ຄຳພະຍາກອນກ່ຽວກັບເມຊີອາພິສູດບໍວ່າພະເຢຊູເປັນເມຊີອາແທ້ໆ?

ຄຳຕອບຈາກຄຳພີໄບເບິນ

ແມ່ນແລ້ວ ເພາະຕອນທີ່ພະເຢຊູຢູ່ເທິງໂລກ ເພິ່ນໄດ້ເຮັດໃຫ້ຄຳພະຍາກອນຫຼາຍເລື່ອງກ່ຽວກັບ “ເມຊີອາຜູ້ນຳ” ເຊິ່ງຈະເປັນ “ຜູ້ຊ່ວຍໂລກໃຫ້ລອດ” ເກີດຂຶ້ນແທ້. (ດານຽນ 9:25, ລ.ມ; 1 ໂຢຮັນ 4:14) ແລະຫຼັງຈາກທີ່ພະເຢຊູຟື້ນຂຶ້ນຈາກຕາຍ ເພິ່ນກໍຍັງເຮັດໃຫ້ຄຳພະຍາກອນອີກຫຼາຍຂໍ້ກ່ຽວກັບເມຊີອາສຳເລັດເປັນຈິງ.—ຄຳເພງ 110:1; ກິດຈະການ 2:34-36

“ເມຊີອາ” ໝາຍຄວາມວ່າຫຍັງ?

ຄຳພາສາເຮັບເຣີມາຊີອັກ (ເມຊີອາ) ກົງກັບຄຳພາສາກຣີກຄລິດໂຕສ໌ (ຄລິດ) ທັງສອງຄຳແປວ່າ “ຜູ້ຖືກເຈີມ.” ດັ່ງນັ້ນ ຄຳວ່າ “ເຢຊູຄລິດ” ຈຶ່ງມີຄວາມໝາຍວ່າ: “ພະເຢຊູຜູ້ຖືກເຈີມ” ຫຼື “ພະເຢຊູເມຊີອາ.”

ໃນສະໄໝຄຳພີໄບເບິນ ເມື່ອແຕ່ງຕັ້ງຄົນໜຶ່ງໃຫ້ມີຕຳແໜ່ງຫຼືໜ້າທີ່ພິເສດມັກຈະມີການເທນ້ຳມັນລົງໃສ່ຫົວຄົນນັ້ນ. (ລະບຽບພວກເລວີ 8:12; 1 ຊາມູເອນ 16:13) ພະເຢຊູໄດ້ຮັບການແຕ່ງຕັ້ງຈາກພະເຈົ້າໃຫ້ເປັນເມຊີອາເຊິ່ງເປັນຕຳແໜ່ງທີ່ສຳຄັນຫຼາຍ. (ກິດຈະການ 2:36) ໃນກໍລະນີຂອງພະເຢຊູ ພະເຈົ້າບໍ່ໄດ້ເຈີມເພິ່ນດ້ວຍການເທນ້ຳມັນ ແຕ່ເຈີມດ້ວຍພະລັງບໍລິສຸດ.—ມັດທາຍ 3:16

ຈະມີເມຊີອາຫຼາຍກວ່າໜຶ່ງຄົນໄດ້ບໍ?

ບໍ່ໄດ້. ເພາະຄຳພະຍາກອນຕ່າງໆໃນຄຳພີໄບເບິນເຮັດໃຫ້ເຮົາຮູ້ວ່າມີເມຊີອາຫຼືພະຄລິດພຽງຄົນດຽວ ຄືກັບທີ່ລາຍນິ້ວມືຕ້ອງເປັນຂອງຄົນຜູ້ດຽວ. ແຕ່ຄຳພີໄບເບິນກໍເຕືອນວ່າ: “ຈະມີພະຄລິດປອມແລະຜູ້ພະຍາກອນປອມມາເຮັດການອັດສະຈັນແລະສະແດງປາຕິຫານທີ່ຍິ່ງໃຫຍ່ ພວກເຂົາຈະພະຍາຍາມຫຼອກລວງແມ່ນແຕ່ຜູ້ທີ່ພະເຈົ້າເລືອກໄວ້ແລ້ວ.”—ມັດທາຍ 24:24

ໃນອະນາຄົດຈະມີເມຊີອາອີກບໍ?

ບໍ່. ຄຳພີໄບເບິນບອກລ່ວງໜ້າວ່າເມຊີອາຕ້ອງເປັນລູກຫຼານຂອງດາວິດກະສັດຂອງອິດສະຣາເອນ. (ຄຳເພງ 89:3, 4) ໃນປັດຈຸບັນ ບໍ່ມີບັນທຶກວົງຕະກູນຂອງຄົນຢິວທີ່ສືບໄປເຖິງສະໄໝຂອງດາວິດແລ້ວ ເພາະບັນທຶກນີ້ອາດຖືກທຳລາຍຕອນທີ່ກອງທັບໂຣມມາຍຶດເມືອງເຢຣູຊາເລັມໃນປີ ຄ.ສ 70.a ຕັ້ງແຕ່ນັ້ນມາກໍບໍ່ມີໃຜພິສູດໄດ້ອີກເລີຍວ່າ ໃຜສືບເຊື້ອສາຍມາຈາກກະສັດດາວິດ. ແຕ່ຕອນທີ່ພະເຢຊູຢູ່ເທິງໂລກຍັງມີບັນທຶກວົງຕະກູນຢູ່ ແລະເມື່ອພະເຢຊູບອກວ່າເພິ່ນເປັນລູກຫຼານຂອງດາວິດ ແມ່ນແຕ່ພວກສັດຕູກໍບໍ່ໄດ້ໂຕ້ແຍ່ງໃນເລື່ອງນີ້.—ມັດທາຍ 22:41-46

ໃນຄຳພີໄບເບິນມີຄຳພະຍາກອນກ່ຽວກັບເມຊີອາຈັກເລື່ອງ?

ບໍ່ສາມາດບອກຈຳນວນທີ່ແນ່ນອນໄດ້. ເຫດຜົນໜຶ່ງກໍຍ້ອນວິທີນັບຈຳນວນຄຳພະຍາກອນຂອງແຕ່ລະຄົນອາດແຕກຕ່າງກັນ. ແມ່ນແຕ່ຄຳພະຍາກອນທີ່ເຫັນໄດ້ແຈ້ງວ່າກ່ຽວຂ້ອງກັບເມຊີອາ ເຊັ່ນ: ເອຊາຢາ 53:2-7 ເຊິ່ງໃຫ້ລາຍລະອຽດຫຼາຍຢ່າງ. ບາງຄົນເບິ່ງວ່າເປັນຄຳພະຍາກອນເລື່ອງດຽວ ສ່ວນຄົນອື່ນໆອາດເບິ່ງວ່າລາຍລະອຽດແຕ່ລະຢ່າງເປັນຄຳພະຍາກອນໜຶ່ງເລື່ອງ.

ຄຳພະຍາກອນບາງເລື່ອງກ່ຽວກັບເມຊີອາທີ່ເກີດຂຶ້ນແທ້ກັບພະເຢຊູ

ຄຳພະຍາກອນ	ຂໍ້ພະຄຳພີ	ເກີດຂຶ້ນແທ້
ເປັນລູກຫຼານຂອງອັບຣາຮາມ	ປະຖົມມະການ 22:17, 18	ມັດທາຍ 1:1
ເປັນລູກຫຼານອີຊາກລູກຊາຍຂອງອັບຣາຮາມ	ປະຖົມມະການ 17:19	ມັດທາຍ 1:2
ເກີດໃນຕະກູນຢູດາ	ປະຖົມມະການ 49:10	ມັດທາຍ 1:1, 3
ສືບເຊື້ອສາຍຈາກລາຊະວົງດາວິດ	ເອຊາຢາ 9:7	ມັດທາຍ 1:1
ເກີດຈາກສາວບໍລິສຸດ	ເອຊາຢາ 7:14	ມັດທາຍ 1:18, 22, 23
ເກີດຢູ່ເມືອງເບັດເລເຮັມ	ມີເກ 5:2	ມັດທາຍ 2:1, 5, 6
ຖືກເອີ້ນວ່າເອມານູເອນb	ເອຊາຢາ 7:14	ມັດທາຍ 1:21-23
ເກີດໃນຄອບຄົວທີ່ທຸກຍາກ	ເອຊາຢາ 53:2	ລູກາ 2:7
ເດັກນ້ອຍຖືກຂ້າຫຼັງຈາກເພິ່ນເກີດ	ເຢເຣມີ 31:15	ມັດທາຍ 2:16-18
ຖືກເອີ້ນອອກຈາກເອຢິບ	ໂອເຊ 11:1	ມັດທາຍ 2:13-15
ຖືກເອີ້ນວ່າຊາວນາຊາເຣັດc	ເອຊາຢາ 11:1	ມັດທາຍ 2:23
ມີທູດນຳໜ້າມາກ່ອນ	ມາລາກີ 3:1	ມັດທາຍ 11:7-10
ຖືກເຈີມເປັນເມຊີອາ ຄ.ສ29d	ດານຽນ 9:25	ມັດທາຍ 3:13-17
ພະເຈົ້າຮັບຮອງວ່າເປັນລູກ	ຄຳເພງ 2:7	ກິດຈະການ 13:33, 34
ມີຄວາມຮັກແຮງກ້າຕໍ່ວິຫານຂອງພະເຈົ້າ	ຄຳເພງ 69:9	ໂຢຮັນ 2:13-17
ເປັນຜູ້ປະກາດຂ່າວດີ	ເອຊາຢາ 61:1	ລູກາ 4:16-21
ວຽກຮັບໃຊ້ໃນຄາລີເລເປັນຄືແສງສະຫວ່າງເຈີດຈ້າ	ເອຊາຢາ 9:1, 2	ມັດທາຍ 4:13-16
ເຮັດການອັດສະຈັນຄືໂມເຊ	ພະບັນຍັດ 18:15	ກິດຈະການ 2:22
ເວົ້າຕາມທີ່ພະເຈົ້າບອກໃຫ້ເວົ້າຄືໂມເຊ	ພະບັນຍັດ 18:18, 19	ໂຢຮັນ 12:49
ຮັກສາຄົນປ່ວຍຫຼາຍຄົນ	ເອຊາຢາ 53:4	ມັດທາຍ 8:16, 17
ບໍ່ເຮັດໃຫ້ຄົນອື່ນມາສົນໃຈໂຕເອງ	ເອຊາຢາ 42:2	ມັດທາຍ 12:17, 19
ສະແດງຄວາມອີ່ຕົນຕໍ່ຄົນທີ່ມີຄວາມທຸກ	ເອຊາຢາ 42:3	ມັດທາຍ 12:9-20; ມາຣະໂກ 6:34
ເຮັດໃຫ້ເຫັນຄວາມຍຸຕິທຳຂອງພະເຈົ້າ	ເອຊາຢາ 42:1, 4	ມັດທາຍ 12:17-20
ເປັນທີ່ປຶກສາມະຫັດສະຈັນ	ເອຊາຢາ 9:6, 7	ໂຢຮັນ 6:68
ປະກາດຊື່ພະເຢໂຫວາ	ຄຳເພງ 22:22	ໂຢຮັນ 17:6
ເວົ້າເປັນຕົວຢ່າງປຽບທຽບ	ຄຳເພງ 78:2	ມັດທາຍ 13:34, 35
ເປັນຜູ້ນຳ	ດານຽນ 9:25	ມັດທາຍ 23:10
ຫຼາຍຄົນບໍ່ເຊື່ອສິ່ງທີ່ເພິ່ນເວົ້າ	ເອຊາຢາ 53:1	ໂຢຮັນ 12:37, 38
ເປັນຫີນທີ່ເຮັດໃຫ້ສະດຸດ	ເອຊາຢາ 8:14, 15	ມັດທາຍ 21:42-44
ຜູ້ຄົນບໍ່ຍອມຮັບ	ຄຳເພງ 118:22, 23	ກິດຈະການ 4:10, 11
ຖືກຊັງໂດຍບໍ່ມີເຫດຜົນ	ຄຳເພງ 69:4	ໂຢຮັນ 15:24, 25
ຂີ່ລາເຂົ້າເມືອງເຢຣູຊາເລັມແບບຜູ້ຊະນະ	ຊາກາລີ 9:9	ມັດທາຍ 21:4-9
ໄດ້ຮັບຄຳສັນລະເສີນຈາກເດັກນ້ອຍ	ຄຳເພງ 8:2	ມັດທາຍ 21:15, 16
ມາໃນນາມພະເຢໂຫວາ	ຄຳເພງ 118:26	ໂຢຮັນ 12:12, 13
ຖືກໝູ່ສະໜິດທໍລະຍົດ	ຄຳເພງ 41:9	ໂຢຮັນ 13:18
ຖືກທໍລະຍົດດ້ວຍເງິນ 30 ຫຼຽນe	ຊາກາລີ 11:12, 13	ມັດທາຍ 26:14-16; 27:3-10
ຖືກໝູ່ຖິ້ມ	ຊາກາລີ 13:7	ມັດທາຍ 26:31, 56
ຖືກພະຍານປອມໃຫ້ການໃສ່ຮ້າຍ	ຄຳເພງ 35:11	ມັດທາຍ 26:59-61
ບໍ່ຕອບຜູ້ທີ່ກ່າວຫາ	ເອຊາຢາ 53:7	ມັດທາຍ 27:12-14
ຖືກຖົ່ມນ້ຳລາຍໃສ່	ເອຊາຢາ 50:6	ມັດທາຍ 26:67; 27:27, 30
ຖືກຕີຫົວ	ມີເກ 5:1	ມາຣະໂກ 15:19
ຖືກຂ້ຽນ	ເອຊາຢາ 50:6	ໂຢຮັນ 19:1
ຍອມຖືກທຳຮ້າຍ	ເອຊາຢາ 50:6	ໂຢຮັນ 18:22, 23
ພວກຜູ້ນຳລວມຫົວກັນຂ້າ	ຄຳເພງ 2:2	ລູກາ 23:10-12
ຖືກຕອກຕະປູຢູ່ມືແລະຕີນ	ຄຳເພງ 22:16	ມັດທາຍ 27:35; ໂຢຮັນ 20:25
ຜູ້ຄົນເອົາເສື້ອເພິ່ນມາຈັບສະຫຼາກ	ຄຳເພງ 22:18	ໂຢຮັນ 19:23, 24
ຖືກນັບລວມກັບຄົນບາບ	ເອຊາຢາ 53:12	ມັດທາຍ 27:38
ຖືກດ່າແລະຖືກດູຖູກ	ຄຳເພງ 22:7, 8	ມັດທາຍ 27:39-43
ທົນທຸກເພື່ອຄົນບາບ	ເອຊາຢາ 53:5, 6	1 ເປໂຕ 2:23-25
ເບິ່ງຄືຖືກພະເຈົ້າປະຖິ້ມ	ຄຳເພງ 22:1	ມາຣະໂກ 15:34
ມີຄົນເອົານ້ຳສົ້ມສາຍຊູກັບນ້ຳບີໃຫ້ດື່ມ	ຄຳເພງ 69:21	ມັດທາຍ 27:34
ຫິວນ້ຳກ່ອນຈະເສຍຊີວິດ	ຄຳເພງ 22:15	ໂຢຮັນ 19:28, 29
ຝາກຊີວິດໄວ້ກັບພະເຈົ້າ	ຄຳເພງ 31:5	ລູກາ 23:46
ຍອມສະລະຊີວິດ	ເອຊາຢາ 53:12	ມາຣະໂກ 15:37
ເປັນຄ່າໄຖ່ເພື່ອກຳຈັດບາບ	ເອຊາຢາ 53:12	ມັດທາຍ 20:28
ກະດູກບໍ່ຫັກ	ຄຳເພງ 34:20	ໂຢຮັນ 19:31-33, 36
ຖືກແທງ	ຊາກາລີ 12:10	ໂຢຮັນ 19:33-35, 37
ຖືກຝັງໄວ້ກັບຄົນລວຍ	ເອຊາຢາ 53:9	ມັດທາຍ 27:57-60
ຖືກປຸກໃຫ້ຟື້ນຂຶ້ນຈາກຕາຍ	ຄຳເພງ 16:10	ກິດຈະການ 2:29-31
ມີຄົນຮັບໜ້າທີ່ແທນຄົນທີ່ທໍລະຍົດເພິ່ນ	ຄຳເພງ 109:8	ກິດຈະການ 1:15-20
ນັ່ງເບື້ອງຂວາຂອງພະເຈົ້າ	ຄຳເພງ 110:1	ກິດຈະການ 2:34-36

a ສາລານຸກົມແມັກຄລິນທອກແລະສະຕຣອງບອກວ່າ: “ເກືອບບໍ່ມີຂໍ້ສົງໄສເລີຍວ່າບັນທຶກວົງຕະກູນຂອງຄົນຢິວສູນຫາຍໄປຕອນທີ່ເມືອງເຢຣູຊາເລັມຖືກທຳລາຍ ບໍ່ແມ່ນກ່ອນໜ້ານັ້ນ.”

b ເອມານູເອນເປັນຊື່ພາສາເຮັບເຣີແປວ່າ “ພະເຈົ້າຢູ່ກັບເຮົາ.” ຊື່ນີ້ສອດຄ່ອງກັບບົດບາດຂອງພະເຢຊູໃນຖານະເມຊີອາ. ເພາະການທີ່ເພິ່ນມາເທິງໂລກແລະວຽກທຸກຢ່າງທີ່ເພິ່ນເຮັດເປັນຫຼັກຖານວ່າພະເຈົ້າຢູ່ກັບຄົນທີ່ນະມັດສະການເພິ່ນ.—ລູກາ 2:27-32; 7:12-16

c ຄຳວ່າ “ຊາວນາຊາເຣັດ” ອາດມາຈາກຄຳພາສາເຮັບເຣີ ເນເຊີ ທີ່ແປວ່າ “ໜໍ່” ຫຼື “ຜູ້ສືບເຊື້ອສາຍ.”

d ສຳລັບລາຍລະອຽດກ່ຽວກັບລຳດັບເວລາໃນຄຳພີໄບເບິນທີ່ຊີ້ວ່າ ຄ.ສ 29 ເປັນປີທີ່ເມຊີອາປາກົດໂຕ ເບິ່ງບົດຄວາມ “ວິທີທີ່ຄຳພະຍາກອນຂອງດານຽນບອກລ່ວງໜ້າເລື່ອງການປາກົດຕົວຂອງເມຊີ.”

e ຄຳພະຍາກອນນີ້ຢູ່ໃນປຶ້ມຊາກາລີ ແຕ່ມັດທາຍບອກວ່າເລື່ອງນີ້ “ບອກໄວ້ຜ່ານທາງຜູ້ພະຍາກອນເຢເຣມີ.” (ມັດທາຍ 27:9) ເບິ່ງຄືວ່າບາງເທື່ອປຶ້ມເຢເຣມີຖືກຈັດໄວ້ເປັນຫົວທຳອິດຂອງໝວດ “ປຶ້ມຂອງພວກຜູ້ພະຍາກອນ.” (ລູກາ 24:44) ດັ່ງນັ້ນ ມັດທາຍອາດຈະໃຊ້ຄຳວ່າ: “ເຢເຣມີ” ເພື່ອໝາຍເຖິງປຶ້ມທຸກເຫຼັ້ມໃນໝວດນີ້ ເຊິ່ງລວມເຖິງປຶ້ມຊາກາລີ.

ຄຳຕອບ​ຈາກ​ຄຳພີໄບເບິນ

“ເມຊີອາ” ໝາຍ​ຄວາມ​ວ່າ​ຫຍັງ?

ຈະ​ມີ​ເມຊີອາ​ຫຼາຍ​ກວ່າ​ໜຶ່ງ​ຄົນ​ໄດ້​ບໍ?

ໃນ​ອະນາຄົດ​ຈະ​ມີ​ເມຊີອາ​ອີກ​ບໍ?