ຜູ້ອ່ານຢາກຮູ້ . . .
ໃຜສ້າງພະເຈົ້າ?
ລອງນຶກພາບພໍ່ຄົນໜຶ່ງທີ່ກຳລັງລົມກັບລູກຊາຍອາຍຸ 7 ປີ. ພໍ່ບອກວ່າ “ດົນນານມາແລ້ວ ພະເຈົ້າສ້າງໂລກແລະທຸກສິ່ງທີ່ຢູ່ເທິງໂລກ ເພິ່ນສ້າງດວງຕາເວັນ ດວງຈັນ ແລະດວງດາວຕ່າງໆ.” ລູກຊາຍຄິດຢູ່ບຶດໜຶ່ງກ່ອນຈະຖາມພໍ່ວ່າ “ພໍ່ ແລ້ວແມ່ນໃຜສ້າງພະເຈົ້າ?”
ພໍ່ຕອບວ່າ “ບໍ່ມີໃຜສ້າງພະເຈົ້າ ເພິ່ນມີຊີວິດຢູ່ຕະຫຼອດມາ.” ຄຳຕອບງ່າຍໆແບບນີ້ຄືຊິເຮັດໃຫ້ເດັກນ້ອຍອາຍຸ 7 ປີເຊົາສົງໄສໄດ້. ແຕ່ເມື່ອລາວໃຫຍ່ຂຶ້ນ ຄຳຖາມນີ້ກໍຍັງຄາໃຈລາວຢູ່ ຍ້ອນລາວຄິດວ່າຈະເປັນໄປໄດ້ແນວໃດທີ່ຜູ້ໃດຜູ້ໜຶ່ງຈະມີຊີວິດຢູ່ໂດຍບໍ່ມີຈຸດເລີ່ມຕົ້ນ. ລາວສົງໄສວ່າ ແມ່ນແຕ່ເອກະພົບກໍຍັງມີຈຸດເລີ່ມຕົ້ນ ແລ້ວ ‘ພະເຈົ້າເດມາຈາກໃສ?’
ຄຳພີໄບເບິນຕອບຄຳຖາມນີ້ແນວໃດ? ແທ້ໆແລ້ວ ກໍຄ້າຍຄືກັບຄຳຕອບຂອງພໍ່ໃນຕົວຢ່າງນີ້. ຜູ້ຂຽນຄຳພີໄບເບິນທີ່ຊື່ໂມເຊຂຽນວ່າ: “ພະເຢໂຫວາ . . . ກ່ອນພູເຂົາຈະເກີດ ກ່ອນພະອົງຈະສ້າງໂລກແລະແຜ່ນດິນທີ່ອຸດົມສົມບູນ ພະອົງເປັນພະເຈົ້າຕັ້ງແຕ່ອະດີດຈົນເຖິງຕະຫຼອດການ.” (ຄຳເພງ 90:1, 2, ລ.ມ.) ເອຊາຢາຜູ້ສົ່ງຂ່າວຂອງພະເຈົ້າກໍເວົ້າແບບດຽວກັນວ່າ: “ພວກເຈົ້າບໍ່ຮູ້ແລະບໍ່ເຄີຍໄດ້ຍິນບໍ? ພະເຢໂຫວາຜູ້ສ້າງທຸກສິ່ງເທິງໂລກເປັນພະເຈົ້າທີ່ມີຊີວິດຢູ່ຕະຫຼອດໄປ”! (ເອຊາອີ 40:28, ລ.ມ.) ຈົດໝາຍຂອງຢູດາກໍເວົ້າເຖິງພະເຈົ້າທີ່ມີຊີວິດຢູ່ “ຕະຫຼອດທຸກຍຸກທຸກສະໄໝ” ນຳ.—ຢູດາ 25
ຂໍ້ຄຳພີເຫຼົ່ານັ້ນເຮັດໃຫ້ນຶກເຖິງຄຳເວົ້າຂອງອັກຄະສາວົກໂປໂລທີ່ບອກວ່າ ພະເຈົ້າ “ຜູ້ເປັນກະສັດຕະຫຼອດໄປ.” (1 ຕີໂມທຽວ 1:17) ນີ້ໝາຍຄວາມວ່າ ບໍ່ວ່າເຮົາຈະເບິ່ງຍ້ອນກັບໄປໄກສ່ຳໃດ ພະເຈົ້າກໍມີຊີວິດຢູ່ຕະຫຼອດມາ ແລະເພິ່ນກໍຈະມີຊີວິດຢູ່ຕະຫຼອດໄປໃນອະນາຄົດ. (ພະນິມິດ 1:8) ດັ່ງນັ້ນ ການທີ່ພະເຈົ້າມີຊີວິດຢູ່ຕະຫຼອດການເປັນຫຼັກຖານທີ່ສະແດງເຖິງອຳນາດທີ່ຍິ່ງໃຫຍ່ຂອງເພິ່ນ.
ເປັນຫຍັງເຮົາຈຶ່ງຮູ້ສຶກວ່າເລື່ອງນີ້ເຂົ້າໃຈຍາກ? ເພາະຊ່ວງຊີວິດທີ່ແສນສັ້ນຂອງເຮົາເຮັດໃຫ້ເຮົາມີຄວາມຄິດເລື່ອງເວລາຕ່າງຈາກພະເຢໂຫວາຫຼາຍແທ້ໆ. ເນື່ອງຈາກພະເຈົ້າມີຊີວິດຢູ່ຕະຫຼອດການ ພັນປີກໍເປັນຄືກັບມື້ດຽວສຳລັບເພິ່ນ. (2 ເປໂຕ 3:8) ເພື່ອເປັນຕົວຢ່າງ: ເຈົ້າຄິດວ່າຕັກແຕນທີ່ໃຫຍ່ເຕັມໄວເຊິ່ງມີຊ່ວງຊີວິດປະມານ 50 ມື້ ຈະເຂົ້າໃຈບໍວ່າຊ່ວງຊີວິດຂອງມະນຸດທີ່ດົນເຖິງ 70 ຫຼື 80 ປີເປັນແນວໃດ? ຄືຊິບໍ່ເຂົ້າໃຈດອກ! ຄຳພີໄບເບິນບອກວ່າ ເຮົາກໍເປັນຄືກັບຕັກແຕນຖ້າທຽບກັບພະຜູ້ສ້າງອົງຍິ່ງໃຫຍ່. ຄວາມສາມາດໃນການຄິດຫາເຫດຜົນຂອງເຮົາກໍແຫ່ງມີໜ້ອຍຫຼາຍເມື່ອທຽບກັບພະເຈົ້າ. (ເອຊາອີ 40:22; 55:8, 9) ດັ່ງນັ້ນ ຈຶ່ງບໍ່ແປກເລີຍທີ່ມະນຸດຈະບໍ່ເຂົ້າໃຈບາງເລື່ອງກ່ຽວກັບພະເຢໂຫວາ.
ເຖິງວ່າຄວາມຄິດທີ່ວ່າພະເຈົ້າມີຊີວິດຢູ່ຕະຫຼອດການບໍ່ມີເກີດບໍ່ມີຕາຍອາດເປັນເລື່ອງທີ່ເຂົ້າໃຈຍາກ ແຕ່ເຮົາກໍຮູ້ວ່າມີເຫດຜົນທີ່ເປັນໄປໄດ້. ເພາະຖ້າມີໃຜສ້າງພະເຈົ້າ ເຮົາກໍຄືຊິເອີ້ນເພິ່ນວ່າພະຜູ້ສ້າງບໍ່ໄດ້. ແຕ່ຄຳພີໄບເບິນອະທິບາຍວ່າ ພະເຢໂຫວາເປັນຜູ້ທີ່ “ສ້າງທຸກສິ່ງ.” (ພະນິມິດ 4:11) ນອກຈາກນັ້ນ ເຮົາຮູ້ວ່າເປັນເວລາດົນກ່ອນໜ້ານີ້ບໍ່ເຄີຍມີເອກະພົບ. (ຕົ້ນເດີມ 1:1, 2) ແລ້ວເອກະພົບມາຈາກໃສ? ຜູ້ສ້າງເອກະພົບກໍຕ້ອງມີຊີວິດຢູ່ກ່ອນທີ່ຈະສ້າງມັນຂຶ້ນມາ. ພະເຈົ້າມີຊີວິດຢູ່ກ່ອນສິ່ງມີຊີວິດທີ່ມີສະຕິປັນຍາທັງໝົດເຊັ່ນ ລູກຊາຍຄົນດຽວຂອງເພິ່ນແລະທູດສະຫວັນອົງອື່ນໆ. (ໂຢບ 38:4, 7; ໂກໂລຊາຍ 1:15) ເຫັນໄດ້ແຈ້ງວ່າ ກ່ອນໜ້ານັ້ນມີພະເຈົ້າຜູ້ດຽວທີ່ມີຊີວິດຢູ່. ພະເຈົ້າບໍ່ໄດ້ຖືກສ້າງຂຶ້ນມາ ແລະບໍ່ມີອັນໃດຫຼືສິ່ງໃດມີຊີວິດຢູ່ກ່ອນເພິ່ນ.
ຫຼັກຖານທີ່ພິສູດວ່າພະເຈົ້າທີ່ມີຊີວິດຢູ່ຕະຫຼອດການມີແທ້ ກໍຄືເອກະພົບແລະມະນຸດທີ່ຢູ່ເທິງໂລກ. ພະເຈົ້າຕ້ອງມີຊີວິດຢູ່ກ່ອນ ຈຶ່ງຈະເຮັດໃຫ້ເອກະພົບທີ່ກວ້າງໃຫຍ່ເຄື່ອນໄຫວໄດ້ແລະຕັ້ງກົດຕ່າງໆເພື່ອຄວບຄຸມມັນ. ການທີ່ພະເຈົ້າມີຊີວິດຢູ່ຕະຫຼອດໂດຍບໍ່ມີຈຸດເລີ່ມຕົ້ນເປັນເຫດຜົນດຽວທີ່ເຮັດໃຫ້ເພິ່ນສາມາດໃຫ້ຊີວິດກັບສິ່ງອື່ນໆໄດ້.—ໂຢບ 33:4