ເຈົ້າຈະແກ້ໄຂຂໍ້ຂັດແຍ່ງແລະສ້າງສັນຕິສຸກບໍ?
ພະເຢໂຫວາຢາກໃຫ້ຜູ້ນະມັດສະການພະອົງມີສັນຕິສຸກແລະໃຫ້ຢູ່ຮ່ວມກັນຢ່າງສັນຕິ. ເມື່ອເປັນແບບນັ້ນ ປະຊາຄົມກໍຈະມີສັນຕິສຸກ ແລະເຮັດໃຫ້ຫຼາຍຄົນເຂົ້າມາສົມທົບນຳ.
ໝໍຜີຄົນໜຶ່ງໃນມາດາກາສະກາ ສັງເກດເຫັນປະຊາຊົນຂອງພະເຈົ້າມີສັນຕິສຸກ ແລະຄິດວ່າ ‘ຖ້າຂ້ອຍຢາກມີສາສະໜາ ຂ້ອຍຈະເລືອກສາສະໜານີ້ແຫຼະ.’ ບໍ່ດົນ ລາວກໍເຊົາເຊື່ອຖືຜີແລະເຮັດໃຫ້ຊີວິດຄູ່ຖືກຕ້ອງຕາມຫຼັກພະຄຳພີ ແລະເຂົ້າມານະມັດສະການພະເຢໂຫວາພະເຈົ້າທີ່ມີສັນຕິສຸກ.
ຄືກັບຊາຍຄົນນັ້ນ ທຸກໆປີມີຫຼາຍແສນຄົນເຂົ້າມາເປັນສ່ວນໜຶ່ງຂອງປະຊາຄົມແລະພົບສັນຕິສຸກທີ່ເຂົາເຈົ້າຢາກໄດ້ມາຕະຫຼອດ. ແຕ່ຄຳພີໄບເບິນບອກວ່າຖ້າໃນປະຊາຄົມມີ ‘ໃຈຫຶງສາ [ໃຈອິດສາ] ອັນຂົມ ແລະໃຈຢາກຖຽງກັນ’ ຈະທຳລາຍມິດຕະພາບແລະສ້າງຄວາມແຕກແຍກ. (ຢາໂກໂບ 3:14-16) ແຕ່ມີຄຳແນະນຳທີ່ດີເຊິ່ງຈະຊ່ວຍໃຫ້ຫຼີກລ່ຽງບັນຫາ ແລະສ້າງສັນຕິສຸກກັບພີ່ນ້ອງ. ໃຫ້ເບິ່ງຕົວຢ່າງຂອງບາງຄົນທີ່ເອົາແນະນຳນີ້ໄປໃຊ້ໃນຊີວິດຈິງ.
ບັນຫາແລະທາງແກ້
“ຂ້ອຍເຮັດວຽກກັບພີ່ນ້ອງຄົນໜຶ່ງແລະມີບັນຫາກັນ. ມີເທື່ອໜຶ່ງເຮົາຮ້ອງໃສ່ກັນແລະມີສອງຄົນເຫັນຕອນທີ່ເຮົາຜິດກັນ.”—ຄລິດ
“ຢູ່ດີໆພີ່ນ້ອງຍິງທີ່ຂ້ອຍມັກໄປປະກາດນຳເລື້ອຍໆກໍຍົກເລີກນັດທີ່ຈະໄປຮັບໃຊ້ນຳກັນ. ແລ້ວລາວກໍບໍ່ລົມກັບຂ້ອຍເລີຍ. ຂ້ອຍບໍ່ຮູ້ວ່າເກີດຫຍັງຂຶ້ນ.”—ເຈເນັດ
“ຂ້ອຍປະຊຸມທາງໂທລະສັບກັບສາມຄົນ. ຄົນໜຶ່ງບອກລາ ຂ້ອຍຄິດວ່າລາວວາງສາຍແລ້ວ ຂ້ອຍຈຶ່ງເວົ້າເລື່ອງບໍ່ດີຂອງລາວສູ່ອີກຄົນໜຶ່ງຟັງ ແຕ່ແທ້ໆແລ້ວລາວຍັງບໍ່ວາງ.”—ໄມເຄິນ
“ໃນປະຊາຄົມໄພໂອເນຍສອງຄົນເລີ່ມມີບັນຫາກັນ. ຄົນໜຶ່ງເວົ້າໃຫ້ອີກຄົນໜຶ່ງ ແລ້ວກໍຖຽງກັນ ເມື່ອຄົນອື່ນໃນປະຊາຄົມເຫັນກໍໝົດກຳລັງໃຈ.”—ແກຣີ
ບັນຫາເຫຼົ່ານີ້ອາດເບິ່ງຄືບໍ່ຮ້າຍແຮງ ແຕ່ອາດເຮັດໃຫ້ຄົນທີ່ກ່ຽວຂ້ອງຮູ້ສຶກບໍ່ດີແລະອາດທຳລາຍສັນຕິສຸກໃນປະຊາຄົມ. ໜ້າດີໃຈທີ່ພີ່ນ້ອງເຮັດຕາມຄຳແນະນຳໃນພະຄຳພີແລະສາມາດມີສັນຕິສຸກນຳກັນອີກ. ເຈົ້າຄິດວ່າພະຄຳພີຂໍ້ໃດແດ່ຈະຊ່ວຍເຂົາເຈົ້າໄດ້?
“ຢ່າຊູ່ພາກັນຖຽງກັນໃນກາງທາງ.” (ຕົ້ນເດີມ 45:24) ໂຢເຊບແນະນຳພວກອ້າຍຢ່າງສຸຂຸມຕອນທີ່ເຂົາເຈົ້າກຳລັງກັບໄປຫາພໍ່. ຖ້າຄົນເຮົາບໍ່ໄດ້ຄວບຄຸມອາລົມແລະປ່ອຍໃຫ້ຕົວເອງຄຽດງ່າຍ ເລື່ອງບໍ່ດີອາດຮ້າຍແຮງຂຶ້ນ. ບາງຄົນກໍໃຈຮ້າຍ. ຄລິດຍອມຮັບວ່າບໍ່ງ່າຍທີ່ຈະຖ່ອມແລະເຮັດຕາມຄຳແນະນຳ. ລາວຢາກປ່ຽນແປງ ດັ່ງນັ້ນຈຶ່ງຂໍໂທດພີ່ນ້ອງຄົນນັ້ນ. ຕໍ່ມາຄລິດໄດ້ພະຍາຍາມຫຼາຍເພື່ອຄວບຄຸມອາລົມຂອງຕົນ. ເມື່ອພີ່ນ້ອງຄົນນັ້ນສັງເກດເຫັນ ລາວກໍເຮັດແບບດຽວກັນ. ຕອນນີ້ເຂົາເຈົ້າຮັບໃຊ້ພະເຢໂຫວາຮ່ວມກັນຢ່າງມີຄວາມສຸກ.
“ຖ້າບໍ່ມີຄວາມປຶກສາກັນຄວາມໝາຍໃຈ [“ແຜນການ,” ລ.ມ.] ກໍບໍ່ຊະນະ.” (ສຸພາສິດ 15:22) ເມື່ອພີ່ນ້ອງຄົນນັ້ນບໍ່ລົມນຳ ເຈເນັດຈຶ່ງເຮັດຕາມຂໍ້ນີ້ ໂດຍໄປປຶກສາຫຼືລົມນຳລາວ. ເຈເນັດຖາມວ່າລາວໄດ້ເຮັດຫຍັງໃຫ້ພີ່ນ້ອງຄົນນັ້ນຄຽດບໍ. ທຳອິດກໍບໍ່ງ່າຍ ແຕ່ທັງສອງກໍຍັງລົມກັນແບບຄ່ອຍເປັນຄ່ອຍໄປຈົນສາມາດລົມກັນໄດ້ງ່າຍຂຶ້ນ. ພີ່ນ້ອງຄົນນີ້ຈຶ່ງຮູ້ວ່າເຂົ້າໃຈຜິດ ແລະເຈເນັດບໍ່ໄດ້ເຮັດຫຍັງຜິດ. ລາວຂໍໂທດເຈເນັດ ຕອນນີ້ເຂົາເຈົ້າກັບມາເປັນໝູ່ກັນແລະຮັບໃຊ້ນຳກັນອີກ.
“ເຫດສັນນີ້ຖ້າທ່ານເອົາເຄື່ອງບູຊາມາຖວາຍເທິງແທ່ນບູຊາແລະທີ່ນັ້ນຈື່ຈຳວ່າພີ່ນ້ອງມີຄວາມປະການໃດປະການໜຶ່ງຕໍ່ທ່ານ ຈົ່ງວາງຂອງຖວາຍລົງໄວ້ຕໍ່ໜ້າແທ່ນນັ້ນ ແລະຈົ່ງໄປກະທຳໃຫ້ດີກັນກັບພີ່ນ້ອງກ່ອນ.” (ມັດທາຍ 5:23, 24) ນີ້ເປັນຄຳແນະນຳຂອງພະເຍຊູ. ຫຼັງຈາກເວົ້າສິ່ງບໍ່ດີໃຫ້ພີ່ນ້ອງຄົນນັ້ນ ໄມເຄິນຮູ້ສຶກເສຍໃຈຫຼາຍ. ລາວຢາກແກ້ໄຂເລື່ອງນັ້ນ ລາວຈຶ່ງໄປຫາພີ່ນ້ອງຄົນນັ້ນເພື່ອຂໍໂທດແລະບອກວ່າລາວເສຍໃຈແທ້ໆ. ຜົນເປັນແນວໃດ? ໄມເຄິນເລົ່າວ່າ: “ພີ່ນ້ອງຍົກໂທດໃຫ້ຂ້ອຍແທ້ໆ.” ແລ້ວເຂົາເຈົ້າກໍກັບມາເປັນໝູ່ກັນອີກ.
“ຈົ່ງອົດກັ້ນໄວ້ກັນແລະກັນ ແລະຍົກໂທດໃຫ້ກັນແລະກັນຖ້າແມ່ນຜູ້ໃດມີຂໍ້ຄວາມຟ້ອງຕໍ່ຄົນອື່ນ.” (ໂກໂລດ 3:12-14) ໄພໂອເນຍສອງຄົນທີ່ຂັດແຍ່ງກັນເຊິ່ງກ່າວເຖິງກ່ອນໜ້ານີ້ ຜູ້ເຖົ້າແກ່ໄດ້ຊ່ວຍຢ່າງກະລຸນາໃຫ້ເຂົາເຈົ້າເຫັນວ່າໄດ້ເຮັດໃຫ້ຄົນອື່ນຮູ້ສຶກບໍ່ດີແລະອຶດອັດ. ລາວເຕືອນທັງສອງໃຫ້ອົດທົນຕໍ່ກັນແລະຮັກສາສັນຕິສຸກໃນປະຊາຄົມ. ເຂົາເຈົ້າຍອມຮັບແລະໃຊ້ຄຳແນະນຳນັ້ນ ແລະຕອນນີ້ກໍຮັບໃຊ້ນຳກັນຢ່າງດີ.
ຖ້າມີຄົນເຮັດໃຫ້ເຈົ້າຮູ້ສຶກເຈັບໃຈ ຄຳແນະນຳໃນໂກໂລດ 3:12-14 ຈະຊ່ວຍເຈົ້າໃຫ້ຖ່ອມໃຈ ໃຫ້ອະໄພ ແລະລືມເລື່ອງນັ້ນໄດ້. ແຕ່ຖ້າເຮົາພະຍາຍາມແລ້ວ ແຕ່ກໍຍັງໃຫ້ອະໄພບໍ່ໄດ້ເດ? ຫຼັກການໃນມັດທາຍ 18:15 ຈະຊ່ວຍໄດ້. ຄຳແນະນຳນີ້ພະເຍຊູເນັ້ນເຖິງຄວາມຜິດທີ່ຮ້າຍແຮງ ແຕ່ຫຼັກການນີ້ຍັງໃຊ້ໄດ້ເມື່ອເຮົາມີບັນຫາກັບພີ່ນ້ອງ. ເຮົາຄວນໄປຫາຄົນນັ້ນເພື່ອລົມກັນດີໆດ້ວຍຄວາມຖ່ອມ ແລະພະຍາຍາມຄືນດີກັນໃຫ້ໄດ້.
ຍັງມີຄຳແນະນຳອື່ນອີກທີ່ໃຊ້ໄດ້. ຖ້າເຮົາຢາກແກ້ໄຂຂໍ້ຂັດແຍ່ງເຮົາຕ້ອງເພິ່ງພະລັງບໍລິສຸດຂອງພະເຈົ້າ ເຊິ່ງຈະຊ່ວຍເຮົາໃຫ້ມີຄຸນລັກສະນະຕ່າງໆທີ່ເປັນ “ຜົນແຫ່ງພະວິນຍານ” ເຊັ່ນ: “ຄວາມຮັກ ຄວາມຍິນດີ ສັນຕິສຸກ ຄວາມອົດທົນ ຄວາມເມດຕາກະລຸນາ ຄວາມດີ ແລະຄວາມສັດຊື່ ຄວາມຖ່ອມຕົວ ແລະການຮູ້ຈັກບັງຄັບຕົນ.” (ຄາລາຊີ 5:22, 23, ທ.ປ.) ເພື່ອໃຫ້ເຄື່ອງຈັກເຮັດວຽກໄດ້ດີເຮົາຕ້ອງຢອດນ້ຳມັນໃສ່ ຄ້າຍຄືກັນຖ້າເຮົາຢາກແກ້ໄຂຂໍ້ຂັດແຍ່ງແລະມີສາຍສຳພັນທີ່ດີຕໍ່ກັນ ເຮົາຕ້ອງສະແດງຄຸນລັກສະນະທີ່ດີຈາກພະເຢໂຫວາ.
ຄວາມແຕກຕ່າງດ້ານນິດໄສເຮັດໃຫ້ປະຊາຄົມມີສີສັນຫຼາຍຂຶ້ນ
ເຮົາແຕ່ລະຄົນມີນິດໄສຕ່າງກັນໃນດ້ານບຸກຄະລິກ ການເບິ່ງສິ່ງຕ່າງໆ ແລະການສະແດງອອກ. ເມື່ອຢູ່ນຳກັນຈຶ່ງເຮັດໃຫ້ມີຄວາມຫຼາກຫຼາຍແລະບໍ່ໜ້າເບື່ອ. ແຕ່ຈຸດນີ້ກໍອາດເຮັດໃຫ້ເຂົ້າໃຈຜິດແລະຂັດແຍ່ງກັນໄດ້. ຜູ້ເຖົ້າແກ່ຄົນໜຶ່ງເຫັນວ່າສິ່ງນີ້ເກີດຂຶ້ນໄດ້ ລາວເລົ່າວ່າ: “ຄົນທີ່ຂີ້ອາຍອາດຈະອຶດອັດເມື່ອຢູ່ກັບຄົນທີ່ມັກສະແດງອອກ. ຄວາມຕ່າງກັນແບບນີ້ອາດເບິ່ງຄືວ່າເປັນເລື່ອງບໍ່ສຳຄັນ ແຕ່ກໍອາດເປັນບັນຫາໃຫຍ່ໄດ້.” ເຈົ້າຄິດວ່າຄົນທີ່ມີນິດໄສຕ່າງກັນເຂົ້າກັນບໍ່ໄດ້ເລີຍບໍ? ໃຫ້ເຮົາເບິ່ງອັກຄະສາວົກສອງຄົນເປັນຕົວຢ່າງ. ຖ້າເວົ້າເຖິງເປໂຕເຮົາກໍຈະຄິດເຖິງຄົນທີ່ກົງໆຄິດແນວໃດກໍເວົ້າອອກມາໂລດ. ຖ້າເວົ້າເຖິງໂຢຮັນເຮົາກໍຄິດເຖິງຄົນທີ່ອົບອຸ່ນ ແລະຄິດກ່ອນເວົ້າຫຼືເຮັດ. ເປໂຕແລະໂຢຮັນມີນິດໄສຕ່າງກັນ ແຕ່ທັງສອງກໍຮັບໃຊ້ພະເຢໂຫວານຳກັນຢ່າງດີ. (ກິດຈະການ 8:14; ຄາລາຊີ 2:9) ເຮົາໃນທຸກມື້ນີ້ກໍຄືກັນ ເຖິງວ່າຈະມີນິດໄສຕ່າງກັນ ແຕ່ເຮົາກໍຮັບໃຊ້ນຳກັນຢ່າງດີ.
ແຕ່ຖ້າບາງຄົນໃນປະຊາຄົມເວົ້າຫຼືເຮັດສິ່ງທີ່ເຈົ້າບໍ່ສະບາຍໃຈເດ? ຈະດີຖ້າເຮົາຈື່ວ່າພະຄລິດໄດ້ຕາຍເພື່ອພີ່ນ້ອງຄົນນັ້ນຄືກັບທີ່ຕາຍເພື່ອເຈົ້າ ແລະເຈົ້າກໍຄວນຮັກພີ່ນ້ອງ. (ໂຢຮັນ 13:34, 35; ໂລມ 5:6-8) ແທນທີ່ຈະໜີໜ້າຫຼືບໍ່ເປັນໝູ່ນຳລາວ ແຕ່ເຈົ້າຄວນຖາມຕົວເອງວ່າ: ‘ພີ່ນ້ອງຄົນນີ້ເຮັດສິ່ງທີ່ຜິດຫຼັກການຂອງພະເຢໂຫວາບໍ? ລາວຕັ້ງໃຈເຮັດໃຫ້ຂ້ອຍເຈັບໃຈບໍ? ຫຼືພຽງແຕ່ເຮົາມີນິດໄສຕ່າງກັນ? ທີ່ຈິງ ຄວນຖາມຕົວເອງວ່າ ນິດໄສທີ່ດີຫຍັງແດ່ທີ່ຂ້ອຍຢາກຮຽນຈາກລາວ?’
ຕົວຢ່າງເຊັ່ນ: ຖ້າລາວມັກເວົ້າແຕ່ເຈົ້າພັດເປັນຄົນມິດງຽບເດ? ໃຫ້ລອງໄປປະກາດນຳກັນ ແລະຮຽນຮູ້ຈາກລາວ. ຫຼືຖ້າລາວເປັນຄົນເອື້ອເຟື້ອຫຼາຍກວ່າເຈົ້າ ເຈົ້າອາດເຫັນວ່າລາວມີຄວາມສຸກຫຼາຍທີ່ໄດ້ຊ່ວຍຄົນສູງອາຍຸ ຄົນເຈັບປ່ວຍ ຫຼືຄົນທີ່ມີຄວາມຈຳເປັນ. ເຈົ້າອາດຮຽນຈາກລາວເພື່ອຈະເປັນຄົນເອື້ອເຟື້ອຫຼາຍຂຶ້ນ. ຈຸດສຳຄັນກໍຄືເຖິງວ່າເຈົ້າມີນິດໄສຕ່າງກັນ ແຕ່ກໍສາມາດເບິ່ງຈຸດທີ່ດີຂອງລາວ. ເຖິງວ່າເປັນໝູ່ສະໜິດກັນບໍ່ໄດ້ ແຕ່ເຈົ້າຈະຮູ້ຈັກກັນຫຼາຍຂຶ້ນ. ສິ່ງນີ້ຈະຊ່ວຍໃຫ້ເຈົ້າແລະປະຊາຄົມມີສັນຕິສຸກ.
ໃນສະຕະວັດທຳອິດມີພີ່ນ້ອງຍິງສອງຄົນຊື່ເອໂວດີແລະຊີນຕີເກ. ເບິ່ງຄືວ່າເຂົາເຈົ້າມີນິດໄສທີ່ຕ່າງກັນຫຼາຍ ແຕ່ໂປໂລໄດ້ກະຕຸ້ນທັງສອງໃຫ້ “ມີຄວາມຄຶດອັນໜຶ່ງອັນດຽວກັນໃນພະອົງເຈົ້າ.” (ຟີລິບ 4:2) ເຮົາກໍຄືກັນຢາກນະມັດສະການພະເຢໂຫວາຮ່ວມກັບພີ່ນ້ອງແລະສ້າງສັນຕິສຸກໃນປະຊາຄົມ.
ຢ່າຍອມໃຫ້ຂໍ້ຂັດແຍ່ງມີຕໍ່ໄປ
ເປັນຫຍັງເຮົາຄວນກຳຈັດຄວາມຮູ້ສຶກທີ່ບໍ່ດີຕໍ່ຄົນອື່ນອອກໄປໃຫ້ໄວ? ເຮົາອາດປຽບທຽບຄວາມຮູ້ສຶກນັ້ນຄືກັບຫຍ້າຮົກເຊິ່ງປົນຢູ່ໃນສວນດອກໄມ້ທີ່ງາມໆ. ຖ້າບໍ່ຫຼົກຫຍ້ານັ້ນອອກ ມັນກໍຈະແຜ່ຮົກໄປທົ່ວສວນ. ຄ້າຍຄືກັນ ຖ້າຄວາມຮູ້ສຶກບໍ່ດີທີ່ເຮົາມີຕໍ່ຄົນອື່ນຮຸນແຮງຂຶ້ນ ສິ່ງນີ້ຈະສົ່ງຜົນເສຍໄປທົ່ວປະຊາຄົມ. ແຕ່ຖ້າເຮົາຮັກພະເຢໂຫວາແລະຮັກພີ່ນ້ອງ ເຮົາຈະເຮັດທຸກຢ່າງໃຫ້ປະຊາຄົມມີສັນຕິສຸກ.
ຖ້າເຈົ້າຖ່ອມຕົວແລະພະຍາຍາມສ້າງສັນຕິສຸກກັບຄົນອື່ນ ເຈົ້າຈະເຫັນຜົນດີເກີນຄາດ
ເມື່ອເຮົາພະຍາຍາມສ້າງສັນຕິສຸກກັບຄົນອື່ນ ເຮົາອາດເຫັນຜົນດີເກີນຄາດ. ພີ່ນ້ອງຍິງຄົນໜຶ່ງປະສົບດ້ວຍຕົວເອງ ລາວເລົ່າວ່າ: “ຂ້ອຍຮູ້ສຶກວ່າພີ່ນ້ອງຍິງຄົນໜຶ່ງເຮັດຄືຂ້ອຍເປັນເດັກນ້ອຍ. ຂ້ອຍຫງຸດຫງິດແລະເບື່ອລາວ ຂ້ອຍກໍເສຍມາລະຍາດກັບລາວ. ຂ້ອຍຄິດວ່າ ‘ຖ້າລາວບໍ່ນັບຖືຂ້ອຍ ຂ້ອຍກໍຈະບໍ່ນັບຖືລາວຄືກັນ.’”
ຈາກນັ້ນພີ່ນ້ອງຄົນນີ້ກໍເບິ່ງຄືນການປະພຶດຂອງຕົວເອງ. ລາວເລົ່າວ່າ “ຂ້ອຍເລີ່ມເຫັນວ່າຕົວເອງມີນິດໄສທີ່ບໍ່ດີຄືກັນ ແລະກໍຜິດຫວັງໃນຕົວເອງຫຼາຍ. ຂ້ອຍສຳນຶກວ່າຕ້ອງປັບຄວາມຄິດ. ຂ້ອຍອະທິດຖານເລື່ອງນີ້ກັບພະເຢໂຫວາ ແລ້ວເອົາຂອງຂວັນໃຫ້ລາວແລະຂຽນກາດຂໍໂທດທີ່ຄິດບໍ່ດີຕໍ່ລາວ. ເຮົາກອດກັນແລະລົມກັນວ່າຈະລືມເລື່ອງນັ້ນ. ຈາກນັ້ນເຮົາກໍບໍ່ມີບັນຫາກັນອີກເລີຍ.”
ບໍ່ມີໃຜຢາກມີບັນຫາ ແຕ່ຄວາມຮູ້ສຶກບໍ່ໝັ້ນໃຈຫຼືຄວາມຍິ່ງອາດເຮັດໃຫ້ຄົນເຮົາທຳລາຍສັນຕິສຸກ. ເຖິງວ່າເປັນເລື່ອງທຳມະດາໃນໂລກ ແຕ່ພະເຢໂຫວາຄາດໝາຍໃຫ້ຜູ້ຮັບໃຊ້ຂອງພະອົງບໍ່ເປັນແບບນັ້ນ. ພະຍານພະເຢໂຫວາຄວນມີສັນຕິສຸກແລະເປັນນ້ຳໜຶ່ງໃຈດຽວກັນ. ພະເຢໂຫວາດົນໃຈໃຫ້ໂປໂລຂຽນວ່າ: “ໃຫ້ໃຊ້ຊີວິດໃຫ້ສົມກັບການເປັນຄົນທີ່ພະເຈົ້າຮຽກ” ຕາມທີ່ເຂົາເຈົ້າໄດ້ຮັບ. ລາວກະຕຸ້ນຄລິດສະຕຽນໃຫ້ “ເປັນຄົນຖ່ອມຕົວແລະອ່ອນໂຍນ ມີຄວາມອົດທົນອົດກັ້ນ ຍອມທົນກັນແລະກັນດ້ວຍຄວາມຮັກ ພະຍາຍາມເຕັມທີທີ່ຈະເປັນນ້ຳໜຶ່ງໃຈດຽວກັນດ້ວຍພະລັງຂອງພະເຈົ້າ ແລະມີສັນຕິສຸກທີ່ຜູກພັນຄົນເຮົາໃຫ້ເປັນໜຶ່ງດຽວ.” (ເອເຟດ 4:1-3, ລ.ມ.) ປະຊາຊົນຂອງພະເຈົ້າເຫັນວ່າ “ສັນຕິສຸກທີ່ຜູກພັນຄົນເຮົາໃຫ້ເປັນໜຶ່ງດຽວ” ມີຄ່າຫຼາຍ. ດັ່ງນັ້ນ ຂໍໃຫ້ເຮົາທຸກຄົນເຮັດທຸກສິ່ງເພື່ອກຳຈັດຂໍ້ຂັດແຍ່ງກັບພີ່ນ້ອງແລະມີສັນຕິສຸກຫຼາຍຂຶ້ນ.