ບົດຄວາມສຶກສາທີ 6
ໃຫ້ຮັກສາຄວາມສັດຊື່ຂອງເຈົ້າຕໍ່ໆໄປ!
“ຂ້ອຍຈະສັດຊື່ຕໍ່ພະເຈົ້າຈົນວັນຕາຍ!”—ໂຢບ 27:5, ລ.ມ.
ເພງ 34 ສັດຊື່ຕໍ່ພະເຈົ້າສະເໝີ
ໃຈຄວາມສຳຄັນa
1. ພະຍານພະເຢໂຫວາ 3 ຄົນໃນຂໍ້ນີ້ຢືນຢັດຢູ່ຝ່າຍພະເຢໂຫວາແນວໃດ?
ລອງນຶກພາບເຖິງ 3 ເຫດການຕໍ່ໄປນີ້ທີ່ກ່ຽວຂ້ອງກັບພະຍານພະເຢໂຫວາ: (1) ເດັກຍິງຄົນໜຶ່ງຢູ່ໂຮງຮຽນ ອາຈານໄດ້ບອກໃຫ້ນັກຮຽນທຸກຄົນໃນຫ້ອງມາສະຫຼອງບຸນໜຶ່ງຢູ່ໂຮງຮຽນ. ແຕ່ເດັກນ້ອຍຄົນນີ້ຮູ້ວ່າການສະຫຼອງບຸນນີ້ເຮັດໃຫ້ພະເຢໂຫວາບໍ່ພໍໃຈ ດັ່ງນັ້ນ ລາວຈຶ່ງເວົ້າປະຕິເສດດ້ວຍຄວາມນັບຖືວ່າຈະບໍ່ເຂົ້າຮ່ວມ. (2) ຊາຍໜຸ່ມຂີ້ອາຍຄົນໜຶ່ງໄປປະກາດຕາມບ້ານເຮືອນ. ລາວຮູ້ວ່າເຮືອນຫຼັງຕໍ່ໄປເປັນເຮືອນຂອງໝູ່ທີ່ຢູ່ໂຮງຮຽນເຊິ່ງມັກເວົ້າເຍາະເຍີ້ຍພະຍານພະເຢໂຫວາ ແຕ່ລາວກໍໄປປະກາດຢູ່ເຮືອນຫຼັງນັ້ນແລະເຄາະປະຕູ. (3) ຜູ້ຊາຍຄົນໜຶ່ງເຮັດວຽກໜັກເພື່ອຫາລ້ຽງຄອບຄົວ ມີມື້ໜຶ່ງຫົວໜ້າບອກໃຫ້ລາວເຮັດບາງສິ່ງທີ່ບໍ່ສັດຊື່ຫຼືຜິດກົດໝາຍ. ເຖິງວ່າລາວອາດຈະຖືກໄລ່ອອກຈາກວຽກ ແຕ່ລາວກໍກ້າອະທິບາຍກັບຫົວໜ້າວ່າລາວຕ້ອງສັດຊື່ແລະເຊື່ອຟັງກົດໝາຍ ເພາະພະເຈົ້າໄດ້ຮຽກຮ້ອງໃຫ້ຜູ້ຮັບໃຊ້ຂອງພະອົງເຮັດແບບນັ້ນ.—ໂລມ 13:1-4; ເຫບ. 13:18
2. ເຮົາຈະພິຈາລະນາຄຳຖາມຫຍັງ ແລະຍ້ອນຫຍັງ?
2 ເຈົ້າໄດ້ເຫັນຄຸນລັກສະນະຫຍັງໃນ 3 ຄົນນີ້? ເຈົ້າອາດສັງເກດເຫັນວ່າເຂົາເຈົ້າມີຄຸນລັກສະນະຫຼາຍຢ່າງເຊັ່ນ: ຄວາມກ້າຫານແລະຄວາມສັດຊື່. ແຕ່ມີຄຸນລັກສະນະໜຶ່ງທີ່ໂດດເດັ່ນເປັນພິເສດຄື ຄວາມສັດຊື່. ທັງ 3 ຄົນນີ້ສະແດງໃຫ້ເຫັນວ່າເຂົາເຈົ້າສັດຊື່ພັກດີຕໍ່ພະເຢໂຫວາແລະບໍ່ຍອມຝ່າຝືນມາດຕະຖານຂອງພະອົງ. ຄວາມສັດຊື່ໄດ້ກະຕຸ້ນເຂົາເຈົ້າໃຫ້ເຮັດສິ່ງທີ່ເຮົາໄດ້ອ່ານໃນຂໍ້ຜ່ານມາ. ແນ່ນອນ ພະເຢໂຫວາພູມໃຈທີ່ເຂົາເຈົ້າສັດຊື່ຕໍ່ພະອົງ. ເຮົາກໍຄືກັນ ເຮົາກໍຢາກໃຫ້ພະເຢໂຫວາພໍ່ໃນສະຫວັນພູມໃຈ. ດັ່ງນັ້ນ ໃຫ້ເຮົາພິຈາລະນາຄຳຖາມຕໍ່ໄປນີ້: ຄວາມສັດຊື່ແມ່ນຫຍັງ? ເປັນຫຍັງເຮົາຕ້ອງເປັນຄົນສັດຊື່? ເຮົາຈະເຮັດແນວໃດເພື່ອຕັ້ງໃຈໃຫ້ຫຼາຍຂຶ້ນທີ່ຈະຮັກສາຄວາມສັດຊື່ໃນສະໄໝທີ່ຍາກລຳບາກນີ້?
ຄວາມສັດຊື່ແມ່ນຫຍັງ?
3. (ກ) ຄວາມສັດຊື່ໝາຍເຖິງຫຍັງສຳລັບຜູ້ຮັບໃຊ້ພະເຢໂຫວາ? (ຂ) ມີຕົວຢ່າງຫຍັງແດ່ທີ່ຊ່ວຍເຮົາໃຫ້ເຂົ້າໃຈຄວາມໝາຍຂອງຄວາມສັດຊື່?
3 ສຳລັບຜູ້ຮັບໃຊ້ພະເຢໂຫວາ ຄວາມສັດຊື່ໝາຍເຖິງການຮັກພະອົງສຸດຫົວໃຈແລະເຫຼື້ອມໃສໃນພະອົງບໍ່ປ່ຽນແປງ. ເຮົາຕ້ອງຄິດເຖິງພະອົງກ່ອນສະເໝີບໍ່ວ່າເຮົາຈະຕັດສິນໃຈຫຍັງ. ຂໍໃຫ້ເຮົາມາເບິ່ງຄຳວ່າຄວາມສັດຊື່ທີ່ໃຊ້ໃນຄຳພີໄບເບິນ. ຕົວຢ່າງ: ຕາມກົດໝາຍຂອງໂມເຊບອກວ່າຊາວອິດສະລາແອນທີ່ຈະເອົາສັດມາຖວາຍເປັນເຄື່ອງບູຊາໃຫ້ພະເຢໂຫວາຕ້ອງເປັນສັດທີ່ດີຫຼືສົມບູນແຂງແຮງ.b (ເລວີ. 22:21, 22) ຕາມກົດໝາຍແລ້ວບໍ່ອະນຸຍາດໃຫ້ຖວາຍສັດທີ່ພິການ ເຊັ່ນ: ຂາຂາດ ຫູແວ່ງ ຫຼືຕາບອດ ແລະສັດທີ່ເປັນພະຍາດ. ເປັນເລື່ອງສຳຄັນສຳລັບພະເຢໂຫວາທີ່ສັດຈະຕ້ອງເປັນສັດທີ່ດີ ຄົບຖ້ວນແລະບໍ່ມີຕຳໜິ. (ມລກີ. 1:6-9) ເຮົາເຂົ້າໃຈໄດ້ວ່າເປັນຫຍັງພະເຢໂຫວາມັກສິ່ງທີ່ດີແລະຄົບຖ້ວນ. ຕົວຢ່າງ: ຕອນທີ່ເຮົາໄປຊື້ເຄື່ອງ ເຊັ່ນ ໝາກໄມ້ ປຶ້ມ ຫຼືເຄື່ອງມື ເຮົາຄົງບໍ່ຢາກໄດ້ອັນທີ່ເປັນຮູຫຼືບາງຊິ້ນສ່ວນຂາດໄປ. ເຮົາຢາກໄດ້ອັນທີ່ດີ ຄົບຖ້ວນ ແລະບໍ່ມີຕຳໜິ. ພະເຢໂຫວາກໍຮູ້ສຶກແບບນັ້ນຄືກັນ ເຮົາຕ້ອງໃຫ້ຄວາມຮັກແລະຄວາມພັກດີກັບພະອົງໃນແບບທີ່ດີທີ່ສຸດ ຄົບຖ້ວນ ແລະບໍ່ມີຕຳໜິ.
4. (ກ) ເປັນຫຍັງຄົນທີ່ບໍ່ສົມບູນແບບສາມາດຮັກສາຄວາມສັດຊື່ໄດ້? (ຂ) ໃນຄຳເພງ 103:12-14 ບອກວ່າພະເຢໂຫວາຄາດໝາຍຫຍັງຈາກເຮົາ?
4 ເຮົາຄິດວ່າເຮົາຕ້ອງເປັນຄົນສົມບູນແບບກ່ອນບໍຈຶ່ງຈະຮັກສາຄວາມສັດຊື່ໄດ້? ເຮົາອາດຮູ້ສຶກວ່າຕົວເອງມີຂໍ້ບົກຜ່ອງແລະເຮັດຜິດພາດເລື້ອຍໆ. ຂໍໃຫ້ພິຈາລະນາເຫດຜົນ 2 ຢ່າງວ່າເປັນຫຍັງເຮົາບໍ່ຈຳເປັນຕ້ອງສົມບູນແບບກ່ອນຈຶ່ງຈະສັດຊື່ໄດ້. ທຳອິດ ພະເຢໂຫວາບໍ່ໄດ້ເບິ່ງໄປທີ່ຂໍ້ບົກຜ່ອງຂອງເຮົາ. ຄຳພີໄບເບິນບອກວ່າ: “ໂອ້ພະເຢໂຫວາ ຖ້າພະອົງຈະກວດເບິ່ງການອະທຳທັງຫຼາຍ ໂອ້ພະອົງເຈົ້າໃຜຈະຢັ້ງຢືນໄດ້?” (ເພງ. 130:3) ພະອົງຮູ້ວ່າເຮົາບໍ່ສົມບູນແບບ ເປັນມະນຸດຜິດບາບ ແລະພະອົງກໍໃຫ້ອະໄພເຮົາຢ່າງໃຈກວ້າງ. (ເພງ. 86:5) ທີສອງ ພະອົງຮູ້ຈັກຂີດຈຳກັດຂອງເຮົາ ແລະພະອົງບໍ່ໄດ້ຄາດໝາຍເກີນຄວາມສາມາດຂອງເຮົາ. (ອ່ານຄຳເພງ 103:12-14) ແລ້ວເຮົາຈະເປັນຄົນທີ່ດີ ຄົບຖ້ວນຫຼືບໍ່ມີຕຳໜິໃນສາຍຕາຂອງພະອົງໄດ້ແນວໃດ?
5. ເປັນຫຍັງຜູ້ຮັບໃຊ້ພະເຢໂຫວາຕ້ອງມີຄວາມຮັກເພື່ອຈະຮັກສາຄວາມສັດຊື່ໄດ້?
5 ສຳລັບຜູ້ຮັບໃຊ້ພະເຢໂຫວາ ສິ່ງສຳຄັນທີ່ຈະຊ່ວຍໃຫ້ເຮົາສັດຊື່ຕໍ່ພະອົງຄືຄວາມຮັກ. ຄວາມຮັກແລະຄວາມເຫຼື້ອມໃສທີ່ເຮົາມີຕໍ່ພະເຈົ້າຜູ້ເປັນພໍ່ໃນສະຫວັນຕ້ອງດີ ຄົບຖ້ວນ ແລະບໍ່ມີຕຳໜິ. ຖ້າຄວາມຮັກຂອງເຮົາເປັນແບບນັ້ນສະເໝີເຖິງວ່າເຮົາກຳລັງຖືກທົດສອບ ເຮົາກໍຍັງຈະສັດຊື່ຕໍ່ໆໄປ. (1 ຂ່າວ. 28:9; ມັດ. 22:37) ຂໍໃຫ້ຄິດເຖິງພະຍານພະເຢໂຫວາ 3 ຄົນອີກເທື່ອໜຶ່ງທີ່ເວົ້າເຖິງໃນຕອນທຳອິດ. ເປັນຫຍັງເຂົາເຈົ້າເຮັດແບບນັ້ນ? ເດັກຍິງບໍ່ຢາກມ່ວນຊື່ນຢູ່ໂຮງຮຽນບໍ ຫຼືຊາຍໜຸ່ມຄົນນັ້ນຢາກອັບອາຍຂາຍໜ້າຢູ່ໜ້າປະຕູບໍ ຫຼືຜູ້ຊາຍທີ່ມີຄອບຄົວຢາກຕົກວຽກບໍ? ບໍ່. ເຂົາເຈົ້າຮູ້ວ່າພະເຢໂຫວາມີມາດຕະຖານທີ່ຖືກຕ້ອງຊອບທຳ ແລະເຂົາເຈົ້າຢາກເຮັດສິ່ງທີ່ພະອົງພໍໃຈ. ຍ້ອນເຂົາເຈົ້າຮັກພະອົງ ເຂົາເຈົ້າຈຶ່ງຄິດເຖິງພະອົງສະເໝີກ່ອນທີ່ຈະຕັດສິນໃຈເລື່ອງຕ່າງໆ. ໂດຍວິທີນີ້ເຂົາເຈົ້າກໍພິສູດໃຫ້ເຫັນວ່າເຂົາເຈົ້າສັດຊື່ແທ້ໆ.
ເປັນຫຍັງເຮົາຕ້ອງສັດຊື່?
6. (ກ) ເປັນຫຍັງເຈົ້າຕ້ອງຮັກສາຄວາມສັດຊື່? (ຂ) ອັນໃດເຮັດໃຫ້ອາດາມແລະເອວາບໍ່ສັດຊື່ຕໍ່ພະເຈົ້າ?
6 ເປັນຫຍັງເຮົາຕ້ອງສັດຊື່? ເຮົາຕ້ອງສັດຊື່ເພາະຊາຕານທ້າທາຍພະເຢໂຫວາແລະມັນກໍທ້າທາຍເຈົ້າຄືກັນ. ໃຫ້ຫວນກັບໄປທີ່ສວນເອເດນ ທູດສະຫວັນທີ່ກະບົດນີ້ກາຍເປັນຊາຕານຫຼື “ຜູ້ຕໍ່ຕ້ານ.” ມັນພະຍາຍາມທຳລາຍຊື່ສຽງຂອງພະເຢໂຫວາໂດຍບອກວ່າພະອົງເປັນຜູ້ປົກຄອງທີ່ບໍ່ດີ ເຫັນແກ່ຕົວແລະບໍ່ຊື່ສັດ. ໜ້າເສົ້າທີ່ອາດາມແລະເອວາເລືອກຢູ່ຝ່າຍຊາຕານທີ່ກະບົດຕໍ່ພະເຢໂຫວາ. (ຕົ້ນ. 3:1-6) ຊີວິດໃນສວນເອເດນເຮັດໃຫ້ເຂົາເຈົ້າມີໂອກາດຫຼາຍຢ່າງທີ່ຈະເສີມສ້າງຄວາມຮັກຕໍ່ພະເຢໂຫວາ. ແຕ່ຕອນທີ່ຊາຕານມາທ້າທາຍ ຄວາມຮັກທີ່ເຂົາເຈົ້າມີຕໍ່ພະເຢໂຫວາບໍ່ໄດ້ດີທີ່ສຸດ ບໍ່ຄົບຖ້ວນ ແລະມີຕຳໜິ. ດັ່ງນັ້ນຈຶ່ງເກີດມີຄຳຖາມທີ່ວ່າ: ຈະມີມະນຸດຄົນໃດບໍທີ່ຈະພັກດີຕໍ່ພະເຢໂຫວາຍ້ອນວ່າຮັກພະອົງ? ຫຼືອີກຢ່າງໜຶ່ງຄື ມະນຸດຈະສັດຊື່ຕໍ່ພະເຢໂຫວາໄດ້ບໍ? ຄຳຖາມນີ້ເຄີຍເກີດຂຶ້ນໃນກໍລະນີຂອງໂຢບ.
7. ໃນໂຢບ 1:8-11 ບອກວ່າພະເຢໂຫວາຮູ້ສຶກແນວໃດກັບຄວາມສັດຊື່ຂອງໂຢບ ແລະຊາຕານຮູ້ສຶກແນວໃດ?
7 ໂຢບມີຊີວິດຢູ່ໃນສະໄໝທີ່ຊາວອິດສະລາແອນຍັງຢູ່ເອຢິບ. ຕອນທີ່ໂຢບຍັງມີຊີວິດຢູ່ ບໍ່ມີມະນຸດຄົນໃດທີ່ຈະສັດຊື່ເທົ່າລາວ. ໂຢບກໍເປັນຄົນບໍ່ສົມບູນແບບແລະເຮັດຜິດພາດຄືກັນກັບເຮົາ ແຕ່ພະເຢໂຫວາກໍຮັກໂຢບເພາະວ່າລາວສັດຊື່. ກ່ອນໜ້ານັ້ນເບິ່ງຄືວ່າຊາຕານເຄີຍເຍາະເຍີ້ຍພະເຢໂຫວາກ່ຽວກັບຄວາມສັດຊື່ຂອງມະນຸດ. ດັ່ງນັ້ນ ພະອົງຈຶ່ງບອກຊາຕານໃຫ້ເບິ່ງໂຢບເພາະຊີວິດຂອງໂຢບພິສູດໃຫ້ເຫັນວ່າຊາຕານຂີ້ຕົວະ. ຊາຕານຈຶ່ງບອກວ່າຕ້ອງມີການທົດສອບຄວາມສັດຊື່ຂອງໂຢບ. ພະເຢໂຫວາໄວ້ໃຈໂຢບໝູ່ຂອງພະອົງ ແລະພະອົງກໍຍອມໃຫ້ຊາຕານທົດສອບລາວ.—ອ່ານໂຢບ 1:8-11
8. ຊາຕານໂຈມຕີໂຢບແນວໃດ?
8 ຊາຕານເປັນຄາຕະກອນທີ່ໂຫດຫ້ຽມ. ມັນທຳລາຍທຸກສິ່ງທຸກຢ່າງຂອງໂຢບ ຂ້າຄົນຮັບໃຊ້ ແລະທຳລາຍຊື່ສຽງຂອງລາວ. ມັນຍັງທຳລາຍຄອບຄົວຂອງໂຢບໂດຍເຮັດໃຫ້ລູກທີ່ລາວຮັກທັງ 10 ຄົນຕາຍ. ແລ້ວມັນກໍທຳຮ້າຍຕົວໂຢບນຳ ໂດຍເຮັດໃຫ້ລາວເປັນຝີເຕັມຕົວຕັ້ງແຕ່ຫົວຮອດຕີນ. ເມຍຂອງໂຢບກໍທຸກໃຈແລະເສຍໃຈແຮງ ລາວຈຶ່ງບອກໃຫ້ໂຢບຍອມແພ້ ປ້ອຍດ່າພະເຈົ້າແລ້ວຕາຍຊະ. ໂຢບເອງກໍຢາກຕາຍ ແຕ່ລາວກໍຍັງຮັກສາຄວາມສັດຊື່ຕໍ່ພະເຈົ້າ. ຊາຕານຈຶ່ງພະຍາຍາມໃຊ້ວິທີໃໝ່ ມັນໄດ້ໃຊ້ໝູ່ 3 ຄົນຂອງໂຢບ. ເຂົາເຈົ້າໄດ້ມາຢາມໂຢບຫຼາຍມື້ແຕ່ກໍບໍ່ໄດ້ໃຫ້ກຳລັງໃຈລາວ. ເຂົາເຈົ້າໃຫ້ຄຳແນະນຳແບບບໍ່ຄິດເຖິງຄວາມຮູ້ສຶກຂອງໂຢບແລະຕຳໜິລາວ. ເຂົາເຈົ້າອ້າງວ່າພະເຈົ້າຢູ່ເບື້ອງຫຼັງສິ່ງທີ່ໂຫດຮ້າຍທີ່ເກີດຂຶ້ນກັບໂຢບ ແລະບໍ່ໄດ້ສົນໃຈວ່າລາວຈະຮັກສາຄວາມສັດຊື່ຫຼືບໍ່. ເຂົາເຈົ້າເຖິງກັບບອກວ່າໂຢບເປັນຄົນຊົ່ວເຊິ່ງສົມຄວນປະສົບກັບສິ່ງທີ່ບໍ່ດີເຫຼົ່ານີ້!—ໂຢບ 1:13-22; 2:7-11; 15:4, 5; 22:3-6; 25:4-6
9. ໂຢບບໍ່ຍອມເຮັດຫຍັງ ເຖິງວ່າຈະປະສົບກັບຄວາມຍາກລຳບາກ?
9 ໂຢບຮັບມືແນວໃດກັບສິ່ງທີ່ບໍ່ດີທັງໝົດນີ້? ລາວເອງກໍເປັນຄົນບໍ່ສົມບູນແບບ. ລາວໃຈຮ້າຍໃຫ້ໝູ່ຈອມປອມຂອງລາວ ແລະລາວໄດ້ເວົ້າບາງຢ່າງອອກມາເຊິ່ງຕໍ່ມາລາວຍອມຮັບວ່າໄດ້ເວົ້າແບບບໍ່ຄິດ. ລາວພະຍາຍາມພິສູດວ່າຕົວເອງເປັນຝ່າຍຖືກຫຼາຍກວ່າພະເຈົ້າ. (ໂຢບ 6:3; 13:4, 5; 32:2; 34:5) ເຖິງວ່າຈະປະສົບເລື່ອງທີ່ບໍ່ດີ ແຕ່ລາວກໍບໍ່ຖິ້ມພະເຢໂຫວາ. ລາວບໍ່ເຊື່ອຄຳຕົວະຂອງໝູ່ຈອມປອມເຫຼົ່ານັ້ນ. ລາວບອກວ່າ: “ຂ້ອຍຈະບໍ່ມີວັນບອກວ່າພວກເຈົ້າເປັນຝ່າຍຖືກ ແລະຂ້ອຍຈະສັດຊື່ຕໍ່ພະເຈົ້າຈົນວັນຕາຍ!” (ໂຢບ 27:5, ລ.ມ.) ຄຳເວົ້ານີ້ສະແດງໃຫ້ເຫັນວ່າໂຢບຕັ້ງໃຈຮັກສາຄວາມສັດຊື່ບໍ່ວ່າຈະເກີດຫຍັງຂຶ້ນກໍຕາມ ແລະເຮົາກໍສາມາດເຮັດໄດ້ຄືກັນ.
10. ເລື່ອງທີ່ຊາຕານກ່າວຫາໂຢບໄດ້ກ່ຽວຂ້ອງກັບເຮົາແນວໃດ?
10 ເລື່ອງທີ່ຊາຕານກ່າວຫາໂຢບກ່ຽວຂ້ອງກັບເຈົ້າແນວໃດ? ທີ່ຈິງ ມັນກ່າວຫາວ່າເຈົ້າບໍ່ໄດ້ຮັກພະເຢໂຫວາແທ້ໆ ຖ້າເຈົ້າເຈິຄວາມລຳບາກເຈົ້າຈະບໍ່ສັດຊື່ແລະຈະເຊົາຮັບໃຊ້ພະອົງ. (ໂຢບ 2:4, 5; ຄຳປ. 12:10) ຂໍ້ກ່າວຫານີ້ເຮັດໃຫ້ເຈົ້າຮູ້ສຶກແນວໃດ? ມັນເຈັບປວດແມ່ນບໍ? ແຕ່ລອງຄິດເບິ່ງວ່າພະເຢໂຫວາໄວ້ໃຈເຈົ້າຫຼາຍຈົນໃຫ້ໂອກາດທີ່ພິເສດກັບເຈົ້າ. ພະອົງຍອມໃຫ້ຊາຕານທົດສອບຄວາມສັດຊື່ຂອງເຈົ້າ. ພະອົງໝັ້ນໃຈວ່າເຈົ້າຈະຮັກສາຄວາມສັດຊື່ໄດ້ ແລະພິສູດວ່າຊາຕານຂີ້ຕົວະ. ພະອົງຍັງສັນຍາວ່າຈະຊ່ວຍເຈົ້າໃຫ້ເຮັດສຳເລັດ. (ເຫບ. 13:6) ເປັນສິດທິພິເສດແທ້ໆທີ່ພະເຈົ້າອົງຍິ່ງໃຫຍ່ສູງສຸດແຫ່ງເອກະພົບໄວ້ໃຈເຈົ້າ! ເຈົ້າເຫັນບໍວ່າເປັນຫຍັງຄວາມສັດຊື່ຈຶ່ງສຳຄັນຫຼາຍແທ້ໆ? ຄວາມສັດຊື່ເຮັດໃຫ້ເຮົາພິສູດໄດ້ວ່າຊາຕານຂີ້ຕົວະ ແລະຍັງຍົກຍ້ອງນາມຊື່ຂອງພະເຢໂຫວາແລະສະໜັບສະໜູນການປົກຄອງຂອງພະອົງ. ເຮົາຈະຮັກສາຄວາມສັດຊື່ໄດ້ແນວໃດ?
ເຮົາຈະຮັກສາຄວາມສັດຊື່ໃນສະໄໝນີ້ໄດ້ແນວໃດ?
11. ເຮົາໄດ້ຮຽນຮູ້ຫຍັງຈາກເລື່ອງຂອງໂຢບ?
11 ຊາຕານໂຈມຕີປະຊາຊົນຂອງພະເຈົ້າແຮງຂຶ້ນ “ໃນສະໄໝສຸດທ້າຍ.” (2 ຕີໂມ. 3:1, ລ.ມ.) ໃນສະໄໝທີ່ຍາກລຳບາກນີ້ ເຮົາຈະເຮັດໃຫ້ຕົວເອງເຂັ້ມແຂງຫຼາຍຂຶ້ນໄດ້ແນວໃດເພື່ອຈະຮັກສາຄວາມສັດຊື່? ເຮົາໄດ້ຮຽນຮູ້ຫຼາຍຢ່າງຈາກເລື່ອງໂຢບ. ເປັນເວລາດົນກ່ອນທີ່ລາວຈະຖືກທົດສອບ ລາວກໍຮັກສາຄວາມສັດຊື່ຕໍ່ພະເຈົ້າຫຼາຍເທື່ອແລ້ວ. ໃຫ້ເຮົາມາເບິ່ງບົດຮຽນ 3 ຢ່າງທີ່ເຮົາຈະຮຽນຈາກລາວ ເລື່ອງການເຮັດໃຫ້ຕົວເອງເຂັ້ມແຂງຂຶ້ນເພື່ອຈະຮັກສາຄວາມສັດຊື່.
ເຮົາຈະເຮັດໃຫ້ຕົວເອງເຂັ້ມແຂງຫຼາຍຂຶ້ນໄດ້ແນວໃດເພື່ອຈະຮັກສາຄວາມສັດຊື່? (ເບິ່ງຂໍ້ 12)c
12. (ກ) ຕາມທີ່ຍົກມາໃນໂຢບ 26:7, 8, 14 ອັນໃດເຮັດໃຫ້ໂຢບຢ້ານຢຳແລະນັບຖືພະເຢໂຫວາ? (ຂ) ເຮົາຈະຢ້ານຢຳພະເຢໂຫວາຫຼາຍຂຶ້ນໄດ້ແນວໃດ?
12 ໂຢບຮັກພະເຈົ້າຫຼາຍຂຶ້ນເພາະລາວຢ້ານຢຳພະເຢໂຫວາ. ໂຢບໃຊ້ເວລາຄິດຕຶກຕອງເຖິງສິ່ງມະຫັດສະຈັນຕ່າງໆທີ່ພະເຢໂຫວາສ້າງ. (ອ່ານໂຢບ 26:7, 8, 14) ລາວຮູ້ສຶກຢ້ານຢຳເມື່ອຄິດຕຶກຕອງກ່ຽວກັບໜ່ວຍໂລກ ທ້ອງຟ້າ ເມກ ແລະຟ້າຮ້ອງ ແຕ່ລາວກໍຮູ້ຕົວວ່າ ລາວຮູ້ພຽງແຕ່ໜ້ອຍດຽວກ່ຽວກັບສິ່ງທີ່ພະເຢໂຫວາສ້າງ. ລາວຍັງເຫັນຄຸນຄ່າຖ້ອຍຄຳຂອງພະເຈົ້າ ລາວບອກວ່າ: “ຂ້ອຍໄດ້ຖືຮັກສາພະຄຳແຕ່ປາກຂອງພະອົງ.” (ໂຢບ 23:12) ໂຢບຢ້ານຢຳແລະນັບຖືພະເຢໂຫວາຫຼາຍ ລາວຈຶ່ງຮັກພະອົງແລະຢາກເຮັດໃຫ້ພະອົງພໍໃຈ. ຜົນກໍຄື ລາວຕັ້ງໃຈຫຼາຍຂຶ້ນທີ່ຈະຮັກສາຄວາມສັດຊື່. ເຮົາກໍຕ້ອງເຮັດຄືກັນກັບໂຢບ ເພາະເຮົາມີຄວາມຮູ້ຫຼາຍກວ່າຄົນໃນສະໄໝຂອງໂຢບກ່ຽວກັບສິ່ງມະຫັດສະຈັນຕ່າງໆທີ່ພະເຢໂຫວາສ້າງ ແລະເຮົາຍັງມີຄຳພີໄບເບິນນຳອີກທີ່ຈະຊ່ວຍໃຫ້ຮູ້ຈັກພະເຢໂຫວາແທ້ໆ. ທຸກສິ່ງທີ່ເຮົາຮຽນຈະຊ່ວຍໃຫ້ເຮົາຢ້ານຢຳພະອົງ. ຖ້າເຮົາຢ້ານຢຳແລະນັບຖືພະອົງ ເຮົາກໍຈະຮັກແລະເຊື່ອຟັງພະອົງ ແລະຢາກຮັກສາຄວາມສັດຊື່ຕໍ່ພະອົງຫຼາຍຂຶ້ນ.—ໂຢບ 28:28
ເຮົາຈະເຮັດໃຫ້ຕົວເອງເຂັ້ມແຂງຫຼາຍຂຶ້ນເພື່ອຈະຮັກສາຄວາມສັດຊື່ ໂດຍບໍ່ເບິ່ງສິ່ງລາມົກ ມີຄວາມສົມດຸນໃນເລື່ອງຊັບສົມບັດວັດຖຸ ແລະມີຄວາມຫວັງຢູ່ສະເໝີ (ເບິ່ງຂໍ້ 13)d
13-14. (ກ) ໃນໂຢບ 31:1 ໂຢບສະແດງໃຫ້ເຫັນແນວໃດວ່າລາວເປັນຄົນເຊື່ອຟັງ? (ຂ) ເຮົາອາດຮຽນແບບຕົວຢ່າງຂອງໂຢບແນວໃດ?
13 ການທີ່ໂຢບເຊື່ອຟັງທຸກຢ່າງຊ່ວຍລາວໃຫ້ຮັກສາຄວາມສັດຊື່. ໂຢບຮູ້ວ່າເພື່ອລາວຈະສັດຊື່ ລາວຕ້ອງເຊື່ອຟັງພະເຢໂຫວາ. ທີ່ຈິງ ທຸກຄັ້ງທີ່ເຮົາເຊື່ອຟັງກໍຈະເຮັດໃຫ້ເຮົາຕັ້ງໃຈຫຼາຍຂຶ້ນທີ່ຈະຮັກສາຄວາສັດຊື່. ໂຢບພະຍາຍາມທີ່ຈະເຊື່ອຟັງພະເຢໂຫວາທຸກມື້ ຕົວຢ່າງ: ລາວລະມັດລະວັງຕົວເມື່ອຢູ່ກັບຜູ້ຍິງຄົນອື່ນ. (ອ່ານໂຢບ 31:1) ລາວແຕ່ງດອງແລ້ວ ລາວຮູ້ວ່າບໍ່ເໝາະສົມທີ່ຈະສົນໃຈແບບຊູ້ສາວກັບຜູ້ຍິງຄົນອື່ນທີ່ບໍ່ແມ່ນເມຍຂອງລາວ. ທຸກມື້ນີ້ ເຮົາຢູ່ໃນໂລກທີ່ລໍ້ໃຈໃຫ້ເຮັດຜິດສິນລະທຳທາງເພດ. ເຮົາເປັນຄືກັບໂຢບບໍທີ່ບໍ່ໄດ້ໃຫ້ຄວາມສົນໃຈແບບບໍ່ເໝາະສົມກັບຄົນອື່ນທີ່ບໍ່ແມ່ນຜົວຫຼືເມຍຂອງເຮົາ? ແລະເຮົາບໍ່ເບິ່ງສິ່ງລາມົກທຸກຮູບແບບບໍ? (ມັດ. 5:28) ຖ້າເຮົາຄວບຄຸມຕົວເອງແບບນີ້ທຸກມື້ ເຮົາຈະເຮັດໃຫ້ຕົວເອງເຂັ້ມແຂງຫຼາຍຂຶ້ນເພື່ອຈະຮັກສາຄວາມສັດຊື່.
ເຮົາຈະເຮັດໃຫ້ຕົວເອງເຂັ້ມແຂງຫຼາຍຂຶ້ນເພື່ອຈະຮັກສາຄວາມສັດຊື່ ໂດຍບໍ່ເບິ່ງສິ່ງລາມົກ ມີຄວາມສົມດຸນໃນເລື່ອງຊັບສົມບັດວັດຖຸ ແລະມີຄວາມຫວັງຢູ່ສະເໝີ (ເບິ່ງຂໍ້ 14)e
14 ໂຢບຍັງເຊື່ອຟັງພະເຢໂຫວາໃນເລື່ອງຊັບສົມບັດ. ໂຢບຮູ້ວ່າຖ້າລາວໄວ້ໃຈໃນຊັບສົມບັດ ລາວກໍເຮັດບາບຮ້າຍແຮງແລະສົມຄວນໄດ້ຮັບການລົງໂທດ. (ໂຢບ 31:24, 25, 28) ທຸກມື້ນີ້ເຮົາຢູ່ໃນໂລກທີ່ນິຍົມວັດຖຸຫຼາຍ. ຖ້າເຮົາພະຍາຍາມມີຄວາມຄິດທີ່ສົມດຸນໃນເລື່ອງເງິນແລະຊັບສົມບັດຄືກັບທີ່ຄຳພີໄບເບິນເຕືອນ ເຮົາກໍຈະເຮັດໃຫ້ຕົວເອງຕັ້ງໃຈຫຼາຍຂຶ້ນທີ່ຈະຮັກສາຄວາມສັດຊື່.—ສຸພາ. 30:8, 9; ມັດ. 6:19-21
ເຮົາຈະເຮັດໃຫ້ຕົວເອງເຂັ້ມແຂງຫຼາຍຂຶ້ນເພື່ອຈະຮັກສາຄວາມສັດຊື່ ໂດຍບໍ່ເບິ່ງສິ່ງລາມົກ ມີຄວາມສົມດຸນໃນເລື່ອງຊັບສົມບັດວັດຖຸ ແລະມີຄວາມຫວັງຢູ່ສະເໝີ (ເບິ່ງຂໍ້ 15)f
15. (ກ) ຄວາມຫວັງກ່ຽວກັບລາງວັນຫຍັງທີ່ຊ່ວຍໂຢບໃຫ້ຮັກສາຄວາມສັດຊື່? (ຂ) ການຄິດເຖິງລາງວັນທີ່ພະເຢໂຫວາຈະໃຫ້ຊ່ວຍເຮົາແນວໃດ?
15 ໂຢບຮັກສາຄວາມສັດຊື່ສະເໝີໂດຍເບິ່ງໄປທີ່ຄວາມຫວັງກ່ຽວກັບລາງວັນທີ່ພະເຈົ້າຈະໃຫ້ລາວ. ລາວເຊື່ອວ່າພະເຈົ້າສົນໃຈວ່າລາວຮັກສາຄວາມສັດຊື່ຫຼືບໍ່. (ໂຢບ 31:6) ເຖິງວ່າຈະປະສົບຄວາມຍາກລຳບາກ ໂຢບກໍໝັ້ນໃຈວ່າເມື່ອເຖິງເວລາພະເຢໂຫວາຈະໃຫ້ລາງວັນກັບລາວ. ຄວາມໝັ້ນໃຈນີ້ຊ່ວຍລາວສັດຊື່ຕໍ່ໆໄປ. ພະເຢໂຫວາດີໃຈທີ່ໂຢບສັດຊື່ແລະພະອົງກໍໃຫ້ລາງວັນຢ່າງຫຼວງຫຼາຍ ທັງໆທີ່ລາວກໍຍັງເປັນຄົນບໍ່ສົມບູນແບບ! (ໂຢບ 42:12-17; ຢໂກ. 5:11) ແລະໂຢບຍັງຈະໄດ້ຮັບລາງວັນທີ່ຍິ່ງໃຫຍ່ກວ່ານັ້ນອີກໃນອະນາຄົດ. ເຈົ້າໝັ້ນໃຈບໍວ່າພະເຢໂຫວາຈະໃຫ້ລາງວັນຍ້ອນເຈົ້າຮັກສາຄວາມສັດຊື່? ພະເຈົ້າບໍ່ປ່ຽນແປງ. (ມລກີ. 3:6) ຖ້າເຮົາຈື່ວ່າພະອົງເຫັນຄຸນຄ່າຄວາມສັດຊື່ຂອງເຮົາ ຄວາມຫວັງທີ່ສົດໃສໃນເລື່ອງອະນາຄົດກໍຈະແຈ່ມແຈ້ງໃນໃຈຂອງເຮົາສະເໝີ.—1 ເທ. 5:8, 9
16. ເຮົາຄວນຕັ້ງໃຈເຮັດຫຍັງ?
16 ຂໍໃຫ້ເຮົາຕັ້ງໃຈຮັກສາຄວາມສັດຊື່ຕໍ່ໆໄປ! ບາງເທື່ອເຈົ້າອາດຮູ້ສຶກເຫງົາ ເພາະຜູ້ຄົນອ້ອມຂ້າງເຈົ້າບໍ່ມີໃຜຮັກສາຄວາມສັດຊື່ຕໍ່ພະເຈົ້າ ແຕ່ເຈົ້າຈະບໍ່ມີວັນໂດດດ່ຽວ. ເຈົ້າຍັງມີພີ່ນ້ອງຫຼາຍລ້ານຄົນທົ່ວໂລກທີ່ຮັກສາຄວາມສັດຊື່. ນອກຈາກນັ້ນ ເຈົ້າຍັງເຮັດຄືກັບຜູ້ຮັບໃຊ້ໃນອະດີດຂອງພະເຈົ້າທີ່ຮັກສາຄວາມສັດຊື່ ເຖິງວ່າຈະຕ້ອງສ່ຽງຊີວິດ. (ເຫບ. 11:36-38; 12:1) ຂໍໃຫ້ເຮົາທຸກຄົນໃຫ້ຕັ້ງໃຈຮັກສາຄວາມສັດຊື່ຄືກັນກັບໂຢບ ເຊິ່ງລາວບອກວ່າ: “ຂ້ອຍຈະສັດຊື່ຕໍ່ພະເຈົ້າຈົນວັນຕາຍ!” ແລະໃຫ້ຄວາມສັດຊື່ຂອງເຮົາເຮັດໃຫ້ພະເຢໂຫວາໄດ້ຮັບການຍົກຍ້ອງສັນລະເສີນຕະຫຼອດໄປ!
ເພງ 124 ສັດຊື່ຕະຫຼອດໄປ
a ຄວາມສັດຊື່ແມ່ນຫຍັງ? ເປັນຫຍັງຜູ້ຮັບໃຊ້ທີ່ສະແດງຄວາມສັດຊື່ຈຶ່ງມີຄ່າຕໍ່ພະເຢໂຫວາຫຼາຍ? ເປັນຫຍັງຄວາມສັດຊື່ຈຶ່ງສຳຄັນສຳລັບເຮົາ? ເຮົາຈະໄດ້ຄຳຕອບໃນບົດຄວາມນີ້ ແລະບົດຄວາມນີ້ຈະຊ່ວຍເຮົາໃຫ້ເຫັນແຈ້ງວ່າເຮົາຈະເຮັດໃຫ້ຕົວເອງເຂັ້ມແຂງຂຶ້ນໄດ້ແນວໃດເພື່ອທີ່ຈະຮັກສາຄວາມສັດຊື່ໃນແຕ່ລະມື້ໄດ້. ການເຮັດແບບນີ້ຈະເຮັດໃຫ້ເຮົາໄດ້ຮັບພອນຫຼາຍຢ່າງ.
b ຄຳພາສາເຫບເລີທີ່ແປວ່າ: “ສົມບູນແຂງແຮງ” ທີ່ໃຊ້ກັບສັດກ່ຽວຂ້ອງກັບຄຳພາສາເຫບເລີທີ່ແປວ່າ “ຄວາມສັດຊື່” ທີ່ໃຊ້ກັບຄົນ.
c ຄຳອະທິບາຍຮູບພາບ: ຕອນໂຢບຍັງໜຸ່ມ ລາວໄດ້ສອນລູກກ່ຽວກັບສິ່ງມະຫັດສະຈັນທີ່ພະເຢໂຫວາສ້າງ
d ຄຳອະທິບາຍຮູບພາບ: ໝູ່ຢູ່ບ່ອນເຮັດວຽກຊວນເບິ່ງສິ່ງລາມົກ ແຕ່ພີ່ນ້ອງຊາຍໄດ້ປະຕິເສດ
e ຄຳອະທິບາຍຮູບພາບ: ພະນັກງານຂາຍຊັກຊວນພີ່ນ້ອງຊາຍໃຫ້ຊື້ໂທລະທັດໜ່ວຍໃຫຍ່ລາຄາແພງ ແຕ່ລາວບໍ່ຊື້ເພາະມັນບໍ່ຈຳເປັນແລະແພງໂພດ
f ຄຳອະທິບາຍຮູບພາບ: ພີ່ນ້ອງຊາຍໃຊ້ເວລາຄິດຕຶກຕອງແລະອະທິດຖານກ່ຽວກັບຄວາມຫວັງເລື່ອງອຸທິຍານ