີ່ຂ້ອຍກຳລັງເຈິຢູ່ຕອນນີ້ ແລະສິ່ງທີ່ຂ້ອຍອາດຈະເຈິໃນອະນາຄົດ? ຂ້ອຍຈະເອົາຫຼັກການຫຼືຄຳແນະນຳເຫຼົ່ານີ້ໄປໃຊ້ໃນຊີວິດໄດ້ແນວໃດ?’ (ໂຢບ 23:5; ຄຳເພງ 49:3) ເມື່ອເຈົ້າຄິດຕຶກຕອງ ເຈົ້າອະທິບາຍໄດ້ບໍວ່າເປັນຫຍັງພະເຢໂຫວາບໍ່ຢາກໃຫ້ຄົນຂອງພະອົງເຮັດແບບນັ້ນ ຫຼືລອງຄິດເບິ່ງວ່າຜົນຈະເປັນແນວໃດຖ້າຄົນໃນຄຳພີໄບເບິນເຮັດອີກແບບໜຶ່ງ.—ພະບັນຍັດ 32:28, 29
ຈິນຕະນາການຕອນທີ່ເຈົ້າອ່ານ. ຕົວຢ່າງ: ເຈົ້ານຶກພາບເຫດການອອກບໍຕອນທີ່ພວກອ້າຍໄດ້ຂາຍໂຢເຊບໃຫ້ພວກຍິດມາເອນ? (ຕົ້ນເດີມ 37:18-28) ເຈົ້າໄດ້ເຫັນ ໄດ້ຍິນ ແລະໄດ້ກິ່ນຫຍັງແດ່? ໃຫ້ສົມມຸດວ່າເຈົ້າເປັນຕົວລະຄອນໃນເຫດການນັ້ນ ແລະຄິດເບິ່ງວ່າເຂົາເຈົ້າຄິດແລະຮູ້ສຶກແນວໃດ? ເມື່ອເຈົ້າໃຊ້ຈິນຕະນາການຕອນທີ່ອ່ານ ເຈົ້າຈະໄດ້ຮັບປະໂຫຍດຫຼາຍຂຶ້ນ.
ໃຊ້ເຄື່ອງມືສຳລັບສຶກສາທີ່ອົງການໄດ້ຈັດກຽມ. ເຄື່ອງມືເຫຼົ່ານີ້ຈະຊ່ວຍໃຫ້ການຄົ້ນຄວ້າຂອງເຈົ້າໜ້າສົນໃຈຫຼາຍຂຶ້ນ. ໃຫ້ຮຽນວິທີໃຊ້ເຄື່ອງມືເຫຼົ່ານີ້ໃນພາສາຂອງເຈົ້າທັງແບບອອນລາຍແລະເປັນປຶ້ມ. ຢ່າລັງເລທີ່ຈະຂໍຄົນອື່ນຊ່ວຍເຈົ້າໃຫ້ຮຽນຮູ້ທີ່ຈະໃຊ້ໃຫ້ເກັ່ງຂຶ້ນ. ຕົວຢ່າງ: ເຈົ້າສາມາດໃຊ້ດັດຊະນີສັບພະໜັງສືຂອງວັອດທາວເວີ (ພາສາອັງກິດ) ຫຼືຄູ່ມືຄົ້ນຄວ້າສຳລັບພະຍານພະເຢໂຫວາ ເຊິ່ງຈະຊ່ວຍເຈົ້າໃຫ້ພົບຫົວເລື່ອງທີ່ເຈົ້າຕ້ອງການແລະເຫັນຄຳອະທິບາຍຂອງຂໍ້ຄຳພີຕ່າງໆ. ນອກຈາກນັ້ນ ເຈົ້າສາມາດໃຊ້ພາກຜະໜວກຂອງຄຳພີໄບເບິນສະບັບແປໂລກໃໝ່ ຖ້າມີໃນພາສາຂອງເຈົ້າ ໃນນັ້ນມີຂໍ້ມູນທີ່ເປັນປະໂຫຍດກ່ຽວກັບພູມສາດ ລຳດັບເຫດການ ມາດຕາຊັ່ງນ້ຳໜັກຫຼືບອກຂະໜາດ ແລະຫົວເລື່ອງອື່ນໆ.
ສະຫຼຸບຈຸດສຳຄັນ. ການເຮັດຕາມຄຳແນະນຳເຫຼົ່ານີ້ຈະຊ່ວຍເຈົ້າໃຫ້ຈື່ສິ່ງທີ່ຫາກໍສຶກສາ ແລະຈະດີກວ່ານັ້ນອີກຖ້າເຈົ້າໄດ້ລົມສິ່ງທີ່ຮຽນກັບຄົນອື່ນ. ນອກຈາກນັ້ນ ໃຫ້ເບິ່ງວ່າຍັງມີສິ່ງໃດແດ່ທີ່ເຈົ້າຈະເອົາໄປໃຊ້ໃນວຽກປະກາດ? ການເຮັດແບບນີ້ຈະຊ່ວຍເຈົ້າໃຫ້ຈື່ຈຸດສຳຄັນແລະຄົນອື່ນໆກໍຈະໄດ້ຮັບປະໂຫຍດຈາກສິ່ງທີ່ເຈົ້າຮຽນຄືກັນ.