ບົດທີ 58

ສັດຊື່ພັກດີຕໍ່ພະເຢໂຫວາສະເໝີ

ສະບັບພິມ

ຄລິດສະຕຽນແທ້ຕັ້ງໃຈຄັກແນ່ວ່າຈະບໍ່ໃຫ້ໃຜຫຼືອັນໃດມາເຮັດໃຫ້ເຂົາເຈົ້າເຊົານະມັດສະການພະເຢໂຫວາ. ເຈົ້າເອງກໍຄືຊິຕັ້ງໃຈທີ່ຈະພັກດີຕໍ່ພະເຢໂຫວາຄືກັນ ແລະເພິ່ນກໍເບິ່ງວ່າຄວາມສັດຊື່ພັກດີຂອງເຈົ້າມີຄ່າຫຼາຍ. (ອ່ານ 1 ຂ່າວຄາວ 28:9) ແຕ່ມີຫຍັງແດ່ທີ່ອາດເຮັດໃຫ້ຍາກທີ່ເຈົ້າຈະພັກດີຕໍ່ພະເຢໂຫວາສະເໝີ ແລະອັນໃດຈະຊ່ວຍໃຫ້ເຈົ້າຮັບມືໄດ້?

1. ຄົນອື່ນອາດເຮັດຫຍັງແດ່ທີ່ເຮັດໃຫ້ເຮົາບໍ່ພັກດີຕໍ່ພະເຢໂຫວາ?

ບາງຄົນອາດພະຍາຍາມເຮັດໃຫ້ເຮົາເຊົາຮັບໃຊ້ພະເຢໂຫວາ. ຄົນພວກນັ້ນແມ່ນໃຜ? ເຂົາເຈົ້າແມ່ນຄົນທີ່ທໍລະຍົດພະເຈົ້າ. ເຂົາເຈົ້າເຊົາຮັບໃຊ້ພະເຢໂຫວາ ແລະຕອນນີ້ກຳລັງເວົ້າຕົວະກ່ຽວກັບອົງການຂອງເພິ່ນເພື່ອໃຫ້ຄວາມເຊື່ອຂອງເຮົາອ່ອນແອລົງແລະເຊົາຮັບໃຊ້ພະເຢໂຫວາຄືກັບເຂົາເຈົ້າ. ສ່ວນຜູ້ນຳສາສະໜາບາງຄົນກໍເຜີຍແພ່ຂໍ້ມູນທີ່ບໍ່ຖືກຕ້ອງກ່ຽວກັບພວກເຮົາ. ຖ້າເຮົາບໍ່ລະວັງ ເຮົາກໍອາດຫຼົງເຊື່ອເຂົາເຈົ້າແລະເຊົາຮັບໃຊ້ພະເຢໂຫວາ. ດັ່ງນັ້ນ ເປັນເລື່ອງອັນຕະລາຍຫຼາຍທີ່ເຮົາຈະໄປໂຕ້ຕອບຄົນເຫຼົ່ານັ້ນທີ່ບໍ່ພັກດີຕໍ່ພະເຈົ້າ. ເຮົາບໍ່ຄວນອ່ານປຶ້ມ ອ່ານກະທູ້ຫຼືບົດຄວາມໃນອິນເຕີເນັດ ເຂົ້າເວັບໄຊ ຫຼືເບິ່ງວິດີໂອຂອງເຂົາເຈົ້າ. ພະເຢຊູເວົ້າເຖິງຄົນທີ່ພະຍາຍາມເຮັດໃຫ້ເຮົາບໍ່ພັກດີຕໍ່ພະເຢໂຫວາວ່າ: “ຢ່າເຂົາເຈົ້າ. ເຂົາເຈົ້າເປັນຄົນນຳທາງທີ່ຕາບອດ. ຖ້າຄົນຕາບອດນຳທາງຄົນຕາບອດ ທັງສອງຄົນຈະພາກັນຕົກຂຸມ.”—ມັດທາຍ 15:14

2. ເຮົາຈະຕັດສິນໃຈແນວໃດເພື່ອສະແດງໃຫ້ເຫັນວ່າເຮົາພັກດີຕໍ່ພະເຢໂຫວາ?

ຍ້ອນເຮົາຮັກພະເຢໂຫວາ ເຮົາກໍເລີຍບໍ່ຢາກມີສ່ວນກ່ຽວຂ້ອງກັບສາສະໜາທີ່ພາຄົນໄປຜິດທາງ. ດັ່ງນັ້ນ ບໍ່ວ່າເຮົາຈະເຮັດວຽກຫຍັງ ຢູ່ໃນອົງກອນໃດ ຫຼືເຮັດກິດຈະກຳຫຍັງ ເຮົາກໍຕ້ອງເຮັດໃຫ້ແນ່ໃຈວ່າສິ່ງເຫຼົ່ານັ້ນບໍ່ໄດ້ມີສ່ວນກ່ຽວຂ້ອງກັບສາສະໜາທີ່ພາຄົນໄປຜິດທາງ. ພະເຢໂຫວາເຕືອນເຮົາວ່າ: “ປະຊາຊົນຂອງເຮົາ ພວກເຈົ້າຕ້ອງອອກຈາກ [ບາບີໂລນໃຫຍ່].”—ພະນິມິດ 18:2, 4

ຮຽນຮູ້ຫຼາຍຂຶ້ນ

ມາເບິ່ງວ່າເຈົ້າຈະບໍ່ຍອມໃຫ້ຄົນອື່ນມາເຮັດໃຫ້ເຈົ້າເຊົາພັກດີຕໍ່ພະເຢໂຫວາໄດ້ແນວໃດ ແລະການອອກຈາກບາບີໂລນໃຫຍ່ຈະເຮັດໃຫ້ເຫັນວ່າເຈົ້າພັກດີຕໍ່ພະເຢໂຫວາແນວໃດ.

3. ລະວັງຄົນທີ່ສອນຜິດໆ

ເຮົາຈະເຮັດແນວໃດຖ້າເຮົາໄດ້ຍິນເລື່ອງໃນແງ່ລົບກ່ຽວກັບອົງການຂອງພະເຢໂຫວາ? ອ່ານສຸພາສິດ 14:15 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເປັນຫຍັງເຮົາບໍ່ຄວນເຊື່ອທຸກສິ່ງທີ່ເຮົາໄດ້ຍິນທັນທີ?

ອ່ານ 2 ໂຢຮັນ 9-11 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຈາກຂໍ້ຄຳພີນີ້ ເຮົາຄວນຫຍຸ້ງກ່ຽວກັບຄົນທີ່ທໍລະຍົດພະເຈົ້າບໍ? ຍ້ອນຫຍັງ?
ເຖິງວ່າເຮົາຈະບໍ່ໄດ້ລົມກັບຄົນທີ່ທໍລະຍົດພະເຈົ້າໂດຍກົງ ແຕ່ເຮົາອາດເຮັດຫຍັງທີ່ເປັນຄືກັບວ່າເຮົາກຳລັງຟັງຄຳສອນຂອງເຂົາເຈົ້າ?
ເຈົ້າຄິດວ່າພະເຢໂຫວາຈະຮູ້ສຶກແນວໃດຖ້າເຮົາຟັງຄຳເວົ້າໃນແງ່ລົບກ່ຽວກັບເພິ່ນແລະອົງການຂອງເພິ່ນ?

4. ເມື່ອພີ່ນ້ອງເຮັດຜິດ ເຮົາຈະພັກດີຕໍ່ພະເຢໂຫວາໄດ້ແນວໃດ?

ຖ້າເຮົາຮູ້ວ່າມີພີ່ນ້ອງບາງຄົນໃນປະຊາຄົມເຮັດຜິດຮ້າຍແຮງ ເຮົາຕ້ອງເຮັດຫຍັງ? ໃຫ້ເຮົາມາເບິ່ງຫຼັກການຈາກກົດໝາຍຂອງພະເຈົ້າທີ່ໃຫ້ກັບຊາດອິດສະຣາເອນໃນສະໄໝກ່ອນ. ອ່ານລະບຽບພວກເລວີ 5:1.

ຂໍ້ຄຳພີນີ້ບອກວ່າ ຖ້າເຮົາຮູ້ວ່າພີ່ນ້ອງຄົນໜຶ່ງເຮັດຜິດຮ້າຍແຮງ ເຮົາຕ້ອງໄປບອກຜູ້ເບິ່ງແຍງ. ແຕ່ກ່ອນຈະເຮັດແນວນັ້ນ ເຮົາຈະສະແດງວ່າເຮົາຮັກລາວໂດຍຂໍໃຫ້ລາວໄປຫາຜູ້ເບິ່ງແຍງແລະສາລະພາບຄວາມຜິດນັ້ນດ້ວຍໂຕເອງ. ຖ້າລາວບໍ່ຍອມໄປຫາຜູ້ເບິ່ງແຍງ ເຮົາຕ້ອງສະແດງຄວາມພັກດີຕໍ່ພະເຢໂຫວາໂດຍໄປບອກເລື່ອງນັ້ນໃຫ້ຜູ້ເບິ່ງແຍງຮູ້. ເປັນຫຍັງການເຮັດແບບນີ້ຈຶ່ງເປັນການສະແດງຄວາມຮັກຕໍ່ . . .

ພະເຢໂຫວາ?
ຄົນທີ່ເຮັດຜິດ?
ພີ່ນ້ອງຄົນອື່ນໃນປະຊາຄົມ?

ຮູບ: ພີ່ນ້ອງຊາຍຄົນໜຶ່ງຊ່ວຍພີ່ນ້ອງຄລິດສະຕຽນອີກຄົນໜຶ່ງທີ່ໄດ້ເຮັດຜິດ. 1. ພີ່ນ້ອງຊາຍເບິ່ງໂທລະສັບມືຖືແລະຮູ້ສຶກບໍ່ສະບາຍໃຈເມື່ອໄດ້ເຫັນບາງຢ່າງໃນອິນເຕີເນັດກ່ຽວກັບພີ່ນ້ອງຄົນໜຶ່ງທີ່ລາວຮູ້ຈັກ. 2. ລາວໃຫ້ພີ່ນ້ອງຄົນທີ່ລາວຮູ້ຈັກນັ້ນເບິ່ງສິ່ງທີ່ລາວເຫັນແລະພະຍາຍາມຈະຊ່ວຍພີ່ນ້ອງຄົນນັ້ນ ແຕ່ລາວບໍ່ຍອມໃຫ້ຊ່ວຍ. 3. ພີ່ນ້ອງຊາຍໄປຫາຜູ້ເບິ່ງແຍງ 2 ຄົນ ແລະໃຫ້ຜູ້ເບິ່ງແຍງເບິ່ງສິ່ງທີ່ລາວເຫັນ. — ຖ້າພີ່ນ້ອງຄລິດສະຕຽນກຳລັງມີບັນຫາ ເຈົ້າຕ້ອງຊ່ວຍລາວ!

5. ຢ່າມີສ່ວນກ່ຽວຂ້ອງກັບບາບີໂລນໃຫຍ່

ເປີດວິດີໂອ.

ວິດີໂອ: ອອກມາຈາກບາບີໂລນໃຫຍ່! (5:06)

ສາກໜຶ່ງຈາກວິດີໂອ ‘ອອກມາຈາກບາບີໂລນໃຫຍ່!’ ນັກສຶກສາຄົນໜຶ່ງເຮັດວຽກຢູ່ໂບດ ລາວລາອອກຈາກວຽກແລະກໍຍ່າງອອກມາຈາກບ່ອນນັ້ນ.

ອ່ານລູກາ 4:8 ແລະພະນິມິດ 18:4, 5 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເຈົ້າຍັງມີສ່ວນຮ່ວມກັບພິທີກຳຫຼືກິດຈະກຳຂອງສາສະໜາທີ່ພາຄົນໄປຜິດທາງຢູ່ບໍ?
ເຈົ້າຍັງເປັນສະມາຊິກຂອງອົງກອນທີ່ກ່ຽວຂ້ອງກັບສາສະໜາເຫຼົ່ານັ້ນຢູ່ບໍ?
ວຽກທີ່ເຈົ້າເຮັດມີສ່ວນສະໜັບສະໜູນສາສະໜາທີ່ພາຄົນໄປຜິດທາງບໍ?
ແລ້ວຍັງມີເລື່ອງອື່ນໆອີກບໍທີ່ເຈົ້າຕ້ອງເຊົາມີສ່ວນກ່ຽວຂ້ອງກັບສາສະໜາທີ່ພາຄົນໄປຜິດທາງ?
ຖ້າມີບາງຂໍ້ທີ່ຄຳຕອບຄືແມ່ນ ເຈົ້າຄວນຕັດສິນໃຈເຮັດຫຍັງ?

ຖ້າເຈົ້າມີບາງເລື່ອງທີ່ຕ້ອງປ່ຽນແປງ ຂໍໃຫ້ເຈົ້າຕັດສິນໃຈໃນແບບທີ່ເຮັດໃຫ້ເຈົ້າຮູ້ສຶກສະບາຍໃຈແລະບໍ່ມີຫຍັງລົບກວນໃຈຮູ້ຜິດຮູ້ຖືກຂອງເຈົ້າ ແລະສະແດງວ່າເຈົ້າພັກດີຕໍ່ພະເຢໂຫວາ.