ບົດສິບແປດ
“ເຂົາບໍ່ເປັນຝ່າຍໂລກ”
1. (ກ) ກ່ອນຈະສິ້ນຊີວິດ ພະເຍຊູອະທິດຖານເພື່ອເຫຼົ່າສາວົກຂອງພະອົງຢ່າງໃດ? (ຂ) ດ້ວຍເຫດໃດການ “ບໍ່ເປັນຝ່າຍໂລກ” ຈຶ່ງສຳຄັນຫຼາຍ?
ໃນຄືນກ່ອນທີ່ຈະສິ້ນຊີວິດ ພະເຍຊູໄດ້ອະທິດຖານເພື່ອເຫຼົ່າສາວົກ. ເນື່ອງຈາກຮູ້ວ່າເຂົາເຈົ້າຈະຕົກຢູ່ໃນຄວາມກົດດັນຢ່າງໜັກໜ່ວງຍ້ອນຊາຕານເປັນຕົ້ນເຫດ ພະເຍຊູຈຶ່ງຂໍກັບພະບິດາວ່າ “ຂ້າພະເຈົ້າບໍ່ຂໍໃຫ້ພະເຈົ້າເອົາເຂົາອອກຈາກໂລກ ແຕ່ວ່າໃຫ້ພະເຈົ້າຮັກສາເຂົາຈາກການຊົ່ວຮ້າຍ. ເຂົາບໍ່ເປັນຝ່າຍໂລກ ເໝືອນດັ່ງຂ້າພະເຈົ້າບໍ່ເປັນຝ່າຍໂລກ.” (ໂຢຮັນ 17:15, 16) ເປັນຫຍັງການແຍກຕ່າງຫາກຈາກໂລກຈຶ່ງສຳຄັນຫຼາຍ? ກໍເພາະວ່າຊາຕານເປັນຜູ້ປົກຄອງຂອງໂລກນີ້. ຄລິດສະຕຽນຈຶ່ງບໍ່ຕ້ອງການກາຍເປັນສ່ວນຂອງໂລກທີ່ຢູ່ພາຍໃຕ້ການຄວບຄຸມຂອງມັນ.—ລືກາ 4:5-8; ໂຢຮັນ 14:30; 1 ໂຢຮັນ 5:19.
2. ພະເຍຊູບໍ່ເປັນຝ່າຍໂລກໃນທາງໃດ?
2 ການບໍ່ເປັນຝ່າຍໂລກບໍ່ໄດ້ໝາຍຄວາມວ່າພະເຍຊູບໍ່ຮັກຄົນອື່ນ. ໃນທາງກົງກັນຂ້າມ ພະອົງປິ່ນປົວຄົນເຈັບປ່ວຍ, ປຸກຄົນຕາຍໃຫ້ກັບຄືນມາຈາກຕາຍ, ແລະສອນປະຊາຊົນກ່ຽວກັບລາຊະອານາຈັກຂອງພະເຈົ້າ. ພະອົງເຮັດເຖິງຂັ້ນໄດ້ສະລະຊີວິດຕົນເອງເພື່ອມະນຸດຊາດ. ແຕ່ ພະອົງບໍ່ມັກທັດສະນະທີ່ບໍ່ເຫຼື້ອມໃສໃນພະເຈົ້າ ແລະການກະທຳຂອງຄົນເຫຼົ່ານັ້ນທີ່ສະແດງນ້ຳໃຈແບບໂລກຂອງຊາຕານ. ດ້ວຍເຫດນັ້ນ ພະອົງຈຶ່ງເຕືອນໃຫ້ລະວັງສິ່ງຕ່າງໆ ເຊັ່ນ ຄວາມປາຖະໜາທີ່ຜິດສິນລະທຳ, ແນວທາງຊີວິດທີ່ນິຍົມວັດຖຸ, ແລະການສະແຫວງຫາຊື່ສຽງທີ່ໂດ່ງດັງ. (ມັດທາຍ 5:27, 28; 6:19-21; ລືກາ 20:46, 47) ບໍ່ແປກທີ່ພະເຍຊູຍັງໄດ້ຫຼີກລ້ຽງການເມືອງຂອງໂລກນຳອີກ. ເຖິງແມ່ນວ່າພະອົງເປັນຄົນຢິວ ພະອົງບໍ່ໄດ້ເຂົ້າຂ້າງຝ່າຍໃດຝ່າຍໜຶ່ງໃນເລື່ອງຄວາມຂັດແຍ່ງທາງການເມືອງລະຫວ່າງພວກໂລມແລະພວກຢິວ.
‘ລາຊະອານາຈັກຂອງເຮົາບໍ່ເປັນແຕ່ໂລກນີ້’
3. (ກ) ພວກຫົວໜ້າສາສະໜາຄົນຢິວໄດ້ແຈ້ງຕໍ່ພີລາດໃນຂໍ້ກ່າວຫາອັນໃດກ່ຽວກັບພະເຍຊູ ແລະເພາະເຫດໃດ? (ຂ) ສິ່ງໃດທີ່ສະແດງວ່າພະເຍຊູບໍ່ມີຄວາມສົນໃຈຈະເປັນກະສັດໃນຖານະມະນຸດ?
3 ຂໍໃຫ້ພິຈາລະນາສິ່ງທີ່ເກີດຂຶ້ນເມື່ອພວກຫົວໜ້າສາສະໜາຄົນຢິວໄດ້ເຮັດໃຫ້ພະເຍຊູຖືກຈັບກຸມ ແລະພາໄປຫາປົນເຊພີລາດ ຜູ້ວ່າການລັດຄົນໂລມ. ທີ່ຈິງ ພວກຫົວໜ້າສາສະໜາເຫຼົ່ານີ້ບໍ່ພໍໃຈເພາະວ່າພະເຍຊູໄດ້ເປີດໂປງຄວາມໜ້າຊື່ໃຈຄົດຂອງເຂົາເຈົ້າ. ເພື່ອໃຫ້ຜູ້ວ່າການລັດຈັດການກັບພະເຍຊູ ເຂົາເຈົ້າຈຶ່ງກ່າວຫາພະເຍຊູໂດຍເວົ້າວ່າ “ພວກຂ້າພະເຈົ້າໄດ້ພົບທ່ານຜູ້ນີ້ພວມຊັກຊວນປະເທດຂອງພວກຂ້າພະເຈົ້າໃຫ້ກະທຳຜິດ [“ກໍ່ການປະຕິວັດ,” ທ.ປ.] ແລະຫ້າມເຂົາບໍ່ໃຫ້ເສຍເງິນສ່ວຍແກ່ກະສັດເຊຊາ ແລະກ່າວວ່າຕົວເອງເປັນພະຄລິດ ເປັນກະສັດ.” (ລືກາ 23:2) ເຫັນໄດ້ຢ່າງຈະແຈ້ງວ່າ ເປັນການຕົວະເພາະໜຶ່ງປີກ່ອນໜ້ານີ້ ຕອນທີ່ປະຊາຊົນຕ້ອງການແຕ່ງຕັ້ງພະເຍຊູໃຫ້ເປັນກະສັດ ພະອົງໄດ້ປະຕິເສດໄປແລ້ວ. (ໂຢຮັນ 6:15) ພະອົງຮູ້ວ່າຕົນເອງຈະໄດ້ເປັນກະສັດທາງພາກສະຫວັນ ໃນອະນາຄົດ. (ລືກາ 19:11, 12) ນອກຈາກນັ້ນ ແມ່ນພະເຢໂຫວາເອງທີ່ຈະແຕ່ງຕັ້ງພະເຍຊູໃຫ້ເປັນກະສັດ ບໍ່ແມ່ນມະນຸດ.
4. ພະເຍຊູມີທັດສະນະແນວໃດຕໍ່ການເສຍພາສີ?
4 ພຽງແຕ່ສາມມື້ກ່ອນທີ່ພະເຍຊູຈະຖືກຈັບກຸມ ພວກຟາລິຊຽນພະຍາຍາມເຮັດໃຫ້ພະເຍຊູກ່າວສິ່ງໃດສິ່ງໜຶ່ງອອກມາເພື່ອຈະກ່າວຫາພະອົງເລື່ອງການເສຍພາສີ. ໃນໂອກາດນັ້ນພະອົງບອກວ່າ “ຈົ່ງເອົາເງິນແຜ່ນໜຶ່ງໃຫ້ເຮົາເບິ່ງເທີ້ນ ເປັນຮູບແລະເປັນໜັງສືຂອງຜູ້ໃດ?” ເມື່ອເຂົາເຈົ້າກ່າວວ່າ “ຂອງກະສັດເຊຊາ” ພະອົງຈຶ່ງຕອບວ່າ “ສິ່ງຂອງກະສັດເຊຊາ ຈົ່ງສົ່ງໃຫ້ຄືນແກ່ກະສັດເຊຊາ ແລະສິ່ງຂອງພະເຈົ້າ ຈົ່ງສົ່ງໃຫ້ຄືນແກ່ພະເຈົ້າເທີ້ນ.”—ລືກາ 20:20-25.
5. (ກ) ໃນຕອນທີ່ພະອົງຖືກຈັບກຸມ ພະເຍຊູສອນບົດຮຽນອັນໃດແກ່ສາວົກ? (ຂ) ພະເຍຊູຊີ້ແຈງເຫດຜົນທີ່ພະອົງເຮັດສິ່ງນັ້ນຢ່າງໃດ? (ຄ) ຜົນຂອງການພິຈາລະນາຄະດີນັ້ນເປັນແນວໃດ?
5 ພະເຍຊູບໍ່ໄດ້ສອນໃຫ້ຂັດຂືນອຳນາດບ້ານເມືອງ. ເມື່ອທະຫານແລະຄົນອື່ນໆ ມາຈັບພະເຍຊູ ເປໂຕໄດ້ຊັກດາບອອກມາຟັນຊາຍຄົນໜຶ່ງແລະຖືກຫູລາວຈົນຂາດ. ຕອນນັ້ນພະເຍຊູບອກວ່າ “ຈົ່ງເອົາດາບຂອງທ່ານໃສ່ໄວ້ໃນຝັກມັນ ເພາະວ່າຄົນທັງປວງທີ່ຖືເອົາດາບຈະຈິບຫາຍດ້ວຍດາບ.” (ມັດທາຍ 26:51, 52) ມື້ຕໍ່ມາພະເຍຊູຈຶ່ງຊີ້ແຈງຕໍ່ພີລາດເຖິງສິ່ງທີ່ພະອົງໄດ້ກະທຳໂດຍກ່າວວ່າ “ແຜ່ນດິນ [“ລາຊະອານາຈັກ,” ລ.ມ.] ຂອງເຮົາບໍ່ເປັນແຕ່ໂລກນີ້ ຖ້າແຜ່ນດິນຂອງເຮົາເປັນແຕ່ໂລກນີ້ ພວກຂ້າໃຊ້ຂອງເຮົາຈະໄດ້ເລວເສິກແລ້ວ ເພື່ອບໍ່ໃຫ້ເຮົາເປັນທີ່ມອບໄວ້ແກ່ພວກຢູເດ.” (ໂຢຮັນ 18:36) ພີລາດຍອມຮັບວ່າ “ເຮົາບໍ່ໄດ້ເຫັນການໂທດຫຼວງ” ໃນຂໍ້ທີ່ພວກເຂົາຍົກຂຶ້ນມາກ່າວຫາພະເຍຊູ. ແຕ່ຍ້ອນຖືກບີບບັງຄັບຈາກຝູງຊົນ ພີລາດຈຶ່ງສັ່ງໃຫ້ເອົາພະເຍຊູໄປຕອກໃສ່ຫຼັກທໍລະມານ.—ລືກາ 23:13-15; ໂຢຮັນ 19:12-16.
ເຫຼົ່າສາວົກຕິດຕາມການນຳຂອງພະເຍຊູ
6. ຄລິດສະຕຽນໃນສະຕະວັດທຳອິດສະແດງໃຫ້ເຫັນຢ່າງໃດວ່າເຂົາເຈົ້າຫຼີກລ້ຽງແນວຄວາມຄິດແບບໂລກ ແຕ່ວ່າພັດຮັກປະຊາຊົນ?
6 ບາດນີ້ ເຫຼົ່າສາວົກຂອງພະເຍຊູໄດ້ເຂົ້າໃຈເຖິງຂໍ້ຮຽກຮ້ອງໃນການບໍ່ເປັນສ່ວນຂອງໂລກ. ນັ້ນກໍໝາຍເຖິງການຫຼີກລ້ຽງແນວຄິດທີ່ບໍ່ເຫຼື້ອມໃສໃນພະເຈົ້າແລະການກະທຳແບບໂລກ ເຊິ່ງລວມເຖິງການບັນເທີງທີ່ຮຸນແຮງແລະຜິດສິນລະທຳໃນໂຮງລະຄອນແລະໂຮງມະຫໍລະສົບຂອງພວກໂລມ. ຍ້ອນແນວນັ້ນ ເຫຼົ່າສາວົກຈຶ່ງຖືກເອີ້ນວ່າເປັນຜູ້ກຽດຊັງມະນຸດຊາດ. ແທນທີ່ຈະກຽດຊັງມວນມະນຸດ ເຂົາເຈົ້າພັດເຮັດວຽກໜັກເພື່ອຊ່ວຍຄົນອື່ນໃຫ້ໄດ້ຮັບປະໂຫຍດຈາກການຈັດຕຽມຂອງພະເຈົ້າເພື່ອຄວາມລອດ.
7. (ກ) ເນື່ອງຈາກບໍ່ເປັນຝ່າຍໂລກ ສາວົກໃນສະຕະວັດທຳອິດໄດ້ປະສົບກັບສິ່ງໃດແດ່? (ຂ) ເຂົາເຈົ້າມີທັດສະນະຕໍ່ຜູ້ປົກຄອງທາງການເມືອງແລະການເສຍພາສີຢ່າງໃດ ແລະເພາະເຫດໃດ?
7 ຜູ້ຕິດຕາມພະເຍຊູກໍຖືກຂົ່ມເຫງແບບດຽວກັບທີ່ພະອົງຖືກ ເຊິ່ງຫຼາຍຄັ້ງເກີດຈາກການທີ່ເຈົ້າໜ້າທີ່ລັດຖະບານໄດ້ຂໍ້ມູນແບບຜິດໆ. ເຖິງແນວນັ້ນກໍຕາມ ປະມານປີ 56 ສາກົນສັກກະຫຼາດ ອັກຄະສາວົກໂປໂລໄດ້ຂຽນໜັງສືເຖິງຄລິດສະຕຽນໃນເມືອງໂລມເພື່ອບອກເຂົາເຈົ້າໃຫ້ “ຍອມຢູ່ໃຕ້ບັງຄັບຜູ້ມີອຳນາດທັງເທິງເຂົາ [ຜູ້ປົກຄອງບ້ານເມືອງ] ເຫດວ່າອຳນາດບໍ່ມີເວັ້ນໄວ້ມາແຕ່ພະເຈົ້າ.” ເລື່ອງນີ້ບໍ່ໄດ້ໝາຍຄວາມວ່າພະເຢໂຫວາຈັດຕັ້ງລັດຖະບານຕ່າງໆ ຝ່າຍໂລກ ແຕ່ພະອົງອະນຸຍາດໃຫ້ລັດຖະບານເຫຼົ່ານີ້ປົກຄອງຕໍ່ໄປຈົນກວ່າລາຊະອານາຈັກຂອງພະອົງຈະເປັນລັດຖະບານດຽວທີ່ປົກຄອງທົ່ວແຜ່ນດິນໂລກ. ເປັນເລື່ອງເໝາະສົມທີ່ໂປໂລບອກຄລິດສະຕຽນໃຫ້ນັບຖືເຈົ້າໜ້າທີ່ບ້ານເມືອງແລະເສຍພາສີ.—ໂລມ 13:1-7; ຕິໂຕ 3:1, 2.
8. (ກ) ຄລິດສະຕຽນຕ້ອງຍອມຢູ່ໃຕ້ອຳນາດທີ່ສູງກວ່າເຖິງຂັ້ນໃດ? (ຂ) ຄລິດສະຕຽນໃນສະຕະວັດທຳອິດຕິດຕາມຕົວຢ່າງຂອງພະເຍຊູຢ່າງໃດ?
8 ແນວໃດກໍຕາມ ການຍອມຢູ່ໃຕ້ອຳນາດຜູ້ປົກຄອງບ້ານເມືອງນັ້ນມີຂອບເຂດຈຳກັດ. ເມື່ອມີຂໍ້ຂັດກັນລະຫວ່າງກົດໝາຍຂອງພະເຈົ້າກັບກົດໝາຍຂອງມະນຸດ ແນ່ນອນຄົນເຫຼົ່ານັ້ນທີ່ຮັບໃຊ້ພະເຢໂຫວາຈະເຊື່ອຟັງກົດໝາຍຂອງພະອົງ. ຂໍໃຫ້ສັງເກດສິ່ງທີ່ໜັງສືການເດີນທາງສູ່ຄວາມສິວິໄລ—ແງ່ໜຶ່ງຂອງປະຫວັດສາດໂລກ (ພາສາອັງກິດ) ໄດ້ບັນທຶກກ່ຽວກັບຄລິດສະຕຽນໃນຍຸກທຳອິດວ່າ “ຄລິດສະຕຽນປະຕິເສດທີ່ຈະຮ່ວມຮັບໜ້າທີ່ບາງຢ່າງແບບພົນລະເມືອງໂລມເຮັດ. ຄລິດສະຕຽນ . . . ສຳນຶກວ່າການເຂົ້າເປັນທະຫານແມ່ນເປັນການຂັດກັບຄວາມເຊື່ອຂອງເຂົາເຈົ້າ. ເຂົາເຈົ້າບໍ່ຮັບໜ້າທີ່ທາງການເມືອງ. ເຂົາເຈົ້າບໍ່ນະມັດສະການຈອມຈັກກະພັດ.” ເມື່ອສານສູງຂອງພວກຢິວ ‘ສັ່ງຫ້າມດ້ວຍແຂງແຮງແທ້’ ຫຼືອອກຄຳສັ່ງເດັດຂາດໃຫ້ພວກສາວົກເຊົາປະກາດ ເຂົາເຈົ້າຕອບວ່າ “ພວກຂ້າພະເຈົ້າຈຳຕ້ອງຟັງພະເຈົ້າຫຼາຍກວ່າຟັງມະນຸດ.”—ກິດຈະການ 5:27-29.
9. (ກ) ໃນປີ 66 ສາກົນສັກກະຫຼາດ ເປັນຫຍັງຄລິດສະຕຽນຈຶ່ງໜີອອກຈາກເມືອງເຢຣຶຊາເລມ? (ຂ) ເລື່ອງນີ້ເປັນບົດຮຽນທີ່ມີຄຸນຄ່າໃນທາງໃດ?
9 ໃນເລື່ອງຄວາມຂັດແຍ່ງທາງດ້ານການເມືອງແລະທາງດ້ານການທະຫານ ເຫຼົ່າສາວົກຮັກສາຄວາມເປັນກາງຢ່າງເຄັ່ງຄັດ. ໃນປີ 66 ສາກົນສັກກະຫຼາດ ພວກຢິວໃນແຂວງຢູເດໄດ້ກະບົດຕໍ່ເຊຊາ. ດັ່ງນັ້ນ ກອງທະຫານໂລມຈຶ່ງເຄື່ອນທັບເຂົ້າໄປອ້ອມເມືອງເຢຣຶຊາເລມຢ່າງກະທັນຫັນ. ຄລິດສະຕຽນທີ່ຢູ່ໃນເມືອງໄດ້ເຮັດແນວໃດ? ເຂົາເຈົ້ານຶກເຖິງຄຳແນະນຳຂອງພະເຍຊູທີ່ໃຫ້ໜີອອກຈາກເມືອງທັນທີ. ພາຍຫຼັງທີ່ກອງທັບໂລມຖອນກຳລັງອອກໄປຊົ່ວຄາວ ຄລິດສະຕຽນໄດ້ໜີຂວ້າມແມ່ນ້ຳຢູລະເດນແລ້ວເຂົ້າໄປໃນເຂດພູເຂົາເພລາ. (ລືກາ 21:20-24) ຄວາມເປັນກາງຂອງເຂົາເຈົ້າໄດ້ກາຍເປັນແບບຢ່າງໃຫ້ແກ່ຄລິດສະຕຽນຜູ້ສັດຊື່ໃນຮຸ່ນຕໍ່ມາ.
ຄວາມເປັນກາງຂອງຄລິດສະຕຽນໃນສະໄໝສຸດທ້າຍ
10. (ກ) ພະຍານພະເຢໂຫວາສຸມໃສ່ວຽກງານອັນໃດ ແລະເພາະເຫດໃດ? (ຂ) ເຂົາເຈົ້າເປັນກາງໃນເລື່ອງໃດ?
10 ບັນທຶກທາງປະຫວັດສາດສະແດງໃຫ້ເຫັນວ່າ ໃນສະໄໝສຸດທ້າຍນີ້ມີກຸ່ມທີ່ຮັກສາຄວາມເປັນກາງຢ່າງເຄັ່ງຄັດຕາມແບບຢ່າງຂອງຄລິດສະຕຽນຮຸ່ນທຳອິດບໍ? ມີແທ້ ພະຍານພະເຢໂຫວາໄດ້ເຮັດແນວນັ້ນ. ດັ່ງທີ່ໄດ້ເຫັນຕະຫຼອດໄລຍະສະໄໝສຸດທ້າຍນີ້ ເຂົາເຈົ້າຍັງປະກາດຕໍ່ໄປວ່າລາຊະອານາຈັກຂອງພະເຈົ້າແມ່ນວິທີທາງດຽວທີ່ຈະນຳເອົາສັນຕິພາບອັນຖາວອນ, ຄວາມຈະເລີນຮຸ່ງເຮືອງ, ແລະຄວາມສຸກມາໃຫ້ກັບຜູ້ທີ່ສະແຫວງຫາຄວາມຊອບທຳ. (ມັດທາຍ 24:14) ພ້ອມນີ້ ໃນເລື່ອງຄວາມຂັດແຍ່ງລະຫວ່າງຊາດຕ່າງໆ ເຂົາເຈົ້າໄດ້ຮັກສາຄວາມເປັນກາງຢ່າງເຄັ່ງຄັດ.
11. (ກ) ຄວາມເປັນກາງຂອງພະຍານພະເຢໂຫວາກົງກັນຂ້າມກັບການປະຕິບັດຂອງນັກເທດນັກບວດຢ່າງໃດ? (ຂ) ພະຍານພະເຢໂຫວາມີທັດສະນະຢ່າງໃດຕໍ່ສິ່ງທີ່ຄົນອື່ນເຮັດກ່ຽວກັບເລື່ອງການເມືອງ?
11 ໃນທາງກົງກັນຂ້າມ ບັນດານັກເທດນັກບວດຂອງສາສະໜາຕ່າງໆ ໃນໂລກນີ້ພັດມັກເຂົ້າໄປພົວພັນກັບກິດຈະກຳຫຼາຍຢ່າງທາງການເມືອງ. ໃນບາງປະເທດ ເຂົາເຈົ້າຂົນຂວາຍເພື່ອທີ່ຈະສົ່ງເສີມຫຼືບໍ່ກໍຕໍ່ຕ້ານຜູ້ລົງສະໝັກເລືອກຕັ້ງ. ນັກເທດນັກບວດບາງຄົນຍັງມີຕຳແໜ່ງທາງການເມືອງນຳອີກ. ນອກຈາກນັ້ນ ນັກເທດນັກບວດຄົນອື່ນໆ ຍັງໄດ້ກົດດັນໃຫ້ນັກການເມືອງສະໜັບສະຫນູນໂຄງການຕ່າງໆ ທີ່ຕົນເອງເຫັນດີ. ແນວໃດກໍຕາມ ພະຍານພະເຢໂຫວາບໍ່ຫຍຸ້ງກ່ຽວກັບເລື່ອງການເມືອງ ແລະບໍ່ກໍ່ກວນຜູ້ທີ່ເຂົ້າຮ່ວມພັກການເມືອງ ບໍ່ຍາດຊິງຕຳແໜ່ງທາງການເມືອງ ຫຼືບໍ່ລົງຄະແນນສຽງໃນການເລືອກຕັ້ງ. ເນື່ອງຈາກພະເຍຊູບອກວ່າ ສາວົກຂອງພະອົງບໍ່ເປັນຝ່າຍໂລກ ດັ່ງນັ້ນ ພະຍານພະເຢໂຫວາຈຶ່ງບໍ່ເຂົ້າສ່ວນໃນເລື່ອງການເມືອງ.
12. ເນື່ອງຈາກສາສະໜາຕ່າງໆ ຂອງໂລກບໍ່ເປັນກາງ ຜົນເປັນຢ່າງໃດ?
12 ດັ່ງທີ່ພະເຍຊູໄດ້ບອກລ່ວງໜ້າ ຊາດຕ່າງໆ ໄດ້ເຮັດສົງຄາມຊ້ຳແລ້ວຊ້ຳອີກ ແລະແມ່ນແຕ່ກຸ່ມຕ່າງໆ ພາຍໃນຊາດກໍໄດ້ຕໍ່ສູ້ກັນເອງ. (ມັດທາຍ 24:3, 6, 7) ຫົວໜ້າສາສະໜາມັກສະໜັບສະຫນູນຊາດໜຶ່ງຫຼືກຸ່ມໃດກຸ່ມໜຶ່ງໃຫ້ຕໍ່ສູ້ກັບອີກກຸ່ມໜຶ່ງຢູ່ສະເໝີ ແລະກະຕຸ້ນເຫຼົ່າຜູ້ຕິດຕາມເຂົາເຈົ້າໃຫ້ເຮັດແບບດຽວກັນ. ຜົນເປັນແນວໃດ? ສະມາຊິກຂອງສາສະໜາດຽວກັນຂ້າຟັນກັນເອງໃນສົງຄາມພຽງເພາະຄວາມແຕກຕ່າງທາງດ້ານເຊື້ອຊາດແລະເຜົ່າພັນ. ເລື່ອງນີ້ກົງກັນຂ້າມກັບໃຈປະສົງຂອງພະເຈົ້າ.—1 ໂຢຮັນ 3:10-12; 4:8, 20.
13. ຫຼັກຖານຕ່າງໆ ສະແດງໃຫ້ເຫັນຫຍັງແດ່ກ່ຽວກັບຄວາມເປັນກາງຂອງພະຍານພະເຢໂຫວາ?
13 ຢ່າງໃດກໍຕາມ ພະຍານພະເຢໂຫວາຮັກສາຄວາມເປັນກາງຢ່າງເຄັ່ງຄັດໃນເລື່ອງຄວາມຂັດແຍ່ງທຸກໆ ດ້ານ. ວາລະສານຫໍສັງເກດການ ສະບັບວັນທີ 1 ເດືອນພະຈິກ ປີ 1939 (ພາສາອັງກິດ) ກ່າວວ່າ “ທຸກຄົນທີ່ຢູ່ຝ່າຍອົງພະຜູ້ເປັນເຈົ້າຈະວາງຕົວເປັນກາງໃນຂະນະທີ່ຊາດຕ່າງໆ ຕໍ່ສູ້ກັນ.” ພະຍານພະເຢໂຫວາໃນທຸກດິນແດນແລະໃນທຸກສະພາບການຍັງຍຶດໝັ້ນກັບຖານະເປັນກາງນີ້ຕໍ່ໆ ໄປ. ເຂົາເຈົ້າບໍ່ຍອມໃຫ້ການແບ່ງແຍກທາງການເມືອງຂອງໂລກແລະສົງຄາມຕ່າງໆ ມາທຳລາຍຄວາມເປັນພີ່ນ້ອງແບບນານາຊາດຂອງເຂົາເຈົ້າ. ເຂົາເຈົ້າ “ເອົາດາບທັງຫຼາຍຂອງເຂົາຕີອີກເປັນໝາກສົບ ແລະຫອກທັງຫຼາຍຕີເປັນເຫຼັກກ່ຽວ.” ເນື່ອງຈາກເປັນກາງ ເຂົາເຈົ້າຈຶ່ງບໍ່ສຶກສາການເສິກອີກຕໍ່ໄປ.—ເອຊາອີ 2:3, 4; 2 ໂກລິນໂທ 10:3, 4.
14. ເນື່ອງຈາກຮັກສາຕົວຕ່າງຫາກຈາກໂລກ ພະຍານພະເຢໂຫວາໄດ້ປະສົບກັບສິ່ງໃດ?
14 ຜົນຢ່າງໜຶ່ງເນື່ອງຈາກຄວາມເປັນກາງຂອງເຂົາເຈົ້າແມ່ນຫຍັງ? ພະເຍຊູກ່າວວ່າ ເພາະ “ພວກທ່ານບໍ່ເປັນຂອງໂລກ; . . . ໂລກຈຶ່ງກຽດຊັງພວກທ່ານ.” (ໂຢຮັນ 15:19, ທ.ປ.) ພະຍານພະເຢໂຫວາຫຼາຍຄົນຕິດຄຸກເນື່ອງຈາກເປັນຜູ້ຮັບໃຊ້ພະເຈົ້າ. ບາງຄົນໄດ້ຮັບຄວາມທໍລະມານຫຼືກະທັ່ງຖືກຂ້າ ເຊິ່ງບໍ່ຕ່າງຈາກສິ່ງທີ່ເກີດຂຶ້ນກັບຄລິດສະຕຽນໃນສະຕະວັດທຳອິດ. ນີ້ກໍເພາະວ່າຊາຕານ “ພະຂອງໂລກນີ້” ໄດ້ຕໍ່ຕ້ານຜູ້ຮັບໃຊ້ຂອງພະເຢໂຫວາ ຜູ້ເຊິ່ງບໍ່ຢູ່ຝ່າຍມັນ.—2 ໂກລິນໂທ 4:4; ຄຳປາກົດ 12:12.
15. (ກ) ຊາດຕ່າງໆ ກຳລັງມຸ່ງໜ້າເຂົ້າໄປສູ່ເຫດການຫຍັງ ແລະພະຍານພະເຢໂຫວາລະວັງທີ່ຈະບໍ່ເຮັດສິ່ງໃດ? (ຂ) ເຫດໃດການແຍກຕົວຕ່າງຫາກຈາກໂລກຈຶ່ງເປັນເລື່ອງສຳຄັນແທ້ໆ?
15 ຜູ້ຮັບໃຊ້ຂອງພະເຢໂຫວາມີຄວາມສຸກທີ່ເຂົາເຈົ້າບໍ່ໄດ້ຢູ່ຝ່າຍໂລກນີ້ ເພາະຊາດທັງໝົດກຳລັງມຸ່ງໜ້າໄປສູ່ຈຸດຈົບຂອງເຂົາເຈົ້າໃນສົງຄາມອະລະມະເຄໂດນ. (ດານຽນ 2:44; ຄຳປາກົດ 16:14, 16; 19:11-21) ເຮົາຈະພົ້ນຈາກຄວາມຈິບຫາຍນີ້ເພາະເຮົາຢູ່ຕ່າງຫາກຈາກໂລກ. ໃນຖານະທີ່ເປັນປະຊາຊົນເຊິ່ງເປັນເອກະພາບກັນທົ່ວໂລກ ເຮົາຈຶ່ງຮັກສາຄວາມພັກດີຕໍ່ລາຊະອານາຈັກທາງພາກສະຫວັນຂອງພະເຈົ້າ. ແມ່ນແລ້ວ ໂດຍການຮັກສາຕົວເອງບໍ່ໃຫ້ເປັນສ່ວນຂອງໂລກ ເຮົາເລີຍປະສົບກັບການເຍາະເຍີ້ຍແລະການຂົ່ມເຫງ. ເຖິງແນວນັ້ນກໍຕາມ ໃນອີກບໍ່ດົນສິ່ງເຫຼົ່ານີ້ກໍຈະໝົດໄປ ເພາະໂລກຊົ່ວໃນປັດຈຸບັນທີ່ຢູ່ພາຍໃຕ້ອຳນາດຂອງຊາຕານຈະຖືກທຳລາຍຕະຫຼອດໄປ. ໃນທາງກົງກັນຂ້າມ ສຳລັບຄົນເຫຼົ່ານັ້ນທີ່ຮັບໃຊ້ພະເຢໂຫວາຈະມີຊີວິດຕະຫຼອດໄປໃນໂລກໃໝ່ທີ່ມີຄວາມຊອບທຳພາຍໃຕ້ການຊີ້ນຳແຫ່ງລາຊະອານາຈັກຂອງພະເຈົ້າ.—2 ເປໂຕ 3:10-13; 1 ໂຢຮັນ 2:15-17.
ການພິຈາລະນາທົບທວນ
• ພະເຍຊູສະແດງໃຫ້ເຫັນຢ່າງໃດເຖິງສິ່ງທີ່ກ່ຽວຂ້ອງກັບການ “ບໍ່ເປັນຝ່າຍໂລກ”?
• ຄລິດສະຕຽນໃນສະໄໝທຳອິດມີທັດສະນະຢ່າງໃດຕໍ່ (ກ) ແນວຄວາມຄິດແບບໂລກ, (ຂ) ຜູ້ປົກຄອງບ້ານເມືອງ, ແລະ (ຄ) ການເສຍພາສີ?
• ພະຍານພະເຢໂຫວາໃນສະໄໝປັດຈຸບັນສະແດງໃຫ້ເຫັນຄວາມເປັນກາງຂອງເຂົາເຈົ້າໂດຍວິທີໃດ?
[ຮູບພາບໜ້າ 165]
ພະເຍຊູຊີ້ແຈງວ່າພະອົງເອງແລະເຫຼົ່າສາວົກ “ບໍ່ເປັນຝ່າຍໂລກ”