ບາງຄົນ​ຮູ້ສຶກ​ວ່າ​ຍາກ​ທີ່​ຈະ​ຮັກ​ພະເຈົ້າ. ສຳລັບ​ເຂົາເຈົ້າ​ແລ້ວ ພະເຈົ້າ​ເບິ່ງ​ຄື​ວ່າ​ລຶກລັບ ຫ່າງ​ໄກ ຫຼື​ເຖິງ​ກັບ​ໂຫດ​ຮ້າຍ​ນຳ. ລອງ​ມາ​ຟັງ​ຄວາມຄິດ​ເຫັນ​ຕໍ່ໄປ​ນີ້:

• “ຂ້ອຍ​ອະທິດຖານ​ຂໍ​ໃຫ້​ພະເຈົ້າ​ຊ່ວຍ ແຕ່​ໃນ​ຂະນະ​ດຽວ​ກັນ​ ຂ້ອຍ​ກໍ​ຮູ້ສຶກ​ວ່າ​ເພິ່ນ​ຢູ່​ໄກ​ເກີນ​ໄປ ແລະ​ເຂົ້າ​ເຖິງ​ໄດ້​ຍາກ. ສຳລັບ​ຂ້ອຍ​ແລ້ວ ເພິ່ນ​ເປັນ​ພະເຈົ້າ​ທີ່​ເຢັນ​ຊາ​ແລະ​ບໍ່​ສົນໃຈ​ເຮົາ.”—ມາໂຄ, ອີຕາລີ.

• “ເຖິງ​ວ່າ​ຂ້ອຍ​ຢາກ​ຮັບໃຊ້​ພະເຈົ້າ​ສຸດ​ຫົວໃຈ ແຕ່​ເບິ່ງ​ຄື​ວ່າ​ເພິ່ນ​ຢູ່​ຫ່າງ​ໄກ​ໂພດ. ຂ້ອຍ​ຄິດ​ວ່າ​ເພິ່ນ​ເປັນ​ພະເຈົ້າ​ທີ່​ໂຫດ​ຮ້າຍ​ແລະ​ມັກ​ລົງໂທດ​ມະນຸດ. ຂ້ອຍ​ບໍ່​ເຊື່ອ​ວ່າ​ເພິ່ນ​ຈະ​ມີ​ຄວາມ​ອົບອຸ່ນ​ແລະ​ຄວາມ​ອ່ອນໂຍນ.”—ໂຣຊາ, ກົວເຕມາລາ.

• “ຕອນ​ຍັງ​ນ້ອຍ ຂ້ອຍ​ຄິດ​ວ່າ​ພະເຈົ້າ​ຖ້າ​ຈອບ​ຈັບ​ຜິດ​ມະນຸດ ແລະ​ພ້ອມ​ຈະ​ລົງໂທດ​ເຮົາ​ທຸກ​ເວລາ. ຕອນ​ໃຫຍ່​ຂຶ້ນ ຂ້ອຍ​ພັດ​ຮູ້ສຶກ​ວ່າ​ເພິ່ນ​ຢູ່​ສູງ​ເກີນ​ໄປ. ພະເຈົ້າ​ເປັນ​ຄື​ກັບ​ນາຍົກ​ລັດຖະມົນຕີ​ທີ່​ມີ​ໜ້າທີ່​ຈັດການ​ບັນຫາ​ຕ່າງໆ​ໃຫ້​ປະຊາຊົນ ແຕ່​ບໍ່​ໄດ້​ສົນໃຈ​ເຂົາເຈົ້າ​ແທ້.”—ເຣມົນ, ການາດາ.

ເຈົ້າ​ເດ​ຄິດ​ແນວໃດ? ເປັນ​ເລື່ອງ​ຍາກ​ແທ້ໆບໍ​ທີ່​ຈະ​ຮັກ​ພະເຈົ້າ? ຜູ້​ທີ່​ເປັນ​ຄລິດສະຕຽນ​ຖາມ​ຄຳຖາມ​ນີ້​ມາ​ຫຼາຍ​ສະຕະວັດ​ແລ້ວ. ໃນ​ຍຸກ​ກາງ ສະມາຊິກ​ສ່ວນ​ໃຫຍ່​ຂອງ​ຄລິດ​ສາສະໜາ​ຈັກ​ເຖິງ​ກັບ​ເຊົາ​ອະທິດຖານ​ຕໍ່​ພະເຈົ້າ​ທີ່​ຍິ່ງໃຫຍ່​ສູງ​ສຸດ. ຍ້ອນຫຍັງ? ຍ້ອນ​ເຂົາເຈົ້າ​ຢ້ານ​ຈົນ​ບໍ່​ກ້າ​ເຂົ້າ​ໃກ້​ເພິ່ນ. ນັກ​ປະຫວັດສາດ ວິວ ດູແຣນ​ບອກ​ວ່າ: “ຄົນ​ທົ່ວໄປ​ທີ່​ເປັນ​ຄົນ​ບາບ​ຈະ​ກ້າ​ອະທິດຖານ​ເຖິງ​ພະເຈົ້າ​ທີ່​ເປັນ​ຕາ​ຢ້ານ​ແລະ​ຢູ່​ຫ່າງ​ໄກ​ຈາກ​ມະນຸດ​ໄດ້​ແນວໃດ?”

ເປັນຫຍັງ​ຫຼາຍ​ຄົນ​ເບິ່ງ​ວ່າ​ພະເຈົ້າ “ເປັນ​ຕາ​ຢ້ານ​ແລະ​ຢູ່​ຫ່າງ​ໄກ”? ແທ້ໆແລ້ວ ຄຳພີໄບເບິນ​ສອນ​ແນວໃດ​ກ່ຽວກັບ​ພະເຈົ້າ? ການ​ຮູ້​ຄວາມຈິງ​ກ່ຽວກັບ​ພະເຈົ້າ​ຈະ​ຊ່ວຍ​ເຈົ້າ​ໃຫ້​ຮັກ​ເພິ່ນ​ໄດ້​ບໍ?

ຄົນ​ທົ່ວໄປ​ເຊື່ອ​ແນວໃດ?

“ພວກ​ເຮົາ​ຍັງ​ບໍ່​ໄດ້​ຂໍ້​ສະຫຼຸບ​ວ່າ​ຄວນ​ເອີ້ນ​ຊື່​ຂອງ​ພະເຈົ້າ​ຫຼື​ບໍ່ ແລະ​ຖ້າ​ຄວນ​ເອີ້ນ ເຮົາ​ຈະ​ໃຊ້​ຊື່​ຫຍັງ.”—ສາສະດາ​ຈານ ເດວິດ ຄັນນິງແຫມ, ຜູ້​ຊ່ຽວຊານ​ດ້ານ​ສາສະໜາ​ສາດ.

ອັນ​ໃດ​ແມ່ນ​ຄວາມຈິງ​ໃນ​ຄຳພີໄບເບິນ?

ພະເຈົ້າ​ບອກ​ວ່າ: “ເຮົາ​ແມ່ນ​ເຢໂຫວາ ນີ້​ແມ່ນ​ຊື່​ຂອງ​ເຮົາ.” (ເອຊາຢາ 42:8, ລ.ມ.) ເຢໂຫວາ​ເປັນ​ຊື່​ພາສາ​ເຮັບເຣີ​ທີ່​ມີ​ຄວາມໝາຍ​ວ່າ “ເຮົາ​ຈະ​ເປັນ​ຫຍັງ​ກໍ​ໄດ້​ທີ່​ເຮົາ​ຢາກ​ເປັນ.”—ອົບພະຍົບ 3:14, ລ.ມ.

ພະເຢໂຫວາ​ຕ້ອງການ​ໃຫ້​ເຮົາ​ໃຊ້​ຊື່​ຂອງ​ເພິ່ນ. ຄຳພີໄບເບິນ​ບອກ​ວ່າ “ຮ້ອງ ຊື່​ເພິ່ນ ບອກ​ທຸກ​ຄົນ​ໃຫ້​ຮູ້ ວ່າ​ເພິ່ນ​ໄດ້​ເຮັດ​ຫຍັງ​ແດ່ ບອກ​ທຸກ​ຄົນ​ໃຫ້​ຮູ້ ວ່າ​ຊື່​ຂອງ​ເພິ່ນ​ໄດ້​ຮັບ​ການ​ຍົກຍ້ອງ​ຫຼາຍ​ສ່ຳ​ໃດ.”—ເອຊາຢາ 12:4, ລ.ມ.

ພະເຢຊູ​ເອງ​ກໍ​ໃຊ້​ຊື່​ພະເຈົ້າ. ພະເຢຊູ​ອະທິດຖານ​ເຖິງ​ພະເຢໂຫວາ​ວ່າ: “ລູກ​ເຮັດ​ໃຫ້​ພວກ​ເຂົາ [ພວກ​ລູກສິດ​ຂອງ​ພະເຢຊູ] ຮູ້ຈັກ​ຊື່​ຂອງ​ພະອົງ​ແລ້ວ ແລະ​ຈະ​ເຮັດ​ໃຫ້​ພວກ​ເຂົາ​ຮູ້ຈັກ​ຕໍ່ໆໄປ​ອີກ.” ເປັນຫຍັງ​ພະເຢຊູ​ບອກ​ໃຫ້​ພວກ​ລູກສິດ​ຮູ້ຈັກ​ຊື່​ຂອງ​ພະເຈົ້າ? ເພິ່ນ​ອະທິບາຍ​ຕໍ່ໄປ​ວ່າ: “ເພື່ອ​ພວກ​ເຂົາ​ຈະ​ຮັກ​ຄົນອື່ນ​ຄື​ກັບ​ທີ່​ພະອົງ​ຮັກ​ລູກ ແລະ​ລູກ​ຈະ​ເປັນ​ອັນ​ໜຶ່ງ​ອັນ​ດຽວ​ກັບ​ພວກ​ເຂົາ.”—ໂຢຮັນ 17:26

ເປັນຫຍັງ​ເລື່ອງ​ນີ້​ຈຶ່ງ​ສຳຄັນ?

ວໍເທີ ເລົາຣີ ນັກ​ເທວະ​ວິທະຍາ​ຄົນ​ໜຶ່ງ​ຂຽນ​ວ່າ: “ຄົນ​ໃດ​ບໍ່​ຮູ້ຈັກ​ຊື່​ພະເຈົ້າ ຄົນ​ນັ້ນ​ບໍ່​ຮູ້ຈັກ​ຕົວ​ຕົນ​ທີ່​ແທ້​ຈິງ​ຂອງ​ເພິ່ນ ແລະ​ລາວ​ຮັກ​ເພິ່ນ​ບໍ່​ໄດ້ ຖ້າ​ລາວ​ຄິດ​ວ່າ​ເພິ່ນ​ເປັນ​ພຽງ​ພະລັງ​ທີ່​ບໍ່​ມີ​ຕົວ​ຕົນ.”

ຜູ້​ຊາຍ​ຄົນ​ໜຶ່ງ​ທີ່​ຊື່​ວິກເຕີ​ໄປ​ໂບດ​ທຸກໆອາທິດ ແຕ່​ລາວ​ຍັງ​ຮູ້ສຶກ​ວ່າ​ບໍ່​ໄດ້​ຮູ້ຈັກ​ພະເຈົ້າ​ແທ້. ແຕ່​ລາວ​ບອກ​ວ່າ: “ເມື່ອ​ຂ້ອຍ​ໄດ້​ຮູ້​ວ່າ​ພະເຈົ້າ​ມີ​ຊື່​ວ່າ​ເຢໂຫວາ ຂ້ອຍ​ຮູ້ສຶກ​ຄື​ກັບ​ວ່າ​ຫາກໍ​ໄດ້​ຮັບ​ການ​ແນະນຳ​ໃຫ້​ຮູ້ຈັກ​ເພິ່ນ​ເປັນ​ທາງ​ການ. ຂ້ອຍ​ຮູ້ສຶກ​ຄື​ກັບ​ວ່າ ໃນທີ່ສຸດ​ຂ້ອຍ​ກໍ​ໄດ້​ພົບ​ບຸກຄົນ​ທີ່​ຂ້ອຍ​ເຄີຍ​ໄດ້​ຍິນ​ເລື່ອງ​ລາວ​ຂອງ​ລາວ​ມາ​ດົນ​ແລ້ວ. ແລ້ວ​ພະເຈົ້າ​ກໍ​ເປັນ​ຈິງ​ສຳລັບ​ຂ້ອຍ​ແລະ​ເປັນ​ຜູ້​ທີ່​ຂ້ອຍ​ສາມາດ​ໃກ້ຊິດ​ໄດ້.”

ພະເຢໂຫວາ​ເອງ​ກໍ​ຮູ້ສຶກ​ໃກ້ຊິດ​ກັບ​ຄົນ​ທີ່​ໃຊ້​ຊື່​ຂອງ​ເພິ່ນ​ຄື​ກັນ. ພະເຈົ້າ​ເວົ້າ​ເຖິງ​ຄົນ​ທີ່ “ລະນຶກ​ເຖິງ​ຊື່​ຂອງ​ເພິ່ນ” ແລະ​ສັນຍາ​ວ່າ: “ເຮົາ​ຈະ​ສະແດງ​ຄວາມ​ຮັກ​ຄວາມ​ເມດຕາ​ຕໍ່​ພວກ​ເຂົາ​ຄື​ພໍ່​ສະແດງ​ຕໍ່​ລູກ​ທີ່​ເຊື່ອຟັງ.” (ມາລາກີ 3:16, 17, ລ.ມ.) ພະເຢໂຫວາ​ຍັງ​ໃຫ້​ລາງວັນ​ແກ່​ຄົນ​ທີ່​ຮ້ອງ​ເອີ້ນ​ຊື່​ຂອງ​ເພິ່ນ​ຄື​ກັນ. ຄຳພີໄບເບິນ​ບອກ​ວ່າ: “ທຸກ​ຄົນ​ທີ່​ອ້ອນວອນ​ໂດຍ​ອອກ​ຊື່​ຂອງ​ພະເຢໂຫວາ​ຈະ​ລອດ.”—ໂຣມ 10:13

ຄົນ​ທົ່ວໄປ​ເຊື່ອ​ແນວໃດ?

ສາສະໜາ​ຄລິດ “ນິກາຍ​ໃຫຍ່ໆ 3 ນິກາຍ ທັງ​ໂຣມັນ​ກາໂຕລິກ ອໍໂຕດ໋ອກ​ຕາເວັນ​ອອກ ແລະ​ໂປຣແຕສະຕັງ​ເຊື່ອ​ວ່າ​ພະເຈົ້າ​ປະກອບ​ດ້ວຍ 3 ບຸກຄົນ ຄື: ພະເຈົ້າ​ພະບິດາ ພະເຈົ້າ​ພະບຸດ ແລະ​ພະເຈົ້າ​ພະ​ວິນຍານ​ບໍລິສຸດ. ຕາມ​ຫຼັກ​ເທວະ​ວິທະຍາ​ຂອງ​ຄລິດສະຕຽນ ຄຳສອນ​ນີ້​ບໍ່​ໄດ້​ຍອມຮັບ​ວ່າ​ມີ​ພະເຈົ້າ 3 ອົງ ແຕ່​ຍອມຮັບ​ວ່າ​ທັງ 3 ອົງ​ເປັນ​ພະເຈົ້າ​ອົງ​ດຽວ.”—ສາລານຸກົມ​ບຣິແທນນິກາ​ສະບັບ​ໃໝ່.

ອັນ​ໃດ​ແມ່ນ​ຄວາມຈິງ​ໃນ​ຄຳພີໄບເບິນ?

ພະເຢຊູ ລູກ​ຊາຍ​ຂອງ​ພະເຈົ້າ ບໍ່​ເຄີຍ​ອ້າງ​ວ່າ​ເພິ່ນ​ເປັນ​ບຸກຄົນ​ດຽວ​ກັບ​ພໍ່​ຫຼື​ມີ​ຖານະ​ເທົ່າ​ທຽມ​ກັນ. ແຕ່​ເພິ່ນ​ບອກ​ວ່າ: “ຂ້ອຍ​ຈະ​ໄປ​ຫາ​ພໍ່ ເພາະ​ພະເຈົ້າ​ຜູ້​ເປັນ​ພໍ່​ຍິ່ງໃຫຍ່​ກວ່າ​ຂ້ອຍ.” (ໂຢຮັນ 14:28) ພະເຢຊູ​ຍັງ​ບອກ​ລູກສິດ​ຄົນ​ໜຶ່ງ​ອີກ​ວ່າ: “ຂ້ອຍ​ກຳລັງ​ຈະ​ຂຶ້ນ​ໄປ​ຫາ​ພໍ່​ຂອງ​ຂ້ອຍ​ເຊິ່ງ​ເປັນ​ພໍ່​ຂອງ​ພວກເຈົ້າ ແລະ​ໄປ​ຫາ​ພະເຈົ້າ​ຂອງ​ຂ້ອຍ​ເຊິ່ງ​ເປັນ​ພະເຈົ້າ​ຂອງ​ພວກເຈົ້າ.”—ໂຢຮັນ 20:17

ພະລັງບໍລິສຸດ​ບໍ່​ແມ່ນ​ພະເຈົ້າ. ຄລິດສະຕຽນ​ໃນ​ສະຕະວັດ​ທຳອິດ “ເຕັມ​ໄປ ດ້ວຍ​ພະລັງບໍລິສຸດ” ແລະ​ພະເຢໂຫວາ​ບອກ​ວ່າ: “ເຮົາ​ຈະ​ໃຫ້ ພະລັງ​ຂອງ​ເຮົາ​ກັບ​ຄົນ​ທຸກ​ປະເພດ.” (ກິດຈະການ 2:1-4, 17) ພະລັງບໍລິສຸດ​ບໍ່​ໄດ້​ເປັນ​ສ່ວນ​ໜຶ່ງ​ຂອງ​ຕີເອການຸພາບ ແຕ່​ເປັນ​ພະລັງ​ປະຕິບັດການ​ຂອງ​ພະເຈົ້າ.

ເປັນຫຍັງ​ເລື່ອງ​ນີ້​ຈຶ່ງ​ສຳຄັນ?

ຜູ້​ຊ່ຽວຊານ​ດ້ານ​ຄຳສອນ​ກາໂຕລິກ ຄານ ຣາເນີ​ແລະ​ເຮີເບິດ ຟໍກຣິມເລີ​ອະທິບາຍ​ວ່າ ຕີເອການຸພາບ “ບໍ່​ມີ​ທາງ​ເປັນ​ທີ່​ຮູ້ຈັກ​ຖ້າ​ບໍ່​ມີການ​ເປີດເຜີຍ ແລະ​ເຖິງ​ວ່າ​ຈະ​ເປີດເຜີຍ​ແລ້ວ​ກໍ​ບໍ່​ເຂົ້າໃຈ​ໄດ້​ທົງ​ໝົດ.” ເປັນ​ໄປ​ໄດ້​ບໍ​ທີ່​ຈະ​ຮັກ​ຄົນ​ທີ່​ເຈົ້າ​ບໍ່​ມີ​ທາງ​ຮູ້ຈັກ​ຫຼື​ເຂົ້າໃຈ​ລາວ​ໄດ້​ແທ້ໆ? ເຫັນ​ໄດ້​ຈະ​ແຈ້ງ​ວ່າ​ຄຳສອນ​ເລື່ອງ​ຕີເອການຸພາບ​ເປັນ​ອຸປະສັກ​ທີ່​ເຮັດ​ໃຫ້​ເຮົາ​ບໍ່​ຮູ້ຈັກ​ແລະ​ຮັກ​ພະເຈົ້າ​ໄດ້​ຢ່າງ​ແທ້​ຈິງ.

ມາໂຄ ເຊິ່ງ​ເວົ້າ​ເຖິງ​ໃນ​ບົດຄວາມ​ທຳອິດ​ກໍ​ຮູ້ສຶກ​ວ່າ​ຄຳສອນ​ເລື່ອງ​ຕີເອການຸພາບ​ເປັນ​ອຸປະສັກ​ຄື​ກັນ. ລາວ​ບອກ​ວ່າ: “ຂ້ອຍ​ຄິດ​ວ່າ​ພະເຈົ້າ​ພະຍາຍາມ​ປິດ​ບັງ​ບໍ່​ໃຫ້​ຂ້ອຍ​ໄດ້​ຮູ້ຈັກ​ເພິ່ນ ແລະ​ເມື່ອ​ຄິດ​ແບບ​ນີ້​ກໍ​ແຮ່ງ​ຮູ້ສຶກ​ວ່າ​ເພິ່ນ​ຢູ່​ຫ່າງ​ໄກ ເປັນ​ບຸກຄົນ​ລຶກລັບ ແລະ​ເຂົ້າ​ຫາ​ບໍ່​ໄດ້.” ແຕ່​ຄຳພີໄບເບິນ​ບອກ​ວ່າ ພະເຈົ້າ “ບໍ່​ໄດ້​ຢູ່​ໄກ​ຈາກ​ພວກ​ເຮົາ​ແຕ່​ລະ​ຄົນ​ເລີຍ.” (ກິດຈະການ 17:27) ພະເຈົ້າ​ບໍ່​ໄດ້​ປິດ​ບັງ​ໂຕເອງ ແຕ່​ຢາກ​ໃຫ້​ພວກ​ເຮົາ​ຮູ້ຈັກ​ເພິ່ນ. ພະເຢຊູ​ບອກ​ວ່າ: “ພວກ​ເຮົາ​ນະມັດສະການ​ຜູ້​ທີ່​ພວກ​ເຮົາ​ຮູ້ຈັກ.”—ໂຢຮັນ 4:22

ມາໂຄ​ບອກ​ວ່າ: “ເມື່ອ​ຂ້ອຍ​ໄດ້​ຮູ້​ວ່າ​ພະເຈົ້າ​ບໍ່​ໄດ້​ເປັນ​ສ່ວນ​ໜຶ່ງ​ຂອງ​ຕີເອການຸພາບ ຂ້ອຍ​ຈຶ່ງ​ສາມາດ​ສ້າງ​ສາຍສຳພັນ​ເປັນ​ສ່ວນ​ໂຕ​ກັບ​ເພິ່ນ​ໄດ້​ໃນທີ່ສຸດ.” ຖ້າ​ເຮົາ​ເບິ່ງ​ວ່າ​ພະເຢໂຫວາ​ເປັນ​ບຸກຄົນ​ໜຶ່ງ​ທີ່​ແຍກ​ຕ່າງ​ຫາກ​ຈາກ​ຕີເອການຸພາບ​ແລະ​ບໍ່​ແມ່ນ​ພະເຈົ້າ​ທີ່​ລຶກລັບ ເຮົາ​ກໍ​ຈະ​ຮັກ​ເພິ່ນ​ໄດ້​ງ່າຍ​ກວ່າ. ຄຳພີໄບເບິນ​ບອກ​ວ່າ: “ຄົນ​ທີ່​ບໍ່​ສະແດງ​ຄວາມ​ຮັກ​ກໍ​ບໍ່​ຮູ້ຈັກ​ພະເຈົ້າ ເພາະ​ພະເຈົ້າ​ເປັນ​ຄວາມ​ຮັກ.”—1 ໂຢຮັນ 4:8

ຄົນ​ທົ່ວໄປ​ເຊື່ອ​ແນວໃດ?

“ທັນທີ​ທີ່​ຕາຍ ວິນຍານ​ຂອງ​ຄົນ​ທີ່​ເຮັດ​ບາບ​ຮ້າຍແຮງ​ຈະ​ຕົກ​ນະລົກ ແລະ​ຢູ່​ຫັ້ນ​ເຂົາເຈົ້າ​ຈະ​ຖືກ​ລົງໂທດ​ດ້ວຍ​ການ​ທໍລະມານ​ໃນ ‘ໄຟ​ຕະຫຼອດໄປ.’” (ຄູ່​ມື​ຖາມ​ຕອບ​ຂອງ​ຄລິດຕະຈັກ​ກາໂຕລິກ ພາສາ​ອັງກິດ) ນອກຈາກນັ້ນ ຫົວໜ້າ​ສາສະໜາ​ບາງຄົນ​ສອນ​ວ່າ​ນະລົກ​ຄື​ສະພາບ​ທີ່​ຖືກ​ຕັດ​ຂາດ​ຈາກ​ພະເຈົ້າ​ຢ່າງ​ສິ້ນ​ເຊີງ.

ອັນ​ໃດ​ແມ່ນ​ຄວາມຈິງ​ໃນ​ຄຳພີໄບເບິນ?

ຄຳພີໄບເບິນ​ສອນ​ວ່າ: “ຄົນ​ໃດ​ທີ່​ເຮັດ​ບາບ​ຄົນ​ນັ້ນ​ຈະ​ຕາຍ.” (ເອເຊກຽນ 18:4, ລ.ມ.) ຄົນ​ຕາຍ​ແລ້ວ “ບໍ່​ຮູ້​ຫຍັງ​ເລີຍ.” (ຜູ້ເທສະໜາປ່າວປະກາດ 9: 5, ລ.ມ.) ຖ້າ​ຄົນ​ຕາຍ​ບໍ່​ຮັບ​ຮູ້​ຫຍັງ​ເລີຍ ລາວ​ຈະ​ຖືກ​ທໍລະມານ​ໃນ “ໄຟ​ຕະຫຼອດໄປ” ຫຼື​ຮູ້ສຶກ​ເຈັບ​ປວດ​ຍ້ອນ​ຖືກ​ຕັດ​ຂາດ​ຈາກ​ພະເຈົ້າ​ຕະຫຼອດໄປ​ໄດ້​ແນວໃດ?

ໃນ​ຄຳພີໄບເບິນ ຄຳ​ພາສາ​ເຮັບເຣີ​ແລະ​ພາສາ​ກຣີກ​ທີ່​ມັກ​ແປ​ວ່າ “ນະລົກ” ແທ້​ຈິງ​ແລ້ວ​ໝາຍເຖິງ​ຫຼຸມ​ສົບ​ຫຼື​ບ່ອນ​ຝັງ​ສົບ. ເມື່ອ​ໂຢບ​ຮູ້ສຶກ​ເຈັບ​ປວດ​ທຸກ​ທໍລະມານ​ຍ້ອນ​ພະຍາດ​ຮ້າຍ ລາວ​ອະທິດຖານ​ເຖິງ​ພະເຈົ້າ​ວ່າ: “ພະເຈົ້າ​ເອີ້ຍ ຂໍ​ພະອົງ​ເຊື່ອງ​ລູກ​ໄວ້​ໃນ​ບ່ອນ​ຝັງ​ສົບ.” (ໂຢບ 14:13, ລ.ມ.) ເຫັນ​ໄດ້​ແຈ້ງ​ວ່າ​ໂຢບ​ຕ້ອງການ​ໄປ​ພັກຜ່ອນ​ໃນ​ຫຼຸມ​ສົບ ບໍ່​ແມ່ນ​ໃນ​ສະຖານ​ທໍລະມານ​ຫຼື​ໃນ​ສະພາບ​ທີ່​ຖືກ​ຕັດ​ຂາດ​ຈາກ​ພະເຈົ້າ.

ເປັນຫຍັງ​ເລື່ອງ​ນີ້​ຈຶ່ງ​ສຳຄັນ?

ຖ້າ​ພະເຈົ້າ​ເປັນ​ບຸກຄົນ​ທີ່​ໂຫດຫ້ຽມ ເຮົາ​ຄື​ຊິ​ບໍ່​ຢາກ​ຮັກ​ເພິ່ນ ແຕ່​ຢາກ​ໜີ​ໃຫ້​ໄກ​ຈາກ​ເພິ່ນ. ໂຣຊິໂອ ເຊິ່ງ​ຢູ່​ໃນ​ເມັກຊິກ​ບອກ​ວ່າ “ຕັ້ງແຕ່​ເປັນ​ເດັກນ້ອຍ ຂ້ອຍ​ຖືກ​ສອນ​ໃຫ້​ເຊື່ອ​ເລື່ອງ​ໄຟ​ນະລົກ. ຂ້ອຍ​ຢ້ານ​ຫຼາຍ​ຈົນ​ນຶກພາບ​ບໍ່​ອອກ​ວ່າ​ພະເຈົ້າ​ມີ​ຄຸນລັກສະນະ​ທີ່​ດີ​ອັນ​ໃດ​ແດ່. ຂ້ອຍ​ຄິດ​ວ່າ​ເພິ່ນ​ມີ​ແຕ່​ຄວາມ​ຄຽດ​ແລະ​ບໍ່​ຍອມ​ເມດຕາ​ໃຜ.”

ຄຳສອນ​ທີ່​ຈະ​ແຈ້ງ​ໃນ​ຄຳພີໄບເບິນ​ກ່ຽວກັບ​ການ​ພິພາກສາ​ຂອງ​ພະເຈົ້າ​ແລະ​ສະພາບ​ຂອງ​ຄົນ​ຕາຍ​ເຮັດ​ໃຫ້​ໂຣຊິໂອ​ປ່ຽນ​ຄວາມຄິດ​ທີ່​ລາວ​ມີ​ຕໍ່​ພະເຈົ້າ. ລາວ​ບອກ​ວ່າ “ຂ້ອຍ​ຮູ້ສຶກ​ເປັນ​ອິດສະຫຼະ​ຍ້ອນ​ເລື່ອງ​ທີ່​ເຮັດ​ໃຫ້​ໜັກ​ໃຈ​ມາ​ດົນ​ຖືກ​ຍົກ​ອອກ​ໄປ​ແລ້ວ. ຂ້ອຍ​ເລີ່ມ​ໝັ້ນໃຈ​ວ່າ​ພະເຈົ້າ​ຕ້ອງການ​ໃຫ້​ເຮົາ​ໄດ້​ຮັບ​ສິ່ງ​ດີໆ ເພິ່ນ​ຮັກ​ເຮົາ ແລະ​ຂ້ອຍ​ກໍ​ສາມາດ​ຮັກ​ເພິ່ນ​ໄດ້. ເພິ່ນ​ເປັນ​ຄື​ພໍ່​ທີ່​ຈັບ​ມື​ລູກ​ໄວ້​ແລະ​ຢາກ​ໃຫ້​ລູກ​ໄດ້​ຮັບ​ສິ່ງ​ທີ່​ດີ​ທີ່ສຸດ.”—ເອຊາຢາ 41:13

ຫຼາຍ​ຄົນ​ພະຍາຍາມ​ຮັກສາ​ໂຕ​ຢູ່​ໃນ​ສິນລະທຳ​ຍ້ອນ​ຢ້ານ​ຖືກ​ໄຟ​ນະລົກ ແຕ່​ພະເຈົ້າ​ບໍ່​ມັກ​ໃຫ້​ນະມັດສະການ​ເພິ່ນ​ຍ້ອນ​ຄວາມ​ຢ້ານ​ກົວ. ພະເຢຊູ​ເຄີຍ​ບອກ​ວ່າ: “ເຈົ້າ​ຕ້ອງ​ຮັກ​ພະເຢໂຫວາ​ພະເຈົ້າ​ຂອງ​ເຈົ້າ.” (ມາຣະໂກ 12:29, 30) ນອກຈາກນັ້ນ ຖ້າ​ພວກ​ເຮົາ​ໝັ້ນໃຈ​ວ່າ​ພະເຈົ້າ​ຍຸຕິທຳ​ໃນ​ທຸກ​ມື້​ນີ້ ພວກ​ເຮົາ​ກໍ​ຈະ​ເຊື່ອ​ໝັ້ນ​ການ​ພິພາກສາ​ຂອງ​ເພິ່ນ​ໃນ​ອະນາຄົດ. ພວກ​ເຮົາ​ຈະ​ເວົ້າ​ດ້ວຍ​ຄວາມ​ໝັ້ນໃຈ​ຄື​ກັບ​ເອລີ​ຮູ ໝູ່​ຂອງ​ໂຢບ​ວ່າ: “ເປັນ​ໄປ​ບໍ່​ໄດ້​ທີ່​ພະເຈົ້າ​ທ່ຽງແທ້​ຈະ​ເຮັດ​ຊົ່ວ ແລະ​ບໍ່​ມີ​ທາງ​ທີ່​ຜູ້​ມີ​ລິດເດດ​ສູງ​ສຸດ​ຈະ​ເຮັດ​ຜິດ” —ໂຢບ 34:10, ລ.ມ.

ມື້​ໜຶ່ງ ເມື່ອ​ພະເຢຊູ​ຢູ່​ເມືອງ​ເຢຣູຊາເລັມ​ເພິ່ນ​ສອນ​ກ່ຽວກັບ​ພະເຢໂຫວາ​ພໍ່​ຂອງ​ເພິ່ນ ແລະ​ເປີດໂປງ​ຄຳສອນ​ຜິດໆຂອງ​ພວກ​ຫົວໜ້າ​ສາສະໜາ​ໃນ​ສະໄໝ​ນັ້ນ. (ໂຢຮັນ 8:12-30) ສິ່ງ​ທີ່​ເພິ່ນ​ເວົ້າ​ໃນ​ໂອກາດ​ນັ້ນ​ສອນ​ພວກ​ເຮົາ​ໃນ​ທຸກ​ມື້​ນີ້​ໃຫ້​ຮູ້​ວິທີ​ກວດ​ສອບ​ສິ່ງ​ທີ່​ຄົນ​ທົ່ວໄປ​ເຊື່ອ​ກ່ຽວກັບ​ພະເຈົ້າ. ພະເຢຊູ​ບອກ​ວ່າ: “ຖ້າ​ພວກເຈົ້າ​ເຮັດ​ຕາມ​ທີ່​ຂ້ອຍ​ສອນ​ສະເໝີ ພວກເຈົ້າ​ກໍ​ເປັນ​ລູກສິດ​ຂອງ​ຂ້ອຍ​ແທ້ໆ ແລະ​ພວກເຈົ້າ​ຈະ​ຮູ້ຈັກ​ຄວາມຈິງ ແລ້ວ​ຄວາມຈິງ​ຈະ​ເຮັດ​ໃຫ້​ພວກເຈົ້າ​ເປັນ​ອິດສະຫຼະ.”—ໂຢຮັນ 8: 31, 32

ຄຳ​ວ່າ “ເຮັດ​ຕາມ​ທີ່​ຂ້ອຍ​ສອນ​ສະເໝີ” ເປັນ​ກົດເກນ​ທີ່​ພະເຢຊູ​ໄດ້​ຕັ້ງ​ໄວ້​ເພື່ອ​ຊ່ວຍ​ເບິ່ງ​ໃຫ້​ອອກ​ວ່າ​ຄຳສອນ​ຂອງ​ສາສະໜາ​ຕ່າງໆ​ເປັນ “ຄວາມຈິງ” ຫຼື​ບໍ່. ເມື່ອ​ເຈົ້າ​ໄດ້​ຍິນ​ເລື່ອງ​ໃດ​ກໍ​ຕາມ​ກ່ຽວກັບ​ພະເຈົ້າ ໃຫ້​ເຈົ້າ​ຖາມ​ໂຕເອງ​ວ່າ ‘ເລື່ອງ​ນີ້​ສອດຄ່ອງ​ກັບ​ຄຳສອນ​ຂອງ​ພະເຢຊູ​ແລະ​ສ່ວນ​ອື່ນໆຂອງ​ພະຄຳພີ​ບໍລິສຸດ​ບໍ?’ ຂໍ​ໃຫ້​ຮຽນແບບ​ພວກ​ທີ່​ຮັບ​ຟັງ​ອັກຄະສາວົກ​ໂປໂລ ແລ້ວ “ສຶກສາ​ຄົ້ນຄວ້າ​ພະຄຳພີ​ຢ່າງ​ລະອຽດ​ທຸກ​ມື້​ເພື່ອ​ເບິ່ງ​ວ່າ​ສິ່ງ​ທີ່​ພວກ​ເຂົາ​ໄດ້​ຍິນ​ຈະ​ກົງ​ກັບ​ພະຄຳພີ​ຫຼື​ບໍ່.”—ກິດຈະການ 17:11

ມາໂຄ ໂຣຊາ ເຣມອນ ທີ່​ໄດ້​ເວົ້າ​ເຖິງ​ໃນ​ບົດ​ທຳອິດ ເຂົາເຈົ້າ​ໄດ້​ກວດ​ສອບ​ຄວາມເຊື່ອ​ຂອງ​ໂຕເອງ​ຢ່າງ​ລະອຽດ​ໂດຍ​ສຶກສາ​ຄົ້ນຄວ້າ​ຄຳພີໄບເບິນ​ກັບ​ພະຍານ​ພະເຢໂຫວາ. ແລ້ວ​ເຂົາເຈົ້າ​ໄດ້​ຫຍັງ​ແດ່?

ມາໂຄ: “ຄົນ​ທີ່​ສອນ​ຄຳພີໄບເບິນ​ໃຫ້​ຂ້ອຍ​ກັບ​ເມຍ​ກໍ​ໃຊ້​ຂໍ້​ຄຳພີ​ຕອບ​ທຸກໆຄຳຖາມ​ຂອງ​ພວກ​ເຮົາ. ພວກ​ເຮົາ​ກໍ​ເລີ່ມ​ຮັກ​ພະເຢໂຫວາ​ຫຼາຍ​ຂຶ້ນ ແລະ​ຂ້ອຍ​ກັບ​ເມຍ​ກໍ​ໃກ້ຊິດ​ກັນ​ຫຼາຍ​ຂຶ້ນ​ນຳ!”

ໂຣຊາ: “ໃນ​ຕອນ​ທຳອິດ ຂ້ອຍ​ຄິດ​ວ່າ​ຄຳພີໄບເບິນ​ເປັນ​ພຽງ​ແຕ່​ປຶ້ມ​ປັດຊະຍາ​ທີ່​ຄົນ​ໄດ້​ແຕ່ງ​ຂຶ້ນ​ມາ​ເພື່ອ​ລອງ​ອະທິບາຍ​ເລື່ອງ​ພະເຈົ້າ. ແຕ່​ຂ້ອຍ​ກໍ​ຄ່ອຍໆເຫັນ​ວ່າ​ຄຳພີໄບເບິນ​ຕອບ​ຂໍ້​ສົງໄສ​ຕ່າງໆ​ຂອງ​ຂ້ອຍ​ໄດ້. ດຽວ​ນີ້ ພະເຢໂຫວາ​ມີ​ແທ້​ສຳລັບ​ຂ້ອຍ. ເພິ່ນ​ເປັນ​ບຸກຄົນ​ທີ່​ຂ້ອຍ​ໄວ້​ວາງໃຈ.”

ເຣມອນ: “ຂ້ອຍ​ອະທິດຖານ​ຂໍ​ພະເຈົ້າ​ຊ່ວຍ​ຮູ້ຈັກ​ເພິ່ນ. ຈາກ​ນັ້ນ​ບໍ່​ດົນ ຂ້ອຍ​ກັບ​ຜົວ​ກໍ​ເລີ່ມ​ຮຽນ​ຄຳພີໄບເບິນ. ໃນທີ່ສຸດ ພວກ​ເຮົາ​ກໍ​ໄດ້​ຮຽນຮູ້​ຄວາມຈິງ​ກ່ຽວກັບ​ພະເຢໂຫວາ! ພວກ​ເຮົາ​ມີ​ຄວາມສຸກ​ຫຼາຍ​ທີ່​ໄດ້​ເຂົ້າໃຈ​ວ່າ​ພະເຈົ້າ​ເປັນ​ບຸກຄົນ​ແບບ​ໃດ​ແທ້.”

ຄຳພີໄບເບິນ​ບໍ່​ພຽງ​ແຕ່​ເປີດໂປງ​ຄຳ​ຕົວະ​ກ່ຽວກັບ​ພະເຈົ້າ ແຕ່​ຍັງ​ເປີດເຜີຍ​ຄວາມຈິງ​ກ່ຽວກັບ​ຄຸນລັກສະນະ​ທີ່​ງົດງາມ​ຂອງ​ເພິ່ນ. ພະເຈົ້າ​ເອງ​ເປັນ​ຜູ້​ດົນ​ໃຈ​ໃຫ້​ຂຽນ​ຄຳພີໄບເບິນ ເຊິ່ງ​ຊ່ວຍ​ພວກ​ເຮົາ​ໃຫ້ “ຮູ້ຈັກ​ສິ່ງ​ຕ່າງໆ​ທີ່​ພະເຈົ້າ​ໃຫ້​ແກ່​ພວກ​ເຮົາ​ດ້ວຍ​ຄວາມ​ຮັກ.” (1 ໂກຣິນໂທ 2:12) ເຈົ້າ​ຢາກ​ລອງ​ເບິ່ງ​ໂດຍ​ໂຕເອງ​ບໍ​ວ່າ​ຄຳພີໄບເບິນ​ຕອບ​ຄຳຖາມ​ທີ່​ສຳຄັນ​ກ່ຽວກັບ​ພະເຈົ້າ ຈຸດປະສົງ​ຂອງ​ເພິ່ນ ແລະ​ຊີວິດ​ຂ້າງ​ໜ້າ​ແນວໃດ? ລອງ​ອ່ານ​ຄຳຕອບ​ບາງ​ຂໍ້​ຈາກ​ເວັບໄຊ www.pr2711.com ໄປ​ທີ່​ຫົວ​ຂໍ້ “ຄຳສອນ​ໃນ​ຄຳພີໄບເບິນ >ຖາມ-ຕອບ​ເລື່ອງ​ຄຳພີໄບເບິນ.” ນອກຈາກນັ້ນ ເຈົ້າ​ຍັງ​ສາມາດ​ຂໍ​ຮຽນ​ຄຳພີໄບເບິນ​ໄດ້​ໃນ​ເວັບໄຊ​ນັ້ນ​ຫຼື​ບອກ​ກັບ​ພະຍານ​ພະເຢໂຫວາ​ຄົນ​ໃດ​ກໍ​ໄດ້. ພວກ​ເຮົາ​ໝັ້ນໃຈ​ວ່າ​ຖ້າ​ເຈົ້າ​ໄດ້​ລອງ ເຈົ້າ​ຈະ​ຮັກ​ພະເຈົ້າ​ໄດ້​ບໍ່​ຍາກ​ແບບ​ທີ່​ອາດຈະ​ເຄີຍ​ຄິດ​ມາ​ກ່ອນ.