ຫ້ອງສະໝຸດອອນລາຍຂອງວັອດສ໌ທາວເວີ້

ເລື່ອງນີ້ສຳຄັນບໍ?

ຫໍສັງເກດການ (ສາທາລະນະ)—2016 | ສະບັບທີ 4
- ຈາກປົກ | ຄຳພີໄບເບິນຢູ່ລອດມາເຖິງເຮົາໄດ້ແນວໃດ?
  
  ເລື່ອງນີ້ສຳຄັນບໍ?
  
  ຄຳພີໄບເບິນເປັນປຶ້ມທີ່ໂດດເດັ່ນທີ່ສຸດ. ບໍ່ມີປຶ້ມທາງສາສະໜາຫົວໃດຄືກັບຄຳພີໄບເບິນ ປຶ້ມນີ້ມີຜົນຕໍ່ຄວາມເຊື່ອຂອງຜູ້ຄົນຈຳນວນຫຼາຍມາດົນແລ້ວ. ໃນອີກດ້ານໜຶ່ງ ບໍ່ມີປຶ້ມຫົວໃດທີ່ເຮັດໃຫ້ຜູ້ຄົນວິພາກວິຈານແລະຢາກກວດສອບຫຼາຍເທົ່າກັບຄຳພີໄບເບິນ.
  
  ຕົວຢ່າງເຊັ່ນ ນັກວິຊາການບາງຄົນສົງໄສວ່າຄຳພີໄບເບິນທີ່ໃຊ້ໃນປັດຈຸບັນນີ້ກົງກັບສະບັບດັ້ງເດີມບໍ. ສາດສະດາຈານດ້ານການສຶກສາສາສະໜາຄົນໜຶ່ງບອກວ່າ “ເຮົາບໍ່ຄ່ອຍແນ່ໃຈວ່າສະບັບທີ່ເຮົາໃຊ້ຢູ່ໃນຕອນນີ້ກົງກັບສະບັບດັ້ງເດີມຫຼືບໍ່. ສຳເນົາຕ່າງໆທີ່ເຮົາມີຢູ່ກໍມີແຕ່ຂໍ້ຜິດພາດ ແລະສຳເນົາສ່ວນຫຼາຍກໍເຮັດຂຶ້ນຫຼາຍຮ້ອຍປີຫຼັງຈາກທີ່ມີການຂຽນສະບັບດັ້ງເດີມ ແລະເຫັນໄດ້ແຈ້ງວ່າມີຫຼາຍພັນບ່ອນທີ່ຕ່າງຈາກສະບັບດັ້ງເດີມ.”
  
  ບາງຄົນສົງໄສຄວາມຖືກຕ້ອງຂອງຄຳພີໄບເບິນກໍຍ້ອນພູມຫຼັງທາງສາສະໜາຂອງເຂົາເຈົ້າ. ຕົວຢ່າງເຊັ່ນ ຄອບຄົວຂອງໄຟຊານບໍ່ໄດ້ນັບຖືສາສະໜາຄລິດ ລາວຖືກສອນວ່າຄຳພີໄບເບິນເປັນປຶ້ມສັກສິດແຕ່ເນື້ອຫາໃນນັ້ນປ່ຽນໄປແລ້ວ. ລາວບອກວ່າ “ເມື່ອມີຄົນມາລົມກັບຂ້ອຍເລື່ອງຄຳພີໄບເບິນ ຂ້ອຍກໍຈະບໍ່ຄອຍເຊື່ອ ຍ້ອນຄຳພີໄບເບິນທີ່ເຂົາເຈົ້າມີມັນປ່ຽນໄປຈາກສະບັບດັ້ງເດີມແລ້ວ!”
  
  ການທີ່ເນື້ອຫາໃນຄຳພີໄບເບິນຈະກົງຫຼືບໍ່ກົງກັບຕົ້ນສະບັບເປັນເລື່ອງສຳຄັນແທ້ໆບໍ? ລອງຄິດເບິ່ງວ່າ: ເຈົ້າຈະໄວ້ໃຈຄຳສັນຍາຕ່າງໆເລື່ອງອະນາຄົດທີ່ໃຫ້ກຳລັງໃຈຈາກຄຳພີໄບເບິນໄດ້ບໍ ຖ້າເຈົ້າບໍ່ຮູ້ວ່າຄຳສັນຍາເຫຼົ່ານັ້ນມີຢູ່ໃນຂໍ້ຄວາມຕົ້ນສະບັບແທ້ຫຼືບໍ່? (ໂຣມ 15:4) ເຈົ້າຈະເອົາຫຼັກການຕ່າງໆໃນຄຳພີໄບເບິນມາຊ່ວຍໃນການຕັດສິນໃຈເລື່ອງສຳຄັນບໍ ເຊັ່ນ ເລື່ອງວຽກ ຄອບຄົວ ຫຼືການນະມັດສະການ ຖ້າຄຳພີໄບເບິນໃນປັດຈຸບັນມາຈາກສຳເນົາທີ່ກ່າຍຄືນໂດຍມະນຸດເຊິ່ງມີແຕ່ຂໍ້ຜິດພາດ?
  
  ເຖິງວ່າບໍ່ມີຄຳພີໄບເບິນຕົ້ນສະບັບເຫຼືອຢູ່ແລ້ວ ແຕ່ເຮົາກໍສາມາດຄົ້ນເບິ່ງສຳເນົາສະໄໝບູຮານຕ່າງໆ ລວມທັງສຳເນົາຕົ້ນສະບັບຂອງຄຳພີໄບເບິນຫຼາຍພັນສະບັບໄດ້. ສຳເນົາເຫຼົ່ານັ້ນລອດຈາກການຍ່ອຍສະຫຼາຍ ການຕໍ່ຕ້ານ ແລະການພະຍາຍາມປ່ຽນແປງຂໍ້ຄວາມໄດ້ແນວໃດ? ການທີ່ຄຳພີໄບເບິນຢູ່ລອດມາໄດ້ຊ່ວຍເຈົ້າແນວໃດໃຫ້ໝັ້ນໃຈໃນຄວາມຖືກຕ້ອງຂອງຄຳພີໄບເບິນທີ່ເຈົ້າມີຢູ່ໃນປັດຈຸບັນ? ລອງເບິ່ງຄຳຕອບສຳລັບຄຳຖາມເຫຼົ່ານີ້ໃນບົດຄວາມຕໍ່ໄປວ່າຄຳພີໄບເບິນຢູ່ລອດມາເຖິງເຮົາໄດ້ແນວໃດ.

ຄຳພີໄບເບິນລອດຈາກການຍ່ອຍສະຫຼາຍ

ຫໍສັງເກດການ (ສາທາລະນະ)—2016 | ສະບັບທີ 4
- ຈາກປົກ | ຄຳພີໄບເບິນຢູ່ລອດມາເຖິງເຮົາໄດ້ແນວໃດ?
  
  ຄຳພີໄບເບິນລອດຈາກການຍ່ອຍສະຫຼາຍ
  
  ສາເຫດທີ່ສ່ຽງ: ພາໄພຣັດແລະແຜ່ນໜັງເປັນວັດສະດຸຫຼັກທີ່ໃຊ້ຂຽນແລະເຮັດສຳເນົາຄຳພີໄບເບິນ.a (2 ຕີໂມທຽວ 4:13) ວັດສະດຸເຫຼົ່ານີ້ເຮັດໃຫ້ຄຳພີໄບເບິນສ່ຽງຕໍ່ການຖືກທຳລາຍໄດ້ແນວໃດ?
  
  ພາໄພຣັດຈີກຂາດໄດ້ງ່າຍ ປ່ຽນສີໄດ້ ແລະບອບບາງ. ຣິຊາດ ພາກິນສັນກັບສະຕີເວັນ ເຄວິກ ນັກເອຢິບວິທະຍາເວົ້າເຖິງພາໄພຣັດວ່າ “ແຜ່ນເຈ້ຍຈະຄ່ອຍໆຍ່ອຍສະຫຼາຍໄປເຫຼືອແຕ່ໂຄງເສັ້ນໃຍ ແລ້ວສຸດທ້າຍກໍເປັນຂີ້ຝຸ່ນ ເມື່ອຢູ່ໃນບ່ອນເກັບ ມ້ວນໜັງສືອາດຈະມີເຊື້ອລາແລະເປື່ອຍໄປຍ້ອນຄວາມຊຸ່ມ ແລະເມື່ອຖືກຝັງໄວ້ ມ້ວນໜັງສືກໍອາດຖືກໜູຫຼືໂຕແມງກັດກິນໂດຍສະເພາະມົດຂາວ.” ພາໄພຣັດບາງສະບັບ ຫຼັງຈາກຖືກຄົ້ນພົບແລ້ວກໍຈະເຈິກັບແສງແດດແລະຄວາມຊຸ່ມເຊິ່ງເຮັດໃຫ້ເກີດການຍ່ອຍສະຫຼາຍໄວຂຶ້ນ.
  
  ແຜ່ນໜັງຢູ່ໄດ້ດົນກວ່າພາໄພຣັດ ແຕ່ກໍຍ່ອຍສະຫຼາຍໄດ້ຖ້າເກັບໄວ້ບໍ່ດີຫຼືຖ້າເຈິອາກາດຮ້ອນຫຼືເຢັນເກີນໄປ ລວມທັງຄວາມຊຸ່ມ ຫຼືແສງສະຫວ່າງ.b ແມງໄມ້ມັກກິນແຜ່ນໜັງນຳ. ປຶ້ມເອເວີຣີເດໄຣທິງອິນເດິກຣາເອໂຄ-ໂຣມັນອີດສ໌ (Everyday Writing in the Graeco-Roman East) ຈຶ່ງບອກວ່າ “ສຳເນົາເກົ່າແກ່ບູຮານມັກບໍ່ຄ່ອຍຢູ່ລອດຈົນຮອດຕອນນີ້.” ຖ້າຄຳພີໄບເບິນຍ່ອຍສະຫຼາຍໄປ ຂ່າວສານທີ່ຢູ່ໃນນັ້ນກໍສູນຫາຍໄປນຳ.
  
  ຄຳພີໄບເບິນຢູ່ລອດມາໄດ້ແນວໃດ: ກົດໝາຍຂອງຄົນຢິວມີຂໍ້ກຳນົດໃຫ້ກະສັດທຸກຄົນ ‘ກ່າຍຄືນກົດໝາຍໃສ່ມ້ວນໜັງສືເພື່ອປະໂຫຍດຂອງໂຕເອງ’ ເຊິ່ງກໍຄືປຶ້ມຫ້າຫົວທຳອິດຂອງຄຳພີໄບເບິນ. (ພະບັນຍັດ 17:18, ລ.ມ.) ນອກຈາກນັ້ນ ຜູ້ກ່າຍຄືນທີ່ຊຳນານໄດ້ເຮັດສຳເນົາຄຳພີໄບເບິນໄວ້ເປັນຈຳນວນຫຼາຍ ຈົນເມື່ອເຖິງສະຕະວັດທຳອິດຂອງຄລິດຕະສັກກະຫຼາດ ມີການພົບສຳເນົາພະຄຳພີໃນບ່ອນປະຊຸມຂອງຄົນຢິວທົ່ວອິດສະຣາເອນຈົນເຖິງມາເກໂດເນຍ! (ລູກາ 4:16, 17; ກິດຈະການ 17:11) ສຳເນົາທີ່ເກົ່າແກ່ຫຼາຍຂອງຄຳພີໄບເບິນບາງສະບັບຢູ່ລອດມາຈົນຮອດປັດຈຸບັນໄດ້ແນວໃດ?
  
  ສຳເນົາທີ່ຮູ້ຈັກກັນດີແມ່ນມ້ວນໜັງສືທະເລຕາຍເຊິ່ງຢູ່ລອດມາໄດ້ຫຼາຍສະຕະວັດຍ້ອນເກັບໄວ້ໃນໄຫຫຼືກະບອກດິນໜຽວໃນຖ້ຳທີ່ມີສະພາບອາກາດແຫ້ງ.
  
  ຟີລິບ ດັບເບິນຢູ. ຄອມຝອດ ຜູ້ຊ່ຽວຊານດ້ານພະຄຳພີພາກພັນທະສັນຍາໃໝ່ບອກວ່າ “ເປັນທີ່ຮູ້ກັນວ່າຄົນຢິວຈະເກັບມ້ວນໜັງສືພະຄຳພີໄວ້ໃນໄຫຫຼືກະບອກດິນໜຽວເພື່ອເກັບຮັກສາໄວ້.” ຄລິດສະຕຽນກໍເຮັດຕາມທຳນຽມນັ້ນຄືກັນ. ດັ່ງນັ້ນ ມີການຄົ້ນພົບສຳເນົາຂອງຄຳພີໄບເບິນຍຸກຕົ້ນໆບາງສະບັບໃນກະບອກດິນໜຽວ ລວມທັງໃນຫ້ອງມືດໆແລະໃນຖ້ຳ ແລະໃນບ່ອນທີ່ແຫ້ງໆ.
  
  ຜົນກໍຄື: ຊິ້ນສ່ວນສຳເນົາພະຄຳພີຫຼາຍພັນສະບັບ ບາງອັນມີອາຍຸຫຼາຍກວ່າ 2.000 ປີຢູ່ລອດມາໄດ້ຈົນຮອດທຸກມື້ນີ້. ບໍ່ມີຂໍ້ຄວາມໃດໃນສະໄໝບູຮານທີ່ມີສຳເນົາເຫຼືອຢູ່ເປັນຈຳນວນຫຼາຍເທົ່າກັບຄຳພີໄບເບິນ.
  
  a ພາໄພຣັດແມ່ນວັດສະດຸທີ່ເຮັດມາຈາກພືດນ້ຳຊະນິດໜຶ່ງທີ່ຊື່ພາໄພຣັດ. ແຜ່ນໜັງເຮັດມາຈາກໜັງສັດ.
  
  b ຕົວຢ່າງເຊັ່ນ ບັນທຶກລາຍເຊັນຂອງເຈົ້າໜ້າທີ່ໃນຄຳຖະແຫຼງປະກາດເອກະລາດຂອງສະຫະລັດອາເມຣິກາທີ່ຂຽນໄວ້ເທິງແຜ່ນໜັງ ຫຼັງຈາກນັ້ນບໍ່ຮອດ 250 ປີກໍຈາງຫາຍໄປຈົນອ່ານບໍ່ອອກ.

ຄຳພີໄບເບິນລອດຈາກການຕໍ່ຕ້ານ

ຫໍສັງເກດການ (ສາທາລະນະ)—2016 | ສະບັບທີ 4
- ຈາກປົກ | ຄຳພີໄບເບິນຢູ່ລອດມາເຖິງເຮົາໄດ້ແນວໃດ?
  
  ຄຳພີໄບເບິນລອດຈາກການຕໍ່ຕ້ານ
  ສາເຫດທີ່ສ່ຽງ: ຜູ້ນຳທາງການເມືອງແລະສາສະໜາຫຼາຍຄົນເຮັດກົງກັນຂ້າມກັບສິ່ງທີ່ຄຳພີໄບເບິນບອກໄວ້. ເຂົາເຈົ້າມັກຈະໃຊ້ອຳນາດສັ່ງຫ້າມປະຊາຊົນບໍ່ໃຫ້ເປັນເຈົ້າຂອງ ຜະລິດ ຫຼືແປຄຳພີໄບເບິນ. ໃຫ້ເຮົາມາເບິ່ງ 2 ຕົວຢ່າງ:
  - ປະມານປີ 167 ກ່ອນ ຄ.ສ: ກະສັດທີ່ບັງຄັບຄົນຢິວໃຫ້ປ່ຽນມານັບຖືສາສະໜາກຣີກເຊິ່ງກໍຄືອັນທິໂອກຸດສ໌ ເອພິຟາເນສ໌ແຫ່ງລາຊະວົງເຊລູຊິດໄດ້ສັ່ງໃຫ້ທຳລາຍສຳເນົາຄຳພີໄບເບິນພາກພາສາເຮັບເຣີທັງໝົດ. ນັກປະຫວັດສາດຊື່ຮາຍຣິກ ເກຣດຊ໌ຂຽນໄວ້ວ່າ ເຈົ້າໜ້າທີ່ຂອງກະສັດອົງນີ້ “ຈີກແລະທຳລາຍມ້ວນໜັງສືກົດໝາຍຂອງໂມເຊໃນທຸກບ່ອນທີ່ພົບ ແລະຂ້າຄົນທີ່ຢາກໄດ້ຮັບກຳລັງໃຈແລະການປອບໂຍນຈາກການອ່ານໜັງສືນີ້.”
  - ຍຸກກາງ: ຜູ້ນຳສາສະໜາກາໂຕລິກບາງຄົນໃຈຮ້າຍຫຼາຍທີ່ສະມາຊິກປະກາດສິ່ງທີ່ຄຳພີໄບເບິນສອນແທນທີ່ຈະສອນຫຼັກຄຳສອນຂອງກາໂຕລິກ ໃຜກໍຕາມທີ່ມີຄຳພີໄບເບິນຫົວອື່ນນອກຈາກປຶ້ມຄຳເພງພາສາລາຕິນຈະຖືກເບິ່ງວ່າເປັນຄົນນອກຮີດ. ສະພາຄລິດຕະຈັກແຫ່ງໜຶ່ງສັ່ງຄົນຂອງເຂົາເຈົ້າໄປ “ຊອກຫາຄົນນອກຮີດໃຫ້ທົ່ວທຸກແຈທຸກມຸມຢ່າງຈິງຈັງ . . . ໃຫ້ຄົ້ນເຮືອນທຸກຫຼັງແລະຫ້ອງໃຕ້ດິນທຸກບ່ອນທີ່ໜ້າສົງໄສ . . . ເຮືອນຫຼັງໃດທີ່ມີຄົນນອກຮີດເຮືອນນັ້ນຈະຖືກທຳລາຍ.”
  ຖ້າສັດຕູຂອງຄຳພີໄບເບິນສາມາດທຳລາຍຄຳພີໄບເບິນໄດ້ສຳເລັດ ຂ່າວສານຂອງຄຳພີໄບເບິນກໍຈະສູນຫາຍໄປ.
  
  ຄຳພີໄບເບິນສະບັບພາສາອັງກິດຂອງວິນລຽມ ທິນເດວລອດມາໄດ້ທັງໆທີ່ມີການສັ່ງຫ້າມ ການຈູດຄຳພີໄບເບິນ ແລະການປະຫານທິນເດວໃນປີ 1536
  
  ຄຳພີໄບເບິນຢູ່ລອດມາໄດ້ແນວໃດ: ກະສັດອັນທິໂອກຸດສ໌ເລັງເປົ້າການກວາດລ້າງທີ່ອິດສະຣາເອນ ແຕ່ກໍມີຊຸມຊົນຄົນຢິວອີກຫຼາຍແຫ່ງຢູ່ໃນປະເທດອື່ນ. ທີ່ຈິງ ຜູ້ຊ່ຽວຊານຫຼາຍຄົນຄາດວ່າໃນສະຕະວັດທຳອິດຂອງຄລິດຕະສັກກະຫຼາດ ມີຄົນຢິວຫຼາຍກວ່າ 60 ເປີເຊັນອາໄສຢູ່ນອກອິດສະຣາເອນ. ໃນບ່ອນປະຊຸມຂອງຄົນຢິວຫຼາຍບ່ອນ ເຂົາເຈົ້າໄດ້ເກັບສຳເນົາພະຄຳພີໄວ້ຫຼາຍສະບັບ ເຊິ່ງເປັນສຳເນົາທີ່ຄົນລຸ້ນຕໍ່ມາໄດ້ໃຊ້ ລວມເຖິງຄລິດສະຕຽນນຳ.—ກິດຈະການ 15:21
  
  ຊ່ວງຍຸກກາງ ຄົນທີ່ຮັກຄຳພີໄບເບິນກ້າປະເຊີນໜ້າກັບການຂົ່ມເຫງ ເຂົາເຈົ້າຍັງແປແລະເຮັດສຳເນົາພະຄຳພີຕໍ່ໄປ. ເມື່ອເຖິງຊ່ວງກາງສະຕະວັດທີ 15 ມີການແປຫຼາຍສ່ວນຂອງຄຳພີໄບເບິນຫຼາຍເຖິງ 33 ພາສາ ກ່ອນທີ່ຈະມີການປະດິດແທ່ນພິມດ້ວຍຊ້ຳ. ຕໍ່ມາ ມີການແປແລະຜະລິດຄຳພີໄບເບິນຢ່າງຕໍ່ເນື່ອງແບບທີ່ບໍ່ເຄີຍມີມາກ່ອນ.
  
  ຜົນກໍຄື: ເຖິງວ່າຈະຖືກຄຸກຄາມຈາກກະສັດທີ່ມີອຳນາດແລະຈາກນັກເທດນັກບວດທີ່ນຳປະຊາຊົນໄປຜິດທາງ ແຕ່ຄຳພີໄບເບິນກໍຍັງເປັນປຶ້ມທີ່ແຈກຢາຍແລະແປຫຼາຍທີ່ສຸດໃນປະຫວັດສາດ. ໃນບາງປະເທດ ປຶ້ມນີ້ສົ່ງຜົນຕໍ່ກົດໝາຍ ພາສາ ແລະຊີວິດຂອງຫຼາຍລ້ານຄົນ.

ຄຳພີໄບເບິນລອດຈາກການພະຍາຍາມປ່ຽນຂ່າວສານ

ຫໍສັງເກດການ (ສາທາລະນະ)—2016 | ສະບັບທີ 4
- ພວກມາໂຊເຣດກ່າຍຄືນພະຄຳພີຢ່າງລະອຽດຮອບຄອບ
  
  ຈາກປົກ | ຄຳພີໄບເບິນຢູ່ລອດມາເຖິງເຮົາໄດ້ແນວໃດ?
  
  ຄຳພີໄບເບິນລອດຈາກການພະຍາຍາມປ່ຽນຂ່າວສານ
  ສາເຫດທີ່ສ່ຽງ: ການຄຸກຄາມຈາກພາຍນອກ ບໍ່ວ່າຈະເປັນການຍ່ອຍສະຫຼາຍແລະການຕໍ່ຕ້ານກໍບໍ່ສາມາດທຳລາຍຄຳພີໄບເບິນໄດ້. ແຕ່ຜູ້ກ່າຍຄືນສຳເນົາແລະຜູ້ແປບາງຄົນໄດ້ພະຍາຍາມປ່ຽນຂ່າວສານໃນຄຳພີໄບເບິນ. ບາງຄັ້ງ ເຂົາເຈົ້າພະຍາຍາມເຮັດໃຫ້ຄຳພີໄບເບິນສອດຄ່ອງກັບຄຳສອນຂອງໂຕເອງແທນທີ່ຈະເຮັດໃຫ້ຄຳສອນຂອງໂຕເອງສອດຄ່ອງກັບຄຳພີໄບເບິນ. ຂໍມາເບິ່ງບາງຕົວຢ່າງ:
  - ສະຖານທີ່ນະມັດສະການ: ລະຫວ່າງສະຕະວັດທີ 4 ເຖິງ 2 ກ່ອນຄລິດຕະສັກກະຫຼາດ ຜູ້ຂຽນເພນທາທຸກຂອງຊາມາເຣຍໄດ້ເພີ່ມຂໍ້ຄວາມໃນອົບພະຍົບ 20:17 ວ່າ “ເຈົ້າຄວນສ້າງແທ່ນບູຊາທີ່ອາກາຣີເຊມ.” ຄົນຊາມາເຣຍຫວັງຈະໃຫ້ພະຄຳພີສະໜັບສະໜູນການສ້າງວິຫານຂອງເຂົາເຈົ້າຢູ່ທີ່ “ອາກາຣີເຊມ” ຫຼືພູຄາລີຊີມ.
  - ຄຳສອນເລື່ອງຕີເອການຸພາບ: ບໍ່ຮອດ 300 ປີຫຼັງຈາກຄຳພີໄບເບິນຂຽນແລ້ວໆ ຜູ້ຂຽນທີ່ນັບຖືຕີເອການຸພາບໄດ້ເພີ່ມຂໍ້ຄວາມໃນ 1 ໂຢຮັນ 5:7 ວ່າ “ໃນສະຫວັນ ພະບິດາ ພະຄຳ ແລະພະຈິດບໍລິສຸດ ແລະທັງສາມລວມເປັນໜຶ່ງດຽວ.” ຂໍ້ຄວາມນີ້ບໍ່ມີໃນຕົ້ນສະບັບ. ຜູ້ຊ່ຽວຊານດ້ານຄຳພີໄບເບິນຊື່ບຣູດຊ໌ ເມດຊ໌ເກີໃຫ້ຂໍ້ສັງເກດວ່າ ຂໍ້ຄວາມນີ້ “ພົບເລື້ອຍໆໃນຊິ້ນສ່ວນສຳເນົາພະຄຳພີລາຕິນບູຮານແລະລາຕິນວັນເກດຕັ້ງແຕ່ສະຕະວັດທີ 6 ເປັນຕົ້ນມາ.”
  - ຊື່ພະເຈົ້າ: ຜູ້ແປຄຳພີໄບເບິນຫຼາຍຄົນເອົາຄວາມເຊື່ອເລື່ອງໂຊກລາງຂອງຄົນຢິວມາເປັນຂໍ້ອ້າງເພື່ອຈະລຶບຊື່ພະເຈົ້າອອກຈາກພະຄຳພີ. ເຂົາເຈົ້າເອົາຕຳແໜ່ງເຊັ່ນ “ພະເຈົ້າ” ຫຼື “ອົງພະຜູ້ເປັນເຈົ້າ” ມາແທນທີ່ຊື່ພະເຈົ້າ ເຊິ່ງ 2 ຄຳນີ້ໃນຄຳພີໄບເບິນບໍ່ໄດ້ໃຊ້ພຽງແຕ່ກັບພະຜູ້ສ້າງເທົ່ານັ້ນແຕ່ຍັງໃຊ້ກັບມະນຸດ ຮູບປັ້ນໃນການນະມັດສະການປອມແລະແມ່ນແຕ່ກັບມານຮ້າຍນຳ.—ໂຢຮັນ 10:34,35; 1 ໂກຣິນໂທ 8:5, 6; 2 ໂກຣິນໂທ 4:4 a
  ຄຳພີໄບເບິນຢູ່ລອດມາໄດ້ແນວໃດ: ທຳອິດ ເຖິງວ່າຜູ້ກ່າຍຄືນສຳເນົາບາງຄົນຈະບໍ່ໃສ່ໃຈຫຼືເຖິງຂັ້ນບໍ່ສັດຊື່ ແຕ່ກໍຍັງມີອີກຫຼາຍຄົນທີ່ຊຳນານຫຼາຍແລະລະອຽດຮອບຄອບ. ພວກມາໂຊເຣດກ່າຍຄືນພະຄຳພີພາກພາສາເຮັບເຣີໃນຊ່ວງສະຕະວັດທີ 6 ເຖິງ 10 ຄລິດຕະສັກກະຫຼາດ ເຊິ່ງເອີ້ນກັນວ່າຂໍ້ຄວາມຂອງພວກມາໂຊເຣດ. ເຂົາເຈົ້ານັບຄຳແລະໂຕອັກສອນໄວ້ເພື່ອກວດສອບວ່າບໍ່ມີຫຍັງຜິດພາດ. ຕອນທີ່ກ່າຍຄືນ ຖ້າມີຂໍ້ຄວາມໃດໃນຕົ້ນສະບັບທີ່ເຂົາເຈົ້າສົງໄສວ່າຜິດພາດ ເຂົາເຈົ້າກໍຈະຂຽນບອກໄວ້ຢູ່ຂອບເຈ້ຍ. ພວກມາໂຊເຣດຈະບໍ່ຕື່ມຂໍ້ຄວາມເຂົ້າໄປໃນຄຳພີໄບເບິນ. ສາສະດາຈານໂມເຊ ໂກເຊິນ-ກອດສ໌ທີນ ຂຽນວ່າ “ການຈົງໃຈເພີ່ມຂໍ້ຄວາມອື່ນເຂົ້າໄປຖືເປັນຄວາມຜິດຮ້າຍແຮງ.”
  
  ທີສອງ ສຳເນົາພະຄຳພີທີ່ມີຈຳນວນຫຼາຍໃນທຸກມື້ນີ້ຊ່ວຍຜູ້ຊ່ຽວຊານດ້ານຄຳພີໄບເບິນຫຼາຍແທ້ໆໃຫ້ເຫັນຈຸດທີ່ຜິດພາດ. ຕົວຢ່າງເຊັ່ນ ຜູ້ນຳສາສະໜາສອນມາຫຼາຍສະຕະວັດແລ້ວວ່າພະຄຳພີສະບັບພາສາລາຕິນຂອງເຂົາເຈົ້າເປັນສະບັບທີ່ເຊື່ອຖືໄດ້. ແຕ່ແທ້ໆແລ້ວ ໃນ 1 ໂຢຮັນ 5:7 ເຂົາເຈົ້າໄດ້ໃສ່ຂໍ້ຄວາມທີ່ບໍ່ຖືກຕ້ອງລົງໄປຕາມທີ່ບອກໄວ້ກ່ອນໜ້ານີ້. ແມ່ນແຕ່ຄຳພີໄບເບິນພາສາອັງກິດສະບັບຄິງເຈມສ໌ກໍມີຂໍ້ຄວາມນັ້ນຢູ່ນຳ! ແຕ່ເມື່ອມີການຄົ້ນພົບຊິ້ນສ່ວນສຳເນົາອື່ນໆ ຊິ້ນສ່ວນເຫຼົ່ານັ້ນເປີດເຜີຍໃຫ້ເຫັນຫຍັງ? ບຣູດຊ໌ ເມດຊ໌ເກີຂຽນວ່າ: “ຂໍ້ຄວາມນັ້ນ [1 ໂຢຮັນ 5:7] ບໍ່ມີໃນສຳເນົາບູຮານພາສາອື່ນໆເລີຍ (ເຊັ່ນ ພາສາຊີເຣຍບູຮານ ຄອບຕິກ ອາກເມນີ ເອທິໂອເປຍ ອາຣັບ ສະລາໂວນິກ) ນອກຈາກພາສາລາຕິນ.” ຜົນຄືຄຳພີໄບເບິນສະບັບຄິງເຈມສ໌ສະບັບປັບປຸງໃໝ່ແລະສະບັບແປອື່ນໆໄດ້ຕັດຂໍ້ຄວາມທີ່ຜິດນັ້ນອອກໄປ.
  
  ເຊດສ໌ເຕີ ບິດຕີ P46 ຊິ້ນສ່ວນສຳເນົາຄຳພີໄບເບິນທີ່ເຮັດຈາກພາໄພຣັດ ອາຍຸປະມານ ຄ.ສ 200
  
  ສຳເນົາພະຄຳພີເກົ່າແກ່ພິສູດບໍວ່າຂ່າວສານໃນຄຳພີໄບເບິນຍັງຄືເກົ່າ? ເມື່ອມີການຄົ້ນພົບມ້ວນໜັງສືທະເລຕາຍໃນປີ ຄ.ສ 1947 ຜູ້ຊ່ຽວຊານໄດ້ນຳຂໍ້ຄວາມພາສາເຮັບເຣີຂອງພວກມາໂຊເຣດມາທຽບກັບຂໍ້ຄວາມໃນມ້ວນໜັງສືຄຳພີໄບເບິນທີ່ຂຽນກ່ອນໜ້ານັ້ນຫຼາຍກວ່າ 1.000 ປີ. ສະມາຊິກຄົນໜຶ່ງຂອງຄະນະຜູ້ຮຽບຮຽງມ້ວນໜັງສືທະເລຕາຍສະຫຼຸບວ່າ ພຽງແຕ່ມ້ວນໜັງສືມ້ວນດຽວ “ກໍໃຫ້ຂໍ້ພິສູດທີ່ໂຕ້ແຍ່ງບໍ່ໄດ້ວ່າການຖ່າຍທອດຂໍ້ຄວາມໃນຄຳພີໄບເບິນຕະຫຼອດຊ່ວງເວລາຫຼາຍກວ່າພັນປີໂດຍມືຂອງຜູ້ກ່າຍຄືນຄົນຢິວຖືວ່າສັດຊື່ແລະລະອຽດຮອບຄອບຫຼາຍ.”
  
  ຫໍສະໝຸດເຊດສ໌ເຕີ ບິດຕີ ໃນເມືອງດັບລິນ ປະເທດອຽກລັງ ມີການຈັດສະແດງມ້ວນໜັງສືພາໄພຣັດທີ່ມີອາຍຸໃກ້ຄຽງກັບໜັງສືຕ່າງໆຂອງພະຄຳພີຄລິດສະຕຽນພາກພາສາກຣີກ ລວມເຖິງສຳເນົາພະຄຳພີທີ່ມີອາຍຸຕັ້ງແຕ່ສະຕະວັດທີ 2 ຄລິດຕະສັກກະຫຼາດເຊິ່ງກໍພຽງແຕ່ປະມານ 100 ປີຫຼັງຈາກຄຳພີໄບເບິນຂຽນແລ້ວ. ວັດຈະນານຸກົມດິແອງເກີໄບເບິນ ໃຫ້ຂໍ້ສັງເກດວ່າ “ເຖິງວ່າມ້ວນໜັງສືພາໄພຣັດເຫຼົ່ານັ້ນຈະມີລາຍລະອຽດໃໝ່ໆກ່ຽວກັບຂໍ້ຄວາມຕົ້ນສະບັບ ແຕ່ກໍຍັງສະແດງໃຫ້ເຫັນນຳວ່າການຖ່າຍທອດຂໍ້ຄວາມຂອງຄຳພີໄບເບິນຖືກຕ້ອງບໍ່ຜິດພ້ຽນ.”
  
  “ເວົ້າໄດ້ຢ່າງໝັ້ນໃຈເລີຍວ່າບໍ່ມີປຶ້ມເກົ່າແກ່ຫົວໃດຈະຖ່າຍທອດມາຮອດເຮົາຢ່າງຖືກຕ້ອງເທົ່າກັບປຶ້ມນີ້”
  
  ຜົນກໍຄື: ອາຍຸແລະຈຳນວນຂອງສຳເນົາທີ່ມີຢູ່ຫຼາຍສະບັບຊ່ວຍເສີມຄວາມໜ້າເຊື່ອຖືຂອງຂໍ້ຄວາມໃນຄຳພີໄບເບິນຫຼາຍຂຶ້ນ ແທນທີ່ຈະທຳລາຍຄວາມໜ້າເຊື່ອຖືຂອງຄຳພີໄບເບິນ. ເຊີ ເຟເດີຣິກ ເຄນຢອນຂຽນກ່ຽວກັບພະຄຳພີຄລິດສະຕຽນພາກພາສາກຣີກວ່າ “ບໍ່ມີປຶ້ມບູຮານຫົວໃດທີ່ມີຫຼັກຖານສະໄໝບູຮານມາສະໜັບສະໜູນຫຼາຍຂະໜາດນີ້ ແລະຜູ້ຊ່ຽວຊານທີ່ບໍ່ລຳອຽງທຸກຄົນຍອມຮັບວ່າຂໍ້ຄວາມນັ້ນຕົກທອດມາເຖິງເຮົາແບບບໍ່ຂາດຕົກບົກຜ່ອງເລີຍ.” ສຳລັບພະຄຳພີພາກພາສາເຮັບເຣີ ຜູ້ຊ່ຽວຊານຊື່ວິນລຽມ ເຮັນຣີ ກຣີນບອກວ່າ: “ເວົ້າໄດ້ຢ່າງໝັ້ນໃຈເລີຍວ່າບໍ່ມີປຶ້ມເກົ່າແກ່ຫົວໃດຈະຖ່າຍທອດມາຮອດເຮົາຢ່າງຖືກຕ້ອງເທົ່າກັບປຶ້ມນີ້.”
  a ສຳລັບຂໍ້ມູນເພີ່ມເຕີມ ເບິ່ງພາກຜະໜວກ ກ4 ແລະ ກ5 ໃນຄຳພີໄບເບິນສະບັບແປໂລກໃໝ່ ເບິ່ງໄດ້ທີ່ www.pr2711.com/th

ເຫດຜົນທີ່ຄຳພີໄບເບິນຢູ່ລອດມາໄດ້

ຫໍສັງເກດການ (ສາທາລະນະ)—2016 | ສະບັບທີ 4
- ຈາກປົກ | ຄຳພີໄບເບິນຢູ່ລອດມາເຖິງເຮົາໄດ້ແນວໃດ?
  
  ເຫດຜົນທີ່ຄຳພີໄບເບິນຢູ່ລອດມາໄດ້
  
  ຍ້ອນຄຳພີໄບເບິນຢູ່ລອດມາໄດ້ ເຈົ້າຈຶ່ງສາມາດຫາອ່ານໄດ້ໃນທຸກມື້ນີ້. ແລະຖ້າເຈົ້າເລືອກຄຳພີໄບເບິນສະບັບແປທີ່ດີ ເຈົ້າກໍໝັ້ນໃຈໄດ້ເລີຍວ່າເຈົ້າກຳລັງອ່ານຫົວທີ່ມີຂໍ້ຄວາມກົງກັບຕົ້ນສະບັບ.a ແຕ່ເປັນຫຍັງການທີ່ຄຳພີໄບເບິນຢູ່ລອດມາໄດ້ຈຶ່ງເປັນເລື່ອງທີ່ໜ້າງຶດງໍ້ທັງໆທີ່ຕ້ອງເຈິກັບການຍ່ອຍສະຫຼາຍຕາມທຳມະຊາດ ການຕໍ່ຕ້ານຢ່າງໂຫດຮ້າຍ ແລະການຕັ້ງໃຈປ່ຽນຂໍ້ຄວາມ? ອັນໃດເຮັດໃຫ້ຄຳພີໄບເບິນເປັນປຶ້ມທີ່ພິເສດຫຼາຍ?
  
  “ຕອນນີ້ຂ້ອຍໝັ້ນໃຈແລ້ວວ່າຄຳພີໄບເບິນເປັນຂອງຂວັນຈາກພະເຈົ້າ”
  
  ນັກສຶກສາຄຳພີໄບເບິນຫຼາຍຄົນໄດ້ຂໍ້ສະຫຼຸບຄືກັບອັກຄະສາວົກໂປໂລວ່າ: “ພະຄຳພີທຸກຕອນ ພະເຈົ້າດົນໃຈໃຫ້ຂຽນຂຶ້ນມາ.” (2 ຕີໂມທຽວ 3:16) ເຂົາເຈົ້າເຊື່ອວ່າຄຳພີໄບເບິນຢູ່ລອດມາໄດ້ຍ້ອນເປັນຖ້ອຍຄຳຂອງພະເຈົ້າແລະພະເຈົ້າປົກປ້ອງໃຫ້ຄຳພີໄບເບິນຢູ່ລອດມາຈົນເຖິງທຸກມື້ນີ້. ໄຟຊານທີ່ເວົ້າເຖິງໃນບົດຄວາມທຳອິດຢາກກວດສອບດ້ວຍໂຕເອງວ່າຂໍ້ຄວາມໃນຄຳພີໄບເບິນປ່ຽນໄປແລ້ວແທ້ບໍຕາມທີ່ມີຄົນກ່າວຫາ ລາວຈຶ່ງຕັດສິນໃຈຮຽນຄຳພີໄບເບິນ. ສິ່ງທີ່ຄົ້ນພົບເຮັດໃຫ້ລາວແປກໃຈ. ບໍ່ດົນລາວກໍຮູ້ວ່າຄຳສອນຫຼາຍຢ່າງທີ່ມີການສອນໃນຄລິດຕະຈັກບໍ່ມີໃນຄຳພີໄບເບິນ. ນອກຈາກນັ້ນ ລາວປະທັບໃຈທີ່ຮູ້ວ່າພະເຈົ້າມີຄວາມຕ້ອງການແນວໃດສຳລັບໂລກຕາມທີ່ບອກໄວ້ໃນຖ້ອຍຄຳຂອງເພິ່ນ.
  
  ລາວບອກວ່າ “ຕອນນີ້ຂ້ອຍໝັ້ນໃຈແລ້ວວ່າຄຳພີໄບເບິນເປັນຂອງຂວັນຈາກພະເຈົ້າ. ແລະຖ້າພະເຈົ້າສ້າງເອກະພົບໄດ້ ເພິ່ນກໍມີອຳນາດທີ່ຈະໃຫ້ຄຳພີໄບເບິນກັບເຮົາແລະປົກປ້ອງປຶ້ມນີ້ໃຫ້ຢູ່ລອດມາເຖິງເຮົາໄດ້ນຳບໍ່ແມ່ນບໍ? ເວົ້າອີກຢ່າງໜຶ່ງກໍຄືພະເຈົ້າເປັນຜູ້ມີພະລັງອຳນາດສູງສຸດບໍ່ມີຂີດຈຳກັດ. ແລ້ວຂ້ອຍແມ່ນໃຜທີ່ຈະໄປຈຳກັດອຳນາດຂອງເພິ່ນ?”—ເອຊາອີ 40:8
  
  a ເບິ່ງບົດຄວາມ “ເຈົ້າຈະເລືອກສະບັບແປຄຳພີໄບເບິນທີ່ດີໄດ້ແນວໃດ?” ໃນຫໍສັງເກດການ 1 ພຶດສະພາ 2008
  
  ບົດຄວາມຊຸດນີ້ອະທິບາຍວ່າຄຳພີໄບເບິນໄດ້ຮັບການປົກປ້ອງເບິ່ງແຍງຈາກພະເຈົ້າໄດ້ແນວໃດ. ເຈົ້າໝັ້ນໃຈໄດ້ແນວໃດວ່າຄຳພີໄບເບິນເປັນ “ຄຳສອນຂອງພະເຈົ້າ” ແທ້ໆບໍ່ແມ່ນເລື່ອງເລົ່າຫຼືນິທານ? (1 ເທຊະໂລນິກ 2:13) ເຊີນເບິ່ງວິດີໂອເລື່ອງເຮົາໝັ້ນໃຈໄດ້ແນວໃດວ່າຄຳພີໄບເບິນເປັນຄວາມຈິງ? ໃນ www.pr2711.com/lo. (ເບິ່ງຫົວຂໍ້ ສື່ແລະສິ່ງພິມ > ວິດີໂອ)