ຫ້ອງສະໝຸດອອນລາຍຂອງວັອດສ໌ທາວເວີ້

1 ເປັນຫຍັງ?

ຫໍສັງເກດການ—2010 | 1 ຕຸລາ
- 1 ເປັນຫຍັງ?
  
  ການອະທິດຖານເປັນເລື່ອງໜຶ່ງໃນຄຳພີໄບເບິນທີ່ຫຼາຍຄົນສົນໃຈຢາກຮູ້. ໃຫ້ເຮົາມາພິຈາລະນາ 7 ຄຳຖາມທີ່ຜູ້ຄົນມັກຖາມກ່ຽວກັບການອະທິດຖານ ແລ້ວເບິ່ງນຳກັນວ່າຄຳພີໄບເບິນຕອບຄຳຖາມເຫຼົ່ານີ້ແນວໃດ. ບົດຄວາມຕໍ່ໄປນີ້ຂຽນຂຶ້ນເພື່ອຊ່ວຍເຈົ້າໃນເລື່ອງການອະທິດຖານ ບໍ່ວ່າຈະເປັນວິທີເລີ່ມອະທິດຖານໃນເທື່ອທຳອິດຫຼືວິທີປັບປຸງຄຳອະທິດຖານໃຫ້ດີຂຶ້ນ.
  
  ຕະຫຼອດທົ່ວໂລກ ຜູ້ຄົນທຸກວັດທະນະທຳແລະສາສະໜາຕ່າງກໍອະທິດຖານ. ເຂົາເຈົ້າອະທິດຖານເມື່ອຢູ່ຜູ້ດຽວຫຼືອະທິດຖານເປັນກຸ່ມ. ເຂົາເຈົ້າອະທິດຖານໃນໂບດ ໃນວັດ ໃນບ່ອນປະຊຸມຂອງຄົນຢິວ ໃນມັດສະຍິດ ຫຼືຕາມສານເຈົ້າຕ່າງໆ. ເຂົາເຈົ້າອາດໃຊ້ຜ້າພົມສຳລັບອະທິດຖານ ລູກປະຄຳ ກະບອກສວດມົນ ຮູບບູຊາ ປຶ້ມບົດສວດ ຫຼືຂຽນຄຳອະທິດຖານລົງເທິງແຜ່ນໄມ້ນ້ອຍໆ.
  
  ການອະທິດຖານເຮັດໃຫ້ມະນຸດແຕກຕ່າງຈາກສິ່ງທີ່ມີຊີວິດອື່ນໆເທິງໂລກນີ້. ແມ່ນຢູ່ ເຮົາມີຫຼາຍຢ່າງທີ່ຄ້າຍກັບສັດ. ເຮົາຈຳເປັນຕ້ອງໄດ້ຮັບອາຫານ ອາກາດ ແລະນ້ຳ. ເຮົາເກີດມາ ມີຊີວິດຢູ່ ແລະຕາຍ. (ຜູ້ເທສະໜາປ່າວປະກາດ 3:19) ແຕ່ມີພຽງມະນຸດເທົ່ານັ້ນທີ່ອະທິດຖານ. ເປັນຫຍັງຈຶ່ງເປັນແນວນັ້ນ?
  
  ບາງເທື່ອຄຳຕອບທີ່ງ່າຍທີ່ສຸດແມ່ນຍ້ອນການອະທິດຖານເປັນສິ່ງຈຳເປັນສຳລັບມະນຸດ. ທີ່ຈິງ ໂດຍທົ່ວໄປຜູ້ຄົນມັກເບິ່ງວ່າການອະທິດຖານເປັນວິທີຕິດຕໍ່ກັບສິ່ງສັກສິດໃນໂລກວິນຍານ. ຄຳພີໄບເບິນບອກວ່າເຮົາຖືກສ້າງໃຫ້ມີຄວາມຕ້ອງການແບບນັ້ນ. (ຜູ້ເທສະໜາປ່າວປະກາດ 3:11) ມີເທື່ອໜຶ່ງພະເຢຊູຄລິດບອກວ່າ: “ຄົນທີ່ຮູ້ຕົວວ່າຈຳເປັນຕ້ອງເພິ່ງພະເຈົ້າກໍມີຄວາມສຸກ.”—ມັດທາຍ 5:3
  
  ຄືຊິບໍ່ມີໃຜປະຕິເສດໄດ້ວ່າ ຄົນເຮົາບໍ່ມີຄວາມ “ຈຳເປັນຕ້ອງເພິ່ງພະເຈົ້າ” ຫຼືຄວາມຕ້ອງການທີ່ຈະນະມັດສະການສິ່ງສັກສິດ ເພາະໂລກເຕັມໄປດ້ວຍຕຶກອາຄານແລະວັດຖຸສິ່ງຂອງຈຳນວນຫຼາຍກ່ຽວກັບສາສະໜາ ແລະບໍ່ວ່າໃຜກໍອະທິດຖານພາວະນາທັງນັ້ນ. ແມ່ນຢູ່ ບາງຄົນຫາວິທີສະໜອງຄວາມຈຳເປັນນັ້ນດ້ວຍໂຕເອງຫຼືບໍ່ກໍຂໍຄວາມຊ່ວຍເຫຼືອຈາກເພື່ອນມະນຸດ. ແຕ່ເຈົ້າເຫັນດີນຳບໍວ່າມະນຸດບໍ່ມີຄວາມສາມາດພໍທີ່ຈະຊ່ວຍໄດ້? ມະນຸດເຮົາອ່ອນແອ ຊ່ວງຊີວິດກໍສັ້ນຫຼາຍ ແລະຍັງເບິ່ງສິ່ງຕ່າງໆພຽງແຕ່ໄລຍະສັ້ນໆ. ສະເພາະແຕ່ຜູ້ທີ່ສະຫຼາດສຸຂຸມກວ່າ ແຂງແຮງກວ່າ ແລະມີຊີວິດຍາວນານກວ່າເຮົາເທົ່ານັ້ນຈຶ່ງຈະສາມາດສະໜອງຄວາມຈຳເປັນຕ້ອງເພິ່ງພະເຈົ້າທີ່ເຮົາມີໄດ້. ແຕ່ອັນໃດແມ່ນຄວາມຈຳເປັນນັ້ນທີ່ກະຕຸ້ນເຮົາໃຫ້ອະທິດຖານ?
  
  ຂໍໃຫ້ຄິດເຖິງເລື່ອງນີ້: ເຈົ້າເຄີຍຢາກໄດ້ຄຳແນະນຳ ສະຕິປັນຍາ ຫຼືຄຳຕອບສຳລັບຄຳຖາມຕ່າງໆທີ່ເບິ່ງຄືວ່າບໍ່ມີມະນຸດຄົນໃດຈະຮູ້ໄດ້ບໍ? ເຈົ້າເຄີຍຮູ້ສຶກວ່າຢາກໄດ້ການປອບໂຍນໃນຍາມທີ່ເຈິກັບການສູນເສຍທີ່ເຈັບປວດ ຕ້ອງການການຊີ້ນຳເມື່ອເຈິເລື່ອງທີ່ຕັດສິນໃຈຍາກ ຫຼືຢາກໄດ້ຮັບການອະໄພເພາະຄວາມຮູ້ສຶກຜິດທີ່ມີຢູ່ໃນໃຈບໍ?
  
  ຄຳພີໄບເບິນສະແດງໃຫ້ເຫັນວ່າ ທັງໝົດທີ່ເວົ້າມານັ້ນລ້ວນເປັນເຫດຜົນທີ່ເຮົາຈະອະທິດຖານໄດ້. ຄຳພີໄບເບິນເປັນປຶ້ມທີ່ໃຫ້ຄຳແນະນຳໄດ້ດີທີ່ສຸດໃນເລື່ອງນີ້ ແລະໄດ້ບັນທຶກຄຳອະທິດຖານຂອງຜູ້ທີ່ສັດຊື່ຫຼາຍຄົນທັງຊາຍແລະຍິງ. ເຂົາເຈົ້າອະທິດຖານເພື່ອຈະໄດ້ຮັບການປອບໂຍນ ການຊີ້ນຳ ການໃຫ້ອະໄພ ແລະເພື່ອຈະໄດ້ຮັບຄຳຕອບສຳລັບຄຳຖາມທີ່ຍາກທີ່ສຸດ.—ຄຳເພງ 23:3; 71:21; ດານຽນ 9:4, 5, 19; ຫາບາກຸກ 1:3
  
  ຄຳອະທິດຖານເຫຼົ່ານີ້ ເຖິງວ່າຈະແຕກຕ່າງກັນ ແຕ່ກໍມີສິ່ງໜຶ່ງທີ່ຄືກັນ. ຜູ້ອະທິດຖານແຕ່ລະຄົນຮູ້ວິທີທີ່ຈະເຮັດໃຫ້ຄຳອະທິດຖານຂອງລາວໄດ້ຮັບຄຳຕອບ ເຊິ່ງເປັນສິ່ງທີ່ຜູ້ຄົນສ່ວນຫຼາຍໃນໂລກນີ້ບໍ່ຮູ້ຫຼືບໍ່ຖືວ່າເປັນເລື່ອງສຳຄັນ. ນັ້ນກໍຄື ຜູ້ທີ່ສັດຊື່ເຫຼົ່ານັ້ນຮູ້ວ່າຄວນອະທິດຖານເຖິງໃຜ.

2 ເຖິງໃຜ?

ຫໍສັງເກດການ—2010 | 1 ຕຸລາ
- 2 ເຖິງໃຜ?
  
  ຄຳອະທິດຖານທັງໝົດໄປເຖິງພະເຈົ້າອົງດຽວກັນບໍ ບໍ່ວ່າຈະເວົ້າຊື່ໃດກໍຕາມ? ຫຼາຍຄົນໃນໂລກທຸກມື້ນີ້ອາດຄິດແບບນັ້ນ ໂດຍສະເພາະຄົນທີ່ສະໜັບສະໜູນການລວມຄວາມເຊື່ອແລະຢາກໃຫ້ທຸກສາສະໜາເປັນທີ່ຍອມຮັບໃນສັງຄົມ ເຖິງວ່າຈະຕ່າງກັນກໍຕາມ. ແຕ່ເປັນໄປໄດ້ບໍວ່າຄວາມຄິດນີ້ອາດບໍ່ເປັນຄວາມຈິງ?
  
  ຄຳພີໄບເບິນສອນວ່າແທ້ໆແລ້ວຄຳອະທິດຖານຈຳນວນຫຼາຍບໍ່ໄດ້ໄປເຖິງພະເຈົ້າທ່ຽງແທ້. ໃນສະໄໝທີ່ມີການຂຽນຄຳພີໄບເບິນ ເປັນເລື່ອງທຳມະດາທີ່ຜູ້ຄົນຈະອະທິດຖານຕໍ່ໜ້າຮູບບູຊາ. ແຕ່ພະເຈົ້າໄດ້ເຕືອນຫຼາຍເທື່ອແລ້ວວ່າບໍ່ໃຫ້ເຮັດແບບນັ້ນ. ຕົວຢ່າງເຊັ່ນ ຄຳເພງ 115:4-6, ລ.ມ. ເວົ້າເຖິງຮູບບູຊາວ່າ “ມີຫູແຕ່ບໍ່ໄດ້ຍິນ.” ເຮົາເຫັນຈຸດສຳຄັນໄດ້ຊັດເຈນ. ຈະມີປະໂຫຍດຫຍັງທີ່ຈະອະທິດຖານເຖິງພະທີ່ບໍ່ມີທາງໄດ້ຍິນສິ່ງທີ່ເຈົ້າເວົ້າ?
  
  ບັນທຶກເລື່ອງໜຶ່ງທີ່ໜ້າຕື່ນເຕັ້ນໃນຄຳພີໄບເບິນຊ່ວຍໃຫ້ເຂົ້າໃຈເລື່ອງນີ້ຈະແຈ້ງຫຼາຍຂຶ້ນ. ຜູ້ພະຍາກອນແທ້ເອລີຢາໄດ້ທ້າໃຫ້ພວກຜູ້ພະຍາກອນຂອງພະບາອານອະທິດຖານເຖິງພະຂອງເຂົາເຈົ້າ ແລ້ວຫຼັງຈາກນັ້ນລາວຈະອະທິດຖານເຖິງພະຂອງລາວ. ເອລີຢາເວົ້າວ່າພະເຈົ້າທ່ຽງແທ້ຈະຕອບຄຳອະທິດຖານແຕ່ພະປອມຈະບໍ່ຕອບ. ຜູ້ພະຍາກອນຂອງພະບາອານຮັບຄຳທ້າແລະໄດ້ອະທິດຖານຢ່າງຮ້ອນຮົນແລະຍືດຍາວ ແລະເຖິງຂັ້ນຮ້ອງສຽງດັງດ້ວຍຊ້ຳ ແຕ່ກໍບໍ່ໄດ້ຜົນ! ບັນທຶກບອກວ່າ: “ບໍ່ມີສຽງຕອບແລະບໍ່ມີໃຜຟັງ.” (1 ກະສັດ 18:29, ລ.ມ.) ແຕ່ເອລີຢາເດເປັນແນວໃດ?
  
  ຫຼັງຈາກເອລີຢາອະທິດຖານແລ້ວ ພະເຈົ້າຂອງລາວກໍຕອບຄຳອະທິດຖານທັນທີ ໂດຍສົ່ງໄຟລົງມາຈາກສະຫວັນເຜົາເຄື່ອງບູຊາທີ່ເອລີຢາໄດ້ກຽມໄວ້. ຄຳອະທິດຖານຂອງເອລີຢາຕ່າງຈາກຄຳອະທິດຖານຂອງຜູ້ພະຍາກອນຂອງພະບາອານແນວໃດ? ຄຳອະທິດຖານຂອງເອລີຢາເຊິ່ງບັນທຶກໄວ້ໃນ 1 ກະສັດ 18:36, 37 ຊ່ວຍເຮົາໃຫ້ຮູ້ຄຳຕອບ. ຄຳອະທິດຖານນັ້ນສັ້ນຫຼາຍ ລາວໃຊ້ຄຳພາສາເຮັບເຣີປະມານ 30 ຄຳເທົ່ານັ້ນ. ແຕ່ໃນຄຳອະທິດຖານພຽງບໍ່ເທົ່າໃດປະໂຫຍກນັ້ນ ເອລີຢາໄດ້ໃຊ້ຊື່ພະເຢໂຫວາເຊິ່ງເປັນຊື່ສະເພາະຂອງພະເຈົ້າເຖິງ 3 ເທື່ອ.
  
  ບາອານ ເຊິ່ງມີຄວາມໝາຍວ່າ “ເຈົ້າຂອງ” ຫຼື “ເຈົ້ານາຍ” ເປັນພະຂອງຄົນການາອານ ແລະເປັນຊື່ທີ່ໃຊ້ກັບພະຫຼາຍອົງໃນຫຼາຍດິນແດນ. ແຕ່ ເຢໂຫວາ ເປັນຊື່ພິເສດທີ່ບໍ່ຄືກັບຊື່ໃດແລະໃຊ້ກັບຜູ້ດຽວເທົ່ານັ້ນໃນເອກະພົບ. ພະເຈົ້າອົງນີ້ໄດ້ບອກກັບປະຊາຊົນຂອງເພິ່ນວ່າ: “ເຮົາແມ່ນເຢໂຫວາ. ນີ້ແມ່ນຊື່ຂອງເຮົາ ເຮົາຈະບໍ່ຍົກສະຫງ່າລາສີຂອງເຮົາໃຫ້ໃຜເລີຍ.”—ເອຊາອີ 42:8, ລ.ມ.
  
  ຄຳອະທິດຖານຂອງເອລີຢາແລະຄຳອະທິດຖານຂອງພວກຜູ້ພະຍາກອນຂອງບາອານໄປເຖິງພະອົງດຽວກັນບໍ? ການນະມັດສະການບາອານເຮັດໃຫ້ຜູ້ຄົນເສື່ອມຊາມດ້ວຍພິທີກຳທີ່ກ່ຽວຂ້ອງກັບໂສເພນີແລະເຖິງຂັ້ນບູຊາຍັນມະນຸດດ້ວຍຊ້ຳ. ກົງກັນຂ້າມ ການນະມັດສະການພະເຢໂຫວາຍົກລະດັບຄົນອິດສະຣາເອນປະຊາຊົນຂອງເພິ່ນໂດຍເຮັດໃຫ້ເຂົາເຈົ້າເປັນອິດສະຫຼະຈາກການກະທຳທີ່ເສື່ອມຊາມເຫຼົ່ານັ້ນ. ສະນັ້ນ ລອງຄິດເບິ່ງ: ຖ້າເຈົ້າຕັ້ງໃຈຈະຂຽນຈົດໝາຍໄປເຖິງໝູ່ຄົນໜຶ່ງເຊິ່ງເປັນຄົນດີໜ້ານັບຖື ໂດຍຂຽນຊື່ຂອງລາວເທິງໜ້າຊອງຢ່າງຈະແຈ້ງ ເຈົ້າຄືຊິບໍ່ຄາດໝາຍວ່າຈົດໝາຍນັ້ນຈະໄປເຖິງອີກຄົນໜຶ່ງທີ່ມີຊື່ສຽງບໍ່ດີເຊິ່ງຕ່າງກັນຫຼາຍຈາກໝູ່ຂອງເຈົ້າບໍ່ແມ່ນບໍ? ເຈົ້າຄືຊິບໍ່ຄາດໝາຍແບບນັ້ນແນ່ນອນ!
  
  ເລື່ອງລາວກ່ຽວກັບເອລີຢາແລະຜູ້ພະຍາກອນຂອງບາອານພິສູດວ່າຄຳອະທິດຖານທຸກຢ່າງບໍ່ໄດ້ໄປເຖິງພະອົງດຽວກັນ
  
  ຖ້າເຈົ້າອະທິດຖານເຖິງພະເຢໂຫວາ ເຈົ້າກໍກຳລັງອະທິດຖານເຖິງພະຜູ້ສ້າງ ເຊິ່ງເປັນພໍ່ຂອງມະນຸດທຸກຄົນ.a ຜູ້ພະຍາກອນເອຊາຢາເວົ້າໃນຄຳອະທິດຖານວ່າ “ພະອົງເປັນພໍ່ຂອງພວກເຮົາ.” (ເອຊາອີ 63:16, ລ.ມ.) ສະນັ້ນ ພະເຈົ້າອົງນີ້ແຫຼະແມ່ນຜູ້ທີ່ພະເຢຊູຄລິດໄດ້ເວົ້າເຖິງເມື່ອບອກລູກສິດຂອງເພິ່ນວ່າ: “ຂ້ອຍກຳລັງຈະຂຶ້ນໄປຫາພໍ່ຂອງຂ້ອຍເຊິ່ງເປັນພໍ່ຂອງພວກເຈົ້າ.” (ໂຢຮັນ 20:17) ພະເຢໂຫວາແມ່ນພໍ່ຂອງພະເຢຊູ. ເພິ່ນເປັນພະເຈົ້າທີ່ພະເຢຊູອະທິດຖານເຖິງແລະສອນລູກສິດໃຫ້ອະທິດຖານເຖິງນຳ.—ມັດທາຍ 6:9
  
  ຄຳພີໄບເບິນສອນໃຫ້ເຮົາອະທິດຖານເຖິງພະເຢຊູ ມາຣີ ນັກບຸນ ຫຼືທູດສະຫວັນບໍ? ບໍ່ ເຮົາຕ້ອງອະທິດຖານເຖິງພະເຢໂຫວາເທົ່ານັ້ນ. ໃຫ້ເຮົາມາພິຈະລະນາ 2 ເຫດຜົນໃນເລື່ອງນີ້. ເຫດຜົນທຳອິດ ການອະທິດຖານເປັນການນະມັດສະການຮູບແບບໜຶ່ງ ແລະຄຳພີໄບເບິນບອກວ່າເຮົາຕ້ອງນະມັດສະການພະເຢໂຫວາຜູ້ດຽວເທົ່ານັ້ນ. (ອົບພະຍົບ 20:5) ເຫດຜົນທີສອງ ຄຳພີໄບເບິນບອກໃຫ້ຮູ້ວ່າພະເຢໂຫວາເປັນ “ຜູ້ຟັງຄຳອະທິດຖານ.” (ຄຳເພງ 65:2, ລ.ມ.) ເຖິງວ່າພະເຢໂຫວາຈະມອບໜ້າທີ່ຫຼາຍຢ່າງໃຫ້ກັບຜູ້ອື່ນ ແຕ່ເພິ່ນບໍ່ເຄີຍມອບໜ້າທີ່ນີ້ໃຫ້ກັບຜູ້ໃດ. ເພິ່ນເປັນພະເຈົ້າທີ່ສັນຍາວ່າຈະຟັງຄຳອະທິດຖານຂອງເຮົາດ້ວຍໂຕເພິ່ນເອງ.
  
  ດັ່ງນັ້ນ ຖ້າເຈົ້າຕ້ອງການໃຫ້ພະເຈົ້າຟັງຄຳອະທິດຖານຂອງເຈົ້າ ຂໍໃຫ້ຈື່ຄຳແນະນຳໃນຂໍ້ຄຳພີນີ້ໄວ້ທີ່ວ່າ: “ທຸກຄົນທີ່ອ້ອນວອນໂດຍອອກຊື່ຂອງພະເຢໂຫວາຈະລອດ.” (ກິດຈະການ 2:21) ແຕ່ພະເຢໂຫວາຈະຟັງຄຳອະທິດຖານທຸກຢ່າງບໍ? ຫຼືມີຫຍັງອີກບໍທີ່ເຮົາຈຳເປັນຕ້ອງຮູ້ຖ້າເຮົາຕ້ອງການໃຫ້ພະເຢໂຫວາຟັງຄຳອະທິດຖານຂອງເຮົາ?
  
  a ບາງສາສະໜາສອນວ່າເປັນເລື່ອງບໍ່ຖືກຕ້ອງທີ່ຈະອອກສຽງຊື່ສະເພາະຂອງພະເຈົ້າແມ່ນແຕ່ໃນຄຳອະທິດຖານ. ແນວໃດກໍຕາມ ໃນຄຳພີໄບເບິນພາສາເດີມມີຊື່ນີ້ປາກົດຢູ່ປະມານ 7.000 ເທື່ອ ເຊິ່ງຫຼາຍເທື່ອຢູ່ໃນຄຳອະທິດຖານແລະເພງສັນລະເສີນຂອງຜູ້ຮັບໃຊ້ທີ່ສັດຊື່ຂອງພະເຢໂຫວາ.

3 ແນວໃດ?

ຫໍສັງເກດການ—2010 | 1 ຕຸລາ
- 3 ແນວໃດ?
  
  ເມື່ອເວົ້າເຖິງການອະທິດຖານ ຫຼາຍສາສະໜາມັກຈະເນັ້ນທີ່ທ່າທາງ ຄຳເວົ້າ ຫຼືພິທີກຳ. ແຕ່ຄຳພີໄບເບິນຊ່ວຍເຮົາໃຫ້ຄິດເຖິງແງ່ມຸມອື່ນໆທີ່ສຳຄັນກວ່າກ່ຽວກັບຄຳຖາມທີ່ວ່າ “ເຮົາຄວນອະທິດຖານແນວໃດ?”
  
  ຄຳພີໄບເບິນສະແດງໃຫ້ເຫັນວ່າຜູ້ຮັບໃຊ້ຂອງພະເຈົ້າໄດ້ອະທິດຖານໃນຫຼາຍໂອກາດແລະອະທິດຖານດ້ວຍທ່າທາງຕ່າງໆ. ເຂົາເຈົ້າອະທິດຖານໃນໃຈຫຼືອອກສຽງແລ້ວແຕ່ສະພາບການ. ເຂົາເຈົ້າອະທິດຖານໂດຍເງີຍໜ້າເບິ່ງຟ້າຫຼືກົ້ມຫົວລົງ. ແທນທີ່ຈະອະທິດຖານໂດຍໃຊ້ຮູບບູຊາ ລູກປະຄຳ ຫຼືປຶ້ມບົດສວດ ເຂົາເຈົ້າພຽງແຕ່ອະທິດຖານຈາກຫົວໃຈເປັນຄຳເວົ້າຂອງໂຕເອງ. ອັນໃດເຮັດໃຫ້ພະເຈົ້າຟັງຄຳອະທິດຖານຂອງເຂົາເຈົ້າ?
  
  ຕາມທີ່ບອກໄປໃນບົດຄວາມກ່ອນໜ້ານີ້ ເຂົາເຈົ້າອະທິດຖານເຖິງພະເຢໂຫວາພະເຈົ້າອົງດຽວເທົ່ານັ້ນ. ແຕ່ມີອີກປັດໄຈໜຶ່ງທີ່ສຳຄັນຄືກັນ. ເຮົາອ່ານໃນ 1 ໂຢຮັນ 5:14 ວ່າ: “ພວກເຮົາໝັ້ນໃຈໃນພະເຈົ້າວ່າ ຖ້າພວກເຮົາຂໍສິ່ງໃດກໍຕາມທີ່ສອດຄ່ອງກັບຄວາມຕ້ອງການຂອງພະອົງ ພະອົງຈະຟັງພວກເຮົາ.” ຄຳອະທິດຖານຂອງເຮົາຕ້ອງສອດຄ່ອງກັບຄວາມຕ້ອງການຂອງພະເຈົ້າ. ນີ້ໝາຍຄວາມວ່າແນວໃດ?
  
  ເພື່ອຈະອະທິດຖານແບບທີ່ສອດຄ່ອງກັບຄວາມຕ້ອງການຂອງພະເຈົ້າ ເຮົາຈຳເປັນຕ້ອງຮູ້ວ່າເພິ່ນມີຄວາມຕ້ອງການແນວໃດ. ດັ່ງນັ້ນ ການສຶກສາຄຳພີໄບເບິນຈຶ່ງຈຳເປັນແທ້ໆ. ນີ້ໝາຍຄວາມວ່າເຮົາຕ້ອງມີຄວາມຮູ້ເຖິງຂັ້ນເປັນຜູ້ຊ່ຽວຊານດ້ານຄຳພີໄບເບິນ ພະເຈົ້າຈຶ່ງຈະຟັງຄຳອະທິດຖານຂອງເຮົາບໍ? ບໍ່ ແຕ່ພະເຈົ້າຄາດໝາຍໃຫ້ເຮົາຮຽນຮູ້ວ່າເພິ່ນຕ້ອງການຫຍັງ ລວມທັງພະຍາຍາມເຂົ້າໃຈແລະເຮັດຕາມສິ່ງທີ່ເພິ່ນຕ້ອງການ. (ມັດທາຍ 7:21-23) ສິ່ງທີ່ເຮົາອະທິດຖານຈະຕ້ອງສອດຄ່ອງກັບສິ່ງທີ່ເຮົາໄດ້ຮຽນຮູ້.
  
  ພະເຈົ້າຈະຟັງຄຳອະທິດຖານຂອງເຮົາຖ້າຄຳອະທິດຖານນັ້ນສອດຄ່ອງກັບຄວາມຕ້ອງການຂອງເພິ່ນ ອະທິດຖານດ້ວຍຄວາມເຊື່ອ ແລະອະທິດຖານໃນນາມຂອງພະເຢຊູ
  
  ຕອນທີ່ເຮົາຮຽນກ່ຽວກັບພະເຢໂຫວາແລະຄວາມຕ້ອງການຂອງເພິ່ນ ເຮົາຈະມີຄວາມເຊື່ອຫຼາຍຂຶ້ນ ແລະຄວາມເຊື່ອນີ້ເປັນສິ່ງສຳຄັນອີກຢ່າງໜຶ່ງທີ່ເຮັດໃຫ້ເພິ່ນຟັງຄຳອະທິດຖານຂອງເຮົາ. ພະເຢຊູເວົ້າວ່າ: “ຖ້າພວກເຈົ້າມີຄວາມເຊື່ອ ພວກເຈົ້າອະທິດຖານຂໍຫຍັງກໍຈະໄດ້.” (ມັດທາຍ 21:22) ຄວາມເຊື່ອບໍ່ແມ່ນຄວາມງົມງວາຍ. ແຕ່ຄວາມເຊື່ອໝາຍເຖິງຄວາມໝັ້ນໃຈໃນສິ່ງໜຶ່ງ ເຖິງວ່າເປັນສິ່ງທີ່ເບິ່ງບໍ່ເຫັນ ແຕ່ກໍມີຫຼັກຖານສະໜັບສະໜູນທີ່ໜັກແໜ້ນ. (ເຮັບເຣີ 11:1) ຄຳພີໄບເບິນມີຫຼັກຖານຈະແຈ້ງທີ່ສະແດງວ່າພະເຢໂຫວາຜູ້ທີ່ເຮົາເບິ່ງບໍ່ເຫັນນັ້ນມີຢູ່ແທ້ ເປັນຜູ້ທີ່ເຮົາໄວ້ໃຈໄດ້ ແລະເຕັມໃຈຈະຕອບຄຳອະທິດຖານຂອງຄົນທີ່ເຊື່ອໃນເພິ່ນ. ນອກຈາກນັ້ນ ເຮົາໝັ້ນໃຈໄດ້ວ່າເຮົາສາມາດຂໍພະເຢໂຫວາຊ່ວຍເຮົາໃຫ້ມີຄວາມເຊື່ອຫຼາຍຂຶ້ນໄດ້ ເພິ່ນເຕັມໃຈແລະຍິນດີທີ່ຈະໃຫ້ທຸກສິ່ງທີ່ເຮົາຈຳເປັນຕ້ອງໄດ້ຮັບ.—ລູກາ 17:5; ຢາໂກໂບ 1:17
  
  ຍັງມີອີກແງ່ມຸມໜຶ່ງທີ່ສຳຄັນກ່ຽວກັບການອະທິດຖານ. ພະເຢຊູເວົ້າວ່າ: “ບໍ່ມີຜູ້ໃດທີ່ຈະມາເຖິງພະເຈົ້າຜູ້ເປັນພໍ່ໄດ້ນອກຈາກມາທາງຂ້ອຍ.” (ໂຢຮັນ 14:6) ດັ່ງນັ້ນ ພະເຢຊູເປັນຜູ້ດຽວທີ່ສາມາດພາພວກເຮົາເຂົ້າຫາພະເຢໂຫວາພໍ່ຂອງພວກເຮົາໄດ້. ສະນັ້ນ ພະເຢຊູຈຶ່ງບອກໃຫ້ລູກສິດອະທິດຖານໃນນາມຂອງເພິ່ນ. (ໂຢຮັນ 14:13; 15:16) ນີ້ບໍ່ໄດ້ໝາຍຄວາມວ່າເຮົາຄວນອະທິດຖານເຖິງພະເຢຊູ. ແທນທີ່ຈະເຮັດແບບນັ້ນ ເຮົາອະທິດຖານໃນນາມຂອງພະເຢຊູ ໂດຍລະນຶກວ່າພະເຢຊູເປັນຜູ້ທີ່ເຮັດໃຫ້ເຮົາສາມາດເຂົ້າຫາພໍ່ທີ່ບໍລິສຸດແລະສົມບູນແບບໄດ້.
  
  ມີເທື່ອໜຶ່ງ ພວກລູກສິດທີ່ໃກ້ຊິດທີ່ສຸດຂອງພະເຢຊູໄດ້ເວົ້າກັບເພິ່ນວ່າ: “ອາຈານ ສອນພວກເຮົາໃຫ້ຮູ້ວິທີອະທິດຖານ . . . ໄດ້ບໍ?” (ລູກາ 11:1) ເບິ່ງຄືວ່າເຂົາເຈົ້າບໍ່ໄດ້ຂໍພະເຢຊູສອນກ່ຽວກັບວິທີອະທິດຖານຄືທີ່ເຮົາຫາກໍພິຈາລະນາໄປ. ແຕ່ເຂົາເຈົ້າຢາກຮູ້ກ່ຽວກັບເລື່ອງທີ່ຈະເວົ້າໃນຄຳອະທິດຖານ ຄືກັບຊິຖາມວ່າ ‘ພວກເຮົາຄວນອະທິດຖານເລື່ອງຫຍັງ?’

4 ເລື່ອງຫຍັງ?

ຫໍສັງເກດການ—2010 | 1 ຕຸລາ
- 4 ເລື່ອງຫຍັງ?
  
  ເວົ້າກັນວ່າ ຄຳອະທິດຖານແບບຢ່າງຂອງພະເຢຊູຫຼືທີ່ບາງຄົນເອີ້ນວ່າຄຳອະທິດຖານຂອງອົງພະຜູ້ເປັນເຈົ້າຫຼືບົດສວດຂ້າແຕ່ພະບິດາເປັນຄຳອະທິດຖານທີ່ຄລິດສະຕຽນທ່ອງຈຳຫຼາຍທີ່ສຸດ. ບໍ່ວ່າຈະແທ້ຫຼືບໍ່ ແຕ່ທີ່ແນ່ນອນກໍຄື ຫຼາຍຄົນເຂົ້າໃຈຜິດກ່ຽວກັບຄຳອະທິດຖານນີ້. ຫຼາຍລ້ານຄົນທ່ອງຄຳອະທິດຖານນີ້ທຸກມື້ ບາງເທື່ອມື້ລະຫຼາຍເທື່ອດ້ວຍຊ້ຳ. ແຕ່ທີ່ຈິງພະເຢຊູບໍ່ຢາກໃຫ້ເຮົາທ່ອງຈຳຄຳອະທິດຖານນັ້ນ. ເຮົາຮູ້ໄດ້ແນວໃດ?
  
  ກ່ອນທີ່ຈະເວົ້າເຖິງຄຳອະທິດຖານນັ້ນ ພະເຢຊູຫາກໍເວົ້າວ່າ: “ຕອນທີ່ເຈົ້າອະທິດຖານ ຢ່າເວົ້າຊ້ຳຄຳເກົ່າ.” (ມັດທາຍ 6:7) ພະເຢຊູຈະເຮັດສິ່ງທີ່ຂັດກັບຄຳເວົ້າຂອງເພິ່ນເອງໂດຍສອນລູກສິດໃຫ້ທ່ອງຈຳຫຼືເວົ້າຊ້ຳຄຳອະທິດຖານບົດໜຶ່ງບໍ? ບໍ່! ທີ່ຈິງ ພະເຢຊູພຽງແຕ່ບອກໃຫ້ເຮົາຮູ້ວ່າຄວນອະທິດຖານເລື່ອງຫຍັງແລະສອນໃຫ້ເຮົາຈັດລຳດັບຄວາມສຳຄັນເລື່ອງທີ່ຈະເວົ້າໃນຄຳອະທິດຖານ. ໃຫ້ເຮົາມາເບິ່ງສິ່ງທີ່ພະເຢຊູເວົ້າໃນຄຳອະທິດຖານຢ່າງລະອຽດ. ຄຳອະທິດຖານນີ້ມີບັນທຶກໄວ້ໃນມັດທາຍ 6:9-13.
  
  “ພະເຈົ້າ ພໍ່ຂອງພວກເຮົາທີ່ຢູ່ໃນສະຫວັນ ຂໍໃຫ້ຊື່ຂອງພະອົງເປັນທີ່ເຄົາລົບນັບຖືຢູ່ສະເໝີ.”
  
  ພະເຢຊູເວົ້າແບບນີ້ເພື່ອໃຫ້ລູກສິດຈື່ວ່າເມື່ອອະທິດຖານຄວນອະທິດຖານເຖິງພະເຢໂຫວາພໍ່ຂອງເພິ່ນເທົ່ານັ້ນ. ແຕ່ເຈົ້າຮູ້ບໍວ່າເປັນຫຍັງຊື່ຂອງພະເຈົ້າຈຶ່ງສຳຄັນຫຼາຍແລະເປັນຫຍັງຕ້ອງເຮັດໃຫ້ຊື່ນີ້ເປັນທີ່ເຄົາລົບນັບຖືຢູ່ສະເໝີ?
  
  ຕັ້ງແຕ່ຕອນເລີ່ມຕົ້ນປະຫວັດສາດມະນຸດ ຊື່ທີ່ບໍລິສຸດຂອງພະເຈົ້າຖືກເຮັດໃຫ້ມົວໝອງໂດຍຄຳຕົວະ. ຊາຕານ ສັດຕູຂອງພະເຢໂຫວາກ່າວຫາເພິ່ນວ່າເປັນຜູ້ປົກຄອງທີ່ຂີ້ຕົວະ ເຫັນແກ່ໂຕ ແລະບໍ່ມີສິດຢ່າງແທ້ຈິງທີ່ຈະປົກຄອງສິ່ງທີ່ເພິ່ນສ້າງ. (ຕົ້ນເດີມ 3:1-6) ຫຼາຍຄົນເຂົ້າຂ້າງຊາຕານໂດຍສອນວ່າພະເຈົ້າເຢັນຊາ ໂຫດຫ້ຽມ ແລະອາຄາດພະຍາບາດ ທັງຍັງບໍ່ຍອມຮັບວ່າເພິ່ນເປັນພະຜູ້ສ້າງເລີຍດ້ວຍຊ້ຳ. ບາງຄົນເຖິງຂັ້ນລົບຫຼູ່ຊື່ຂອງເພິ່ນໂດຍລຶບຊື່ເຢໂຫວາອອກຈາກຄຳພີໄບເບິນຫຼາຍສະບັບແລະຫ້າມບໍ່ໃຫ້ໃຊ້ຊື່ນີ້.
  
  ຄຳພີໄບເບິນບອກໃຫ້ຮູ້ວ່າພະເຈົ້າຈະແກ້ໄຂການກະທຳທີ່ບໍ່ຍຸຕິທຳເຫຼົ່ານີ້ທັງໝົດ. (ເອເຊກຽນ 39:7) ການທີ່ເພິ່ນເຮັດແບບນັ້ນຈະເປັນຜົນດີກັບເຈົ້ານຳ ເພາະບັນຫາທັງໝົດຂອງເຈົ້າຈະໄດ້ຮັບການແກ້ໄຂແລະເພິ່ນຈະເບິ່ງແຍງເຈົ້າທຸກເລື່ອງ. ພະເຈົ້າຈະເຮັດໂດຍວິທີໃດ? ຄຳເວົ້າຕໍ່ໄປຂອງພະເຢຊູໃນຄຳອະທິດຖານຈະໃຫ້ຄຳຕອບ.
  
  “ຂໍໃຫ້ການປົກຄອງຂອງພະອົງມາທີ່ໂລກນີ້.”
  
  ໃນທຸກມື້ນີ້ ສິ່ງທີ່ພວກຜູ້ສອນສາສະໜາສອນເລື່ອງການປົກຄອງຂອງພະເຈົ້າເຮັດໃຫ້ຫຼາຍຄົນສັບສົນ. ແຕ່ລູກສິດຂອງພະເຢຊູຮູ້ວ່າຜູ້ພະຍາກອນຂອງພະເຈົ້າໄດ້ບອກໄວ້ລ່ວງໜ້າດົນມາແລ້ວວ່າ ເມຊີອາຜູ້ຊ່ວຍໃຫ້ລອດທີ່ພະເຈົ້າໄດ້ເລືອກໄວ້ຈະປົກຄອງໃນການປົກຄອງຂອງພະເຈົ້າເຊິ່ງຈະເຮັດໃຫ້ເກີດການປ່ຽນແປງເທິງໂລກ. (ເອຊາອີ 9:6, 7; ດານຽນ 2:44) ການປົກຄອງນີ້ຈະເຮັດໃຫ້ຊື່ຂອງພະເຈົ້າເປັນທີ່ເຄົາລົບນັບຖືຢູ່ສະເໝີໂດຍເປີດໂປງຄຳຕົວະຂອງຊາຕານ ແລ້ວຫຼັງຈາກນັ້ນກໍຈະທຳລາຍຊາຕານແລະທຸກສິ່ງທີ່ມັນໄດ້ເຮັດໄວ້. ການປົກຄອງຂອງພະເຈົ້າຈະເຮັດໃຫ້ສົງຄາມ ຄວາມເຈັບປ່ວຍ ຄວາມອຶດຢາກ ແລະແມ່ນແຕ່ຄວາມຕາຍໝົດໄປ. (ຄຳເພງ 46:9; 72:12-16; ເອຊາອີ 25:8; 33:24) ການທີ່ເຈົ້າອະທິດຖານຂໍໃຫ້ການປົກຄອງຂອງພະເຈົ້າມາກໍສ່ຳກັບວ່າເຈົ້າກຳລັງອະທິດຖານຂໍໃຫ້ຄຳສັນຍາເຫຼົ່ານີ້ທັງໝົດເກີດຂຶ້ນແທ້.
  
  “ຂໍໃຫ້ທຸກຢ່າງໃນໂລກແລະໃນສະຫວັນເປັນໄປຕາມທີ່ພະອົງຕ້ອງການໃຫ້ເປັນ.”
  
  ຄຳເວົ້າຂອງພະເຢຊູບອກໃຫ້ຮູ້ວ່າຄວາມຕ້ອງການຂອງພະເຈົ້າຈະຕ້ອງສຳເລັດເທິງໂລກຢ່າງແນ່ນອນຄືກັບທີ່ໄດ້ສຳເລັດໃນສະຫວັນເຊິ່ງເປັນບ່ອນຢູ່ຂອງພະເຈົ້າ. ຄວາມຕ້ອງການຂອງພະເຈົ້າໄດ້ສຳເລັດແລ້ວໃນສະຫວັນແບບທີ່ບໍ່ມີໃຜຂັດຂວາງໄດ້ ຢູ່ຫັ້ນລູກຂອງເພິ່ນໄດ້ເຮັດສົງຄາມກັບຊາຕານແລະພວກຂອງມັນແລ້ວຖິ້ມພວກມັນລົງມາໃນໂລກ. (ພະນິມິດ 12:9-12) ຄືກັບຄຳຂໍ 2 ຢ່າງກ່ອນໜ້ານັ້ນ ຄຳຂໍຢ່າງທີ 3 ໃນຄຳອະທິດຖານແບບຢ່າງຂອງພະເຢຊູ ຊ່ວຍເຮົາໃຫ້ຄິດເຖິງຄວາມຕ້ອງການຂອງພະເຈົ້າເປັນອັນດັບທຳອິດສະເໝີ ບໍ່ແມ່ນຄວາມຕ້ອງການຂອງໂຕເຮົາເອງ. ແລະຄວາມຕ້ອງການຂອງພະເຈົ້າຈະເຮັດໃຫ້ເກີດຜົນດີທີ່ສຸດຕໍ່ສິ່ງທີ່ເພິ່ນສ້າງທັງໝົດ. ດັ່ງນັ້ນ ແມ່ນແຕ່ພະເຢຊູທີ່ເປັນມະນຸດສົມບູນແບບກໍຍັງເວົ້າກັບພໍ່ຂອງເພິ່ນວ່າ: “ຢ່າໃຫ້ເປັນຕາມໃຈຂອງລູກ ຂໍໃຫ້ເປັນໄປຕາມທີ່ພໍ່ຕ້ອງການ.”—ລູກາ 22:42
  
  “ຂໍໃຫ້ພວກເຮົາມີອາຫານກິນໃນມື້ນີ້.”
  
  ຄຳຂໍນີ້ຂອງພະເຢຊູສະແດງໃຫ້ເຫັນວ່າເຮົາສາມາດຂໍສຳລັບໂຕເອງໄດ້ນຳ. ບໍ່ຜິດທີ່ເຮົາຈະຂໍພະເຈົ້າເບິ່ງແຍງເຮົາໃຫ້ມີສິ່ງຈຳເປັນໃນແຕ່ລະມື້. ທີ່ຈິງ ການຂໍແບບນີ້ຈະຊ່ວຍເຮົາໃຫ້ຄິດຢູ່ສະເໝີວ່າພະເຢໂຫວາ “ເປັນຜູ້ທີ່ໃຫ້ຊີວິດ ລົມຫາຍໃຈ ແລະທຸກສິ່ງທຸກຢ່າງແກ່ມະນຸດທຸກຄົນ.” (ກິດຈະການ 17:25) ຄຳພີໄບເບິນບອກໃຫ້ຮູ້ວ່າເພິ່ນເປັນພໍ່ທີ່ມີຄວາມຮັກເຊິ່ງຍິນດີທີ່ຈະໃຫ້ທຸກສິ່ງທີ່ຈຳເປັນກັບລູກຂອງເພິ່ນ. ຄືກັບພໍ່ທີ່ດີ ເພິ່ນຈະບໍ່ເຮັດຕາມຄຳຂໍທີ່ອາດເປັນຜົນເສຍຕໍ່ໂຕລູກ.
  
  “ຂໍພະອົງຍົກໂທດໃຫ້ພວກເຮົາ.”
  
  ເຈົ້າຈຳເປັນຕ້ອງໄດ້ຮັບການອະໄພບາບຈາກພະເຈົ້າບໍ? ຫຼາຍຄົນໃນທຸກມື້ນີ້ບໍ່ມີຄວາມສຳນຶກໃນເລື່ອງບາບຫຼືຄວາມຮ້າຍແຮງຂອງບາບອີກຕໍ່ໄປ. ແຕ່ຄຳພີໄບເບິນສອນວ່າບາບເປັນຕົ້ນເຫດຂອງສິ່ງທີ່ຊົ່ວຮ້າຍທີ່ສຸດທີ່ເກີດຂຶ້ນກັບເຮົາ ຍ້ອນບາບເປັນໂຕການສຳຄັນທີ່ເຮັດໃຫ້ມະນຸດຕາຍ. ເນື່ອງຈາກເຮົາເກີດມາເປັນຄົນບາບ ເຮົາຈຶ່ງເຮັດຜິດເລື້ອຍໆ ແລະວິທີດຽວທີ່ຈະເຮັດໃຫ້ເຮົາຢູ່ຕະຫຼອດໄປໄດ້ຄືເຮົາຕ້ອງໄດ້ຮັບການອະໄພຈາກພະເຈົ້າ. (ໂຣມ 3:23; 5:12; 6:23) ເຮົາສະບາຍໃຈທີ່ຮູ້ວ່າຄຳພີໄບເບິນບອກແບບນີ້: “ພະເຢໂຫວາ ພະອົງດີແທ້ໆແລະພ້ອມຈະໃຫ້ອະໄພ.”—ຄຳເພງ 86:5, ລ.ມ.
  
  “ຂໍຊ່ວຍພວກເຮົາໃຫ້ພົ້ນຈາກຕົວຊົ່ວຮ້າຍ.”
  
  ເຈົ້າຮູ້ບໍວ່າເປັນເລື່ອງດ່ວນແລະຈຳເປັນຫຼາຍສ່ຳໃດ ທີ່ເຈົ້າຈະຕ້ອງໄດ້ຮັບການປົກປ້ອງຈາກພະເຈົ້າ? ຫຼາຍຄົນບໍ່ເຊື່ອວ່າ ຊາຕານ “ຕົວຊົ່ວຮ້າຍ” ມີຢູ່ແທ້. ແຕ່ພະເຢຊູສອນວ່າຊາຕານມີຕົວຕົນຢູ່ແທ້ແລະເຖິງຂັ້ນເອີ້ນມັນວ່າ “ຜູ້ປົກຄອງໂລກ.” (ໂຢຮັນ 12:31; 16:11) ຊາຕານໄດ້ທຳລາຍໂລກທີ່ມັນຄອບຄອງຢູ່ນີ້ ແລະມັນກໍຫາທາງທີ່ຈະທຳລາຍເຈົ້າ ແລະຂັດຂວາງບໍ່ໃຫ້ເຈົ້າມີສາຍສຳພັນທີ່ໃກ້ຊິດກັບພະເຢໂຫວາພໍ່ຂອງເຈົ້າທີ່ຢູ່ໃນສະຫວັນ. (1 ເປໂຕ 5:8) ແຕ່ພະເຢໂຫວາມີພະລັງອຳນາດຫຼາຍກວ່າຊາຕານຫຼາຍແລະຍິນດີທີ່ຈະປົກປ້ອງຜູ້ທີ່ຮັກເພິ່ນ.
  
  ຄຳອະທິດຖານແບບຢ່າງຂອງພະເຢຊູທີ່ເຮົາໄດ້ເບິ່ງນຳກັນໃນບົດຄວາມນີ້ບໍ່ໄດ້ກວມເອົາທຸກເລື່ອງທີ່ອາດເວົ້າໄດ້ໃນຄຳອະທິດຖານ. ຂໍໃຫ້ຈື່ໄວ້ວ່າ 1 ໂຢຮັນ 5:14 ບອກເຮົາກ່ຽວກັບພະເຈົ້າວ່າ: “ຖ້າພວກເຮົາຂໍສິ່ງໃດກໍຕາມທີ່ສອດຄ່ອງກັບຄວາມຕ້ອງການຂອງພະອົງ ພະອົງຈະຟັງພວກເຮົາ.” ດັ່ງນັ້ນ ບໍ່ວ່າເຈົ້າຈະມີບັນຫາຫຍັງ ຂໍເຈົ້າຢ່າຄິດວ່າບັນຫາຂອງເຈົ້າເປັນເລື່ອງເລັກນ້ອຍເກີນກວ່າຈະບອກເລື່ອງນັ້ນກັບພະເຈົ້າ.—1 ເປໂຕ 5:7
  
  ແລ້ວຈະວ່າແນວໃດໃນເລື່ອງເວລາແລະສະຖານທີ່ສຳລັບອະທິດຖານ? ສິ່ງເຫຼົ່ານີ້ເປັນເລື່ອງສຳຄັນບໍ?

5 ເວລາແລະສະຖານທີ່ສຳຄັນບໍ?

ຫໍສັງເກດການ—2010 | 1 ຕຸລາ
- 5 ເວລາແລະສະຖານທີ່ສຳຄັນບໍ?
  
  ເຈົ້າຄືຊິສັງເກດວ່າສາສະໜາສ່ວນຫຼາຍໃຫ້ຄວາມສຳຄັນກັບສະຖານທີ່ອະທິດຖານທີ່ໃຫຍ່ໂຕຫຼູຫຼາແລະຍັງກຳນົດນຳວ່າຄວນອະທິດຖານເວລາໃດ. ຄຳພີໄບເບິນມີຂໍ້ກຳນົດບໍວ່າຄວນອະທິດຖານຢູ່ໃສແລະຕອນໃດ?
  
  ແທ້ໆແລ້ວຄຳພີໄບເບິນບອກໃຫ້ຮູ້ວ່າມີໂອກາດໃດແດ່ທີ່ຈະອະທິດຖານໄດ້. ຕົວຢ່າງເຊັ່ນ ກ່ອນທີ່ພະເຢຊູຈະກິນເຂົ້າກັບພວກລູກສິດ ເພິ່ນໄດ້ອະທິດຖານຂອບໃຈພະເຈົ້າ. (ລູກາ 22:17) ແລະເມື່ອພວກລູກສິດຂອງເພິ່ນມາປະຊຸມເພື່ອນະມັດສະການພະເຈົ້າ ເຂົາເຈົ້າກໍອະທິດຖານຮ່ວມກັນ. ນັ້ນເປັນທຳນຽມທີ່ເຮັດມາດົນແລ້ວໃນບ່ອນປະຊຸມຂອງຄົນຢິວແລະໃນວິຫານຢູ່ເມືອງເຢຣູຊາເລັມ. ພະເຈົ້າໃຫ້ມີວິຫານເພື່ອເປັນ “ວິຫານສຳລັບການອະທິດຖານຂອງຄົນທຸກຊາດ.”—ມາຣະໂກ 11:17
  
  ເມື່ອຜູ້ຮັບໃຊ້ຂອງພະເຈົ້າມາປະຊຸມກັນແລະອະທິດຖານນຳກັນ ພະເຈົ້າກໍຟັງຄຳອະທິດຖານຂອງເຂົາເຈົ້າ. ຖ້າຄວາມຄິດຈິດໃຈຂອງເຂົາເຈົ້າເປັນນ້ຳໜຶ່ງໃຈດຽວກັນແລະຄຳອະທິດຖານທີ່ຂໍເພື່ອປະໂຫຍດຂອງເຂົາເຈົ້າສອດຄ່ອງກັບຫຼັກການໃນຄຳພີໄບເບິນ ພະເຈົ້າກໍຈະພໍໃຈ. ຄຳອະທິດຖານນັ້ນອາດເຖິງກັບກະຕຸ້ນພະເຈົ້າໃຫ້ເຮັດສິ່ງທີ່ເພິ່ນອາດບໍ່ຄິດຈະເຮັດດ້ວຍຊ້ຳ. (ເຮັບເຣີ 13:18, 19) ພະຍານພະເຢໂຫວາອະທິດຖານເປັນປະຈຳຢູ່ການປະຊຸມຂອງເຂົາເຈົ້າ. ເຮົາຍິນດີເຊີນເຈົ້າມາທີ່ຫໍປະຊຸມລາຊະອານາຈັກທີ່ຢູ່ໃກ້ເຮືອນເຈົ້າແລະຟັງຄຳອະທິດຖານເຫຼົ່ານີ້ດ້ວຍໂຕເຈົ້າເອງ.
  
  ແນວໃດກໍຕາມ ຄຳພີໄບເບິນບໍ່ໄດ້ກຳນົດວ່າຄວນອະທິດຖານເວລາໃດແລະຢູ່ໃສ. ໃນຄຳພີໄບເບິນ ເຮົາພົບວ່າຜູ້ຮັບໃຊ້ຂອງພະເຈົ້າອະທິດຖານທຸກບ່ອນທຸກເວລາ. ພະເຢຊູເວົ້າວ່າ: “ເມື່ອອະທິດຖານ ໃຫ້ເຂົ້າໄປໃນຫ້ອງສ່ວນຕົວ ອັດປະຕູແລະອະທິດຖານເຖິງພະເຈົ້າຜູ້ເປັນພໍ່ທີ່ເຈົ້າເບິ່ງບໍ່ເຫັນ ແລ້ວພະອົງຜູ້ເຫັນທຸກສິ່ງທີ່ເຈົ້າເຮັດກໍຈະໃຫ້ລາງວັນເຈົ້າ.”—ມັດທາຍ 6:6
  
  ເຮົາສາມາດອະທິດຖານໄດ້ທຸກບ່ອນທຸກເວລາ
  
  ນີ້ເປັນຄຳເວົ້າທີ່ເຮັດໃຫ້ອົບອຸ່ນໃຈແມ່ນບໍ? ເຈົ້າສາມາດເຂົ້າຫາຜູ້ທີ່ຍິ່ງໃຫຍ່ສູງສຸດໃນເອກະພົບໄດ້ເປັນສ່ວນໂຕບໍ່ວ່າເວລາໃດ ແລະໝັ້ນໃຈໄດ້ວ່າເພິ່ນຈະຟັງເຈົ້າແນ່ນອນ. ຍ້ອນແນວນີ້ ພະເຢຊູຈຶ່ງມັກຫາເວລາຢູ່ຜູ້ດຽວເພື່ອອະທິດຖານ! ມີເທື່ອໜຶ່ງເພິ່ນອະທິດຖານເຖິງພະເຈົ້າໝົດຄືນເລີຍ ເບິ່ງຄືວ່າເພິ່ນເຮັດແບບນັ້ນເພື່ອຂໍການຊີ້ນຳກ່ອນຈະຕັດສິນໃຈເລື່ອງສຳຄັນ.—ລູກາ 6:12, 13
  
  ຊາຍຍິງຄົນອື່ນໆໃນຄຳພີໄບເບິນໄດ້ອະທິດຖານເມື່ອຕ້ອງຕັດສິນໃຈເລື່ອງທີ່ສຳຄັນຫຼືຕອນທີ່ເຈິບັນຫາທີ່ເຮັດໃຫ້ຢ້ານ. ບາງເທື່ອເຂົາເຈົ້າອະທິດຖານໂດຍເວົ້າອອກສຽງແລະບາງເທື່ອກໍອະທິດຖານຢູ່ໃນໃຈ ເຂົາເຈົ້າອະທິດຖານເປັນກຸ່ມແລະອະທິດຖານຄົນດຽວ. ບໍ່ວ່າຈະເປັນແນວໃດ ສິ່ງສຳຄັນກໍຄືເຂົາເຈົ້າອະທິດຖານ. ພະເຈົ້າເຖິງກັບເຊີນຜູ້ຮັບໃຊ້ຂອງເພິ່ນວ່າ: “ອະທິດຖານເປັນປະຈຳ.” (1 ເທຊະໂລນິກ 5:17) ເພິ່ນເຕັມໃຈຟັງຄຳອະທິດຖານຂອງຄົນທີ່ເຮັດຕາມຄວາມຕ້ອງການຂອງເພິ່ນສະເໝີ. ຄຳເຊີນນີ້ເຮັດໃຫ້ເຫັນວ່າເພິ່ນຮັກແລະສົນໃຈມະນຸດບໍ່ແມ່ນບໍ?
  
  ແນວໃດກໍຕາມ ໃນໂລກທຸກມື້ນີ້ທີ່ບໍ່ສາມາດເຊື່ອຫຍັງໄດ້ງ່າຍໆ ຫຼາຍຄົນອາດສົງໄສວ່າ ‘ການອະທິດຖານຈະຊ່ວຍໄດ້ແທ້ໆບໍ?’ ເຈົ້າຄິດແບບນັ້ນນຳບໍ?

6 ຈະຊ່ວຍໄດ້ບໍ?

ຫໍສັງເກດການ—2010 | 1 ຕຸລາ
- 6 ຈະຊ່ວຍໄດ້ບໍ?
  
  ການອະທິດຖານເປັນປະໂຫຍດຕໍ່ເຮົາບໍ? ຄຳພີໄບເບິນສະແດງໃຫ້ເຫັນວ່າຜູ້ຮັບໃຊ້ທີ່ສັດຊື່ຂອງພະເຈົ້າໄດ້ຮັບປະໂຫຍດຫຼາຍແທ້ໆຈາກການອະທິດຖານ. (ລູກາ 22:40; ຢາໂກໂບ 5:13) ທີ່ຈິງ ການອະທິດຖານຊ່ວຍເຮົາໃຫ້ມີສາຍສຳພັນທີ່ໃກ້ຊິດກັບພະເຈົ້າແລະເປັນປະໂຫຍດຕໍ່ເຮົາທັງດ້ານຮ່າງກາຍແລະຈິດໃຈນຳ. ເປັນແບບນັ້ນໄດ້ແນວໃດ?
  
  ສົມມຸດວ່າລູກຂອງເຈົ້າໄດ້ຮັບຂອງຂວັນຈາກຜູ້ໃດຜູ້ໜຶ່ງ. ເຈົ້າຈະສອນລູກໃຫ້ຮູ້ສຶກຂອບໃຈເທົ່ານັ້ນບໍ? ຫຼືເຈົ້າຈະສອນລາວໃຫ້ເວົ້າຂອບໃຈນຳ? ເມື່ອເຮົາສະແດງຄວາມຮູ້ສຶກທີ່ສຳຄັນອອກມາເປັນຄຳເວົ້າ ເຮົາກໍກຳລັງໃຫ້ຄວາມສຳຄັນກັບຄວາມຮູ້ສຶກນັ້ນແລະເຖິງກັບເຮັດໃຫ້ໂຕເອງຮູ້ສຶກແບບນັ້ນຫຼາຍຂຶ້ນອີກ. ເປັນແບບນັ້ນນຳບໍໃນການເວົ້າກັບພະເຈົ້າ? ແນ່ນອນ! ໃຫ້ເຮົາເບິ່ງບາງຕົວຢ່າງນຳກັນ.
  
  ຄຳອະທິດຖານຂອບໃຈ. ເມື່ອເຮົາຂອບໃຈພໍ່ຂອງເຮົາທີ່ຢູ່ໃນສະຫວັນສຳລັບສິ່ງດີໆທີ່ເຮົາໄດ້ຮັບ ເຮົາກໍກຳລັງຄິດເຖິງແຕ່ສິ່ງທີ່ດີ. ຜົນກໍຄືເຮົາຈະຮູ້ສຶກຂອບໃຈພະເຈົ້າຫຼາຍຂຶ້ນ ມີຄວາມສຸກຫຼາຍຂຶ້ນ ແລະຄິດໃນແງ່ບວກຫຼາຍຂຶ້ນ.—ຟີລິບປອຍ 4:6
  
  ຕົວຢ່າງ: ພະເຢຊູສະແດງຄວາມຂອບໃຈພະເຢໂຫວາພໍ່ທີ່ຢູ່ໃນສະຫວັນທີ່ຟັງແລະຕອບຄຳອະທິດຖານຂອງເພິ່ນ.—ໂຢຮັນ 11:41
  
  ຄຳອະທິດຖານຂໍການອະໄພ. ເມື່ອເຮົາຂໍພະເຈົ້າໃຫ້ອະໄພເຮົາ ເຮົາກໍມີໃຈຮູ້ຜິດຮູ້ຖືກດີຂຶ້ນ ເສຍໃຈຕໍ່ສິ່ງທີ່ໄດ້ເຮັດໄປຫຼາຍຂຶ້ນ ແລະສຳນຶກເຖິງຄວາມຮ້າຍແຮງຂອງບາບຫຼາຍຂຶ້ນ. ນອກຈາກນັ້ນ ເຮົາຈະບໍ່ທຸກໃຈຍ້ອນຄວາມຮູ້ສຶກຜິດອີກຕໍ່ໄປ.
  
  ຕົວຢ່າງ: ດາວິດອະທິດຖານເພື່ອສະແດງວ່າລາວກັບໃຈແລະເສຍໃຈ.—ຄຳເພງ ບົດ 51
  
  ຄຳອະທິດຖານຂໍການຊີ້ນຳແລະສະຕິປັນຍາ. ການອະທິດຖານຂໍໃຫ້ພະເຢໂຫວາຊີ້ນຳຫຼືໃຫ້ສະຕິປັນຍາກັບເຮົາເພື່ອຈະຕັດສິນໃຈໄດ້ຢ່າງດີຈະຊ່ວຍເຮົາໃຫ້ເປັນຄົນຖ່ອມແທ້ໆ. ການອະທິດຖານແບບນັ້ນຊ່ວຍເຮົາໃຫ້ຄິດເຖິງຂີດຈຳກັດຂອງໂຕເອງແລະໄວ້ວາງໃຈພໍ່ທີ່ຢູ່ໃນສະຫວັນຂອງເຮົາຫຼາຍຂຶ້ນ.—ສຸພາສິດ 3:5, 6
  
  ຕົວຢ່າງ: ໂຊໂລໂມນອະທິດຖານດ້ວຍຄວາມຖ່ອມໃຈເພື່ອຂໍການຊີ້ນຳແລະສະຕິປັນຍາໃນການປົກຄອງຊາດອິດສະຣາເອນ.—1 ກະສັດ 3:5-12
  
  ຄຳອະທິດຖານເມື່ອທຸກໃຈ. ເມື່ອເຮົາລະບາຍຄວາມໃນໃຈຕໍ່ພະເຈົ້າຕອນທີ່ເຮົາກະວົນກະວາຍໃຈ ໃຈຂອງເຮົາກໍຈະສະຫງົບແລະເຮົາຈະເພິ່ງພະເຢໂຫວາແທນທີ່ຈະເພິ່ງໂຕເອງ.—ຄຳເພງ 62:8
  
  ຕົວຢ່າງ: ກະສັດອາຊາອະທິດຖານເມື່ອປະເຊີນໜ້າກັບສັດຕູທີ່ເປັນຕາຢ້ານ.—2 ຂ່າວຄາວ 14:11
  
  ຄຳອະທິດຖານເພື່ອຄົນອື່ນ. ການອະທິດຖານແບບນີ້ຈະຊ່ວຍເຮົາບໍ່ໃຫ້ເປັນຄົນເຫັນແກ່ໂຕ ມີຄວາມເມດຕາສົງສານແລະຄວາມເຫັນອົກເຫັນໃຈຫຼາຍຂຶ້ນ.
  
  ຕົວຢ່າງ: ພະເຢຊູອະທິດຖານເພື່ອລູກສິດຂອງເພິ່ນ.—ໂຢຮັນ 17:9-17
  
  ຄຳອະທິດຖານເພື່ອສັນລະເສີນພະເຈົ້າ. ເມື່ອເຮົາສັນລະເສີນພະເຢໂຫວາສຳລັບຄຸນລັກສະນະທີ່ດີເລີດແລະວຽກທີ່ໜ້າງຶດງໍ້ຂອງເພິ່ນ ເຮົາກໍຈະຮູ້ສຶກເຄົາລົບນັບຖືແລະສຳນຶກບຸນຄຸນເພິ່ນຫຼາຍຂຶ້ນ. ການອະທິດຖານແບບນັ້ນຍັງຊ່ວຍເຮົາໃຫ້ໃກ້ຊິດພະເຈົ້າພໍ່ຂອງເຮົາທີ່ຢູ່ໃນສະຫວັນຫຼາຍຂຶ້ນນຳ.
  
  ຕົວຢ່າງ: ດາວິດສັນລະເສີນພະເຈົ້າດ້ວຍຄວາມຮູ້ສຶກຈາກໃຈສຳລັບສິ່ງຕ່າງໆທີ່ເພິ່ນໄດ້ສ້າງ.—ຄຳເພງ ບົດ 8
  
  ປະໂຫຍດອີກຢ່າງໜຶ່ງຂອງການອະທິດຖານກໍຄືເຮົາຈະມີ “ສັນຕິສຸກຂອງພະເຈົ້າທີ່ເກີນຄວາມເຂົ້າໃຈທຸກຢ່າງ.” (ຟີລິບປອຍ 4:7) ການມີໃຈທີ່ສະຫງົບເປັນສິ່ງທີ່ພິເສດຫຼາຍໃນໂລກທີ່ວຸ່ນວາຍນີ້ແລະຍັງເປັນຜົນດີຕໍ່ສຸຂະພາບຂອງເຮົານຳອີກ. (ສຸພາສິດ 14:30) ແຕ່ການມີໃຈທີ່ສະຫງົບເປັນຜົນມາຈາກຄວາມພະຍາຍາມຂອງເຮົາເທົ່ານັ້ນບໍ? ຫຼືມີຢ່າງອື່ນທີ່ສຳຄັນກວ່າກ່ຽວຂ້ອງນຳ?
  
  ການອະທິດຖານເປັນປະໂຫຍດຕໍ່ເຮົາທັງດ້ານຮ່າງກາຍແລະຈິດໃຈ ແລະທີ່ສຳຄັນຊ່ວຍເຮົາໃຫ້ມີສາຍສຳພັນທີ່ໃກ້ຊິດກັບພະເຈົ້າ

7 ພະເຈົ້າຈະຟັງແລະຕອບບໍ?

ຫໍສັງເກດການ—2010 | 1 ຕຸລາ
- 7 ພະເຈົ້າຈະຟັງແລະຕອບບໍ?
  
  ຄຳຖາມນີ້ກະຕຸ້ນຄວາມສົນໃຈແລະຄວາມຢາກຮູ້ຢາກເຫັນ. ຄຳພີໄບເບິນສະແດງໃຫ້ເຫັນວ່າພະເຢໂຫວາຟັງຄຳອະທິດຖານຂອງຜູ້ຄົນໃນທຸກມື້ນີ້ແທ້ໆ. ແຕ່ເພິ່ນຈະຟັງຄຳອະທິດຖານຂອງເຮົາຫຼືບໍ່ນັ້ນ ສ່ວນຫຼາຍແລ້ວກໍຂຶ້ນຢູ່ກັບໂຕເຮົາເອງ.
  
  ພະເຢຊູໄດ້ຕຳໜິຜູ້ນຳສາສະໜາໃນສະໄໝຂອງເພິ່ນທີ່ອະທິດຖານແບບໜ້າຊື່ໃຈຄົດ ຍ້ອນເຂົາເຈົ້າອະທິດຖານພຽງເພື່ອຈະໃຫ້ຄົນອື່ນເຫັນວ່າເຂົາເຈົ້າເຄັ່ງສາສະໜາ. ເພິ່ນເວົ້າວ່າຄົນເຫຼົ່ານັ້ນຈະໄດ້ “ລາງວັນສ່ຳນັ້ນແຫຼະ” ເຊິ່ງໝາຍຄວາມວ່າຄົນເຫຼົ່ານັ້ນຈະໄດ້ແຕ່ສິ່ງທີ່ເຂົາເຈົ້າຢາກໄດ້ຫຼາຍທີ່ສຸດນັ້ນຄືການຍ້ອງຍໍຈາກມະນຸດ ແຕ່ເຂົາເຈົ້າຈະບໍ່ໄດ້ສິ່ງທີ່ສຳຄັນທີ່ສຸດນັ້ນກໍຄືການທີ່ພະເຈົ້າຮັບຟັງຄຳອະທິດຖານຂອງເຂົາເຈົ້າ. (ມັດທາຍ 6:5) ທຸກມື້ນີ້ກໍຄືກັນ ຫຼາຍຄົນອະທິດຖານຕາມວິທີຂອງໂຕເອງບໍ່ແມ່ນຕາມວິທີຂອງພະເຈົ້າ. ເນື່ອງຈາກເຂົາເຈົ້າບໍ່ສົນໃຈຫຼັກການຂອງຄຳພີໄບເບິນກ່ຽວກັບການອະທິດຖານຄືກັບທີ່ເຮົາໄດ້ພິຈາລະນາໄປແລ້ວ ພະເຈົ້າຈຶ່ງບໍ່ຟັງຄຳອະທິດຖານຂອງເຂົາເຈົ້າ.
  
  ແລ້ວເຈົ້າເດ? ພະເຈົ້າຈະຟັງແລະຕອບຄຳອະທິດຖານຂອງເຈົ້າບໍ? ຄຳຕອບບໍ່ໄດ້ຂຶ້ນຢູ່ກັບວ່າເຈົ້າມີສີຜິວຫຼືເຊື້ອຊາດໃດແລະມີຖານະທາງສັງຄົມແນວໃດ. ຄຳພີໄບເບິນຮັບຮອງກັບເຮົາວ່າ: “ພະເຈົ້າບໍ່ລຳອຽງ ພະອົງຍອມຮັບທຸກຄົນທີ່ຢຳເກງພະອົງແລະເຮັດສິ່ງທີ່ຖືກຕ້ອງ ບໍ່ວ່າລາວຈະເປັນຄົນຊາດໃດກໍຕາມ.” (ກິດຈະການ 10:34, 35) ເຈົ້າເປັນຄົນທີ່ຢຳເກງພະເຈົ້າແລະເຮັດສິ່ງທີ່ຖືກຕ້ອງບໍ? ຖ້າເຈົ້າຢຳເກງພະເຈົ້າ ເຈົ້າຈະເຄົາລົບຍ້ອງຍໍເພິ່ນຢ່າງສູງສຸດແລະບໍ່ຢາກເຮັດໃຫ້ເພິ່ນບໍ່ພໍໃຈ. ເພື່ອຈະເຮັດສິ່ງທີ່ຖືກຕ້ອງ ເຈົ້າຕ້ອງພະຍາຍາມເຮັດສິ່ງທີ່ພະເຈົ້າບອກວ່າຖືກຕ້ອງແທນທີ່ຈະເຮັດຕາມຄວາມຕ້ອງການຂອງໂຕເອງຫຼືຂອງຄົນອື່ນ. ເຈົ້າຢາກໃຫ້ພະເຈົ້າຟັງຄຳອະທິດຖານຂອງເຈົ້າແທ້ໆບໍ? ຄຳພີໄບເບິນບອກໃຫ້ຮູ້ວ່າເຈົ້າຕ້ອງເຮັດແນວໃດ.a
  
  ແມ່ນຢູ່ ຫຼາຍຄົນຢາກໃຫ້ພະເຈົ້າຕອບຄຳອະທິດຖານໂດຍວິທີອັດສະຈັນ. ແຕ່ໃນສະໄໝຄຳພີໄບເບິນກໍມີບໍ່ເທົ່າໃດເທື່ອທີ່ພະເຈົ້າຈະຕອບຄຳອະທິດຖານໂດຍການອັດສະຈັນ. ການອັດສະຈັນແບບນັ້ນບໍ່ໄດ້ເກີດຂຶ້ນຕະຫຼອດ ບາງເທື່ອອາດເວັ້ນໄລຍະຫ່າງກັນເປັນຮ້ອຍໆປີ. ນອກຈາກນັ້ນ ຄຳພີໄບເບິນບອກວ່າຫຼັງຈາກພວກອັກຄະສາວົກຕາຍໝົດແລ້ວ ການອັດສະຈັນຕ່າງໆກໍໝົດໄປ. (1 ໂກຣິນໂທ 13:8-10) ນີ້ໝາຍຄວາມວ່າໃນທຸກມື້ນີ້ພະເຈົ້າບໍ່ຕອບຄຳອະທິດຖານເລີຍບໍ? ບໍ່ແມ່ນແນວນັ້ນ! ໃຫ້ເຮົາມາເບິ່ງຕົວຢ່າງຄຳອະທິດຖານທີ່ໄດ້ຮັບຄຳຕອບຈາກພະເຈົ້າ.
  
  ພະເຈົ້າໃຫ້ສະຕິປັນຍາ. ພະເຢໂຫວາເປັນບໍ່ເກີດຂອງສະຕິປັນຍາແທ້ທັງໝົດ. ເພິ່ນໃຈກວ້າງແລະເຕັມໃຈທີ່ຈະໃຫ້ສະຕິປັນຍາກັບຄົນທີ່ຢາກໄດ້ຮັບການຊີ້ນຳຈາກເພິ່ນແລະພະຍາຍາມໃຊ້ຊີວິດຕາມສະຕິປັນຍານັ້ນ.—ຢາໂກໂບ 1:15
  
  ພະເຈົ້າໃຫ້ພະລັງບໍລິສຸດຂອງເພິ່ນແລະຜົນດີທີ່ເກີດຈາກພະລັງນັ້ນ. ພະລັງບໍລິສຸດແມ່ນພະລັງທີ່ພະເຈົ້າໃຊ້ເຮັດສິ່ງຕ່າງໆ. ບໍ່ມີພະລັງໃດທີ່ຍິ່ງໃຫຍ່ກວ່າພະລັງນີ້. ພະລັງຂອງພະເຈົ້າສາມາດຊ່ວຍເຮົາໃຫ້ອົດທົນກັບການທົດສອບ. ພະລັງນີ້ສາມາດເຮັດໃຫ້ເຮົາມີຄວາມສະຫງົບໃຈເມື່ອມີບັນຫາ. ພະລັງຂອງພະເຈົ້າສາມາດຊ່ວຍເຮົາໃຫ້ປູກຝັງຄຸນລັກສະນະທີ່ດີເລີດແລະໜ້າຮັກອື່ນໆນຳ. (ຄາລາເຕຍ 5:22, 23) ພະເຢຊູຮັບຮອງກັບຜູ້ທີ່ຕິດຕາມເພິ່ນວ່າພະເຈົ້າຈະໃຫ້ພະລັງບໍລິສຸດຢ່າງໃຈກວ້າງ.—ລູກາ 11:13
  
  ພະເຈົ້າຊ່ວຍຄົນທີ່ຊອກຫາເພິ່ນຢ່າງຈິງໃຈໃຫ້ຮູ້ຄວາມຈິງ. (ກິດຈະການ 17:26, 27) ມີຄົນທີ່ພະຍາຍາມຊອກຫາຄວາມຈິງຢູ່ທົ່ວໂລກ. ເຂົາເຈົ້າຢາກຮູ້ເລື່ອງຕ່າງໆກ່ຽວກັບພະເຈົ້າ ເຊັ່ນ ເພິ່ນມີຊື່ວ່າແນວໃດ ເພິ່ນມີຄວາມຕ້ອງການແນວໃດສຳລັບແຜ່ນດິນໂລກແລະມະນຸດ ເຂົາເຈົ້າຈະໃກ້ຊິດເພິ່ນໄດ້ແນວໃດ. (ຢາໂກໂບ 4:8) ຫຼາຍເທື່ອ ພະຍານພະເຢໂຫວາໄດ້ພົບຄົນແບບນັ້ນແລະຍິນດີບອກໃຫ້ເຂົາເຈົ້າຮູ້ຄຳຕອບຈາກຄຳພີໄບເບິນສຳລັບຄຳຖາມເຫຼົ່ານັ້ນ.
  
  ເຈົ້າຮັບວາລະສານນີ້ຍ້ອນຢາກຮູ້ກ່ຽວກັບພະເຈົ້າບໍ? ເຈົ້າກຳລັງຊອກຫາພະເຈົ້າຢູ່ບໍ? ບາງເທື່ອນີ້ອາດເປັນຄຳຕອບຈາກພະເຈົ້າສຳລັບຄຳອະທິດຖານຂອງເຈົ້າກໍໄດ້.
  
  a ສຳລັບລາຍລະອຽດເພີ່ມເຕີມກ່ຽວກັບວິທີອະທິດຖານແບບທີ່ພະເຈົ້າຈະຟັງ ເບິ່ງປຶ້ມຮຽນຄຳພີໄບເບິນແລ້ວໄດ້ຫຍັງ? ບົດທີ 17 ຈັດພິມໂດຍພະຍານພະເຢໂຫວາ.

“ພະເຈົ້າ ພໍ່​ຂອງ​ພວກ​ເຮົາ​ທີ່​ຢູ່​ໃນ​ສະຫວັນ ຂໍ​ໃຫ້​ຊື່​ຂອງ​ພະອົງ​ເປັນ​ທີ່​ເຄົາລົບ​ນັບຖື​ຢູ່​ສະເໝີ.”

“ຂໍ​ໃຫ້​ການ​ປົກຄອງ​ຂອງ​ພະອົງ​ມາ​ທີ່​ໂລກ​ນີ້.”

“ຂໍ​ໃຫ້​ທຸກ​ຢ່າງ​ໃນ​ໂລກ​ແລະ​ໃນ​ສະຫວັນ​ເປັນ​ໄປ​ຕາມ​ທີ່​ພະອົງ​ຕ້ອງການ​ໃຫ້​ເປັນ.”

“ຂໍ​ໃຫ້​ພວກ​ເຮົາ​ມີ​ອາຫານ​ກິນ​ໃນ​ມື້​ນີ້.”

“ຂໍ​ພະອົງ​ຍົກ​ໂທດ​ໃຫ້​ພວກ​ເຮົາ.”

“ຂໍ​ຊ່ວຍ​ພວກ​ເຮົາ​ໃຫ້​ພົ້ນ​ຈາກ​ຕົວ​ຊົ່ວ​ຮ້າຍ.”

“ພະເຈົ້າ ພໍ່ຂອງພວກເຮົາທີ່ຢູ່ໃນສະຫວັນ ຂໍໃຫ້ຊື່ຂອງພະອົງເປັນທີ່ເຄົາລົບນັບຖືຢູ່ສະເໝີ.”

“ຂໍໃຫ້ການປົກຄອງຂອງພະອົງມາທີ່ໂລກນີ້.”

“ຂໍໃຫ້ທຸກຢ່າງໃນໂລກແລະໃນສະຫວັນເປັນໄປຕາມທີ່ພະອົງຕ້ອງການໃຫ້ເປັນ.”

“ຂໍໃຫ້ພວກເຮົາມີອາຫານກິນໃນມື້ນີ້.”

“ຂໍພະອົງຍົກໂທດໃຫ້ພວກເຮົາ.”

“ຂໍຊ່ວຍພວກເຮົາໃຫ້ພົ້ນຈາກຕົວຊົ່ວຮ້າຍ.”