ບົດທີ 47

ເຈົ້າພ້ອມທີ່ຈະຮັບບັບເຕມາບໍ?

ສະບັບພິມ

ເມື່ອເຈົ້າຮຽນຄຳພີໄບເບິນມາຈົນຮອດຕອນນີ້ ເຈົ້າຄືຊິໄດ້ຮູ້ຫຼາຍຢ່າງກ່ຽວກັບພະເຢໂຫວາ. ໄດ້ຮູ້ວ່າເພິ່ນມັກຫຍັງບໍ່ມັກຫຍັງແລະເຈົ້າກໍພະຍາຍາມເຮັດຕາມສິ່ງທີ່ເພິ່ນບອກ. ແຕ່ເຈົ້າອາດຮູ້ສຶກວ່າຍັງບໍ່ພ້ອມທີ່ຈະອຸທິດໂຕໃຫ້ພະເຢໂຫວາແລະຮັບບັບເຕມາ. ໃນບົດນີ້ເຮົາຈະມາເບິ່ງວ່າມີບັນຫາຫຍັງແດ່ທີ່ອາດເຮັດໃຫ້ເຈົ້າບໍ່ພ້ອມທີ່ຈະຮັບບັບເຕມາແລະເຮົາຈະໄດ້ເບິ່ງນຳວ່າອັນໃດຈະຊ່ວຍໃຫ້ເຈົ້າພ້ອມທີ່ຈະຮັບບັບເຕມາ.

1. ເຈົ້າຕ້ອງມີຄວາມຮູ້ຫຼາຍສ່ຳໃດຈຶ່ງຈະຮັບບັບເຕມາໄດ້?

ເພື່ອຈະຮັບບັບເຕມາໄດ້ເຈົ້າຕ້ອງມີ “ຄວາມຮູ້ທີ່ຖືກຕ້ອງເລື່ອງຄວາມຈິງ.” (1 ຕີໂມທຽວ 2:4) ນີ້ບໍ່ໄດ້ໝາຍຄວາມວ່າເຈົ້າຕ້ອງຮູ້ທຸກເລື່ອງທີ່ຢູ່ໃນຄຳພີໄບເບິນກ່ອນຈຶ່ງຈະຮັບບັບເຕມາໄດ້. ເພາະແມ່ນແຕ່ຄົນທີ່ຮັບບັບເຕມາມາຫຼາຍປີແລ້ວກໍຍັງຕ້ອງຮຽນຫຼາຍຂຶ້ນເລື້ອຍໆ. (ໂກໂລຊາຍ 1:9, 10) ແຕ່ສິ່ງທີ່ເຈົ້າຕ້ອງຮູ້ກໍຄືຄຳສອນພື້ນຖານຂອງຄຳພີໄບເບິນ ແລະຖ້າເຈົ້າຢາກຮູ້ວ່າເຈົ້າມີຄວາມຮູ້ພຽງພໍແລ້ວບໍ ຜູ້ເບິ່ງແຍງໃນປະຊາຄົມຈະຊ່ວຍເຈົ້າໄດ້.

2. ມີຫຍັງອີກທີ່ເຈົ້າຕ້ອງເຮັດເພື່ອຈະຮັບບັບເຕມາໄດ້?

ກ່ອນທີ່ເຈົ້າຈະຮັບບັບເຕມາໄດ້ ເຈົ້າຕ້ອງ “ກັບໃຈແລະປ່ຽນແປງຊີວິດໃໝ່.” (ອ່ານກິດຈະການ 3:19) ນີ້ໝາຍຄວາມວ່າເຈົ້າຮູ້ສຶກເສຍໃຈແທ້ໆກັບຄວາມຜິດທຸກຢ່າງທີ່ເຄີຍເຮັດໄປແລະອະທິດຖານຂໍພະເຢໂຫວາໃຫ້ອະໄພເຈົ້າ. ແລ້ວເຈົ້າກໍຕ້ອງເຊົາເຮັດສິ່ງທີ່ພະເຢໂຫວາບອກວ່າຜິດແລະຕັ້ງໃຈໃຊ້ຊີວິດໃນແບບທີ່ເພິ່ນພໍໃຈນຳ. ນອກຈາກນັ້ນ ເຈົ້າຄວນໄປປະກາດແລະໄປປະຊຸມກັບປະຊາຄົມເປັນປະຈຳ.

3. ເປັນຫຍັງເຈົ້າບໍ່ຕ້ອງຢ້ານທີ່ຈະຮັບບັບເຕມາ?

ບາງຄົນບໍ່ກ້າຮັບບັບເຕມາຍ້ອນຢ້ານວ່າຈະເຮັດຕາມທີ່ສັນຍາໄວ້ກັບພະເຢໂຫວາບໍ່ໄດ້. ກໍແມ່ນຢູ່ ບາງຄັ້ງຄົນເຮົາອາດຈະເຮັດຜິດພາດ ຄຳພີໄບເບິນກໍບອກວ່າຄົນຂອງພະເຈົ້າທີ່ສັດຊື່ໃນສະໄໝກ່ອນກໍເຮັດຜິດພາດຄືກັນ. ແຕ່ຂໍໃຫ້ຈື່ໄວ້ວ່າພະເຢໂຫວາບໍ່ເຄີຍຄາດໝາຍຫຍັງທີ່ເກີນຄວາມສາມາດຂອງເຮົາ. (ອ່ານເພງສັນລະເສີນ 103:13, 14) ຖ້າເຈົ້າພະຍາຍາມເຮັດດີທີ່ສຸດເທົ່າທີ່ເຈົ້າເຮັດໄດ້ ພະເຢໂຫວາກໍຈະດີໃຈແລະຈະຊ່ວຍເຈົ້າ. ເພິ່ນຮັບຮອງກັບເຮົາວ່າ ‘ຈະບໍ່ມີຫຍັງຂັດຂວາງຄວາມຮັກທີ່ເພິ່ນສະແດງຕໍ່ພວກເຮົາ.’—ອ່ານໂຣມ 8:38, 39

ຮຽນຮູ້ຫຼາຍຂຶ້ນ

ມາເບິ່ງວ່າຖ້າເຈົ້າຮູ້ຈັກພະເຢໂຫວາຫຼາຍຂຶ້ນແລະໃຫ້ເພິ່ນຊ່ວຍເຈົ້າ ເຈົ້າກໍຈະເອົາຊະນະບັນຫາຕ່າງໆແລະພ້ອມທີ່ຈະຮັບບັບເຕມາໄດ້.

ຮູບ: ຜູ້ຍິງຄົນໜຶ່ງເອົາຊະນະບັນຫາແລະກ້າວໜ້າຈົນຮັບບັບເຕມາໄດ້. ຈະມີການເວົ້າເຖິງສາກຕ່າງໆຄືນອີກໃນບົດນີ້.

4. ຮູ້ຈັກພະເຢໂຫວາຫຼາຍຂຶ້ນ

ຜູ້ຍິງຄົນໜຶ່ງຮຽນຄຳພີໄບເບິນກັບພະຍານພະເຢໂຫວາ.

ເຈົ້າຕ້ອງຮູ້ຈັກພະເຢໂຫວາຫຼາຍສ່ຳໃດ? ກ່ອນທີ່ຈະຮັບບັບເຕມາ ເຈົ້າຕ້ອງຮູ້ຈັກພະເຢໂຫວາຫຼາຍພໍທີ່ຈະຮັກເພິ່ນແລະຢາກເຮັດໃຫ້ເພິ່ນພໍໃຈ. ເປີດວິດີໂອເພື່ອເບິ່ງວ່າອັນໃດຊ່ວຍຫຼາຍຄົນທີ່ຮຽນຄຳພີໄບເບິນໃຫ້ເຮັດແບບນັ້ນໄດ້. ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ເສັ້ນທາງສູ່ການຮັບບັບເຕມາ (3:56)

ຈາກວິດີໂອ ບາງຄົນເຮັດຫຍັງເພື່ອຈະຮັບບັບເຕມາໄດ້?

ອ່ານໂຣມ 12:2 ແລ້ວລົມກັນກ່ຽວກັບຄຳຖາມຕໍ່ໄປນີ້:

ໃນສິ່ງທີ່ຄຳພີໄບເບິນບອກຫຼືທີ່ພະຍານພະເຢໂຫວາສອນ ມີຫຍັງບໍທີ່ເຈົ້າຍັງບໍ່ແນ່ໃຈວ່າເປັນຄວາມຈິງ?
ຖ້າເປັນແນວນັ້ນ ເຈົ້າຄິດວ່າເຈົ້າຄວນເຮັດຫຍັງ?

5. ເອົາຊະນະບັນຫາທີ່ເຮັດໃຫ້ບໍ່ພ້ອມທີ່ຈະຮັບບັບເຕມາ

ຜູ້ຍິງຄົນດຽວກັນກຳລັງເອົາຄຳພີໄບເບິນໃສ່ກະເປົາ ຕອນນັ້ນແມ່ກຳລັງເວົ້າໃຫ້ລາວ.

ເມື່ອເຮົາຕັດສິນໃຈອຸທິດໂຕໃຫ້ພະເຢໂຫວາແລະຮັບບັບເຕມາ ກໍບໍ່ແປກທີ່ເຮົາອາດເຈິບັນຫາ. ໃຫ້ເຮົາມາເບິ່ງຕົວຢ່າງໜຶ່ງນຳກັນ ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ຄວາມຮັກຕໍ່ພະເຢໂຫວາເອົາຊະນະອຸປະສັກທຸກຢ່າງ (5:22)

ຈາກວິດີໂອ ເພື່ອຈະຮັບໃຊ້ພະເຢໂຫວາໄດ້ ນາເຣັງເກີເຣີຕ້ອງເອົາຊະນະບັນຫາຫຍັງແດ່?
ຄວາມຮັກທີ່ລາວມີຕໍ່ພະເຢໂຫວາຊ່ວຍລາວໃຫ້ເອົາຊະນະບັນຫາເຫຼົ່ານັ້ນໄດ້ແນວໃດ?

ອ່ານສຸພາສິດ 29:25 ແລະ 2 ຕີໂມທຽວ 1:7 ແລ້ວລົມກັນກ່ຽວກັບຄຳຖາມຕໍ່ໄປນີ້:

ອັນໃດຈະຊ່ວຍໃຫ້ເຮົາມີຄວາມກ້າທີ່ຈະເອົາຊະນະບັນຫາໄດ້?

6. ໄວ້ໃຈວ່າພະເຢໂຫວາຈະຊ່ວຍເຈົ້າໄດ້

ຜູ້ຍິງຄົນດຽວກັນໄປປະກາດນຳກັນກັບຜູ້ທີ່ສອນຄຳພີໄບເບິນໃຫ້ລາວ. ທັງຄູ່ກຳລັງລົມກັບປ້າຄົນໜຶ່ງ.

ພະເຢໂຫວາພ້ອມທີ່ຈະຊ່ວຍເຈົ້າສະເໝີ. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ພະເຢໂຫວາພະເຈົ້າຈະຊ່ວຍເຈົ້າ (2:50)

ຈາກວິດີໂອ ເປັນຫຍັງນັກສຶກສາຄົນໜຶ່ງບໍ່ກ້າທີ່ຈະອຸທິດໂຕໃຫ້ພະເຢໂຫວາແລະຮັບບັບເຕມາ?
ລາວຮູ້ຫຍັງກ່ຽວກັບພະເຢໂຫວາທີ່ຊ່ວຍໃຫ້ລາວໄວ້ໃຈເພິ່ນຫຼາຍຂຶ້ນ?

ອ່ານເອຊາຢາ 41:10, 13 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເຈົ້າໄດ້ສັນຍາກັບພະເຢໂຫວາຕອນທີ່ເຈົ້າອຸທິດໂຕໃຫ້ເພິ່ນ ເປັນຫຍັງເຈົ້າຈຶ່ງໝັ້ນໃຈວ່າຈະເຮັດຕາມສັນຍານັ້ນໄດ້?

7. ເຫັນຄ່າຫຼາຍຂຶ້ນໃນຄວາມຮັກທີ່ພະເຢໂຫວາມີຕໍ່ເຈົ້າ

ແຮ່ງເຈົ້າຄິດເຖິງພະເຢໂຫວາວ່າເພິ່ນຮັກເຈົ້າຫຼາຍສ່ຳໃດ ເຈົ້າກໍແຮ່ງຈະຮູ້ສຶກຂອບໃຈເພິ່ນ ແລະຖ້າເຈົ້າຮູ້ສຶກຂອບໃຈເພິ່ນຫຼາຍຂຶ້ນ ເຈົ້າກໍຈະຢາກຮັບໃຊ້ເພິ່ນຕະຫຼອດໄປ. ອ່ານເພງສັນລະເສີນ 40:5 ແລ້ວລົມກັນກ່ຽວກັບຄຳຖາມຕໍ່ໄປນີ້:

ມີສິ່ງດີໆຫຍັງແດ່ທີ່ມາຈາກພະເຢໂຫວາທີ່ເຈົ້າປະທັບໃຈເປັນພິເສດ?

ຜູ້ພະຍາກອນເຢເຣມີຢາຮັກພະເຢໂຫວາແລະຮັກຄຳສອນຂອງເພິ່ນ ແລະລາວຮູ້ສຶກຂອບໃຈທີ່ໄດ້ມີສິດທິພິເສດຮັບໃຊ້ພະເຢໂຫວາ. ລາວບອກວ່າ: “ຄຳເວົ້າຂອງພະອົງເຮັດໃຫ້ລູກມີຄວາມຍິນດີແລະມີຄວາມສຸກໃນໃຈ ຍ້ອນລູກຖືກເອີ້ນຕາມຊື່ຂອງພະອົງ.” (ເຢເຣມີຢາ 15:16) ຂໍໃຫ້ເຈົ້າຕອບຄຳຖາມຕໍ່ໄປນີ້: