ເລື່ອງທີ່ໜ້າຮູ້ກ່ຽວກັບການຮຽນຄຳພີໄບເບິນກັບພະຍານພະເຢໂຫວາ
ພະຍານພະເຢໂຫວາຊວນເຈົ້າມາຮຽນຄຳພີໄບເບິນນຳກັນ. ການຮຽນຄຳພີໄບເບິນຈະຊ່ວຍເຈົ້າຫຼາຍຢ່າງເຊັ່ນ:
ຊ່ວຍໃຫ້ຊີວິດມີຄວາມສຸກ
ຊ່ວຍໃຫ້ເຈົ້າເປັນໝູ່ກັບພະເຈົ້າ
ຊ່ວຍໃຫ້ເຈົ້າຮູ້ຄຳສັນຍາຂອງພະເຈົ້າກ່ຽວກັບອະນາຄົດ
ໃນບົດຄວາມນີ້ເຮົາຈະມາເບິ່ງວ່າ
ເຮົາຮຽນຄຳພີໄບເບິນແນວໃດ?
ຜູ້ສອນຈະຊ່ວຍເຈົ້າຮຽນຄຳພີໄບເບິນໄປເທື່ອລະເລື່ອງໂດຍໃຊ້ປຶ້ມຊີວິດທີ່ມີຄວາມສຸກຕະຫຼອດໄປ! ເຈົ້າຈະຄ່ອຍໆຮູ້ວ່າຄຳພີໄບເບິນສອນຫຍັງແດ່ ແລະເປັນປະໂຫຍດກັບເຈົ້າແນວໃດ. ເພື່ອຈະຮູ້ຫຼາຍຂຶ້ນ ຂໍເຊີນເບິ່ງວິດີໂອ.
ຕ້ອງເສຍເງິນຄ່າຮຽນບໍ?
ບໍ່. ພະຍານພະເຢໂຫວາເຮັດຕາມຄຳແນະນຳຂອງພະເຢຊູທີ່ໃຫ້ກັບພວກລູກສິດວ່າ: “ສິ່ງທີ່ເຈົ້າໄດ້ຮັບມາລ້າໆ ກໍໃຫ້ຄົນອື່ນໄປລ້າໆ.” (ມັດທາຍ 10:8) ນອກຈາກນັ້ນ ເຈົ້າຍັງສາມາດຂໍຮັບປຶ້ມທີ່ໃຊ້ໃນການຮຽນ ເຊິ່ງລວມເຖິງຄຳພີໄບເບິນແລະປຶ້ມຊີວິດທີ່ມີຄວາມສຸກຕະຫຼອດໄປ! ໄດ້ຟຣີ.
ຕ້ອງຮຽນດົນສ່ຳໃດ?
ຄູ່ມືທີ່ໃຊ້ຮຽນຄຳພີໄບເບິນນີ້ມີທັງໝົດ 60 ບົດ. ເຮົາບໍ່ໄດ້ກຳນົດຕາຍໂຕວ່າຕ້ອງຮຽນສ່ຳໃດ ແຕ່ຄົນທີ່ຮຽນສ່ວນຫຼາຍມັກຮຽນເທື່ອລະ 1 ບົດຫຼືຫຼາຍກວ່ານັ້ນຕໍ່ອາທິດ.
ຈະເລີ່ມຮຽນແນວໃດ?
1. ຂຽນແບບຟອມອອນລາຍ. ເຮົາຈະໃຊ້ຂໍ້ມູນສ່ວນໂຕທີ່ເຈົ້າໃຫ້ເພື່ອພະຍານພະເຢໂຫວາຜູ້ໃດຜູ້ໜຶ່ງຈະຕິດຕໍ່ກັບເຈົ້າເທົ່ານັ້ນ.
2. ຜູ້ສອນຈະຕິດຕໍ່ເຈົ້າ. ຜູ້ສອນຈະອະທິບາຍວ່າການຮຽນຄຳພີໄບເບິນເຮັດແນວໃດ ແລະຈະຕອບຄຳຖາມຕ່າງໆທີ່ເຈົ້າສົງໄສ.
3. ເຈົ້ານັດວັນເວລາທີ່ຈະຮຽນໄດ້. ເຈົ້າອາດຈະຮຽນແບບໂຕຕໍ່ໂຕຫຼືຮຽນທາງໂທລະສັບ ໂທທາງວິດີໂອ ຈົດໝາຍ ຫຼືອີເມວກໍໄດ້. ການຮຽນແຕ່ລະເທື່ອໃຊ້ເວລາປະມານ 1 ຊົ່ວໂມງ ແຕ່ຖ້າເຈົ້າມີເວລາໜ້ອຍຫຼືຫຼາຍກວ່ານັ້ນກໍສາມາດປັບປ່ຽນໄດ້.
ລອງຮຽນແຕ່ບາງບົດກ່ອນໄດ້ບໍ?
ໄດ້. ຫຼັງຈາກທີ່ເຈົ້າຂຽນແບບຟອມອອນລາຍ ຈະມີຜູ້ສອນຕິດຕໍ່ເຈົ້າ ເຈົ້າສາມາດບອກກັບຜູ້ສອນໄດ້ວ່າເຈົ້າຢາກຈະລອງເບິ່ງກ່ອນວ່າເຈົ້າຈະມັກການຮຽນນີ້ບໍ. ຜູ້ສອນຈະໃຊ້ຈຸນລະສານຊີວິດທີ່ມີຄວາມສຸກຕະຫຼອດໄປ!—ເລີ່ມຮຽນຮູ້ກ່ຽວກັບຄຳພີໄບເບິນ ເຊິ່ງມີ 3 ບົດທີ່ຈະຊ່ວຍໃຫ້ເຈົ້າຮູ້ວ່າເຈົ້າຈະມັກເລື່ອງທີ່ໄດ້ຮຽນຫຼືບໍ່.
ຖ້າຮຽນຄຳພີໄບເບິນ ຂ້ອຍຈະຕ້ອງປ່ຽນສາສະໜາບໍ?
ບໍ່. ພະຍານພະເຢໂຫວາຢາກບອກຄົນອື່ນໃຫ້ຮູ້ວ່າຄຳພີໄບເບິນສອນຫຍັງ ແຕ່ເຮົາບໍ່ກົດດັນໃຜໃຫ້ປ່ຽນສາສະໜາ. ເຮົາເຮັດຕາມສິ່ງທີ່ຄຳພີໄບເບິນບອກຄືໃຫ້ກຽດແລະນັບຖືການຕັດສິນໃຈຂອງທຸກຄົນວ່າຈະນັບຖືສາສະໜາຫຍັງ.—1 ເປໂຕ 3:15
ຂ້ອຍຈະໃຊ້ຄຳພີໄບເບິນຂອງໂຕເອງໄດ້ບໍ?
ໄດ້ ເຈົ້າຈະໃຊ້ຄຳພີໄບເບິນສະບັບແປໃດກໍໄດ້. ພະຍານພະເຢໂຫວາໃຊ້ຄຳພີໄບເບິນສະບັບແປໂລກໃໝ່ ເຊິ່ງຈະແຈ້ງເຂົ້າໃຈງ່າຍແລະຖືກຕ້ອງ ແຕ່ເຮົາກໍເຂົ້າໃຈວ່າຜູ້ຮຽນຫຼາຍຄົນອາດຈະມັກສະບັບແປທີ່ເຂົາເຈົ້າຄຸ້ນເຄີຍຫຼາຍກວ່າ.
ຂ້ອຍຈະຊວນຄົນອື່ນມາຮຽນນຳໄດ້ບໍ?
ໄດ້. ເຈົ້າອາດຊວນຄອບຄົວຫຼືໝູ່ເພື່ອນຂອງເຈົ້າມາຮຽນນຳກັນໄດ້.
ຖ້າຂ້ອຍເຄີຍຮຽນຄຳພີໄບເບິນກັບພະຍານພະເຢໂຫວາມາແລ້ວ ຂ້ອຍຈະເລີ່ມຮຽນໃໝ່ໄດ້ບໍ?
ໄດ້. ເຈົ້າຈະມ່ວນກັບການຮຽນຫຼາຍກວ່າແຕ່ກ່ອນອີກ ເພາະເຮົາໄດ້ປັບຄູ່ມືການຮຽນໃໝ່ໃຫ້ເຂົ້າກັບປັດຈຸບັນ. ປຶ້ມນີ້ມີວິດີໂອຊ່ວຍສອນທີ່ຈະເຮັດໃຫ້ເຈົ້າມ່ວນກັບການຮຽນຫຼາຍຂຶ້ນ.
ຂ້ອຍຈະຮຽນເອງໂດຍບໍ່ຕ້ອງມີຜູ້ສອນໄດ້ບໍ?
ໄດ້. ເຖິງວ່າຄົນທີ່ຮຽນຫຼາຍຄົນໄດ້ຮັບປະໂຫຍດຫຼາຍເມື່ອມີຜູ້ສອນຊ່ວຍອະທິບາຍ ແຕ່ບາງຄົນກໍມັກຮຽນດ້ວຍໂຕເອງກ່ອນ. ເຮົາມີສ່ວນເຄື່ອງມືສຶກສາຄຳພີໄບເບິນ ເຊິ່ງຈະມີເຄື່ອງມືແລະແຫຼ່ງຂໍ້ມູນຕ່າງໆທີ່ຈະຊ່ວຍເຈົ້າຮຽນຄຳພີໄບເບິນ. ເຈົ້າສາມາດເລືອກໃຊ້ເຄື່ອງມືຕ່າງໆຕໍ່ໄປນີ້:
ໄດ້ປະໂຫຍດຈາກຄຳສອນໃນຄຳພີໄບເບິນ. ບົດຄວາມເຫຼົ່ານີ້ເວົ້າເຖິງຫຼັກການຕ່າງໆໃນຄຳພີໄບເບິນທີ່ໃຊ້ໄດ້ແທ້ໃນຊີວິດຂອງເຮົາ ເຊັ່ນ: ບົດຄວາມເລື່ອງ ວິທີຮັບມືກັບຄວາມເຄັ່ງຕຶງ ວິທີສອນລູກ ຈະໃຊ້ຊີວິດແນວໃດຖ້າລາຍໄດ້ໜ້ອຍລົງ?
ວິດີໂອອະທິບາຍຄຳພີໄບເບິນ. ວິດີໂອສັ້ນຫຼາຍເລື່ອງທີ່ອະທິບາຍຄຳສອນຫຼັກຂອງຄຳພີໄບເບິນ.
ຖາມ-ຕອບເລື່ອງຄຳພີໄບເບິນ. ບົດຄວາມທີ່ຕອບຄຳຖາມເລື່ອງຕ່າງໆໃນຄຳພີໄບເບິນ.
ອະທິບາຍຂໍ້ຄຳພີ. ເບິ່ງຄວາມໝາຍທີ່ແທ້ຈິງຂອງຂໍ້ຄຳພີແລະສຳນວນຈາກຂໍ້ຄຳພີທີ່ຫຼາຍຄົນຮູ້ຈັກດີ.