ບົດຄວາມສຶກສາທີ 6
ສິ່ງທີ່ຄຳພີໄບເບິນບອກກ່ຽວກັບຜູ້ແຕ່ງ
ເຈົ້າຕ້ອງ “ຂຽນທຸກຄຳທີ່ເຮົາເວົ້າກັບເຈົ້າໄວ້ໃນໜັງສື.”—ຢເຣ. 30:2, ລ.ມ.
ເພງ 96 ປຶ້ມຄຳພີໄບເບິນປຽບເໝືອນຊັບສົມບັດ
ໃຈຄວາມສຳຄັນa
1. ເປັນຫຍັງເຈົ້າຈຶ່ງຮູ້ສຶກຂອບໃຈທີ່ມີຄຳພີໄບເບິນ?
ເຮົາຮູ້ສຶກຂອບໃຈພະເຢໂຫວາແທ້ໆທີ່ໃຫ້ເຮົາມີຄຳພີໄບເບິນ ຍ້ອນຄຳພີໄບເບິນມີຄຳແນະນຳທີ່ຊ່ວຍເຮົາໃຫ້ຮັບມືກັບບັນຫາຕ່າງໆທີ່ເຮົາເຈິໃນທຸກມື້ນີ້ໄດ້. ຄຳພີໄບເບິນຍັງໃຫ້ຄວາມຫວັງທີ່ດີເລີດກັບເຮົາເລື່ອງອະນາຄົດ. ແລະທີ່ສຳຄັນ ຄຳພີໄບເບິນຊ່ວຍເຮົາໃຫ້ຮູ້ຈັກຄຸນລັກສະນະຕ່າງໆຂອງພະເຢໂຫວາ. ເມື່ອເຮົາຄິດເຖິງຄຸນລັກສະນະເຫຼົ່ານັ້ນ ເຮົາກໍຈະຮູ້ສຶກປະທັບໃຈແລະຢາກເປັນໝູ່ສະໜິດກັບເພິ່ນ.—ເພງ. 25:14
2. ພະເຢໂຫວາບອກມະນຸດໃຫ້ຮູ້ກ່ຽວກັບເພິ່ນໂດຍວິທີໃດແດ່?
2 ພະເຢໂຫວາຢາກໃຫ້ທຸກຄົນຮູ້ຈັກເພິ່ນ. ໃນອະດີດເພິ່ນບອກໃຫ້ມະນຸດຮູ້ກ່ຽວກັບເພິ່ນໂດຍທາງຄວາມຝັນ ນິມິດ ແລະທູດສະຫວັນ. (ຈຊບ. 12:6; ກຈກ. 10:3, 4) ເຮົາຈະບໍ່ສາມາດຮູ້ຈັກພະເຢໂຫວາໄດ້ໂດຍທາງຄວາມຝັນ ນິມິດ ຫຼືຂ່າວສານຈາກທູດສະຫວັນໄດ້ເລີຍຖ້າບໍ່ມີການຂຽນເລື່ອງເຫຼົ່ານັ້ນ. ດັ່ງນັ້ນ ພະເຢໂຫວາຈຶ່ງໃຫ້ມີຜູ້ຂຽນສິ່ງທີ່ເພິ່ນຢາກໃຫ້ເຮົາຮູ້ໄວ້ໃນປຶ້ມ. (ຢເຣ. 30:2) ຍ້ອນ “ທຸກຢ່າງທີ່ພະເຈົ້າທ່ຽງແທ້ເຮັດແມ່ນດີທີ່ສຸດ” ເຮົາຈຶ່ງໝັ້ນໃຈໄດ້ວ່າວິທີທີ່ເພິ່ນຕິດຕໍ່ສື່ສານກັບເຮົານັ້ນດີທີ່ສຸດແລະເປັນປະໂຫຍດກັບເຮົາ.—ເພງ. 18:30
3. ພະເຢໂຫວາໄດ້ເຮັດແນວໃດເພື່ອໃຫ້ຄຳພີໄບເບິນຢູ່ມາຮອດເຮົາຈົນເຖິງທຸກມື້ນີ້? (ເອຊາຢາ 40:8)
3 ອ່ານເອຊາຢາ 40:8. ຄຳພີໄບເບິນມີຄຳແນະນຳທີ່ດີແລະເປັນປະໂຫຍດແກ່ຜູ້ຮັບໃຊ້ທີ່ສັດຊື່ຂອງພະເຢໂຫວາມາຫຼາຍພັນປີແລ້ວ. ເປັນແບບນັ້ນໄດ້ແນວໃດ? ເພາະທີ່ຈິງ ຄຳພີໄບເບິນຖືກຂຽນໄວ້ໃນວັດຖຸທີ່ຍ່ອຍສະຫຼາຍໄດ້. ດັ່ງນັ້ນ ຄຳພີໄບເບິນທີ່ເປັນຕົ້ນສະບັບດັ້ງເດີມຈຶ່ງບໍ່ເຫຼືອມາຮອດເຮົາໃນທຸກມື້ນີ້. ແຕ່ພະເຢໂຫວາກໍໃຫ້ມີການຄັດລອກຄຳພີໄບເບິນໄວ້. ເຖິງວ່າຜູ້ທີ່ຄັດລອກຈະບໍ່ແມ່ນຄົນສົມບູນແບບ ແຕ່ເຂົາເຈົ້າກໍເຮັດວຽກຢ່າງລະມັດລະວັງແລະລະອຽດທີ່ຖ້ວນ. ນັກຄົ້ນຄວ້າດ້ານຄຳພີໄບເບິນຄົນໜຶ່ງເວົ້າເຖິງພະຄຳພີພາກພາສາເຮັບເຣີວ່າ “ພວກເຮົາໝັ້ນໃຈໄດ້ເລີຍວ່າ ບໍ່ມີປຶ້ມໃດໃນສະໄໝກ່ອນທີ່ໄດ້ຖ່າຍທອດຢ່າງຖືກຕ້ອງຄືກັບຄຳພີໄບເບິນ.” ດັ່ງນັ້ນ ເຖິງວ່າຄຳພີໄບເບິນຈະຖືກຂຽນມາຫຼາຍປີແລ້ວ ແຖມຍັງຂຽນໄວ້ໃນວັດຖຸທີ່ຍ່ອຍສະຫຼາຍໄດ້ ແລະຜູ້ທີ່ຄັດລອກກໍເປັນຄົນບໍ່ສົມບູນແບບ ແຕ່ເຮົາກໍໝັ້ນໃຈວ່າເນື້ອໃນຂອງຄຳພີໄບເບິນທີ່ເຮົາອ່ານໃນທຸກມື້ນີ້ເປັນຄວາມຄິດຂອງພະເຢໂຫວາຜູ້ທີ່ແຕ່ງປຶ້ມນີ້ແທ້ໆ.
4. ເຮົາຈະຮຽນຫຍັງໃນບົດຄວາມນີ້?
4 “ສິ່ງດີໆແລະສົມບູນທຸກຢ່າງມາຈາກ” ພະເຢໂຫວາ. (ຢກບ. 1:17) ຄຳພີໄບເບິນເປັນຂອງຂວັນທີ່ດີທີ່ສຸດຢ່າງໜຶ່ງທີ່ພະເຢໂຫວາໄດ້ໃຫ້ກັບເຮົາ. ຂອງຂວັນຈະບອກໃຫ້ເຮົາຮູ້ວ່າຜູ້ທີ່ໃຫ້ເປັນຄົນແນວໃດ ຮູ້ຈັກເຮົາດີຂະໜາດໃດ ແລະຮູ້ຈັກວ່າເຮົາຕ້ອງການຫຍັງ. ພະເຈົ້າຜູ້ທີ່ໃຫ້ຄຳພີໄບເບິນກັບເຮົາກໍຄືກັນ. ເມື່ອເຮົາອ່ານຄຳພີໄບເບິນທີ່ເປັນຂອງຂວັນທີ່ມາຈາກພະເຢໂຫວາ ເຮົາກໍຈະໄດ້ຮຽນຮູ້ຫຼາຍຢ່າງກ່ຽວກັບເພິ່ນ. ເຮົາໄດ້ຮຽນຮູ້ວ່າພະເຢໂຫວາຮູ້ຈັກເຮົາດີສ່ຳໃດແລະຮູ້ວ່າເຮົາຕ້ອງການຫຍັງ. ໃນບົດຄວາມນີ້ເຮົາຈະມາເບິ່ງວ່າ ເຮົາໄດ້ບົດຮຽນຫຍັງຈາກຄຳພີໄບເບິນກ່ຽວກັບຄຸນລັກສະນະສາມຢ່າງຂອງພະເຢໂຫວາ ເຊັ່ນ: ສະຕິປັນຍາ ຄວາມຍຸຕິທຳ ແລະຄວາມຮັກຂອງເພິ່ນ. ກ່ອນອື່ນ ເຮົາຈະມາເບິ່ງວ່າຄຳພີໄບເບິນຊ່ວຍເຮົາໃຫ້ເຫັນສະຕິປັນຍາຂອງພະເຢໂຫວາແນວໃດ.
ຄຳພີໄບເບິນຊ່ວຍເຮົາໃຫ້ເຫັນສະຕິປັນຍາຂອງພະເຢໂຫວາ
5. ຄຳພີໄບເບິນຊ່ວຍເຮົາໃຫ້ເຫັນສະຕິປັນຍາຂອງພະເຢໂຫວາໃນເລື່ອງຫຍັງ?
5 ພະເຢໂຫວາຮູ້ວ່າພວກເຮົາຈຳເປັນຕ້ອງມີຄຳແນະນຳທີ່ສະຫຼາດແລະສຸຂຸມ. ຄຳພີໄບເບິນເຕັມໄປດ້ວຍສະຕິປັນຍາທີ່ມາຈາກພະເຢໂຫວາ. ຄຳແນະນຳໃນຄຳພີໄບເບິນມີຜົນດີຕໍ່ຊີວິດຂອງຄົນເຮົາແລະສາມາດປ່ຽນຊີວິດຂອງເຮົາໄດ້. ເມື່ອໂມເຊຂຽນສ່ວນທຳອິດຂອງຄຳພີໄບເບິນແລ້ວ ລາວກໍເວົ້າກັບຄົນອິດສະຣາເອນວ່າ “ກົດໝາຍນີ້ມີຄ່າຫຼາຍສຳລັບພວກເຈົ້າ ເພາະມັນໝາຍເຖິງຊີວິດຂອງພວກເຈົ້າ.” (ພບຍ. 32:47) ຜູ້ທີ່ເຊື່ອຟັງຄຳແນະນຳໃນຄຳພີໄບເບິນຈະມີຄວາມສຸກແລະປະສົບຜົນສຳເລັດໃນຊີວິດ. (ເພງ. 1:2, 3) ເຖິງວ່າຄຳພີໄບເບິນຈະຂຽນມາດົນແລ້ວ ແຕ່ກໍມີພະລັງທີ່ສາມາດປ່ຽນຊີວິດຄົນໃຫ້ດີຂຶ້ນໄດ້ ເຊັ່ນ: ບົດຄວາມຊຸດ “ຄຳພີໄບເບິນປ່ຽນຊີວິດຄົນ” ທີ່ລົງຢູ່ໃນເວັບໄຊ jw.org ເຊິ່ງມີປະສົບການຈິງຫຼາຍກວ່າ 50 ເລື່ອງທີ່ສະແດງໃຫ້ເຫັນວ່າ ຄຳພີໄບເບິນມີພະລັງແລະ “ເກີດຜົນກັບ [ຄົນ] ທີ່ເປັນຜູ້ເຊື່ອຖື” ໃນທຸກມື້ນີ້.—1ທຊ. 2:13
6. ເປັນຫຍັງເຮົາຈຶ່ງເວົ້າໄດ້ວ່າຄຳພີໄບເບິນບໍ່ຄືກັບປຶ້ມຫົວອື່ນໆ?
6 ຄຳພີໄບເບິນຕ່າງຈາກປຶ້ມຫົວອື່ນໆ. ເປັນຫຍັງຄືເວົ້າແນວນັ້ນ? ເພາະວ່າຜູ້ທີ່ແຕ່ງຄຳພີໄບເບິນແມ່ນພະເຢໂຫວາພະເຈົ້າຜູ້ທີ່ມີອຳນາດສູງສຸດທີ່ບໍ່ມີວັນຕາຍ ແລະສະຫຼາດກວ່າໝົດທຸກຄົນ. ສ່ວນປຶ້ມອື່ນໆຜູ້ຂຽນກໍຕາຍໄປແລະຄຳແນະນຳອາດຫຼ້າສະໄໝໄປແລ້ວ. ແຕ່ຫຼັກການໃນຄຳພີໄບເບິນໃຊ້ໄດ້ຕະຫຼອດ ທຸກຍຸກທຸກສະໄໝ ແລະເປັນປະໂຫຍດຕໍ່ທຸກຄົນ ບໍ່ວ່າຈະຢູ່ໃນສະໄໝໃດກໍຕາມ. ເມື່ອເຮົາອ່ານຄຳພີໄບເບິນແລ້ວຄິດຕຶກຕອງ ພະເຢໂຫວາກໍຈະໃຊ້ພະລັງບໍລິສຸດເພື່ອຊ່ວຍເຮົາໃຫ້ເຫັນວ່າ ຈະເອົາຄຳແນະນຳໃນຄຳພີໄບເບິນມາໃຊ້ໃນຊີວິດແນວໃດ. (ເພງ. 119:27; ມລກີ. 3:16; ຮຣ. 4:12) ເຮົາເຫັນໄດ້ວ່າພະເຢໂຫວາຜູ້ທີ່ແຕ່ງຄຳພີໄບເບິນຢາກຊ່ວຍເຮົາແທ້ໆ. ດັ່ງນັ້ນ ເຮົາຈຶ່ງຢາກອ່ານຄຳພີໄບເບິນທຸກມື້!
ຄຳພີໄບເບິນຊ່ວຍໃຫ້ປະຊາຊົນຂອງພະເຈົ້າເປັນນ້ຳໜຶ່ງໃຈດຽວກັນແນວໃດທັງໃນອະດີດແລະໃນປັດຈຸບັນ? (ເບິ່ງຂໍ້ 7-8)
7. ໃນອະດີດຄຳພີໄບເບິນເຮັດໃຫ້ປະຊາຊົນຂອງພະເຈົ້າເປັນນ້ຳໜຶ່ງໃຈດຽວກັນແນວໃດ?
7 ອີກສິ່ງໜຶ່ງທີ່ຄຳພີໄບເບິນສະແດງໃຫ້ເຫັນສະຕິປັນຍາຂອງພະເຈົ້າກໍຄື ຄຳພີໄບເບິນຊ່ວຍໃຫ້ປະຊາຊົນຂອງພະເຈົ້າເປັນນ້ຳໜຶ່ງໃຈດຽວກັນ. ຕອນທີ່ຄົນອິດສະຣາເອນເຂົ້າໄປໃນແຜ່ນດິນຕາມຄຳສັນຍາ ເຂົາເຈົ້າໄດ້ຕັ້ງຖິ່ນຖານກະຈັດກະຈາຍກັນຢູ່. ບາງຄົນມີອາຊີບເປັນຄົນຫາປາ ບາງຄົນກໍລ້ຽງສັດ ແລະຄົນອື່ນໆກໍເຮັດໄຮ່ເຮັດນາ. ນີ້ຈຶ່ງເຮັດໃຫ້ເຂົາເຈົ້າອາໄສຢູ່ໃນພື້ນທີ່ທີ່ແຕກຕ່າງກັນ ແຕ່ພະເຢໂຫວາໄດ້ຈັດໃຫ້ຄົນອິດສະຣາເອນມາເຕົ້າໂຮມກັນເພື່ອຟັງການອ່ານແລະການອະທິບາຍກົດໝາຍຂອງເພິ່ນໃນຫຼາຍໆໂອກາດ. (ພບຍ. 31:10-13; ນຮຢ. 8:2, 8, 18) ລອງນຶກພາບເບິ່ງວ່າຄົນອິດສະຣາເອນຈະຮູ້ສຶກແນວໃດເມື່ອໄປຮອດເຢຣູຊາເລັມແລະໄດ້ເຫັນຜູ້ທີ່ມີຄວາມເຊື່ອດຽວກັນເປັນລ້ານຄົນທີ່ມາຈາກທຸກພາກສ່ວນຂອງປະເທດ. ນີ້ເປັນວິທີທີ່ພະເຢໂຫວາຊ່ວຍເຂົາເຈົ້າໃຫ້ເປັນນ້ຳໜຶ່ງໃຈດຽວກັນ. ຕໍ່ມາກໍມີການຕັ້ງປະຊາຄົມຄລິດສະຕຽນເຊິ່ງປະກອບດ້ວຍຜູ້ຊາຍແລະຜູ້ຍິງທີ່ເວົ້າພາສາແຕກຕ່າງກັນ ມາຈາກຫຼາຍຊົນຊາດແລະຫຼາຍວັດທະນະທຳ. ແຕ່ຍ້ອນວ່າທຸກຄົນຮັກຄຳພີໄບເບິນ ເຂົາເຈົ້າຈຶ່ງນະມັດສະການພະເຈົ້າທ່ຽງແທ້ຢ່າງເປັນນ້ຳໜຶ່ງໃຈດຽວກັນ. ຜູ້ທີ່ເຂົ້າມາເປັນຄລິດສະຕຽນຈະເຂົ້າໃຈຄຳພີໄບເບິນໄດ້ເມື່ອເຂົາເຈົ້າໄດ້ຮັບຄວາມຊ່ວຍເຫຼືອຈາກເພື່ອນຮ່ວມຄວາມເຊື່ອແລະຈາກການມາປະຊຸມຮ່ວມກັນ.—ກຈກ. 2:42; 8:30, 31
8. ໃນທຸກມື້ນີ້ ຄຳພີໄບເບິນເຮັດໃຫ້ປະຊາຊົນຂອງພະເຢໂຫວາເປັນນ້ຳໜຶ່ງໃຈດຽວກັນແນວໃດ?
8 ໃນທຸກມື້ນີ້ ພະເຢໂຫວາຍັງໃຊ້ຄຳພີໄບເບິນເພື່ອສອນແລະເຮັດໃຫ້ປະຊາຊົນຂອງເພິ່ນເປັນນ້ຳໜຶ່ງໃຈດຽວກັນ. ໃນຄຳພີໄບເບິນຈະມີຄວາມຈິງຫຼາຍເລື່ອງກ່ຽວກັບພະເຢໂຫວາທີ່ເຮົາຕ້ອງຮູ້. ເຮົາໄດ້ຟັງການອ່ານ ການອະທິບາຍ ແລະການສຶກສາຄຳພີໄບເບິນເປັນປະຈຳຢູ່ທີ່ການປະຊຸມປະຈຳປະຊາຄົມ ການປະຊຸມໝວດ ແລະການປະຊຸມພາກ. ດັ່ງນັ້ນ ເຮົາເຫັນໄດ້ວ່າຄຳພີໄບເບິນເປັນປຶ້ມທີ່ສຳຄັນທີ່ພະເຢໂຫວາໃຊ້ເພື່ອເຮັດໃຫ້ປະຊາຊົນຂອງເພິ່ນ “ຮັບໃຊ້ເພິ່ນຄຽງບ່າຄຽງໄຫຼ່ກັນ.”—ຊໂຟ. 3:9, ລ.ມ.
9. ເຮົາຕ້ອງເປັນຄົນແບບໃດຈຶ່ງຈະເຂົ້າໃຈຄຳພີໄບເບິນໄດ້? (ລູກາ 10:21)
9 ໃຫ້ເຮົາມາເບິ່ງຫຼັກຖານອີກຢ່າງໜຶ່ງທີ່ສະແດງໃຫ້ເຫັນວ່າ ພະເຢໂຫວາເປັນພະເຈົ້າທີ່ສະຫຼາດ. ຫຼາຍສ່ວນໃນຄຳພີໄບເບິນຖືກຂຽນໃນແບບທີ່ມີແຕ່ຄົນຖ່ອມເທົ່ານັ້ນທີ່ເຂົ້າໃຈໄດ້. (ອ່ານລູກາ 10:21) ບໍ່ວ່າຄົນຈະຢູ່ສ່ວນໃດໃນໂລກ ກໍສາມາດຫາອ່ານຄຳພີໄບເບິນໄດ້. ຄືກັບທີ່ນັກຄົ້ນຄວ້າດ້ານຄຳພີໄບເບິນຄົນໜຶ່ງບອກວ່າ: “ຄຳພີໄບເບິນບໍ່ໄດ້ເປັນພຽງປຶ້ມທີ່ຄົນອ່ານຫຼາຍທີ່ສຸດໃນໂລກເທົ່ານັ້ນ ແຕ່ຍັງເປັນປຶ້ມທີ່ມີການສຶກສາຄົ້ນຄວ້າຢ່າງລະອຽດຖີ່ຖ້ວນທີ່ສຸດນຳ.” ແຕ່ມີພຽງແຕ່ຄົນຖ່ອມເທົ່ານັ້ນທີ່ເຂົ້າໃຈຄຳພີໄບເບິນແທ້ໆແລະເອົາສິ່ງທີ່ໄດ້ຮຽນໄປໃຊ້ໃນຊີວິດ.—2ກຣ. 3:15, 16
10. ຄຳພີໄບເບິນຊ່ວຍເຮົາໃຫ້ເຫັນສະຕິປັນຍາຂອງພະເຢໂຫວາໃນແງ່ໃດອີກ?
10 ຄຳພີໄບເບິນຍັງຊ່ວຍເຮົາໃຫ້ເຫັນສະຕິປັນຍາຂອງພະເຢໂຫວາໃນອີກແງ່ໜຶ່ງ. ພະເຢໂຫວາບໍ່ພຽງແຕ່ໃຊ້ຄຳພີໄບເບິນເພື່ອສອນເຮົາເປັນກຸ່ມເທົ່ານັ້ນ ແຕ່ຍັງສອນແລະໃຫ້ກຳລັງໃຈເຮົາເປັນສ່ວນຕົວນຳ. ເມື່ອເຮົາອ່ານຄຳພີໄບເບິນ ເຮົາກໍຮູ້ເລີຍວ່າພະເຢໂຫວາສົນໃຈເຮົາແຕ່ລະຄົນເປັນສ່ວນຕົວ. (ອຊຢ. 30:21) ຕອນທີ່ເຈົ້າເຈິບັນຫາ ເຈົ້າເຄີຍຮູ້ສຶກບໍວ່າຂໍ້ຄຳພີທີ່ເຈົ້າອ່ານມັນກົງກັບເຈົ້າແທ້ໆ. ເຖິງວ່າພະເຢໂຫວາຈະໃຫ້ຂຽນຄຳພີໄບເບິນເພື່ອຫຼາຍລ້ານຄົນ ແຕ່ເປັນຫຍັງຄຳແນະນຳບາງຢ່າງຈຶ່ງກົງກັບຄວາມຕ້ອງການຂອງເຈົ້າ ພໍດີເລີຍ? ທີ່ເປັນແບບນັ້ນກໍຍ້ອນວ່າ ຜູ້ທີ່ແຕ່ງຄຳພີໄບເບິນແມ່ນພະເຢໂຫວາເຊິ່ງເປັນພະເຈົ້າທີ່ສະຫຼາດທີ່ສຸດໃນເອກະພົບ.—2ຕມ. 3:16, 17
ຄຳພີໄບເບິນຊ່ວຍເຮົາໃຫ້ເຫັນຄວາມຍຸຕິທຳຂອງພະເຢໂຫວາ
11. ພະເຢໂຫວາສະແດງໃຫ້ເຫັນແນວໃດວ່າ ເພິ່ນເປັນພະເຈົ້າທີ່ບໍ່ລຳອຽງຕອນທີ່ໃຫ້ມີການຂຽນຄຳພີໄບເບິນ?
11 ຄຸນລັກສະນະອີກຢ່າງໜຶ່ງຂອງພະເຢໂຫວາກໍຄື ຄວາມຍຸຕິທຳ. (ພບຍ. 32:4) ຄວາມຍຸຕິທຳກ່ຽວຂ້ອງກັບການບໍ່ເລືອກໜ້າຄົນຫຼືບໍ່ລຳອຽງ ແລະພະເຢໂຫວາກໍເປັນພະເຈົ້າທີ່ບໍ່ລຳອຽງ. (ກຈກ. 10:34, 35; ຣມ. 2:11) ສິ່ງໜຶ່ງທີ່ສະແດງໃຫ້ເຫັນວ່າພະເຢໂຫວາເປັນພະເຈົ້າທີ່ບໍ່ລຳອຽງກໍຄື ເພິ່ນໃຫ້ມີການຂຽນຄຳພີໄບເບິນໃນຫຼາຍພາສາ. ໃນຄຳພີໄບເບິນສ່ວນທຳອິດມີ 39 ຫົວ ສ່ວນຫຼາຍແມ່ນຂຽນເປັນພາສາເຮັບເຣີ ແລະຂຽນໃນແບບທີ່ປະຊາຊົນຂອງພະເຢໂຫວາເຂົ້າໃຈໄດ້ງ່າຍ. ແຕ່ພໍຮອດສະຕະວັດທຳອິດ ຄົນສ່ວນຫຼາຍໃຊ້ພາສາກຣີກ. ດັ່ງນັ້ນ ຄຳພີໄບເບິນສ່ວນສຸດທ້າຍທີ່ມີ 27 ຫົວຈຶ່ງຂຽນເປັນພາສາກຣີກ. ພະເຢໂຫວາບໍ່ໄດ້ຈຳກັດວ່າຖ້ອຍຄຳຂອງເພິ່ນຕ້ອງຂຽນເປັນພາສາໃດພາສາໜຶ່ງເທົ່ານັ້ນ. ໃນທຸກມື້ນີ້ ຢູ່ທົ່ວໂລກມີປະຊາກອນທັງໝົດເກືອບ 8 ຕື້ຄົນ ແລະເຂົາເຈົ້າເວົ້າພາສາທີ່ແຕກຕ່າງກັນ. ແລ້ວຄົນເຫຼົ່ານັ້ນຈະໄດ້ມີໂອກາດຮຽນຮູ້ກ່ຽວກັບພະເຢໂຫວາໄດ້ແນວໃດ?
12. ຄຳພະຍາກອນໃນດານີເອນ 12:4 ເກີດຂຶ້ນແທ້ແນວໃດໃນສະໄໝສຸດທ້າຍ?
12 ພະເຢໂຫວາໄດ້ໃຫ້ຜູ້ພະຍາກອນດານີເອນຂຽນຄຳສັນຍາຂອງເພິ່ນວ່າ ໃນສະໄໝສຸດທ້າຍ “ຄວາມຮູ້ແທ້” ໃນຄຳພີໄບເບິນຈະ “ມີຢ່າງຫຼວງຫຼາຍ.” (ອ່ານດານີເອນ 12:4, ລ.ມ.) ວິທີໜຶ່ງທີ່ຈະເຮັດໃຫ້ຄວາມຮູ້ແທ້ໃນຄຳພີໄບເບິນມີຢ່າງຫຼວງຫຼາຍກໍຄືໂດຍການແປ ການຈັດພິມ ການແຈກຢາຍຄຳພີໄບເບິນແລະປຶ້ມອື່ນໆທີ່ອະທິບາຍຄຳພີໄບເບິນ. ຄຳພີໄບເບິນເປັນປຶ້ມທີ່ໄດ້ຮັບການແປແລະແຈກຢາຍຫຼາຍທີ່ສຸດໃນໂລກ. ຄຳພີໄບເບິນທີ່ຜະລິດອອກມາບາງເທື່ອກໍມີລາຄາແພງຫຼາຍ. ແຕ່ພະຍານພະເຢໂຫວາໄດ້ແປຄຳພີໄບເບິນແບບຄົບຊຸດແລະບາງສ່ວນຫຼາຍກວ່າ 240 ພາສາ. ຜູ້ໃດທີ່ຢາກໄດ້ຫຼືຢາກອ່ານກໍສາມາດຮັບໄດ້ຟຣີ. ນີ້ຈຶ່ງເຮັດໃຫ້ຄົນຈາກທຸກຊາດໄດ້ຮຽນຮູ້ “ຂ່າວດີເລື່ອງການປົກຄອງຂອງພະເຈົ້າ” ກ່ອນທີ່ຈຸດຈົບຈະມາເຖິງ. (ມທ. 24:14) ພະເຈົ້າທີ່ຍຸຕິທຳຕ້ອງການໃຫ້ທຸກຄົນໄດ້ມີໂອກາດຮູ້ຈັກເພິ່ນໂດຍການອ່ານຄຳພີໄບເບິນ. ນີ້ສະແດງໃຫ້ເຫັນວ່າພະເຢໂຫວາຮັກເຮົາທຸກຄົນຫຼາຍແທ້ໆ.
ຄຳພີໄບເບິນຊ່ວຍເຮົາໃຫ້ເຫັນຄວາມຮັກຂອງພະເຢໂຫວາ
13. ຄຳພີໄບເບິນຊ່ວຍເຮົາໃຫ້ເຫັນຄວາມຮັກຂອງພະເຢໂຫວາແນວໃດ? (ໂຢຮັນ 21:25)
13 ຄຳພີໄບເບິນຊ່ວຍເຮົາໃຫ້ເຂົ້າໃຈວ່າຄຸນລັກສະນະທີ່ເດັ່ນທີ່ສຸດຂອງພະເຢໂຫວາກໍຄື ຄວາມຮັກ. (1ຢຮ. 4:8) ໃຫ້ເຮົາຄິດເຖິງສິ່ງທີ່ພະເຢໂຫວາໃຫ້ຂຽນໄວ້ໃນຄຳພີໄບເບິນແລະສິ່ງທີ່ເພິ່ນບໍ່ໄດ້ໃຫ້ຂຽນໄວ້. ສິ່ງທີ່ພະເຢໂຫວາໃຫ້ຂຽນໄວ້ກໍຄືສິ່ງທີ່ຈະຊ່ວຍເຮົາໃຫ້ສະໜິດກັບເພິ່ນ ຊ່ວຍເຮົາໃຫ້ມີຄວາມສຸກໃນຕອນນີ້ ແລະຊ່ວຍເຮົາໃຫ້ມີຊີວິດຕະຫຼອດໄປ. ແຕ່ຍ້ອນພະເຢໂຫວາຮັກເຮົາຫຼາຍ ເພິ່ນຈຶ່ງບໍ່ໄດ້ໃຫ້ຂຽນລາຍລະອຽດປີກຍ່ອຍຫຼາຍເກີນໄປໃນຄຳພີໄບເບິນ.—ອ່ານໂຢຮັນ 21:25
14. ມີສິ່ງໃດອີກທີ່ສະແດງໃຫ້ເຫັນວ່າພະເຢໂຫວາຮັກເຮົາ?
14 ພະເຢໂຫວາຍັງສະແດງຄວາມຮັກຕໍ່ເຮົາໂດຍການໃຫ້ຂຽນຄຳພີໄບເບິນໃນແບບທີ່ໃຫ້ກຽດເຮົາ. ພະເຢໂຫວາບໍ່ໄດ້ໃຫ້ຂຽນກົດທຸກຢ່າງເພື່ອຄວບຄຸມຊີວິດເຮົາວ່າ ອັນໃດເຮັດໄດ້ ອັນໃດເຮັດບໍ່ໄດ້. ແຕ່ເພິ່ນໄດ້ໃຊ້ເລື່ອງຊີວິດຈິງ ຄຳພະຍາກອນທີ່ໜ້າຕື່ນເຕັ້ນ ແລະຄຳແນະນຳທີ່ດີຈາກຄຳພີໄບເບິນເພື່ອຊ່ວຍເຮົາໃຫ້ຕັດສິນໃຈໄດ້ຢ່າງຖືກຕ້ອງ. ນີ້ຈຶ່ງເຮັດໃຫ້ເຮົາຮັກແລະຢາກເຊື່ອຟັງເພິ່ນຈາກຫົວໃຈ.
ເປັນຫຍັງເຮົາຄວນຄິດຕຶກຕອງເຖິງວິທີທີ່ພະເຢໂຫວາປະຕິບັດກັບຜູ້ຮັບໃຊ້ຂອງເພິ່ນໃນອະດີດ? (ເບິ່ງຂໍ້ 15)
15. (ກ) ຄຳພີໄບເບິນສະແດງໃຫ້ເຫັນແນວໃດວ່າພະເຢໂຫວາເປັນຫ່ວງພວກເຮົາ? (ຂ) ຕາມຮູບພາບ ເດັກນ້ອຍຜູ້ຍິງ ພີ່ນ້ອງຊາຍ ແລະພີ່ນ້ອງຍິງທີ່ສູງອາຍຸກຳລັງຄິດເຖິງຜູ້ໃດແດ່ໃນພະຄຳພີ? (ປຖກ. 39:1, 10-12; 2ກສ. 5:1-3; ລກ. 2:25-38)
15 ຄຳພີໄບເບິນບອກໃຫ້ຮູ້ວ່າພະເຢໂຫວາເປັນຫ່ວງພວກເຮົາຫຼາຍ ເພາະຄຳພີໄບເບິນມີເລື່ອງເລົ່າທີ່ສະແດງໃຫ້ເຫັນເຖິງອາລົມຄວາມຮູ້ສຶກຂອງຄົນເຮົາ. ເຮົາເຂົ້າໃຈຄວາມຮູ້ສຶກຂອງຄົນໃນສະໄໝທີ່ຂຽນຄຳພີໄບເບິນໄດ້ ເພາະເຂົາເຈົ້າ “ເປັນຄົນທຳມະດາຄືພວກເຮົາ.” (ຢກບ. 5:17) ທີ່ສຳຄັນ ເມື່ອເຫັນວິທີທີ່ພະເຢໂຫວາປະຕິບັດກັບເຂົາເຈົ້າ ກໍສະແດງໃຫ້ເຫັນເລີຍວ່າ “ພະເຢໂຫວາເມດຕາແລະມີຄວາມເຫັນອົກເຫັນໃຈແທ້ໆ.”—ຢກບ. 5:11
16. ເມື່ອເຮົາອ່ານຄຳພີໄບເບິນກ່ຽວກັບຜູ້ທີ່ເຮັດຜິດພາດ ເຮົາໄດ້ຮຽນຮູ້ຫຍັງກ່ຽວກັບພະເຢໂຫວາ? (ເອຊາຢາ 55:7)
16 ຄຳພີໄບເບິນຍັງຊ່ວຍເຮົາໃຫ້ເຫັນຄວາມຮັກຂອງພະເຢໂຫວາໃນອີກແງ່ໜຶ່ງ. ຄຳພີໄບເບິນຮັບຮອງກັບເຮົາວ່າ ພະເຢໂຫວາຈະບໍ່ປະຖິ້ມເຮົາເຖິງວ່າເຮົາຈະເຮັດຜິດພາດ. ຄົນອິດສະຣາເອນໄດ້ເຮັດຜິດຕໍ່ພະເຢໂຫວາຊ້ຳແລ້ວຊ້ຳອີກ ແຕ່ເມື່ອເຂົາເຈົ້າກັບໃຈແທ້ໆເພິ່ນກໍໃຫ້ອະໄພ. (ອ່ານເອຊາຢາ 55:7) ຄລິດສະຕຽນໃນສະຕະວັດທຳອິດກໍຄືກັນ. ເຂົາເຈົ້າຮູ້ວ່າພະເຢໂຫວາຮັກເຂົາເຈົ້າຫຼາຍ. ອັກຄະສາວົກໂປໂລໄດ້ຮັບການດົນໃຈໃຫ້ຂຽນເພື່ອກະຕຸ້ນຄລິດສະຕຽນ “ໃຫ້ອະໄພແລະປອບໃຈ” ຜູ້ຊາຍທີ່ໄດ້ເຮັດຜິດຮ້າຍແຮງແຕ່ໄດ້ກັບໃຈແລ້ວ. (2ກຣ. 2:6, 7; 1ກຣ. 5:1-5) ເປັນສິ່ງທີ່ໜ້າປະທັບໃຈແທ້ໆທີ່ພະເຢໂຫວາບໍ່ໄດ້ປະຖິ້ມເຂົາເຈົ້າ! ແຕ່ຍ້ອນເພິ່ນຮັກເຂົາເຈົ້າ ເພິ່ນຈຶ່ງຊ່ວຍເຂົາເຈົ້າໃຫ້ປ່ຽນແປງໂຕເອງແລະເຊີນໃຫ້ມາເປັນໝູ່ກັບເພິ່ນອີກ. ໃນທຸກມື້ນີ້ ພະເຢໂຫວາກໍສັນຍາວ່າຈະເຮັດແບບດຽວກັນກັບຜູ້ຮັບໃຊ້ທີ່ກັບໃຈແລ້ວທຸກຄົນ.—ຢກບ. 4:8-10
ໃຫ້ຖືວ່າຄຳພີໄບເບິນເປັນ “ສິ່ງດີໆ” ທີ່ມາຈາກພະເຈົ້າ
17. ເປັນຫຍັງຄຳພີໄບເບິນຈຶ່ງເປັນຂອງຂວັນທີ່ມີຄ່າຫຼາຍແທ້ໆ?
17 ພະເຢໂຫວາໄດ້ໃຫ້ຂອງຂວັນທີ່ມີຄ່າທີ່ສຸດກັບເຮົາ ນັ້ນກໍຄືຄຳພີໄບເບິນ. ເຮົາໄດ້ຮຽນວ່າຄຳພີໄບເບິນບອກໃຫ້ຮູ້ກ່ຽວກັບສະຕິປັນຍາ ຄວາມຍຸຕິທຳ ແລະຄວາມຮັກຂອງພະເຢໂຫວາ. ແລະຄຳພີໄບເບິນຍັງບອກໃຫ້ຮູ້ອີກວ່າ ພະເຢໂຫວາຢາກໃຫ້ເຮົາຮູ້ຈັກເພິ່ນແລະເປັນໝູ່ກັບເພິ່ນ.
18. ເຮົາຈະສະແດງໃຫ້ເຫັນແນວໃດວ່າ ເຮົາເຫັນຄ່າຄຳພີໄບເບິນທີ່ເປັນ “ສິ່ງດີໆ” ທີ່ມາຈາກພະເຈົ້າ?
18 ເຮົາຢາກຈື່ໄວ້ສະເໝີວ່າ ຄຳພີໄບເບິນເປັນ “ສິ່ງດີໆ” ທີ່ມາຈາກພະເຈົ້າ. (ຢກບ. 1:17) ດັ່ງນັ້ນ ເຮົາຢາກສະແດງໃຫ້ເຫັນວ່າເຮົາເຫັນຄ່າຄຳພີໄບເບິນໂດຍການອ່ານແລະຄິດຕຶກຕອງສິ່ງທີ່ໄດ້ອ່ານເປັນປະຈຳ. ເມື່ອເຮົາເຮັດແບບນັ້ນ ເຮົາກໍໝັ້ນໃຈໄດ້ວ່າພະເຢໂຫວາຜູ້ທີ່ແຕ່ງຄຳພີໄບເບິນຈະອວຍພອນເຮົາທີ່ພະຍາຍາມເຮັດແບບນັ້ນ. ແລະເຮົາກໍ “ຈະພົບຄວາມຮູ້ກ່ຽວກັບພະເຈົ້າ.”—ສຸພາ. 2:5, ລ.ມ.
ເພງ 98 ພະຄຳພີຂຽນຂຶ້ນໂດຍການດົນໃຈຈາກພະເຈົ້າ
a ຄຳພີໄບເບິນຊ່ວຍເຮົາໃຫ້ໃກ້ຊິດກັບພະເຢໂຫວາ. ຄຳພີໄບເບິນສອນເຮົາເລື່ອງສະຕິປັນຍາ ຄວາມຍຸຕິທຳ ແລະຄວາມຮັກຂອງເພິ່ນ. ເມື່ອເຮົາຮຽນເລື່ອງນີ້ ເຮົາກໍຈະເຫັນຄ່າຄຳພີໄບເບິນຫຼາຍຂຶ້ນແລະເຫັນວ່າຄຳພີໄບເບິນເປັນຂອງຂວັນຈາກພໍ່ທີ່ຢູ່ໃນສະຫວັນຂອງເຮົາແທ້ໆ.