ຫ້ອງສະໝຸດອອນລາຍຂອງວັອດສ໌ທາວເວີ້

ຄວາມທຸກຍາກທີ່ນຳໄປສູ່ຄວາມຫວັງ

ຫໍສັງເກດການ—2011 | 1 ພຶດສະພາ
- ຄວາມທຸກຍາກທີ່ນຳໄປສູ່ຄວາມຫວັງ
  
  “ໃນສະໄໝສຸດທ້າຍຈະເປັນໄລຍະທີ່ມີແຕ່ຄວາມຫຍຸ້ງຍາກລຳບາກແລະອັນຕະລາຍ.”—2 ຕີໂມທຽວ 3:1
  
  ເຈົ້າເຄີຍໄດ້ຍິນຫຼືໄດ້ເຫັນເຫດການໜ້າເສົ້າເຫຼົ່ານີ້ບໍ?
  
  ● ພະຍາດຮ້າຍແຮງທີ່ເຮັດໃຫ້ຫຼາຍຮ້ອຍຄົນຕາຍ.
  
  ● ຄວາມອຶດຢາກທີ່ເຮັດໃຫ້ຫຼາຍພັນຄົນຕາຍ.
  
  ● ແຜ່ນດິນໄຫວທີ່ເຮັດໃຫ້ຫຼາຍໝື່ນຄົນຕາຍແລະຄົນອີກຈຳນວນຫຼາຍບໍ່ມີບ່ອນຢູ່.
  
  ໃນບົດຄວາມຕໍ່ໄປນີ້ ເຈົ້າຈະໄດ້ທົບທວນຄວາມຈິງບາງຢ່າງທີ່ອາດເຮັດໃຫ້ເຈົ້າຕ້ອງຄິດຢ່າງຈິງຈັງກ່ຽວກັບເຫດການຕ່າງໆຄ້າຍກັນນີ້. ເຈົ້າຍັງຈະໄດ້ເຫັນວ່າຄຳພີໄບເບິນມີຄຳພະຍາກອນທີ່ບອກລ່ວງໜ້າເຖິງເຫດການເຫຼົ່ານີ້ທີ່ຈະເກີດຂຶ້ນໃນໄລຍະທີ່ເອີ້ນວ່າ “ສະໄໝສຸດທ້າຍ.”a
  
  ແນວໃດກໍຕາມ ບົດຄວາມຊຸດນີ້ ບໍ່ໄດ້ມີຈຸດປະສົງເພື່ອເຮັດໃຫ້ເຈົ້າເຊື່ອວ່າເຮົາຢູ່ໃນໂລກທີ່ມີແຕ່ບັນຫາແລະຄວາມທຸກ. ເຈົ້າອາດຈະເຈິຫຼືໄດ້ເຫັນຄວາມທຸກເຫຼົ່ານັ້ນດ້ວຍໂຕເອງຢູ່ແລ້ວ. ດັ່ງນັ້ນ ບົດຄວາມຊຸດນີ້ຂຽນຂຶ້ນເພື່ອໃຫ້ເຈົ້າມີຄວາມຫວັງ. ເຈົ້າຈະໄດ້ເຫັນວ່າການທີ່ຄຳພະຍາກອນຫົກເລື່ອງນີ້ເກີດຂຶ້ນແທ້ສະແດງວ່າ “ສະໄໝສຸດທ້າຍ” ກຳລັງຈະຈົບລົງໃນອີກບໍ່ດົນ. ບົດຄວາມຊຸດນີ້ຍັງຈະພິຈາລະນາຂໍ້ໂຕ້ແຍ່ງທີ່ຖືກເອົາມາເວົ້າຢູ່ເລື້ອຍໆ ແລະຍັງໃຫ້ເຫດຜົນທີ່ໜັກແໜ້ນເຊິ່ງເຮັດໃຫ້ເຊື່ອໄດ້ວ່າມີອະນາຄົດທີ່ດີກວ່າຖ້າຢູ່ທາງໜ້າ.
  
  [ຂໍ້ຄວາມໄຂເງື່ອນ]
  
  a ເພື່ອຈະຮູ້ເຫດຜົນທີ່ພະເຈົ້າຍອມໃຫ້ສະພາບການຊົ່ວຮ້າຍແບບນີ້ເກີດຂຶ້ນ ຂໍໃຫ້ເບິ່ງບົດຄວາມ “ເປັນຫຍັງພະເຈົ້າຍອມໃຫ້ມີຄວາມຊົ່ວແລະຄວາມທຸກ?” ໃນໜ້າ 16 ແລະ 17 ຂອງວາລະສານນີ້.

1. ແຜ່ນດິນໄຫວ

ຫໍສັງເກດການ—2011 | 1 ພຶດສະພາ
- 1. ແຜ່ນດິນໄຫວ
  
  “ຈະເກີດແຜ່ນດິນໄຫວໃຫຍ່.”—ລູກາ 21:11
  
  ● ວິນນີ້ ເດັກນ້ອຍອາຍຸປະມານປີເຄິ່ງ ຖືກດຶງອອກມາຈາກຊາກຫັກພັງໃນເຮຕິ. ນັກຂ່າວໂທລະພາບຄົນໜຶ່ງເຊິ່ງກຳລັງລາຍງານຂ່າວແຜ່ນດິນໄຫວຢູ່ໃນເຂດນັ້ນໄດ້ຍິນສຽງຮ້ອງຄ່ອຍໆຂອງລາວ. ເດັກນ້ອຍຄົນນີ້ລອດຊີວິດຈາກແຜ່ນດິນໄຫວ ແຕ່ພໍ່ແມ່ຂອງລາວບໍ່ລອດ.
  
  ຄວາມຈິງເປັນແນວໃດ? ແຜ່ນດິນໄຫວຂະໜາດ 7,0 ຣິກເຕີຢູ່ເຮຕິໃນເດືອນມັງກອນ 2010 ເຮັດໃຫ້ມີຄົນຕາຍຫຼາຍກວ່າ 300.000 ຄົນ. ປະຊາຊົນອີກ 1,3 ລ້ານຄົນກາຍເປັນຄົນບໍ່ມີບ່ອນຢູ່ທັນທີ. ເຖິງວ່າແຜ່ນດິນໄຫວຢູ່ເຮຕິເທື່ອນີ້ຈະຮຸນແຮງຫຼາຍ ແຕ່ເຫດການແບບນີ້ກໍເກີດຂຶ້ນຢູ່ເລື້ອຍໆ. ຕະຫຼອດທົ່ວໂລກມີແຜ່ນດິນໄຫວໃຫຍ່ເກີດຂຶ້ນຢ່າງໜ້ອຍ 18 ເທື່ອໃນໄລຍະເດືອນເມສາ 2009 ຫາເດືອນເມສາ 2010.
  
  ຄົນທົ່ວໄປໂຕ້ແຍ່ງວ່າແນວໃດ? ແຜ່ນດິນໄຫວບໍ່ໄດ້ມີຫຼາຍຂຶ້ນ ແຕ່ເນື່ອງຈາກມີເຕັກໂນໂລຊີທີ່ທັນສະໄໝ ເຮົາຈຶ່ງໄດ້ຍິນຂ່າວເລື່ອງແຜ່ນດິນໄຫວຫຼາຍກວ່າຜູ້ຄົນໃນສະໄໝກ່ອນ.
  
  ຂໍ້ໂຕ້ແຍ່ງນີ້ມີເຫດຜົນບໍ? ຂໍໃຫ້ສັງເກດຄວາມຈິງນີ້: ຄຳພີໄບເບິນບໍ່ໄດ້ເນັ້ນວ່າໃນສະໄໝສຸດທ້າຍຈະເກີດແຜ່ນດິນໄຫວຂຶ້ນຈັກເທື່ອ. ແຕ່ຄຳພີໄບເບິນບອກວ່າຈະມີ “ແຜ່ນດິນໄຫວໃຫຍ່” ເກີດຂຶ້ນ “ໃນບ່ອນຕ່າງໆ.” ການເກີດແຜ່ນດິນໄຫວໃຫຍ່ເປັນລັກສະນະເດັ່ນຢ່າງໜຶ່ງຂອງສະໄໝນີ້ທີ່ມີຄວາມສຳຄັນຫຼາຍໃນປະຫວັດສາດ.—ມາຣະໂກ 13:8; ລູກາ 21:11
  
  ເຈົ້າຄິດແນວໃດ? ເຮົາກຳລັງເຫັນແຜ່ນດິນໄຫວໃຫຍ່ ຄືທີ່ຄຳພີໄບເບິນພະຍາກອນໄວ້ບໍ?
  
  ແຜ່ນດິນໄຫວພຽງຢ່າງດຽວອາດບໍ່ແມ່ນຫຼັກຖານທີ່ຢືນຢັນໄດ້ຢ່າງໜັກແໜ້ນວ່າເຮົາກຳລັງຢູ່ໃນສະໄໝສຸດທ້າຍ. ຄຳພະຍາກອນເລື່ອງແຜ່ນດິນໄຫວເປັນພຽງຂໍ້ໜຶ່ງໃນຫຼາຍໆຂໍ້ທີ່ກຳລັງເກີດຂຶ້ນແທ້. ໃຫ້ເຮົາມາເບິ່ງຄຳພະຍາກອນເລື່ອງທີ 2.
  
  [ຖ້ອຍຄຳທີ່ຍົກມາ]
  
  “ພວກເຮົາ [ນັກທໍລະນີຟີຊິກ] ເອີ້ນເຫດການແບບນີ້ວ່າແຜ່ນດິນໄຫວໃຫຍ່. ສ່ວນຄົນອື່ນເອີ້ນວ່າໄພຫາຍະນະ.”—ເຄນ ຮັດນັດ ສຳນັກງານສຳຫຼວດທາງທໍລະນີວິທະຍາຂອງສະຫະລັດອາເມຣິກາ.
  
  [ທີ່ມາຂອງຮູບ]
  
  © William Daniels/Panos Pictures

2. ການຂາດແຄນອາຫານ

ຫໍສັງເກດການ—2011 | 1 ພຶດສະພາ
- 2. ການຂາດແຄນອາຫານ
  
  “ຈະເກີດການຂາດແຄນອາຫານ.”—ມາຣະໂກ 13:8
  
  ● ຜູ້ຊາຍຄົນໜຶ່ງອົບພະຍົບໜີໄປຢູ່ບ້ານຄວາຣາເຕີຈີ ປະເທດນີເຊ. ຍາດພີ່ນ້ອງຂອງລາວກໍອົບພະຍົບມາຈາກຕອນກາງຂອງປະເທດເພື່ອໜີຄວາມອຶດຢາກຄືກັນ. ແຕ່ຜູ້ຊາຍຄົນນີ້ນອນໝົດຫວັງຢູ່ເທິງສາດຄົນດຽວ. ເປັນຫຍັງລາວຄືເປັນແນວນັ້ນ? ນາຍບ້ານທີ່ຊື່ຊິດິບອກວ່າ “ລາວບໍ່ສາມາດເບິ່ງແຍງ [ຄອບຄົວ] ໄດ້ແລະບໍ່ສາມາດທົນເບິ່ງໜ້າລູກເມຍໄດ້ອີກຕໍ່ໄປ.”
  
  ຄວາມຈິງເປັນແນວໃດ? ປະຊາກອນໂລກປະມານ 1 ໃນ 7 ຄົນມີອາຫານບໍ່ພໍກິນໃນແຕ່ລະມື້. ສະພາບການທາງໃຕ້ຂອງທະເລຊາຍຊາຮາຣາໃນທະວີບອາຝຼິກກາແຮ່ງຮ້າຍແຮງກວ່ານັ້ນ ຄືມີປະຊາກອນ 1 ໃນ 3 ຄົນອຶດຢາກຫິວໂຫຍຢູ່ຕະຫຼອດເວລາ. ເພື່ອຈະເຫັນພາບຈະແຈ້ງຂຶ້ນ ຂໍໃຫ້ຄິດເຖິງຄອບຄົວທີ່ມີພໍ່ ແມ່ ແລະລູກນ້ອຍໆໜຶ່ງຄົນ. ຖ້າມີອາຫານພໍກິນສຳລັບພຽງແຕ່ສອງຄົນ ໃຜຈະເປັນຄົນທີ່ຕ້ອງເສຍສະລະ? ພໍ່? ແມ່? ຫຼືລູກ? ສຳລັບຄອບຄົວທີ່ອຶດຢາກ ນີ້ເປັນເລື່ອງທີ່ຕ້ອງຕັດສິນໃຈໃນແຕ່ລະມື້.
  
  ຄົນທົ່ວໄປໂຕ້ແຍ່ງວ່າແນວໃດ? ແຜ່ນດິນໂລກຜະລິດອາຫານໄດ້ຫຼາຍພໍທີ່ຈະລ້ຽງມະນຸດທຸກຄົນໄດ້ຢ່າງເຫຼືອເຟືອ ພຽງແຕ່ຕ້ອງບໍລິຫານຈັດການຊັບພະກອນໂລກໃຫ້ດີກວ່ານີ້.
  
  ຂໍ້ໂຕ້ແຍ່ງນີ້ມີເຫດຜົນບໍ? ແມ່ນຢູ່ວ່າ ກະເສດຕະກອນສາມາດຜະລິດແລະຂົນສົ່ງອາຫານໄດ້ຫຼາຍກວ່າທີ່ເຄີຍເຮັດມາໃນອະດີດ. ແທ້ໆແລ້ວ ລັດຖະບານຕ່າງໆຂອງມະນຸດໜ້າຈະຈັດການກັບຜົນຜະລິດຂອງໂລກແລະແກ້ໄຂບັນຫາຄວາມອຶດຢາກໄດ້. ແຕ່ຫຼັງຈາກພະຍາຍາມມາຫຼາຍສິບປີແລ້ວ ລັດຖະບານຕ່າງໆກໍຍັງບໍ່ສາມາດແກ້ບັນຫານີ້ໄດ້.
  
  ເຈົ້າຄິດແນວໃດ? ຄຳພະຍາກອນໃນມາຣະໂກ 13:8 ກຳລັງເກີດຂຶ້ນແທ້ບໍ? ເຖິງວ່າເຕັກໂນໂລຊີດ້ານຕ່າງໆຈະກ້າວໜ້າຫຼາຍ ແຕ່ການຂາດແຄນອາຫານກໍຍັງເປັນບັນຫາໃຫຍ່ລະດັບໂລກແມ່ນບໍ?
  
  ເມື່ອມີແຜ່ນດິນໄຫວແລະການຂາດແຄນອາຫານກໍມັກຈະມີບັນຫາອື່ນໆຕາມມາ ເຊິ່ງເປັນຜົນຈາກສັນຍານອີກຢ່າງໜຶ່ງຂອງສະໄໝສຸດທ້າຍ.
  
  [ຖ້ອຍຄຳທີ່ຍົກມາ]
  
  “ຫຼາຍກວ່າ 1 ໃນ 3 ຂອງເດັກນ້ອຍທີ່ຕາຍຍ້ອນພະຍາດປອດບວມ ພະຍາດຖອກທ້ອງ ແລະພະຍາດອື່ນໆອາດຈະບໍ່ຕາຍ ຖ້າເດັກນ້ອຍເຫຼົ່ານັ້ນໄດ້ຮັບອາຫານພຽງພໍ.”—ແອນ ເອັມ. ເວເນີແມນ ອະດີດຜູ້ອຳນວຍການບໍລິຫານກອງທຶນເພື່ອເດັກນ້ອຍແຫ່ງສະຫະປະຊາຊາດ.
  
  [ທີ່ມາຂອງຮູບ]
  
  © Paul Lowe/Panos Pictures

3. ໂລກລະບາດ

ຫໍສັງເກດການ—2011 | 1 ພຶດສະພາ
- 3. ໂລກລະບາດ
  
  “ຈະເກີດ . . . ໂລກລະບາດຫຼາຍແຫ່ງ.”—ລູກາ 21:11
  
  ● ບອນຊາລີເປັນເຈົ້າໜ້າທີ່ສາທາລະນະສຸກໃນປະເທດໜຶ່ງແຖວອາຝຼິກກາເຊິ່ງເສຍຫາຍຫຼາຍຍ້ອນສົງຄາມກາງເມືອງ. ລາວພະຍາຍາມຊ່ວຍກຳມະກອນບໍ່ແຮ່ໃນເມືອງຂອງລາວທີ່ກຳລັງຈະຕາຍຍ້ອນໄຂ້ເລືອດອອກມາບູກ ແຕ່ລາວກໍເຮັດຫຍັງບໍ່ໄດ້ເລີຍ.a ລາວຂໍຄວາມຊ່ວຍເຫຼືອຈາກເຈົ້າໜ້າທີ່ໃນເມືອງທີ່ໃຫຍ່ກວ່າແຕ່ກໍບໍ່ໄດ້ຮັບຄຳຕອບ. 4 ເດືອນຕໍ່ມາ ໃນທີ່ສຸດຄວາມຊ່ວຍເຫຼືອກໍມາຮອດ ແຕ່ບອນຊາລີກໍຕາຍແລ້ວ. ລາວຕິດເຊື້ອຈາກກຳມະກອນບໍ່ແຮ່ທີ່ລາວພະຍາຍາມຊ່ວຍໄວ້.
  
  ຄວາມຈິງເປັນແນວໃດ? ພະຍາດຕິດເຊື້ອໃນລະບົບທາງເດີນຫາຍໃຈສ່ວນລຸ່ມ (ເຊັ່ນປອດບວມ) ພະຍາດຖອກທ້ອງ ເອັດຈ໌ໄອວີ/ເອດສ໌ ວັນນະໂລກ ແລະໄຂ້ມາລາເລຍຈັດຢູ່ໃນກຸ່ມພະຍາດທີ່ເຮັດໃຫ້ຜູ້ຄົນຕາຍຫຼາຍທີ່ສຸດ. ໃນປີ 2004 ພຽງປີດຽວ ພະຍາດທັງ 5 ຊະນິດນີ້ເຮັດໃຫ້ຜູ້ຄົນປະມານ 10,7 ລ້ານຄົນຕາຍ. ເວົ້າອີກຢ່າງໜຶ່ງ ໝົດປີນັ້ນ ມີຄົນຕາຍຍ້ອນພະຍາດເຫຼົ່ານີ້ປະມານ 1 ຄົນໃນທຸກໆ 3 ວິນາທີ.
  
  ຄົນທົ່ວໄປໂຕ້ແຍ່ງວ່າແນວໃດ? ເມື່ອປະຊາກອນໂລກເພີ່ມຂຶ້ນເລື້ອຍໆ ໂລກໄພໄຂ້ເຈັບກໍຕ້ອງເພີ່ມຂຶ້ນນຳ. ຄົນທີ່ເຈັບປ່ວຍກໍຕ້ອງມີຫຼາຍຂຶ້ນເປັນທຳມະດາ.
  
  ຂໍ້ໂຕ້ແຍ່ງນີ້ມີເຫດຜົນບໍ? ຈຳນວນປະຊາກອນໂລກເພີ່ມຂຶ້ນໄວຫຼາຍ. ແຕ່ມະນຸດກໍມີຄວາມສາມາດຫຼາຍຂຶ້ນທີ່ຈະກວດ ຄວບຄຸມ ແລະປິ່ນປົວພະຍາດ. ດັ່ງນັ້ນ ຕາມຫຼັກເຫດຜົນແລ້ວ ພະຍາດທີ່ຄຸກຄາມຊີວິດມະນຸດກໍໜ້າຈະຫຼຸດໜ້ອຍລົງບໍ່ແມ່ນບໍ? ແຕ່ກໍບໍ່ໄດ້ເປັນແບບນັ້ນ.
  
  ເຈົ້າຄິດແນວໃດ? ຜູ້ຄົນກຳລັງທົນທຸກຍ້ອນໂລກໄພໄຂ້ເຈັບຄືກັບທີ່ຄຳພີໄບເບິນບອກລ່ວງໜ້າບໍ?
  
  ແຜ່ນດິນໄຫວ ການຂາດແຄນອາຫານ ແລະພະຍາດຕ່າງໆເປັນໄພຄຸກຄາມທີ່ເຮັດໃຫ້ຫຼາຍລ້ານຄົນຕາຍ. ແຕ່ຍັງມີອີກຫຼາຍລ້ານຄົນທີ່ຕ້ອງທົນທຸກຈາກການກະທຳຂອງມະນຸດນຳກັນເອງ ແລະຫຼາຍຄົນກໍຕົກເປັນເຫຍື່ອຂອງຄົນທີ່ໜ້າຈະເປັນຜູ້ປົກປ້ອງຄຸ້ມຄອງເຂົາເຈົ້າດ້ວຍຊ້ຳ. ຂໍໃຫ້ສັງເກດສິ່ງທີ່ຄຳພີໄບເບິນພະຍາກອນໄວ້ວ່າຈະຕ້ອງເກີດຂຶ້ນ.
  
  [ຂໍ້ຄວາມໄຂເງື່ອນ]
  
  a ໄຂ້ເລືອດອອກມາບູກເກີດຈາກໄວຣັດສ໌ປະເພດດຽວກັນກັບໄວຣັດສ໌ອີໂບລາ.
  
  [ຖ້ອຍຄຳທີ່ຍົກມາ]
  
  “ມັນເປັນຕາຢ້ານຫຼາຍຖ້າຖືກໂຕສິງຫຼືບາງສິ່ງກັດກິນຮ່າງກາຍພາຍນອກ ແຕ່ມັນກໍເປັນຕາຢ້ານຄືກັນຖ້າຖືກພະຍາດຮ້າຍແຮງກັດກິນຢູ່ພາຍໃນແລະໄດ້ເຫັນຄົນອື່ນທີ່ຢູ່ອ້ອມຂ້າງເຈົ້າຖືກແບບດຽວກັນ.”—ໄມເຄິ້ນ ອອດສ໌ເທີໂຮມ ນັກວິທະຍາການລະບາດ.
  
  [ທີ່ມາຂອງຮູບ]
  
  © William Daniels/Panos Pictures

4. ບໍ່ມີຄວາມຮັກຕໍ່ຄົນໃນຄອບຄົວ

ຫໍສັງເກດການ—2011 | 1 ພຶດສະພາ
- 4. ບໍ່ມີຄວາມຮັກຕໍ່ຄົນໃນຄອບຄົວ
  
  “ຜູ້ຄົນຈະ . . . ບໍ່ຮັກຍາດພີ່ນ້ອງ.”—2 ຕີໂມທຽວ 3:1-3
  
  ● ຄຣິດສ໌ເຮັດວຽກໃຫ້ກັບສູນຊ່ວຍເຫຼືອຜູ້ຖືກກະທຳດ້ວຍຄວາມຮຸນແຮງໃນຄອບຄົວຢູ່ນອດເວວສ໌. ລາວເວົ້າວ່າ “ຂ້ອຍຈື່ໄດ້ວ່າຜູ້ຍິງຄົນໜຶ່ງເຂົ້າມາຫາເຮົາໃນສະພາບທີ່ຖືກທຸບຕີໜ້າຊ້ຳຕາບວມຈົນຂ້ອຍນຶກບໍ່ອອກວ່າເຄີຍເຈິລາວມາກ່ອນ. ຜູ້ຍິງອີກຫຼາຍຄົນກໍຖືກທຳຮ້າຍຈົນຈິດໃຈເຈັບຊ້ຳຫຼາຍ ເຂົາເຈົ້າຈົນບໍ່ຢາກເຈິໜ້າໃຜ.”
  
  ຄວາມຈິງເປັນແນວໃດ? ໃນປະເທດໜຶ່ງແຖວອາຝຼິກກາ ຜູ້ຍິງປະມານ 1 ໃນ 3 ຄົນເຄີຍຖືກລ່ວງລະເມີດທາງເພດຕອນເປັນເດັກນ້ອຍ. ການສຳຫຼວດເທື່ອໜຶ່ງໃນປະເທດນັ້ນສະແດງວ່າຜູ້ຊາຍຫຼາຍກວ່າ 1 ໃນ 3 ຄົນຄິດວ່າການທຸບຕີເມຍເປັນເລື່ອງທຳມະດາ. ແຕ່ບໍ່ໄດ້ມີແຕ່ຜູ້ຍິງເທົ່ານັ້ນທີ່ຕົກເປັນເຫຍື່ອຄວາມຮຸນແຮງໃນຄອບຄົວ. ຕົວຢ່າງເຊັ່ນ: ໃນການາດາ ຜູ້ຊາຍປະມານ 3 ໃນ 10 ຄົນເຄີຍຖືກຄູ່ແຕ່ງດອງທຸບຕີຫຼືທຳຮ້າຍຮ່າງກາຍດ້ວຍວິທີອື່ນໆ.
  
  ຄົນທົ່ວໄປໂຕ້ແຍ່ງວ່າແນວໃດ? ຄວາມຮຸນແຮງໃນຄອບຄົວເປັນເລື່ອງທີ່ມີມາດົນແລ້ວ. ພຽງແຕ່ຜູ້ຄົນໃນສະໄໝນີ້ໃຫ້ຄວາມສົນໃຈຫຼາຍກວ່າແຕ່ກ່ອນ.
  
  ຂໍ້ໂຕ້ແຍ່ງນີ້ມີເຫດຜົນບໍ? ໃນໄລຍະຫຼາຍກວ່າ 10 ປີມານີ້ ຜູ້ຄົນຕື່ນໂຕກັບເລື່ອງຄວາມຮຸນແຮງໃນຄອບຄົວຫຼາຍຂຶ້ນ. ແຕ່ການຕື່ນໂຕກັບບັນຫານີ້ຫຼາຍຂຶ້ນເຮັດໃຫ້ຄວາມຮຸນແຮງໃນຄອບຄົວຫຼຸດໜ້ອຍລົງບໍ? ບໍ່. ຜູ້ຄົນທຸກມື້ນີ້ບໍ່ມີຄວາມຮັກຕໍ່ຍາດພີ່ນ້ອງຫຼືຄົນໃນຄອບຄົວຫຼາຍກວ່າແຕ່ກ່ອນ.
  
  ເຈົ້າຄິດແນວໃດ? ຄຳພະຍາກອນໃນ 2 ຕີໂມທຽວ 3:1-3 ກຳລັງເກີດຂຶ້ນແທ້ບໍ? ເຈົ້າເຫັນດີບໍວ່າຫຼາຍຄົນບໍ່ມີຄວາມຮັກຕໍ່ຄົນໃນຄອບຄົວແບບທີ່ທຸກຄົນຄວນຈະມີ?
  
  ຄຳພະຍາກອນເລື່ອງທີ 5 ເຊິ່ງທຳລັງເກີດຂຶ້ນແທ້ໃນເວລານີ້ກ່ຽວຂ້ອງກັບແຜ່ນດິນໂລກ ເຊິ່ງເປັນຄືກັບເຮືອນຂອງເຮົາ. ໃຫ້ເຮົາມາເບິ່ງວ່າຄຳພີໄບເບິນບອກແນວໃດໃນເລື່ອງນີ້.
  
  [ຖ້ອຍຄຳທີ່ຍົກມາ]
  
  “ເປັນທີ່ຍອມຮັບວ່າຄວາມຮຸນແຮງໃນຄອບຄົວເປັນອາຊະຍາກຳຢ່າງໜຶ່ງທີ່ມີການແຈ້ງຄວາມໜ້ອຍທີ່ສຸດ. ໂດຍສະເລ່ຍແລ້ວຜູ້ຍິງຈະແຈ້ງຄວາມກັບຕຳຫຼວດຫຼັງຈາກຖືກຜົວທຳຮ້າຍມາແລ້ວ 35 ເທື່ອ.”—ໂຄສົກຍິງປະຈຳສູນຊ່ວຍເຫຼືອຜູ້ຖືກທຳຮ້າຍໃນຄອບຄົວຢູ່ເວວສ໌

5. ການທຳລາຍແຜ່ນດິນໂລກ

ຫໍສັງເກດການ—2011 | 1 ພຶດສະພາ
- 5. ການທຳລາຍແຜ່ນດິນໂລກ
  
  “[ພະເຈົ້າຈະ] ທຳລາຍຜູ້ຄົນທີ່ທຳລາຍໂລກນີ້.”—ພະນິມິດ 11:18
  
  ● ເປຍຣິອາໄສຢູ່ໃນບ້ານກະປໍ ປະເທດນີເຊເຣຍ. ລາວເປັນຄົນປາດຕານເພື່ອເອົານ້ຳຕານສົດມາເຮັດເຫຼົ້າ. ອາຊີບຂອງລາວໄດ້ຮັບຜົນກະທົບຫຼາຍເນື່ອງຈາກນ້ຳມັນປະລິມານມະຫາສານຮົ່ວໄຫຼເຂົ້າມາໃນພື້ນທີ່ສາມຫຼ່ຽມປາກແມ່ນ້ຳນີເຊ. ລາວເວົ້າວ່າ “ຄາບນ້ຳມັນເຫຼົ່ານີ້ເຮັດໃຫ້ປາຂອງເຮົາຕາຍ ເຮັດໃຫ້ເຮົາເປັນພະຍາດຜິວໜັງ ເຮັດໃຫ້ແມ່ນ້ຳລຳເຊຂອງເຮົາເນົ່າເໝັນ. ຂ້ອຍບໍ່ຮູ້ວ່າຈະຫາຢູ່ຫາກິນແນວໃດອີກຕໍ່ໄປແລ້ວ.”
  
  ຄວາມຈິງເປັນແນວໃດ? ຜູ້ຊ່ຽວຊານບາງຄົນບອກວ່າ ມີການຖິ້ມຂີ້ເຫຍື້ອ 6,5 ລ້ານໂຕນລົງໃນມະຫາສະໝຸດທຸກປີ. ປະມານ 50 ເປີເຊັນຂອງຂີ້ເຫຍື້ອເຫຼົ່ານັ້ນເປັນຢາງເຊິ່ງຕ້ອງໃຊ້ເວລາຫຼາຍຮ້ອຍປີເພື່ອຈະຍ່ອຍສະຫຼາຍໝົດ. ນອກຈາກຈະທຳລາຍແຜ່ນດິນໂລກແລ້ວ ມະນຸດຍັງໃຊ້ຊັບພະຍາກອນທຳມະຊາດຈົນເກືອບຈະໝົດໄປຈາກໂລກ. ຜົນການສຶກສາວິໄຈສະແດງວ່າຊັບພະຍາກອນຂອງໂລກທີ່ຖືກທຳລາຍໄປໃນໄລຍະເວລາ 1 ປີຈະຕ້ອງໃຊ້ເວລາເຖິງ 1 ປີ 5 ເດືອນຈຶ່ງຈະກັບມາເປັນຄືເກົ່າ. ໜັງສືພິມຊິດນີ ມໍນິງ ເຮໂຣຂອງອົດສະຕຣາລີລາຍງານວ່າ “ຖ້າປະຊາກອນໂລກຍັງເພີ່ມຂຶ້ນແລະຍັງໃຊ້ຊັບພະຍາກອນແບບສິ້ນເປືອງຕໍ່ໄປ ເມື່ອເຖິງປີ 2035 ເຮົາຄືຊິຕ້ອງມີໂລກເຖິງ 2 ໜ່ວຍ.”
  
  ຄົນທົ່ວໄປໂຕ້ແຍ່ງວ່າແນວໃດ? ມະນຸດສະຫຼາດແລະຮູ້ຈັກໃຊ້ຊັບພະກອນຕ່າງໆ. ເຮົາສາມາດພິກປີ້ນສະຖານະການແລະຮັກສາໂລກໜ່ວຍນີ້ໄວ້ໄດ້.
  
  ຂໍ້ໂຕ້ແຍ່ງນີ້ມີເຫດຜົນບໍ? ມີຫຼາຍຄົນລວມທັງອົງກອນຕ່າງໆໄດ້ທຸ່ມເທຄວາມພະຍາຍາມເພື່ອກະຕຸ້ນສັງຄົມໃຫ້ຕື່ນໂຕໃນເລື່ອງສິ່ງແວດລ້ອມຫຼາຍຂຶ້ນ. ແຕ່ກໍຍັງມີການທຳລາຍແຜ່ນດິນໂລກຫຼາຍຂຶ້ນເລື້ອຍໆ.
  
  ເຈົ້າຄິດແນວໃດ? ເຈົ້າຄິດວ່າຈຳເປັນບໍທີ່ພະເຈົ້າຈະເຂົ້າມາແຊກແຊງເພື່ອປົກປ້ອງໂລກຂອງເຮົາບໍ່ໃຫ້ຖືກທຳລາຍຕາມທີ່ເພິ່ນສັນຍາໄວ້?
  
  ນອກຈາກຄຳພະຍາກອນ 5 ເລື່ອງທີ່ໄດ້ພິຈະລະນາໄປແລ້ວ ຄຳພີໄບເບິນຍັງບອກລ່ວງໜ້າອີກວ່າຈະມີເຫດການທີ່ໜ້າຍິນດີເກີດຂຶ້ນໃນສະໄໝສຸດທ້າຍ. ໃຫ້ເຮົາມາເບິ່ງຕົວຢ່າງໜຶ່ງໃນຄຳພະຍາກອນເລື່ອງທີ 6 ນຳກັນ.
  
  [ຖ້ອຍຄຳທີ່ຍົກມາ]
  
  “ຈາກທີ່ເຄີຍເປັນເຈົ້າຂອງດິນທີ່ສວຍງາມ ຕອນນີ້ຂ້ອຍຮູ້ສຶກຄືກັບວ່າເປັນເຈົ້າຂອງບ່ອນຖິ້ມຂີ້ເຫຍື້ອປົນເປື້ອນສານພິດໄປແລ້ວ.”—ເອຣິນ ແທມເບີ ຜູ້ທີ່ອາໄສຢູ່ໃນເຂດຊາຍຝັ່ງອ່າວແມັກຊິກ ສະຫະລັດອາເມຣິກາ ໄດ້ໃຫ້ຄວາມເຫັນກ່ຽວກັບຜົນກະທົບຂອງຄາບນ້ຳມັນທີ່ຮົ່ວໄຫຼໃນອ່າວແມັກຊິກປີ 2010.
  
  [ຂອບ]
  
  ພະເຈົ້າຕ້ອງຮັບຜິດຊອບບໍ?
  
  ເນື່ອງຈາກພະເຈົ້າໄດ້ພະຍາກອນໄວ້ໃນຄຳພີໄບເບິນວ່າຈະເກີດເຫດການຊົ່ວຮ້າຍຕ່າງໆທີ່ເຮົາເຫັນຢູ່ໃນທຸກມື້ນີ້ ນັ້ນໝາຍຄວາມວ່າພະເຈົ້າຕ້ອງເປັນຜູ້ຮັບຜິດຊອບໃນເລື່ອງເຫຼົ່ານີ້ບໍ? ພະເຈົ້າເປັນຜູ້ທີ່ເຮັດໃຫ້ເຮົາຕ້ອງເຈິຄວາມທຸກບໍ? ເຈົ້າຈະພົບຄຳຕອບທີ່ໜ້າພໍໃຈສຳລັບຄຳຖາມເຫຼົ່ານີ້ໃນບົດ 11 ຂອງປຶ້ມຮຽນຄຳພີໄບເບິນແລ້ວໄດ້ຫຍັງ? ຈັດພິມໂດຍພະຍານພະເຢໂຫວາ.
  
  [ທີ່ມາຂອງຮູບ]
  
  U.S. Coast Guard photo

6. ວຽກປະກາດຂ່າວດີທົ່ວໂລກ

ຫໍສັງເກດການ—2011 | 1 ພຶດສະພາ
- 6. ວຽກປະກາດຂ່າວດີທົ່ວໂລກ
  
  “ຈະມີການປະກາດຂ່າວດີເລື່ອງການປົກຄອງຂອງພະເຈົ້າໄປທົ່ວໂລກ.”—ມັດທາຍ 24:14
  
  ● ໄວອາເທຍອາໄສຢູ່ໃນເກາະແຫ່ງໜຶ່ງໃນໝູ່ເກາະຕູອາໂມຕູທີ່ຫ່າງໄກໃນມະຫາສະໝຸດປາຊີຟິກ. ເຖິງວ່າໝູ່ເກາະຕູອາໂມຕູຈະມີເນື້ອທີ່ຫຼາຍກວ່າ 802.900 ຕາລາງກິໂລແມັດແລະມີເກາະທີ່ເປັນຮູບວົງແຫວນທີ່ເກີດຈາກປະກາລັງກະຈັດກະຈາຍຢູ່ເກືອບ 80 ເກາະ ແຕ່ໝູ່ເກາະນີ້ມີພົນລະເມືອງອາໄສຢູ່ປະມານ 16.000 ຄົນເທົ່ານັ້ນ. ເຖິງວ່າຈະເປັນແບບນັ້ນ ໄວອາເທຍກັບເພື່ອນບ້ານຂອງລາວກໍໄດ້ພົບກັບພະຍານພະເຢໂຫວາ. ຍ້ອນຫຍັງ? ກໍຍ້ອນວ່າພະຍານຕ້ອງການປະກາດຂ່າວດີເລື່ອງການປົກຄອງຂອງພະເຈົ້າໃຫ້ກັບທຸກຄົນບໍ່ວ່າຈະຢູ່ໃສກໍຕາມ.
  
  ຄວາມຈິງເປັນແນວໃດ? ຂ່າວດີເລື່ອງການປົກຄອງຂອງພະເຈົ້າກຳລັງໄດ້ຮັບການປະກາດໄປທົ່ວໂລກ. ໃນປີ 2010 ພຽງປີດຽວ ພະຍານພະເຢໂຫວາໃຊ້ເວລາຫຼາຍກວ່າ 1,6 ພັນລ້ານຊົ່ວໂມງເພື່ອປະກາດຂ່າວດີນີ້ໃນ 236 ດິນແດນ. ສະເລ່ຍແລ້ວພະຍານແຕ່ລະຄົນໃຊ້ເວລາປະກາດມື້ລະ 30 ນາທີທຸກມື້. ໃນໄລຍະ 10 ປີທີ່ຜ່ານມາ ເຂົາເຈົ້າໄດ້ຜະລິດແລະແຈກຢາຍປຶ້ມທີ່ໃຊ້ໃນການສຶກສາຄຳພີໄບເບິນຫຼາຍກວ່າ 20 ພັນລ້ານຫົວ.
  
  ຄົນທົ່ວໄປໂຕ້ແຍ່ງວ່າແນວໃດ? ມີການປະກາດຂ່າວສານຈາກຄຳພີໄບເບິນມາດົນເປັນພັນໆປີແລ້ວ.
  
  ຂໍ້ໂຕ້ແຍ່ງນີ້ມີເຫດຜົນບໍ? ກໍແມ່ນຢູ່ ມີຫຼາຍຄົນເຄີຍເຜີຍແຜ່ຂ່າວສານບາງຢ່າງຈາກຄຳພີໄບເບິນ. ແຕ່ສ່ວນຫຼາຍກໍເຮັດໃນໄລຍະເວລາສັ້ນໆແລະເຮັດໃນບາງບ່ອນເທົ່ານັ້ນ. ກົງກັນຂ້າມ ພະຍານພະເຢໂຫວາກຳລັງເຮັດວຽກປະກາດນີ້ໄປທົ່ວໂລກຢ່າງເປັນລະບົບແລະເຂົ້າເຖິງຜູ້ຄົນຫຼາຍຮ້ອຍລ້ານຄົນ. ພະຍານພະເຢໂຫວາດຸໝັ່ນຫ້າວຫັນເຮັດວຽກປະກາດຢ່າງບໍ່ທໍ້ຖອຍເຖິງວ່າບາງເທື່ອເຂົາເຈົ້າຈະຖືກຕໍ່ຕ້ານຢ່າງຮຸນແຮງຈາກພວກຜູ້ມີອຳນາດແລະອົງກອນທີ່ໂຫດຮ້າຍທີ່ສຸດໃນປະຫວັດສາດ.a (ມາຣະໂກ 13:13) ນອກຈາກນີ້ ພະຍານພະເຢໂຫວາເຮັດວຽກປະກາດໂດຍບໍ່ໄດ້ຮັບຄ່າຈ້າງ. ເຂົາເຈົ້າເຕັມໃຈສະລະເວລາຂອງໂຕເອງ ແລະແຈກຢາຍສິ່ງພິມໃຫ້ຄົນອື່ນແບບຟຣີໆ. ວຽກທັງໝົດຂອງເຂົາເຈົ້າໄດ້ຮັບການສະໜັບສະໜູນໂດຍການບໍລິຈາກດ້ວຍຄວາມສະໝັກໃຈ.
  
  ເຈົ້າຄິດແນວໃດ? “ຂ່າວດີເລື່ອງການປົກຄອງຂອງພະເຈົ້າ” ກຳລັງໄດ້ຮັບການປະກາດໄປທົ່ວໂລກບໍ? ການທີ່ຄຳພະຍາກອນນີ້ເກີດຂຶ້ນແທ້ສະແດງວ່າອະນາຄົດທີ່ດີກວ່າກຳລັງໃກ້ເຂົ້າມາແລ້ວແມ່ນບໍ?
  
  [ຂໍ້ຄວາມໄຂເງື່ອນ]
  
  a ສຳລັບລາຍລະອຽດເພີ່ມເຕີມຂໍໃຫ້ເບິ່ງວິດີໂອເລື່ອງ “ສັດຊື່ພາຍໃຕ້ການທົດລອງ” “ສາມຫຼ່ຽມສີມ່ວງ” ແລະ “ພະຍານພະເຢໂຫວາຢືນຢັດໝັ້ນຄົງພາຍໃຕ້ການໂຈມຕີຂອງນາຊີ” (ພາສາອັງກິດ) ເຮັດຂຶ້ນໂດຍພະຍານພະເຢໂຫວາ.
  
  [ຖ້ອຍຄຳທີ່ຍົກມາ]
  
  “ເທົ່າທີ່ພະເຢໂຫວາອະນຸຍາດ ເຮົາຈະປະກາດຂ່າວດີເລື່ອງການປົກຄອງຂອງພະເຈົ້າຕໍ່ໆໄປດ້ວຍຄວາມກະຕືລືລົ້ນ ແລະໃຊ້ທຸກວິທີທີ່ເປັນໄປໄດ້ເພື່ອເຂົ້າເຖິງຜູ້ຄົນ.”—ປຶ້ມປະຈຳປີຂອງພະຍານພະເຢໂຫວາ 2010.

ຍຸກສະໄໝທີ່ດີກວ່າໃກ້ເຂົ້າມາແລ້ວ!

ຫໍສັງເກດການ—2011 | 1 ພຶດສະພາ
- ຍຸກສະໄໝທີ່ດີກວ່າໃກ້ເຂົ້າມາແລ້ວ!
  
  “ອີກຈັກໜ້ອຍຈະບໍ່ມີຄົນຊົ່ວເລີຍ . . . ແຕ່ຄົນທີ່ອ່ອນນ້ອມຖ່ອມຕົນຈະໄດ້ຢູ່ໃນໂລກ ເຂົາເຈົ້າຈະຊື່ນຊົມຍິນດີແລະມີແຕ່ຄວາມສະຫງົບສຸກ.”—ຄຳເພງ 37:10, 11, ລ.ມ.
  
  ເຈົ້າຢາກເຫັນຄຳພະຍາກອນທີ່ຍົກມາທາງເທິງນີ້ເກີດຂຶ້ນແທ້ບໍ? ເຈົ້າຄືຊິຢາກເຫັນແທ້ໆ. ມີເຫດຜົນໜັກແໜ້ນຫຼາຍຢ່າງທີ່ເຮັດໃຫ້ເຊື່ອໄດ້ວ່າຄຳພະຍາກອນນີ້ຈະເກີດຂຶ້ນແທ້ໃນອີກບໍ່ດົນ.
  
  ບົດຄວາມກ່ອນໜ້ານີ້ໄດ້ພິຈາລະນາຄຳພະຍາກອນໃນຄຳພີໄບເບິນພຽງບາງຂໍ້ທີ່ສະແດງໃຫ້ເຫັນຢ່າງຈະແຈ້ງວ່າເຮົາກຳລັງຢູ່ໃນ “ສະໄໝສຸດທ້າຍ.” (2 ຕີໂມທຽວ 3:1-5) ພະເຈົ້າດົນໃຈຜູ້ຂຽນຄຳພີໄບເບິນໃຫ້ບອກລ່ວງໜ້າກ່ຽວກັບເຫດການເຫຼົ່ານັ້ນເພື່ອເຮົາຈະມີຄວາມຫວັງ. (ໂຣມ 15:4) ການທີ່ຄຳພະຍາກອນເຫຼົ່ານັ້ນເກີດຂຶ້ນແທ້ສະແດງວ່າຄວາມທຸກຍາກທີ່ເຮົາກຳລັງເຈິຢູ່ໃນທຸກມື້ນີ້ໃກ້ຈະຈົບລົງແລ້ວ.
  
  ຈະເກີດຫຍັງຂຶ້ນຫຼັງຈາກສະໄໝສຸດທ້າຍຈົບລົງ? ການປົກຄອງຂອງພະເຈົ້າຈະປົກຄອງມະນຸດທຸກຄົນທົ່ວໂລກ. (ມັດທາຍ 6:9) ໃຫ້ເຮົາມາເບິ່ງວ່າຄຳພີໄບເບິນບອກແນວໃດກ່ຽວກັບສະພາບການຂອງໂລກໃນສະໄໝນັ້ນ:
  
  ● ຄວາມອຶດຢາກຫິວໂຫຍຈະບໍ່ມີອີກຕໍ່ໄປ. “ຈະມີເຂົ້າຢ່າງຫຼວງຫຼາຍໃນແຜ່ນດິນ ເທິງຍອດເຂົາທັງຫຼາຍຈະມີເຂົ້າອຸດົມສົມບູນ.”—ຄຳເພງ 72:16, ລ.ມ.
  
  ● ພະຍາດຕ່າງໆຈະຖືກກຳຈັດໃຫ້ໝົດໄປ. “ຈະບໍ່ມີໃຜທີ່ຢູ່ໃນແຜ່ນດິນນັ້ນເວົ້າວ່າ ‘ຂ້ອຍປ່ວຍ.’”—ເອຊາອີ 33:24, ລ.ມ.
  
  ● ແຜ່ນດິນໂລກຈະໄດ້ຮັບການຟື້ນຟູ. “ບ່ອນກັນດານແລະດິນແດນທີ່ແຫ້ງແລ້ງຈະປາບປື້ມຍິນດີ ທົ່ງພຽງກັນດານຈະມີຄວາມສຸກແລະມີດອກໄມ້ເຕັມໄປໝົດ.”—ເອຊາອີ 35:1, ລ.ມ.
  
  ນີ້ເປັນພຽງບາງຕົວຢ່າງຂອງຄຳພະຍາກອນທີ່ໃຫ້ກຳລັງໃຈໃນຄຳພີໄບເບິນເຊິ່ງຈະເກີດຂຶ້ນແທ້ໃນອີກບໍ່ດົນນີ້. ເຈົ້າຢາກໃຫ້ພະຍານພະເຢໂຫວາອະທິບາຍໃຫ້ເຈົ້າຟັງບໍວ່າເປັນຫຍັງເຂົາເຈົ້າຈຶ່ງໝັ້ນໃຈວ່າຍຸກສະໄໝທີ່ດີກວ່າໃກ້ເຂົ້າມາແລ້ວ?