ບົດຄວາມສຶກສາທີ 7
ຮັບປະໂຫຍດຫຼາຍຂຶ້ນຈາກການອ່ານຄຳພີໄບເບິນ
“ເຈົ້າອ່ານແລ້ວເຂົ້າໃຈຈັ່ງໃດ?”—ລກ. 10:26
ເພງ 97 ຊີວິດເຮົາຕ້ອງອາໄສຄຳສອນຂອງພະເຈົ້າ
ໃຈຄວາມສຳຄັນa
1. ສິ່ງໃດສະແດງໃຫ້ເຫັນວ່າຄຳພີໄບເບິນສຳຄັນຕໍ່ພະເຢຊູ?
ລອງຄິດເບິ່ງວ່າ ເຈົ້າຈະຮູ້ສຶກແນວໃດຖ້າໄດ້ມີໂອກາດຟັງສິ່ງທີ່ພະເຢຊູສອນ. ພະເຢຊູຈື່ຂໍ້ພະຄຳພີໄດ້ດີຫຼາຍແລະມັກຍົກຄຳເວົ້າມາຈາກພະຄຳພີ. ຄຳເວົ້າທຳອິດຫຼັງຈາກທີ່ເພິ່ນຮັບບັບເຕມາແລະຄຳເວົ້າສຸດທ້າຍຕອນທີ່ເພິ່ນໃກ້ຈະຕາຍເພິ່ນກໍຍົກມາຈາກພະຄຳພີ.b (ພບຍ. 8:3; ເພງ. 31:5; ລກ. 4:4; 23:46) ໄລຍະ 3 ປີເຄິ່ງທີ່ເພິ່ນຮັບໃຊ້ຢູ່ໂລກນີ້ ເພິ່ນມັກຈະຍົກຄຳເວົ້າມາຈາກພະຄຳພີ ອ່ານ ແລະອະທິບາຍໃຫ້ຄົນອື່ນຟັງ.—ມທ. 5:17, 18, 21, 22, 27, 28; ລກ. 4:16-20
ຕະຫຼອດຊີວິດຂອງພະເຢຊູ ເພິ່ນສະແດງໃຫ້ເຫັນວ່າເພິ່ນຮັກພະຄຳພີແລະເອົາສິ່ງທີ່ໄດ້ຮຽນໄປໃຊ້ໃນຊີວິດ (ເບິ່ງຂໍ້ 2)
2. ອັນໃດຊ່ວຍພະເຢຊູໃຫ້ຮູ້ຈັກພະຄຳພີເປັນຢ່າງດີເມື່ອເພິ່ນໃຫຍ່ຂຶ້ນ? (ເບິ່ງຮູບໜ້າປົກ)
2 ຫຼາຍປີກ່ອນທີ່ພະເຢຊູຈະເລີ່ມເຮັດວຽກຮັບໃຊ້ ເພິ່ນໄດ້ອ່ານແລະໄດ້ຟັງການອ່ານພະຄຳພີເປັນປະຈຳ. ຕອນຢູ່ເຮືອນ ເພິ່ນຄືຊິໄດ້ຍິນມາຣີແລະໂຢເຊັບຍົກພະຄຳພີມາເວົ້າຕອນທີ່ລົມກັນໃນຄອບຄົວ.c (ພບຍ. 6:6, 7) ເຮົາໝັ້ນໃຈວ່າພະເຢຊູໄດ້ໄປບ່ອນປະຊຸມຂອງຄົນຢິວກັບຄອບຄົວທຸກໆວັນຊະບາໂຕ. (ລກ. 4:16) ຕອນທີ່ຢູ່ຫັ້ນ ເພິ່ນຄືຊິຕັ້ງໃຈຟັງຕອນທີ່ມີການອ່ານພະຄຳພີ. ຕໍ່ມາເພິ່ນກໍໄດ້ຮຽນທີ່ຈະອ່ານພະຄຳພີດ້ວຍໂຕເອງ. ນີ້ຈຶ່ງເຮັດໃຫ້ພະເຢຊູບໍ່ພຽງແຕ່ຮູ້ຈັກພະຄຳພີເປັນຢ່າງດີເທົ່ານັ້ນ ແຕ່ເພິ່ນຮັກພະຄຳພີແລະເອົາສິ່ງທີ່ໄດ້ຮຽນໄປໃຊ້ໃນຊີວິດນຳ. ຕົວຢ່າງເຊັ່ນ: ຂໍໃຫ້ຄິດເຖິງຕອນທີ່ພະເຢຊູໄປວິຫານຕອນອາຍຸ 12 ປີ. ພວກອາຈານທີ່ຮູ້ຈັກກົດໝາຍຂອງໂມເຊເປັນຢ່າງດີ “ຮູ້ສຶກງຶດງໍ້ແທ້ໆທີ່ເຫັນວ່າ [ພະເຢຊູ] ເຂົ້າໃຈແລະຕອບໄດ້ດີຫຼາຍ.”—ລກ. 2:46, 47, 52
3. ເຮົາຈະຮຽນຫຍັງໃນບົດຄວາມນີ້?
3 ເຮົາກໍຮູ້ຈັກແລະຮັກຄຳພີໄບເບິນໄດ້ຖ້າເຮົາອ່ານເປັນປະຈຳ. ແລ້ວເຮົາຈະໄດ້ຮັບປະໂຫຍດຫຼາຍທີ່ສຸດຈາກການອ່ານຄຳພີໄບເບິນໄດ້ແນວໃດ? ເຮົາສາມາດຮຽນຈາກສິ່ງທີ່ພະເຢຊູເວົ້າກັບຜູ້ທີ່ຮູ້ຈັກກົດໝາຍຂອງໂມເຊເປັນຢ່າງດີ ເຊັ່ນ: ພວກຄູສອນສາສະໜາ ພວກຟາຣິຊາຍ ແລະພວກຊາດູກາຍ. ພວກຄູສອນສາສະໜາເຫຼົ່ານີ້ອ່ານພະຄຳພີເປັນປະຈຳ ແຕ່ບໍ່ໄດ້ຮັບປະໂຫຍດຈາກສິ່ງທີ່ເຂົາເຈົ້າອ່ານ. ພະເຢຊູເວົ້າເຖິງສາມສິ່ງທີ່ເຮົາຄວນເຮັດເພື່ອຈະໄດ້ຮັບປະໂຫຍດຫຼາຍຂຶ້ນເມື່ອອ່ານຄຳພີໄບເບິນ ເຊິ່ງຄົນສາມກຸ່ມນັ້ນບໍ່ໄດ້ເຮັດ. 3 ສິ່ງນັ້ນກໍຄື: (1) ເຂົ້າໃຈສິ່ງທີ່ອ່ານ (2) ໄດ້ບົດຮຽນທີ່ເປັນປະໂຫຍດ ແລະ (3) ໃຫ້ຄຳພີໄບເບິນມີຜົນຕໍ່ຊີວິດຂອງເຮົາ.
ເຂົ້າໃຈສິ່ງທີ່ອ່ານ
4. ລູກາ 10:25-29 ສອນຫຍັງເຮົາເລື່ອງການອ່ານຄຳພີໄບເບິນ?
4 ຖ້າເຮົາບໍ່ເຂົ້າໃຈສິ່ງທີ່ອ່ານໃນຄຳພີໄບເບິນ ເຮົາກໍຈະບໍ່ໄດ້ຮັບປະໂຫຍດຫຼາຍປານໃດ. ຕົວຢ່າງໃນເລື່ອງນີ້ແມ່ນຕອນທີ່ພະເຢຊູເວົ້າກັບ “ຜູ້ຊາຍຄົນໜຶ່ງທີ່ຊ່ຽວຊານກົດໝາຍຂອງໂມເຊ.” (ອ່ານລູກາ 10:25-29) ເມື່ອຜູ້ຊາຍຄົນນັ້ນຖາມພະເຢຊູວ່າ ຕ້ອງເຮັດແນວໃດຈຶ່ງຈະໄດ້ຊີວິດຕະຫຼອດໄປ ພະເຢຊູຈຶ່ງໃຫ້ລາວເບິ່ງພະຄຳພີແລະຖາມລາວວ່າ: “ກົດໝາຍຂອງໂມເຊຂຽນໄວ້ແນວໃດ? ເຈົ້າອ່ານແລ້ວເຂົ້າໃຈຈັ່ງໃດ?” ຜູ້ຊາຍຄົນນັ້ນຕອບໄດ້ງ່າຍໆໂດຍຍົກຂໍ້ຄຳພີທີ່ບອກວ່າ ຕ້ອງຮັກພະເຈົ້າແລະຮັກຄົນອື່ນ. (ລລວ. 19:18; ພບຍ. 6:5) ແຕ່ຂໍສັງເກດສິ່ງທີ່ລາວເວົ້າຕໍ່ໄປ ລາວເວົ້າວ່າ: “ຄົນອື່ນທີ່ຂ້ອຍຕ້ອງຮັກນັ້ນແມ່ນໃຜ?” ເຫັນໄດ້ວ່າ ລາວບໍ່ໄດ້ເຂົ້າໃຈສິ່ງທີ່ໄດ້ອ່ານແທ້ໆ. ດັ່ງນັ້ນ ລາວຈຶ່ງບໍ່ຮູ້ວ່າຊິເອົາສິ່ງທີ່ໄດ້ອ່ານໄປໃຊ້ໃນຊີວິດແນວໃດ.
ເຮົາສາມາດຝຶກທີ່ຈະເຂົ້າໃຈສິ່ງທີ່ເຮົາອ່ານຫຼາຍຂຶ້ນໄດ້.
5. ກ່ານອະທິດຖານແລະການອ່ານໃນຈັງຫວະທີ່ຊ້າໆຊ່ວຍໃຫ້ເຂົ້າໃຈຫຼາຍຂຶ້ນແນວໃດ?
5 ເຮົາຈະເຂົ້າໃຈຄຳພີໄບເບິນຫຼາຍຂຶ້ນເມື່ອເຮົາເຮັດບາງຢ່າງຕອນທີ່ອ່ານຄຳພີໄບເບິນ. ການອະທິດຖານ ກ່ອນອ່ານສາມາດຊ່ວຍໄດ້. ເຮົາຕ້ອງໃຫ້ພະເຢໂຫວາຊ່ວຍເພື່ອຈະເຂົ້າໃຈຄຳພີໄບເບິນ. ດັ່ງນັ້ນ ເຮົາສາມາດຂໍພະລັງບໍລິສຸດຈາກເພິ່ນເພື່ອຈະມີສະມາທິ. ຫຼັງຈາກນັ້ນ ໃຫ້ອ່ານໃນຈັງຫວະທີ່ຊ້າໆເພື່ອຈະເຂົ້າໃຈໄດ້ງ່າຍຂຶ້ນ. ອີກສິ່ງໜຶ່ງທີ່ຊ່ວຍໄດ້ກໍຄື ການອ່ານອອກສຽງຫຼືອ່ານໄປພ້ອມກັບສຽງບັນທຶກການອ່ານຄຳພີໄບເບິນ. ຖ້າເຈົ້າທັງໄດ້ຍິນແລະໄດ້ເຫັນສິ່ງທີ່ອ່ານໄປພ້ອມໆກັນ ເຈົ້າກໍຈະເຂົ້າໃຈ ຈື່ ແລະໄດ້ຮັບປະໂຫຍດຫຼາຍຂຶ້ນເມື່ອອ່ານຄຳພີໄບເບິນ. (ຢຊ. 1:8) ເມື່ອເຈົ້າອ່ານຈົບແລ້ວ ໃຫ້ອະທິດຖານອີກເທື່ອໜຶ່ງເພື່ອຂອບໃຈພະເຢໂຫວາທີ່ໃຫ້ມີຄຳພີໄບເບິນ ແລະຂໍເພິ່ນຊ່ວຍເຈົ້າໃຫ້ເອົາສິ່ງທີ່ໄດ້ອ່ານໄປໃຊ້.
ເປັນຫຍັງການຈົດບັນທຶກສັ້ນໆຊ່ວຍເຈົ້າໃຫ້ເຂົ້າໃຈແລະຈື່ສິ່ງທີ່ເຈົ້າອ່ານ? (ເບິ່ງຂໍ້ 6)
6. ການຕັ້ງຄຳຖາມແລະການຈົດບັນທຶກສັ້ນໆຊ່ວຍເຈົ້າແນວໃດຕອນທີ່ເຈົ້າອ່ານ? (ເບິ່ງຮູບພາບ)
6 ຍັງມີຄຳແນະນຳອີກສອງຢ່າງທີ່ຈະຊ່ວຍເຈົ້າໃຫ້ເຂົ້າໃຈຄຳພີໄບເບິນຫຼາຍຂຶ້ນ. ຢ່າງໜຶ່ງກໍຄື ຕັ້ງຄຳຖາມເມື່ອເຈົ້າອ່ານ. ໃຫ້ຖາມຕົວເອງວ່າ: ເລື່ອງທີ່ອ່ານເປັນເລື່ອງກ່ຽວກັບຜູ້ໃດ? ໃຜກຳລັງເວົ້າແລະເວົ້າກັບຜູ້ໃດ? ເປັນຫຍັງລາວຈຶ່ງເວົ້າແນວນັ້ນ? ເລື່ອງນັ້ນເກີດຂຶ້ນຢູ່ໃສແລະເກີດຂຶ້ນເມື່ອໃດ? ຄຳຖາມເຫຼົ່ານີ້ຈະຊ່ວຍເຈົ້າໃຫ້ຮູ້ວ່າຈຸດສຳຄັນຂອງເລື່ອງແມ່ນຫຍັງ. ອີກຢ່າງໜຶ່ງກໍຄື ຈົດບັນທຶກສັ້ນໆ. ເມື່ອເຈົ້າຈົດບັນທຶກເລື່ອງທີ່ເຈົ້າອ່ານ ກໍຈະຊ່ວຍເຈົ້າໃຫ້ຄິດກ່ຽວກັບເລື່ອງນັ້ນແລະເຂົ້າໃຈເລື່ອງນັ້ນຫຼາຍຂຶ້ນ. ການຈົດບັນທຶກຍັງຊ່ວຍເຈົ້າໃຫ້ຈື່ສິ່ງທີ່ອ່ານ. ເຈົ້າອາດຈະຈົດຄຳຖາມຫຼືສິ່ງທີ່ເຈົ້າໄດ້ຈາກການຄົ້ນຄວ້າ ຈົດສະຫຼຸບຈຸດສຳຄັນ ສິ່ງທີ່ເຈົ້າຈະເອົາໄປນຳໃຊ້ ຫຼືຈົດອອກມາວ່າເຈົ້າຮູ້ສຶກແນວໃດກັບສິ່ງທີ່ໄດ້ອ່ານ. ການຈົດບັນທຶກແບບນີ້ຈະຊ່ວຍເຈົ້າໃຫ້ຮູ້ສຶກວ່າ ຄຳພີໄບເບິນຂຽນຂຶ້ນມາເພື່ອເຈົ້າແທ້ໆ.
7. ສິ່ງໜຶ່ງທີ່ເຮົາຕ້ອງມີຕອນທີ່ເຮົາອ່ານຄຳພີໄບເບິນແມ່ນຫຍັງ? ແລະເປັນຫຍັງຕ້ອງມີ? (ມັດທາຍ 24:15)
7 ພະເຢຊູເວົ້າເຖິງສິ່ງທີ່ສຳຄັນອີກຢ່າງໜຶ່ງເພື່ອຈະຊ່ວຍເຮົາໃຫ້ເຂົ້າໃຈຄຳພີໄບເບິນຫຼາຍຂຶ້ນ. ນັ້ນກໍຄື ການຄິດໃຫ້ເລິກເຊິ່ງ. (ອ່ານມັດທາຍ 24:15) ການຄິດໃຫ້ເລິກເຊິ່ງໝາຍຄວາມວ່າແນວໃດ? ຄົນທີ່ຄິດເລິກເຊິ່ງຈະຮູ້ວ່າເລື່ອງທີ່ອ່ານກ່ຽວຂ້ອງກັນແນວໃດ ແລະຕ່າງກັນແນວໃດ ແລະລາວຈະເຂົ້າໃຈແມ່ນແຕ່ເລື່ອງທີ່ບໍ່ໄດ້ບອກໄວ້ຢ່າງຊັດເຈນໃນຄຳພີໄບເບິນ. ຄືກັບທີ່ພະເຢຊູບອກໄວ້ ເຮົາຕ້ອງຄິດໃຫ້ເລິກເຊິ່ງເພື່ອຈະຮູ້ວ່າເຫດການຕ່າງໆເກີດຂຶ້ນແທ້ຕາມຄຳພະຍາກອນໃນຄຳພີໄບເບິນແນວໃດ. ຖ້າເຮົາເຮັດແບບນີ້ ເຮົາກໍຈະໄດ້ຮັບປະໂຫຍດຢ່າງເຕັມທີຈາກສິ່ງທີ່ເຮົາອ່ານໃນຄຳພີໄບເບິນ.
8. ເຮົາຈະອ່ານແລະຄິດຢ່າງເລິກເຊິ່ງແນວໃດ?
8 ພະເຢໂຫວາຊ່ວຍຜູ້ຮັບໃຊ້ຂອງເພິ່ນໃຫ້ມີຄວາມເຂົ້າໃຈທີ່ເລິກເຊິ່ງໄດ້. ດັ່ງນັ້ນ ໃຫ້ເຈົ້າອະທິດຖານຂໍພະເຢໂຫວາຊ່ວຍເຈົ້າໃຫ້ມີສິ່ງນີ້. (ສຸພາ. 2:6) ເຈົ້າຕ້ອງເຮັດຫຍັງແດ່ເພື່ອໃຫ້ສອດຄ່ອງກັບສິ່ງທີ່ເຈົ້າຂໍ? ເຈົ້າຕ້ອງວິເຄາະສິ່ງທີ່ອ່ານຢ່າງລະອຽດ ແລະເບິ່ງວ່າມັນກ່ຽວຂ້ອງແນວໃດກັບສິ່ງທີ່ເຈົ້າຮູ້ຢູ່ແລ້ວ. ເພື່ອຈະຊ່ວຍເຈົ້າໃນເລື່ອງນີ້ ໃຫ້ເຈົ້າຄົ້ນຄວ້າປຶ້ມຕ່າງໆຂອງອົງການ ເຊັ່ນ: ຄູ່ມືຄົ້ນຄວ້າສຳລັບພະຍານພະເຢໂຫວາ. ເຄື່ອງມືນີ້ຈະຊ່ວຍເຈົ້າໃຫ້ຮູ້ວ່າເລື່ອງທີ່ເຈົ້າອ່ານມີຄວາມໝາຍວ່າແນວໃດ ແລະຈະເອົາໄປໃຊ້ໃນຊີວິດແນວໃດ. (ຮຣ. 5:14) ເມື່ອເຈົ້າອ່ານຄຳພີໄບເບິນແລະຄິດຢ່າງເລິກເຊິ່ງ ເຈົ້າກໍຈະເຂົ້າໃຈຄຳພີໄບເບິນຫຼາຍຂຶ້ນເລື້ອຍໆ.
ໄດ້ບົດຮຽນທີ່ເປັນປະໂຫຍດ
9. ພວກຊາດູກາຍເບິ່ງຂ້າມຄວາມຈິງທີ່ສຳຄັນເລື່ອງຫຍັງ?
9 ພວກຊາດູກາຍຮູ້ຈັກພະຄຳພີພາກພາສາເຮັບເຣີ 5 ຫົວທຳອິດເປັນຢ່າງດີ. ແຕ່ເຂົາເຈົ້າເບິ່ງຂ້າມຄວາມຈິງທີ່ສຳຄັນຫຼາຍເລື່ອງໃນປຶ້ມເຫຼົ່ານັ້ນ. ຕົວຢ່າງເຊັ່ນ: ໃຫ້ເຮົາມາເບິ່ງວ່າພະເຢຊູໄດ້ຕອບແນວໃດເມື່ອພວກຊາດູກາຍຖາມເພິ່ນກ່ຽວກັບການຄືນມາຈາກຕາຍ. ເພິ່ນຖາມເຂົາເຈົ້າວ່າ “ເຈົ້າບໍ່ໄດ້ອ່ານໃນປຶ້ມຂອງໂມເຊບໍ ທີ່ພະເຈົ້າເວົ້າກັບລາວຢູ່ຟຸ່ມໜາມວ່າ: ‘ເຮົາເປັນພະເຈົ້າຂອງອັບຣາຮາມ ພະເຈົ້າຂອງອີຊາກ ແລະພະເຈົ້າຂອງຢາໂຄບ’?” (ມຣກ. 12:18, 26) ເຖິງວ່າພວກຊາດູກາຍຈະໄດ້ອ່ານຂໍ້ພະຄຳພີເຫຼົ່ານັ້ນມາຫຼາຍເທື່ອແລ້ວກໍຕາມ ແຕ່ຄຳຖາມຂອງພະເຢຊູສະແດງໃຫ້ເຫັນວ່າເຂົາເຈົ້າເບິ່ງຂ້າມຄວາມຈິງທີ່ສຳຄັນເລື່ອງໜຶ່ງທີ່ຢູ່ໃນຄຳພີໄບເບິນ ນັ້ນກໍຄືຄຳສອນເລື່ອງການຄືນມາຈາກຕາຍ.—ມຣກ. 12:27; ລກ. 20:38d
10. ເຮົາຄວນຕັ້ງໃຈທີ່ຈະເຮັດຫຍັງເມື່ອອ່ານຄຳພີໄບເບິນ?
10 ເຮົາໄດ້ບົດຮຽນຫຍັງ? ເມື່ອເຮົາອ່ານຄຳພີໄບເບິນ ເຮົາຕ້ອງສັງເກດດີໆວ່າຂໍ້ນັ້ນຫຼືເລື່ອງນັ້ນສອນຫຍັງເຮົາ. ເຮົາບໍ່ຢາກເຂົ້າໃຈຄຳສອນງ່າຍໆເທົ່ານັ້ນ ແຕ່ເຮົາຢາກເຂົ້າໃຈຄວາມຈິງແລະຫຼັກການທີ່ແຝງຢູ່ໃນຂໍ້ນັ້ນນຳ ເຊິ່ງເປັນຄືກັບຊັບສົມບັດທີ່ມີຄ່າທີ່ເຊື່ອງໄວ້. ແລະເຮົາຕ້ອງອອກຄວາມພະຍາຍາມຫຼາຍເພື່ອທີ່ຈະໄດ້ຊັບສົມບັດນັ້ນ.
11. ເຈົ້າຈະພົບຄວາມຮູ້ທີ່ມີຄ່າແນວໃດຕອນທີ່ອ່ານຄຳພີໄບເບິນ?
11 ເຈົ້າຈະພົບຄວາມຮູ້ທີ່ມີຄ່າໄດ້ແນວໃດຕອນທີ່ອ່ານຄຳພີໄບເບິນ? ໃຫ້ເຮົາເບິ່ງສິ່ງທີ່ຢູ່ໃນ 2 ຕີໂມທຽວ 3:16, 17 (ອ່ານ) ນຳກັນ. ຂໍ້ນີ້ອ່ານວ່າ “ພະຄຳພີທຸກຕອນມີປະໂຫຍດສຳລັບ” (1) ສອນ (2) ຕັກເຕືອນ (3) ແກ້ໄຂສິ່ງຕ່າງໆໃຫ້ຮຽບຮ້ອຍ ແລະ (4) ສັ່ງສອນ. ເຈົ້າຈະໄດ້ຮັບປະໂຫຍດ 4 ຢ່າງນີ້ຈາກຄຳພີໄບເບິນແທ້ໆແມ່ນແຕ່ໃນປຶ້ມບາງຫົວທີ່ຢູ່ໃນຄຳພີໄບເບິນທີ່ເຈົ້າບໍ່ຄ່ອຍໄດ້ອ່ານ. ໃຫ້ເບິ່ງວ່າເລື່ອງທີ່ອ່ານສອນຫຍັງເຈົ້າກ່ຽວກັບພະເຢໂຫວາ ຄວາມຕ້ອງການຂອງເພິ່ນ ຫຼືກ່ຽວກັບຫຼັກການໃນຄຳພີໄບເບິນ. ໃຫ້ເບິ່ງວ່າຂໍ້ນີ້ຊ່ວຍຕັກເຕືອນເຈົ້າແນວໃດ. ເຈົ້າຈະເຮັດແບບນັ້ນໄດ້ໂດຍເບິ່ງວ່າຂໍ້ຄຳພີນັ້ນຊ່ວຍເຈົ້າໃຫ້ເຫັນຄວາມຄິດແລະນິດໄສທີ່ບໍ່ດີຫຍັງແດ່ ແລະຈະຊ່ວຍເຈົ້າໃຫ້ສັດຊື່ຕໍ່ພະເຢໂຫວາໄດ້ແນວໃດ. ນອກຈາກນັ້ນ ໃຫ້ເບິ່ງວ່າເລື່ອງທີ່ອ່ານຈະຊ່ວຍເຈົ້າໃຫ້ແກ້ໄຂສິ່ງຕ່າງໆໃຫ້ຮຽບຮ້ອຍແນວໃດ ເຊັ່ນ ຊ່ວຍເຈົ້າໃຫ້ຕອບຂໍ້ໂຕ້ແຍ້ງຫຼືຄຳສອນຜິດໆທີ່ເຈົ້າເຈິໃນເຂດປະກາດແນວໃດ. ແລະໃຫ້ເບິ່ງວ່າຂໍ້ນັ້ນມີຄຳສັ່ງສອນຫຍັງທີ່ຊ່ວຍຝຶກເຈົ້າໃຫ້ມີຄວາມຄິດແບບພະເຢໂຫວາ. ເມື່ອເຈົ້າຄິດເຖິງປະໂຫຍດທັງ 4 ຢ່າງນີ້ໄວ້ສະເໝີ ເຈົ້າກໍຈະພົບຄວາມຮູ້ທີ່ມີຄ່າຕອນທີ່ອ່ານຄຳພີໄບເບິນ.
ໃຫ້ຄຳພີໄບເບິນມີຜົນຕໍ່ຊີວິດຂອງເຮົາ
12. ເປັນຫຍັງພະເຢຊູຖາມພວກຟາຣິຊາຍວ່າ “ພວກເຈົ້າບໍ່ໄດ້ອ່ານບໍວ່າ?”
12 ຄຳຖາມທີ່ພະເຢຊູຖາມວ່າ: “ພວກເຈົ້າບໍ່ໄດ້ອ່ານບໍວ່າ?” ຍັງຊ່ວຍໃຫ້ຮູ້ວ່າພວກຟາຣິຊາຍມີຄວາມຄິດທີ່ຜິດໆກ່ຽວກັບສິ່ງທີ່ຢູ່ໃນຄຳພີໄບເບິນ. (ມທ. 12:1-7)e ຕອນນັ້ນພວກຟາຣິຊາຍອ້າງວ່າພວກລູກສິດຂອງພະເຢຊູເຮັດຜິດກົດວັນຊະບາໂຕ. ແລ້ວພະເຢຊູຕອບເຂົາເຈົ້າໂດຍຍົກຕົວຢ່າງສອງເລື່ອງຈາກຄຳພີໄບເບິນແລະຍົກພະຄຳພີຂໍ້ໜຶ່ງຈາກປຶ້ມໂອເຊ ເພື່ອສະແດງໃຫ້ເຫັນວ່າພວກຟາຣິຊາຍບໍ່ເຂົ້າໃຈຈຸດປະສົງຂອງວັນຊະບາໂຕແລະບໍ່ໄດ້ສະແດງຄວາມເມດຕາ. ເປັນຫຍັງເຂົາເຈົ້າອ່ານຄຳພີໄບເບິນແຕ່ບໍ່ໄດ້ໃຫ້ຄຳພີໄບເບິນມີຜົນຕໍ່ຊີວິດຂອງເຂົາເຈົ້າ? ກໍຍ້ອນວ່າເຂົາເຈົ້າເປັນຄົນຍິ່ງແລະຄິດວ່າຄຳແນະນຳໃນຄຳພີໄບເບິນມີໄວ້ສຳລັບຄົນອື່ນ ບໍ່ແມ່ນສຳລັບຕົວເຂົາເຈົ້າເອງ. ນີ້ຈຶ່ງເຮັດໃຫ້ເຂົາເຈົ້າບໍ່ເຂົ້າໃຈສິ່ງທີ່ເຂົາເຈົ້າອ່ານໃນຄຳພີໄບເບິນແທ້ໆ.—ມທ. 23:23; ຢຮ. 5:39, 40
13. ເຮົາຄວນມີຄວາມຄິດແບບໃດຕອນທີ່ອ່ານຄຳພີໄບເບິນ? ແລະຍ້ອນຫຍັງ?
13 ເຮົາໄດ້ບົດຮຽນຈາກຄຳເວົ້າຂອງພະເຢຊູກໍຄື: ເມື່ອເຮົາອ່ານຄຳພີໄບເບິນ ເຮົາຕ້ອງມີຄວາມຄິດທີ່ຖືກຕ້ອງ. ເຮົາບໍ່ຄວນເປັນຄືກັບພວກຟາຣິຊາຍ. ເຮົາຕ້ອງເປັນຄົນຖ່ອມແລະເຕັມໃຈຮຽນຮູ້. ເຮົາຕ້ອງ “ຍອມຮັບຢ່າງອ່ອນນ້ອມເມື່ອພະເຈົ້າປູກຝັງຄຳສອນຂອງພະອົງໄວ້ໃນຕົວ” ເຮົາ. (ຢກບ. 1:21) ຖ້າເຮົາເປັນຄົນອ່ອນນ້ອມຖ່ອມຕົນ ເຮົາກໍຈະຍອມໃຫ້ຄຳພີໄບເບິນມີຜົນຕໍ່ຄວາມຄິດຈິດໃຈຂອງເຮົາ. ເພື່ອຄຳພີໄບເບິນຈະມີຜົນຕໍ່ເຮົາແລະຊ່ວຍເຮົາໃຫ້ເຂົ້າໃຈຄຳສອນໃນເລື່ອງຄວາມເມດຕາ ຄວາມເຫັນອົກເຫັນໃຈແລະຄວາມຮັກ ເຮົາຕ້ອງບໍ່ເປັນຄົນຍິ່ງແລະບໍ່ຄິດວ່າຄຳສອນໃນຄຳພີໄບເບິນມີໄວ້ສຳລັບຄົນອື່ນເທົ່ານັ້ນ.
ເຮົາຈະຮູ້ໄດ້ແນວໃດວ່າ ເຮົາຍອມໃຫ້ຄຳພີໄບເບິນມີຜົນຕໍ່ຊີວິດຂອງເຮົາຫຼືບໍ່? (ເບິ່ງຂໍ້ 14)f
14. ເຮົາຈະຮູ້ໄດ້ແນວໃດວ່າ ເຮົາຍອມໃຫ້ຄຳພີໄບເບິນມີຜົນຕໍ່ຊີວິດຂອງເຮົາຫຼືບໍ່? (ເບິ່ງຮູບພາບ)
14 ວິທີທີ່ເຮົາປະຕິບັດຕໍ່ຄົນອື່ນສະແດງໃຫ້ເຫັນວ່າເຮົາຍອມໃຫ້ຄຳພີໄບເບິນມີຜົນຕໍ່ຊີວິດຂອງເຮົາຫຼືບໍ່. ພວກຟາຣິຊາຍບໍ່ຍອມໃຫ້ຄຳສອນໃນຄຳພີໄບເບິນມີຜົນຕໍ່ຊີວິດຂອງເຂົາເຈົ້າ. ດັ່ງນັ້ນ ເຂົາເຈົ້າຈຶ່ງ “ກ່າວໂທດໃສ່ຄົນທີ່ບໍ່ມີຄວາມຜິດ.” (ມທ. 12:7) ຄ້າຍກັນ ວິທີທີ່ເຮົາເບິ່ງແລະປະຕິບັດຕໍ່ຄົນອື່ນກໍສະແດງໃຫ້ເຫັນວ່າເຮົາຍອມໃຫ້ຄຳພີໄບເບິນມີຜົນຕໍ່ຊີວິດຂອງເຮົາຫຼືບໍ່. ຕົວຢ່າງເຊັ່ນ ເຮົາມັກຊອກຫາຈຸດດີໃນໂຕຄົນອື່ນບໍ ຫຼືເຮົາມັກຈັບຜິດຄົນອື່ນ? ເຮົາເປັນຄົນເມດຕາແລະພ້ອມທີ່ຈະໃຫ້ອະໄພຄົນອື່ນບໍ ຫຼືເຮົາມັກວິພາກວິຈານຄົນອື່ນແລະເກັບຄວາມຄຽດໄວ້? ຄຳຕອບຂອງເຮົາຈະຊ່ວຍໃຫ້ຮູ້ວ່າເຮົາໃຫ້ສິ່ງທີ່ເຮົາອ່ານມີຜົນຕໍ່ຄວາມຄິດ ຄວາມຮູ້ສຶກແລະການກະທຳຂອງເຮົາຫຼືບໍ່.—1ຕມ. 4:12, 15; ຮຣ. 4:12
ການອ່ານຄຳພີໄບເບິນເຮັດໃຫ້ມີຄວາມສຸກ
15. ພະເຢຊູຮູ້ສຶກແນວໃດກັບຄຳພີໄບເບິນ?
15 ພະເຢຊູຮັກຄຳພີໄບເບິນຫຼາຍ ແລະເພິ່ນຮູ້ສຶກຄືກັບຄຳພະຍາກອນທີ່ຢູ່ໃນຄຳເພງ 40:8, ລ.ມ. ທີ່ບອກວ່າ “ພະເຈົ້າຂອງຂ້ອຍ ຂ້ອຍມີຄວາມສຸກຫຼາຍທີ່ໄດ້ເຮັດຕາມຄວາມຕ້ອງການຂອງພະອົງ ແລະກົດໝາຍຂອງພະອົງກໍຢູ່ໃນໃຈຂອງຂ້ອຍສະເໝີ.” ຍ້ອນພະເຢຊູຮັກຄຳພີໄບເບິນ ເພິ່ນຈຶ່ງມີຄວາມສຸກແລະຮັບໃຊ້ພະເຢໂຫວາຕໍ່ໆໄປ. ເຮົາກໍຄືກັນ ເຮົາສາມາດມີຄວາມສຸກແລະຮັບໃຊ້ພະເຢໂຫວາຕໍ່ໆໄປໄດ້ ຖ້າເຮົາອ່ານແລະຮັກຄຳພີໄບເບິນ.—ເພງ. 1:1-3
16. ເຈົ້າຈະເຮັດຫຍັງແດ່ເພື່ອຈະໄດ້ຮັບປະໂຫຍດຫຼາຍທີ່ສຸດຈາກການອ່ານຄຳພີໄບເບິນ? (ເບິ່ງຂອບ “ຄຳເວົ້າຂອງພະເຢຊູຊ່ວຍເຈົ້າໃຫ້ເຂົ້າໃຈສິ່ງທີ່ໄດ້ອ່ານ”)
16 ຈາກຄຳເວົ້າແລະຕົວຢ່າງຂອງພະເຢຊູ ເຮັດໃຫ້ເຮົາຢາກປັບປຸງການອ່ານຄຳພີໄບເບິນຂອງເຮົາໃຫ້ດີຂຶ້ນ. ເຮົາຈະເຂົ້າໃຈຄຳພີໄບເບິນຫຼາຍຂຶ້ນຖ້າເຮົາອະທິດຖານ ອ່ານໃນຈັງຫວະທີ່ຊ້າໆ ຕັ້ງຄຳຖາມ ແລະຈົດບັນທຶກສັ້ນໆ. ເຮົາຈະເຂົ້າໃຈຄຳພີໄບເບິນຫຼາຍຂຶ້ນໄດ້ໂດຍວິເຄາະສິ່ງທີ່ເຮົາອ່ານຢ່າງລະອຽດແລະຄົ້ນຄວ້າໂດຍໃຊ້ປຶ້ມຕ່າງໆຂອງອົງການ. ເຮົາຈະໄດ້ຮັບປະໂຫຍດຈາກຄຳພີໄບເບິນຫຼາຍຂຶ້ນໂດຍຝຶກທີ່ຈະຊອກຫາຄວາມຮູ້ທີ່ມີຄ່າທີ່ແຝງຢູ່ໃນເລື່ອງທີ່ເຮົາອ່ານ ແມ່ນແຕ່ບາງເລື່ອງໃນຄຳພີໄບເບິນທີ່ເຮົາບໍ່ຄ່ອຍຄຸ້ນເຄີຍ. ແລະເຮົາຈະໃຫ້ຄຳພີໄບເບິນມີຜົນຕໍ່ຊີວິດຂອງເຮົາໂດຍມີຄວາມຄິດທີ່ຖືກຕ້ອງຕອນທີ່ອ່ານ. ຖ້າເຮົາເຮັດຕາມຄຳແນະນຳທັງໝົດນີ້ ເຮົາກໍຈະໄດ້ຮັບປະໂຫຍດຫຼາຍທີ່ສຸດຈາກການອ່ານຄຳພີໄບເບິນແລະເຮົາຈະສະໜິດກັບພະເຢໂຫວາຫຼາຍຂຶ້ນ.—ເພງ. 119:17, 18; ຢກບ. 4:8
ເພງ 95 ແສງສະຫວ່າງທີ່ແຮງກ້າຂຶ້ນ
a ເຮົາທຸກຄົນທີ່ນະມັດສະການພະເຢໂຫວາພະຍາຍາມອ່ານຄຳພີໄບເບິນທຸກມື້. ຄົນທົ່ວໄປກໍອ່ານຄຳພີໄບເບິນຄືກັນ ແຕ່ບໍ່ຄ່ອຍເຂົ້າໃຈສິ່ງທີ່ອ່ານປານໃດ. ຄົນໃນສະໄໝຂອງພະເຢຊູກໍເປັນແບບນັ້ນຄືກັນ. ເມື່ອເຮົາເບິ່ງສິ່ງທີ່ພະເຢຊູເວົ້າກັບຄົນທີ່ອ່ານຄຳພີໄບເບິນໃນສະໄໝຂອງເພິ່ນ ເຮົາຈະໄດ້ຮຽນຮູ້ສິ່ງທີ່ຈະຊ່ວຍເຮົາໃຫ້ໄດ້ຮັບປະໂຫຍດຫຼາຍຂຶ້ນຈາກການອ່ານຄຳພີໄບເບິນ.
b ຕອນທີ່ພະເຢຊູຮັບບັບເຕມາແລະໄດ້ຖືກເຈີມດ້ວຍພະລັງບໍລິສຸດ ພະເຢໂຫວາກໍໄດ້ເຮັດໃຫ້ຄວາມຊົງຈຳຂອງເພິ່ນຕອນທີ່ຢູ່ໃນສະຫວັນກັບຄືນມາ.—ມທ. 3:16
c ມາຣີຮູ້ຈັກພະຄຳພີເປັນຢ່າງດີ ແລະລາວມັກເວົ້າເຖິງຂໍ້ຄຳພີຫຼາຍຂໍ້. (ລກ. 1:46-55) ໂຢເຊັບແລະມາຣີອາດບໍ່ມີເງິນພຽງພໍທີ່ຈະຊື້ພະຄຳພີເປັນຂອງຕົວເອງ. ດັ່ງນັ້ນ ເພື່ອທີ່ເຂົາເຈົ້າຈະຈື່ຂໍ້ຄຳພີໄດ້ ເຂົາເຈົ້າຕ້ອງຕັ້ງໃຈຟັງເມື່ອມີການອ່ານພະຄຳພີຢູ່ບ່ອນປະຊຸມຂອງຄົນຢິວ.
d ເບິ່ງບົດຄວາມທີ່ຊື່ວ່າ “ຈົ່ງໃກ້ຊິດພະເຈົ້າ—‘ພະອົງ . . . ເປັນພະເຈົ້າຂອງຄົນເປັນ’” ໃນຫໍສັງເກດການສະບັບ 1 ກຸມພາ 2013. (ພາສາໄທ)
e ໃຫ້ເບິ່ງມັດທາຍ 19:4-6 ເຊິ່ງເປັນອີກຂໍ້ໜຶ່ງທີ່ພະເຢຊູໃຊ້ຄຳຖາມແບບດຽວກັນຖາມພວກຟາຣິຊາຍທີ່ວ່າ “ພວກເຈົ້າບໍ່ໄດ້ອ່ານບໍວ່າ?” ເຖິງວ່າພວກຟາຣິຊາຍຈະໄດ້ອ່ານເລື່ອງການສ້າງຂອງພະເຈົ້າ ແຕ່ເຂົາເຈົ້າກໍບໍ່ໄດ້ເຂົ້າໃຈຄຳສອນຂອງພະເຈົ້າເລື່ອງການແຕ່ງດອງ.
f ຄຳອະທິບາຍຮູບພາບ: ຕອນທີ່ກຳລັງປະຊຸມ ພີ່ນ້ອງຊາຍທີ່ຊ່ວຍຄຸມພາບແລະສຽງໄດ້ເຮັດຜິດພາດຫຼາຍເທື່ອ. ແຕ່ຫຼັງຈາກເລີກປະຊຸມ ພີ່ນ້ອງໄດ້ຊົມເຊີຍຄວາມພະຍາຍາມຂອງລາວແທນທີ່ຈະຕຳໜິລາວ.