ບົດສິບເອັດ
‘ຈົ່ງຊອກຫາ ລາຊະອານາຈັກແຫ່ງພະເຈົ້າກ່ອນ’
1. (ກ) ດ້ວຍເຫດໃດພະເຍຊູຈຶ່ງກະຕຸ້ນຜູ້ຟັງຂອງພະອົງໃຫ້ຊອກຫາລາຊະອານາຈັກກ່ອນ? (ຂ) ເຮົາຄວນຖາມຕົວເອງແນວໃດໃນເລື່ອງນີ້?
ຫຼາຍກວ່າ 1,900 ປີຜ່ານໄປແລ້ວເມື່ອພະເຍຊູເທດສະໜາຢູ່ຄາລິເລ ພະອົງກະຕຸ້ນໃຈຜູ້ຟັງວ່າ “ຈົ່ງຊອກຫາແຜ່ນດິນ [“ລາຊະອານາຈັກ,” ລ.ມ.] ແຫ່ງພະເຈົ້າແລະຄວາມຊອບທຳແຫ່ງພະອົງກ່ອນ.” ເປັນຫຍັງເລື່ອງນີ້ຈຶ່ງຮີບດ່ວນຂະໜາດນັ້ນ? ເວລາທີ່ພະເຍຊູຈະໄດ້ຮັບອຳນາດແຫ່ງລາຊະອານາຈັກບໍ່ແມ່ນຍັງອີກຫຼາຍສະຕະວັດຕໍ່ມາບໍ? ແມ່ນແລ້ວ ແຕ່ວ່າລາຊະອານາຈັກເມຊີນັ້ນຈະເປັນຊ່ອງທາງທີ່ພະເຢໂຫວາຈະພິສູດເຖິງສິດທິສູງສຸດໃນການປົກຄອງຂອງພະອົງ ແລະເຮັດໃຫ້ພະປະສົງຂອງພະອົງສຳລັບແຜ່ນດິນໂລກສຳເລັດເປັນຈິງ. ໃຜກໍຕາມທີ່ຮູ້ຄຸນຄ່າຄວາມສຳຄັນຂອງສິ່ງເຫຼົ່ານັ້ນຢ່າງແທ້ຈິງຈະຈັດໃຫ້ລາຊະອານາຈັກມາເປັນອັນດັບທຳອິດໃນຊີວິດຂອງຕົນ. ຖ້າເລື່ອງນີ້ເປັນຄວາມຈິງໃນສະຕະວັດທຳອິດ ມັນຈະເປັນຄວາມຈິງຫຼາຍຂະໜາດໃດໃນທຸກມື້ນີ້ ເພາະວ່າພະຄລິດໄດ້ຮັບການແຕ່ງຕັ້ງໃຫ້ເປັນກະສັດແລ້ວ! ສະນັ້ນ ຈຶ່ງເກີດມີຄຳຖາມວ່າ ຮູບແບບການດຳລົງຊີວິດຂອງເຮົາສະແດງໃຫ້ເຫັນວ່າເຮົາກຳລັງຊອກຫາລາຊະອານາຈັກຂອງພະເຈົ້າກ່ອນສິ່ງອື່ນບໍ?—ມັດທາຍ 6:33.
2. ຄົນທົ່ວໄປມັກໃຝ່ຫາສິ່ງໃດດ້ວຍໃຈຈົດຈໍ່?
2 ຄວາມຈິງແລ້ວ ໃນປັດຈຸບັນນີ້ສິ່ງທຳອິດທີ່ຫຼາຍລ້ານຄົນກຳລັງຊອກຫາແມ່ນລາຊະອານາຈັກ. ເຂົາເຈົ້າສະແດງໃຫ້ເຫັນວ່າຕົນເອງສະໜັບສະຫນູນການປົກຄອງແຫ່ງລາຊະອານາຈັກ ໂດຍໃຫ້ຊີວິດຂອງຕົນລວມຈຸດຢູ່ໃນການເຮັດຕາມໃຈປະສົງຂອງພະເຢໂຫວາດ້ວຍການອຸທິດຕົວແກ່ພະອົງ. ແຕ່ມະນຸດຊາດສ່ວນໃຫຍ່ຈະສຸມຈິດສຸມໃຈໃສ່ບັນຫາໃນຊີວິດປະຈຳວັນ. ຜູ້ຄົນສະແຫວງຫາເງິນຄຳ, ຊັບສົມບັດ, ແລະຄວາມເພີດເພີນເຊິ່ງເງິນສາມາດຊື້ໄດ້. ຖ້າບໍ່ດັ່ງນັ້ນກໍທຸ່ມເທກຳລັງສ່ວນໃຫຍ່ເພື່ອສົ່ງເສີມອາຊີບຂອງຕົນ. ຮູບແບບການດຳລົງຊີວິດຂອງເຂົາເຈົ້າສະທ້ອນໃຫ້ເຫັນວ່າ ເຂົາເຈົ້າໝົກມຸ່ນຢູ່ກັບຕົນເອງ, ສິ່ງຝ່າຍວັດຖຸ, ແລະຄວາມເພີດເພີນ. ຖ້າແມ່ນວ່າເຂົາເຈົ້າມີຄວາມເຊື່ອ ເຂົາເຈົ້າຍັງຈັດໃຫ້ພະເຈົ້າຢູ່ໃນອັນດັບຮອງລົງມາ.—ມັດທາຍ 6:31, 32.
3. (ກ) ພະເຍຊູແນະນຳໃຫ້ລູກສິດຂອງພະອົງຊອກຫາຊັບສົມບັດປະເພດໃດ ແລະຍ້ອນຫຍັງ? (ຂ) ເປັນຫຍັງຈຶ່ງບໍ່ຄວນເປັນຫ່ວງຫຼາຍເກີນໄປກ່ຽວກັບສິ່ງຝ່າຍວັດຖຸ?
3 ຢ່າງໃດກໍຕາມ ພະເຍຊູໄດ້ໃຫ້ຄຳແນະນຳແກ່ລູກສິດຂອງພະອົງວ່າ “ຢ່າຊູໂຮມເອົາເຂົ້າຂອງແພງໄວ້ສຳລັບຕົນໃນແຜ່ນດິນໂລກ” ເນື່ອງຈາກຊັບສົມບັດເຫຼົ່ານັ້ນບໍ່ຄົງທົນຖາວອນ. ພະອົງກ່າວດັ່ງນີ້: “ແຕ່ວ່າ ຈົ່ງໂຮມເອົາເຂົ້າຂອງແພງໄວ້ສຳລັບຕົນໃນສະຫວັນ” ໂດຍການຮັບໃຊ້ພະເຢໂຫວາ. ພະເຍຊູກະຕຸ້ນພວກລູກສິດໃຫ້ຮັກສາຕາໃຫ້ “ຊື່ດີ” ຫຼືປົກກະຕິໂດຍການສຸມຈິດສຸມໃຈແລະທຸ່ມເທກຳລັງວັງຊາໃນການເຮັດຕາມໃຈປະສົງຂອງພະເຈົ້າ. ພະອົງບອກເຂົາເຈົ້າວ່າ “ທ່ານທັງຫຼາຍອາດເປັນຂ້າໃຊ້ຂອງພະເຈົ້າແລະຂ້າໃຊ້ຂອງເຂົ້າຂອງເງິນຄຳກໍບໍ່ໄດ້.” ຖ້າເປັນແນວນັ້ນ ສຳລັບຄວາມຈຳເປັນທາງດ້ານວັດຖຸເຊັ່ນ ອາຫານ, ເຄື່ອງນຸ່ງຫົ່ມ, ແລະບ່ອນຢູ່ອາໄສເດ? ພະເຍຊູແນະນຳວ່າ “ຢ່າຊູອຸກໃຈ.” ພະອົງຊີ້ໃຫ້ເຂົາເຈົ້າເຫັນຝູງນົກທີ່ພະເຈົ້າໄດ້ລ້ຽງໄວ້. ພະເຍຊູເນັ້ນໃຫ້ຜູ້ຕິດຕາມພະອົງຮຽນເອົາບົດຮຽນຈາກດອກໄມ້ທີ່ພະເຈົ້າໄດ້ຕົບແຕ່ງໄວ້. ຜູ້ຮັບໃຊ້ຂອງພະເຢໂຫວາທີ່ເປັນມະນຸດເຊິ່ງມີຄວາມຮູ້ສຶກນຶກຄິດຈະບໍ່ມີຄຸນຄ່າຫຼາຍກວ່ານັ້ນບໍ? ພະເຍຊູກ່າວວ່າ “ຈົ່ງຊອກຫາແຜ່ນດິນ [“ລາຊະອານາຈັກ,” ລ.ມ.] ແຫ່ງພະເຈົ້າແລະຄວາມຊອບທຳແຫ່ງພະອົງກ່ອນ ແລະສິ່ງຂອງທັງປວງ [ທີ່ຈຳເປັນ] ນີ້ ຈະເປັນທີ່ຕື່ມໃຫ້ແກ່ທ່ານທັງຫຼາຍ.” (ມັດທາຍ 6:19-34) ການດຳລົງຊີວິດຂອງເຮົາໄດ້ສະແດງໃຫ້ເຫັນວ່າເຮົາເຊື່ອໃນເລື່ອງນັ້ນບໍ?
ຢ່າປ່ອຍໃຫ້ຄວາມຈິງເລື່ອງລາຊະອານາຈັກຖືກປິດກັ້ນ
4. ຖ້າຄົນເຮົາໃຫ້ຄວາມສຳຄັນກ່ຽວກັບສິ່ງຝ່າຍວັດຖຸຫຼາຍເກີນໄປ ຜົນທີ່ຕາມມາອາດເປັນແນວໃດ?
4 ເປັນເລື່ອງເໝາະສົມແລ້ວທີ່ຈະເປັນຫ່ວງໃນການສະໜອງຄວາມຈຳເປັນຢ່າງພຽງພໍທາງດ້ານວັດຖຸຕໍ່ຕົນເອງແລະຄອບຄົວ. ແນວໃດກໍຕາມ ຖ້າຄົນຜູ້ໜຶ່ງເປັນຫ່ວງກ່ຽວກັບສິ່ງຝ່າຍວັດຖຸຫຼາຍເກີນໄປອາດເປັນຜົນທີ່ກໍ່ໃຫ້ເກີດຄວາມຫາຍະນະໄດ້. ເຖິງແມ່ນວ່າຄົນຜູ້ນັ້ນອາດອ້າງວ່າເຊື່ອໃນລາຊະອານາຈັກກໍຕາມ ແຕ່ຖ້າລາວຈັດເອົາສິ່ງອື່ນໆໄວ້ເປັນອັນດັບທຳອິດໃນຫົວໃຈ ຄວາມຈິງແຫ່ງລາຊະອານາຈັກກໍຈະຖືກປິດກັ້ນໄວ້. (ມັດທາຍ 13:18-22) ຕົວຢ່າງ ໃນໂອກາດໜຶ່ງຜູ້ປົກຄອງຫນຸ່ມທີ່ຮັ່ງມີຄົນໜຶ່ງໄດ້ຖາມພະເຍຊູວ່າ “ຂ້າພະເຈົ້າຈະກະທຳສິ່ງໃດເພື່ອຈະຮັບຊີວິດອັນຕະຫຼອດໄປເປັນນິດມາເປັນມູນລະດົກ”? ລາວໄດ້ດຳເນີນຊີວິດຢ່າງມີສິນລະທຳແລະປະຕິບັດດີກັບຄົນອື່ນ ແຕ່ລາວຊ້ຳພັດຕິດພັນກັບຊັບສົມບັດຝ່າຍວັດຖຸຫຼາຍໂພດ. ລາວບໍ່ສາມາດປະຖິ້ມຊັບສົມບັດຂອງຕົນເພື່ອເຂົ້າມາເປັນຜູ້ຕິດຕາມພະຄລິດໄດ້. ດ້ວຍເຫດນັ້ນ ລາວຈຶ່ງພາດໂອກາດທີ່ຈະໄດ້ຢູ່ຮ່ວມກັບພະຄລິດໃນລາຊະອານາຈັກທາງພາກສະຫວັນ. ພະເຍຊູກ່າວໃນໂອກາດນັ້ນວ່າ “ທີ່ຄົນຮັ່ງມີຈະເຂົ້າໄປໃນອານາຈັກຂອງພະເຈົ້າກໍຍາກແທ້!”—ມາລະໂກ 10:17-22, 23, ທ.ປ.
5. (ກ) ໂປໂລກະຕຸ້ນຕີໂມເຕໃຫ້ພໍໃຈກັບສິ່ງໃດ ແລະເພາະເຫດໃດ? (ຂ) ຊາຕານໃຊ້ “ຄວາມຮັກເງິນຄຳ” ເປັນບ້ວງແຮ້ວທີ່ພາໄປສູ່ຄວາມຈິບຫາຍແນວໃດ?
5 ຫຼາຍປີຕໍ່ມາ ອັກຄະສາວົກໂປໂລໄດ້ຂຽນເຖິງຕີໂມເຕເຊິ່ງຕອນນັ້ນຢູ່ເມືອງເອເຟດ ທີ່ເປັນສູນກາງການຄ້າທີ່ຈະເລີນຮຸ່ງເຮືອງຫຼາຍ. ໂປໂລເຕືອນລາວວ່າ “ເພາະວ່າເຮົາທັງຫຼາຍບໍ່ໄດ້ເອົາສິ່ງໜຶ່ງສິ່ງໃດຖືມາໃນໂລກ ແລະເປັນແທ້ວ່າ ເຮົາທັງຫຼາຍຈະເອົາສິ່ງໜຶ່ງສິ່ງໃດຖືໄປຈາກໂລກກໍບໍ່ໄດ້. ແຕ່ວ່າຖ້າເຮົາທັງຫຼາຍມີອາຫານລ້ຽງຕົວແລະມີທີ່ອາໄສ ເຮົາທັງຫຼາຍຈະດີໃຈດ້ວຍສິ່ງຂອງນັ້ນ.” ການເຮັດວຽກເພື່ອຈັດຫາ “ອາຫານລ້ຽງຕົວແລະມີທີ່ອາໄສ” ສຳລັບຕົນເອງແລະຄອບຄົວເປັນເລື່ອງທີ່ສົມຄວນແລ້ວ. ແນວໃດກໍຕາມ ໂປໂລຕັກເຕືອນວ່າ “ຄົນທັງຫຼາຍທີ່ຢາກໄດ້ຫາເປັນຄົນມັ່ງມີ ກໍຕົກໃນຄວາມທົດລອງ [“ການລໍ້ໃຈ,” ລ.ມ.] ແລະໃນຫາງໂທນ [“ບ້ວງແຮ້ວ,” ລ.ມ.] ແລະໃນຄວາມຄຶດຢາກໄດ້ອັນບໍ່ຮູ້ ອັນຊົ່ວຫຼາຍຢ່າງທີ່ໃຫ້ຄົນທັງຫຼາຍຈົມລົງໃນຄວາມຈິບຫາຍ ແລະໃນການທຳລາຍເສຍ.” ຊາຕານມີເລ່ຫຼ່ຽມຫຼາຍ. ທຳອິດມັນອາດລໍ້ລວງຄົນເຮົາດ້ວຍເລື່ອງເລັກນ້ອຍ. ຈາກນັ້ນ ອາດຕາມມາດ້ວຍຄວາມກົດດັນທີ່ໃຫຍ່ກວ່າ ບາງເທື່ອອາດເປັນໂອກາດດີສຳລັບການເລື່ອນຕຳແໜ່ງ ຫຼືໄດ້ວຽກທີ່ດີກວ່າເຊິ່ງໃຫ້ເງິນເດືອນຫຼາຍກວ່າເກົ່າ ແຕ່ພັດຮຽກຮ້ອງເວລາເຊິ່ງແຕ່ກ່ອນໄດ້ຈັດໄວ້ສຳລັບສິ່ງຝ່າຍວິນຍານ. ຖ້າເຮົາບໍ່ລະວັງ “ຄວາມຮັກເງິນຄຳ” ຈະປິດກັ້ນເລື່ອງລາຊະອານາຈັກເຊິ່ງມີຄວາມສຳຄັນຫຼາຍກວ່າໄວ້ໄດ້. ໂປໂລບອກໄວ້ດັ່ງນີ້: “ຜູ້ລາງຄົນທີ່ໄດ້ໂລບເງິນຄຳນັ້ນ ກໍໄດ້ຫຼົງໄປຈາກຄວາມເຊື່ອ ແລະເຂົາໄດ້ແທງຕົວເອງດ້ວຍຄວາມທຸກໂສກຫຼາຍປະການ.”—1 ຕີໂມເຕ 6:7-10.
6. (ກ) ເຮົາຕ້ອງເຮັດຫຍັງເພື່ອຫຼີກລ້ຽງບ້ວງແຮ້ວຂອງການນິຍົມວັດຖຸ? (ຂ) ເຮົາສາມາດໝັ້ນໃຈໃນເລື່ອງໃດເຖິງວ່າຈະປະເຊີນກັບບັນຫາທາງເສດຖະກິດຂອງໂລກໃນປັດຈຸບັນນີ້ກໍຕາມ?
6 ຍ້ອນຄວາມຮັກທີ່ແທ້ຈິງເຊິ່ງມີຕໍ່ພີ່ນ້ອງຄລິດສະຕຽນ ໂປໂລແນະນຳຕີໂມເຕວ່າ “ຈົ່ງປົບໜີເສຍຈາກສິ່ງທັງຫຼາຍນີ້” ແລະ “ຈົ່ງເລວເສິກໃນການເສິກຢ່າງດີແຫ່ງຄວາມເຊື່ອ.” (1 ຕີໂມເຕ 6:11, 12) ຄວາມພາກພຽນພະຍາຍາມຢ່າງຈິງຈັງເປັນສິ່ງຈຳເປັນ ຖ້າເຮົາຕ້ອງການຫຼີກລ້ຽງການຖືກຊັກຈູງໄປຕາມແນວທາງຊີວິດທີ່ນິຍົມວັດຖຸຂອງໂລກເຊິ່ງຢູ່ອ້ອມຕົວເຮົາ. ຖ້າເຮົາທຸ່ມເທຕົວເອງແບບທີ່ສອດຄ່ອງກັບຄວາມເຊື່ອຂອງເຮົາ ພະເຢໂຫວາຈະບໍ່ປະຖິ້ມເຮົາເດັດຂາດ. ບໍ່ວ່າພາວະເງິນເຟີ້ແລະການວ່າງງານຈະມີຫຼາຍຂຶ້ນກໍຕາມ ແຕ່ພະອົງຈະເຮັດໃຫ້ແນ່ໃຈວ່າເຮົາມີສິ່ງຈຳເປັນແທ້ໆ. ໂປໂລໄດ້ຂຽນວ່າ “ຈົ່ງກະທຳປາສະຈາກຄວາມໂລບ ພວກທ່ານມີສິ່ງຂອງມາກໜ້ອຍເທົ່າໃດ ຈົ່ງມີອີ່ມໃຈດ້ວຍເທົ່ານັ້ນເທີ້ນ ເພາະວ່າພະອົງ [ພະເຈົ້າ] ເອງໄດ້ບອກແລ້ວວ່າ ເຮົາຈະບໍ່ປະເຈົ້າເສຍສັກເທື່ອ ແລະເຮົາຈະບໍ່ຖິ້ມເຈົ້າເສຍສັກເທື່ອ. ເຫດສັນນີ້ ເຮົາທັງຫຼາຍຈະກ່າວດ້ວຍໃຈກ້າວ່າ ພະອົງເຈົ້າ [ພະເຢໂຫວາ] ເປັນຜູ້ຊ່ອຍຂ້າພະເຈົ້າ ແລະຂ້າພະເຈົ້າຈະບໍ່ຢ້ານກົວ ມະນຸດຈະກະທຳສິ່ງໃດແກ່ຂ້າພະເຈົ້າ.” (ເຫບເລີ 13:5, 6) ກະສັດດາວິດຍັງໄດ້ຂຽນວ່າ “ແຕ່ກ່ອນຂ້ອຍເປັນຄົນຫນຸ່ມ ດຽວນີ້ກໍເຖົ້າແລ້ວ ແລະຂ້ອຍບໍ່ໄດ້ເຫັນຄົນຊອບທຳຮ້າງປະແລ້ວຫຼືເຊື້ອສາຍແຫ່ງຕົນພວມຂໍເຂົ້າ.”—ຄຳເພງ 37:25.
ລູກສິດຮຸ່ນທຳອິດວາງແບບຢ່າງໄວ້
7. ພະເຍຊູໃຫ້ຄຳແນະນຳຫຍັງແດ່ແກ່ລູກສິດຂອງພະອົງໃນເລື່ອງການປະກາດ ແລະເປັນຫຍັງຄຳແນະນຳເຫຼົ່ານີ້ຈຶ່ງເໝາະສົມ?
7 ພາຍຫຼັງພະເຍຊູໃຫ້ການຝຶກອົບຮົມທີ່ເໝາະສົມແກ່ພວກອັກຄະສາວົກແລ້ວ ພະອົງໄດ້ສົ່ງເຂົາເຈົ້າໄປທົ່ວຍິດສະລາເອນເພື່ອປະກາດຂ່າວດີແລະໃຫ້ປະກາດວ່າ “ແຜ່ນດິນ [ລາຊະອານາຈັກ] ສະຫວັນຫຍັບເຂົ້າມາໃກ້ແລ້ວ.” ຖືວ່າເປັນຂ່າວອັນໜ້າຕື່ນເຕັ້ນແທ້ໆ! ພະເຍຊູຄລິດຜູ້ເປັນກະສັດເມຊີໄດ້ຢູ່ທ່າມກາງເຂົາເຈົ້າແລ້ວ. ເນື່ອງຈາກພວກອັກຄະສາວົກໄດ້ທຸ່ມເທຕົວເອງເພື່ອຮັບໃຊ້ພະເຈົ້າ ພະເຍຊູກະຕຸ້ນເຂົາເຈົ້າໃຫ້ມີຄວາມໝັ້ນໃຈວ່າ ພະເຈົ້າຈະເບິ່ງແຍງເຂົາເຈົ້າ. ດ້ວຍເຫດນັ້ນ ພະອົງກ່າວວ່າ “ຢ່າຖືເອົາສິ່ງໜຶ່ງສິ່ງໃດສຳລັບທາງ ໄມ້ຄ້ອນກໍດີ ຖົງກໍດີ ເຂົ້າຈີ່ກໍດີ ເງິນກໍດີ ແລະຢ່າຖືເອົາເສື້ອສອງຕົວ. ແລະໃນເຮືອນຫຼັງໃດທ່ານທັງຫຼາຍຈະເຂົ້າໄປ ຈົ່ງອາໄສຢູ່ທີ່ນັ້ນແລະອອກໄປແຕ່ທີ່ນັ້ນ.” (ມັດທາຍ 10:5-10; ລືກາ 9:1-6) ພະເຢໂຫວາຈະເຝົ້າເບິ່ງແຍງເພື່ອສະໜອງຄວາມຈຳເປັນຂອງເຂົາເຈົ້າ ໂດຍການເກື້ອຫນູນຈາກຊາວຍິດສະລາເອນເພື່ອນຮ່ວມຊາດຂອງເຂົາເຈົ້າເຊິ່ງມີນ້ຳໃຈມັກຕ້ອນຮັບແຂກເປັນທຳນຽມຢູ່ແລ້ວ.
8. (ກ) ບໍ່ດົນກ່ອນທີ່ພະອົງຈະສິ້ນຊີວິດ ເປັນຫຍັງພະເຍຊູຈຶ່ງໃຫ້ຄຳແນະນຳໃໝ່ໃນເລື່ອງການປະກາດ? (ຂ) ສິ່ງໃດຄວນເປັນເລື່ອງສຳຄັນທີ່ສຸດໃນຊີວິດຂອງຜູ້ຕິດຕາມພະເຍຊູ?
8 ຕໍ່ມາກ່ອນພະອົງຈະສິ້ນຊີວິດ ພະເຍຊູເຕືອນເຫຼົ່າອັກຄະສາວົກເຖິງຄວາມຈິງທີ່ວ່າ ໃນອະນາຄົດເຂົາເຈົ້າຈະເຮັດວຽກໃນສະພາບການທີ່ແຕກຕ່າງອອກໄປ. ເນື່ອງຈາກຈະມີການຕໍ່ຕ້ານວຽກງານຂອງເຂົາເຈົ້າຢ່າງເປັນທາງການ ນ້ຳໃຈເຜື່ອແຜ່ອາດບໍ່ມີໃຫ້ແກ່ເຂົາເຈົ້າຫຼາຍໃນຍິດສະລາເອນ. ອີກຢ່າງໜຶ່ງ ໃນບໍ່ດົນເຂົາເຈົ້າຍັງຈະເອົາຂ່າວສານເລື່ອງລາຊະອານາຈັກໄປບອກແກ່ຄົນຕ່າງຊາດໃນດິນແດນຕ່າງໆນຳອີກ. ໃນຕອນນັ້ນແຫຼະ ເຂົາເຈົ້າຈະຕ້ອງ ເອົາ “ຖົງເງິນ” ແລະ “ກະເປົ໋າ [ເພື່ອໃສ່ອາຫານ]” ໄປນຳ. ເຖິງຢ່າງນັ້ນກໍຕາມ ເຂົາເຈົ້າຕ້ອງຊອກຫາລາຊະອານາຈັກຂອງພະເຢໂຫວາແລະຄວາມຊອບທຳຂອງພະອົງກ່ອນໂດຍໝັ້ນໃຈວ່າພະເຈົ້າຈະອວຍພອນຄວາມພະຍາຍາມຂອງເຂົາເຈົ້າເພື່ອຈະມີອາຫານການກິນແລະເຄື່ອງໃຊ້ສອຍຕ່າງໆ.—ລືກາ 22:35-37.
9. ຂະນະທີ່ເອົາໃຈໃສ່ຕໍ່ຄວາມຈຳເປັນທາງດ້ານຮ່າງກາຍ ໂປໂລໄດ້ຈັດໃຫ້ລາຊະອານາຈັກມາເປັນສິ່ງສຳຄັນອັນດັບທຳອິດໃນຊີວິດຂອງຕົນແນວໃດ ແລະໃນເລື່ອງນີ້ລາວໄດ້ໃຫ້ຄຳແນະນຳຫຍັງແດ່?
9 ອັກຄະສາວົກໂປໂລເປັນຕົວຢ່າງທີ່ດີຂອງຜູ້ທີ່ປະຕິບັດຕາມຄຳແນະນຳຂອງພະເຍຊູ. ໂປໂລສຸມໃສ່ວຽກງານຮັບໃຊ້ໃຫ້ເປັນວຽກຫຼັກໃນຊີວິດຂອງຕົນ. (ກິດຈະການ 20:24, 25) ເມື່ອລາວເຂົ້າໄປໃນເຂດແດນໜຶ່ງເພື່ອປະກາດ ລາວໄດ້ເບິ່ງແຍງຕົວເອງໂດຍເຮັດວຽກຫຍິບກະໂຈມເພື່ອຈະມີສິ່ງຈຳເປັນທາງດ້ານວັດຖຸ. ລາວບໍ່ໄດ້ຄາດຫວັງໃຫ້ຜູ້ອື່ນເບິ່ງແຍງລາວ. (ກິດຈະການ 18:1-4; 1 ເທຊະໂລນີກ 2:9) ເຖິງຢ່າງນັ້ນກໍຕາມ ລາວຮັບເອົາຄວາມເອື້ອເຟື້ອເຜື່ອແຜ່ແລະສິ່ງຂອງຕ່າງໆດ້ວຍຄວາມຂອບໃຈແລະຮູ້ຄຸນຄ່າເມື່ອຄົນອື່ນສະແດງຄວາມຮັກຕໍ່ລາວໃນທາງນີ້. (ກິດຈະການ 16:15, 34; ຟີລິບ 4:15-17) ໂປໂລບອກຄລິດສະຕຽນໃຫ້ສຳນຶກເຖິງພັນທະໜ້າທີ່ຕໍ່ຄອບຄົວຂອງເຂົາເຈົ້າເອງ ຄືບໍ່ໃຫ້ປະຖິ້ມພັນທະນັ້ນເພື່ອງານປະກາດ ແຕ່ໃຫ້ມີຄວາມດຸນດ່ຽງໃນໜ້າທີ່ຮັບຜິດຊອບຕ່າງໆຂອງເຂົາເຈົ້າ. ລາວແນະນຳໃຫ້ເຂົາເຈົ້າເຮັດວຽກ, ຮັກຄອບຄົວ, ແລະແບ່ງປັນໃຫ້ຄົນອື່ນ. (ເອເຟດ 4:28; 2 ເທຊະໂລນີກ 3:7-12) ລາວກະຕຸ້ນເຂົາເຈົ້າໃຫ້ມີຄວາມໝັ້ນໃຈໃນພະເຈົ້າ ບໍ່ແມ່ນໃນຊັບສົມບັດ ແລະໃຫ້ເຂົາເຈົ້າໃຊ້ຊີວິດໃນແນວທາງທີ່ສະແດງໃຫ້ເຫັນວ່າເຂົາເຈົ້າເຂົ້າໃຈແທ້ໆເຖິງສິ່ງທີ່ສຳຄັນກວ່ານັ້ນ. ດັ່ງທີ່ສອດຄ່ອງກັບຄຳສອນຂອງພະເຍຊູ ສິ່ງນັ້ນໝາຍເຖິງການຊອກຫາລາຊະອານາຈັກແລະຄວາມຊອບທຳຂອງພະເຈົ້າກ່ອນ.—ຟີລິບ 1:9-11.
ຈົ່ງຈັດໃຫ້ລາຊະອານາຈັກມາເປັນອັນດັບທຳອິດໃນຊີວິດຂອງເຮົາ
10. ການຊອກຫາລາຊະອານາຈັກກ່ອນໝາຍຄວາມວ່າຢ່າງໃດ?
10 ໂດຍສ່ວນຕົວແລ້ວ ເຮົາແບ່ງປັນຂ່າວສານເລື່ອງລາຊະອານາຈັກກັບຄົນອື່ນເຖິງຂະໜາດໃດ? ການຈະເຮັດໄດ້ຫຼາຍຫຼືໜ້ອຍນັ້ນແມ່ນຂຶ້ນກັບສະພາບການໃນຊີວິດຂອງເຮົາ ແລະຂຶ້ນກັບການຮູ້ຄຸນຄ່າຂອງເຮົາຕໍ່ເລື່ອງດັ່ງກ່າວ. ຂໍໃຫ້ຈື່ໄວ້ວ່າ ພະເຍຊູບໍ່ໄດ້ບອກວ່າ ‘ຈົ່ງຊອກຫາລາຊະອານາຈັກເມື່ອບໍ່ມີສິ່ງອື່ນເຮັດແລ້ວ.’ ໂດຍເຫັນແຈ້ງໃນຄວາມສຳຄັນຂອງລາຊະອານາຈັກ ພະອົງຈຶ່ງເນັ້ນກ່ຽວກັບພະປະສົງຂອງພະບິດາໂດຍກ່າວວ່າ “ຈົ່ງຊອກຫາລາຊະອານາຈັກຂອງພະເຈົ້າຕໍ່ໆໄປ.” (ລືກາ 12:31, ລ.ມ.) ເຖິງແມ່ນວ່າເຮົາສ່ວນຫຼາຍຕ້ອງເຮັດວຽກເພື່ອຫາລ້ຽງຕົວເອງແລະຄອບຄົວກໍຕາມ ແຕ່ຖ້າເຮົາມີຄວາມເຊື່ອ ຊີວິດຂອງເຮົາຈະຕິດພັນຢ່າງສະໜິດແໜ້ນກັບວຽກງານລາຊະອານາຈັກເຊິ່ງພະເຈົ້າໄດ້ມອບໃຫ້ເຮົາເຮັດ. ໃນເວລາດຽວກັນ ເຮົາກໍເອົາໃຈໃສ່ຕໍ່ໜ້າທີ່ຮັບຜິດຊອບໃນຄອບຄົວຂອງເຮົາໄປນຳ.—1 ຕີໂມເຕ 5:8.
11. (ກ) ພະເຍຊູປຽບທຽບໃຫ້ເຫັນຢ່າງໃດວ່າ ບໍ່ແມ່ນໝົດທຸກຄົນຈະສາມາດເຮັດໄດ້ເທົ່າກັນໃນການປະກາດຂ່າວສານເລື່ອງລາຊະອານາຈັກ? (ຂ) ການທີ່ຄົນເຮົາຈະເຮັດໄດ້ຫຼາຍຫຼືໜ້ອຍນັ້ນມັນຂຶ້ນຢູ່ກັບປັດໄຈອັນໃດແດ່?
11 ບາງຄົນໃນທ່າມກາງພວກເຮົາສາມາດທຸ່ມເທເວລາໄດ້ຫຼາຍກວ່າຄົນອື່ນໃນການປະກາດຂ່າວດີເລື່ອງລາຊະອານາຈັກ. ໃນຄຳອຸປະມາຂອງພະເຍຊູພະອົງກ່າວເຖິງດິນປະເພດຕ່າງໆພະອົງພັດສະແດງໃຫ້ເຫັນວ່າທຸກຄົນທີ່ສະພາບຫົວໃຈຂອງເຂົາເຈົ້າປຽບຄືດິນດີກໍຈະເກີດຜົນທີ່ດີ. ເຂົາເຈົ້າຈະເກີດຜົນຫຼາຍປານໃດ? ສະພາບການຂອງແຕ່ລະຄົນແຕກຕ່າງກັນ. ອາຍຸ, ສຸຂະພາບ, ແລະຄວາມຮັບຜິດຊອບຕ່າງໆຕໍ່ຄອບຄົວກໍລ້ວນແຕ່ເປັນປັດໄຈທີ່ມີຜົນກະທົບໄດ້ທັງໝົດ. ເຖິງຢ່າງໃດກໍຕາມ ຖ້າເຮົາຮູ້ຄຸນຄ່າຢ່າງແທ້ຈິງຕໍ່ຂ່າວດີເລື່ອງລາຊະອານາຈັກ ເຮົາກໍສາມາດເກີດຜົນໄດ້ຫຼາຍ.—ມັດທາຍ 13:23.
12. ມີການສະໜັບສະຫນູນໃຫ້ຄົນຫນຸ່ມພິຈາລະນາເປົ້າໝາຍຝ່າຍວິນຍານທີ່ດີງາມອັນໃດເປັນພິເສດ?
12 ເປັນສິ່ງດີທີ່ຈະຕັ້ງເປົ້າໝາຍຕ່າງໆເພື່ອຊ່ວຍເຮົາໃຫ້ຂະຫຍາຍສ່ວນຂອງຕົນເອງໃນວຽກງານການປະກາດເລື່ອງລາຊະອານາຈັກອອກໄປຕື່ມອີກ. ຄົນຫນຸ່ມຄວນຄິດຢ່າງຈິງຈັງກ່ຽວກັບຕົວຢ່າງທີ່ດີຂອງຕີໂມເຕ ຊາຍຫນຸ່ມຄລິດສະຕຽນທີ່ມີໃຈຫ້າວຫັນ. (ຟີລິບ 2:19-22) ມີສິ່ງໃດທີ່ຈະດີໄປກວ່າການເຂົ້າສູ່ວຽກຮັບໃຊ້ເຕັມເວລາເມື່ອເຂົາເຈົ້າຈົບການສຶກສາຝ່າຍໂລກແລ້ວ? ຜູ້ໃຫຍ່ກໍໄດ້ຮັບປະໂຫຍດເຊັ່ນກັນ ໂດຍການຕັ້ງເປົ້າໝາຍຝ່າຍວິນຍານທີ່ເໝາະສົມ.
13. (ກ) ໃຜເປັນຜູ້ຕັດສິນໃນສິ່ງທີ່ແຕ່ລະຄົນສາມາດເຮັດໃນການຮັບໃຊ້ເລື່ອງລາຊະອານາຈັກ? (ຂ) ເຮົາພິສູດສິ່ງໃດ ຖ້າເຮົາຊອກຫາລາຊະອານາຈັກກ່ອນຢ່າງແທ້ຈິງ?
13 ແທນທີ່ຈະວິພາກວິຈານຄົນເຫຼົ່ານັ້ນ ຜູ້ເຊິ່ງເຮົາອາດຮູ້ສຶກວ່າເຂົາເຈົ້າສາມາດເຮັດໄດ້ຫຼາຍກວ່າທີ່ກຳລັງເຮັດຢູ່ ຄວາມເຊື່ອຄວນກະຕຸ້ນເຮົາໃຫ້ປັບປຸງຕົວເອງເພື່ອເຮົາອາດຮັບໃຊ້ພະເຈົ້າໄດ້ເຕັມເມັດເຕັມໜ່ວຍຕາມທີ່ສະພາບການຂອງເຮົາເອງ ເອື້ອອຳນວຍໃຫ້. (ໂລມ 14:10-12; ຄາລາຊີ 6:4, 5) ດັ່ງທີ່ສະແດງໃຫ້ເຫັນໃນກໍລະນີຂອງໂຢບ ຊາຕານໂຕ້ຖຽງວ່າຄວາມສົນໃຈຫຼັກຂອງເຮົາແມ່ນຊັບສົມບັດຝ່າຍວັດຖຸ, ຄວາມສະດວກສະບາຍຂອງເຮົາເອງ, ຄວາມສຸກສ່ວນຕົວ, ແລະຄວາມມຸ່ງມາດປາຖະໜາຂອງເຮົາໃນການຮັບໃຊ້ພະເຈົ້າແມ່ນເປັນແບບເຫັນແກ່ຕົວ. ແຕ່ຖ້າເຮົາຊອກຫາລາຊະອານາຈັກກ່ອນຢ່າງແທ້ຈິງ ເຮົາກໍມີສ່ວນໃນການພິສູດວ່າພະຍາມານເປັນຜູ້ຕົວະທີ່ຮ້າຍກາດແທ້ໆ. ເຮົາກຳລັງສະແດງອອກໃຫ້ເຫັນອີກວ່າສິ່ງທີ່ສຳຄັນອັນດັບທຳອິດໃນຊີວິດຂອງເຮົາແມ່ນການຮັບໃຊ້ພະເຈົ້າ. ໂດຍສິ່ງທີ່ເຮົາເຮັດແລະເວົ້າຈະຢືນຢັນວ່າເຮົາມີຄວາມຮັກອັນເລິກເຊິ່ງຕໍ່ພະເຢໂຫວາ ທັງເປັນການພິສູດວ່າເຮົາສະໜັບສະຫນູນສິດທິສູງສຸດໃນການປົກຄອງຂອງພະອົງດ້ວຍຄວາມພັກດີ ແລະຍັງພິສູດເຖິງຄວາມຮັກຂອງເຮົາທີ່ມີຕໍ່ເພື່ອນມະນຸດນຳອີກ.—ໂຢບ 1:9-11; 2:4, 5; ສຸພາສິດ 27:11.
14. (ກ) ດ້ວຍເຫດໃດຕາລາງເວລາສຳລັບງານຮັບໃຊ້ໃນການປະກາດຈຶ່ງເປັນປະໂຫຍດ? (ຂ) ພະຍານພະເຢໂຫວາຫຼາຍຄົນກຳລັງມີສ່ວນຮ່ວມໃນງານຮັບໃຊ້ຫຼາຍຂະໜາດໃດ?
14 ການມີຕາລາງເວລາສາມາດຊ່ວຍເຮົາໃຫ້ເຮັດໄດ້ຫຼາຍກວ່າການບໍ່ມີເລີຍ. ພະເຢໂຫວາເອງມີ “ກຳນົດເວລາ” ເພື່ອໃຫ້ຈຸດປະສົງຂອງພະອົງດຳເນີນໄປຈົນສຳເລັດ. (ອຸປະຍົກໜີ 9:5; ມາລະໂກ 1:15) ຖ້າເປັນໄປໄດ້ ການເຂົ້າຮ່ວມໃນງານປະກາດຕາມເວລາທີ່ໄດ້ກຳນົດໄວ້ຈັກເທື່ອໜຶ່ງ ຫຼືຫຼາຍກວ່ານັ້ນໃນແຕ່ລະອາທິດກໍເປັນສິ່ງທີ່ດີ. ພະຍານພະເຢໂຫວາຫຼາຍແສນຄົນທົ່ວໂລກໄດ້ສະໝັກເປັນໄພໂອເນຍສົມທົບ ເຊິ່ງໃຊ້ເວລາປະມານສອງຊົ່ວໂມງຕໍ່ມື້ໃນການປະກາດຂ່າວດີ. ອີກຫຼາຍແສນຄົນຮັບໃຊ້ໃນຖານະໄພໂອເນຍປະຈຳໂດຍໃຊ້ເວລາປະມານສອງຊົ່ວໂມງເຄິ່ງຕໍ່ມື້ໃນການປະກາດຂ່າວສານເລື່ອງລາຊະອານາຈັກ. ໄພໂອເນຍພິເສດແລະມິດຊັນນາລີແຮ່ງໃຊ້ເວລາຫຼາຍກວ່ານັ້ນອີກໃນວຽກຮັບໃຊ້ທີ່ກ່ຽວຂ້ອງກັບເລື່ອງລາຊະອານາຈັກ. ເຮົາຍັງສາມາດຊອກຫາໂອກາດຕ່າງໆເພື່ອແບ່ງປັນຄວາມຫວັງເລື່ອງລາຊະອານາຈັກໂດຍສວຍໂອກາດເວົ້ານຳໃຜກໍໄດ້ທີ່ສົນໃຈຟັງ. (ໂຢຮັນ 4:7-15) ເຮົາຄວນປາຖະໜາທີ່ຈະມີສ່ວນຮ່ວມຢ່າງເຕັມກຳລັງໃນວຽກນັ້ນຕາມທີ່ສະພາບການຂອງເຮົາເອື້ອອຳນວຍໃຫ້ ເນື່ອງຈາກພະເຍຊູບອກລ່ວງໜ້າໄວ້ວ່າ “ຄຳປະເສີດນີ້ແຫ່ງແຜ່ນດິນ [“ລາຊະອານາຈັກ,” ລ.ມ.] ຂອງພະເຈົ້າຈະເປັນທີ່ເທສະໜາປ່າວປະກາດໄປທົ່ວແຜ່ນດິນໂລກ ເພື່ອຈະເປັນພິຍານແກ່ພວກຕ່າງປະເທດທັງປວງ ແລະເມື່ອນັ້ນທີ່ສຸດຈະມາເຖິງແລ້ວ.”—ມັດທາຍ 24:14; ເອເຟດ 5:15-17.
15. ໂດຍກ່ຽວຂ້ອງກັບງານຮັບໃຊ້ຂອງເຮົາ ເປັນຫຍັງເຮົາຈຶ່ງຮູ້ສຶກວ່າຄຳແນະນຳໃນ 1 ໂກລິນໂທ 15:58 ແມ່ນເໝາະກັບເວລາ?
15 ໃນທຸກຫົນທຸກແຫ່ງທົ່ວໂລກ ພະຍານພະເຢໂຫວາບໍ່ວ່າຈະອາໄສຢູ່ໃນປະເທດໃດກໍຕາມ ເຂົາເຈົ້າກຳລັງມີສ່ວນຮ່ວມໃນສິດທິພິເສດຂອງວຽກງານການຮັບໃຊ້ນີ້ຢ່າງເປັນນ້ຳໜຶ່ງໃຈດຽວກັນ. ເຂົາເຈົ້າເອົາຄຳແນະນຳຈາກຄຳພີໄບເບິນທີ່ໄດ້ຮັບການດົນໃຈມາໃຊ້ກັບຕົວເອງທີ່ວ່າ “ທ່ານທັງຫຼາຍຈົ່ງຕັ້ງໝັ້ນຄົງຢູ່ ຢ່າສະເທືອນສະທ້ານ ຈົ່ງກະທຳການຂອງພະອົງເຈົ້າໃຫ້ບໍລິບູນທຸກເວລາ ທ່ານທັງຫຼາຍຮູ້ວ່າການຂອງທ່ານຝ່າຍພະອົງເຈົ້າບໍ່ເປັນການເປົ່າໆ.”—1 ໂກລິນໂທ 15:58.
ການພິຈາລະນາທົບທວນ
• ເມື່ອພະເຍຊູກ່າວວ່າ ‘ຈົ່ງຊອກຫາລາຊະອານາຈັກກ່ອນ’ ຕໍ່ໆໄປ ພະອົງຊີ້ໃຫ້ເຫັນວ່າສິ່ງໃດຄວນຢູ່ໃນອັນດັບຮອງ?
• ເຮົາຄວນມີທັດສະນະຕໍ່ການເອົາໃຈໃສ່ໃນຄວາມຈຳເປັນທາງດ້ານຮ່າງກາຍຂອງຕົນເອງແລະຂອງຄອບຄົວແນວໃດ? ພະເຈົ້າຈະໃຫ້ຄວາມຊ່ວຍເຫຼືອອັນໃດແກ່ເຮົາ?
• ເຮົາສາມາດມີສ່ວນຮ່ວມໃນວຽກງານຮັບໃຊ້ກ່ຽວກັບລາຊະອານາຈັກໃນແບບໃດແດ່?
[ຮູບພາບໜ້າ 107]
ປັດຈຸບັນນີ້ ພະຍານພະເຢໂຫວາກຳລັງປະກາດຂ່າວດີໃນທຸກດິນແດນກ່ອນທີ່ອະວະສານຈະມາເຖິງ