ບົດທີ 19
“ປະກາດຕໍ່ໄປຢ່າເຊົາ”
ໂປໂລເຮັດວຽກເພື່ອຫາລ້ຽງຕົວເອງ ແຕ່ລາວກໍໃຫ້ວຽກປະກາດສຳຄັນທີ່ສຸດໃນຊີວິດ
ຈາກກິດຈະການ 18:1-22
1-3. ເປັນຫຍັງອັກຄະສາວົກໂປໂລຈຶ່ງມາຢູ່ເມືອງໂກຣິນໂທ ແລະລາວອາດຈະກັງວົນເລື່ອງຫຍັງແດ່?
ໃນຊ່ວງທ້າຍໆຂອງປີ 50 ອັກຄະສາວົກໂປໂລຢູ່ໃນເມືອງໂກຣິນໂທເຊິ່ງເປັນເມືອງທີ່ລ່ຳລວຍແລະເປັນສູນກາງທາງການຄ້າ. ຄົນກຣີກ ຄົນໂຣມ ແລະຄົນຢິວຈຳນວນຫຼາຍມາອາໄສຢູ່ໃນເມືອງນີ້.a ໂປໂລບໍ່ໄດ້ມາເມືອງໂກຣິນໂທເພື່ອຊື້ຂາຍສິນຄ້າ ຫຼືເພື່ອເຮັດວຽກອາຊີບ ແຕ່ເຫດຜົນສຳຄັນທີ່ລາວມາເມືອງນີ້ກໍເພື່ອປະກາດຂ່າວດີເລື່ອງການປົກຄອງຂອງພະເຈົ້າ. ເຖິງຈະເປັນແບບນັ້ນ ໂປໂລກໍຕ້ອງມີບ່ອນພັກ ແລະລາວຕັ້ງໃຈວ່າຈະບໍ່ຂໍໃຫ້ພີ່ນ້ອງມາຊ່ວຍລາວທາງດ້ານການເງິນ. ໂປໂລບໍ່ຢາກໃຫ້ໃຜຄິດວ່າ ຍ້ອນລາວຮັບໃຊ້ພະເຈົ້າ ຄົນອື່ນຈຶ່ງຕ້ອງມາລ້ຽງລາວ. ແລ້ວໂປໂລເຮັດແນວໃດ?
2 ໂປໂລຮູ້ວິທີເຮັດເຕັ້ນ. ການເຮັດເຕັ້ນບໍ່ແມ່ນວຽກທີ່ງ່າຍໆແຕ່ໂປໂລກໍເຕັມໃຈເຮັດວຽກນີ້ເພື່ອຈະຫາລ້ຽງຕົວເອງ. ລາວຈະຊອກວຽກເຮັດໃນເມືອງທີ່ສັບສົນວຸ່ນວາຍໄດ້ບໍ? ລາວຈະຊອກບ່ອນພັກທີ່ເໝາະສົມໄດ້ບໍ? ເຖິງໂປໂລຈະຄິດເຖິງເລື່ອງເຫຼົ່ານີ້ ແຕ່ລາວກໍບໍ່ລືມວ່າວຽກຫຼັກຂອງລາວແມ່ນວຽກປະກາດ.
3 ໃນທີ່ສຸດ ໂປໂລກໍໄດ້ຢູ່ເມືອງໂກຣິນໂທໄລຍະໜຶ່ງ ແລະວຽກປະກາດທີ່ລາວເຮັດຢູ່ຫັ້ນກໍເກີດຜົນດີຫຼາຍ. ເຮົາໄດ້ຮຽນຫຍັງຈາກສິ່ງທີ່ໂປໂລເຮັດໃນເມືອງໂກຣິນໂທເຊິ່ງຈະຊ່ວຍເຮົາໃຫ້ປະກາດເລື່ອງການປົກຄອງຂອງພະເຈົ້າຢ່າງລະອຽດຖີ່ຖ້ວນໄດ້ໃນເຂດຂອງເຮົາ?
“ພວກເຂົາມີອາຊີບເປັນຊ່າງເຮັດເຕັ້ນຄືກັນ”(ກິດຈະການ 18:1-4)
4, 5. (ກ) ໂປໂລພັກຢູ່ໃສຕອນທີ່ຢູ່ໃນເມືອງໂກຣິນໂທ ແລະລາວເຮັດວຽກອາຊີບຫຍັງ? (ຂ) ໂປໂລອາດມາເປັນຊ່າງເຮັດເຕັ້ນໄດ້ແນວໃດ?
4 ຫຼັງຈາກທີ່ມາຮອດເມືອງໂກຣິນໂທໄລຍະໜຶ່ງ ໂປໂລໄດ້ເຈິຜົວເມຍຄູ່ໜຶ່ງທີ່ມີນ້ຳໃຈ ຜູ້ເປັນຜົວຊື່ ອາກີລາ ເຊິ່ງເປັນຄົນຢິວໂດຍກຳເນີດແລະເມຍຂອງລາວຊື່ ປີຊະກີລາຫຼືປີຊະກາ. ຜົວເມຍຄູ່ນີ້ຍ້າຍມາຢູ່ເມືອງໂກຣິນໂທຍ້ອນຈັກກະພັດກະລາວດີໂອ ສັ່ງ “ຄົນຢິວທຸກຄົນໃຫ້ອອກໄປຈາກເມືອງໂຣມ.” (ກຈກ. 18:1, 2) ອາກີລາກັບປີຊະກີລາບໍ່ພຽງແຕ່ຊວນໂປໂລໃຫ້ພັກຢູ່ນຳເທົ່ານັ້ນ ແຕ່ຍັງຊວນລາວໃຫ້ມາເຮັດວຽກນຳກັນ. ຄຳພີໄບເບິນບອກວ່າ: “ແລ້ວ [ໂປໂລ] ພັກຢູ່ເຮືອນພວກເຂົາແລະເຮັດວຽກນຳກັນ ເພາະພວກເຂົາມີອາຊີບເປັນຊ່າງເຮັດເຕັ້ນຄືກັນ.” (ກຈກ. 18:3) ໂປໂລພັກຢູ່ເຮືອນຂອງຄູ່ຜົວເມຍທີ່ມີນ້ຳໃຈນີ້ຕະຫຼອດໄລຍະທີ່ລາວເຮັດວຽກປະກາດຢູ່ເມືອງໂກຣິນໂທ. ຕອນທີ່ໂປໂລພັກຢູ່ກັບອາກີລາແລະປີຊະກີລາ ລາວອາດຂຽນຈົດໝາຍບາງສະບັບເຊິ່ງຕໍ່ມາໄດ້ກາຍມາເປັນສ່ວນໜຶ່ງຂອງຄຳພີໄບເບິນ.b
5 ເຖິງວ່າໂປໂລຈະເຄີຍ “ຮຽນກັບຄາມາລີເອັນ” ແຕ່ລາວກໍມີອາຊີບເປັນຊ່າງເຮັດເຕັ້ນນຳ. ເປັນໄປໄດ້ແນວໃດ? (ກຈກ. 22:3) ເບິ່ງຄືວ່າຄົນຢິວໃນສະຕະວັດທຳອິດບໍ່ໄດ້ຖືວ່າເປັນເລື່ອງໜ້າອາຍທີ່ຈະສອນວິທີເຮັດວຽກອາຊີບໃຫ້ກັບລູກ ເຖິງວ່າລູກຈະໄດ້ຮັບການສຶກສາເພີ່ມຢູ່ແລ້ວ. ໂປໂລມາຈາກເມືອງຕາໂຊໃນແຂວງກີລີເກຍເຊິ່ງເປັນບ່ອນທີ່ມີຊື່ສຽງໃນເລື່ອງຜ້າຄີລີເຄອຸມ ທີ່ເອົາມາໃຊ້ເຮັດເຕັ້ນ. ໂປໂລຄືຊິໄດ້ຝຶກເຮັດວຽກນີ້ຕອນທີ່ເປັນໄວລຸ້ນ. ຄົນທີ່ເຮັດວຽກນີ້ຕ້ອງຕ່ຳຜ້າເຕັ້ນ ຫຼືບໍ່ກໍຕັດແລະຫຍິບຜ້າທີ່ຫຍາບແລະແຂງເຊິ່ງບໍ່ແມ່ນວຽກທີ່ງ່າຍໆ.
6, 7. (ກ) ໂປໂລເບິ່ງວ່າວຽກເຮັດເຕັ້ນເປັນວຽກແນວໃດ ແລະສິ່ງໃດເຮັດໃຫ້ເຫັນວ່າອາກີລາກັບປີຊະກີລາກໍມີຄວາມຄິດຕໍ່ວຽກອາຊີບຄືກັບໂປໂລ? (ຂ) ຄລິດສະຕຽນໃນປັດຈຸບັນເຮັດຕາມຕົວຢ່າງຂອງໂປໂລແນວໃດ?
6 ໂປໂລບໍ່ໄດ້ເບິ່ງວ່າການເຮັດເຕັ້ນເປັນວຽກຫຼັກຂອງລາວ. ລາວເຮັດວຽກນີ້ກໍເພື່ອຈະຫາລ້ຽງໂຕເອງໄດ້ຕອນທີ່ເຮັດວຽກປະກາດຂ່າວດີ “ໂດຍບໍ່ຄິດຄ່າຕອບແທນ.” (2ກຣ. 11:7) ແລ້ວອາກີລາກັບປີຊະກີລາເບິ່ງວ່າວຽກອາຊີບຂອງເຂົາເຈົ້າເປັນແນວໃດ? ແນ່ນອນວ່າເຂົາເຈົ້າຄືຊິມີຄວາມຄິດຕໍ່ວຽກອາຊີບຄືກັບໂປໂລ. ທີ່ຈິງ ເມື່ອໂປໂລອອກຈາກເມືອງໂກຣິນໂທໃນປີ 52 ອາກີລາກັບປີຊະກີລາກໍໄດ້ເກັບເຄື່ອງຂອງຍ້າຍໄປຢູ່ເມືອງເອເຟໂຊນຳໂປໂລ ແລະມີການໃຊ້ເຮືອນຂອງເຂົາເຈົ້າເປັນບ່ອນປະຊຸມສຳລັບປະຊາຄົມທ້ອງຖິ່ນ. (1ກຣ. 16:19) ຕໍ່ມາ ເຂົາເຈົ້າກໍກັບໄປເມືອງໂຣມ ແລະຫຼັງຈາກນັ້ນກໍກັບມາເມືອງເອເຟໂຊອີກ. ເຂົາເຈົ້າໄດ້ໃຫ້ການປົກຄອງຂອງພະເຈົ້າເປັນອັນດັບທຳອິດແລະທຸ່ມເທຕົວໃນການຮັບໃຊ້ຄົນອື່ນ. ຍ້ອນແນວນີ້ “ທຸກປະຊາຄົມທີ່ເປັນຄົນຕ່າງຊາດ” ຈຶ່ງຮູ້ສຶກຂອບໃຈໃນສິ່ງທີ່ເຂົາເຈົ້າເຮັດ.—ຣມ. 16:3-5; 2ຕມ. 4:19
7 ຄລິດສະຕຽນໃນປັດຈຸບັນກໍເຮັດຕາມຕົວຢ່າງຂອງໂປໂລແລະອາກີລາກັບປີຊະກີລາ. ຜູ້ຮັບໃຊ້ທີ່ມີໃຈກະຕືລືລົ້ນເຫຼົ່ານີ້ເຮັດວຽກໜັກ “ເພື່ອຈະບໍ່ເປັນພາລະຂອງຜູ້ໃດ.” (1ທຊ. 2:9) ໜ້າຊົມເຊີຍທີ່ໄພໂອເນຍບາງຄົນເຮັດວຽກອາຊີບບາງມື້ຕໍ່ອາທິດ ຫຼືເຮັດວຽກບໍ່ເທົ່າໃດເດືອນຕໍ່ປີເພື່ອຈະຫາລ້ຽງໂຕເອງ. ເຂົາເຈົ້າໃຫ້ວຽກຮັບໃຊ້ເປັນວຽກສຳຄັນທີ່ສຸດໃນຊີວິດ. ຄືກັບອາກີລາແລະປີຊະກີລາ ຜູ້ຮັບໃຊ້ຂອງພະເຢໂຫວາຫຼາຍຄົນທີ່ມີນ້ຳໃຈໄດ້ເຊີນຜູ້ດູແລໝວດໃຫ້ມາພັກຢູ່ເຮືອນຂອງເຂົາເຈົ້າ. ຄົນທີ່ “ມີນ້ຳໃຈຕ້ອນຮັບແຂກ” ຮູ້ດີວ່າການເຮັດແບບນີ້ຈະຊ່ວຍໃຫ້ເຂົາເຈົ້າສົດຊື່ນແລະໄດ້ກຳລັງໃຈ.—ຣມ. 12:13
“ຫຼາຍຄົນໃນເມືອງໂກຣິນໂທໄດ້ . . . ເຊື່ອ” (ກິດຈະການ 18:5-8)
8, 9. ເມື່ອໂປໂລປະກາດຢ່າງກະຕືລືລົ້ນກັບຄົນຢິວແຕ່ພັດເຈິການຕໍ່ຕ້ານ ລາວໄດ້ເຮັດແນວໃດ ແລະຈາກນັ້ນລາວໄປປະກາດຢູ່ໃສ?
8 ໂປໂລເຮັດວຽກອາຊີບພຽງເພື່ອຈະຫາລ້ຽງໂຕເອງແລະຮັບໃຊ້ຕໍ່ໄປໄດ້ ເຮົາຮູ້ເລື່ອງນີ້ໄດ້ຈາກຕອນທີ່ຊີລາກັບຕີໂມທຽວເດີນທາງຈາກແຂວງມາເກໂດເນຍມາຫາລາວພ້ອມກັບສິ່ງຂອງຫຼາຍຢ່າງທີ່ພີ່ນ້ອງຝາກມາໃຫ້. (2ກຣ. 11:9) ທັນໃດນັ້ນ ໂປໂລ “ກໍທຸ່ມເທເວລາໃນການປະກາດຄຳສອນຂອງພະເຈົ້າ.” (ກຈກ. 18:5) ເຖິງວ່າໂປໂລຈະປະກາດຢ່າງກະຕືລືລົ້ນກັບຄົນຢິວ ແຕ່ເຂົາເຈົ້າກໍບໍ່ຟັງແລະຕໍ່ຕ້ານລາວ. ເຂົາເຈົ້າບໍ່ຍອມຮັບວ່າພະເຢຊູແມ່ນຜູ້ທີ່ມາຊ່ວຍເຂົາເຈົ້າໃຫ້ລອດ. ໂປໂລເຮັດໃຫ້ຄົນຢິວເຫັນວ່າລາວບໍ່ຕ້ອງຮັບຜິດຊອບຫຍັງຕໍ່ການຕັດສິນໃຈຂອງເຂົາເຈົ້າ. ໂປໂລສັ່ນເສື້ອ ແລ້ວເວົ້າກັບຄົນທີ່ຕໍ່ຕ້ານລາວວ່າ: “ພວກເຈົ້າຮັບຜິດຊອບຊີວິດຂອງພວກເຈົ້າເອງ. ຂ້ອຍພົ້ນຈາກຄວາມຮັບຜິດຊອບແລ້ວ. ຕັ້ງແຕ່ນີ້ໄປ ຂ້ອຍຈະໄປຫາຄົນຕ່າງຊາດ.”—ກຈກ. 18:6; ອຊກ. 3:18, 19
9 ແລ້ວຕອນນີ້ໂປໂລຈະປະກາດຢູ່ໃສ? ຜູ້ຊາຍຄົນໜຶ່ງທີ່ຊື່ຕີໂຕຢູສະໂຕ ເຊິ່ງອາດຈະເປັນຄົນທີ່ປ່ຽນມານັບຖືສາສະໜາຢິວໄດ້ໃຫ້ໂປໂລໃຊ້ເຮືອນຂອງລາວ ລາວມີເຮືອນຢູ່ຕິດກັບບ່ອນປະຊຸມຂອງຄົນຢິວ. ໂປໂລຈຶ່ງບໍ່ໄດ້ປະກາດຢູ່ບ່ອນປະຊຸມຂອງຄົນຢິວອີກ ແຕ່ປະກາດຢູ່ເຮືອນຂອງຕີໂຕແທນ. (ກຈກ. 18:7) ໂປໂລຍັງພັກຢູ່ເຮືອນຂອງອາກີລາກັບປີຊະກີລາຕະຫຼອດໄລຍະທີ່ລາວຢູ່ໃນໂກຣິນໂທ ແຕ່ລາວໄດ້ໃຊ້ເຮືອນຂອງຕີໂຕເປັນສູນກາງໃນການປະກາດ.
10. ສິ່ງໃດສະແດງວ່າໂປໂລບໍ່ໄດ້ຕັ້ງໃຈທີ່ຈະປະກາດກັບຄົນຕ່າງຊາດເທົ່ານັ້ນ?
10 ການທີ່ໂປໂລເວົ້າວ່າລາວຈະໄປຫາຄົນຕ່າງຊາດບໍ່ໄດ້ໝາຍຄວາມວ່າ ລາວຈະເຊົາປະກາດກັບຄົນຢິວຫຼືຄົນທີ່ປ່ຽນມານັບຖືສາສະໜາຢິວທີ່ເຕັມໃຈຢາກຟັງ. ຕົວຢາງເຊັ່ນ “ກີສະໂປທີ່ເປັນຫົວໜ້າບ່ອນປະຊຸມຂອງຊາວຢິວກັບທຸກຄົນໃນເຮືອນຂອງລາວໄດ້ມາເປັນລູກສິດຂອງຜູ້ເປັນນາຍ.” ເຫັນໄດ້ແຈ້ງວ່າມີຄົນຢິວຫຼາຍຄົນຈາກບ່ອນປະຊຸມຂອງຄົນຢິວໄດ້ປ່ຽນມາເປັນຄລິດສະຕຽນ ເພາະຄຳພີໄບເບິນບອກວ່າ: “ຫຼາຍຄົນໃນເມືອງໂກຣິນໂທໄດ້ຟັງແລ້ວກໍເຊື່ອແລະຮັບບັບເຕມາ.” (ກຈກ. 18:8) ດັ່ງນັ້ນ ເຮືອນຂອງຕີໂຕຢູສະໂຕຈຶ່ງກາຍເປັນບ່ອນປະຊຸມຂອງຄລິດສະຕຽນທີ່ໄດ້ຕັ້ງຂຶ້ນໃໝ່ໃນໂກຣິນໂທ. ຖ້າລູກາບັນທຶກເຫດການນີ້ຕາມລຳດັບເວລາຄືກັບທີ່ລາວເຮັດມາຕະຫຼອດ ການທີ່ຄົນຢິວຫຼືຄົນທີ່ປ່ຽນມານັບຖືສາສະໜາຢິວເຫຼົ່ານີ້ປ່ຽນມາເປັນຄລິດສະຕຽນກໍຈະຕ້ອງເກີດຂຶ້ນຫຼັງຈາກທີ່ໂປໂລສັ່ນເສື້ອ. ເຫດການນີ້ເຮັດໃຫ້ເຮົາເຫັນວ່າ ໂປໂລເປັນຄົນທີ່ພ້ອມຈະປັບປ່ຽນແລະພ້ອມຈະປະກາດກັບທຸກຄົນທີ່ສົນໃຈຟັງ.
11. ພະຍານພະເຢໂຫວາໃນທຸກມື້ນີ້ຮຽນແບບໂປໂລແນວໃດຕອນທີ່ປະກາດກັບຄົນທີ່ເປັນຄລິດຕະຈັກ?
11 ໃນທຸກມື້ນີ້ ມີຄົນຈາກຫຼາຍບ່ອນເປັນສະມາຊິກຂອງໂບດຕ່າງໆເຊິ່ງອ້າງວ່າຕິດຕາມພະເຢຊູ. ໂບດເຫຼົ່ານີ້ມີອິດທິພົນຕໍ່ຊີວິດຂອງເຂົາເຈົ້າມາດົນຫຼາຍປີ. ທົ່ວໂລກ ພວກມິດຊັນນາຣີຂອງຄລິດຕະຈັກໄດ້ພະຍາຍາມຫຼາຍເພື່ອເຮັດໃຫ້ຜູ້ຄົນເຂົ້າມາເປັນສະມາຊິກ. ຄ້າຍກັບຄົນຢິວຢູ່ເມືອງໂກຣິນໂທໃນສະຕະວັດທຳອິດ ຄົນທີ່ອ້າງວ່າເປັນຄລິດສະຕຽນເຫຼົ່ານີ້ສົນໃຈທຳນຽມທາງສາສະໜາຫຼາຍກວ່າການໃກ້ຊິດພະເຈົ້າ. ແຕ່ພວກເຮົາທີ່ເປັນພະຍານພະເຢໂຫວາຢາກເຮັດຄືກັບໂປໂລໂດຍພະຍາຍາມຊ່ວຍຜູ້ຄົນໃຫ້ເຂົ້າໃຈສິ່ງທີ່ເຂົາເຈົ້າໄດ້ອ່ານຈາກຄຳພີໄບເບິນ. ເຖິງວ່າຄົນເຫຼົ່ານັ້ນຈະຕໍ່ຕ້ານເຮົາຫຼືຜູ້ນຳສາສະໜາຂົ່ມເຫງເຮົາ ເຮົາກໍບໍ່ໝົດຫວັງ. ໃນກຸ່ມຄົນທີ່ “ມີໃຈກະຕືລືລົ້ນເພື່ອພະເຈົ້າ ແຕ່ຂາດຄວາມຮູ້ທີ່ຖືກຕ້ອງ” ກໍອາດຈະມີຄົນຖ່ອມໂຕອີກຫຼາຍຄົນທີ່ເຮົາຕ້ອງຊອກໃຫ້ເຫັນ.—ຣມ. 10:2
“ໃນເມືອງນີ້ຍັງມີອີກຫຼາຍຄົນທີ່ຈະເຂົ້າມາເຊື່ອ”(ກິດຈະການ 18:9-17)
12. ໂປໂລໄດ້ຮັບຄຳຮັບຮອງຫຍັງໃນນິມິດ?
12 ຖ້າໂປໂລສົງໄສວ່າລາວຈະເຮັດວຽກປະກາດຕໍ່ໄປໃນເມືອງໂກຣິນໂທຫຼືບໍ່ ລາວກໍຄືຊິໄດ້ຮັບຄຳຕອບຊັດເຈນໃນຄືນທີ່ພະເຢຊູມາເຮັດໃຫ້ລາວເຫັນຜ່ານທາງນິມິດແລະບອກວ່າ: “ບໍ່ຕ້ອງຢ້ານ ປະກາດຕໍ່ໄປຢ່າເຊົາ. ຍ້ອນຂ້ອຍຢູ່ນຳເຈົ້າແລະຈະບໍ່ມີຜູ້ໃດທຳຮ້າຍເຈົ້າໄດ້. ໃນເມືອງນີ້ຍັງມີອີກຫຼາຍຄົນທີ່ຈະເຂົ້າມາເຊື່ອ.” (ກຈກ. 18:9, 10) ນິມິດນີ້ໃຫ້ກຳລັງໃຈຫຼາຍແທ້ໆ! ຜູ້ເປັນນາຍຮັບຮອງກັບໂປໂລວ່າຈະປົກປ້ອງລາວບໍ່ໃຫ້ຖືກທຳຮ້າຍແລະຍັງມີອີກຫຼາຍຄົນທີ່ພະເຢຊູຢາກໃຫ້ລາວປະກາດນຳ. ແລ້ວໂປໂລຕອບຮັບແນວໃດ? ຄຳພີໄບເບິນບອກຕໍ່ໄປວ່າ: “ໂປໂລຈຶ່ງຢູ່ຫັ້ນ 1 ປີກັບ 6 ເດືອນແລະສອນຄຳສອນຂອງພະເຈົ້າໃຫ້ຄົນໃນເມືອງນັ້ນ.”—ກຈກ. 18:11
13. ໂປໂລອາດຄິດເຖິງເຫດການຫຍັງຕອນທີ່ເຂົ້າໄປໃກ້ບັນລັງພິພາກສາ ແຕ່ມີຫຍັງທີ່ເຮັດໃຫ້ລາວໝັ້ນໃຈວ່າເຫດການນັ້ນຈະບໍ່ເກີດຂຶ້ນກັບລາວ?
13 ຫຼັງຈາກໃຊ້ເວລາປະມານ 1 ປີໃນເມືອງໂກຣິນໂທ ກໍມີບາງຢ່າງເກີດຂຶ້ນເຊິ່ງເຮັດໃຫ້ໂປໂລໝັ້ນໃຈວ່າພະເຢຊູຢູ່ກັບລາວແທ້ໆ. ຄຳພີໄບເບິນບອກວ່າ: “ຊາວຢິວໄດ້ລວມຕົວກັນຕໍ່ຕ້ານໂປໂລແລະເອົາຕົວລາວໄປທີ່ບັນລັງພິພາກສາ” ທີ່ເອີ້ນວ່າບີມາ. (ກຈກ. 18:12) ບາງຄົນຄິດວ່າເປັນເວທີທີ່ຍົກພື້ນສູງເຮັດດ້ວຍຫີນອ່ອນສີຟ້າແລະສີຂາວເຊິ່ງເຕັມໄປດ້ວຍການແກະສະຫຼັກຕົກແຕ່ງຢ່າງສວຍງາມ. ບີມາ ອາດຕັ້ງຢູ່ໃກ້ສູນກາງຂອງຕະຫຼາດເມືອງໂກຣິນໂທ. ຢູ່ທາງໜ້າບີມາ ຈະມີບໍລິເວນທີ່ໂລ່ງແລະກວ້າງໃຫຍ່ພໍທີ່ຫຼາຍຄົນຈະມາຊຸມນຸມກັນ. ການຄົ້ນພົບທາງບູຮານຄະດີຊ່ວຍໃຫ້ຮູ້ວ່າ ບັນລັງພິພາກສານີ້ອາດຢູ່ຫ່າງຈາກບ່ອນປະຊຸມຂອງຄົນຢິວບໍ່ເທົ່າໃດກ້າວ ດັ່ງນັ້ນ ບັນລັງນີ້ກໍຢູ່ຫ່າງຈາກເຮືອນຂອງຕີໂຕຢູສະໂຕບໍ່ເທົ່າໃດກ້າວຄືກັນ. ຕອນທີ່ໂປໂລເຂົ້າໄປໃກ້ບີມາ ລາວອາດຄິດເຖິງຊະເຕຟາໂນທີ່ຖືກແກວ່ງຫີນໃສ່ຈົນຕາຍ. ຊະເຕຟາໂນເປັນຄລິດສະຕຽນຄົນທຳອິດທີ່ຖືກຂ້າຍ້ອນຄວາມເຊື່ອ. ໂປໂລເຊິ່ງຕອນນັ້ນເປັນທີ່ຮູ້ຈັກກັນວ່າໂຊໂລ ກໍໄດ້ເຫັນດີກັບ “ການຂ້າຊະເຕຟາໂນ.” (ກຈກ. 8:1) ຕອນນີ້ໂປໂລຈະເຈິກັບເຫດການຄ້າຍໆກັນນີ້ບໍ? ບໍ່. ຍ້ອນໂປໂລໄດ້ຮັບຄຳຮັບຮອງວ່າ: “ຈະບໍ່ມີຜູ້ໃດທຳຮ້າຍເຈົ້າໄດ້.”—ກຈກ. 18:10
“ແລ້ວຄາລີໂອກໍໄລ່ພວກເຂົາອອກໄປຈາກໜ້າບັນລັງພິພາກສາ.”—ກິດຈະການ 18:16
14, 15. (ກ) ພວກຢິວໄດ້ກ່າວຫາໂປໂລແນວໃດ ແລະເປັນຫຍັງຄາລີໂອຈຶ່ງຍົກເລີກການພິຈາລະນາຄະດີ? (ຂ) ເກີດຫຍັງຂຶ້ນກັບໂຊຊະເຖນ ແລະຕໍ່ມາລາວອາດປ່ຽນໄປແນວໃດ?
14 ເກີດຫຍັງຂຶ້ນເມື່ອໂປໂລມາຮອດບັນລັງພິພາກສາ? ເຈົ້າໜ້າທີ່ຝ່າຍປົກຄອງທີ່ຢູ່ຫັ້ນແມ່ນ ຄາລີໂອທີ່ເປັນເຈົ້າແຂວງອະຂາຢາ ລາວເປັນອ້າຍຂອງເຊເນການັກປັດຊະຍາຄົນໂຣມ. ພວກຢິວໄດ້ກ່າວຫາໂປໂລວ່າ: “ຄົນນີ້ຊັກຈູງຜູ້ຄົນໃຫ້ນະມັດສະການພະເຈົ້າໃນແບບທີ່ຜິດກົດໝາຍ.” (ກຈກ. 18:13) ສິ່ງທີ່ຄົນຢິວເວົ້າເຮັດໃຫ້ຜູ້ຄົນຄິດວ່າ ການທີ່ໂປໂລເຮັດໃຫ້ຄົນປ່ຽນສາສະໜານັ້ນເປັນການເຮັດຜິດກົດໝາຍ ແຕ່ຄາລີໂອບໍ່ເຫັນວ່າໂປໂລ “ເຮັດຜິດ.” (ກຈກ. 18:14) ຄາລີໂອບໍ່ຢາກຫຍຸ້ງກ່ຽວກັບຂໍ້ໂຕ້ແຍ່ງຂອງພວກຢິວ. ໂປໂລຍັງບໍ່ໄດ້ເວົ້າປົກປ້ອງໂຕເອງແມ່ນແຕ່ຄຳດຽວ ຄາລີໂອກໍຍົກເລີກການພິຈາລະນາຄະດີ. ພວກທີ່ກ່າວຫາໃຈຮ້າຍແລະຄຽດແຄ້ນຫຼາຍ ເຂົາເຈົ້າຈຶ່ງລະບາຍຄວາມໃຈຮ້າຍໃສ່ໂຊຊະເຖນເຊິ່ງອາດເຮັດໜ້າທີ່ແທນກີສະໂປທີ່ເປັນຫົວໜ້າບ່ອນປະຊຸມຂອງຄົນຢິວ. ເຂົາເຈົ້າຈັບໂຊຊະເຖນມາ “ຂ້ຽນຕີຢູ່ໜ້າບັນລັງພິພາກສາ.”—ກຈກ. 18:17
15 ເປັນຫຍັງຄາລີໂອຈຶ່ງບໍ່ຫ້າມຝູງຄົນບໍ່ໃຫ້ຂ້ຽນໂຊຊະເຖນ? ຄາລີໂອອາດຄິດວ່າໂຊຊະເຖນເປັນຜູ້ນຳພາຝູງຄົນໃຫ້ຕໍ່ຕ້ານໂປໂລ ແລະສົມຄວນຖືກລົງໂທດ. ບາງທີເຫດການນັ້ນອາດສົ່ງຜົນດີກໍໄດ້. ໃນຈົດໝາຍສະບັບທຳອິດທີ່ຂຽນເຖິງປະຊາຄົມໂກຣິນໂທໃນຫຼາຍປີຕໍ່ມາ ໂປໂລໄດ້ເວົ້າເຖິງຄົນທີ່ຊື່ໂຊຊະເຖນວ່າເປັນພີ່ນ້ອງ. (1ກຣ. 1:1, 2) ນີ້ເປັນຄົນດຽວກັນກັບໂຊຊະເຖນທີ່ຖືກຂ້ຽນຢູ່ເມືອງໂກຣິນໂທບໍ? ຖ້າແມ່ນ ກໍສະແດງວ່າປະສົບການອັນເຈັບປວດອາດຊ່ວຍໂຊຊະເຖນໃຫ້ມາເປັນຄລິດສະຕຽນ.
16. ຄຳເວົ້າຂອງພະເຢຊູຜູ້ເປັນນາຍທີ່ວ່າ “ປະກາດຕໍ່ໄປຢ່າເຊົາ ຍ້ອນຂ້ອຍຢູ່ນຳເຈົ້າ” ມີຜົນຕໍ່ວຽກປະກາດຂອງເຮົາແນວໃດ?
16 ຂໍໃຫ້ຈື່ໄວ້ວ່າ ຫຼັງຈາກທີ່ຄົນຢິວບໍ່ຍອມຮັບຂ່າວສານທີ່ໂປໂລປະກາດ ພະເຢຊູໄດ້ຮັບຮອງກັບໂປໂລວ່າ: “ບໍ່ຕ້ອງຢ້ານ ປະກາດຕໍ່ໄປຢ່າເຊົາ ຍ້ອນຂ້ອຍຢູ່ນຳເຈົ້າ.” (ກຈກ. 18:9, 10) ເຮົາກໍຄວນຈື່ຄຳເວົ້ານີ້ຄືກັນ ໂດຍສະເພາະຕອນທີ່ບາງຄົນບໍ່ຍອມຮັບຂ່າວສານທີ່ເຮົາປະກາດ. ຢ່າລືມວ່າພະເຢໂຫວາອ່ານຫົວໃຈຄົນໄດ້ ແລະເພິ່ນເປັນຜູ້ທີ່ຊັກນຳຄົນທີ່ຈິງໃຈໃຫ້ມາຫາເພິ່ນ. (1ຊມ. 16:7; ຢຮ. 6:44) ເມື່ອຄິດເຖິງເລື່ອງນີ້ ເຮົາກໍໄດ້ກຳລັງໃຈທີ່ຈະປະກາດຕໍ່ໄປ. ແຕ່ລະປີມີຫຼາຍແສນຄົນຮັບບັບເຕມາ ນີ້ສະແດງວ່າທຸກມື້ມີຄົນຮັບບັບເຕມາຫຼາຍຮ້ອຍຄົນ. ສຳລັບທຸກຄົນທີ່ເຮັດຕາມຄຳສັ່ງຂອງພະເຢຊູທີ່ວ່າ: “ໃຫ້ພວກເຈົ້າໄປຫາຄົນທຸກຊາດແລະສອນພວກເຂົາໃຫ້ເຂົ້າມາເປັນລູກສິດ” ພະເຢຊູສັນຍາກັບເຂົາເຈົ້າວ່າ: “ຂ້ອຍຈະຢູ່ກັບພວກເຈົ້າສະເໝີຈົນຮອດສະໄໝສຸດທ້າຍຂອງໂລກນີ້.”—ມທ. 28:19, 20
“ຖ້າພະເຢໂຫວາຕ້ອງການ” (ກິດຈະການ 18:18-22)
17, 18. ໂປໂລອາດຄິດເຖິງຫຍັງຕອນທີ່ຂຶ້ນເຮືອໄປເມືອງເອເຟໂຊ?
17 ເຮົາບໍ່ຮູ້ວ່າສິ່ງທີ່ຄາລີໂອເຮັດຊ່ວຍໃຫ້ປະຊາຄົມໃນເມືອງໂກຣິນໂທມີໄລຍະເວລາທີ່ສະຫງົບສຸກຫຼືບໍ່. ແຕ່ໂປໂລກໍພັກຢູ່ຫັ້ນ “ອີກຫຼາຍມື້” ກ່ອນລາຈາກພີ່ນ້ອງໃນເມືອງໂກຣິນໂທ. ຊ່ວງລະດູໃບໄມ້ຫຼົ່ນປີ 52 ໂປໂລວາງແຜນຈະຂຶ້ນເຮືອຈາກທ່າເຮືອເກັນເຂໄອໄປແຂວງຊີເຣຍເຊິ່ງຢູ່ທາງຕາເວັນອອກຂອງເມືອງໂກຣິນໂທປະມານ 11 ກິໂລແມັດ. ແຕ່ກ່ອນອອກຈາກເກັນເຂໄອ ໂປໂລ “ຕັດຜົມສັ້ນ . . . ຍ້ອນລາວເຄີຍສາບານໄວ້ກັບພະເຈົ້າ.”c (ກຈກ. 18:18) ຫຼັງຈາກນັ້ນ ໂປໂລພາອາກີລາກັບປີຊະກີລາໄປນຳ. ເຂົາເຈົ້າຂຶ້ນເຮືອຂ້າມທະເລອີຈຽນໄປເມືອງເອເຟໂຊໃນອາຊີນ້ອຍ.
18 ຕອນທີ່ໂປໂລຂຶ້ນເຮືອຈາກເກັນເຂໄອ ລາວຄືຊິຄິດເຖິງຊ່ວງທີ່ຢູ່ໃນໂກຣິນໂທ. ໂປໂລມີຄວາມຊົງຈຳທີ່ດີຫຼາຍເລື່ອງແລະມີເຫດຜົນຫຼາຍຢ່າງທີ່ເຮັດໃຫ້ລາວມີຄວາມສຸກ. ວຽກປະກາດຢູ່ຫັ້ນຕະຫຼອດ 18 ເດືອນເກີດຜົນດີ. ມີການຕັ້ງປະຊາຄົມທຳອິດໃນເມືອງໂກຣິນໂທໂດຍໃຊ້ເຮືອນຂອງຕີໂຕຢູສະໂຕເປັນບ່ອນປະຊຸມ. ໃນກຸ່ມຄົນທີ່ເຂົ້າມາເຊື່ອມີ ຕີໂຕຢູສະໂຕກັບຄອບຄົວ ແລະອີກຫຼາຍຄົນ. ພວກພີ່ນ້ອງໃໝ່ເຫຼົ່ານີ້ເປັນທີ່ຮັກຂອງໂປໂລ ຍ້ອນໂປໂລໄດ້ຊ່ວຍເຂົາເຈົ້າໃຫ້ເຂົ້າມາເປັນຄລິດສະຕຽນ. ໂປໂລຂຽນເຖິງເຂົາເຈົ້າໃນພາຍຫຼັງວ່າ ເຂົາເຈົ້າເປັນໜັງສືແນະນຳຕົວເຊິ່ງຂຽນໄວ້ໃນຫົວໃຈຂອງລາວ. ເຮົາກໍຮັກຄົນທີ່ເຮົາໄດ້ຊ່ວຍໃຫ້ເຂົ້າມາຮັບໃຊ້ພະເຢໂຫວາຄືກັນ. ເຮົາມີຄວາມສຸກຫຼາຍແທ້ໆທີ່ໄດ້ເຫັນ “ໜັງສືແນະນຳຕົວ” ທີ່ມີຊີວິດແບບນັ້ນ!—2ກຣ. 3:1-3
19, 20. ໂປໂລເຮັດຫຍັງເມື່ອມາຮອດເມືອງເອເຟໂຊ ແລະເຮົາໄດ້ຮຽນຫຍັງຈາກເລື່ອງນີ້?
19 ເມື່ອມາຮອດເມືອງເອເຟໂຊ ໂປໂລໄດ້ເຮັດວຽກຕໍ່ໄປທັນທີ ‘ລາວເຂົ້າໄປໃນບ່ອນປະຊຸມຂອງຊາວຢິວແລະຍົກເຫດຜົນລົມກັບພວກຢິວ.’ (ກຈກ. 18:19) ຕອນນັ້ນໂປໂລພັກຢູ່ເມືອງເອເຟໂຊພຽງແຕ່ໄລຍະສັ້ນໆ. ເຖິງວ່າໂປໂລຈະຖືກຂໍຮ້ອງໃຫ້ພັກຢູ່ຫັ້ນຕໍ່ໄປອີກ ແຕ່ “ລາວກໍບໍ່ຍອມຢູ່.” ຕອນທີ່ລາພີ່ນ້ອງໃນເມືອງເອເຟໂຊ ລາວບອກວ່າ: “ຖ້າພະເຢໂຫວາຕ້ອງການ ຂ້ອຍຈະກັບມາຫາພວກເຈົ້າອີກ.” (ກຈກ. 18:20, 21) ໂປໂລຮູ້ດີວ່າລາວຍັງຕ້ອງປະກາດໃຫ້ກັບອີກຫຼາຍຄົນໃນເມືອງເອເຟໂຊ. ລາວຢາກກັບມາເມືອງເອເຟໂຊອີກ ແຕ່ລາວກໍເລືອກທີ່ຈະຝາກເລື່ອງຕ່າງໆໄວ້ກັບພະເຢໂຫວາ. ນີ້ເປັນຕົວຢ່າງທີ່ດີສຳລັບພວກເຮົານຳ. ເຮົາຢາກວາງແຜນຊີວິດໃນແບບທີ່ເຮົາຈະຮັບໃຊ້ພະເຢໂຫວາໄດ້ຢ່າງເຕັມທີ ແຕ່ເຮົາກໍຕ້ອງເພິ່ງການຊີ້ນຳຈາກພະເຢໂຫວາ ແລະເຮັດສິ່ງທີ່ສອດຄ່ອງກັບຄວາມຕ້ອງການຂອງເພິ່ນ.—ຢກບ. 4:15
20 ຫຼັງຈາກທີ່ອາກີລາກັບປີຊະກີລາຢູ່ໃນເມືອງເອເຟໂຊຕໍ່ ໂປໂລໄດ້ຂຶ້ນເຮືອໄປເມືອງກາຍຊາເຣຍ ແລະ “ຈາກນັ້ນກໍໄປ” ເມືອງເຢຣູຊາເລັມແລະທັກທາຍປະຊາຄົມຢູ່ຫັ້ນ. (ເບິ່ງຂໍ້ມູນສຳລັບສຶກສາຂອງກິດຈະການ 18:22, ພາສາໄທ) ຕໍ່ຈາກນັ້ນ ໂປໂລກໍໄປເມືອງອັນຕີໂອເຂຍໃນແຂວງຊີເຣຍເຊິ່ງເປັນບ່ອນທີ່ລາວພັກຢູ່ຕອນທີ່ບໍ່ໄດ້ເດີນທາງໄປປະກາດ. ການເດີນທາງໄປປະກາດຢູ່ຕ່າງປະເທດຮອບທີສອງສິ້ນສຸດລົງຢ່າງດີ. ແລ້ວມີຫຍັງແດ່ທີ່ລໍຖ້າໂປໂລໃນການເດີນທາງໄປປະກາດຢູ່ຕ່າງປະເທດຮອບສຸດທ້າຍ?
a ເບິ່ງຂອບ “ໂກຣິນໂທ—ເມືອງທີ່ຕັ້ງຢູ່ລະຫວ່າງສອງທະເລ”
b ເບິ່ງຂອບ “ຈົດໝາຍທີ່ຂຽນຂຶ້ນໂດຍການດົນໃຈທີ່ໃຫ້ກຳລັງໃຈ”
c ເບິ່ງຂອບ “ຄຳສາບານຂອງໂປໂລ”