ບົດຮຽນ 15
ເພື່ອນຂອງພະເຈົ້າເຮັດສິ່ງທີ່ດີ
ເມື່ອທ່ານມີເພື່ອນຜູ້ໜຶ່ງຊຶ່ງທ່ານນິຍົມແລະນັບຖື ທ່ານພະຍາຍາມທີ່ຈະເປັນຄືເຂົາ. ຄຳພີໄບເບິນກ່າວວ່າ “ພະເຢໂຫວາເປັນຜູ້ດີແລະສັດຊື່.” (ຄຳເພງ 25:8) ເພື່ອຈະເປັນເພື່ອນຂອງພະເຈົ້າເຮົາຕ້ອງເປັນຄົນດີແລະຊື່ຕົງ. ຄຳພີໄບເບິນກ່າວວ່າ “ຈົ່ງເປັນຜູ້ກະທຳຕາມແບບຢ່າງພະເຈົ້າເໝືອນເປັນລູກທີ່ຮັກຂອງພະເຈົ້າແລະຈົ່ງທຽວໄປໃນຄວາມຮັກ.” (ເອເຟດ 5:1, 2) ຕໍ່ໄປນີ້ແມ່ນບາງແນວທາງທີ່ຈະເຮັດສິ່ງດັ່ງກ່າວ:
ໃຫ້ຄວາມຊ່ວຍເຫຼືອແກ່ຄົນອື່ນ. “ຈົ່ງກະທຳການດີແກ່ຄົນທັງປວງ.”—ຄາລາຊີ 6:10.
ດຸໝັ່ນໃນການເຮັດວຽກ. “ຄົນທີ່ເຄີຍລັກຂອງ ຢ່າຊູ່ລັກຕໍ່ໄປອີກ ແຕ່ວ່າໃຫ້ເພິ່ນກະທຳການດີດ້ວຍມືກໍຊອບກວ່າ.”—ເອເຟດ 4:28.
ຮັກສາຮ່າງກາຍແລະສິນທຳໃຫ້ສະອາດ. “ເຮົາທັງຫຼາຍຕ້ອງຊຳຮະຕົວໃຫ້ປາສະຈາກການຖ່ອຍຮ້າຍແຫ່ງເນື້ອໜັງແລະຈິດວິນຍານ [“ວິນຍານ,” ລ.ມ.] ທຸກຢ່າງ ແລະກະທຳຄວາມບໍລິສຸດໃຫ້ສຳເລັດໃນຄວາມຢ້ານຢຳພະເຈົ້າ.”—2 ໂກລິນໂທ 7:1.
ປະຕິບັດຕໍ່ສະມາຊິກຄອບຄົວຂອງທ່ານດ້ວຍຄວາມຮັກແລະຄວາມນັບຖື. “ທ່ານທັງຫຼາຍທັງມວນທຸກຄົນຈົ່ງຮັກເມຍແຫ່ງຕົນເໝືອນຮັກຕົວເອງ ແລະຝ່າຍເມຍນັ້ນຈົ່ງຢ້ານຢຳຜົວແຫ່ງຕົນ. ລູກທັງຫຼາຍເອີຍ ຈົ່ງຟັງພໍ່ແມ່.”—ເອເຟດ 5:33-6:1.
ສະແດງຄວາມຮັກຕໍ່ຄົນອື່ນ. “ເຮົາທັງຫຼາຍຈົ່ງຮັກກັນແລະກັນ ເພາະວ່າຄວາມຮັກມາແຕ່ພະເຈົ້າ.”—1 ໂຍຮັນ 4:7.
ເຊື່ອຟັງກົດໝາຍບ້ານເມືອງ. “ໃຫ້ຄົນທັງຫຼາຍທຸກຄົນຍອມຢູ່ໃຕ້ບັງຄັບ [ລັດຖະບານ] . . . ຈົ່ງໃຫ້ແກ່ຄົນທຸກຄົນຕາມທີ່ສົມຄວນກັບເຂົາ ເງິນສ່ວຍສົມຄວນແກ່ຜູ້ໃດຈົ່ງໃຫ້ແກ່ຜູ້ນັ້ນ.”—ໂລມ 13:1, 7.