ບົດສິບຫ້າ
ຈົ່ງຟັງຄຳເຕືອນສະຕິແລະຈົ່ງຮັບການຕີສອນ
1. (ກ) ເປັນຫຍັງເຮົາໝົດທຸກຄົນຈຳເປັນຕ້ອງຮັບເອົາຄຳແນະນຳແລະການຕີສອນ? (ຂ) ເຮົາຕ້ອງພິຈາລະນາຄຳຖາມຫຍັງແດ່?
ຄຳພີໄບເບິນກ່າວໄວ້ໃນຢາໂກໂບ 3:2 ວ່າ “ເຮົາທັງປວງກະທຳຜິດຫຼາຍປະການ.” ເຮົາຄົງຈະຄິດເຖິງຫຼາຍໆ ຈຸດເຊິ່ງເຮົາເອງບໍ່ສາມາດບັນລຸໄດ້ເພື່ອເປັນບຸກຄົນໃນແບບທີ່ພະຄຳຂອງພະເຈົ້າກະຕຸ້ນໃຫ້ເຮົາເປັນ. ສະນັ້ນ ເຮົາຍອມຮັບວ່າຄຳພີໄບເບິນກ່າວໄວ້ຢ່າງຖືກຕ້ອງທີ່ວ່າ “ຈົ່ງຟັງຄຳເຕືອນສະຕິແລະຈົ່ງຮັບຄຳສັ່ງສອນ [“ຕີສອນ,” ລ.ມ.] ເພື່ອເຈົ້າຈະມີຄວາມປັນຍາເມື່ອທີ່ສຸດເຈົ້າ.” (ສຸພາສິດ 19:20) ໃນຕົວຈິງເຮົາອາດໄດ້ປ່ຽນແປງແກ້ໄຂຕົນເອງແດ່ແລ້ວເພື່ອໃຫ້ຊີວິດສອດຄ່ອງກັບຫຼັກຄຳສອນຂອງຄຳພີໄບເບິນ. ແຕ່ວ່າເຮົາສະແດງອາການແນວໃດຖ້າເພື່ອນຄລິດສະຕຽນໃຫ້ຄຳແນະນຳແກ່ເຮົາກ່ຽວກັບເລື່ອງໃດເລື່ອງໜຶ່ງສະເພາະ?
2. ເມື່ອເຮົາໄດ້ຮັບຄຳແນະນຳເປັນສ່ວນຕົວເຮົາຄວນເຮັດແນວໃດ?
2 ບາງຄົນສະແດງອາການອອກມາໂດຍພະຍາຍາມຫາຂໍ້ແກ້ຕົວເພື່ອຫລຸດຜ່ອນຄວາມຮ້າຍແຮງຂອງເລື່ອງນັ້ນ ຫຼືໂຍນຄຳຕຳໜິໃຫ້ກັບຄົນອື່ນ. ແທນທີ່ຈະເປັນແນວນັ້ນ ຈະດີກວ່າຖ້າຮັບຟັງ ແລະໃສ່ໃຈຕໍ່ຄຳແນະນຳດັ່ງກ່າວ. (ເຫບເລີ 12:11) ແນ່ນອນ ບໍ່ຄວນມີໃຜທີ່ຈະຄາດຫວັງຄວາມສົມບູນຈາກຄົນອື່ນ ທັງບໍ່ຄວນໃຫ້ຄຳແນະນຳເລື້ອຍເກີນໄປກ່ຽວກັບສິ່ງເລັກໆ ນ້ອຍໆ ຫຼືເລື່ອງຕ່າງໆ ທີ່ຄຳພີໄບເບິນປ່ອຍໃຫ້ເປັນການເລືອກສ່ວນຕົວ. ນອກຈາກນັ້ນ ບາງເທື່ອຜູ້ທີ່ໃຫ້ຄຳແນະນຳບໍ່ໄດ້ຮັບຮູ້ເຖິງຄວາມຈິງທັງໝົດ ແລະເມື່ອເປັນແນວນັ້ນ ຜູ້ຮັບເອົາຄຳແນະນຳອາດຊີ້ແຈງຕໍ່ຜູ້ທີ່ໃຫ້ຄຳແນະນຳນັ້ນດ້ວຍຄວາມນັບຖື. ໃນການພິຈາລະນາຕໍ່ໄປນີ້ ໃຫ້ເຮົາຖືວ່າຄຳແນະນຳຫຼືການຕີສອນທີ່ໃຫ້ໄວ້ໃນນີ້ແມ່ນເໝາະສົມແລະເປັນສິ່ງທີ່ອີງຕາມຫຼັກການໃນຄຳພີໄບເບິນ. ເຮົາເອງຄວນຕອບສະໜອງຢ່າງໃດ?
ຕົວຢ່າງຕ່າງໆ ເພື່ອເຕືອນສະຕິເຮົາ
3, 4. (ກ) ຄຳພີໄບເບິນບັນທຶກສິ່ງໃດໄວ້ເພື່ອຊ່ວຍເຮົາໃຫ້ປູກຝັງທັດສະນະຄະຕິທີ່ຖືກຕ້ອງຕໍ່ຄຳແນະນຳແລະການຕີສອນ? (ຂ) ກະສັດຊາອຶລຮູ້ສຶກຢ່າງໃດຕໍ່ຄຳແນະນຳ ແລະຜົນເປັນແນວໃດ?
3 ພະຄຳຂອງພະເຈົ້າບັນທຶກປະສົບການຊີວິດຈິງຂອງບຸກຄົນຕ່າງໆ ທີ່ຈຳເປັນຕ້ອງໄດ້ຮັບຄຳແນະນຳ. ບາງຄັ້ງ ຄຳແນະນຳກໍຄຽງຄູ່ໄປກັບການຕີສອນ. ບຸກຄົນໜຶ່ງທີ່ໄດ້ຮັບການປະຕິບັດແບບນັ້ນແມ່ນກະສັດຊາອຶລແຫ່ງຊາດຍິດສະລາເອນ. ລາວບໍ່ໄດ້ເຊື່ອຟັງພະເຢໂຫວາເລື່ອງຊາດອາມາເລກ. ພວກອາມາເລກໄດ້ຕໍ່ຕ້ານເຫຼົ່າຜູ້ຮັບໃຊ້ຂອງພະເຢໂຫວາ ແລະພະອົງໄດ້ຕັດສິນພວກອາມາເລກແລະຝູງສັດຂອງເຂົາເຈົ້າວ່າຄວນຖືກຂ້າຖິ້ມທັງໝົດ. ເຖິງແນວນັ້ນກໍຕາມ ກະສັດຊາອຶລບໍ່ໄດ້ຂ້າກະສັດແລະຝູງສັດທີ່ອ້ວນພີດີງາມຂອງເຂົາເຈົ້າ.—1 ຊາເມືອນ 15:1-11.
4 ພະເຢໂຫວາໄດ້ສົ່ງຜູ້ພະຍາກອນຊາເມືອນເພື່ອໄປວ່າກ່າວຊາອຶລ. ຊາອຶລສະແດງຄວາມຮູ້ສຶກແນວໃດ? ລາວຖຽງຄືນວ່າລາວໄດ້ເອົາຊະນະພວກອາມາເລກ ພຽງແຕ່ຕັດສິນໃຈບໍ່ຂ້າກະສັດຂອງເຂົາເຈົ້າ. ແນວໃດກໍຕາມ ເລື່ອງນັ້ນກົງກັນຂ້າມກັບຄຳສັ່ງຂອງພະເຢໂຫວາ. (1 ຊາເມືອນ 15:20) ຊາອຶລພະຍາຍາມໂຍນຄວາມຜິດໃຫ້ປະຊາຊົນໃນການໄວ້ຊີວິດຝູງສັດ ໂດຍກ່າວວ່າ “ຂ້ອຍໄດ້ຢ້ານຄົນທັງຫຼາຍ ຈຶ່ງໄດ້ຟັງຄວາມຂອງເຂົາ.” (1 ຊາເມືອນ 15:24) ເບິ່ງຄືວ່າລາວເປັນຫ່ວງສັກສີຂອງຕົນເອງຫຼາຍໂພດ ຈົນເຖິງຂັ້ນວ່າຂໍໃຫ້ຊາເມືອນໃຫ້ກຽດລາວຕໍ່ໜ້າປະຊາຊົນ. (1 ຊາເມືອນ 15:30) ໃນທີ່ສຸດ ພະເຢໂຫວາໄດ້ປົດຊາອຶລອອກຈາກການເປັນກະສັດ.—1 ຊາເມືອນ 16:1.
5. ເກີດຫຍັງຂຶ້ນກັບກະສັດໂອເຊຍເຊເມື່ອລາວປະຕິເສດຄຳແນະນຳ?
5 ກະສັດໂອເຊຍເຊແຫ່ງຢູເດ “ໄດ້ເຮັດການບາບຕໍ່ສູ້ພະເຢໂຫວາພະເຈົ້າຂອງຕົນ ແລະໄດ້ເຂົ້າໄປໃນວິຫານຂອງພະເຢໂຫວາເພື່ອຈະເຜົາກຳຍານເທິງແທ່ນກຳຍານ.” (2 ຂ່າວຄາວ 26:16) ຢ່າງໃດກໍດີ ຕາມກົດໝາຍແລ້ວມີພຽງແຕ່ປະໂລຫິດເທົ່ານັ້ນທີ່ມີສິດຖວາຍເຄື່ອງຫອມ. ເມື່ອປະໂລຫິດໃຫຍ່ພະຍາຍາມຫ້າມໂອເຊຍເຊ ກະສັດກໍໃຈຮ້າຍ. ມີຫຍັງເກີດຂຶ້ນ? ຄຳພີໄບເບິນກ່າວວ່າ “ຂີ້ທູດກໍແຕກອອກທີ່ໜ້າຜາກຂອງຕົນ . . . ເຫດວ່າພະເຢໂຫວາໄດ້ຕີທ່ານແລ້ວ. ແລະກະສັດໂອເຊຍເຊເປັນຂີ້ທູດຈົນຕາຍ.”—2 ຂ່າວຄາວ 26:19-21.
6. (ກ) ເປັນຫຍັງທັງຊາອຶລແລະໂອເຊຍເຊຈຶ່ງແຂງຂໍ້ຕໍ່ຄຳແນະນຳ? (ຂ) ດ້ວຍເຫດໃດການແຂງຂໍ້ຕໍ່ຄຳແນະນຳຈຶ່ງເປັນບັນຫາທີ່ຮ້າຍແຮງໃນທຸກມື້ນີ້?
6 ດ້ວຍເຫດໃດທັງຊາອຶລແລະໂອເຊຍເຊຈຶ່ງເບິ່ງຄືວ່າຍາກທີ່ຈະຮັບເອົາຄຳແນະນຳ? ບັນຫາພື້ນຖານແມ່ນຍ້ອນຄວາມຈອງຫອງ ແລະແຕ່ລະຄົນມັກຖືຕົວຫຼາຍໂພດ. ຫຼາຍຄົນນຳເອົາຄວາມໂສກເສົ້າມາສູ່ຕົວເອງຍ້ອນລັກສະນະນິດໄສແບບນີ້. ເບິ່ງຄືເຂົາເຈົ້າຮູ້ສຶກວ່າການຮັບເອົາຄຳແນະນຳໝາຍຄວາມວ່າ ເຂົາເຈົ້າບົກພ່ອງບາງສິ່ງບາງຢ່າງ ຫຼືເປັນການທຳລາຍຊື່ສຽງຂອງເຂົາເຈົ້າ. ຢ່າງໃດກໍຕາມ ຄວາມຈອງຫອງພັດແມ່ນຂໍ້ອ່ອນແອ. ຄວາມຈອງຫອງຄອບງຳຄວາມຄິດຂອງຄົນເຮົາ ດ້ວຍເຫດນັ້ນ ຄົນເຮົາຈຶ່ງມີທ່າອ່ຽງທີ່ຈະແຂງຂໍ້ຕໍ່ຄວາມຊ່ວຍເຫຼືອທີ່ພະເຢໂຫວາໄດ້ຈັດຕຽມໂດຍຜ່ານທາງພະຄຳ ແລະອົງການຂອງພະອົງ. ດ້ວຍເຫດນັ້ນ ພະເຢໂຫວາຈຶ່ງເຕືອນວ່າ “ຄວາມຈອງຫອງນຳໄປສູ່ການທຳລາຍແລະຄວາມອວດດີກໍນຳໄປສູ່ການຫຼົ້ມຈົມ.”—ສຸພາສິດ 16:18, ທ.ປ.; ໂລມ 12:3.
ການຮັບເອົາຄຳແນະນຳ
7. ບົດຮຽນທີ່ເສີມສ້າງອັນໃດເຊິ່ງເຮົາສາມາດຮຽນຮູ້ໄດ້ຈາກວິທີທີ່ໂມເຊຕອບສະໜອງຕໍ່ຄຳແນະນຳ?
7 ພະຄຳພີຍັງບັນທຶກຕົວຢ່າງທີ່ດີຂອງຄົນເຫຼົ່ານັ້ນທີ່ຍອມຮັບເອົາຄຳແນະນຳ ແລະເຮົາເອງກໍສາມາດຮຽນຮູ້ຈາກຕົວຢ່າງເຫຼົ່ານັ້ນໄດ້. ຂໍໃຫ້ພິຈາລະນາກໍລະນີຂອງໂມເຊເຊິ່ງ ພໍ່ເຖົ້າຂອງລາວໄດ້ໃຫ້ຄຳແນະນຳກ່ຽວກັບວິທີຈັດການກັບວຽກທີ່ໜັກໜ່ວງ. ໂມເຊຮັບຟັງພໍ່ເຖົ້າຂອງຕົນ ແລະລົງມືປະຕິບັດຕາມຄຳແນະນຳນັ້ນທັນທີ. (ອຸປະຍົກໜີ 18:13-24) ໂມເຊເປັນເຖິງຜູ້ມີອຳນາດຫຼາຍ ເປັນຫຍັງລາວຈຶ່ງຍອມຮັບເອົາຄຳແນະນຳດັ່ງກ່າວ? ເພາະວ່າລາວເປັນຄົນຖ່ອມໃຈ. “ໂມເຊເປັນຄົນອ່ອນນ້ອມຖ່ອມຕົວທີ່ສຸດກວ່າທຸກໆ ຄົນໃນເທິງແຜ່ນດິນໂລກນີ້.” (ຈົດເຊັນບັນຊີ 12:3, ທ.ປ.) ຄວາມຖ່ອມຕົວສຳຄັນພຽງໃດ? ໂຊໂຟນີ 2:3 ສະແດງໃຫ້ເຫັນວ່າຄວາມອ່ອນນ້ອມຖ່ອມຕົວໝາຍເຖິງຊີວິດຂອງເຮົາ.
8. (ກ) ດາວິດໄດ້ເຮັດບາບອັນໃດ? (ຂ) ດາວິດສະແດງອາການຢ່າງໃດຕໍ່ການວ່າກ່າວຂອງນາທານ? (ຄ) ຜົນຂອງບາບທີ່ດາວິດເຮັດແມ່ນຫຍັງ?
8 ກະສັດດາວິດໄດ້ເຮັດຜິດປະເວນີກັບນາງບາດເຊບາ ແລະພະຍາຍາມປົກປິດຄວາມຜິດນັ້ນ ໂດຍເຮັດໃຫ້ອຶລີຜົວຂອງນາງຖືກຂ້າ. ພະເຢໂຫວາໄດ້ສົ່ງຜູ້ພະຍາກອນນາທານໄປວ່າກ່າວດາວິດ. ລາວໄດ້ປະໃຈເກົ່າເອົາໃຈໃໝ່ແລະຍອມຮັບທັນທີວ່າ “ຂ້ອຍໄດ້ເຮັດບາບຕໍ່ສູ້ພະເຢໂຫວາ.” (2 ຊາເມືອນ 12:13) ເຖິງວ່າພະເຈົ້າຍອມຮັບການປະໃຈເກົ່າເອົາໃຈໃໝ່ຂອງດາວິດກໍຕາມ ແຕ່ລາວກໍຍັງຈະໄດ້ຮັບຄວາມເຈັບປວດຈາກຜົນຂອງການເຮັດຜິດນັ້ນຢູ່. ພະເຢໂຫວາບອກລາວວ່າ ດາບຈະ “ບໍ່ໜີຈາກຄອບຄົວ [ລາວ]” ເມຍທັງຫຼາຍຂອງລາວຈະເປັນທີ່ມອບໃຫ້ແກ່ “ເພື່ອນບ້ານ” ແລະລູກທີ່ເກີດຈາກການຜິດປະເວນີຂອງລາວຈະ “ຕາຍໄປດ້ວຍແທ້.”—2 ຊາເມືອນ 12:10, 11, 14.
9. ເມື່ອເຮົາໄດ້ຮັບຄຳແນະນຳຫຼືການຕີສອນເຮົາບໍ່ຄວນລືມສິ່ງໃດ?
9 ກະສັດດາວິດຮູ້ເຖິງຜົນປະໂຫຍດຂອງການເຊື່ອຟັງຄຳແນະນຳທີ່ເໝາະສົມ. ບາງຄັ້ງລາວຂອບໃຈພະເຈົ້າທີ່ໃຫ້ຄົນມາເຕືອນລາວ. (1 ຊາເມືອນ 25:32-35) ເຮົາເປັນແບບນັ້ນບໍ? ຖ້າເປັນແນວນັ້ນ ເຮົາຈະໄດ້ຮັບການປ້ອງກັນບໍ່ໃຫ້ເວົ້າແລະກະທຳສິ່ງຕ່າງໆ ທີ່ອາດເຮັດໃຫ້ຕົນເອງເສຍໃຈໄດ້. ຈະວ່າແນວໃດຖ້າເຮົາຕົກຢູ່ໃນສະພາບການທີ່ຕ້ອງຮັບເອົາຄຳແນະນຳແລະເຖິງຂັ້ນຖືກຕີສອນ? ຂໍໃຫ້ເຮົາຢ່າລືມວ່າ ການໄດ້ຮັບຄຳແນະນຳແລະການຕີສອນແມ່ນຫຼັກຖານທີ່ສະແດງເຖິງຄວາມຮັກຂອງພະເຢໂຫວາ ຍ້ອນວ່າພະອົງຄຳນຶງເຖິງຄວາມສຸກອັນຖາວອນຂອງເຮົາ.—ສຸພາສິດ 3:11, 12; 4:13.
ຄຸນລັກສະນະທີ່ປະເມີນຄ່າບໍ່ໄດ້ເຊິ່ງຄວນປູກຝັງ
10. ພະເຍຊູສະແດງໃຫ້ເຫັນຄຸນລັກສະນະອັນໃດທີ່ຈຳເປັນສຳລັບຄົນເຫຼົ່ານັ້ນທີ່ຈະເຂົ້າໄປໃນລາຊະອານາຈັກ?
10 ເພື່ອຈະມີສາຍສຳພັນທີ່ດີກັບພະເຢໂຫວາແລະກັບພີ່ນ້ອງຄລິດສະຕຽນ ເຮົາຈຳເປັນຕ້ອງປູກຝັງຄຸນລັກສະນະບາງຢ່າງ. ພະເຍຊູຊີ້ເຖິງຄຸນລັກສະນະນີ້ເມື່ອພະອົງໃຫ້ເດັກນ້ອຍຄົນໜຶ່ງມານັ່ງໃນທ່າມກາງສາວົກຂອງພະອົງແລະກ່າວວ່າ “ຖ້າທ່ານບໍ່ຫຼົບຕັ້ງໃຈໃໝ່ ແລະກາຍເປັນເໝືອນດັ່ງເດັກນ້ອຍທັງຫຼາຍ ທ່ານຈະບໍ່ເຂົ້າໄປໃນແຜ່ນດິນສະຫວັນ. ເຫດສັນນີ້ ຄົນທຸກຄົນທີ່ຈະຖ່ອມຈິດໃຈລົງເໝືອນດັ່ງເດັກນ້ອຍຜູ້ນີ້ ຜູ້ນັ້ນເປັນຜູ້ໃຫຍ່ທີ່ສຸດໃນແຜ່ນດິນສະຫວັນ.” (ມັດທາຍ 18:3, 4) ສາວົກຂອງພະເຍຊູຈຳເປັນຕ້ອງໄດ້ປູກຝັງຄວາມຖ່ອມ ເນື່ອງຈາກເຂົາເຈົ້າໄດ້ຖຽງກັນໃນທ່າມກາງເຂົາເຈົ້າເອງວ່າຜູ້ໃດເປັນຜູ້ໃຫຍ່ທີ່ສຸດ.—ລືກາ 22:24-27.
11. (ກ) ເຮົາຈຳເປັນຕ້ອງຖ່ອມຕົວຕໍ່ໜ້າຜູ້ໃດ ແລະຍ້ອນຫຍັງ? (ຂ) ຖ້າເຮົາເປັນຄົນຖ່ອມຕົວເຮົາຈະປະຕິບັດຢ່າງໃດເມື່ອໄດ້ຮັບຄຳແນະນຳ?
11 ອັກຄະສາວົກເປໂຕຂຽນວ່າ “ທ່ານທັງປວງຈົ່ງເອົາຄວາມຖ່ອມໃຈລົງເປັນເຄື່ອງນຸ່ງຫົ່ມຕົວເພື່ອຈະບົວລະບັດກັນແລະກັນ ເຫດວ່າພະເຈົ້າຂັດຂວາງຕໍ່ສູ້ຄົນຈອງຫອງທັງຫຼາຍ ແຕ່ວ່າພະອົງປະທານພະຄຸນແກ່ຄົນທັງຫຼາຍທີ່ຖ່ອມຕົວລົງ.” (1 ເປໂຕ 5:5) ເຮົາຮູ້ວ່າເຮົາຕ້ອງຖ່ອມຕົວຕໍ່ໜ້າພະເຈົ້າ ແຕ່ພະຄຳພີຂໍ້ນີ້ສະແດງໃຫ້ເຫັນວ່າເຮົາຍັງຕ້ອງຖ່ອມຕົວຕໍ່ເພື່ອນຮ່ວມຄວາມເຊື່ອນຳອີກ. ຖ້າເຮົາເປັນຄົນແບບນັ້ນ ເຮົາຈະບໍ່ເຄືອງໃຈເມື່ອຄົນອື່ນໃຫ້ຄຳແນະນຳທີ່ເໝາະສົມແກ່ເຮົາ ແຕ່ຊ້ຳພັດຈະຖອດຖອນເອົາບົດຮຽນຈາກເຂົາເຈົ້າ.—ສຸພາສິດ 12:15.
12. (ກ) ຄຸນລັກສະນະສຳຄັນທີ່ກ່ຽວພັນກັນຢ່າງໃກ້ຊິດກັບຄວາມຖ່ອມແມ່ນຫຍັງ? (ຂ) ເປັນຫຍັງເຮົາຈຶ່ງຄວນເປັນຫ່ວງກ່ຽວກັບຜົນກະທົບເລື່ອງການປະພຶດຂອງເຮົາຕໍ່ຄົນອື່ນ?
12 ການເປັນຫ່ວງຄວາມສຸກຂອງຄົນອື່ນກ່ຽວພັນກັນຢ່າງໃກ້ຊິດກັບຄວາມຖ່ອມ. ອັກຄະສາວົກໂປໂລຂຽນວ່າ “ຢ່າໃຫ້ຜູ້ໃດຫາປະໂຫຍດຂອງຕົວເອງ ແຕ່ວ່າໃຫ້ທຸກຄົນຫາປະໂຫຍດຂອງເພື່ອນບ້ານ. . . . ເຫດສັນນີ້ ຖ້າທ່ານທັງຫຼາຍກິນກໍດີ ດື່ມກໍດີ ຫຼືກະທຳການໃດກໍດີ ຈົ່ງກະທຳທຸກສິ່ງໃຫ້ເປັນທີ່ຖວາຍລັດສະໝີແກ່ພະເຈົ້າ. ຢ່າກະທຳເຫດໃຫ້ຊູນສະດຸດແກ່ຊາວຢູເດ ຫຼືແກ່ຊາວເຫເລນ ຫຼືແກ່ພວກຊຸມນຸມຂອງພະເຈົ້າ.” (1 ໂກລິນໂທ 10:24-33) ໂປໂລບໍ່ໄດ້ເວົ້າວ່າເຮົາຕ້ອງປະຖິ້ມທຸກສິ່ງທຸກຢ່າງທີ່ເຮົາມັກ ແຕ່ລາວກະຕຸ້ນເຮົາບໍ່ໃຫ້ເຮັດໃນສິ່ງໃດກໍຕາມທີ່ອາດສະໜັບສະຫນູນຄົນອື່ນໃຫ້ເຮັດໃນສິ່ງທີ່ສະຕິຮູ້ສຶກຜິດຊອບຂອງເຂົາເຈົ້າບອກວ່າມັນຜິດ.
13. ຕົວຢ່າງອັນໃດທີ່ອາດສະແດງໃຫ້ເຫັນວ່າເຮົາເອົາຄຳແນະນຳໃນຄຳພີໄບເບິນໄປໃຊ້ຫຼືບໍ່?
13 ເຮົາຖືວ່າຄວາມສຸກຂອງຄົນອື່ນສຳຄັນກວ່າຄວາມພໍໃຈຂອງເຮົາເອງບໍ? ເຮົາໝົດທຸກຄົນຄວນຮູ້ຈັກທີ່ຈະເຫັນແກ່ຄົນອື່ນກ່ອນ. ມີຫຼາຍທາງທີ່ເຮົາຈະເຮັດໄດ້. ເພື່ອເປັນຕົວຢ່າງ ຂໍໃຫ້ເຮົາພິຈາລະນາກ່ຽວກັບການນຸ່ງຖືແລະການແຕ່ງຕົວ. ເລື່ອງເຫຼົ່ານີ້ກ່ຽວຂ້ອງກັບຄວາມມັກສ່ວນຕົວເຊິ່ງຢູ່ພາຍໃຕ້ການຊີ້ນຳຂອງພະຄຳພີທີ່ໃຫ້ເປັນຄົນສຸພາບ, ຮຽບຮ້ອຍ, ແລະສະອາດ. ເຖິງແນວນັ້ນກໍຕາມ ຖ້າເຮົາຮຽນຮູ້ວ່າຍ້ອນພູມຫຼັງຂອງຄົນທີ່ຢູ່ໃນຊຸມຊົນຂອງເຮົາ ວິທີການນຸ່ງຖືຫຼືການແຕ່ງຕົວຂອງເຮົາອາດຂັດຂວາງຄົນອື່ນໄວ້ຈາກການຮັບຟັງຂ່າວສານເລື່ອງລາຊະອານາຈັກ ເຮົາຈະປັບປ່ຽນຕົວເອງບໍ? ແນ່ນອນ ການຊ່ວຍຄົນອື່ນໃຫ້ຮັບຊີວິດຕະຫຼອດໄປສຳຄັນກວ່າການເຮັດໃຫ້ຕົນເອງພໍໃຈ.
14. ເປັນຫຍັງການປູກຝັງຄວາມຖ່ອມແລະການຫ່ວງໃຍຕໍ່ຄົນອື່ນຈຶ່ງເປັນເລື່ອງສຳຄັນ?
14 ພະເຍຊູໄດ້ວາງຕົວຢ່າງໃນການເປັນຄົນຖ່ອມແລະສະແດງຄວາມຫ່ວງໃຍຕໍ່ຄົນອື່ນ ແມ່ນແຕ່ໄດ້ລ້າງຕີນສາວົກຂອງພະອົງຊ້ຳ. (ໂຢຮັນ 13:12-15) ພະຄຳຂອງພະເຈົ້າກ່າວເຖິງພະອົງວ່າ “ທ່ານທັງຫຼາຍ ຈົ່ງມີຄວາມຄຶດນັ້ນທີ່ໄດ້ມີຢູ່ໃນພະຄລິດເຍຊູ ພະອົງມີລັກສະນະແຫ່ງພະເຈົ້າ ແລະອັນທີ່ເປັນສະເໝີກັນກັບພະເຈົ້າພະອົງບໍ່ຖືເປັນການຍາດຊິງເອົາ ແຕ່ວ່າໄດ້ຍອມທຳລາຍ [“ສະລະ,” ທ.ປ.] ຕົວເອງລົງ ເອົາລັກສະນະແຫ່ງຂ້າໃຊ້ໄດ້ມາເປັນເໝືອນຢ່າງມະນຸດ. ແລະເມື່ອໄດ້ປາກົດເໝືອນຢ່າງຄົນຜູ້ໜຶ່ງແລ້ວ ພະອົງໄດ້ຖ່ອມຕົວເອງລົງ ບັງເກີດນ້ອມຟັງເຖິງຄວາມຕາຍ ແມ່ນຄວາມຕາຍທີ່ໄມ້ກາງເຂນ.”—ຟີລິບ 2:5-8; ໂລມ 15:2, 3.
ຢ່າປະຕິເສດການຕີສອນຂອງພະເຢໂຫວາ
15. (ກ) ເພື່ອໃຫ້ມີບຸກຄະລິກພາບທີ່ພະເຈົ້າພໍໃຈເຮົາຕ້ອງເຮັດການປ່ຽນແປງຫຍັງແດ່? (ຂ) ພະເຢໂຫວາຈັດຕຽມຄຳແນະນຳແລະການຕີສອນສຳລັບເຮົາໝົດທຸກຄົນໂດຍທາງໃດ?
15 ເນື່ອງຈາກວ່າເຮົາທັງໝົດເປັນຄົນບາບ ເຮົາຕ້ອງປ່ຽນແປງທັດສະນະຄະຕິ ແລະຄວາມປະພຶດຂອງເຮົາ ຖ້າເຮົາຢາກສະທ້ອນບຸກຄະລິກພາບຂອງພະເຈົ້າ. ເຮົາຕ້ອງສວມໃສ່ “ບຸກຄະລິກພາບໃໝ່.” (ໂກໂລດ 3:5-14, ລ.ມ.) ຄຳແນະນຳແລະການຕີສອນຊ່ວຍເຮົາໃຫ້ຮູ້ເຖິງຈຸດທີ່ເຮົາຈຳເປັນຕ້ອງປ່ຽນແປງ ແລະຈະຊ່ວຍເຮົາໃຫ້ຮູ້ວິທີທີ່ປ່ຽນແປງຕົນເອງນຳອີກ. ແຫຼ່ງພື້ນຖານຂອງການສອນທີ່ເຮົາຕ້ອງການແມ່ນຄຳພີໄບເບິນນັ້ນເອງ. (2 ຕີໂມເຕ 3:16, 17) ພ້ອມດຽວກັນນັ້ນ ກໍຍັງມີສິ່ງພິມກ່ຽວກັບຄຳພີໄບເບິນແລະການປະຊຸມຕ່າງໆ ເຊິ່ງຈັດຕຽມໂດຍອົງການຂອງພະເຢໂຫວາທີ່ຈະຊ່ວຍເຮົາໃຫ້ຮູ້ວິທີປະຕິບັດຕາມພະຄຳຂອງພະເຈົ້າ. ເຖິງແມ່ນວ່າເຮົາໄດ້ຍິນຄຳແນະນຳນັ້ນມາກ່ອນແລ້ວກໍຕາມ ເຮົາຍັງຕ້ອງສຳນຶກເຖິງຄວາມຈຳເປັນທີ່ຈະປ່ຽນແປງແລະພະຍາຍາມປັບປຸງຕົວເອງໃຫ້ດີຂຶ້ນບໍ?
16. ພະເຢໂຫວາຈັດຕຽມການຊ່ວຍເຫຼືອຫຍັງສຳລັບເຮົາເປັນສ່ວນບຸກຄົນ?
16 ດ້ວຍຄວາມຫ່ວງໃຍທີ່ເຕັມໄປດ້ວຍຄວາມຮັກ ພະເຢໂຫວາໄດ້ຊ່ວຍເຮົາໃຫ້ຮູ້ວິທີແກ້ໄຂບັນຫາຕ່າງໆ. ຫຼາຍລ້ານຄົນໄດ້ຮັບຄວາມຊ່ວຍເຫຼືອໂດຍຈັດໃຫ້ມີການສຶກສາຄຳພີໄບເບິນຕາມບ້ານເຮືອນ. ພໍ່ແມ່ແນະນຳແລະຕີສອນລູກຂອງຕົນເພື່ອປ້ອງກັນເຂົາເຈົ້າຈາກການປະພຶດທີ່ອາດສ້າງຄວາມເຈັບປວດໃຈ. (ສຸພາສິດ 6:20-23) ພາຍໃນປະຊາຄົມບາງຄົນມັກຂໍຄຳແນະນຳ ແລະການຊີ້ນຳຈາກຜູ້ຮັບໃຊ້ທີ່ມີປະສົບການເພື່ອປັບປຸງຄວາມພະຍາຍາມຂອງຕົນໃນວຽກງານການປະກາດ. ບາງຄັ້ງ ຜູ້ເຖົ້າແກ່ກໍຂໍຄຳແນະນຳຈາກຜູ້ເຖົ້າແກ່ອີກຄົນໜຶ່ງຫຼືຈາກຄົນອື່ນໆ ທີ່ມີປະສົບການໃນວຽກຮັບໃຊ້. ຜູ້ທີ່ມີຄຸນວຸທິຝ່າຍວິນຍານໃຊ້ຄຳພີໄບເບິນເພື່ອໃຫ້ການຊ່ວຍເຫຼືອຕໍ່ຜູ້ທີ່ຈຳເປັນຈະຕ້ອງໄດ້ຮັບຄວາມຊ່ວຍເຫຼືອດ້ວຍນ້ຳໃຈອ່ອນໂຍນ. ຖ້າເຮົາຕ້ອງໃຫ້ຄຳແນະນຳ ຢ່າລືມວ່າ “ຈົ່ງລະວັງຕົວເອງຢ້ານວ່າທ່ານຈະຖືກຄວາມທົດລອງດ້ວຍ.” (ຄາລາຊີ 6:1, 2) ແມ່ນແລ້ວ ເຮົາໝົດທຸກຄົນຈຳເປັນຕ້ອງໄດ້ຮັບຄຳແນະນຳແລະການຕີສອນເພື່ອຈະນະມັດສະການພະເຈົ້າທ່ຽງແທ້ແຕ່ອົງດຽວຢ່າງເປັນນ້ຳໜຶ່ງໃຈດຽວກັນ.
ການພິຈາລະນາທົບທວນ
• ດ້ວຍຄວາມຮັກ ພະເຢໂຫວາຊ່ວຍເຫຼືອເຮົາເພື່ອໃຫ້ເຫັນຈຸດທີ່ຕ້ອງປ່ຽນແປງຕົນເອງຢ່າງໃດ?
• ເປັນຫຍັງຈຶ່ງເປັນເລື່ອງຍາກສຳລັບຫຼາຍຄົນທີ່ຈະຮັບເອົາຄຳແນະນຳທີ່ຈຳເປັນ ແລະເລື່ອງນີ້ຮ້າຍແຮງພຽງໃດ?
• ຄຸນລັກສະນະຫຍັງທີ່ປະເມີນຄ່າບໍ່ໄດ້ເຊິ່ງຈະຊ່ວຍເຮົາໃຫ້ຍອມຮັບເອົາຄຳແນະນຳ ແລະພະເຍຊູວາງຕົວຢ່າງແນວໃດໃນເລື່ອງນີ້?
[ຮູບພາບໜ້າ 142]
ໂອເຊຍເຊປະຕິເສດຄຳແນະນຳແລະເປັນຂີ້ທູດ
[ຮູບພາບໜ້າ 142]
ໂມເຊໄດ້ຮັບປະໂຫຍດຈາກການຮັບຟັງຄຳແນະນຳຂອງເຢດໂລ