ເຢເຣມີຢາ
24 ຫຼັງຈາກເນບູກາດເນັດຊາ*ກະສັດຂອງບາບີໂລນຈັບເຢໂກນີຢາ*+ລູກຊາຍຂອງເຢໂຮຢາກີມ+ກະສັດຂອງຢູດາ ລວມທັງພວກເຈົ້ານາຍຂອງຢູດາ ພວກທີ່ເຮັດວຽກດ້ານສີໄມ້ລາຍມື ແລະພວກຊ່າງເຫຼັກ*ໄປເປັນຊະເລີຍ ລາວພາເຂົາເຈົ້າທັງໝົດອອກຈາກເຢຣູຊາເລັມໄປບາບີໂລນ.+ ແລ້ວພະເຢໂຫວາກໍໃຫ້ຂ້ອຍເຫັນກະຕ່າໃສ່ໝາກເດື່ອ 2 ກະຕ່າທີ່ຕັ້ງຢູ່ໜ້າວິຫານຂອງພະເຢໂຫວາ. 2 ກະຕ່າໜຶ່ງມີໝາກເດື່ອທີ່ດີຫຼາຍຄືກັບໝາກເດື່ອຊຸດທຳອິດທີ່ເກັບກ່ຽວຕອນຕົ້ນປີ ແຕ່ອີກກະຕ່າໜຶ່ງມີໝາກເດື່ອທີ່ບໍ່ດີຈົນກິນບໍ່ໄດ້ເລີຍ.
3 ພະເຢໂຫວາຖາມຂ້ອຍວ່າ: “ເຢເຣມີຢາ ເຈົ້າເຫັນຫຍັງ?” ຂ້ອຍຕອບວ່າ: “ລູກເຫັນໝາກເດື່ອ. ໝາກເດື່ອທີ່ດີກໍດີຫຼາຍ ແຕ່ໝາກເດື່ອທີ່ບໍ່ດີກໍບໍ່ດີຈົນກິນບໍ່ໄດ້ເລີຍ.”+
4 ແລ້ວພະເຢໂຫວາກໍເວົ້າກັບຂ້ອຍອີກວ່າ: 5 “ເຮົາເຢໂຫວາພະເຈົ້າຂອງອິດສະຣາເອນເວົ້າແນວນີ້ ‘ຄືກັບໝາກເດື່ອທີ່ດີເຫຼົ່ານີ້ ເຮົາຈະເຮັດດີກັບພວກຢູດາທີ່ຖືກຈັບໄປເປັນຊະເລີຍເຊິ່ງເຮົາເຮັດໃຫ້ເຂົາເຈົ້າອອກຈາກບ່ອນນີ້ໄປແຜ່ນດິນຂອງພວກການເດອາ. 6 ເຮົາຈະເບິ່ງແຍງເຂົາເຈົ້າ ໃຫ້ເຂົາເຈົ້າໄດ້ຮັບສິ່ງດີໆ ແລະເຮົາຈະໃຫ້ເຂົາເຈົ້າໄດ້ກັບມາແຜ່ນດິນນີ້.+ ເຮົາຈະສ້າງເຂົາເຈົ້າແລະຈະບໍ່ຮື້ຖິ້ມ. ເຮົາຈະປູກເຂົາເຈົ້າແລະຈະບໍ່ຫຼົກຖິ້ມ.+ 7 ເຮົາຈະໃຫ້ເຂົາເຈົ້າມີໃຈຢາກຮູ້ຈັກເຮົາແລະຮູ້ວ່າເຮົາແມ່ນເຢໂຫວາ.+ ເຂົາເຈົ້າຈະເປັນປະຊາຊົນຂອງເຮົາແລະເຮົາຈະເປັນພະເຈົ້າຂອງເຂົາເຈົ້າ.+ ເຂົາເຈົ້າຈະກັບມາຫາເຮົາສຸດຫົວໃຈ.+
8 ພະເຢໂຫວາເວົ້າວ່າ “ຄືກັບໝາກເດື່ອທີ່ບໍ່ດີຈົນກິນບໍ່ໄດ້ນັ້ນ+ ເຮົາຈະບໍ່ເຮັດດີກັບເຊເດກີຢາ+ກະສັດຂອງຢູດາ ຄົນເມືອງເຢຣູຊາເລັມທີ່ຍັງເຫຼືອຢູ່ໃນແຜ່ນດິນນີ້ ແລະຄົນທີ່ອາໄສຢູ່ແຜ່ນດິນເອຢິບ.+ 9 ເຮົາຈະເຮັດໃຫ້ຊາດຕ່າງໆຢ້ານຫຼາຍເມື່ອເຫັນຄວາມຈິບຫາຍທີ່ເຮົາຈະເຮັດໃຫ້ເກີດຂຶ້ນກັບເຂົາເຈົ້າ.+ ຜູ້ຄົນຈະດູຖູກເຂົາເຈົ້າ ຈະໃຊ້ເຂົາເຈົ້າເປັນຕົວຢ່າງຂອງຄົນທີ່ເຈິຄວາມຈິບຫາຍ ຈະເຍາະເຍີ້ຍເຂົາເຈົ້າ ແລະຈະສາບແຊ່ງ+ເຂົາເຈົ້າຢູ່ທຸກບ່ອນທີ່ເຮົາເຮັດໃຫ້ເຂົາເຈົ້າກະຈັດກະຈາຍໄປ.+ 10 ເຮົາຈະເຮັດໃຫ້ເຂົາເຈົ້າຕາຍດ້ວຍດາບ+ ດ້ວຍຄວາມອຶດຢາກ ແລະດ້ວຍໂລກລະບາດ*+ຈົນກວ່າຈະບໍ່ມີເຂົາເຈົ້າເຫຼືອຈັກຄົນໃນແຜ່ນດິນນີ້ທີ່ເຮົາເອົາໃຫ້ເຂົາເຈົ້າແລະປູ່ຍ່າຕານາຍຂອງເຂົາເຈົ້າ.”’”