ພາກ 6
ເປັນຫຍັງຈຶ່ງມີຄວາມທຸກທໍລະມານແລະຄວາມບໍ່ຍຸຕິທຳຫຼາຍເຖິງຂະໜາດນີ້?
1, 2. ເມື່ອຄຳນຶງເຖິງປະສົບການຂອງມະນຸດ ອາດຈະຕັ້ງຄຳຖາມອັນໃດແດ່?
1 ຢ່າງໃດກໍ່ຕາມ ຖ້າພະຜູ້ສູງສຸດປະສົງໃຫ້ຜູ້ຄົນທີ່ສົມບູນອາໄສຢູ່ເທິງແຜ່ນດິນໂລກຕະຫຼອດໄປໃນສະພາບການທີ່ເປັນອຸດທະຍານແລະຖ້ານັ້ນຍັງເປັນພະປະສົງຂອງພະອົງຢູ່ຄືເກົ່າ ເປັນຫຍັງດຽວນີ້ຈຶ່ງບໍ່ມີອຸດທະຍານ? ແທນທີ່ຈະເປັນເຊັ່ນນັ້ນ ເປັນຫຍັງມະນຸດຕ້ອງປະສົບກັບຄວາມທຸກທໍລະມານແລະຄວາມບໍ່ຍຸຕິທຳມາດົນນານຫຼາຍສະຕະວັດ?
2 ບໍ່ມີຄວາມສົງໄສ ປະຫວັດສາດມະນຸດເຕັມໄປດ້ວຍທຸກເວທະນາອັນເກີດຈາກສົງຄາມ, ການເຂົ້າຍຶດຄອງຂອງພວກຈັກກະພັດນິຍົມ, ການຂູດຮີດ, ຄວາມບໍ່ຍຸຕິທຳ, ຄວາມທຸກຍາກຂາດແຄນ, ໄພພິບັດ, ຄວາມເຈັບປ່ວຍ, ແລະຄວາມຕາຍ. ເປັນຫຍັງຈຶ່ງມີສິ່ງຊົ່ວຮ້າຍຫຼວງຫຼາຍເກີດຂຶ້ນແກ່ຜູ້ບໍ່ຮູ້ດຽງສາຫຼືຜູ້ເຄາະຮ້າຍຈຳນວນຫຼາຍແທ້ໆ? ຫາກພະເຈົ້າມີອຳນາດທຸກປະການ ເປັນຫຍັງພະອົງປ່ອຍໃຫ້ມີຄວາມທຸກທໍລະມານຫຼາກຫຼາຍເຊັ່ນນີ້ເຫິງນານຕັ້ງຫຼາຍພັນປີ? ໃນເມື່ອພະເຈົ້າອອກແບບແລະຈັດລະບຽບເອກະພົບໄວ້ຢ່າງດີ ເປັນຫຍັງພະອົງປ່ອຍໃຫ້ມີຄວາມຫຍຸ້ງເຫຍີງແລະການທຳລາຍເທິງແຜ່ນດິນໂລກ?
ຕົວຢ່າງ
3-5. (ກ) ຕົວຢ່າງປະກອບອັນໃດອາດຈະຊ່ວຍເຮົາໃຫ້ເຂົ້າໃຈວ່າເປັນຫຍັງພະເຈົ້າແຫ່ງລະບຽບຈຶ່ງຍອມໃຫ້ມີຄວາມຫຍຸ້ງເຫຍີງເທິງໂລກນີ້? (ຂ) ປະການໃດໃນຫຼາຍປະການນີ້ທີ່ກົງກັບສະພາບການທີ່ກ່ຽວກັບແຜ່ນດິນໂລກ?
3 ໃຫ້ເຮົາໃຊ້ຕົວຢ່າງນຶ່ງເພື່ອສະແດງໃຫ້ເຫັນວ່າເປັນຫຍັງພະເຈົ້າແຫ່ງລະບຽບຈຶ່ງປ່ອຍໃຫ້ມີຄວາມຫຍຸ້ງເຫຍີງເທິງແຜ່ນດິນໂລກ. ລອງນຶກເອົາ ຖ້າເຈົ້າມັກຍ່າງຫຼິ້ນໃນປ່າແລະພົບບ້ານຫຼັງນຶ່ງ. ເມື່ອເຈົ້າກວດເບິ່ງບ້ານນັ້ນ ເຈົ້າເຫັນວ່າບ້ານນັ້ນບໍ່ເປັນລະບຽບ. ປ່ອງຢ້ຽມເພ, ຫຼັງຄາເສຍຫາຍຫຼາຍ, ພື້ນລະບຽງໄມ້ໜ້າບ້ານມີແຕ່ຮູເຕັມໄປໝົດ, ປະຕູແຂວນຢູ່ເທິງບານພັບອັນດຽວ, ແລະບໍ່ມີນ້ຳໃຊ້.
4 ເມື່ອພົບເຫັນສະພາບເສຍຫາຍເຫຼົ່ານີ້ ເຈົ້າຈະລົງຄວາມເຫັນວ່າຄົງບໍ່ມີຜູ້ອອກແບບທີ່ມີເຊົາປັນຍາອາດຈະອອກແບບບ້ານເຊັ່ນນັ້ນໄດ້ຢ່າງນັ້ນບໍ? ຄວາມບໍ່ມີລະບຽບນັ້ນເຮັດໃຫ້ເຈົ້າເຊື່ອໝັ້ນວ່າຄວາມບັງເອີນໄດ້ເຮັດໃຫ້ມີບ້ານຫຼັງນັ້ນຂຶ້ນມາບໍ? ຫຼືຖ້າເຈົ້າລົງຄວາມເຫັນວ່າມີໃຜບາງຄົນໄດ້ອອກແບບແລະສ້າງບ້ານນັ້ນຂຶ້ນ ເຈົ້າຮູ້ສຶກບໍວ່າບຸກຄົນນັ້ນບໍ່ມີຄວາມຊຳນານແລະບໍ່ຮອບຄອບ?
5 ເມື່ອເຈົ້າກວດສອບເບິ່ງໂຄງສ້າງຢ່າງທົ່ວເຖິງ ເຈົ້າເຫັນວ່າບ້ານນັ້ນຖືກປະກອບຂຶ້ນຢ່າງດີແລະໃຫ້ຫຼັກຖານເຖິງການໃຊ້ຄວາມຄຶດຫຼາຍ. ແຕ່ດຽວນີ້ບ້ານນັ້ນຜຸພັງແລະພວມຈະເພພັງ. ສະພາບເສຍຫາຍແລະບັນຫາຕ່າງໆ ນັ້ນອາດຈະຊີ້ບອກອັນໃດ? ສະພາບນັ້ນອາດຈະຊວນໃຫ້ຄຶດວ່າ (1) ເຈົ້າຂອງເຮືອນຕາຍໄປແລ້ວ; (2) ເຂົາເປັນຊ່າງກໍ່ສ້າງທີ່ມີຄວາມສາມາດແຕ່ບໍ່ສົນໃຈບ້ານນັ້ນອີກຕໍ່ໄປແລ້ວຫຼື; (3) ເຂົາໃຫ້ຜູ້ທີ່ບໍ່ມີຄວາມຢັ່ງຮູ້ຄ່າເຊົ່າບ້ານນັ້ນຊົ່ວຄາວ. ປະການຫຼັງນີ້ຄືສິ່ງທີ່ຄ້າຍກັນກັບສະພາບການທີ່ກ່ຽວກັບແຜ່ນດິນໂລກນີ້.
ສິ່ງທີ່ຜິດໄປ
6, 7. ມີຫຍັງເກີດຂຶ້ນກັບອາດາມແລະເອວາເມື່ອພວກເຂົາລະເມີດກົດໝາຍຂອງພະເຈົ້າ?
6 ຕັ້ງແຕ່ບັນທຶກຕອນຕົ້ນໆ ຂອງຄຳພີໄບເບິນ ເຮົາຮູ້ວ່າພະເຈົ້າບໍ່ປະສົງໃຫ້ຜູ້ຄົນຕ້ອງທົນທຸກທໍລະມານແລະຕາຍໄປ. ອາດາມກັບເອວາພໍ່ແມ່ທຳອິດຂອງເຮົາຕາຍກໍ່ເພາະພວກເຂົາບໍ່ເຊື່ອຟັງພະເຈົ້າ. (ຕົ້ນເດິມ ບົດ 2 ແລະ 3) ເມື່ອເຂົາບໍ່ເຊື່ອຟັງ ເຂົາກໍ່ບໍ່ເຮັດຕາມພະໄທປະສົງຂອງພະເຈົ້າອີກຕໍ່ໄປ. ພວກເຂົາຖອນຕົວຈາກການຢູ່ໃຕ້ຄວາມເບິ່ງແຍງຂອງພະເຈົ້າ. ຜົນກໍ່ຄືເຂົາຕັດຕົວເອງຈາກພະເຈົ້າຜູ້ເປັນ “ບໍ່ເກີດແຫ່ງຊີວິດ.”—ຄຳເພງ 36:9, ລ.ມ.
7 ຄືກັນກັບເຄື່ອງຈັກທີ່ຄ່ອຍໆ ແລ່ນຊ້າລົງແລ້ວກໍ່ຢຸດເມື່ອຖືກຕັດຂາດຈາກແຫຼ່ງພະລັງງານຮ່າງກາຍແລະຈິດໃຈຂອງພວກເຂົາເສື່ອມລົງ. ຜົນກໍ່ຄື ອາດາມກັບເອວາເສື່ອມໂຊມ ແກ່ຊະລາແລ້ວກໍ່ຕາຍໃນທີ່ສຸດ. ຫຼັງຈາກນັ້ນມີຫຍັງເກີດຂຶ້ນ? ພວກເຂົາກັບຄືນສູ່ບ່ອນຊຶ່ງເຂົາໄດ້ມາ: “ເຈົ້າຈະຫຼົບໄປໃນດິນອີກ ເພາະວ່າເຈົ້າໄດ້ອອກມາຈາກດິນ.” ພະເຈົ້າເຕືອນພວກເຂົາວ່າຄວາມຕາຍຈະເປັນຜົນເນື່ອງຈາກການບໍ່ເຊື່ອຟັງກົດໝາຍຂອງພະອົງ: “ເຈົ້າຈະຕາຍໄປເປັນແທ້.”—ຕົ້ນເດິມ 2:17; 3:19.
8. ບາບຂອງພໍ່ແມ່ຄູ່ທຳອິດຂອງເຮົາມີຜົນກະທົບຢ່າງໃດຕໍ່ຄອບຄົວມະນຸດ?
8 ບໍ່ພຽງແຕ່ພໍ່ແມ່ຄູ່ທຳອິດຂອງເຮົາເທົ່ານັ້ນທີ່ຕາຍແຕ່ລູກຫຼານທັງຫຼາຍຂອງເຂົາດ້ວຍເຊື້ອສາຍມະນຸດກໍ່ໄດ້ຕົກເປັນທາດຄວາມຕາຍ. ເພາະເຫດໃດ? ກໍ່ເພາະຕາມກົດສືບພັນ ລູກຍ່ອມໄດ້ຮັບຖ່າຍທອດລັກສະນະຕ່າງໆ ຈາກພໍ່ແມ່. ແລະສິ່ງທີ່ລູກທັງຫຼາຍຂອງພໍ່ແມ່ຄູ່ທຳອິດຂອງເຮົາໄດ້ຮັບເປັນມໍລະດົກກໍ່ຄືຄວາມບໍ່ສົມບູນແລະຄວາມຕາຍນັ້ນເອງ. ໂລມ 5:12 ບອກເຮົາດັ່ງນີ້: “ຄວາມບາບໄດ້ເຂົ້າມາໃນໂລກເພາະຄົນຜູ້ດຽວສັນໃດ [ອາດາມ, ບັນພະບຸລຸດຂອງມະນຸດຊາດ], ແລະຄວາມຕາຍເຂົ້າມາດ້ວຍຄວາມບາບນັ້ນ ແລະສັນນັ້ນ, ຄວາມຕາຍໄດ້ມາຖືກຄົນທັງປວງ ເພາະເຂົາທຸກຄົນໄດ້ກະທຳການບາບແລ້ວ [ໂດຍການຮັບຄວາມບໍ່ສົມບູນກ່າວຄື ໂນ້ມອຽງໃນທາງບາບເປັນມໍລະດົກ].” ແລະເນື່ອງຈາກຜູ້ຄົນຮູ້ຈັກແຕ່ບາບ, ຄວາມບໍ່ສົມບູນ, ແລະຄວາມຕາຍເທົ່ານັ້ນ ບາງຄົນຈຶ່ງແນມເບິ່ງສິ່ງເຫຼົ່ານີ້ວ່າເປັນເລື່ອງປົກກະຕິທຳມະດາແລະບໍ່ອາດຈະຫຼີກລ້ຽງໄດ້. ເຖິງຢ່າງນັ້ນກໍ່ດີ ມະນຸດດັ້ງເດີມຖືກສ້າງໃຫ້ມີຄວາມສາມາດ ແລະຄວາມປາຖະໜາຈະມີຊີວິດຕະຫຼອດໄປ. ນັ້ນຄືສາຍເຫດທີ່ຜູ້ຄົນສ່ວນໃຫຍ່ຮູ້ສຶກເປັນເລື່ອງທີ່ເຮັດໃຫ້ຜິດຫວັງຫຼາຍທີ່ຈະຄາດວ່າຊີວິດຂອງເຂົາຈະສິ້ນສຸດລົງດ້ວຍຄວາມຕາຍ.
ເປັນຫຍັງຈຶ່ງເຫິງນານແທ້?
9. ເປັນຫຍັງພະເຈົ້າປ່ອຍໃຫ້ຄວາມທຸກທໍລະມານດຳເນີນຕໍ່ມາເຫິງນານແທ້?
9 ເປັນຫຍັງພະເຈົ້າປ່ອຍໃຫ້ມະນຸດເຮັດຕາມວິຖີທາງຂອງຕົນເອງເຫິງນານແບບນັ້ນ? ເປັນຫຍັງພະອົງປ່ອຍໃຫ້ຄວາມທຸກທໍລະມານມີຢູ່ຕະຫຼອດເວລາຕັ້ງຫຼາຍຮ້ອຍຫຼາຍພັນປີ? ເຫດຜົນທີ່ສຳຄັນ ປະການນຶ່ງຄື ມີການຍົກປະເດັນສຳຄັນຫຼາຍຢ່າງນຶ່ງຂຶ້ນມານັ້ນຄື: ໃຜເປັນຜູ້ມີສິດທິໃນການປົກຄອງ? ພະເຈົ້າສົມຄວນເປັນຜູ້ປົກຄອງມະນຸດບໍ ຫຼືພວກເຂົາສາມາດປົກຄອງຕົນເອງໄດ້ຢ່າງສຳເລັດຜົນໂດຍແຍກຕົວຕ່າງຫາກຈາກພະອົງ?
10. ມະນຸດໄດ້ຮັບຄວາມສາມາດອັນໃດ ພ້ອມດ້ວຍຄວາມຮັບຜິດຊອບອັນໃດ?
10 ມະນຸດຖືກສ້າງຂຶ້ນພ້ອມກັບມີເຈດຈຳນົງເສລີ ນັ້ນຄືພ້ອມດ້ວຍຄວາມສາມາດຈະເລືອກ. ພວກເຂົາບໍ່ໄດ້ຖືກສ້າງຂຶ້ນຄືຫຸ່ນຈັກຫຼືຄືສັດຊຶ່ງຖືກຊີ້ນຳໃຫ້ເຮັດສິ່ງຕ່າງໆ ໂດຍສັນຊາດຕະຍານເປັນສ່ວນໃຫຍ່. ດັ່ງນັ້ນ ມະນຸດຈຶ່ງສາມາດເລືອກໄດ້ວ່າເຂົາຈະຮັບໃຊ້ໃຜ. (ພະບັນຍັດຕິທີ່2 30:19; 2 ໂກລິນໂທ 3:17) ດ້ວຍເຫດນີ້ ພະຄຳຂອງພະເຈົ້າຈຶ່ງມີຄຳແນະນຳວ່າ: “ຈົ່ງດຳເນີນຊີວິດຢ່າງຄົນມີເສລີພາບ ແຕ່ຢ່າໃຊ້ເສລີພາບນັ້ນເປັນຂໍ້ອ້າງເພື່ອເຮັດການຊົ່ວ.” (1 ເປໂຕ 2:16, ລ.ມ.) ຢ່າງໃດກໍ່ຕາມໃນເມື່ອມະນຸດມີຂອງປະທານອັນຍອດຢ້ຽມແຫ່ງເສລີພາບໃນການເລືອກເຂົາກໍ່ຕ້ອງຍອມຮັບຜົນທີ່ເກີດຈາກການທີ່ເຂົາເລືອກເຮັດນັ້ນ.
11. ອັນໃດຄືທາງດຽວເທົ່ານັ້ນທີ່ຈະພົບວ່າແນວທາງທີ່ບໍ່ຂຶ້ນກັບພະເຈົ້ານັ້ນຈະປະສົບຜົນສຳເລັດຫຼືບໍ?
11 ພໍ່ແມ່ທຳອິດຂອງເຮົາໄດ້ເຮັດການເລືອກທີ່ຜິດ. ເຂົາເລືອກແນວທາງແຫ່ງການເປັນເອກະລາດບໍ່ຂຶ້ນກັບພະເຈົ້າ. ຈິງ ພະເຈົ້າອາດຈະປະຫານຄົນກະບົດຄູ່ທຳອິດທັນທີຫຼັງຈາກພວກເຂົາໄດ້ເຮັດຜິດກໍ່ໄດ້. ແຕ່ການເຮັດເຊັ່ນນັ້ນຄົງບໍ່ໄດ້ລະງັບຂໍ້ສົງໄສໃນເລື່ອງສິດທິຂອງພະເຈົ້າໃນການປົກຄອງມະນຸດໝົດໄປ. ເນື່ອງຈາກມະນຸດຄູ່ທຳອິດຕ້ອງການເປັນເອກະລາດບໍ່ຂຶ້ນກັບພະເຈົ້າຄຳຖາມນີ້ຈຶ່ງຕ້ອງໄດ້ຮັບຄຳຕອບ: ແນວທາງເຊັ່ນນັ້ນອາດຈະຍັງຜົນດ້ວຍຊີວິດທີ່ປະສົບຜົນສຳເລັດແລະມີຄວາມສຸກບໍ? ວິຖີທາງດຽວທີ່ຈະໄດ້ຄຳຕອບນັ້ນຄືປ່ອຍໃຫ້ພໍ່ແມ່ຄູ່ທຳອິດກັບລູກຫຼານຂອງເຂົາໄປຕາມແນວທາງຂອງເຂົາ ເພາະນັ້ນເປັນທາງທີ່ເຂົາເລືອກ. ເວລາທີ່ຜ່ານໄປຈະສະແດງໃຫ້ເຫັນວ່າມະນຸດຖືກສ້າງຂຶ້ນເພື່ອປະສົບຄວາມສຳເລັດໃນການປົກຄອງຕົນເອງຢ່າງເປັນເອກະລາດຈາກພະຜູ້ສ້າງຂອງເຂົາໄດ້ບໍ.
12. ເຢເຣມີ ປະເມີນເບິ່ງການປົກຄອງຂອງມະນຸດຢ່າງໃດ ແລະເປັນຫຍັງຈຶ່ງເປັນແນວນັ້ນ?
12 ເຢເຣມີ ຜູ້ຈາລຶກຄຳພີໄບເບິນຮູ້ວ່າຜົນທີ່ເກີດຂຶ້ນຈະເປັນຢ່າງໃດ. ດ້ວຍການນຳຈາກພະວິນຍານບໍລິສຸດຫຼືພະລັງປະຕິບັດການອັນຊົງພະລັງຂອງພະເຈົ້າ ທ່ານຈາລຶກໄວ້ຢ່າງເປັນຄວາມຈິງວ່າ: “ໂອ້ ພະເຢໂຫວາຂ້ານ້ອຍຮູ້ຈັກວ່າທາງມະນຸດບໍ່ເປັນແຫ່ງຕົນ ແລະຄົນທີ່ທຽວໄປກໍ່ບໍ່ມີອຳນາດຈະນຳໜ້າບາດຕີນແຫ່ງຕົນໄປ. ໂອ້ ພະເຢໂຫວາເຊີນຕີສອນຂ້ານ້ອຍ.” (ເຢເຣມີ 10:23, 24) ທ່ານຮູ້ວ່າມະນຸດຕ້ອງໄດ້ຮັບການນຳຈາກສະຕິປັນຍາຝ່າຍສະຫວັນຂອງພະເຈົ້າ. ເພາະເຫດໃດ? ນັ້ນກໍ່ເພາະພະເຈົ້າບໍ່ໄດ້ສ້າງມະນຸດໃຫ້ປະສົບຜົນສຳເລັດໂດຍບໍ່ເພິ່ງການນຳຂອງພະອົງ.
13. ຜົນແຫ່ງການປົກຄອງຂອງມະນຸດຕະຫຼອດຫຼາຍພັນປີສະແດງໃຫ້ເຫັນອັນໃດຢ່າງບໍ່ມີຂໍ້ສົງໄສ?
13 ຜົນຕ່າງໆ ຈາກການປົກຄອງຂອງມະນຸດຫຼາຍພັນປີສະແດງໃຫ້ເຫັນຢ່າງບໍ່ມີຂໍ້ສົງໄສໃດໆ ທີ່ວ່າບໍ່ແມ່ນມະນຸດທີ່ຈະຄວບຄຸມເລື່ອງຕ່າງໆ ຂອງຕົນເອງໄດ້ໂດຍແຍກຕົວຕ່າງຫາກຈາກພະຜູ້ສ້າງຂອງເຂົາ. ເມື່ອໄດ້ພະຍາຍາມເຮັດແນວນັ້ນ ພວກເຂົາຈຶ່ງໄດ້ແຕ່ເຮັດໃຫ້ຕົນເອງຖືກຕິຕຽນເພາະໄພພິບັດຕ່າງໆ ອັນເປັນຜົນທີ່ເກີດຂຶ້ນ. ຄຳພີໄບເບິນເຮັດໃຫ້ເລື່ອງນີ້ແຈ່ມແຈ້ງດັ່ງນີ້: “ພະອົງແມ່ນຫີນດານ ກິດຈະການຂອງພະອົງດີທີ່ສຸດ ເຫດວ່າທາງທັງປວງຂອງພະອົງແມ່ນຄວາມຊອບທຳ ເປັນພະເຈົ້າອົງສັດຊື່ ແລະໃນພະອົງບໍ່ມີການຊົ່ວຮ້າຍ ພະອົງຊອບທຳແລະສັດຊື່. ເຂົາໄດ້ເຮັດຕົວໃຫ້ຊົ່ວໄປຈາກພະອົງ ຄວາມຜິດຂອງເຂົາບໍ່ເປັນຂອງພວກລູກພະອົງ ເຂົາເປັນຊາດຄົນຄົດໂຄ້ງແລະຖ່ອຍຮ້າຍ.”—ພະບັນຍັດຕິທີ່2 32:4, 5.
ພະເຈົ້າຈະແຊກແຊງໃນບໍ່ຊ້າ
14. ເປັນຫຍັງພະເຈົ້າຈະບໍ່ໜ່ວງໜ່ຽວການເຂົ້າແຊກແຊງໄວ້ຂອງພະອົງໃນກິດຈະການຂອງມະນຸດອີກຕໍ່ໄປ?
14 ໂດຍການປ່ອຍໃຫ້ມີການສະແດງໃຫ້ເຫັນຫຼາຍພຽງພໍເຖິງຄວາມລົ້ມເຫຼວແຫ່ງການປົກຄອງຂອງມະນຸດໃນຊ່ວງເວລາຫຼາຍສະຕະວັດ ດຽວນີ້ພະເຈົ້າຈຶ່ງດຳເນີນການຕໍ່ໄປໄດ້ເພື່ອເຂົ້າແຊກແຊງໃນກິດຈະການຕ່າງໆ ຂອງມະນຸດແລະເພື່ອເຮັດໃຫ້ຄວາມທຸກທໍລະມານ, ຄວາມໂສກເສົ້າ, ຄວາມເຈັບປ່ວຍ, ແລະຄວາມຕາຍຍຸຕິລົງ. ເມື່ອໄດ້ປ່ອຍໃຫ້ມະນຸດມາເຖິງຈຸດສຸດຍອດແຫ່ງຄວາມສຳເລັດຂອງພວກເຂົາໃນດ້ານວິທະຍາສາດ, ອຸດສາຫະກຳ, ການແພດ, ແລະສາຂາອື່ນໆ ແລ້ວ ກໍ່ບໍ່ມີຄວາມຈຳເປັນໃດໆ ອີກຕໍ່ໄປທີ່ພະເຈົ້າຈະປ່ອຍໃຫ້ມະນຸດທີ່ແຍກຕົວເປັນເອກະລາດຈາກພະຜູ້ສ້າງຂອງເຂົາມີເວລາເພີ່ມຂຶ້ນອີກຫຼາຍສະຕະວັດເພື່ອສະແດງໃຫ້ເຫັນວ່າພວກເຂົາຈະສາມາດເຮັດໃຫ້ໂລກເປັນອຸດທະຍານແລະມີສັນຕິສຸກໄດ້ຫຼືບໍ. ພວກເຂົາບໍ່ໄດ້ເຮັດແລະເຮັດບໍ່ໄດ້. ການເປັນເອກະລາດບໍ່ຂຶ້ນກັບພະເຈົ້າໄດ້ເຮັດໃຫ້ມີໂລກທີ່ບໍ່ໜ້າເບິ່ງ ເຕັມໄປດ້ວຍການກຽດຊັງ ແລະນຳໄປສູ່ຄວາມຕາຍຂຶ້ນມາ.
15. ເຮົາຄວນເອົາໃຈໃສ່ຄຳແນະນຳຂໍ້ໃດໃນຄຳພີໄບເບິນ?
15 ໃນຂະນະທີ່ເຄີຍມີນັກປົກຄອງທີ່ຈິງໃຈຊຶ່ງມີຄວາມປາຖະໜາຈະຊ່ວຍເຫຼືອມະນຸດຊາດ ຄວາມພະຍາຍາມຂອງເຂົາກໍ່ບໍ່ປະສົບຜົນສຳເລັດ. ທຸກຫົນທຸກແຫ່ງໃນທຸກມື້ນີ້ມີຫຼັກຖານແຫ່ງການລົ້ມເຫຼວໃນການປົກຄອງຂອງມະນຸດ. ນັ້ນຄືເຫດທີ່ຄຳພີໄບເບິນແນະນຳວ່າ: “ຢ່າປົງໃຈໃນພວກຜູ້ໃຫຍ່ໃນລູກຂອງມະນຸດທີ່ຊ່ອຍໃຫ້ພົ້ນບໍ່ໄດ້.”—ຄຳເພງ 146:3.
[ຮູບພາບໜ້າ 24, 25]
ແມ່ນແຕ່ຜູ້ປົກຄອງໂລກທີ່ຈິງໃຈກໍ່ບໍ່ເຄີຍເຮັດໃຫ້ໂລກ ເປັນອຸດທະຍານແລະມີສັນຕິສຸກໄດ້