ໜຸ່ມສາວຖາມວ່າ
ຈະເຮັດແນວໃດຖ້າບໍ່ຢາກໄປໂຮງຮຽນ?
ອາຈານເຂັ້ມງວດເລື່ອງກົດລະບຽບ ຄວາມກົດດັນຈາກໝູ່ ການສອບເສັງທີ່ເຄັ່ງຕຶງ ແລະມີວຽກບ້ານຖ້ວມຫົວ. ຖ້າເຈົ້າບໍ່ມັກໄປໂຮງຮຽນກໍບໍ່ແປກ. ໄວລຸ້ນຄົນໜຶ່ງທີ່ຊື່ ຣາເຊວa ບອກວ່າ:
“ຖ້າເລືອກໄດ້ຂ້ອຍຂໍໄປຢູ່ບ່ອນອື່ນທີ່ບໍ່ແມ່ນໂຮງຮຽນ ໄປແຄມທະເລ ຢູ່ກັບໝູ່ ຫຼືໄປຊ່ວຍພໍ່ແມ່ແຕ່ງກິນແລະອະນາໄມເຮືອນກໍຍັງດີກວ່າ!”
ຖ້າເຈົ້າຮູ້ສຶກຄືກັບຣາເຊວ ເຈົ້າອາດຈະຮູ້ສຶກວ່າການໄປໂຮງຮຽນເປັນຄືກັບການຕິດຄຸກທີ່ເຈົ້າຕ້ອງອົດທົນຕໍ່ໄປເລື້ອຍໆຈົນກວ່າຈະຖືກປ່ອຍອອກມາເມື່ອຮຽນຈົບ. ການຄິດແບບນີ້ອາດເຮັດໃຫ້ທໍ້ໃຈ. ແລ້ວມີວິທີຄິດແບບອື່ນບໍທີ່ຈະຊ່ວຍໄດ້?
ເຈົ້າຮູ້ບໍ? ຖ້າເຈົ້າປ່ຽນຄວາມຄິດທີ່ມີຕໍ່ໂຮງຮຽນ ເຈົ້າກໍຈະຮັບມືກັບເລື່ອງຕ່າງໆໄດ້ດີຂຶ້ນ ແລະບໍ່ເບິ່ງວ່າການໄປໂຮງຮຽນເປັນການທົດສອບຄວາມອົດທົນ. ທີ່ຈິງ ໂຮງຮຽນເປັນຄືກັບເຄື່ອງມືໜຶ່ງທີ່ຈະຊ່ວຍເຈົ້າໃຫ້ພັດທະນາທັກສະຕ່າງໆທີ່ຈຳເປັນຕ້ອງໃຊ້ຕອນທີ່ເປັນຜູ້ໃຫຍ່.
ຄວາມຮູ້ສຶກທີ່ເຈົ້າມີຕໍ່ໂຮງຮຽນຈະປ່ຽນໄປ ເມື່ອຄິດເຖິງສິ່ງເຫຼົ່ານີ້:
ຄວາມຮູ້ທີ່ໄດ້ຮັບ. ແຮ່ງເຈົ້າມີຄວາມຮູ້ຫຼາຍ ເຈົ້າກໍແຮ່ງຈະຮູ້ວິທີແກ້ໄຂບັນຫາໃນອະນາຄົດໄດ້ດີຂຶ້ນຕອນທີ່ໄປເຮັດວຽກ ຫຼືບັນຫາອື່ນໆໃນຊີວິດໂດຍທີ່ບໍ່ຕ້ອງເພິ່ງພາຄົນອື່ນຕະຫຼອດເວລາ. ໃຫ້ຖາມໂຕເອງວ່າ: ‘ເຖິງວ່າຢູ່ໂຮງຮຽນຈະມີບາງຢ່າງທີ່ຂ້ອຍບໍ່ມັກ ແຕ່ຄວາມຮູ້ທີ່ຂ້ອຍໄດ້ຮັບເປັນປະໂຫຍດຕໍ່ຂ້ອຍໃນທາງໃດແດ່?’
ຫຼັກການໃນຄຳພີໄບເບິນ: “ໃຫ້ປົກປ້ອງສະຕິປັນຍາທີ່ໃຊ້ໄດ້ແທ້ແລະຄວາມສາມາດໃນການຄິດ.”—ສຸພາສິດ 3:21
ສຳລັບຂໍ້ມູນເພີ່ມເຕີມ ໃຫ້ເບິ່ງບົດຄວາມ “ຈະເຮັດແນວໃດຖ້າຜົນການຮຽນບໍ່ດີ?” (ພາສາໄທ)
ຝຶກນິດໄສ. ຊີວິດໃນໂຮງຮຽນຈະຊ່ວຍເຈົ້າໃຫ້ຮູ້ວິທີບໍລິຫານເວລາ ມີລະບຽບວິໄນຕໍ່ໂຕເອງ ແລະເປັນຄົນດຸໝັ່ນເຮັດວຽກ. ສິ່ງເຫຼົ່ານີ້ເປັນສິ່ງທີ່ເຈົ້າຈຳເປັນຕ້ອງມີເມື່ອເປັນຜູ້ໃຫຍ່. ໃຫ້ຖາມໂຕເອງວ່າ: ‘ກິດຈະກຳຢູ່ໂຮງຮຽນຊ່ວຍຂ້ອຍແນວໃດໃຫ້ເປັນຄົນທີ່ມີລະບຽບວິໄນແລະດຸໝັ່ນເຮັດວຽກ? ຂ້ອຍຕ້ອງປັບປຸງໂຕເອງໃນເລື່ອງເຫຼົ່ານີ້ແນວໃດ?’
ຫຼັກການໃນຄຳພີໄບເບິນ: “ການເຮັດວຽກໜັກທຸກຢ່າງມີປະໂຫຍດ.”—ສຸພາສິດ 14:23
ສຳລັບຂໍ້ມູນເພີ່ມເຕີມ ໃຫ້ເບິ່ງບົດຄວາມ “ຈະຈັດເວລາແນວໃດດີ?” (ພາສາໄທ)
ຮູ້ຈັກເຂົ້າສັງຄົມ. ການລົມກັບໝູ່ແລະເຮັດກິດຈະກຳນຳກັນຢູ່ໂຮງຮຽນຈະຊ່ວຍເຈົ້າໃຫ້ເປັນຄົນເຫັນອົກເຫັນໃຈແລະນັບຖືຄົນອື່ນ. ຜູ້ຊາຍໄວລຸ້ນທີ່ຊື່ ໂຈຊົວບອກວ່າ: “ການຮຽນຮູ້ວິທີລົມກັບຄົນອື່ນມີຄວາມສຳຄັນສ່ຳກັນກັບການຮຽນປະຫວັດສາດແລະວິທະຍາສາດ ເພາະມັນເປັນທັກສະທີ່ເຈົ້າໃຊ້ໄດ້ຕະຫຼອດຊີວິດ.” ໃຫ້ຖາມໂຕເອງວ່າ ‘ຕອນຢູ່ໂຮງຮຽນ ຂ້ອຍໄດ້ຮຽນຮູ້ວິທີປັບໂຕໃຫ້ເຂົ້າກັບຄົນອື່ນລວມທັງຄົນທີ່ມີພູມຫຼັງຫຼືຄວາມເຊື່ອຕ່າງຈາກຂ້ອຍແນວໃດ?’
ຫຼັກການໃນຄຳພີໄບເບິນ: “ໃຫ້ພະຍາຍາມສ້າງສັນຕິສຸກກັບທຸກຄົນ.”—ເຮັບເຣີ 12:14
ສຳລັບຂໍ້ມູນເພີ່ມເຕີມ ໃຫ້ເບິ່ງບົດຄວາມ “ຂ້ອຍຈະລົມເກັ່ງຂຶ້ນໄດ້ແນວໃດ?” (ພາສາໄທ)
ອະນາຄົດຂອງເຈົ້າ. ໂຮງຮຽນສາມາດຊ່ວຍເຈົ້າໃຫ້ຮູ້ວ່າເຈົ້າມີຄວາມສາມາດດ້ານໃດແລະຕັ້ງເປົ້າໝາຍທີ່ເໝາະກັບໂຕເອງໄດ້. ຜູ້ຍິງໄວລຸ້ນທີ່ຊື່ ບຣຸກບອກວ່າ: “ຕອນຢູ່ໂຮງຮຽນ ຂ້ອຍໄດ້ຮຽນຮູ້ທັກສະບາງຢ່າງໂດຍສະເພາະ ເຈົ້າກໍຈະໄດ້ຮຽນແບບນັ້ນຄືກັນ ແລະເມື່ອຮຽນຈົບ ເຈົ້າກໍຈະຊອກວຽກເຮັດໄດ້ງ່າຍຂຶ້ນເພາະເຈົ້າມີທັກສະນັ້ນແລ້ວ.” ໃຫ້ຖາມໂຕເອງວ່າ: ‘ຂ້ອຍຈະເຮັດວຽກຫຍັງຫຼັງຈາກຮຽນຈົບ? ຂ້ອຍຈະເລືອກຮຽນສາຍໃດເພື່ອໃຫ້ເໝາະກັບວຽກທີ່ຂ້ອຍຢາກເຮັດ?’
ຫຼັກການໃນຄຳພີໄບເບິນ: “ໃຫ້ເອົາສິ່ງທີ່ຂວາງທາງອອກຈາກທາງຂອງລູກ ແລ້ວທາງຂອງລູກຈະປອດໄພ.”—ສຸພາສິດ 4:26, ໄຂເງື່ອນ
a ບາງຊື່ໃນບົດຄວາມນີ້ເປັນຊື່ສົມມຸດ.