13. ໂປໂລ​ອະທິບາຍ​ແນວ​ໃດ​ກ່ຽວກັບ​ຕົ້ນກຳເນີດ​ຂອງ​ເອກະພົບ ແລະ​ຄຳເວົ້າ​ຂອງ​ລາວ​ສະແດງ​ໃຫ້​ເຫັນ​ຫຍັງ?

¹³ ພະເຈົ້າ​ໄດ້​ສ້າງ​ເອກະພົບ. ໂປໂລ​ບອກ​ວ່າ: “ພະອົງ​ເປັນ​ພະເຈົ້າ​ທີ່​ສ້າງ​ໂລກ​ແລະ​ທຸກ​ສິ່ງ​ໃນ​ໂລກ ພະອົງ​ບໍ່​ໄດ້​ຢູ່​ໃນ​ວິຫານ​ທີ່​ມະນຸດ​ສ້າງ​ຂຶ້ນ​ເພາະ​ພະອົງ​ເປັນ​ພະເຈົ້າ​ຂອງ​ສະຫວັນ​ແລະ​ໂລກ.”d (ກຈກ. 17:24) ເອກະພົບ​ບໍ່​ໄດ້​ເກີດຂຶ້ນ​ໂດຍ​ບັງເອີນ. ພະເຈົ້າ​ອົງ​ທ່ຽງແທ້​ເປັນ​ຜູ້​ສ້າງ​ທຸກ​ສິ່ງ. (ເພງ. 146:6) ພະເຈົ້າ​ຜູ້​ຍິ່ງໃຫຍ່​ສູງ​ສຸດ​ບໍ່​ໄດ້​ຢູ່​ໃນ​ວິຫານ​ທີ່​ສ້າງ​ດ້ວຍ​ມື​ມະນຸດ ເຊິ່ງ​ຕ່າງ​ຈາກ​ເທບທິດາ​ອະທີນາ​ຫຼື​ເທບ​ພະເຈົ້າ​ອົງ​ອື່ນໆ​ທີ່​ຕ້ອງ​ຢູ່​ໃນ​ວິຫານ ວິຫານ​ຈຳລອງ ຫຼື​ແທ່ນ​ບູຊາ​ເພື່ອ​ຜູ້​ຄົນ​ຈະ​ມາ​ຂາບ​ໄຫວ້​ບູຊາ​ໄດ້. (1ກສ. 8:27) ສິ່ງ​ທີ່​ໂປໂລ​ເວົ້າ​ສະແດງ​ໃຫ້​ເຫັນ​ຢ່າງ​ຈະ​ແຈ້ງ​ວ່າ ພະເຈົ້າ​ອົງ​ທ່ຽງແທ້​ຍິ່ງໃຫຍ່​ກວ່າ​ຮູບ​ບູຊາ​ທີ່​ມີ​ຢູ່​ຕາມ​ວິຫານ​ທີ່​ມະນຸດ​ສ້າງ​ຂຶ້ນ.—ອຊຢ. 40:18-26