ຄຳສອນໃນຄຳພີໄບເບິນ—ຄວາມຮູ້ທີ່ບໍ່ເຄີຍຫຼ້າສະໄໝ
ລອງນຶກພາບວ່າ: ເຈົ້າໄປທ່ຽວຫໍພິພິທະພັນທີ່ມີຮູບປັ້ນເກົ່າແກ່ຢູ່ຫຼາຍອັນ. ຮູບປັ້ນສ່ວນຫຼາຍຢູ່ໃນສະພາບທີ່ຊຸດໂຊມ ສີຈືດ ແລະແຕກຫັກ. ບາງອັນຢູ່ໃນສະພາບທີ່ບໍ່ສົມບູນ. ແຕ່ມີອັນໜຶ່ງທີ່ໂດດເດັ່ນຫຼາຍ ເພາະແມ່ນແຕ່ລາຍລະອຽດເລັກໆນ້ອຍໆກໍຍັງຢູ່ຄົບທຸກສ່ວນ. ເຈົ້າຖາມຄົນນຳທ່ຽວວ່າ “ຮູບປັ້ນນີ້ໃໝ່ກວ່າອັນອື່ນບໍ?” ລາວຕອບວ່າ “ບໍ່ ແທ້ໆແລ້ວອັນນີ້ເກົ່າແກ່ກວ່າຮູບປັ້ນສ່ວນຫຼາຍອີກ ແລະບໍ່ເຄີຍໄດ້ຮັບການບູລະນະເລີຍ.” ເຈົ້າເລີຍເວົ້າວ່າ “ຮູບປັ້ນນີ້ຄືຊິຖືກຮັກສາດີເນາະ.” ຄົນນຳທ່ຽວບອກວ່າ “ບໍ່ແມ່ນດອກ ແທ້ໆແລ້ວມັນຜ່ານລົມຜ່ານຝົນທີ່ຮຸນແຮງມາດົນຫຼາຍ. ແລະຫຼາຍຄົນກໍພະຍາຍາມທຳລາຍມັນນຳອີກ.” ຕອນນີ້ເຈົ້າອາດເລີ່ມສົງໄສວ່າ ‘ຮູບປັ້ນນີ້ເຮັດມາຈາກຫຍັງ?’
ທີ່ຈິງ ຄຳພີໄບເບິນກໍຄືກັບຮູບປັ້ນທີ່ໂດດເດັ່ນນັ້ນ. ຄຳພີໄບເບິນເປັນປຶ້ມທີ່ເກົ່າແກ່ຫຼາຍເມື່ອທຽບກັບປຶ້ມຫົວອື່ນໆ. ແນ່ນອນ ມີປຶ້ມເກົ່າແກ່ອື່ນໆອີກຫຼາຍຫົວ. ແຕ່ກໍຄືກັບຮູບປັ້ນເກົ່າແກ່ທີ່ຊຸດໂຊມ ປຶ້ມເຫຼົ່ານັ້ນກໍມີຂໍ້ບົກພ່ອງຫຼາຍຢ່າງເມື່ອເວລາຜ່ານໄປ. ຕົວຢ່າງເຊັ່ນ ປຶ້ມທີ່ເວົ້າເຖິງເລື່ອງວິທະຍາສາດກໍຂັດແຍ່ງກັບຄວາມຮູ້ໃໝ່ທີ່ຖືກຄົ້ນພົບແລະຖືກພິສູດແລ້ວວ່າຖືກຕ້ອງ. ຫຼາຍເທື່ອເບິ່ງຄືວ່າຄຳແນະນຳທາງການແພດຈະເຮັດໃຫ້ເກີດອັນຕະລາຍຫຼາຍກວ່າຊ່ວຍປິ່ນປົວ. ແລະປຶ້ມເກົ່າແກ່ຫຼາຍຫົວກໍຍັງເຫຼືອພຽງບາງສ່ວນເທົ່ານັ້ນ ເພາະບາງສ່ວນໄດ້ຮັບຄວາມເສຍຫາຍຫຼາຍຫຼືບໍ່ກໍສູນຫາຍໄປ.
ຄຳພີໄບເບິນໂດດເດັ່ນຕ່າງຈາກປຶ້ມອື່ນໆຫຼາຍ. ຄຳພີໄບເບິນຖືກຂຽນມາດົນກວ່າ 3.500 ປີແລ້ວ ແຕ່ກໍຍັງຢູ່ໃນສະພາບສົມບູນ. ເຖິງວ່າຈະມີການພະຍາຍາມຫຼາຍຄັ້ງທີ່ຈະທຳລາຍຄຳພີໄບເບິນຕະຫຼອດຫຼາຍຮ້ອຍປີທີ່ຜ່ານມາ ບໍ່ວ່າຈະເປັນການຈູດ ສັ່ງຫ້າມ ແລະດູຖູກ ແຕ່ຂໍ້ຄວາມໃນນັ້ນກໍຍັງຢູ່ລອດມາຮອດທຸກມື້ນີ້. ນອກຈາກນັ້ນ ຄວາມຮູ້ໃໝ່ໆໃນທຸກມື້ນີ້ບໍ່ໄດ້ເຮັດໃຫ້ຄຳພີໄບເບິນຫຼ້າສະໄໝເລີຍ ແທ້ໆແລ້ວຄຳພີໄບເບິນມີຂໍ້ມູນຫຼາຍຢ່າງທີ່ເຮັດໃຫ້ເຫັນວ່າເປັນປຶ້ມທີ່ລ້ຳສະໄໝດ້ວຍຊ້ຳ.—ເບິ່ງຂອບ “ຫຼ້າສະໄໝຫຼືລ້ຳສະໄໝ?”
ຄຳສອນທີ່ດີສຳຫຼັບຊີວິດ
ເຈົ້າອາດສົງໄສວ່າ ‘ຄຳສອນຕ່າງໆໃນຄຳພີໄບເບິນຍັງໃຊ້ໄດ້ແທ້ໃນທຸກມື້ນີ້ບໍ?’ ເພື່ອຈະຕອບຄຳຖາມນີ້ ຂໍໃຫ້ເຈົ້າຄິດເບິ່ງວ່າ: ‘ບັນຫາໃຫຍ່ທີ່ສຸດທີ່ເຮົາກຳລັງເຈິໃນທຸກມື້ນີ້ແມ່ນຫຍັງ? ແລະບັນຫາໃດທີ່ເປັນຕາຢ້ານທີ່ສຸດ?’ ເຈົ້າອາດຄິດເຖິງສົງຄາມ ມົນລະພິດ ອາດຊະຍາກຳ ຫຼືການສໍ້ໂກງ. ຕອນນີ້ໃຫ້ເຮົາມາເບິ່ງຄຳສອນບາງຢ່າງໃນຄຳພີໃບໄບເບິນ. ຕອນທີ່ເບິ່ງ ໃຫ້ຖາມໂຕເອງວ່າ ‘ຖ້າທຸກຄົນເຮັດຕາມຄຳສອນເຫຼົ່ານີ້ ໂລກຈະເປັນຕາຢູ່ຂຶ້ນບໍ?’
ຮັກສັນຕິສຸກ
“ຄົນທີ່ສ້າງສັນຕິກໍມີຄວາມສຸກ ຍ້ອນພວກເຂົາຈະຖືກເອີ້ນວ່າເປັນລູກຂອງພະເຈົ້າ.” (ມັດທາຍ 5:9) “ໃຫ້ພວກເຈົ້າພະຍາຍາມເຕັມທີທີ່ຈະຢູ່ຢ່າງສະຫງົບສຸກກັບທຸກຄົນ.”—ໂຣມ 12:18
ເມດຕາແລະໃຫ້ອະໄພ
“ຄົນທີ່ເມດຕາກໍມີຄວາມສຸກ ຍ້ອນພວກເຂົາຈະໄດ້ຮັບຄວາມເມດຕາ.” (ມັດທາຍ 5:7) “ແຕ່ຖ້າຜູ້ໃດມີສາເຫດຈະຈົ່ມໃຫ້ຄົນອື່ນ ກໍຂໍໃຫ້ອົດທົນຕໍ່ກັນແລະກັນ ແລະໃຫ້ອະໄພກັນຢ່າງໃຈກວ້າງຕໍ່ໄປ. ພວກເຈົ້າຕ້ອງເຕັມໃຈໃຫ້ອະໄພກັນຄືກັບທີ່ພະເຢໂຫວາaເຕັມໃຈໃຫ້ອະໄພພວກເຈົ້າ.”—ໂກໂລຊາຍ 3:13
ບໍ່ແບ່ງແຍກເຊື້ອຊາດ
ພະເຈົ້າ “ສ້າງຄົນທຸກຊາດຈາກຄົນໆດຽວໃຫ້ຢູ່ທົ່ວໂລກ.” (ກິດຈະການ 17:26) “ພະເຈົ້າບໍ່ລຳອຽງ ພະອົງຍອມຮັບທຸກຄົນທີ່ຢຳເກງພະອົງແລະເຮັດສິ່ງທີ່ຖືກຕ້ອງ ບໍ່ວ່າລາວຈະເປັນຄົນຊາດໃດກໍຕາມ.”—ກິດຈະການ 10:34, 35
ຮັກສິ່ງແວດລ້ອມ
“ພະເຢໂຫວາພະເຈົ້າໃຫ້ມະນຸດຄົນນັ້ນຢູ່ໃນສວນເອເດນ ໃຫ້ລາວເພາະປູກແລະເບິ່ງແຍງສວນ.” (ຕົ້ນເດີມ 2:15, ລ.ມ.) ພະເຈົ້າຈະ “ທຳລາຍຜູ້ຄົນທີ່ທຳລາຍໂລກນີ້.”—ພະນິມິດ 11:18
ກຽດຊັງຄວາມໂລບແລະການຜິດສິນລະທຳທາງເພດ
“ຢ່າເປັນຄົນໂລບ ເພາະເຖິງແມ່ນວ່າຄົນຜູ້ໜຶ່ງມີຊັບສົມບັດຢ່າງຫຼວງຫຼາຍ ແຕ່ມັນກໍໃຫ້ຊີວິດລາວບໍ່ໄດ້.” (ລູກາ 12:15) “ຢ່າເວົ້າລົມກັນໃນເລື່ອງເຫຼົ່ານີ້ເລີຍ ນັ້ນຄື ການເຮັດຜິດສິນລະທຳທາງເພດ ການກະທຳທີ່ບໍ່ສະອາດທຸກຮູບແບບ ຫຼືຄວາມໂລບ ເພາະມັນບໍ່ເໝາະສົມກັບຄົນບໍລິສຸດ.”—ເອເຟໂຊ 5:3
ສັດຊື່ແລະດຸໝັ່ນເຮັດວຽກ
“ພວກເຮົາຕັ້ງໃຈຈະປະພຶດຕົວສັດຊື່ໃນທຸກເລື່ອງ.” (ເຮັບເຣີ 13:18) “ຄົນທີ່ລັກກໍໃຫ້ເຊົາລັກ ແລະໃຫ້ປ່ຽນມາເຮັດວຽກທີ່ສຸດຈະລິດດ້ວຍຄວາມດຸໝັ່ນ.”—ເອເຟໂຊ 4:28
ຊ່ວຍເຫຼືອຄົນທີ່ລຳບາກ
“ເວົ້າປອບໃຈຄົນທີ່ຊຶມເສົ້າ ຊ່ວຍເຫຼືອຄົນທີ່ອ່ອນແອ ແລະອົດກັ້ນກັບທຸກຄົນ.” (1 ເທຊະໂລນິກ 5:14) “ເບິ່ງແຍງລູກກຳພ້າກັບແມ່ໝ້າຍທີ່ມີຄວາມທຸກລຳບາກ.”—ຢາໂກໂບ 1:27
ຄຳພີໄບເບິນບໍ່ໄດ້ມີແຕ່ຄຳສອນດີໆເທົ່ານັ້ນ ແຕ່ຍັງບອກນຳວ່າເຮົາຈະເຮັດຕາມຄຳສອນເຫຼົ່ານີ້ໃນຊີວິດປະຈຳວັນໄດ້ແນວໃດ. ຖ້າຫຼາຍຄົນເຮັດຕາມຄຳສອນທີ່ເວົ້າມານີ້ ບັນຫາຕ່າງໆໃນໂລກກໍຄືຊິຫຼຸດລົງຫຼາຍແມ່ນບໍ? ຄຳສອນໃນຄຳພີໄບເບິນໃຊ້ໄດ້ກັບສະໄໝຂອງເຮົາແທ້ໆ! ຄັນຊັ້ນ ຄຳສອນໃນຄຳພີໄບເບິນເປັນປະໂຫຍດຕໍ່ເຈົ້າແນວໃດໃນຕອນນີ້?
ຄຳສອນໃນຄຳພີໄບເບິນເປັນປະໂຫຍດຕໍ່ເຈົ້າໃນຕອນນີ້
ຊາຍທີ່ສະຫຼາດທີ່ສຸດບອກໄວ້ວ່າ: “ສະຕິປັນຍາກໍເຫັນໄດ້ຈາກຜົນຂອງມັນ.” (ມັດທາຍ 11:19) ເຈົ້າເຫັນດີບໍ? ເຮົາຈະຮູ້ວ່າສະຕິປັນຍາຫຼືຄຳສອນໃດເປັນປະໂຫຍດ ກໍຕໍ່ເມື່ອເຮົາເຫັນຜົນດີຈາກການເຮັດຕາມຄຳສອນນັ້ນ. ເຈົ້າອາດຄິດແບບນີ້: ‘ຖ້າຄຳສອນໃນຄຳພີໄບເບິນດີແທ້ ກໍຄືຊິຊ່ວຍໃຫ້ຊີວິດຂ້ອຍດີຂຶ້ນ ແລະຊ່ວຍໃຫ້ຂ້ອຍແກ້ບັນຫາທີ່ເຈິຢູ່ໃນຕອນນີ້ໄດ້.’ ໃຫ້ເຮົາມາເບິ່ງຕົວຢ່າງໜຶ່ງນຳກັນ.
ຜູ້ຍິງຄົນໜຶ່ງຊື່ເດວຟີນbເຄີຍມີຊີວິດທີ່ຫຍຸ້ງຫຼາຍເພາະລາວເຮັດຫຼາຍຢ່າງ ແລະລາວກໍມີຄວາມສຸກກັບສິ່ງທີ່ເຮັດ. ແຕ່ຢູ່ບໍ່ຢູ່ລາວກໍເຈິກັບການສູນເສຍ. ລູກສາວໄວລຸ້ນຂອງລາວຕາຍ. ຊີວິດຄູ່ພັງທະລາຍ. ມີບັນຫາເລື່ອງເງິນ. ລາວບອກວ່າ: “ຊີວິດຂ້ອຍບໍ່ເຫຼືອຫຍັງເລີຍ ບໍ່ມີລູກ ບໍ່ມີຜົວ ບໍ່ມີເຮືອນ. ຂ້ອຍຮູ້ສຶກບໍ່ມີຄ່າ ໝົດແຮງ ໝົດຫວັງກັບຊີວິດ ຈັກຊິຢູ່ໄປເຮັດຫຍັງ.”
ນີ້ເຮັດໃຫ້ເດວຟີນໄດ້ເຂົ້າໃຈຄວາມຈິງຂອງຂໍ້ຄຳພີທີ່ວ່າ: “ຊ່ວງຊີວິດຂອງພວກເຮົາມີພຽງ 70 ປີ ຖ້າແຂງແຮງຫຼາຍກໍຢູ່ໄດ້ຮອດ 80 ປີ ແຕ່ຊີວິດກໍເຕັມໄປດ້ວຍຄວາມລຳບາກແລະຄວາມທຸກ ຊີວິດຜ່ານໄປໄວຫຼາຍ ແລ້ວພວກເຮົາກໍຈາກໄປ.”—ຄຳເພງ 90:10, ລ.ມ.
ຕອນທີ່ເຈິບັນຫາ ເດວຟີນເຮັດຕາມຄຳສອນໃນຄຳພີໄບເບິນ. ນັ້ນຊ່ວຍລາວໄດ້ແທ້ໆ. ສາມບົດຄວາມຕໍ່ຈາກນີ້ເຮົາຈະໄດ້ເຫັນວ່າ ຄຳພີໄບເບິນຊ່ວຍຫຼາຍຄົນໃຫ້ຈັດການກັບບັນຫາໄດ້ເມື່ອເຂົາເຈົ້າເຮັດຕາມຄຳແນະນຳໃນນັ້ນ. ເຂົາເຈົ້າຮູ້ສຶກວ່າຄຳພີໄບເບິນເປັນຄືກັບຮູບປັ້ນທີ່ໂດດເດັ່ນທີ່ເຮົາເວົ້າເຖິງໃນຕອນທຳອິດ. ຄຳພີໄບເບິນບໍ່ຄືປຶ້ມຫຼາຍຫົວເຊິ່ງໃນທີ່ສຸດກໍເກົ່າແລະຫຼ້າສະໄໝ. ເປັນຫຍັງຄຳພີໄບເບິນຈຶ່ງພິເສດກວ່າປຶ້ມຫົວອື່ນໆ? ຫຼືແທ້ໆແລ້ວຄຳພີໄບເບິນມາຈາກຄວາມຄິດຂອງພະເຈົ້າ ບໍ່ແມ່ນຄວາມຄິດຂອງມະນຸດ?—1 ເທຊະໂລນິກ 2:13
ບາງເທື່ອເຈົ້າອາດຈະເຄີຍຮູ້ສຶກວ່າຊີວິດຂອງເຮົາສັ້ນແລະມີແຕ່ບັນຫາ. ເມື່ອເຈິບັນຫາຫຍຸ້ງຍາກຫຼາຍຢ່າງ ເຈົ້າຈະຫາຄຳແນະນຳທີ່ໃຊ້ໄດ້ແທ້ເພື່ອຊ່ວຍແກ້ບັນຫາ ແລະເຮັດໃຫ້ມີກຳລັງໃຈໄດ້ຈາກໃສ?
ໃຫ້ເຮົາມາເບິ່ງ 3 ວິທີທີ່ໃຊ້ໄດ້ແທ້ຈາກຄຳພີໄບເບິນທີ່ຊ່ວຍໃຫ້ເຮົາຮູ້ວ່າຄວນເຮັດແນວໃດເມື່ອເຈິບັນຫາ. ວິທີເຫຼົ່ານັ້ນຈະຊ່ວຍເຈົ້າໃຫ້:
ຫຼີກລ່ຽງບັນຫາຫຼາຍຢ່າງໃນຊີວິດ
ແກ້ໄຂບັນຫາທີ່ເກີດຂຶ້ນ
ອົດທົນກັບສະພາບການທີ່ເຈົ້າບໍ່ສາມາດແກ້ໄຂໄດ້
ບົດຄວາມຕໍ່ໆໄປຈະເວົ້າເຖິງ 3 ວິທີນີ້.
a ເຢໂຫວາແມ່ນຊື່ຂອງພະເຈົ້າທີ່ບອກໄວ້ໃນຄຳພີໄບເບິນ.—ຄຳເພງ 83:18
b ຊື່ໃນບົດຄວາມນີ້ແລະບົດຄວາມອື່ນໆເປັນຊື່ສົມມຸດ.