ບົດທີ 22
ລາຊະອານາຈັກຈະເຮັດໃຫ້ໂລກເປັນຕາມທີ່ພະເຈົ້າຕັ້ງໃຈໄວ້
1, 2. (ກ) ເປັນຫຍັງບາງຄັ້ງເຈົ້າເກືອບນຶກພາບບໍ່ອອກວ່າອຸທິຍານເປັນເລື່ອງຈິງ? (ຂ) ສິ່ງໃດຈະຊ່ວຍເຮົາໃຫ້ໝັ້ນໃຈຫຼາຍຂຶ້ນໃນເລື່ອງຄຳສັນຍາຕ່າງໆຂອງພະເຈົ້າ?
ພີ່ນ້ອງຊາຍທີ່ສັດຊື່ຄົນໜຶ່ງມາເຖິງຫໍປະຊຸມ ລາວຮູ້ສຶກອິດເມື່ອຍເພາະເຄັ່ງຕຶງກັບວຽກມາໝົດມື້. ເຈົ້ານາຍທີ່ເອົາໃຈຍາກໃຊ້ວຽກລາວຄືທາດ ການເອົາໃຈໃສ່ເບິ່ງແຍງຄອບຄົວເປັນບັນຫາທີ່ເຮັດໃຫ້ເຄັ່ງຕຶງຢູ່ຕະຫຼອດ ແລະຍັງມີເລື່ອງຄວາມເຈັບປ່ວຍຂອງເມຍອີກ. ເມື່ອສຽງດົນຕີດັງຂຶ້ນຕອນເລີ່ມການປະຊຸມ ລາວກໍຖອນຫາຍໃຈແບບໂລ່ງໃຈ ຮູ້ສຶກດີໃຈທີ່ມື້ນີ້ໄດ້ມາຮ່ວມປະຊຸມກັບພີ່ນ້ອງ. ນີ້ເປັນເພງກ່ຽວກັບຄວາມຫວັງເລື່ອງຊີວິດໃນອຸທິຍານ ເນື້ອເພງເຮັດໃຫ້ລາວນຶກພາບຄວາມຫວັງໃນອະນາຄົດ ແລະຍັງເຫັນຕົວເອງຢູ່ໃນພາບນັ້ນນຳອີກ. ລາວມັກເພງນີ້ຕັ້ງແຕ່ທຳອິດທີ່ໄດ້ຍິນ ເມື່ອຮ້ອງເພງນີ້ກັບລູກໆແລະເມຍ ຫົວໃຈທີ່ຫົດຫູ່ກໍມີກຳລັງທີ່ຈະສູ້ຕໍ່ໄປ.
2 ເຈົ້າເຄີຍຮູ້ສຶກແບບນີ້ບໍ? ຫຼາຍຄົນຕອບວ່າເຄີຍ. ແຕ່ຊີວິດໃນໂລກທຸກມື້ນີ້ອາດເຮັດໃຫ້ເຮົາເກືອບນຶກພາບບໍ່ອອກວ່າອຸທິຍານທີ່ພະເຈົ້າສັນຍາໄວ້ເປັນເລື່ອງຈິງ ເພາະສະໄໝນີ້ເປັນ “ຊ່ວງເວລາວິກິດທີ່ມີແຕ່ຄວາມຫຍຸ້ງຍາກລຳບາກ” ແລະສະພາບໂລກທີ່ເຮົາຢູ່ໃນຕອນນີ້ກໍຕ່າງກັນແທ້ໆກັບອຸທິຍານ. (2 ຕີໂມ. 3:1, ລ.ມ.) ສິ່ງໃດຈະຊ່ວຍເຮົາໃຫ້ເບິ່ງອອກວ່າຄວາມຫວັງນີ້ເປັນເລື່ອງຈິງ? ແລ້ວເຮົາຈະໝັ້ນໃຈໄດ້ແນວໃດວ່າອີກບໍ່ດົນລາຊະອານາຈັກຈະມາປົກຄອງມະນຸດທົ່ວໂລກ? ໃຫ້ເຮົາມາເບິ່ງຄຳພະຍາກອນຂອງພະເຢໂຫວາບາງຂໍ້ທີ່ເກີດຂຶ້ນແທ້ໃນສະໄໝບູຮານເຊິ່ງປະຊາຊົນຂອງພະເຈົ້າໄດ້ເຫັນກັບຕາມາແລ້ວ. ຈາກນັ້ນ ເຮົາຈະມາທົບທວນວ່າຄຳພະຍາກອນເຫຼົ່ານັ້ນແລະຂໍ້ອື່ນໆທີ່ຄ້າຍໆກັນໄດ້ເກີດຂຶ້ນຈິງແນວໃດໃນປັດຈຸບັນ ເຊິ່ງຈະຊ່ວຍໃຫ້ເຮົາມີຄວາມເຊື່ອທີ່ເຂັ້ມແຂງຫຼາຍຂຶ້ນ ແລ້ວເຮົາຈະເບິ່ງວ່າເລື່ອງນີ້ມີຄວາມສຳຄັນຕໍ່ອະນາຄົດຂອງເຮົາແນວໃດ.
ພະເຢໂຫວາໄດ້ເຮັດໃຫ້ຄຳສັນຍາຕ່າງໆ ເປັນຈິງໃນສະໄໝບູຮານແນວໃດ?
3. ຄຳສັນຍາທີ່ຊັດເຈນຫຍັງຢູ່ໃນໃຈຂອງຊະເລີຍຊາວຢິວໃນເມືອງບາບີໂລນສະເໝີ?
3 ລອງນຶກພາບເບິ່ງຊະເລີຍຊາວຢິວທີ່ເມືອງບາບີໂລນໃນສະໄໝສະຕະວັດທີ 6 ກ່ອນ ຄ.ສ. ແລະຄິດເບິ່ງວ່າສະພາບຊີວິດຂອງເຂົາເຈົ້າຈະເປັນແນວໃດ. ຫຼາຍຄົນເຕີບໂຕຂຶ້ນໃນໄລຍະທີ່ທັງຕົວເອງແລະພໍ່ແມ່ຕົກເປັນຊະເລີຍ ຊີວິດຈຶ່ງຍາກລຳບາກຫຼາຍ. ເຂົາເຈົ້າຖືກຊາວບາບີໂລນເຍາະເຍີ້ຍເພາະວ່າມີຄວາມເຊື່ອໃນພະເຢໂຫວາ. (ເພງ. 137:1-3) ຕະຫຼອດຫຼາຍສິບປີ ຊາວຢິວທີ່ສັດຊື່ຍັງຄົງຍຶດໝັ້ນກັບຄວາມຫວັງເລື່ອງໜຶ່ງຢູ່ສະເໝີ ເຊິ່ງກໍຄືຄຳສັນຍາທີ່ວ່າພະເຢໂຫວາຈະລວບລວມປະຊາຊົນຂອງພະອົງກັບໄປບ້ານເກີດເມືອງນອນຂອງເຂົາເຈົ້າ. ພະເຢໂຫວາບອກວ່າທີ່ນັ້ນຈະເປັນຕາຢູ່ແລະເຖິງກັບປຽບທຽບແຜ່ນດິນຢູດາທີ່ຈະໄດ້ຮັບການຟື້ນຟູຂຶ້ນໃໝ່ວ່າເປັນຄືກັບສວນເອເດນ! (ອ່ານເອຊາອີ 51:3) ຄຳສັນຍາຫຼາຍຂໍ້ທີ່ຄ້າຍໆກັນນີ້ເປັນຄຳຮັບຮອງທີ່ປະຊາຊົນຂອງພະເຈົ້າເຊື່ອໝົດໃຈວ່າຈະຕ້ອງເປັນຈິງ ແຕ່ໂດຍວິທີໃດ? ໃຫ້ເຮົາມາເບິ່ງຄຳພະຍາກອນບາງຂໍ້ທີ່ກ່ຽວຂ້ອງກັບເລື່ອງນີ້ໂດຍກົງ.
4. ພະເຢໂຫວາຮັບຮອງກັບຊະເລີຍຊາວຢິວແນວໃດໃນເລື່ອງຄວາມປອດໄພໃນແຜ່ນດິນຢູດາ?
4 ຄວາມປອດໄພ. ຊະເລີຍຊາວຢິວບໍ່ໄດ້ກັບໄປຢູ່ແຜ່ນດິນທີ່ສວຍງາມຕາມຕົວອັກສອນ ເພາະວ່າມັນຮ້າງເປົ່າມາເປັນເວລາ 70 ປີແລ້ວ ແລະຄົນທີ່ເຄີຍເຫັນແຜ່ນດິນນັ້ນກໍເຫຼືອຢູ່ບໍ່ເທົ່າໃດຄົນ. ໃນສະໄໝຄຳພີໄບເບິນ ດິນແດນຕ່າງໆແຖວນັ້ນມັກຈະມີສັດຮ້າຍທີ່ລ່າເຫຍື່ອຫຼາຍຊະນິດມາອາໄສຢູ່ ເຊັ່ນ: ສິງ ໝາປ່າ ແລະເສືອດາວ. ຄົນທີ່ຮັກຄອບຄົວອາດຈະຄິດໃນໃຈວ່າ: ‘ຂ້ອຍຈະປົກປ້ອງບໍ່ໃຫ້ສັດເຫຼົ່ານີ້ມາທຳຮ້າຍລູກເມຍຂອງຂ້ອຍໄດ້ແນວໃດ? ຊ້ຳບໍ່ໜຳຂ້ອຍຍັງມີແກະແລະງົວນຳອີກ ຂ້ອຍຈະປົກປ້ອງເບິ່ງແຍງພວກມັນໄດ້ແນວໃດ?’ ຄວາມວິຕົກກັງວົນແບບນີ້ບໍ່ແມ່ນເລື່ອງແປກ. ຕອນນີ້ລອງຄິດເຖິງຄຳສັນຍາຂອງພະເຈົ້າທີ່ບັນທຶກໄວ້ໃນເອຊາອີ 11:6-9 ແລະເບິ່ງວ່າຄຳສັນຍານີ້ຊ່ວຍເຂົາເຈົ້າໃຫ້ມີກຳລັງໃຈຫຼາຍຂຶ້ນໄດ້ແນວໃດ. (ອ່ານ) ພະເຢໂຫວາຮັບຮອງກັບຊາວຢິວດ້ວຍຄຳເວົ້າທີ່ໜ້າປະທັບໃຈວ່າທັງເຂົາເຈົ້າແລະສັດລ້ຽງຈະປອດໄພ ສິງຈະກິນເຟືອງໃນຄວາມໝາຍທີ່ວ່າ ພວກມັນຈະບໍ່ມາກັດກິນຝູງສັດຂອງຊາວຢິວ. ຄົນທີ່ສັດຊື່ບໍ່ຕ້ອງຢ້ານສັດຮ້າຍເຫຼົ່ານັ້ນ ເພາະພະເຢໂຫວາສັນຍາວ່າປະຊາຊົນຂອງພະອົງຈະປອດໄພໃນແຜ່ນດິນຢູດາທີ່ໄດ້ຮັບການຟື້ນຟູຂຶ້ນໃໝ່ ແມ່ນແຕ່ໃນຖິ່ນທຸລະກັນດານຫຼືໃນປ່າ.—ເອເຊກ. 34:25
5. ຄຳພະຍາກອນຫຍັງທີ່ຊ່ວຍໃຫ້ຊາວຢິວໝັ້ນໃຈວ່າພະເຢໂຫວາຈະເບິ່ງແຍງເຂົາເຈົ້າໃຫ້ມີສິ່ງຈຳເປັນຢ່າງອຸດົມສົມບູນເມື່ອກັບໄປທີ່ແຜ່ນດິນຂອງເຂົາເຈົ້າ?
5 ຄວາມອຸດົມສົມບູນ. ເລື່ອງທີ່ອາດເຮັດໃຫ້ກັງວົນກໍຍັງມີອີກ ເຊັ່ນ: ‘ຂ້ອຍຈະຫາລ້ຽງຄອບຄົວໄດ້ບໍໃນແຜ່ນດິນທີ່ຕ້ອງກັບໄປຟື້ນຟູໃໝ່? ເຮົາຈະອາໄສຢູ່ບ່ອນໃດ? ຈະມີວຽກຫຍັງໃຫ້ເຮັດ? ຫຼືຈະຍອມເປັນຊະເລີຍໃຫ້ພວກບາບີໂລນເຍາະເຍີ້ຍຕໍ່ໄປດີກວ່າ?’ ໂດຍທາງຄຳພະຍາກອນທີ່ໄດ້ຮັບການດົນໃຈ ພະເຢໂຫວາຕອບຄຳຖາມເຫຼົ່ານັ້ນແບບທີ່ເຂົ້າໃຈຄວາມຮູ້ສຶກຂອງເຂົາເຈົ້າ. ພະອົງສັນຍາວ່າຄົນທີ່ເຊື່ອຟັງຈະເຫັນຝົນ ແລະແຜ່ນດິນຈະມີອາຫານທີ່ “ອຸດົມສົມບູນແລະມີປະໂຫຍດ, ລ.ມ.” (ເອຊາ. 30:23) ສ່ວນບ່ອນຢູ່ອາໄສກັບວຽກອາຊີບທີ່ໜ້າພໍໃຈ ພະເຢໂຫວາໄດ້ສັນຍາວ່າ: “ເຂົາຈະປຸກເຮືອນແລະຢູ່ໃນເຮືອນນັ້ນ ແລະເຂົາຈະປູກສວນອະງຸ່ນແລະກິນໝາກແຕ່ສວນນັ້ນ. ເຂົາຈະກໍ່ສ້າງບໍ່ໃຊ່ໃຫ້ຜູ້ອື່ນຢູ່ ເຂົາຈະປູກບໍ່ໃຊ່ໃຫ້ຜູ້ອື່ນກິນ.” (ເອຊາ. 65:21, 22) ແມ່ນແລ້ວ ສິ່ງຕ່າງໆໃນຊີວິດຄົງຕ້ອງດີກວ່າການເປັນຊະເລີຍຢູ່ໃນບາບີໂລນເຊິ່ງເປັນດິນແດນຂອງຄົນທີ່ບໍ່ນັບຖືພະເຈົ້າ ແຕ່ເລື່ອງທີ່ເປັນຫ່ວງທີ່ສຸດກໍຄື: ບັນຫາເກົ່າທີ່ເຮັດໃຫ້ຊາວຢິວຕົກເປັນຊະເລີຍໃນສະໄໝນັ້ນຈະເກີດຂຶ້ນກັບເຂົາເຈົ້າອີກບໍ?
6. (ກ) ເປັນຫຍັງປະຊາຊົນຂອງພະເຈົ້າຈຶ່ງມີສະພາບຄືກັບຄົນປ່ວຍ? (ຂ) ພະເຢໂຫວາໃຫ້ຄຳຮັບຮອງເລື່ອງຫຍັງກັບຄົນທີ່ກັບໄປແຜ່ນດິນຢູດາ?
6 ຄວາມສຳພັນທີ່ດີກັບພະເຈົ້າ. ເປັນເວລາດົນນານກ່ອນທີ່ຈະຖືກເນລະເທດ ຊາວຢິວມີສະພາບຄືກັບຄົນປ່ວຍເພາະວ່າເຂົາເຈົ້າເກືອບຈະບໍ່ມີຄວາມສຳພັນທີ່ດີກັບພະເຈົ້າເລີຍ. ພະເຢໂຫວາຈຶ່ງເວົ້າຜ່ານທາງຜູ້ພະຍາກອນເອຊາອີວ່າ: ເຂົາເຈົ້າກໍ “ຟົກຊ້ຳໄປທັງຫົວແລ້ວ ຫົວໃຈກໍອ່ອນແຮງຈົນເກືອບຈະຢຸດເຕັ້ນ” (ເອຊາ 1:5, ລ.ມ.) ໃນສາຍຕາຂອງພະເຈົ້າ ເຂົາເຈົ້າເປັນຄືກັບຄົນພິການຊ້ຳຍັງຕາບອດແລະຫູໜວກ ເພາະວ່າເຂົາເຈົ້າເຮັດຫູຕຶງບໍ່ຍອມຟັງຄຳແນະນຳ ແລະເຮັດທຳທ່າບໍ່ເຫັນສິ່ງທີ່ພະເຈົ້າພະຍາຍາມເຮັດເພື່ອເຂົາເຈົ້າ. (ເອຊາ. 6:10; ຢເຣ. 5:21; ເອເຊກ. 12:2) ຖ້າບັນຫາເກົ່າໆຍັງມີຢູ່ ເຂົາເຈົ້າຈະມີຄວາມໝັ້ນຄົງໄດ້ແນວໃດ? ພະເຢໂຫວາກໍຈະບໍ່ຍອມຮັບເຂົາເຈົ້າອີກແມ່ນບໍ? ແຕ່ພະເຢໂຫວາໃຫ້ຄຳສັນຍາທີ່ເຮັດໃຫ້ປະຊາຊົນຂອງພະອົງໝັ້ນໃຈວ່າ: “ໃນວັນນັ້ນ ພວກຄົນຫູໜວກຈະໄດ້ຍິນຄວາມທັງຫຼາຍໃນໜັງສືແລະຕາຂອງຄົນຕາບອດຈະພົ້ນຈາກມືດແລະຈະເຫັນຮຸ່ງ.” (ເອຊາ. 29:18) ພະເຢໂຫວາຈະຮັກສາຄົນທີ່ສຳນຶກຜິດແລະກັບໃຈແທ້ໆໃຫ້ມີສາຍສຳພັນທີ່ດີກັບພະອົງອີກ ແລະຖ້າເຂົາເຈົ້າເຊື່ອຟັງແລະເຮັດຕາມຄຳແນະນຳ ພະອົງຈະຊີ້ນຳຊີວິດຂອງເຂົາເຈົ້າຕະຫຼອດໄປ.
7. (ກ) ພະເຢໂຫວາເຮັດຕາມຄຳສັນຍາທີ່ໃຫ້ໄວ້ກັບຊະເລີຍຊາວຢິວແນວໃດ? (ຂ) ເປັນຫຍັງການທົບທວນເລື່ອງເຫຼົ່ານີ້ຈຶ່ງເຮັດໃຫ້ຄວາມເຊື່ອຂອງເຮົາເຂັ້ມແຂງຂຶ້ນ?
7 ພະເຢໂຫວາເຮັດຕາມຄຳສັນຍາທີ່ໃຫ້ໄວ້ບໍ? ບັນທຶກທາງປະຫວັດສາດໃຫ້ຫຼັກຖານວ່າພະເຢໂຫວາອວຍພອນຊາວຢິວທີ່ກັບໄປບ້ານເກີດໃຫ້ຢູ່ຢ່າງປອດໄພ ມີສິ່ງຈຳເປັນຢ່າງອຸດົມສົມບູນ ແລະມີສາຍສຳພັນທີ່ດີກັບພະອົງ ຕົວຢ່າງເຊັ່ນ: ພະເຢໂຫວາປົກປ້ອງເຂົາເຈົ້າຈາກຊາດທີ່ຢູ່ໃກ້ຄຽງເຊິ່ງມີທັງຈຳນວນແລະກຳລັງທີ່ເໜືອກວ່າເຂົາເຈົ້າຫຼາຍເທົ່າ. ສັດຮ້າຍກໍບໍ່ມາທຳຮ້າຍຝູງສັດຂອງເຂົາເຈົ້າ. ທີ່ຈິງແລ້ວ ຊາວຢິວໄດ້ເຫັນຄຳພະຍາກອນກ່ຽວກັບອຸທິຍານທີ່ເອຊາອີ ເຢເຣມີ ແລະເອເຊກຽນເຄີຍບັນທຶກໄວ້ເກີດຂຶ້ນຈິງ ເຖິງແມ່ນວ່າເລື່ອງນັ້ນຈະເກີດຂຶ້ນໃນຂອບເຂດນ້ອຍໆ ແຕ່ປະຊາຊົນຂອງພະເຈົ້າກໍຕື່ນເຕັ້ນດີໃຈ ເພາະວ່າເຂົາເຈົ້າໄດ້ຮັບຄວາມຊ່ວຍເຫຼືອທີ່ດີທີ່ສຸດໃນຍາມທີ່ເຂົາເຈົ້າຕ້ອງການພໍດີ. ເມື່ອເຮົາທົບທວນເບິ່ງສິ່ງຕ່າງໆທີ່ພະເຢໂຫວາເຮັດເພື່ອປະຊາຊົນຂອງພະອົງໃນຕອນນັ້ນ ຄວາມເຊື່ອຂອງເຮົາກໍເຂັ້ມແຂງຫຼາຍຂຶ້ນ. ຖ້າຄຳພະຍາກອນທີ່ເກີດຂຶ້ນຈິງໃນຂອບເຂດນ້ອຍໆຍັງຕື່ນເຕັ້ນຂະໜາດນີ້ ແລ້ວໃນຂອບເຂດທີ່ໃຫຍ່ກວ່າຈະໜ້າຕື່ນເຕັ້ນຂະໜາດໃດ? ໃຫ້ເຮົາມາເບິ່ງວ່າພະເຢໂຫວາເຮັດຫຍັງແດ່ເພື່ອພວກເຮົາໃນທຸກມື້ນີ້.
ພະເຢໂຫວາເລີ່ມເຮັດໃຫ້ຄຳສັນຍາຂອງພະອົງເປັນຈິງໃນສະໄໝຂອງເຮົາແນວໃດ?
8. ປະຊາຊົນຂອງພະເຈົ້າໃນທຸກມື້ນີ້ຢູ່ໃນ “ປະເທດ” ແບບໃດ?
8 ເຮົາອາດຖືວ່າປະຊາຊົນຂອງພະເຢໂຫວາໃນສະໄໝນີ້ເປັນຊາດໜຶ່ງ ແຕ່ເຂົາເຈົ້າກໍບໍ່ໄດ້ຄອບຄອງດິນແດນຫຼືມາຢູ່ລວມກັນທັງໝົດໃນປະເທດດຽວ. ຄລິດສະຕຽນຜູ້ຖືກເຈີມປະກອບກັນເປັນຊາດໜຶ່ງທີ່ພະເຈົ້າເລືອກເຊິ່ງກໍຄື: “ຍິດສະລາເອນຂອງພະເຈົ້າ.” (ຄລາ. 6:16) ໝູ່ຂອງເຂົາເຈົ້າທີ່ເອີ້ນວ່າ: “ແກະອື່ນ” ກໍມາຢູ່ກັບເຂົາເຈົ້າໃນອົງການຂອງພະເຈົ້າເຊິ່ງປຽບເໝືອນ “ປະເທດ” ແລະພ້ອມໃຈກັນເຮັດສິ່ງຕ່າງໆເພື່ອນະມັດສະການພະເຢໂຫວາ ໂດຍຖືວ່າການນະມັດສະການເປັນເລື່ອງສຳຄັນທີ່ສຸດໃນຊີວິດ. (ໂຢ. 10:16; ເອຊາ. 66:8) ແລ້ວ “ປະເທດ” ແບບໃດທີ່ພະເຢໂຫວາຈະໃຫ້ເຮົາຢູ່? ກໍຄືສັງຄົມພີ່ນ້ອງທີ່ມີແຕ່ຄວາມສຸກ ແລະໃນສັງຄົມນີ້ເອງທີ່ພະເຈົ້າສັນຍາວ່າຄວາມສະຫງົບສຸກແບບສວນເອເດນຈະມີໃຫ້ເຫັນແທ້ໆ. ໃຫ້ເຮົາມາເບິ່ງບາງຕົວຢ່າງທີ່ໜ້າງຶດງໍ້ກ່ຽວກັບເລື່ອງນີ້ນຳກັນ.
9, 10. (ກ) ຄຳພະຍາກອນໃນເອຊາອີ 11:6-9 ເກີດຂຶ້ນຈິງໃນເວລານີ້ແນວໃດ? (ຂ) ມີຫຼັກຖານຫຍັງທີ່ສະແດງວ່າປະຊາຊົນຂອງພະເຈົ້າຢູ່ຮ່ວມກັນຢ່າງສະຫງົບສຸກ?
9 ຄວາມປອດໄພ. ຄຳພະຍາກອນທີ່ບັນທຶກໄວ້ໃນເອຊາອີ 11:6-9 ເຮັດໃຫ້ເຮົາເຫັນພາບທີ່ງົດງາມຄື: ມະນຸດແລະສັດລ້ຽງຈະຢູ່ກັບສັດປ່າທີ່ດຸຮ້າຍຢ່າງມີຄວາມສຸກແລະປອດໄພ. ສັງຄົມພີ່ນ້ອງໃນທຸກມື້ນີ້ກໍເປັນແບບນັ້ນ. ໃນຂໍ້ 9 ຂອງພະຄຳພີບົດນີ້ຊ່ວຍເຮົາໃຫ້ຮູ້ວ່າເປັນຫຍັງສັດຮ້າຍຈຶ່ງບໍ່ທຳຮ້າຍຫຼືກໍ່ຄວາມເສຍຫາຍອີກຕໍ່ໄປ ຂໍ້ນັ້ນອ່ານວ່າ: ‘ເຫດວ່າແຜ່ນດິນຈະເຕັມໄປດ້ວຍຄວາມຮູ້ກ່ຽວກັບພະເຢໂຫວາຄືນ້ຳທັງຫຼາຍຖ້ວມພື້ນນ້ຳທະເລ.’ ແລ້ວສັດຈະປ່ຽນພຶດຕິກຳບໍເມື່ອໄດ້ຮັບ ‘ຄວາມຮູ້ກ່ຽວກັບພະເຢໂຫວາ’? ບໍ່! ແຕ່ເປັນມະນຸດຕ່າງຫາກທີ່ຈະປ່ຽນແປງຕົວເອງຫຼັງຈາກທີ່ໄດ້ມາຮູ້ຈັກພະເຈົ້າອົງສູງສຸດ ແລະຮຽນຮູ້ວິທີທີ່ຈະເຮັດຕາມແນວທາງທີ່ສຸຂຸມຂອງພະອົງ. ດ້ວຍເຫດນີ້ ຄວາມອົບອຸ່ນຈຶ່ງເກີດຂຶ້ນແທ້ຕາມຄຳພະຍາກອນຂໍ້ນັ້ນ ເຊິ່ງເຮົາເຫັນໄດ້ຈາກສັງຄົມພີ່ນ້ອງຂອງເຮົາໃນທຸກມື້ນີ້. ໂດຍທາງລາຊະອານາຈັກຜູ້ຕິດພະຄລິດຈະຮຽນຮູ້ວ່າເຂົາເຈົ້າຕ້ອງເຊົານິດໄສທີ່ດຸຮ້າຍຄືກັບສັດ ແລະໃຊ້ຊີວິດຮ່ວມກັບພີ່ນ້ອງຢ່າງສະຫງົບສຸກ.
10 ຕົວຢ່າງ: ໃນປຶ້ມນີ້ເຮົາໄດ້ເວົ້າເຖິງເຫດຜົນຕາມຫຼັກພະຄຳພີທີ່ຄລິດສະຕຽນຮັກສາຄວາມເປັນກາງ ແລະການຂົ່ມເຫງທີ່ເກີດຂຶ້ນກັບປະຊາຊົນຂອງພະເຈົ້າເພາະການຮັກສາຈຸດຢືນກ່ຽວກັບເລື່ອງນີ້. ໃນໂລກທີ່ມີແຕ່ຄວາມຮຸນແຮງນີ້ ເປັນຕາງຶດງໍ້ແທ້ໆທີ່ປະຊາຊົນຈຳນວນຫຼາຍຂອງ “ຊາດ” ໜຶ່ງເຖິງກັບຍອມຖືກຂູ່ ຖືກຂ້າ ຍ້ອນບໍ່ຍອມມີສ່ວນກ່ຽວຂ້ອງກັບຄວາມຮຸນແຮງທຸກຮູບແບບ ນີ້ເປັນຫຼັກຖານຢືນຢັນວ່າປະຊາຊົນຂອງກະສັດເມຊີມີຄວາມສະຫງົບສຸກຄືກັບທີ່ເອຊາອີໄດ້ເວົ້າໄວ້! ພະເຍຊູປະກາດວ່າຄວາມຮັກທີ່ເຂົາເຈົ້າມີຕໍ່ກັນຈະເປັນຂໍ້ພິສູດໃຫ້ຜູ້ຄົນເຫັນວ່າເຂົາເຈົ້າເປັນລູກສິດຂອງເພິ່ນ. (ໂຢ. 13:34, 35) ຕອນນີ້ພະຄລິດກໍກຳລັງໃຊ້ “ທາດທີ່ສັດຊື່ແລະສຸຂຸມ, ລ.ມ.” ເພື່ອສອນພີ່ນ້ອງຄລິດສະຕຽນທຸກຄົນໃນປະຊາຄົມໃຫ້ຢູ່ຮ່ວມກັນດ້ວຍຄວາມຮັກ ຄວາມອ່ອນໂຍນ ແລະສັນຕິສຸກ.—ມັດ. 24:45-47
11, 12. ໂລກນີ້ຂາດແຄນຫຍັງ? ແຕ່ປະຊາຊົນຂອງພະເຢໂຫວາໄດ້ຮັບຫຍັງຢ່າງອຸດົມສົມບູນ?
11 ຄວາມອຸດົມສົມບູນ. ຍ້ອນໂລກນີ້ຂາດຄວາມຮູ້ກ່ຽວກັບພະເຈົ້າ. ຄຳພີໄບເບິນຈຶ່ງໄດ້ເຕືອນວ່າ: “‘ດັ່ງນີ້ເວລາໃກ້ເຂົ້າມາແລ້ວເຮົາຈະເຮັດໃຫ້ມີຄວາມອຶດຫິວໃນປະເທດ ບໍ່ໃຊ່ຄວາມອຶດເຂົ້າຫຼືອຶດນ້ຳ ແຕ່ວ່າເປັນການຢາກຟັງພະຄຳທັງຫຼາຍຂອງພະເຢໂຫວາ.’” (ອາໂມດ 8:11) ປະຊາຊົນຂອງພະເຈົ້າອຶດຫິວຄືກັນບໍ? ພະເຢໂຫວາບອກລ່ວງໜ້າເຖິງຄວາມແຕກຕ່າງລະຫວ່າງປະຊາຊົນຂອງພະອົງກັບພວກສັດຕູວ່າ: “ພວກຂ້າໃຊ້ຂອງເຮົາຈະກິນເຂົ້າແລະພວກທ່ານຈະຫິວກິນ. ພວກຂ້າໃຊ້ຂອງເຮົາຈະກິນນ້ຳແລະພວກທ່ານຈະຫິວນ້ຳ ນີ້ແນະພວກຂ້າໃຊ້ຂອງເຮົາຈະຊົມຊື່ນຍິນດີແລະພວກທ່ານຈະລັກອາຍ.” (ເອຊາ. 65:13) ເຈົ້າເຫັນວ່າຄຳພະຍາກອນນີ້ສຳເລັດເປັນຈິງບໍ?
12 ການຈັດກຽມຕ່າງໆຂອງພະເຈົ້າເປັນຄືກັບສາຍນ້ຳທີ່ທັງເລິກແລະກວ້າງໃຫຍ່ເຊິ່ງໄຫຼມາເຖິງເຮົາຢ່າງບໍ່ຂາດສາຍ. ສິ່ງພິມກ່ຽວກັບຄຳພີໄບເບິນ ເຊັ່ນ: ສື່ບັນທຶກສຽງແລະວິດີໂອ ການປະຊຸມຕ່າງໆແລະການປະຊຸມໃຫຍ່ ລວມທັງຄວາມຮູ້ຫຼາຍຢ່າງໃນເວັບໄຊ ທັງໝົດນີ້ເປັນຄືກັບສາຍນ້ຳທີ່ໄຫຼມາຄ້ຳຈຸນຊີວິດເຮົາ ໃນຂະນະທີ່ຄົນສ່ວນຫຼາຍໃນໂລກຫິວກະຫາຍເພາະບໍ່ໄດ້ຮັບຄວາມຮູ້ຂອງພະເຈົ້າ. (ເອເຊກ. 47:1-12; ໂຢເອນ 3:18) ເຈົ້າຕື່ນເຕັ້ນບໍທີ່ໄດ້ຮັບສິ່ງເຫຼົ່ານີ້ໃນແຕ່ລະມື້ຢ່າງອຸດົມສົມບູນຕາມທີ່ພະເຢໂຫວາສັນຍາໄວ້? ຂໍໃຫ້ເຈົ້າຢ່າລືມກິນອາຫານຈາກໂຕະຂອງພະເຢໂຫວາທຸກມື້!
ປະຊາຄົມລ້ຽງດູເຮົາຢ່າງດີເພື່ອໃຫ້ເຮົາມີຄວາມເຊື່ອທີ່ໝັ້ນຄົງແລະເຂັ້ມແຂງ
13. ເຈົ້າເຫັນຄຳສັນຍາຂອງພະເຢ ໂຫວາເປັນຈິງແນວໃດໃນເລື່ອງທີ່ວ່າ ຄົນຕາບອດຈະເບິ່ງເຫັນແລະຄົນຫູໜວກຈະໄດ້ຍິນ?
13 ຄວາມສຳພັນທີ່ດີກັບພະເຈົ້າ. ຫຼາຍຄົນໃນທຸກມື້ນີ້ມີສະພາບຄືກັບຄົນຕາບອດແລະຫູໜວກ. (2 ໂກ. 4:4) ແຕ່ພະຄລິດກໍກຳລັງປິ່ນປົວຄົນທີ່ມີສະພາບແບບນີ້ທົ່ວໂລກ ເຊັ່ນ: ເຈົ້າເຄີຍເຫັນຄົນທີ່ຕາບອດກັບມາເຫັນຮຸ່ງ ແລະຄົນຫູໜວກກັບມາໄດ້ຍິນອີກບໍ? ເຈົ້າເຄີຍເຫັນຄົນທີ່ໄດ້ຮັບຄວາມຮູ້ຖືກຕ້ອງກ່ຽວກັບຄວາມຈິງໃນຄຳພີໄບເບິນບໍ? ຄົນເຫຼົ່ານັ້ນໄດ້ຫັນຫຼັງໃຫ້ຄຳສອນທາງສາສະໜາທີ່ເຕັມໄປດ້ວຍຄຳຕົວະເຊິ່ງເຄີຍເຮັດໃຫ້ເຂົາເຈົ້າຕາບອດແລະບໍ່ໄດ້ຍິນຄວາມຈິງ. ຖ້າເຈົ້າເຄີຍເຫັນ ເຈົ້າກໍຮູ້ວ່າເລື່ອງນີ້ເປັນຈິງຕາມຄຳສັນຍາທີ່ວ່າ: “ໃນວັນນັ້ນ ພວກຄົນຫູໜວກຈະໄດ້ຍິນຄວາມທັງຫຼາຍໃນໜັງສືແລະຕາຂອງຄົນຕາບອດຈະພົ້ນຈາກມືດແລະຈະເຫັນຮຸ່ງ.” (ເອຊາ. 29:18) ໃນທຸກໆປີ ມີຫຼາຍແສນຄົນທົ່ວໂລກພົບຄວາມຈິງເຊິ່ງຊ່ວຍໃຫ້ຫຼຸດພົ້ນຈາກຄວາມມືດມົນເຊັ່ນນັ້ນ. ທຸກຄົນທີ່ອອກຈາກບາບີໂລນໃຫຍ່ແລະເຂົ້າມານະມັດສະການພະເຈົ້າຮ່ວມກັບເຮົາໃນສັງຄົມພີ່ນ້ອງທີ່ປຽບຄືກັບອຸທິຍານ ເປັນຫຼັກຖານທີ່ມີຊີວິດເຊິ່ງຢືນຢັນໄດ້ວ່າຄຳສັນຍາຂອງພະເຢໂຫວາເປັນຄວາມຈິງ!
14. ການຄິດທົບທວນຫຼັກຖານເລື່ອງຫຍັງທີ່ຈະຊ່ວຍເສີມສ້າງຄວາມເຊື່ອຂອງເຮົາໃຫ້ເຂັ້ມແຂງຂຶ້ນ?
14 ແຕ່ລະບົດຂອງປຶ້ມນີ້ໃຫ້ຫຼັກຖານທີ່ໜັກແໜ້ນວ່າພະຄລິດໄດ້ນຳຜູ້ຕິດຕາມເພິ່ນໃຫ້ມາຢູ່ໃນສັງຄົມຄລິດສະຕຽນແທ້ທີ່ເປັນຄືອຸທິຍານໃນໄລຍະອະວະສານນີ້. ຂໍໃຫ້ເຮົາຄິດທົບທວນສະເໝີວ່າເຮົາໄດ້ຮັບການອວຍພອນແນວໃດແດ່ໃນຂະນະທີ່ຢູ່ໃນອຸທິຍານນີ້. ຍິ່ງເຮົາຄິດຕຶກຕອງຫຼາຍເທົ່າໃດ ເຮົາກໍຍິ່ງເຊື່ອໝັ້ນຫຼາຍຂຶ້ນວ່າຄຳສັນຍາຂອງພະເຢໂຫວາກ່ຽວກັບສິ່ງທີ່ຈະເກີດຂຶ້ນໃນອະນາຄົດຈະຕ້ອງເປັນຈິງ.
“ຂໍໃຫ້ລາຊະອານາຈັກຂອງພະອົງມາຕັ້ງຢູ່”
15. ເປັນຫຍັງເຮົາໝັ້ນໃຈວ່າແຜ່ນດິນໂລກຈະກາຍເປັນອຸທິຍານ?
15 ພະເຢໂຫວາຕັ້ງໃຈມາດົນແລ້ວວ່າຈະເຮັດໃຫ້ທົ່ວໂລກກາຍເປັນອຸທິຍານ ພະອົງໃຫ້ອາດາມແລະເອວາຢູ່ໃນສວນທີ່ສວຍງາມ ພະອົງຍັງບອກເຂົາເຈົ້າໃຫ້ມີລູກມີຫຼານຈົນເຕັມແຜ່ນດິນໂລກ ແລະໃຫ້ຊ່ວຍກັນເບິ່ງແຍງສັດຕ່າງໆ. (ຕົ້ນ. 1:28) ແຕ່ອາດາມແລະເອວາພັດໄປຮ່ວມມືກັບຊາຕານໃນການກະບົດ ແລະຍັງຖ່າຍທອດຄວາມບໍ່ສົມບູນ ບາບ ແລະຄວາມຕາຍໃຫ້ກັບລູກຫຼານທຸກຄົນ. ແນວໃດກໍຕາມພະເຈົ້າບໍ່ເຄີຍລົ້ມເລີກຄວາມຕັ້ງໃຈ ເພາະທຸກຄຳທີ່ພະອົງເວົ້າຈະຕ້ອງເປັນຈິງສະເໝີ. (ອ່ານເອຊາອີ 55:10, 11) ເຮົາໝັ້ນໃຈໄດ້ວ່າ ລູກຫຼານຂອງອາດາມແລະເອວາຈະມີຫຼາຍຈົນເຕັມໂລກທີ່ເປັນອຸທິຍານ ເຂົາເຈົ້າຈະເອົາໃຈໃສ່ເບິ່ງແຍງສິ່ງຕ່າງໆທີ່ພະເຢໂຫວາສ້າງໄວ້. ເມື່ອເຖິງຕອນນັ້ນຄຳພະຍາກອນກ່ຽວກັບຊີວິດໃນອຸທິຍານທີ່ພະເຈົ້າເຄີຍບອກກັບຊະເລີຍຊາວຢິວຕັ້ງແຕ່ຕອນທຳອິດກໍຈະເກີດຂຶ້ນຈິງທຸກປະການ! ໃຫ້ເຮົາມາເບິ່ງບາງຕົວຢ່າງນຳກັນ.
16. ຄຳພີໄບເບິນເວົ້າເຖິງຄວາມປອດໄພໃນອຸທິຍານແນວໃດ?
16 ຄວາມປອດໄພ. ໃນທີ່ສຸດ ຄຳເວົ້າໃນເອຊາອີ 11:6-9 ຊ່ວຍໃຫ້ເຫັນພາບທີ່ງົດງາມເຊິ່ງຈະເກີດຂຶ້ນຈິງທຸກຢ່າງແມ່ນແຕ່ໃນຄວາມໝາຍຕາມຕົວອັກສອນ. ທຸກຄົນທີ່ຢູ່ໃນໂລກນີ້ທັງຜູ້ຊາຍ ຜູ້ຍິງ ແລະເດັກນ້ອຍຈະໄປໃສມາໃສດ້ວຍຄວາມປອດໄພແລະສະບາຍໃຈ ຈະບໍ່ມີມະນຸດຫຼືແມ່ນແຕ່ສັດມາທຳຮ້າຍເຂົາເຈົ້າ. ລອງນຶກພາບໃນມື້ທີ່ເຈົ້າຈະໄດ້ເຫັນໂລກເປັນຄືບ້ານຂອງເຈົ້າ ເຈົ້າຈະລອຍນ້ຳໃນແມ່ນ້ຳ ໃນທະເລສາບ ຫຼືທະເລກໍໄດ້ ເຈົ້າຈະຍ່າງຂ້າມພູຫຼາຍໜ່ວຍ ທຽວໄປໃນທົ່ງຫຍ້າໃນປ່າທີ່ມີອາກາດປອດໂປ່ງເຊິ່ງບໍ່ເປັນອັນຕະລາຍຫຍັງເລີຍ. ເມື່ອຮອດຕອນກາງຄືນເຈົ້າກໍນອນຫຼັບໂດຍບໍ່ຕ້ອງກັງວົນກັບສິ່ງໃດ ຂໍ້ຄວາມໃນເອເຊກຽນ 34:25 ຈະເປັນຈິງເຖິງຂະໜາດທີ່ປະຊາຊົນຂອງພະເຈົ້າຈະ ‘ຢູ່ໃນປ່າດ້ວຍຄວາມປອດໄພ ແລະຈະນອນຫຼັບໃນດົງທັງຫຼາຍ.’
17. ເປັນຫຍັງເຮົາໝັ້ນໃຈວ່າເມື່ອລາຊະອານາຈັກຂອງພະເຈົ້າມາປົກຄອງທົ່ວໂລກ ພະອົງຈະເບິ່ງແຍງໃຫ້ເຮົາມີສິ່ງຈຳເປັນຢ່າງອຸດົມສົມບູນ?
17 ຄວາມອຸດົມສົມບູນ. ລອງນຶກພາບສະໄໝທີ່ຈະບໍ່ມີຄວາມທຸກຍາກ ຄວາມອຶດຢາກ ການຂາດແຄນອາຫານອີກຕໍ່ໄປ ຫຼືບໍ່ຕ້ອງມີສະຫວັດດີການເພື່ອຊ່ວຍເຫຼືອຄົນທຸກຍາກ. ການລ້ຽງດູປະຊາຊົນຂອງພະເຢໂຫວາຢ່າງອຸດົມສົມບູນໂດຍທາງອົງການຂອງພະອົງໃນທຸກມື້ນີ້ເປັນຫຼັກຄ້ຳປະກັນວ່າ ກະສັດເມຊີຈະເບິ່ງແຍງປະຊາຊົນໃນທຸກໆດ້ານ. ຕອນທີ່ພະເຍຊູຢູ່ໃນໂລກ ເພິ່ນໄດ້ສະແດງໃຫ້ເຫັນໃນຂອບເຂດນ້ອຍໆວ່າເພິ່ນເຮັດໃຫ້ຄຳສັນຍາເຫຼົ່ານັ້ນເກີດຂຶ້ນແທ້ໄດ້ໂດຍລ້ຽງອາຫານຫຼາຍພັນຄົນທີ່ກຳລັງຫິວດ້ວຍເຂົ້າຈີ່ບໍ່ເທົ່າໃດກ້ອນແລະປາບໍ່ເທົ່າໃດໂຕ. (ມັດ. 14:17, 18; 15:34-36; ມໂກ. 8:19, 20) ເມື່ອລາຊະອານາຈັກຂອງພະເຈົ້າມາປົກຄອງທົ່ວໂລກ ຄຳພະຍາກອນນີ້ຈະເກີດຂຶ້ນຈິງທີ່ວ່າ: “ພະອົງຈະໃຫ້ຝົນແກ່ເມັດພືດທີ່ເຈົ້າຫວ່ານລົງໃນດິນ ແລະອາຫານເຊິ່ງເປັນຜົນຜະລິດຈະອຸດົມສົມບູນແລະມີປະໂຫຍດ ໃນວັນນັ້ນ ສັດຂອງເຈົ້າຈະຫາກິນຢູ່ໃນທົ່ງກວ້າງ.”—ເອຊາ. 30:23, ລ.ມ.
18, 19. (ກ) ຄຳພະຍາກອນທີ່ບັນທຶກໄວ້ໃນເອຊາອີ 65:20-22 ມີຄວາມໝາຍຕໍ່ເຈົ້າແນວໃດ? (ຂ) ອາຍຸຂອງເຈົ້າຈະເປັນຄືກັບ ‘ອາຍຸຂອງກົກໄມ້’ ໃນຄວາມໝາຍໃດ?
18 ໃນທຸກມື້ນີ້ ຫຼາຍຄົນອາດນຶກພາບບໍ່ອອກວ່າລາວຈະມີເຮືອນທີ່ໜ້າຢູ່ ຫຼືມີວຽກທີ່ໜ້າພໍໃຈໄດ້ແນວໃດ. ໃນລະບົບໂລກທີ່ເສື່ອມຊາມນີ້ຫຼາຍຄົນຮູ້ສຶກວ່າເຂົາເຈົ້າເຮັດວຽກໜັກໝົດມື້ແຕ່ກໍເກືອບບໍ່ມີຫຍັງເຫຼືອໃຫ້ຕົວເອງແລະຄອບຄົວເລີຍ ໃນຂະນະທີ່ຄົນລວຍແລະຄົນໂລບກໍສວຍຜົນປະໂຫຍດໄປໝົດ. ລອງນຶກພາບວ່າຊີວິດຈະເປັນແນວໃດເມື່ອຄຳພະຍາກອນນີ້ເກີດຂຶ້ນແທ້ໃນທົ່ວໂລກທີ່ວ່າ: ‘ເຂົາຈະປຸກເຮືອນແລະຢູ່ໃນເຮືອນນັ້ນ ແລະເຂົາຈະປູກສວນອະງຸ່ນແລະກິນໝາກແຕ່ສວນນັ້ນ. ເຂົາຈະກໍ່ສ້າງບໍ່ໃຊ່ໃຫ້ຜູ້ອື່ນຢູ່ ເຂົາຈະປູກບໍ່ໃຊ່ໃຫ້ຜູ້ອື່ນກິນ. ເຫດວ່າວັນຄືນທັງຫຼາຍ [“ອາຍຸ”, ລ.ມ.] ຂອງພວກຂອງເຮົາຈະມີຫຼາຍທໍ່ວັນຄືນທັງຫຼາຍ [“ອາຍຸ”, ລ.ມ.] ຂອງກົກໄມ້ ແລະຄົນທັງຫຼາຍທີ່ເຮົາໄດ້ເລືອກໄວ້ຈະຮັບປະໂຫຍດເອງແຕ່ກິດຈະການແຫ່ງມືຂອງເຂົາ.’—ເອຊາ. 65:20-22
19 ສຳນວນທີ່ວ່າອາຍຸຂອງເຮົາຈະຄືກັບ ‘ອາຍຸຂອງກົກໄມ້’ ໝາຍຄວາມວ່າແນວໃດ? ເມື່ອເຈົ້າຢືນຢູ່ເຫງົ້າຕົ້ນໄມ້ໃຫຍ່ ເຈົ້າຄຳນວນອາຍຸຂອງມັນໃນໃຈ ແລ້ວເຈົ້າກໍຮູ້ສຶກງຶດຫຼາຍແທ້ໆເພາະອາຍຸຂອງມັນອາດດົນກວ່າອາຍຸປູ່ຍ່າຕານາຍຂອງເຈົ້າ. ເຈົ້າອາດຄິດວ່າ ຖ້າເຈົ້າຍັງເປັນມະນຸດບໍ່ສົມບູນແບບຄືກັບຕອນນີ້ ຕົ້ນໄມ້ຕົ້ນນີ້ກໍອາດຈະມີອາຍຸຍືນຍາວກວ່າເຈົ້າ ເພາະມັນຍັງຈະແຕກກິ່ງກ້ານແລະມີຊີວິດຢູ່ຕໍ່ໄປເລື້ອຍໆແມ່ນແຕ່ຫຼັງຈາກທີ່ເຈົ້າຕາຍໄປແລ້ວ. ດັ່ງນັ້ນ ເມື່ອພະເຢໂຫວາບອກວ່າອາຍຸຂອງເຮົາຈະຄືກັບອາຍຸຂອງຕົ້ນໄມ້ຈຶ່ງເປັນຄຳຮັບຮອງທີ່ເຮັດໃຫ້ໝັ້ນໃຈວ່າຊີວິດຂອງເຮົາຈະຍືນຍາວແລະສະຫງົບສຸກໃນອຸທິຍານ! (ເພງ. 37:11, 29) ໃນວັນນັ້ນແມ່ນແຕ່ຕົ້ນໄມ້ທີ່ອາຍຸຍືນກໍຈະເປັນຄືກັບຕົ້ນຫຍ້າທີ່ຫ່ຽວແຫ້ງແລະຕາຍໄປ ໃນຂະນະທີ່ເຮົາຈະມີຊີວິດຍືນຍາວຕະຫຼອດໄປ!
20. ປະຊາຊົນທີ່ສັດຊື່ຂອງລາຊະອານາຈັກຈະມີສຸຂະພາບສົມບູນແຂງແຮງໄດ້ແນວໃດ?
20 ສຸຂະພາບສົມບູນແຂງແຮງ. ໃນທຸກມື້ນີ້ບໍ່ມີໃຜໜີພົ້ນຄວາມເຈັບປ່ວຍແລະຄວາມຕາຍໄດ້. ທີ່ຈິງ ເຮົາທຸກຄົນຕິດພະຍາດຮ້າຍແຮງທີ່ເອີ້ນວ່າບາບ ແລະສິ່ງດຽວທີ່ຈະປິ່ນປົວໄດ້ກໍຄື: ຄ່າໄຖ່ຂອງພະຄລິດ. (ໂລມ 3:23; 6:23) ໃນໄລຍະ 1.000 ປີທີ່ພະເຍຊູປົກຄອງ ເພິ່ນກັບຜູ້ທີ່ຮ່ວມປົກຄອງຈະຊ່ວຍປະຊາຊົນໃຫ້ໄດ້ຮັບປະໂຫຍດຢ່າງເຕັມທີຈາກຄ່າໄຖ່ນັ້ນ ມະນຸດທີ່ສັດຊື່ທຸກຄົນຈະຫຼຸດພົ້ນຈາກບາບທີ່ຕິດຕົວມາ ແລະຄຳພະຍາກອນຂອງເອຊາອີກໍຈະເປັນຈິງໃນຄວາມໝາຍຄົບຖ້ວນທີ່ວ່າ: “ຊາວຊົນຈະບໍ່ກ່າວວ່າ ‘ຂ້ອຍບໍ່ສຳບາຍ’ ຄວາມອະທຳຂອງຊາວຊົນທັງຫຼາຍເຊິ່ງຢູ່ຫັ້ນຈະເປັນທີ່ໂຜດຍົກເສຍ.” (ເອຊາ. 33:24) ລອງນຶກພາບສະໄໝທີ່ຈະບໍ່ມີໃຜຕາບອດ ຫູໜວກຫຼືພິການເບິ່ງແມ. (ອ່ານເອຊາອີ 35:5, 6) ບໍ່ມີພະຍາດຊະນິດໃດທີ່ພະເຍຊູປິ່ນປົວບໍ່ໄດ້ ບໍ່ວ່າຈະປ່ວຍທາງໃຈ ທາງກາຍ ຫຼືທາງອາລົມກໍຈະຖືກປິ່ນປົວ. ປະຊາຊົນທີ່ສັດຊື່ຂອງລາຊະອານາຈັກຈະມີສຸຂະພາບສົມບູນແຂງແຮງ!
21. ມີຄຳສັນຍາຫຍັງກ່ຽວກັບຄວາມຕາຍ ແລະເປັນຫຍັງເຈົ້າຈຶ່ງຮູ້ສຶກວ່ານີ້ເປັນຄຳສັນຍາທີ່ເຮັດໃຫ້ມີກຳລັງໃຈ?
21 ແລ້ວຄວາມຕາຍເດຈະເປັນແນວໃດ? ຄວາມຕາຍເກີດຈາກຄວາມເຈັບປ່ວຍແລະເປັນຜົນຂອງບາບ ມະນຸດທີ່ບໍ່ສົມບູນທຸກຄົນຕ້ອງພ່າຍແພ້ “ສັດຕູໂຕສຸດທ້າຍ” ນີ້ບໍ່ຊ້າກໍໄວ. (1 ໂກ. 15:26, ທ.ປ.) ແຕ່ຄວາມຕາຍເປັນສັດຕູທີ່ເປັນຕາຢ້ານສຳລັບພະເຢໂຫວາບໍ? ຂໍໃຫ້ເບິ່ງຄຳພະຍາກອນຂອງເອຊາອີທີ່ບອກວ່າ: “ພະອົງຈະທຳລາຍຄວາມຕາຍໃຫ້ສາບສູນໄປຕະຫຼອດການ ພະເຢໂຫວາພະເຈົ້າອົງຍິ່ງໃຫຍ່ສູງສຸດຈະເຊັດນ້ຳຕາໃຫ້ທຸກຄົນ.” (ເອຊາ. 25:8, ລ.ມ.) ເຈົ້ານຶກພາບຕອນນັ້ນອອກບໍ? ໃນຕອນນັ້ນຈະບໍ່ມີຂຸມຝັງສົບ ບໍ່ມີປ່າຊ້າ ບໍ່ມີນ້ຳຕາຂອງຄວາມໂສກເສົ້າອີກຕໍ່ໄປ! ແຕ່ຈະມີນ້ຳຕາຂອງຄວາມຍິນດີເມື່ອຄົນທີ່ຕາຍໄປແລ້ວມີຊີວິດອີກຕາມທີ່ພະເຢໂຫວາສັນຍາໄວ້. (ອ່ານເອຊາອີ 26:19) ໃນທີ່ສຸດ ຄວາມເສຍຫາຍທີ່ເກີດຈາກຄວາມຕາຍຕະຫຼອດປະຫວັດສາດຂອງມະນຸດກໍຈະໝົດໄປ.
22. ຫຼັງຈາກລາຊະອານາຈັກເມຊີເຮັດໃຫ້ທຸກຢ່າງໃນໂລກເປັນໄປຕາມທີ່ພະເຈົ້າຕັ້ງໃຈໄວ້ ຈະມີຫຍັງເກີດຂຶ້ນ?
22 ໃນຕອນທ້າຍຂອງໄລຍະ 1.000 ປີ ລາຊະອານາຈັກຈະເຮັດໃຫ້ທຸກສິ່ງໃນໂລກເປັນໄປຕາມທີ່ພະເຈົ້າຕັ້ງໃຈໄວ້ ແລ້ວພະຄລິດກໍຈະຄືນອຳນາດການປົກຄອງໃຫ້ພໍ່ຂອງເພິ່ນ. (1 ໂກ. 15:25-28) ໃນທີ່ສຸດ ທຸກຄົນຈະເປັນມະນຸດທີ່ສົມບູນແບບ ເຂົາເຈົ້າພ້ອມສຳລັບການທົດສອບຂັ້ນສຸດທ້າຍເມື່ອຊາຕານຖືກປ່ອຍຈາກເຫວເລິກທີ່ຖືກຂັງໄວ້ມາດົນແລ້ວ. ຫຼັງຈາກນັ້ນ ພະຄລິດຈະຢຽບຫົວຂອງງູຮ້າຍແລະພັກພວກຂອງມັນທັງໝົດໃຫ້ມຸ່ນ. (ຕົ້ນ. 3:15; ຄຳປ. 20:3, 7-10) ແຕ່ທຸກຄົນທີ່ຮັກແລະສັດຊື່ຕໍ່ພະເຢໂຫວາຈະມີອະນາຄົດທີ່ສົດໃສ ເຊິ່ງບໍ່ມີຄຳເວົ້າໃດໆຈະມາແທນຄວາມຮູ້ສຶກນັ້ນໄດ້ດີໄປກວ່າຂໍ້ຄວາມທີ່ຖືກດົນໃຈໃຫ້ຂຽນໄວ້ໃນຄຳພີໄບເບິນ ເຊິ່ງສັນຍາວ່າຄົນທີ່ສັດຊື່ຈະມີ “ເສລີພາບທີ່ງົດງາມແບບທີ່ລູກຂອງພະເຈົ້າມີ.”—ໂລມ 8:21, ລ.ມ.
ລາຊະອານາຈັກຈະເຮັດໃຫ້ຄຳສັນຍາຂອງພະເຢໂຫວາທຸກຂໍ້ທີ່ກ່ຽວຂ້ອງກັບມະນຸດແລະແຜ່ນດິນໂລກເປັນຈິງ
23, 24. (ກ) ເປັນຫຍັງຄຳສັນຍາຂອງພະເຈົ້າຈະຕ້ອງເປັນຈິງແນ່ນອນ? (ຂ) ເຈົ້າຕັ້ງໃຈຈະເຮັດຫຍັງ?
23 ຄຳສັນຍາເຫຼົ່ານັ້ນບໍ່ໄດ້ເປັນພຽງແຕ່ຄວາມຫວັງ ຄວາມປາຖະໜາ ຫຼືຄວາມຝັນ ຄຳສັນຍາທຸກຂໍ້ຂອງພະເຢໂຫວາຈະຕ້ອງເປັນຈິງຢ່າງແນ່ນອນ! ຍ້ອນຫຍັງ? ຂໍໃຫ້ນຶກເຖິງຄຳເວົ້າຂອງພະເຍຊູທີ່ເຮົາໄດ້ເວົ້າມາແລ້ວໃນບົດຕົ້ນໆ. ພະເຍຊູສອນພວກລູກສິດໃຫ້ອະທິດຖານເຖິງພະເຢໂຫວາວ່າ: “ຂໍໃຫ້ແຜ່ນດິນ [ລາຊະອານາຈັກ] ຂອງພະອົງມາຕັ້ງຢູ່ ນ້ຳໃຈຂອງພະອົງສຳເລັດແລ້ວໃນສະຫວັນຢ່າງໃດ ຂໍໃຫ້ສຳເລັດທີ່ແຜ່ນດິນໂລກຢ່າງນັ້ນ.” (ມັດ. 6:9, 10) ລາຊະອານາຈັກຂອງພະເຈົ້າບໍ່ແມ່ນສິ່ງທີ່ມະນຸດຄົນໃດຄົນໜຶ່ງຄິດຂຶ້ນເອງ. ລາຊະອານາຈັກນີ້ມີແທ້ແລະກຳລັງປົກຄອງໃນສະຫວັນ! ຕະຫຼອດ 100 ປີທີ່ຜ່ານມາລາຊະອານາຈັກໄດ້ເຮັດໃຫ້ຄຳສັນຍາຂອງພະເຢໂຫວາເປັນຈິງໃນຫຼາຍວິທີເຊິ່ງເຮົາເບິ່ງເຫັນໄດ້ໃນປະຊາຄົມຄລິດສະຕຽນ. ດັ່ງນັ້ນ ເມື່ອເຖິງຕອນທີ່ລາຊະອານາຈັກປົກຄອງທົ່ວໂລກ ເຮົາກໍໝັ້ນໃຈໄດ້ວ່າຄຳສັນຍາທຸກຂໍ້ຂອງພະເຢໂຫວາຈະເປັນຈິງ!
24 ເຮົາຮູ້ວ່າລາຊະອານາຈັກຂອງພະເຈົ້າຈະປົກຄອງໂລກ. ທຸກສິ່ງທີ່ພະເຢໂຫວາສັນຍາໄວ້ຈະເປັນຈິງ. ຍ້ອນຫຍັງ? ຍ້ອນລາຊະອານາຈັກຂອງພະເຈົ້າປົກຄອງແລ້ວ! ເຮົາແຕ່ລະຄົນຄວນຖາມຕົວເອງວ່າ: ‘ລາຊະອານາຈັກປົກຄອງຂ້ອຍຢູ່ບໍ?’ ຂໍໃຫ້ເຮົາເຮັດທຸກສິ່ງເທົ່າທີ່ເຮັດໄດ້ເພື່ອຈະເປັນປະຊາຊົນທີ່ສັດຊື່ຕັ້ງແຕ່ໃນຕອນນີ້ ເພື່ອເຮົາຈະໄດ້ຮັບສິ່ງດີໆຈາກລາຊະອານາຈັກທີ່ສົມບູນແບບແລະປົກຄອງດ້ວຍຄວາມຍຸຕິທຳຕະຫຼອດໄປ!