ບົດທີ 24
ບໍ່ມີຫຍັງຈະ “ຂັດຂວາງຄວາມຮັກທີ່ພະເຈົ້າສະແດງຕໍ່ພວກເຮົາ” ໄດ້
1. ຄວາມຮູ້ສຶກໃນແງ່ລົບສົ່ງຜົນຕໍ່ຫຼາຍຄົນແລະຕໍ່ຜູ້ຮັບໃຊ້ບາງຄົນຂອງພະເຢໂຫວາແນວໃດ?
ພະເຢໂຫວາພະເຈົ້າຮັກເຈົ້າເປັນສ່ວນໂຕບໍ? ບາງຄົນເຊື່ອວ່າພະເຈົ້າຮັກມະນຸດທຸກຄົນຄືກັບທີ່ບອກໃນໂຢຮັນ 3:16. ແຕ່ເຂົາເຈົ້າອາດຮູ້ສຶກວ່າ ‘ພະເຈົ້າຄືຊິບໍ່ຮັກຂ້ອຍເປັນສ່ວນໂຕດອກ.’ ບາງເທື່ອຜູ້ຮັບໃຊ້ຂອງພະເຢໂຫວາກໍຮູ້ສຶກແບບນັ້ນ. ຜູ້ຊາຍຄົນໜຶ່ງທີ່ທໍ້ໃຈເວົ້າວ່າ: “ຂ້ອຍຮູ້ສຶກວ່າເປັນເລື່ອງຍາກຫຼາຍທີ່ຈະເຊື່ອວ່າພະເຈົ້າສົນໃຈຂ້ອຍ.” ເຈົ້າເຄີຍຮູ້ສຶກແບບນັ້ນບໍ?
2, 3. ໃຜຢາກໃຫ້ເຮົາເຊື່ອວ່າເຮົາບໍ່ມີຄ່າຫຼືບໍ່ສົມຄວນໄດ້ຮັບຄວາມຮັກຈາກພະເຢໂຫວາ ແລະເຮົາຈະໝັ້ນໃຈໄດ້ແນວໃດວ່າເລື່ອງນັ້ນບໍ່ແມ່ນຄວາມຈິງ?
2 ຊາຕານຢາກໃຫ້ເຮົາເຊື່ອແທ້ໆວ່າພະເຢໂຫວາພະເຈົ້າບໍ່ຮັກເຮົາແລະເຫັນວ່າເຮົາບໍ່ມີຄ່າ. ຢ່າລືມວ່າຊາຕານພະຍາຍາມເຮັດໃຫ້ຜູ້ຄົນມີຄວາມຄິດທີ່ຜິດໆ. (2 ໂກຣິນໂທ 11:3) ຫຼາຍເທື່ອມັນເຮັດແນວນັ້ນໂດຍເຮັດໃຫ້ເຂົາເຈົ້າຄິດວ່າໂຕເອງດີກວ່າຄົນອື່ນ ແຕ່ມັນກໍມັກເຮັດໃຫ້ຜູ້ຄົນຄິດວ່າໂຕເອງບໍ່ມີຄ່າ. (ໂຢຮັນ 7:47-49; 8:13, 44) ຊາຕານແຮ່ງເຮັດແບບນີ້ຫຼາຍຂຶ້ນໃນ “ສະໄໝສຸດທ້າຍ” ທີ່ເປັນໄລຍະທີ່ມີແຕ່ຄວາມຫຍຸ້ງຍາກລຳບາກ. ຫຼາຍຄົນໃນທຸກມື້ນີ້ໃຫຍ່ມາໃນຄອບຄົວທີ່ “ບໍ່ຮັກຍາດຕິພີ່ນ້ອງ” ຫຼືບໍ່ມີຄວາມຮັກຕາມທຳມະຊາດ. ບາງຄົນຕ້ອງເຈິກັບຄົນທີ່ໂຫດຮ້າຍ ຄົນເຫັນແກ່ໂຕ ແລະຄົນຫົວແຂງຢູ່ເລື້ອຍໆ. (2 ຕີໂມທຽວ 3:1-5) ຄົນທີ່ຖືກເຮັດໃສ່ແບບບໍ່ດີແບບນັ້ນເປັນເວລາຫຼາຍປີອາດຄິດວ່າໂຕເອງບໍ່ມີຄ່າແລະບໍ່ມີໃຜຮັກລາວແທ້ໆ.
3 ຖ້າເຈົ້າຮູ້ສຶກແບບນັ້ນກໍຢ່າຟ້າວໝົດຫວັງ. ບາງເທື່ອພວກເຮົາຫຼາຍຄົນຮູ້ສຶກແບບນັ້ນກັບໂຕເອງ. ແຕ່ຢ່າລືມວ່າຄຳພີໄບເບິນຂຽນໄວ້ເພື່ອ “ແກ້ໄຂເລື່ອງຕ່າງໆໃຫ້ຮຽບຮ້ອຍ” ແລະເພື່ອ “ທຳລາຍສິ່ງທີ່ຝັງຮາກເລິກໄດ້.” (2 ຕີໂມທຽວ 3:16; 2 ໂກຣິນໂທ 10:4) ຄຳພີໄບເບິນຍັງບອກອີກວ່າ: “ພວກເຮົາໝັ້ນໃຈໄດ້ວ່າພະເຈົ້າຮັກພວກເຮົາ. ເຖິງວ່າໃຈພວກເຮົາຈະຕຳໜິໂຕເອງຫຼາຍສ່ຳໃດ ພະເຈົ້າກໍໃຫຍ່ກວ່າໃຈຂອງພວກເຮົາແລະເພິ່ນຮູ້ທຸກສິ່ງ.” (1 ໂຢຮັນ 3:19, 20) ໃຫ້ເຮົາມາເບິ່ງ 4 ວິທີທີ່ຄຳພີໄບເບິນຊ່ວຍເຮົາໃຫ້ “ໝັ້ນໃຈ” ໄດ້ວ່າພະເຢໂຫວາຮັກເຮົາ.
ພະເຢໂຫວາຖືວ່າເຮົາມີຄ່າ
4, 5. ຕົວຢ່າງປຽບທຽບຂອງພະເຢຊູເລື່ອງນົກກະຈອກຊ່ວຍໃຫ້ເຫັນແນວໃດວ່າເຮົາມີຄ່າສຳລັບພະເຢໂຫວາ?
4 ສິ່ງທຳອິດ ຄຳພີໄບເບິນສອນວ່າພະເຈົ້າເຫັນຄ່າຜູ້ຮັບໃຊ້ຂອງເພິ່ນທຸກຄົນ. ຕົວຢ່າງເຊັ່ນ ພະເຢຊູບອກວ່າ: “ນົກກະຈອກ 2 ໂຕເຂົາເຈົ້າຂາຍບໍ່ຈັກກີບ ແຕ່ບໍ່ມີຈັກໂຕຈະຕົກລົງດິນໂດຍທີ່ພະເຈົ້າພໍ່ຂອງພວກເຈົ້າບໍ່ຮູ້ຈັກ. ຂະໜາດຜົມຂອງພວກເຈົ້າເພິ່ນກໍນັບໄວ້ແລ້ວທຸກເສັ້ນ. ດັ່ງນັ້ນ ບໍ່ຕ້ອງຢ້ານ ຍ້ອນພວກເຈົ້າມີຄ່າຫຼາຍກວ່ານົກກະຈອກຫຼາຍໂຕລວມກັນ.” (ມັດທາຍ 10:29-31) ເຈົ້າຄິດວ່າຄົນທີ່ຟັງພະເຢຊູເວົ້າຈະຮູ້ສຶກແນວໃດ?
“ພວກເຈົ້າມີຄ່າຫຼາຍກວ່ານົກກະຈອກຫຼາຍໂຕລວມກັນ”
5 ເຮົາອາດສົງໄສວ່າຈະມີຄົນຊື້ນົກກະຈອກໄປເຮັດຫຍັງ. ໃນສະໄໝຂອງພະເຢຊູ ນົກກະຈອກເປັນນົກທີ່ຂາຍເພື່ອເປັນອາຫານແລະມີລາຄາຖືກທີ່ສຸດ. ສັງເກດວ່າເງິນ 1 ອັດຊາຣິອົນທີ່ມີຄ່າບໍ່ຈັກກີບກໍຊື້ນົກກະຈອກໄດ້ຮອດ 2 ໂຕ. ພະເຢຊູບອກວ່າຖ້າມີຄົນຈະຈ່າຍ 2 ອັດຊາຣິອົນ ລາວຈະໄດ້ນົກບໍ່ແມ່ນ 4 ໂຕ ແຕ່ໄດ້ 5 ໂຕ. ເບິ່ງຄືວ່ານົກໂຕທີ່ແຖມໃຫ້ນັ້ນບໍ່ມີຄ່າຫຍັງເລີຍ. ແຕ່ພະເຢໂຫວາເບິ່ງພວກມັນແນວໃດ? ພະເຢຊູບອກວ່າ: “ນົກກະຈອກ . . . ເຂົາເຈົ້າຂາຍບໍ່ຈັກກີບ ແຕ່ບໍ່ມີຈັກໂຕທີ່ພະເຈົ້າຈະລືມ.” (ລູກາ 12:6, 7) ຕອນນີ້ ເຮົາເຂົ້າໃຈແລ້ວວ່າພະເຢຊູຢາກຈະສອນບົດຮຽນຫຍັງໃຫ້ເຮົາ. ຖ້າພະເຢໂຫວາເບິ່ງວ່ານົກກະຈອກໂຕດຽວມີຄ່າ ເຮົາກໍໝັ້ນໃຈໄດ້ວ່າເຮົາມີຄ່າຫຼາຍກວ່ານັ້ນອີກ! ຄືກັບທີ່ພະເຢຊູບອກ ພະເຢໂຫວາຮູ້ທຸກຢ່າງກ່ຽວກັບໂຕເຮົາ ແລະເພິ່ນຮູ້ນຳວ່າເຮົາມີຜົມຈັກເສັ້ນ!
6. ເປັນຫຍັງເຮົາຈຶ່ງໝັ້ນໃຈໄດ້ວ່າພະເຢຊູບໍ່ໄດ້ເວົ້າເກີນຄວາມຈິງເມື່ອບອກວ່າພະເຢໂຫວາຮູ້ວ່າເຮົາມີຜົມຈັກເສັ້ນ?
6 ບາງຄົນອາດຄິດວ່າພະເຢຊູເວົ້າເກີນຄວາມຈິງເມື່ອບອກວ່າພະເຢໂຫວາຮູ້ວ່າເຮົາມີຜົມຈັກເສັ້ນ? ແຕ່ລອງຄິດເຖິງຄຳສັນຍາຂອງພະເຢໂຫວາທີ່ຈະປຸກຄົນຕາຍໃຫ້ຟື້ນຄືນມາ ເພື່ອຈະເຮັດແບບນັ້ນໄດ້ເພິ່ນຕ້ອງຮູ້ທຸກຢ່າງກ່ຽວກັບໂຕເຮົາ. ເພິ່ນຖືວ່າເຮົາມີຄ່າຫຼາຍ ແລະເພິ່ນຈື່ແມ່ນແຕ່ລາຍລະອຽດເລັກໆນ້ອຍໆກ່ຽວກັບເຮົາ ຕົວຢ່າງເຊັ່ນ: ດີເອັນເອຫຼືລະຫັດໜ່ວຍພັນທຸກຳ ຄວາມຊົງຈຳ ແລະປະສົບການທັງໝົດໃນຊີວິດເຮົາ.a ເມື່ອທຽບກັບເລື່ອງນີ້ແລ້ວກໍງ່າຍຫຼາຍທີ່ພະເຢໂຫວາຈະຮູ້ວ່າເຮົາມີຜົມຈັກເສັ້ນ.
ເປັນຫຍັງພະເຢໂຫວາຖືວ່າເຮົາມີຄ່າ?
7, 8. (ກ) ເມື່ອກວດເບິ່ງຫົວໃຈຄົນ ພະເຢໂຫວາເຫັນຄຸນລັກສະນະຫຍັງແດ່ທີ່ເຮັດໃຫ້ເພິ່ນມີຄວາມສຸກ? (ຂ) ມີຫຍັງແດ່ທີ່ເຮົາເຮັດແລ້ວພະເຢໂຫວາຖືວ່າມີຄ່າ?
7 ສິ່ງທີ 2 ຄຳພີໄບເບິນບອກໃຫ້ຮູ້ວ່າເປັນຫຍັງພະເຢໂຫວາຖືວ່າຜູ້ຮັບໃຊ້ຂອງເພິ່ນມີຄ່າ. ເພິ່ນມີຄວາມສຸກທີ່ເຫັນຄຸນລັກສະນະທີ່ດີແລະເຫັນຄວາມພະຍາຍາມຂອງເຮົາເພື່ອເຮັດໃຫ້ເພິ່ນພໍໃຈ. ກະສັດດາວິດບອກໂຊໂລໂມນລູກຊາຍຂອງລາວວ່າ: “ພະເຢໂຫວາກວດເບິ່ງຫົວໃຈຂອງທຸກຄົນແລະຮູ້ຄວາມຄິດທຸກຢ່າງ.” (1 ຂ່າວຄາວ 28:9) ເມື່ອພະເຢໂຫວາກວດເບິ່ງຫົວໃຈຂອງຫຼາຍພັນລ້ານຄົນໃນໂລກທີ່ມີແຕ່ຄວາມຮຸນແຮງແລະຄວາມກຽດຊັງ ເພິ່ນຄືຊິມີຄວາມສຸກຫຼາຍທີ່ເຫັນຫຼາຍຄົນມີຫົວໃຈທີ່ດີ ຮັກສັນຕິສຸກ ຮັກຄວາມຈິງ ແລະຢາກເຮັດສິ່ງທີ່ຖືກຕ້ອງ. ແລ້ວເພິ່ນເຮັດຫຍັງເມື່ອເຫັນບາງຄົນຮັກເພິ່ນ ຢາກມາຮູ້ຈັກ ແລະຢາກບອກເລື່ອງຂອງເພິ່ນໃຫ້ຄົນອື່ນຮູ້? ຄຳພີໄບເບິນບອກວ່າພະເຢໂຫວາສົນໃຈຄົນແບບນີ້ເປັນພິເສດ. ເພິ່ນເຖິງຂັ້ນວ່າ: “ໃຫ້ຂຽນຊື່ຂອງຄົນທີ່ເພິ່ນຈື່ໃສ່ປຶ້ມໄວ້” ເຊິ່ງແມ່ນ “ຄົນທີ່ຢ້ານຢຳເພິ່ນແລະຄິດເຖິງຊື່ຂອງເພິ່ນ.” (ມາລາກີ 3:16) ຄຸນລັກສະນະເຫຼົ່ານີ້ມີຄ່າຫຼາຍສຳລັບເພິ່ນ.
8 ມີສິ່ງດີຫຍັງແດ່ທີ່ເຮົາເຮັດແລ້ວພະເຢໂຫວາຖືວ່າມີຄ່າ? ເຮົາໝັ້ນໃຈໄດ້ວ່າເພິ່ນເຫັນຄ່າທຸກຢ່າງທີ່ເຮົາເຮັດເພື່ອຮຽນແບບພະເຢຊູຄລິດລູກຊາຍຂອງເພິ່ນ. (1 ເປໂຕ 2:21) ວຽກສຳຄັນຢ່າງໜຶ່ງທີ່ພະເຈົ້າຖືວ່າມີຄ່າຫຼາຍແມ່ນການປະກາດຂ່າວດີເລື່ອງການປົກຄອງຂອງເພິ່ນ. ຢູ່ໂຣມ 10:15 ເຮົາອ່ານວ່າ: “ຕີນຂອງຜູ້ທີ່ປະກາດຂ່າວດີກໍງາມຫຼາຍ.” ຕາມປົກກະຕິແລ້ວເຮົາອາດບໍ່ໄດ້ຄິດວ່າຕີນຂອງເຮົາງາມ. ແຕ່ໃນຂໍ້ນີ້ ຕີນສະແດງໃຫ້ເຫັນຄວາມພະຍາຍາມຂອງຜູ້ຮັບໃຊ້ພະເຢໂຫວາໃນການປະກາດຂ່າວດີເຊິ່ງມີຄ່າຫຼາຍສຳລັບເພິ່ນ.—ມັດທາຍ 24:14; 28:19, 20
9, 10. (ກ) ເປັນຫຍັງເຮົາຈຶ່ງໝັ້ນໃຈໄດ້ວ່າພະເຢໂຫວາເຫັນຄ່າທີ່ເຮົາອົດທົນເຖິງວ່າຕ້ອງເຈິບັນຫາຕ່າງໆ? (ຂ) ພະເຢໂຫວາບໍ່ເຄີຍເຮັດຫຍັງເມື່ອກວດເບິ່ງຫົວໃຈຜູ້ຮັບໃຊ້ທີ່ສັດຊື່ຂອງເພິ່ນ?
9 ພະເຢໂຫວາຍັງຖືວ່າຄວາມອົດທົນຂອງເຮົາມີຄ່ານຳ. (ມັດທາຍ 24:13) ຢ່າລືມວ່າຊາຕານຢາກໃຫ້ເຮົາເຊົາຮັບໃຊ້ເພິ່ນ. ແຕ່ລະມື້ທີ່ເຮົາສັດຊື່ຕໍ່ພະເຢໂຫວາ ເຮົາກໍເຮັດໃຫ້ເຫັນວ່າຊາຕານເວົ້າຕົວະ. (ສຸພາສິດ 27:11) ບາງເທື່ອການອົດທົນຂອງເຮົາກໍບໍ່ແມ່ນເລື່ອງງ່າຍ. ບັນຫາສຸຂະພາບ ບັນຫາເສດຖະກິດ ຄວາມເຄັ່ງຕຶງ ແລະບັນຫາອື່ນໆອາດເຮັດໃຫ້ການໃຊ້ຊີວິດຂອງເຮົາໃນແຕ່ລະມື້ລຳບາກຫຼາຍຂຶ້ນ. ນອກຈາກນັ້ນ ເຮົາອາດຮູ້ສຶກທໍ້ໃຈເມື່ອສິ່ງທີ່ເຮົາຄາດຫວັງບໍ່ໄດ້ເກີດຂຶ້ນແທ້. (ສຸພາສິດ 13:12) ພະເຢໂຫວາຖືວ່າການທີ່ເຮົາອົດທົນກັບບັນຫາເຫຼົ່ານັ້ນມີຄ່າຫຼາຍສຳລັບເພິ່ນ. ກະສັດດາວິດເຂົ້າໃຈເລື່ອງນີ້ ລາວຂໍພະເຢໂຫວາໃຫ້ເກັບນ້ຳຕາຂອງລາວໄວ້ໃນ “ຖົງໜັງ” ຂອງເພິ່ນ ແລະເວົ້າຕື່ມດ້ວຍຄວາມໝັ້ນໃຈວ່າ: “ພະອົງນັບນ້ຳຕາທຸກຢົດຂອງລູກແລະຈົດໄວ້ໃນປຶ້ມຂອງພະອົງ.” (ເພງສັນລະເສີນ 56:8) ດັ່ງນັ້ນ ເມື່ອເຮົາຮັກສາຄວາມສັດຊື່ພັກດີຕໍ່ພະເຢໂຫວາ ເພິ່ນກໍເຫັນຄ່າທີ່ເຮົາອົດທົນແລະບໍ່ລືມນ້ຳຕາທຸກຢົດຂອງເຮົາ. ສິ່ງເຫຼົ່ານີ້ມີຄ່າຫຼາຍແທ້ໆສຳລັບພະເຢໂຫວາ.
ພະເຢໂຫວາເຫັນຄຸນຄ່າທີ່ເຮົາອົດທົນຕອນທີ່ເຈິກັບບັນຫາຕ່າງໆ
10 ເຖິງວ່າຈະມີຫຼັກຖານຫຼາຍແທ້ໆວ່າພະເຢໂຫວາເຫັນຄ່າເຮົາ. ແຕ່ເຈົ້າກໍອາດຍັງຮູ້ສຶກວ່າໂຕເອງບໍ່ມີຄ່າແລະອາດເວົ້າວ່າ: ‘ຍັງມີອີກຫຼາຍຄົນທີ່ດີກວ່າຂ້ອຍ. ຖ້າພະເຢໂຫວາປຽບທຽບຂ້ອຍກັບຄົນອື່ນ ເພິ່ນກໍຕ້ອງຜິດຫວັງແທ້ໆ.’ ແຕ່ພະເຢໂຫວາບໍ່ເຮັດແນວນັ້ນ ເພິ່ນບໍ່ເຄີຍຄາດໝາຍໃຫ້ເຮົາເຮັດສິ່ງທີ່ເຮົາເຮັດບໍ່ໄດ້. (ຄາລາເຕຍ 6:4) ເມື່ອເພິ່ນກວດເບິ່ງຫົວໃຈເຮົາ ເພິ່ນກໍເຫັນຄ່າສິ່ງດີທຸກຢ່າງໃນໂຕເຮົາເຖິງວ່າສິ່ງທີ່ເຮົາເຮັດໄດ້ຈະເປັນສິ່ງເລັກໆນ້ອຍໆກໍຕາມ.
ພະເຢໂຫວາຊອກຫາສິ່ງດີໃນໂຕເຮົາ
11. ເຮົາໄດ້ຮຽນຫຍັງຈາກວິທີທີ່ພະເຢໂຫວາເຮັດກັບອາບີຢາ?
11 ສິ່ງທີ 3 ພະເຢໂຫວາຊອກຫາຄຸນລັກສະນະທີ່ດີໃນໂຕເຮົາ. ຕົວຢ່າງເຊັ່ນ ພະເຢໂຫວາບອກວ່າຈະກຳຈັດຜູ້ຊາຍທຸກຄົນໃນຕະກູນຂອງກະສັດເຢໂຣໂບອາມທີ່ຊົ່ວຫຼາຍ ແຕ່ເພິ່ນພັດສັ່ງໃຫ້ຝັງສົບອາບີຢາເຊິ່ງເປັນລູກຊາຍຄົນໜຶ່ງຂອງລາວ. ເປັນຫຍັງເພິ່ນຈຶ່ງບອກແບບນັ້ນ? ກໍຍ້ອນ “ພະເຢໂຫວາພະເຈົ້າຂອງອິດສະຣາເອນເຫັນວ່າມີແຕ່ລາວຜູ້ດຽວທີ່ຍັງມີບາງສິ່ງທີ່ດີຢູ່.” (1 ກະສັດ 14:1, 10-13) ທີ່ຈິງ ພະເຢໂຫວາກວດເບິ່ງຫົວໃຈຂອງອາບີຢາຢ່າງລະອຽດ ແລ້ວເຫັນວ່າລາວມີ “ສິ່ງທີ່ດີ.” ເຖິງວ່າຄວາມດີທີ່ລາວມີເລັກນ້ອຍ ແຕ່ພະເຢໂຫວາກໍຍັງໃຫ້ຂຽນເລື່ອງນີ້ໄວ້ໃນຄຳພີໄບເບິນ. ເພິ່ນເຖິງຂັ້ນສະແດງຄວາມເມດຕາກັບລາວໂດຍໃຫ້ມີການຝັງສົບຂອງລາວຢ່າງມີກຽດ.
12, 13. (ກ) ເຖິງວ່າເຮົາຈະເຮັດຜິດພາດ ແຕ່ເລື່ອງຂອງກະສັດເຢໂຮຊາຟັດສະແດງໃຫ້ເຫັນແນວໃດວ່າພະເຢໂຫວາຊອກຫາສິ່ງດີໃນໂຕເຮົາ? (ຂ) ພະເຢໂຫວາເບິ່ງຄຸນລັກສະນະຕ່າງໆທີ່ດີແລະສິ່ງທີ່ເຮົາເຮັດເພື່ອເພິ່ນແນວໃດ ແລະເພິ່ນຈະບໍ່ມີມື້ເຮັດຫຍັງ?
12 ອີກຕົວຢ່າງໜຶ່ງແມ່ນກະສັດເຢໂຮຊາຟັດ. ຕອນທີ່ລາວເຮັດຜິດພາດ ຜູ້ພະຍາກອນຂອງພະເຢໂຫວາໄດ້ບອກລາວວ່າ: “ຍ້ອນແນວນີ້ແຫຼະ ພະເຢໂຫວາຈຶ່ງໃຈຮ້າຍໃຫ້ທ່ານຫຼາຍ.” ນີ້ເປັນຄຳເຕືອນທີ່ເປັນຕາຕົກໃຈຫຼາຍ. ແຕ່ຜູ້ພະຍາກອນກໍບອກລາວນຳວ່າ: “ພະເຈົ້າເຫັນວ່າທ່ານຍັງມີສິ່ງທີ່ດີຢູ່.” (2 ຂ່າວຄາວ 19:1-3) ເຖິງວ່າພະເຢໂຫວາຈະໃຈຮ້າຍໃຫ້ເຢໂຮຊາຟັດ ແຕ່ເພິ່ນກໍຍັງເຫັນຄຸນລັກສະນະທີ່ດີໃນໂຕລາວ. ພະເຢໂຫວາຕ່າງຈາກມະນຸດທີ່ບໍ່ສົມບູນແບບຫຼາຍແທ້ໆ! ເມື່ອເຮົາໃຈຮ້າຍໃຫ້ໃຜ ເຮົາມັກຈະເບິ່ງແຕ່ແນວບໍ່ດີໃນໂຕລາວ. ແຕ່ເມື່ອເຮົາເຮັດຜິດ ເຮົາອາດຮູ້ສຶກທໍ້ໃຈ ອາຍ ແລະຮູ້ສຶກຜິດຈົນເບິ່ງບໍ່ເຫັນຂໍ້ດີຂອງໂຕເອງ. ແຕ່ຢ່າລືມວ່າຖ້າເຮົາກັບໃຈແລະພະຍາຍາມຢ່າງເຕັມທີທີ່ຈະບໍ່ເຮັດຜິດຊ້ຳອີກ ພະເຢໂຫວາກໍຈະໃຫ້ອະໄພເຮົາ.
13 ຄືກັບຄົນທີ່ຊອກຫາຄຳຈະຮ່ອນເອົາເສດຫີນທີ່ບໍ່ມີຄ່າຖິ້ມແລະເກັບເອົາແຕ່ຄຳທີ່ມີຄ່າເທົ່ານັ້ນ. ພະເຢໂຫວາກໍເລືອກເບິ່ງຂ້າມຈຸດອ່ອນແລະຊອກຫາສິ່ງດີໃນໂຕເຮົາ. ພະເຢໂຫວາຖືວ່າຄຸນລັກສະນະທີ່ດີແລະສິ່ງດີທີ່ເຮົາເຮັດເປັນຄື “ກ້ອນຄຳ.” ຄືກັບທີ່ພໍ່ແມ່ບາງຄົນໄດ້ເກັບຮູບແຕ້ມຫຼືຂອງຂວັນເລັກໆນ້ອຍໆທີ່ລູກໃຫ້ໄວ້ດົນໆຫຼາຍປີ ພະເຢໂຫວາກໍເປັນທັງພໍ່ແລະແມ່ທີ່ຮັກພວກລູກຂອງເພິ່ນຫຼາຍທີ່ສຸດ. ຖ້າເຮົາສັດຊື່ກັບເພິ່ນສະເໝີ ເພິ່ນຈະບໍ່ມີມື້ລືມສິ່ງທີ່ເຮົາເຮັດເພື່ອເພິ່ນແລະຄຸນລັກສະນະທີ່ດີຂອງເຮົາ. ທີ່ຈິງ ພະເຢໂຫວາຖືວ່າການລືມສິ່ງເຫຼົ່ານັ້ນສ່ຳກັບເຮັດຊົ່ວ. (ເຮັບເຣີ 6:10) ນອກຈາກນັ້ນ ຍັງມີອີກວິທີໜຶ່ງທີ່ພະເຢໂຫວາຊອກຫາຂໍ້ດີໃນໂຕເຮົານຳ.
14, 15. (ກ) ເປັນຫຍັງພະເຢໂຫວາເບິ່ງວ່າເຮົາມີຄ່າທັງໆທີ່ເຮົາເປັນຄົນບໍ່ສົມບູນແບບ? ຂໍໃຫ້ຍົກຕົວຢ່າງ. (ຂ) ພະເຢໂຫວາຈະເຮັດຫຍັງກັບຄຸນລັກສະນະທີ່ດີທີ່ເພິ່ນເຫັນໃນໂຕເຮົາ ແລະເພິ່ນຮູ້ສຶກແນວໃດຕໍ່ຜູ້ຮັບໃຊ້ທີ່ສັດຊື່ຂອງເພິ່ນ?
14 ເມື່ອພະເຢໂຫວາເບິ່ງເຮົາ ເພິ່ນບໍ່ໄດ້ສົນໃຈຂໍ້ຜິດພາດຂອງເຮົາ ແຕ່ເພິ່ນເບິ່ງວ່າເຮົາເປັນຄົນທີ່ດີຂຶ້ນໄດ້. ຕົວຢ່າງເຊັ່ນ ຖ້າມີຮູບແຕ້ມແຜ່ນໜຶ່ງເສຍຫາຍຫຼາຍ ຄົນທີ່ຮັກງານສິລະປະກຳຈະພະຍາຍາມເຕັມທີເພື່ອສ້ອມແຊມຮູບແຕ້ມນັ້ນ. ຕົວຢ່າງເຊັ່ນ ໃນຫ້ອງວາງສະແດງຮູບພາບຢູ່ເມືອງລອນດອນປະເທດອັງກິດ ມີຄົນໜຶ່ງເອົາປືນຍິງຮູບແຕ້ມຂອງລີໂອນາໂດດາວິນຊີ ເຊິ່ງມີມູນຄ່າປະມານ 30 ລ້ານໂດລາສະຫະລັດອາເມຣິກາ. ຕອນທີ່ເລື່ອງນີ້ເກີດຂຶ້ນ ບໍ່ມີໃຜບອກໃຫ້ຖິ້ມຮູບແຕ້ມນັ້ນ ແຕ່ເຂົາເຈົ້າໄດ້ສ້ອມແຊມຮູບແຕ້ມທີ່ມີອາຍຸເກືອບ 500 ປີນັ້ນທັນທີ. ຍ້ອນຫຍັງ? ຍ້ອນຮູບນັ້ນເປັນສິ່ງທີ່ມີຄ່າສຳລັບຄົນທີ່ຮັກງານສິລະປະກຳ. ເຖິງວ່າເຮົາເປັນຄົນທີ່ບໍ່ສົມບູນແບບແລະບາງເທື່ອອາດຮູ້ສຶກວ່າໂຕເອງບໍ່ມີຄ່າ ແຕ່ສຳລັບພະເຈົ້າເຮົາມີຄ່າຫຼາຍກວ່າຮູບແຕ້ມນັ້ນ. (ເພງສັນລະເສີນ 72:12-14) ພະເຢໂຫວາພະເຈົ້າຜູ້ສ້າງໂຕເຮົາຈະເຮັດທຸກຢ່າງເພື່ອແກ້ໄຂຜົນເສຍຫາຍທີ່ເກີດຈາກບາບແລະຊ່ວຍທຸກຄົນທີ່ຮັກແລະເຊື່ອຟັງເພິ່ນໃຫ້ເປັນຄົນສົມບູນແບບໄດ້.—ກິດຈະການ 3:21; ໂຣມ 8:20-22
15 ພະເຢໂຫວາເຫັນສິ່ງດີໃນໂຕເຮົາທີ່ເຮົາອາດເບິ່ງບໍ່ເຫັນ ແລະຖ້າເຮົາຮັບໃຊ້ເພິ່ນຢ່າງສັດຊື່ຕໍ່ໆໄປ. ເພິ່ນກໍຈະຊ່ວຍເຮົາໃຫ້ເປັນຄົນທີ່ດີຂຶ້ນ ແລະໃນທີ່ສຸດເຮົາກໍຈະເປັນຄົນສົມບູນແບບ. ເຖິງວ່າໂລກຂອງຊາຕານຈະເຮັດຄືວ່າເຮົາບໍ່ມີຄ່າ ແຕ່ພະເຢໂຫວາຖືວ່າຜູ້ຮັບໃຊ້ທີ່ສັດຊື່ຂອງເພິ່ນມີຄ່າຫຼາຍ.—ຮັກກາຍ 2:7
ພະເຢໂຫວາເຮັດຫຼາຍຢ່າງທີ່ສະແດງວ່າເພິ່ນຮັກເຮົາ
16. ແມ່ນຫຍັງເປັນຫຼັກຖານທີ່ເຫັນແຈ້ງເລີຍວ່າພະເຢໂຫວາຮັກເຮົາ ແລະເຮົາຮູ້ໄດ້ແນວໃດວ່າພະເຢຊູສະລະຊີວິດເພື່ອເຮົາເປັນສ່ວນໂຕ?
16 ຍ ສິ່ງທີ 4 ພະເຢໂຫວາເຮັດຫຼາຍຢ່າງທີ່ສະແດງວ່າເພິ່ນຮັກເຮົາ. ຄ່າໄຖ່ຂອງພະເຢຊູເປັນຄຳຕອບທີ່ຈະແຈ້ງທີ່ສຸດສຳລັບຄຳຕົວະຂອງຊາຕານທີ່ວ່າເຮົາບໍ່ມີຄ່າຫຼືບໍ່ສົມຄວນໄດ້ຮັບຄວາມຮັກຈາກພະເຈົ້າ. ເຮົາຕ້ອງບໍ່ລືມວ່າພະເຢຊູຕ້ອງເຈັບປວດຫຼາຍແທ້ໆຕອນທີ່ເພິ່ນຖືກຕອກຄຶງໄວ້ເທິງເສົາທໍລະມານ ແລະພະເຢໂຫວາຮູ້ສຶກເຈັບປວດຫຼາຍກວ່ານັ້ນອີກຕອນທີ່ເພິ່ນເຫັນລູກທີ່ເພິ່ນຮັກຕາຍ. ທັງໝົດນີ້ສະແດງວ່າພະເຢໂຫວາກັບພະເຢຊູຮັກພວກເຮົາຫຼາຍແທ້ໆ. ແຕ່ບາງຄົນພັດຮູ້ສຶກວ່າຍາກທີ່ຈະເຊື່ອວ່າພະເຢຊູສະລະຊີວິດເພື່ອລາວຍ້ອນຮູ້ສຶກວ່າໂຕເອງບໍ່ສົມຄວນໄດ້ຮັບ. ຂໍໃຫ້ຄິດເຖິງອັກຄະສາວົກໂປໂລ ເຖິງວ່າລາວເຄີຍຂົ່ມເຫງພວກລູກສິດຂອງພະຄລິດ ແຕ່ຫຼັງຈາກນັ້ນ ລາວໄດ້ຂຽນວ່າ: “ລູກຂອງພະເຈົ້າ . . . ຮັກຂ້ອຍແລະສະລະຊີວິດເພື່ອຂ້ອຍ.”—ຄາລາເຕຍ 1:13; 2:20
17. ພະເຢໂຫວາເຮັດແນວໃດເພື່ອຊັກນຳເຮົາໃຫ້ມາຫາເພິ່ນແລະລູກຂອງເພິ່ນ?
17 ພະເຢໂຫວາສະແດງໃຫ້ເຫັນວ່າເພິ່ນຮັກເຮົາໂດຍຊ່ວຍເຮົາແຕ່ລະຄົນໃຫ້ຮັບປະໂຫຍດຈາກຄ່າໄຖ່. ພະເຢຊູບອກວ່າ: “ບໍ່ມີຜູ້ໃດຈະມາຫາຂ້ອຍໄດ້ ນອກຈາກພະເຈົ້າຜູ້ເປັນພໍ່ທີ່ໃຊ້ຂ້ອຍມາຈະຊັກນຳລາວ.” (ໂຢຮັນ 6:44) ພະເຢໂຫວາຊັກນຳເຮົາເປັນສ່ວນໂຕໃຫ້ມາຫາລູກຂອງເພິ່ນແລະໃຫ້ມີຄວາມຫວັງທີ່ຈະມີຊີວິດຕະຫຼອດໄປ. ເພິ່ນເຮັດແບບນັ້ນໂດຍໃຫ້ມີຄົນມາປະກາດກັບເຮົາ ເພິ່ນໃຊ້ພະລັງບໍລິສຸດເພື່ອຊ່ວຍເຮົາໃຫ້ເຂົ້າໃຈຄຳພີໄບເບິນແລະເອົາສິ່ງທີ່ໄດ້ຮຽນໄປໃຊ້ທັງໆທີ່ເຮົາເປັນຄົນບໍ່ສົມບູນແບບ. ດັ່ງນັ້ນ ພະເຢໂຫວາເວົ້າກັບເຮົາຄືກັບທີ່ເພິ່ນເວົ້າກັບພວກອິດສະຣາເອນວ່າ: “ເຮົາຮັກເຈົ້າດ້ວຍຄວາມຮັກທີ່ມີຢູ່ຕະຫຼອດໄປ ນີ້ຈຶ່ງເປັນເຫດຜົນທີ່ເຮົາສະແດງຄວາມຮັກທີ່ໝັ້ນຄົງຕໍ່ເຈົ້າສະເໝີ.”—ເຢເຣມີຢາ 31:3
18, 19. (ກ) ພະເຢໂຫວາສະແດງວ່າຮັກເຮົາໂດຍໃຫ້ເຮົາເຮັດຫຍັງເພື່ອຈະສະໜິດກັບເພິ່ນເປັນສ່ວນໂຕ ແລະແມ່ນຫຍັງສະແດງວ່າເພິ່ນສົນໃຈເລື່ອງນີ້ຫຼາຍ? (ຂ) ຄຳພີໄບເບິນເຮັດໃຫ້ເຮົາໝັ້ນໃຈແນວໃດວ່າພະເຢໂຫວາເປັນຜູ້ຟັງທີ່ເຫັນອົກເຫັນໃຈ?
18 ພະເຢໂຫວາຮັກເຮົາຫຼາຍແລະຢາກໃຫ້ເຮົາອະທິດຖານເຖິງເພິ່ນ. ຄຳພີໄບເບິນບອກເຮົາໃຫ້ “ອະທິດຖານເປັນປະຈຳ.” (1 ເທຊະໂລນິກ 5:17) ເພິ່ນຈະຟັງເຮົາແນ່ນອນ. ຄຳພີໄບເບິນບອກວ່າເພິ່ນເປັນ “ຜູ້ຟັງຄຳອະທິດຖານ.” (ເພງສັນລະເສີນ 65:2) ເພິ່ນບໍ່ໄດ້ໃຫ້ໃຜເຮັດໜ້າທີ່ນີ້ ແມ່ນແຕ່ພະເຢຊູກໍບໍ່ໄດ້ເຮັດ ຍ້ອນພະເຢໂຫວາເຮັດໜ້າທີ່ນີ້ດ້ວຍໂຕເອງ. ລອງຄິດເບິ່ງແມ້ ຜູ້ສ້າງເອກະພົບເຊີນເຮົາໃຫ້ອະທິດຖານແລະລະບາຍຄວາມໃນໃຈກັບເພິ່ນໄດ້. ແລ້ວພະເຢໂຫວາເປັນຜູ້ຟັງທີ່ເຢັນຊາ ເມີນເສີຍ ຫຼືບໍ່ສົນໃຈເຮົາບໍ? ບໍ່ແມ່ນ.
19 ພະເຢໂຫວາເປັນພະເຈົ້າທີ່ເຫັນອົກເຫັນໃຈ. ແຕ່ຄວາມເຫັນອົກເຫັນໃຈແມ່ນຫຍັງ? ພີ່ນ້ອງສູງອາຍຸທີ່ສັດຊື່ຄົນໜຶ່ງບອກວ່າ: “ຄວາມເຫັນອົກເຫັນໃຈແມ່ນຄວາມເຈັບປວດຂອງເຈົ້າທີ່ຢູ່ໃນຫົວໃຈຂອງຂ້ອຍ.” ພະເຢໂຫວາຮູ້ສຶກແບບນັ້ນກັບຄວາມເຈັບປວດຂອງເຮົາບໍ? ຂໍໃຫ້ສັງເກດວ່າພະເຢໂຫວາຮູ້ສຶກແນວໃດຕອນທີ່ພວກອິດສະຣາເອນປະຊາຊົນຂອງເພິ່ນລຳບາກ. ຄຳພີໄບເບິນບອກວ່າ: “ຕອນທີ່ເຂົາເຈົ້າທຸກໃຈ ພະເຈົ້າກໍທຸກໃຈນຳ.” (ເອຊາຢາ 63:9) ພະເຢໂຫວາບໍ່ພຽງແຕ່ເຫັນຄວາມລຳບາກຂອງເຂົາເຈົ້າ ແຕ່ເພິ່ນຍັງຮູ້ສຶກເຈັບປວດກັບເຂົາເຈົ້ານຳ. ພະເຢໂຫວາສະແດງໃຫ້ເຫັນວ່າເພິ່ນເຫັນອົກເຫັນໃຈເຂົາເຈົ້າຫຼາຍໂດຍບອກວ່າ: “ໃຜທີ່ແຕະຕ້ອງພວກເຈົ້າກໍສ່ຳກັບແຕະຕ້ອງໜ່ວຍຕາຂອງເຮົາ.”b (ເຊຄາຣີຢາ 2:8) ຖ້າມີໃຜເອົານິ້ວມືມາຈີ້ຕາເຮົາ ເຮົາຕ້ອງເຈັບຫຼາຍແທ້ໆ! ພະເຢໂຫວາເຫັນອົກເຫັນໃຈເຮົາ. ດັ່ງນັ້ນ ຖ້າເຮົາເຈັບ ເພິ່ນກໍເຈັບນຳ.
20. ເພື່ອເຮັດຕາມຄຳແນະນຳທີ່ຢູ່ໃນໂຣມ 12:3 ເຮົາຕ້ອງຫຼີກລ່ຽງຄວາມຄິດແບບໃດ?
20 ຄລິດສະຕຽນທີ່ເປັນຜູ້ໃຫຍ່ຈະບໍ່ຮູ້ສຶກພູມໃຈໃນໂຕເອງຫຼາຍເກີນໄປ ຫຼືຮູ້ສຶກວ່າໂຕເອງດີກວ່າຄົນອື່ນຍ້ອນພະເຢໂຫວາຮັກແລະຖືວ່າລາວມີຄ່າ. ອັກຄະສາວົກໂປໂລຂຽນວ່າ: “ຂ້ອຍໄດ້ຮັບຄວາມກະລຸນາທີ່ຍິ່ງໃຫຍ່ ຂ້ອຍຈຶ່ງຂໍບອກພວກເຈົ້າທຸກຄົນວ່າ ຢ່າຄິດວ່າໂຕເອງສຳຄັນກວ່າຄົນອື່ນ ແຕ່ໃຫ້ຄິດແບບສົມເຫດສົມຜົນແລະໃຫ້ຄິດເຖິງໂຕເອງຕາມຂະໜາດຂອງຄວາມເຊື່ອທີ່ພະເຈົ້າໃຫ້ພວກເຈົ້າແຕ່ລະຄົນ.” (ໂຣມ 12:3) ດັ່ງນັ້ນ ໃຫ້ເຮົາມີຄວາມສຸກກັບຄວາມຮັກທີ່ອົບອຸ່ນຂອງພໍ່ໃນສະຫວັນ ແລະຈື່ໄວ້ສະເໝີວ່າເຮົາບໍ່ຄວນຄິດວ່າເຮົາຕ້ອງໄດ້ຮັບຄວາມຮັກຂອງພະເຈົ້າເປັນຄ່າຕອບແທນ.—ລູກາ 17:10
21. ເຮົາຕ້ອງບໍ່ຫຼົງເຊື່ອຄຳຕົວະຫຍັງຂອງຊາຕານ ແຕ່ເຮົາຄວນເຊື່ອຄຳຮັບຮອງຫຍັງຈາກພະເຢໂຫວາ?
21 ຂໍໃຫ້ເຮົາເຮັດທຸກຢ່າງທີ່ເຮັດໄດ້ເພື່ອຈະບໍ່ຫຼົງເຊື່ອຄຳຕົວະຂອງຊາຕານ ລວມທັງຄຳຕົວະທີ່ວ່າເຮົາບໍ່ມີຄ່າຫຼືບໍ່ສົມຄວນໄດ້ຮັບຄວາມຮັກ. ຖ້າມີບາງຢ່າງທີ່ບໍ່ດີເກີດຂຶ້ນທີ່ເຮັດໃຫ້ຮູ້ສຶກວ່າເຈົ້າບໍ່ດີພໍໃຫ້ພະເຈົ້າຮັກ ຫຼືຄິດວ່າສິ່ງດີໆທີ່ເຈົ້າເຮັດບໍ່ມີຄ່າສຳລັບເພິ່ນ ຫຼືເຈົ້າອາດເຮັດຜິດຮ້າຍແຮງແລະຮູ້ສຶກວ່າຄ່າໄຖ່ຂອງພະເຢຊູບໍ່ສາມາດໄຖ່ຄວາມຜິດນັ້ນໄດ້ ຖ້າເຈົ້າຄິດແບບນັ້ນ ເຈົ້າກໍກຳລັງຖືກຊາຕານຕົວະ. ຢ່າເຊື່ອຄຳຂີ້ຕົວະເຫຼົ່ານັ້ນ. ຂໍໃຫ້ໝັ້ນໃຈວ່າຄຳເວົ້າທີ່ພະເຢໂຫວາດົນໃຈໃຫ້ໂປໂລຂຽນຈະໃຊ້ກັບເຮົາໄດ້ນຳ. ລາວຂຽນວ່າ: “ຂ້ອຍໝັ້ນໃຈວ່າຈະບໍ່ມີຫຍັງສາມາດຂັດຂວາງຄວາມຮັກທີ່ພະເຈົ້າສະແດງຕໍ່ພວກເຮົາ. ບໍ່ວ່າຈະເປັນຄວາມຕາຍ ຫຼືຊີວິດ ຫຼືທູດສະຫວັນ ຫຼືລັດຖະບານ ຫຼືສິ່ງທີ່ມີຢູ່ຕອນນີ້ ຫຼືສິ່ງທີ່ຈະມາໃນອະນາຄົດ ຫຼືອຳນາດ ຫຼືຄວາມສູງ ຫຼືຄວາມເລິກ ຫຼືສິ່ງອື່ນໆທີ່ຖືກສ້າງຂຶ້ນມາ. ບໍ່ມີຫຍັງຈະສາມາດຂັດຂວາງຄວາມຮັກທີ່ພະເຈົ້າສະແດງຕໍ່ພວກເຮົາຜ່ານທາງພະຄລິດເຢຊູຜູ້ເປັນນາຍຂອງພວກເຮົາ.”—ໂຣມ 8:38, 39
a ຫຼາຍເທື່ອທີ່ຄຳພີໄບເບິນເຊື່ອມຄວາມຫວັງເລື່ອງການຟື້ນຄືນມາຈາກຕາຍເຂົ້າກັບຄວາມຈື່ຈຳຂອງພະເຢໂຫວາ. ໂຢບຜູ້ຮັບໃຊ້ທີ່ສັດຊື່ເວົ້າກັບພະເຢໂຫວາວ່າ: “ພະເຈົ້າເອີ້ຍ . . . ຂໍພະອົງກຳນົດເວລາໃຫ້ລູກ ເພື່ອພະອົງຈະຈື່ລູກ.” (ໂຢບ 14:13) ພະເຢຊູເວົ້າເຖິງການຟື້ນຄືນມາຈາກຕາຍຂອງ “ທຸກຄົນທີ່ຢູ່ໃນບ່ອນຝັງສົບ.” ນີ້ສະແດງວ່າພະເຢໂຫວາຈື່ທຸກຄົນທີ່ເພິ່ນຢາກປຸກໃຫ້ຟື້ນຄືນມາຈາກຕາຍ.—ໂຢຮັນ 5:28, 29
b ຄຳພີໄບເບິນບາງສະບັບບອກວ່າຂໍ້ນີ້ໝາຍເຖິງຜູ້ທີ່ແຕະຕ້ອງປະຊາຊົນຂອງພະເຈົ້າກໍແຕະຕ້ອງຕາຂອງໂຕເອງຫຼືຕາຂອງພວກອິດສະຣາເອນ ບໍ່ແມ່ນຕາຂອງພະເຈົ້າ. ຄວາມຄິດທີ່ຜິດໆນີ້ມາຈາກຄົນທີ່ຄັດລອກຄຳພີໄບເບິນ. ເຂົາເຈົ້າຮູ້ສຶກວ່າຂໍ້ຄວາມນີ້ບໍ່ໄດ້ສະແດງຄວາມນັບຖືພະເຈົ້າ. ດັ່ງນັ້ນ ເຂົາເຈົ້າກໍເລີຍປ່ຽນຂໍ້ຄວາມນີ້. ການເຮັດແບບນີ້ເຮັດໃຫ້ພາບທີ່ໜ້າປະທັບໃຈທີ່ພະເຢໂຫວາສະແດງຄວາມເຫັນອົກເຫັນໃຈກັບປະຊາຊົນຂອງເພິ່ນບໍ່ເຫຼືອເລີຍ.