ບົດສິບສອງ
ຄວາມໝາຍແຫ່ງການຮັບບັບເຕມາຂອງເຮົາ
1. ເປັນຫຍັງການຮັບບັບເຕມາດ້ວຍນ້ຳຈຶ່ງເປັນເລື່ອງທີ່ເຮົາແຕ່ລະຄົນຄວນໃສ່ໃຈ?
ໃນປີ 29 ສາກົນສັກກະຫຼາດ ພະເຍຊູໄດ້ຮັບບັບເຕມາ ໂດຍມີໂຢຮັນຜູ້ໃຫ້ບັບເຕມາເປັນຜູ້ຈຸ່ມຕົວພະອົງລົງໃນແມ່ນ້ຳຢູລະເດນ. ພະເຢໂຫວາເອງໄດ້ເຝົ້າສັງເກດເບິ່ງແລະສະແດງການຍອມຮັບໃນເລື່ອງນີ້. (ມັດທາຍ 3:16, 17) ພະເຍຊູໄດ້ວາງແບບຢ່າງໄວ້ເພື່ອສາວົກໝົດທຸກຄົນຂອງພະອົງຈະຕິດຕາມແບບຢ່າງດັ່ງກ່າວນັ້ນ. ສາມປີເຄິ່ງຕໍ່ມາ ພະເຍຊູໄດ້ໃຫ້ຄຳສັ່ງນີ້ແກ່ເຫຼົ່າສາວົກຂອງພະອົງວ່າ “ອຳນາດທຸກສິ່ງເປັນທີ່ປະທານໃຫ້ແກ່ເຮົາແລ້ວ ໃນຟ້າສະຫວັນກໍດີ ແລະທີ່ແຜ່ນດິນໂລກກໍດີ. ເຫດສັນນີ້ ທ່ານທັງຫຼາຍຈົ່ງໄປແລະກະທຳໃຫ້ພວກຕ່າງປະເທດທັງປວງເຂົ້າເປັນລູກສິດ ໃຫ້ເຂົາຮັບສິນບັບເຕມາໃນນາມຊື່ແຫ່ງພະບິດາ ແລະພະບຸດ ແລະພະວິນຍານບໍລິສຸດ.” (ມັດທາຍ 28:18, 19) ເຮົາໄດ້ຮັບບັບເຕມາຕາມທີ່ພະເຍຊູສັ່ງແລ້ວບໍ? ຖ້າຍັງ ເຮົາກຳລັງກຽມຕົວຈະເຮັດເຊັ່ນນັ້ນບໍ?
2. ຄຳຖາມໃດແດ່ທີ່ຕ້ອງໄດ້ຮັບຄຳຕອບກ່ຽວກັບການຮັບບັບເຕມາ?
2 ບໍ່ວ່າເຮົາໄດ້ຮັບບັບເຕມາແລ້ວຫຼືກຳລັງກຽມຕົວເພື່ອຮັບບັບເຕມາກໍຕາມ ຄວາມເຂົ້າໃຈທີ່ຈະແຈ້ງຕໍ່ການຮັບບັບເຕມາແມ່ນສຳຄັນສຳລັບໝົດທຸກຄົນທີ່ຕ້ອງການຮັບໃຊ້ພະເຢໂຫວາ ແລະຕ້ອງການມີຊີວິດໃນໂລກໃໝ່ທີ່ຊອບທຳຂອງພະອົງ. ຄຳຖາມຕ່າງໆ ຕໍ່ໄປນີ້ເປັນຄຳຖາມທີ່ຄວນຈະໄດ້ຮັບຄຳຕອບ: ການຮັບບັບເຕມາໃນທຸກມື້ນີ້ມີຄວາມໝາຍແບບດຽວກັບການຮັບບັບເຕມາຂອງພະເຍຊູບໍ? ການຮັບບັບເຕມາ “ໃນນາມຊື່ແຫ່ງພະບິດາ ແລະພະບຸດ ແລະພະວິນຍານບໍລິສຸດ” ມີຄວາມໝາຍຢ່າງໃດ? ສິ່ງທີ່ລວມຢູ່ໃນການດຳເນີນຊີວິດທີ່ສອດຄ່ອງກັບຄວາມໝາຍຂອງການຮັບບັບເຕມາດ້ວຍນ້ຳແບບຄລິດສະຕຽນມີອັນໃດແດ່?
ການຮັບບັບເຕມາທີ່ໂຢຮັນເຄີຍເຮັດ
3. ການຮັບບັບເຕມາຂອງໂຢຮັນຈຳກັດໄວ້ສຳລັບໃຜເທົ່ານັ້ນ?
3 ປະມານຫົກເດືອນກ່ອນທີ່ພະເຍຊູຈະຮັບບັບເຕມາ ໂຢຮັນຜູ້ໃຫ້ບັບເຕມາໄດ້ໄປປະກາດທົ່ວແຂວງຢູເດ ໂດຍກ່າວວ່າ “ທ່ານທັງຫຼາຍຈົ່ງປະໃຈເກົ່າເອົາໃຈໃໝ່ ເພາະວ່າແຜ່ນດິນສະຫວັນໄດ້ຫຍັບເຂົ້າມາໃກ້ແລ້ວ.” (ມັດທາຍ 3:1, 2) ປະຊາຊົນໄດ້ຍິນສິ່ງທີ່ໂຢຮັນປະກາດແລະໄດ້ເອົາໃຈໃສ່ຕໍ່ຄຳແນະນຳນັ້ນ. ເຂົາເຈົ້າຍອມຮັບບາບຂອງຕົນຢ່າງເປີດເຜີຍ, ໄດ້ປະໃຈເກົ່າເອົາໃຈໃໝ່, ແລ້ວຈຶ່ງມາຫາໂຢຮັນເພື່ອຮັບບັບເຕມາໃນແມ່ນ້ຳຢູລະເດນ. ການຮັບບັບເຕມາດັ່ງກ່າວແມ່ນສຳລັບຄົນຢິວເທົ່ານັ້ນ.—ລືກາ 1:13-16; ກິດຈະການ 13:23, 24.
4. ເປັນຫຍັງຄົນຢິວໃນສະຕະວັດທຳອິດຈຳເປັນຕ້ອງປະໃຈເກົ່າເອົາໃຈໃໝ່ຢ່າງຮີບດ່ວນ?
4 ຄົນຢິວເຫຼົ່ານັ້ນຈຳເປັນຕ້ອງປະໃຈເກົ່າເອົາໃຈໃໝ່ຢ່າງຮີບດ່ວນ. ຢູ່ທີ່ພູເຂົາຊີນາຍໃນປີ 1513 ກ່ອນສາກົນສັກກະຫຼາດ ບັນພະບຸລຸດຂອງເຂົາເຈົ້າໄດ້ຕົກລົງເຮັດສັນຍາໄມຕີແຫ່ງຊາດ ເຊິ່ງເປັນຂໍ້ຕົກລົງທີ່ສຳຄັນຢ່າງເປັນທາງການກັບພະເຢໂຫວາພະເຈົ້າ. ເຖິງແນວນັ້ນກໍຕາມ ເນື່ອງຈາກບາບທີ່ຮ້າຍແຮງຂອງຕົນ ເຂົາເຈົ້າຈຶ່ງບໍ່ໄດ້ດຳເນີນຊີວິດໃຫ້ສົມກັບເງື່ອນໄຂໃນສັນຍາໄມຕີນັ້ນ ແລະດ້ວຍເຫດນັ້ນ ເຂົາເຈົ້າຈຶ່ງຖືກກ່າວໂທດຍ້ອນສັນຍາໄມຕີດັ່ງກ່າວ. ເມື່ອມາຮອດສະໄໝຂອງພະເຍຊູ ສະພາບຂອງເຂົາເຈົ້າຈຶ່ງຕົກຢູ່ໃນຂັ້ນວິກິດແລ້ວ. “ວັນອັນໃຫຍ່ອັນພິລຶກເພີງກົວຂອງພະເຢໂຫວາ” ເຊິ່ງບອກລ່ວງໜ້າໂດຍມາລາກີນັ້ນກໍໃກ້ເຂົ້າມາແລ້ວ. ໃນປີ 70 ສາກົນສັກກະຫຼາດ “ວັນ” ນັ້ນມາເຖິງເມື່ອກອງທັບໂລມທຳລາຍເມືອງເຢຣຶຊາເລມ, ພະວິຫານຂອງເມືອງນັ້ນ ແລະຂ້າຄົນຢິວຫຼາຍກວ່າໜຶ່ງລ້ານຄົນ. ໂຢຮັນຜູ້ໃຫ້ບັບເຕມາເຊິ່ງມີຄວາມກະຕືລືລົ້ນໃນການນະມັດສະການແທ້ໄດ້ອອກໄປເຕືອນກ່ອນການທຳລາຍນັ້ນຈະມາຮອດເພື່ອ “ຕຽມປະຊາຊົນຂອງພະຜູ້ເປັນເຈົ້າໄວ້ພ້ອມສຳລັບ [ພະເຢໂຫວາ].” ເຂົາເຈົ້າຈຳເປັນຕ້ອງປະໃຈເກົ່າເອົາໃຈໃໝ່ຈາກບາບຂອງຕົນທີ່ຂັດກັບສັນຍາໄມຕີແຫ່ງກົດໝາຍຂອງໂມເຊ ແລະກຽມພ້ອມທີ່ຈະຮັບເອົາພະເຍຊູພະບຸດຂອງພະເຈົ້າເຊິ່ງພະເຢໂຫວາໄດ້ສົ່ງມາ.—ມາລາກີ 4:4-6; ລືກາ 1:17, ທ.ປ.; ກິດຈະການ 19:4.
5. (ກ) ເມື່ອພະເຍຊູມາເພື່ອຮັບບັບເຕມາ ເປັນຫຍັງໂຢຮັນຈຶ່ງທ້ວງກ່ຽວກັບເລື່ອງນີ້? (ຂ) ການຮັບບັບເຕມາຂອງພະເຍຊູເປັນສັນຍາລັກຊີ້ເຖິງຫຍັງ?
5 ພະເຍຊູເອງກໍແມ່ນບຸກຄົນໜຶ່ງໃນທ່າມກາງຄົນເຫຼົ່ານັ້ນທີ່ມາຫາໂຢຮັນເພື່ອຮັບບັບເຕມາ. ເພາະເຫດໃດ? ໂດຍຮູ້ວ່າພະເຍຊູບໍ່ມີບາບທີ່ຈະຕ້ອງສາລະພາບ ໂຢຮັນກ່າວວ່າ “ຂ້າພະເຈົ້າຕ້ອງການຈະຮັບສິນບັບເຕມາດ້ວຍພະອົງ ແລະພະອົງມາຫາຂ້າພະເຈົ້າຫຼື?” ການຮັບບັບເຕມາຂອງພະເຍຊູພັດເປັນສັນຍາລັກເຖິງບາງຢ່າງທີ່ແຕກຕ່າງອອກໄປ. ດ້ວຍເຫດນັ້ນ ພະເຍຊູຕອບວ່າ “ບັດນີ້ທ່ານຈົ່ງຍອມກະທຳເທີ້ນ ເຫດວ່າສົມຄວນທີ່ເຮົາກະທຳຄວາມຊອບທຳສຳເລັດທັງສິ້ນຢ່າງນັ້ນ.” (ມັດທາຍ 3:13-15) ເນື່ອງຈາກພະເຍຊູບໍ່ມີບາບ ການຮັບບັບເຕມາຂອງພະອົງຈຶ່ງບໍ່ໄດ້ເປັນສັນຍາລັກທີ່ບົ່ງຊີ້ເຖິງການປະໃຈເກົ່າເອົາໃຈໃໝ່ຈາກບາບ; ທັງພະອົງເອງບໍ່ຈຳເປັນຕ້ອງອຸທິດຕົວແກ່ພະເຈົ້າ ເນື່ອງຈາກພະອົງເປັນຄົນຂອງຊາດທີ່ໄດ້ອຸທິດຕົວແກ່ພະເຈົ້າແລ້ວ. ແທນທີ່ຈະເປັນແນວນັ້ນ ການຮັບບັບເຕມາຂອງພະອົງຕອນອາຍຸ 30 ປີ ມີຄວາມໝາຍສະເພາະຕໍ່ພະອົງເອງ ແລະຍັງເປັນສັນຍາລັກທີ່ບົ່ງບອກເຖິງການສະເໜີຕົວເອງຕໍ່ພະບິດາທາງພາກສະຫວັນ ເພື່ອຈະເຮັດຕາມພະປະສົງຂອງພະບິດາທີ່ຍັງຢູ່ຂ້າງໜ້າ.
6. ສຳລັບພະເຍຊູແລ້ວການເຮັດຕາມຄວາມປະສົງຂອງພະເຈົ້າສຳຄັນຂະໜາດໃດ?
6 ພະປະສົງຂອງພະເຈົ້າສຳລັບພະເຍຊູຄລິດແມ່ນລວມເຖິງວຽກງານທີ່ກ່ຽວຂ້ອງກັບລາຊະອານາຈັກນຳອີກ. (ລືກາ 8:1) ວຽກງານນີ້ຍັງກ່ຽວຂ້ອງກັບການຖວາຍຊີວິດມະນຸດທີ່ສົມບູນຂອງພະອົງເພື່ອເປັນຄ່າໄຖ່ ແລະເພື່ອເປັນພື້ນຖານສຳລັບສັນຍາໄມຕີໃໝ່. (ມັດທາຍ 20:28; 26:26-28; ເຫບເລີ 10:5-10) ພະເຍຊູຖືວ່າສິ່ງທີ່ການຮັບບັບເຕມາດ້ວຍນ້ຳເປັນສັນຍາລັກຊີ້ເຖິງນັ້ນເປັນເລື່ອງທີ່ສຳຄັນຢ່າງແທ້ຈິງ. ພະອົງບໍ່ໄດ້ປ່ອຍໃຫ້ສິ່ງໃດກໍຕາມມາຊັກຈູງຄວາມສົນໃຈຂອງພະອົງໃຫ້ຫັນເຫໄປໃສ່ຜົນປະໂຫຍດແນວອື່ນ. ຈົນເຖິງຂັ້ນວ່າຕ້ອງສິ້ນຊີວິດເທິງແຜ່ນດິນໂລກ ພະອົງກໍຍັງຈົດຈໍ່ຢູ່ກັບການເຮັດຕາມໃຈປະສົງຂອງພະເຈົ້າ ໂດຍເອົາວຽກງານການປະກາດເລື່ອງລາຊະອານາຈັກໃຫ້ເປັນວຽກຕົ້ນຕໍໃນຊີວິດຂອງພະອົງ.—ໂຢຮັນ 4:34.
ການຮັບບັບເຕມາໃນນ້ຳຂອງເຫຼົ່າສາວົກຄລິດສະຕຽນ
7. ຕັ້ງແຕ່ວັນເພນເຕກອດປີ 33 ສາກົນສັກກະຫຼາດ ຄລິດສະຕຽນໄດ້ຮັບຄຳສັ່ງໃຫ້ເຮັດຫຍັງກ່ຽວກັບການຮັບບັບເຕມາ?
7 ເຫຼົ່າສາວົກຮຸ່ນທຳອິດຂອງພະເຍຊູໄດ້ຮັບບັບເຕມາໃນນ້ຳໂດຍໂຢຮັນ ແລະຈາກນັ້ນໄດ້ຮັບຄຳແນະນຳໃຫ້ໄປຫາພະເຍຊູໃນຖານະຜູ້ມີຄວາມຫວັງທີ່ຈະເປັນສະມາຊິກແຫ່ງລາຊະອານາຈັກທາງພາກສະຫວັນ. (ໂຢຮັນ 3:25-30) ພາຍໃຕ້ການຊີ້ນຳຂອງພະເຍຊູ ສາວົກເຫຼົ່ານີ້ໄດ້ໃຫ້ບັບເຕມາແກ່ຄົນອື່ນຄືກັນ ເຊິ່ງມີຄວາມໝາຍແບບດຽວກັບການຮັບບັບເຕມາທີ່ໂຢຮັນໄດ້ເຮັດ. (ໂຢຮັນ 4:1, 2) ຢ່າງໃດກໍຕາມ ໂດຍເລີ່ມຕົ້ນໃນວັນເພນເຕກອດປີ 33 ສາກົນສັກກະຫຼາດ ເຂົາເຈົ້າເລີ່ມປະຕິບັດຕາມໜ້າທີ່ເຊິ່ງຈະເຮັດໃຫ້ຄົນອື່ນຮັບບັບເຕມາ “ໃນນາມຊື່ແຫ່ງພະບິດາ ແລະພະບຸດ ແລະພະວິນຍານບໍລິສຸດ.” (ມັດທາຍ 28:19) ເມື່ອທົບທວນຄວາມໝາຍຂອງໜ້າທີ່ນັ້ນ ເຮົາຈະພົບວ່າມັນເປັນປະໂຫຍດຫຼາຍແທ້ໆ.
8. ການຮັບບັບເຕມາ “ໃນນາມຊື່ແຫ່ງພະບິດາ” ມີຄວາມໝາຍຢ່າງໃດ?
8 ການຮັບບັບເຕມາ “ໃນນາມຊື່ແຫ່ງພະບິດາ” ມີຄວາມໝາຍຢ່າງໃດ? ນັ້ນໝາຍເຖິງການຍອມຮັບຊື່, ຖານະຕຳແໜ່ງ, ສິດອຳນາດ, ພະປະສົງ ແລະກົດໝາຍຕ່າງໆ ຂອງພະອົງ. ຂໍໃຫ້ພິຈາລະນາສິ່ງທີ່ກ່ຽວພັນກັນໃນເລື່ອງນີ້. (1) ໃນເລື່ອງທີ່ກ່ຽວຂ້ອງກັບຊື່ຂອງພະອົງ ຄຳເພງ 83:18 ກ່າວວ່າ “ພະເຈົ້າຜູ້ມີນາມຊື່ວ່າພະເຢໂຫວາ ອົງດຽວເປັນພະເຈົ້າອົງສູງສຸດເທິງແຜ່ນດິນທັງສິ້ນ.” (2) ກ່ຽວກັບຖານະຕຳແໜ່ງຂອງພະອົງ 2 ກະສັດ 19:15 (ລ.ມ.) ກ່າວວ່າ “ໂອ້ພະເຢໂຫວາ . . . ພະອົງອົງດຽວເປັນພະເຈົ້າທ່ຽງແທ້.” (3) ກ່ຽວກັບສິດອຳນາດຂອງພະອົງ ຄຳປາກົດ 4:11 ບອກເຮົາວ່າ “ພະອົງເຈົ້າ ແລະພະເຈົ້າຂອງຂ້າພະເຈົ້າທັງຫຼາຍ ພະອົງເປັນຜູ້ສົມຄວນຈະຮັບລັດສະໝີ ແລະຍົດສັກແລະລິດເດດ ເພາະວ່າພະອົງເປັນຜູ້ທີ່ໄດ້ເນລະມິດສ້າງສັບພະທຸກສິ່ງ ແລະສັບພະທຸກສິ່ງເປັນຢູ່ ແລະຕ້ອງເນລະມິດສ້າງແລ້ວດ້ວຍນ້ຳໃຈຂອງພະອົງ.” (4) ເຮົາຕ້ອງຍອມຮັບເຊັ່ນກັນວ່າ ພະເຢໂຫວາເປັນຜູ້ໃຫ້ຊີວິດ ຜູ້ເຊິ່ງປະສົງຈະຊ່ວຍຊີວິດເຮົາໃຫ້ພົ້ນຈາກຄວາມບາບແລະຄວາມຕາຍ: “ຄວາມພົ້ນມາແຕ່ພະເຢໂຫວາ.” (ຄຳເພງ 3:8; 36:9) (5) ເຮົາຕ້ອງຍອມຮັບວ່າພະເຢໂຫວາເປັນຜູ້ອອກກົດໝາຍອົງສູງສຸດ: “ພະເຢໂຫວາແມ່ນຜູ້ຕັດສິນພວກເຮົາ ພະເຢໂຫວາແມ່ນຜູ້ຕັ້ງກົດໝາຍໄວ້ສຳລັບພວກເຮົາ ພະເຢໂຫວາແມ່ນພະມະຫາກະສັດຂອງພວກເຮົາ.” (ເອຊາອີ 33: 22) ເນື່ອງຈາກພະອົງກຳບົດບາດທັງໝົດນີ້ ເຮົາຈຶ່ງໄດ້ຮັບການກະຕຸ້ນວ່າ “ຈົ່ງຮັກພະເຢໂຫວາ ຜູ້ເປັນພະເຈົ້າຂອງເຈົ້າ ເຈົ້າຈົ່ງຮັກດ້ວຍສຸດໃຈແລະດ້ວຍສຸດຈິດແລະດ້ວຍສຸດຄວາມຄິດຂອງເຈົ້າ.”—ມັດທາຍ 22:37.
9. ການຮັບບັບເຕມາ “ໃນນາມຊື່ແຫ່ງ . . . ພະບຸດ” ມີຄວາມໝາຍຢ່າງໃດ?
9 ການຮັບບັບເຕມາ “ໃນນາມຊື່ແຫ່ງ . . . ພະບຸດ” ໝາຍຄວາມວ່າຢ່າງໃດ? ເລື່ອງນີ້ໝາຍເຖິງການຍອມຮັບຊື່, ຖານະຕຳແໜ່ງ, ແລະສິດອຳນາດຂອງພະເຍຊູຄລິດ. ຊື່ພະເຍຊູມີຄວາມໝາຍວ່າ “ພະເຢໂຫວາເປັນຄວາມລອດ.” ພະເຍຊູໄດ້ຮັບຕຳແໜ່ງນີ້ຈາກຄວາມຈິງທີ່ວ່າ ພະອົງເປັນພະບຸດຜູ້ໄດ້ຮັບກຳເນີດອົງດຽວຈາກພະເຈົ້າ ແລະເປັນສິ່ງເນລະມິດສ້າງທຳອິດຂອງພະເຈົ້າ. (ມັດທາຍ 16:16; ໂກໂລດ 1:15, 16) ກ່ຽວກັບພະບຸດອົງນີ້ ໂຢຮັນ 3:16 ບອກເຮົາວ່າ “ພະເຈົ້າໄດ້ຮັກມະນຸດສະໂລກຫຼາຍປານນັ້ນ ຈົນໄດ້ປະທານໃຫ້ພະບຸດອົງດຽວຂອງພະອົງ ເພື່ອຄົນທຸກຄົນທີ່ເຊື່ອໃນພະບຸດນັ້ນຈະບໍ່ຈິບຫາຍ ແຕ່ວ່າຈະມີຊີວິດອັນຕະຫຼອດໄປເປັນນິດ.” ເນື່ອງຈາກພະເຍຊູສິ້ນຊີວິດດ້ວຍຄວາມສັດຊື່ ພະເຈົ້າຈຶ່ງປຸກພະອົງໃຫ້ຟື້ນຄືນຈາກຕາຍ ແລະໄດ້ມອບສິດອຳນາດໃຫ້ພະອົງຕື່ມອີກ. ຕາມທີ່ອັກຄະສາວົກໂປໂລກ່າວ ພະເຈົ້າ “ໄດ້ຍົກຍໍພະອົງຂຶ້ນເຖິງທີ່ສູງສຸດ” ໃນເອກະພົບ ເຊິ່ງເປັນຮອງແຕ່ພະເຢໂຫວາເທົ່ານັ້ນ. ດ້ວຍເຫດນັ້ນ “ຫົວເຂົ່າທຸກອັນ . . . ຈະໄດ້ຄູ້ເຂົ່າລົງໃນນາມຊື່ແຫ່ງພະເຍຊູ ແລະເພື່ອລີ້ນທຸກລີ້ນຈະຍອມກ່າວວ່າພະເຍຊູຄລິດເປັນພະອົງເຈົ້າສຳລັບລັດສະໝີແຫ່ງພະເຈົ້າພະບິດາ.” (ຟີລິບ 2:9-11) ເລື່ອງນີ້ໝາຍເຖິງການເຊື່ອຟັງຄຳສັ່ງຂອງພະເຍຊູ ເຊິ່ງທັງໝົດກໍລ້ວນແຕ່ມາຈາກພະເຢໂຫວານັ້ນເອງ.—ໂຢຮັນ 15:10.
10. ການຮັບບັບເຕມາ “ໃນນາມຊື່ແຫ່ງ . . . ພະວິນຍານບໍລິສຸດ” ມີຄວາມໝາຍຢ່າງໃດ?
10 ການຮັບບັບເຕມາ “ໃນນາມຊື່ແຫ່ງ . . . ພະວິນຍານບໍລິສຸດ” ໝາຍຄວາມວ່າຢ່າງໃດ? ນີ້ໝາຍເຖິງການຍອມຮັບຖານະບົດບາດແລະການດຳເນີນງານຂອງພະວິນຍານບໍລິສຸດ. ພະວິນຍານບໍລິສຸດແມ່ນຫຍັງ? ພະວິນຍາຍບໍລິສຸດແມ່ນພະລັງປະຕິບັດການຂອງພະເຢໂຫວາ ເຊິ່ງພະອົງໃຊ້ເພື່ອເຮັດໃຫ້ພະປະສົງຂອງພະອົງສຳເລັດ. ພະເຍຊູບອກເຫຼົ່າຜູ້ຕິດຕາມພະອົງວ່າ “ເຮົາຈະອ້ອນວອນພະບິດາ ແລະພະບິດາຈະປະທານຜູ້ເລົ້າໂລມອົງໜຶ່ງໃຫ້ແກ່ທ່ານທັງຫຼາຍ . . . ເປັນພະວິນຍານແຫ່ງຄວາມຈິງ.” (ໂຢຮັນ 14:16, 17) ສິ່ງນີ້ຈະຊ່ວຍເຂົາເຈົ້າໃຫ້ເຮັດອັນໃດໄດ້ແດ່? ພະເຍຊູຍັງບອກເຂົາເຈົ້າຕື່ມວ່າ “ພວກທ່ານຈະຮັບອຳນາດແລະຈະເປັນພິຍານຝ່າຍເຮົາໃນເມືອງເຢຣຶຊາເລມ ແລະທົ່ວໄປໃນແຂວງຢູເດ ແລະໃນແຂວງສະມາລີ ແລະໄປເຖິງທີ່ສຸດແຜ່ນດິນໂລກ.” (ກິດຈະການ 1:8) ໂດຍທາງພະວິນຍານບໍລິສຸດພະເຢໂຫວາຍັງດົນໃຈໃຫ້ມີການຂຽນຄຳພີໄບເບິນນຳອີກວ່າ “ຄຳທຳນວາຍບໍ່ໄດ້ມາຈາກນ້ຳໃຈແຫ່ງມະນຸດສັກເທື່ອ ແຕ່ວ່າ ຄົນບໍລິສຸດທັງຫຼາຍຂອງພະເຈົ້າໄດ້ກ່າວແລ້ວ ຕາມພະວິນຍານບໍລິສຸດໄດ້ກະທຳໃຫ້ເຂົາກ່າວນັ້ນ.” (2 ເປໂຕ 1:21) ດ້ວຍເຫດນັ້ນ ເມື່ອເຮົາສຶກສາຄຳພີໄບເບິນເຮົາເອງກໍຍອມຮັບຖານະບົດບາດຂອງພະວິນຍານບໍລິສຸດຄືກັນ. ມີອີກວິທີໜຶ່ງເຊິ່ງສະແດງວ່າເຮົາຍອມຮັບພະວິນຍານບໍລິສຸດ ແມ່ນໂດຍການຂໍພະເຢໂຫວາເພື່ອຊ່ວຍເຮົາໃຫ້ເກີດ “ໝາກແຫ່ງພະວິນຍານ” ເຊິ່ງລວມເອົາ “ຄວາມຮັກ, ຄວາມຍິນດີ, ສັນຕິສຸກ, ຄວາມອົດກັ້ນດົນນານ, ຄວາມກະລຸນາ, ຄວາມດີ, ຄວາມເຊື່ອ, ຄວາມອ່ອນໂຍນ, ການຮູ້ຈັກບັງຄັບຕົນ.”—ຄາລາຊີ 5:22, 23, ລ.ມ.
11. (ກ) ຄວາມໝາຍທີ່ແທ້ຈິງຂອງການຮັບບັບເຕມາໃນສະໄໝຂອງເຮົາແມ່ນໝາຍເຖິງຫຍັງ? (ຂ) ການຮັບບັບເຕມາປຽບເໝືອນການຕາຍແລະການຟື້ນຄືນຈາກຕາຍຢ່າງໃດ?
11 ຄົນຢິວແລະຜູ້ທີ່ປ່ຽນມາຖືສາສະໜາຢິວເປັນກຸ່ມທຳອິດທີ່ໄດ້ຮັບບັບເຕມາຕາມຄຳສັ່ງຂອງພະເຍຊູ ເຊິ່ງເລີ່ມຕົ້ນໃນປີ 33 ສາກົນສັກກະຫຼາດ. ບໍ່ດົນຫຼັງຈາກນັ້ນ ສິດທິພິເສດຂອງການເປັນສາວົກຄລິດສະຕຽນໄດ້ແຜ່ຂະຫຍາຍໄປເຖິງຄົນສະມາລີ. ຕໍ່ມາ ໃນປີ 36 ສາກົນສັກກະຫຼາດ ສິດທິພິເສດນັ້ນໄດ້ແຜ່ຂະຫຍາຍໄປເຖິງຄົນຕ່າງຊາດທີ່ບໍ່ໄດ້ຮັບສິນຕັດ. ກ່ອນຈະຮັບບັບເຕມາ ຊາວສະມາລີແລະຄົນຕ່າງຊາດຕ້ອງອຸທິດຕົວເອງແກ່ພະເຢໂຫວາເພື່ອຈະຮັບໃຊ້ພະອົງໃນຖານະລູກສິດຂອງພະບຸດພະອົງ. ສິ່ງນີ້ກໍຍັງເປັນຄວາມໝາຍທີ່ແທ້ຈິງຂອງການຮັບບັບເຕມາໃນນ້ຳເຊິ່ງສືບຕໍ່ມາຈົນເຖິງສະໄໝຂອງເຮົາ. ການຈຸ່ມຕົວຈົມລົງໃນນ້ຳເປັນສັນຍາລັກທີ່ເໝາະສົມເຊິ່ງຊີ້ບອກເຖິງການອຸທິດຕົວຂອງບຸກຄົນ ເນື່ອງຈາກໃນຄວາມໝາຍເປັນໄນແລ້ວການຮັບບັບເຕມາແມ່ນຄືກັບການຖືກຝັງໄວ້. ການທີ່ເຮົາຖືກຈຸ່ມຕົວຈົມລົງໃນນ້ຳສະແດງວ່າເຮົາໄດ້ຕາຍຈາກແນວທາງຊີວິດແບບເກົ່າຂອງເຮົາ. ການທີ່ເຮົາຂຶ້ນມາຈາກນ້ຳຈຶ່ງເປັນສັນຍາລັກທີ່ສະແດງໃຫ້ເຫັນວ່າ ເຮົາໄດ້ມີຊີວິດໃໝ່ເພື່ອຈະເຮັດຕາມໃຈປະສົງຂອງພະເຈົ້າ. “ບັບເຕມາອັນດຽວ” ນີ້ ໃຊ້ໄດ້ກັບໝົດທຸກຄົນທີ່ກາຍມາເປັນຄລິດສະຕຽນແທ້. ເມື່ອຮັບບັບເຕມາແລ້ວເຂົາເຈົ້າໄດ້ກາຍເປັນຄລິດສະຕຽນພະຍານພະເຢໂຫວາ ຜູ້ຮັບໃຊ້ທີ່ໄດ້ຮັບການແຕ່ງຕັ້ງຈາກພະເຈົ້າ.—ເອເຟດ 4:5; 2 ໂກລິນໂທ 6:3, 4.
12. ການຮັບບັບເຕມາດ້ວຍນ້ຳຂອງຄລິດສະຕຽນກົງກັບຫຍັງ ແລະເປັນເຊັ່ນນັ້ນຢ່າງໃດ?
12 ການຮັບບັບເຕມາແບບນີ້ ມີຄຸນຄ່າຢ່າງຫຼວງຫຼາຍໃນສາຍຕາຂອງພະເຈົ້າສຳລັບການຊ່ວຍໃຫ້ລອດ. ຕົວຢ່າງເຊັ່ນ ພາຍຫຼັງທີ່ກ່າວເຖິງການສ້າງນາວາຂອງໂນເອ ເຊິ່ງໄດ້ຊ່ວຍປົກປ້ອງໂນເອແລະຄອບຄົວໃຫ້ລອດຜ່ານນ້ຳຖ້ວມຄັ້ງໃຫຍ່ນັ້ນ ອັກຄະສາວົກເປໂຕຈຶ່ງຂຽນວ່າ “ອັນນຶ່ງ ນ້ຳນັ້ນເປັນອຸປະມາແກ່ສິນບັບເຕມາ ທີ່ບໍ່ເປັນການຊຳລະລ້າງຂີ້ດຽດແຫ່ງເນື້ອໜັງ ແຕ່ວ່າເປັນການພິຍານແຫ່ງໃຈຮູ້ຜິດແລະຊອບ ເປັນອັນດີຝ່າຍພະເຈົ້າ ແລະສິນບັບເຕມານັ້ນຊ່ອຍທ່ານທັງຫຼາຍດຽວນີ້ ດ້ວຍການຄືນມາຈາກຕາຍແຫ່ງພະເຍຊູຄລິດ.” (1 ເປໂຕ 3:21) ນາວາເປັນຫຼັກຖານທີ່ຊີ້ໃຫ້ເຫັນວ່າ ໂນເອເຮັດວຽກທີ່ໄດ້ຮັບມອບໝາຍຈາກພະເຈົ້າຢ່າງສັດຊື່. ພາຍຫຼັງໄດ້ສ້າງນາວາສຳເລັດແລ້ວ “ໂລກທີ່ຢູ່ໃນເວລານັ້ນໄດ້ຈິບຫາຍດ້ວຍນ້ຳຖ້ວມ.” (2 ເປໂຕ 3:6) ເຖິງຢ່າງນັ້ນກໍຕາມ ໂນເອແລະຄອບຄົວຂອງຕົນ “ຄົນຫມູ່ນ້ອຍແປດຄົນໄດ້ພົ້ນຈາກນ້ຳ.”—1 ເປໂຕ 3:20
13. ໂດຍການຮັບບັບເຕມາໃນນ້ຳ ຄລິດສະຕຽນໄດ້ຮັບການຊ່ວຍໃຫ້ລອດຈາກສິ່ງໃດ?
13 ໃນປັດຈຸບັນນີ້ ຄົນເຫຼົ່ານັ້ນທີ່ອຸທິດຕົວແກ່ພະເຢໂຫວາເທິງພື້ນຖານຂອງຄວາມເຊື່ອໃນພະຄລິດຜູ້ຟື້ນຄືນຈາກຕາຍກໍຮັບບັບເຕມາເພື່ອສະແດງເຖິງການອຸທິດຕົວຂອງຕົນ. ເຂົາເຈົ້າກໍຍັງເຮັດສິ່ງນີ້ທີ່ພະເຈົ້າປະສົງໃນສະໄໝຂອງເຮົາ ແລະກໍຮັບການປົກປ້ອງຈາກໂລກຊົ່ວໃນປັດຈຸບັນອີກ. (ຄາລາຊີ 1:3, 4) ດັ່ງນັ້ນ ເຂົາເຈົ້າບໍ່ໄດ້ມຸ່ງໜ້າໄປສູ່ການທຳລາຍພ້ອມກັບລະບົບຊົ່ວນີ້ ແຕ່ຊ້ຳພັດຈະໄດ້ຮັບການປົກປ້ອງໄວ້ຈາກການທຳລາຍນີ້ ແລະພະເຈົ້າຍັງໃຫ້ເຂົາເຈົ້າມີສະຕິຮູ້ສຶກຜິດຊອບທີ່ດີນຳອີກ. ອັກຄະສາວົກໂຢຮັນຮັບຮອງກັບຜູ້ຮັບໃຊ້ຂອງພະເຈົ້າວ່າ “ໂລກນີ້ ກັບຄວາມຄຶດຢາກໄດ້ຂອງໂລກພວມໄປເສຍ ແຕ່ວ່າຜູ້ທີ່ກະທຳຕາມນ້ຳໃຈແຫ່ງພະເຈົ້າກໍຕັ້ງຢູ່ໄປເປັນນິດ.”—1 ໂຢຮັນ 2:17.
ການດຳເນີນຊີວິດໃຫ້ສົມກັບໜ້າທີ່ຮັບຜິດຊອບຂອງເຮົາ
14. ເປັນຫຍັງການຮັບບັບເຕມາເອງບໍ່ແມ່ນຫຼັກປະກັນສຳລັບຄວາມລອດ?
14 ຄົງຈະບໍ່ຖືກຕ້ອງທີ່ຈະລົງຄວາມເຫັນວ່າ ການຮັບບັບເຕມາພຽງຢ່າງດຽວເປັນສິ່ງຢັ້ງຢືນສຳລັບຄວາມລອດ. ການຮັບບັບເຕມານີ້ ຈະມີຄຸນຄ່າກໍຕໍ່ເມື່ອບຸກຄົນນັ້ນອຸທິດຕົວເອງໃຫ້ກັບພະເຢໂຫວາຢ່າງແທ້ຈິງໂດຍຜ່ານທາງພະເຍຊູຄລິດ ແລະຈາກນັ້ນ ກໍເຮັດຕາມໃຈປະສົງຂອງພະເຈົ້າຢ່າງສັດຊື່ຈົນເຖິງທີ່ສຸດ. “ຜູ້ໃດທີ່ຈະອົດທົນເຖິງທີ່ສຸດ ຜູ້ນັ້ນຈະພົ້ນ.”—ມັດທາຍ 24:13.
15. (ກ) ໃນປັດຈຸບັນນີ້ ອັນໃດແມ່ນໃຈປະສົງຂອງພະເຢໂຫວາສຳລັບຄລິດສະຕຽນທີ່ຮັບບັບເຕມາແລ້ວ? (ຂ) ການເປັນຜູ້ຕິດຕາມພະເຍຊູຄວນມີຄວາມສຳຄັນຢ່າງໃດໃນຊີວິດຂອງເຮົາ?
15 ໃຈປະສົງຂອງພະເຈົ້າສຳລັບພະເຍຊູຍັງລວມເຖິງວິທີທີ່ພະອົງດຳລົງຊີວິດໃນຖານະມະນຸດນຳອີກ. ພະອົງຕ້ອງສະລະຊີວິດເພື່ອເປັນເຄື່ອງບູຊາ. ໃນກໍລະນີຂອງພວກເຮົາ ເຮົາມອບຮ່າງກາຍຂອງເຮົາໃຫ້ແກ່ພະເຈົ້າ ແລະເຮົາດຳເນີນຊີວິດແບບເສຍສະລະໂດຍການເຮັດຕາມໃຈປະສົງຂອງພະອົງ. (ໂລມ 12:1, 2) ເຮົາບໍ່ໄດ້ເຮັດຕາມໃຈປະສົງຂອງພະເຈົ້າຢ່າງແນ່ນອນ ຖ້າບາງຄັ້ງບາງຄາວເຮົາປະພຶດແບບໂລກທີ່ຢູ່ອ້ອມຂ້າງເຮົາ ຫຼືດຳເນີນຊີວິດໂດຍສະແຫວງຫາຜົນປະໂຫຍດສ່ວນຕົວ ແລະຮັບໃຊ້ພະເຈົ້າພຽງແຕ່ເປັນພິທີເທົ່ານັ້ນ. (1 ເປໂຕ 4:1-3; 1 ໂຢຮັນ 2:15, 16) ເມື່ອມີຄົນຢິວຜູ້ໜຶ່ງຖາມວ່າລາວຕ້ອງເຮັດຫຍັງເພື່ອຈະມີຊີວິດຕະຫຼອດໄປ ພະເຍຊູຍອມຮັບວ່າການດຳເນີນຊີວິດທີ່ສະອາດທາງດ້ານສິນລະທຳເປັນສິ່ງສຳຄັນ. ເຖິງແນວນັ້ນກໍຕາມ ພະອົງຊີ້ໃຫ້ເຫັນສິ່ງທີ່ສຳຄັນກວ່ານັ້ນຄື ຕ້ອງເປັນສາວົກຄລິດສະຕຽນ ເຊິ່ງກໍຄືຜູ້ຕິດຕາມພະເຍຊູ. ເລື່ອງນັ້ນຕ້ອງເປັນສິ່ງທີ່ສຳຄັນທີ່ສຸດໃນຊີວິດ. ເລື່ອງນີ້ບໍ່ສາມາດເປັນຮອງຈາກການໃຝ່ຫາສິ່ງຝ່າຍວັດຖຸໄດ້ເລີຍ.—ມັດທາຍ 19:16-21.
16. (ກ) ຄລິດສະຕຽນໝົດທຸກຄົນມີຄວາມຮັບຜິດຊອບຫຍັງກ່ຽວກັບລາຊະອານາຈັກ? (ຂ) ດັ່ງທີ່ສະແດງໃຫ້ເຫັນໃນໜ້າ 116 ແລະ 117 ມີວິທີໃດແດ່ທີ່ຈະເກີດຜົນໃນວຽກງານກ່ຽວກັບເລື່ອງລາຊະອານາຈັກ? (ຄ) ການມີສ່ວນຮ່ວມຢ່າງສິ້ນສຸດຫົວໃຈໃນວຽກງານໃຫ້ຄຳພິຍານ ເປັນຫຼັກຖານເຖິງສິ່ງໃດ?
16 ສິ່ງທີ່ສົມຄວນຈະກ່າວຊ້ຳອີກເທື່ອໜຶ່ງຄືວ່າ ໃຈປະສົງຂອງພະເຈົ້າສຳລັບພະເຍຊູໝາຍລວມເຖິງກິດຈະການທີ່ສຳຄັນຫຼາຍກ່ຽວຂ້ອງກັບລາຊະອານາຈັກຂອງພະເຈົ້າ. ພະເຍຊູຈຶ່ງໄດ້ຮັບການແຕ່ງຕັ້ງໃຫ້ເປັນກະສັດ. ແນວໃດກໍຕາມ ໃນຂະນະທີ່ຢູ່ເທິງແຜ່ນດິນໂລກ ພະອົງຍັງໃຫ້ຄຳພິຍານດ້ວຍໃຈຫ້າວຫັນໃນເລື່ອງລາຊະອານາຈັກ. ເຮົາກໍມີວຽກໃຫ້ຄຳພິຍານແບບດຽວກັນທີ່ຕ້ອງໄດ້ເຮັດ ແລະມີຫຼາຍເຫດຜົນທີ່ຈະມີສ່ວນຮ່ວມໃນວຽກນີ້ຢ່າງສິ້ນສຸດຫົວໃຈ. ໂດຍການເຮັດແບບນີ້ ຊີ້ບອກວ່າເຮົາຮູ້ຄຸນຄ່າຕໍ່ສິດທິສູງສຸດໃນການປົກຄອງຂອງພະເຢໂຫວາ ທັງສະແດງວ່າເຮົາມີຄວາມຮັກຕໍ່ເພື່ອນມະນຸດນຳອີກ. (ມັດທາຍ 22:36-40) ນອກຈາກນັ້ນ ເຮົາກໍຍັງສະແດງໃຫ້ເຫັນອີກວ່າເຮົາເປັນເອກະພາບກັບເພື່ອນຮ່ວມນະມັດສະການທົ່ວໂລກ ເຊິ່ງເຂົາເຈົ້າທັງໝົດເປັນຜູ້ປະກາດລາຊະອານາຈັກຄືກັບເຮົາ. ໂດຍການເປັນເອກະພາບກັນທົ່ວໂລກ ພວກເຮົາພ້ອມກັນກ້າວໜ້າຕໍ່ໆ ໄປສູ່ເປົ້າໝາຍແຫ່ງການມີຊີວິດຕະຫຼອດໄປເທິງແຜ່ນດິນໂລກເຊິ່ງເປັນສ່ວນແຫ່ງລາຊາອານາຈັກນັ້ນ.
ການພິຈາລະນາທົບທວນ
• ມີສິ່ງທີ່ຄ້າຍຄືກັນແລະແຕກຕ່າງກັນແນວໃດລະຫວ່າງການຮັບບັບເຕມາຂອງພະເຍຊູແລະການຮັບບັບເຕມາດ້ວຍນ້ຳໃນປັດຈຸບັນນີ້?
• ການຮັບບັບເຕມາ “ໃນນາມຊື່ແຫ່ງພະບິດາ ແລະພະບຸດ ແລະພະວິນຍານບໍລິສຸດ” ໝາຍຄວາມວ່າຢ່າງໃດ?
• ມີສິ່ງໃດກ່ຽວຂ້ອງໃນການດຳເນີນຊີວິດໃຫ້ສົມກັບຄວາມຮັບຜິດຊອບແຫ່ງການຮັບບັບເຕມາດ້ວຍນ້ຳຂອງຄລິດສະຕຽນ?
[ຮູບພາບໜ້າ 116, 117]
ບາງວິທີໃນການປະກາດເລື່ອງລາຊະອານາຈັກ
ໄປຕາມບ້ານ
ກັບຍາດພີ່ນ້ອງ
ກັບຫມູ່ເຮັດວຽກນຳກັນ
ກັບເພື່ອນນັກຮຽນ
ຕາມຖະໜົນຫົນທາງ
ການກັບໄປຢ້ຽມຢາມຄົນສົນໃຈ
ສຶກສາຄຳພີໄບເບິນຢູ່ຕາມບ້ານ