ບົດທີ 36

ສັດຊື່ໃນທຸກເລື່ອງ

ສະບັບພິມ

ຜູ້ໃດກໍຢາກມີໝູ່ທີ່ເປັນຄົນສັດຊື່. ພະເຢໂຫວາກໍຢາກໃຫ້ໝູ່ຂອງເພິ່ນເປັນຄົນສັດຊື່ຄືກັນ. ແຕ່ບໍ່ງ່າຍເລີຍທີ່ຈະເປັນຄົນແບບນັ້ນເພາະຄົນສ່ວນຫຼາຍໃນໂລກນີ້ບໍ່ສັດຊື່. ແລ້ວການເປັນຄົນສັດຊື່ໃນທຸກເລື່ອງມີປະໂຫຍດຫຍັງແດ່?

1. ເຫດຜົນສຳຄັນທີ່ສຸດທີ່ເຮົາຕ້ອງເປັນຄົນສັດຊື່ແມ່ນຫຍັງ?

ເມື່ອເຮົາສັດຊື່ກັບຄົນອື່ນ ເຮົາກໍເຮັດໃຫ້ພະເຢໂຫວາເຫັນວ່າເຮົາຮັກແລະນັບຖືເພິ່ນ. ພະເຢໂຫວາຮູ້ວ່າເຮົາຄິດຫຍັງແລະເຫັນທຸກຢ່າງທີ່ເຮົາເຮັດ. (ເຮັບເຣີ 4:13) ຖ້າເຮົາເລືອກທີ່ຈະເປັນຄົນສັດຊື່ ພະເຢໂຫວາກໍເຫັນແລະດີໃຈທີ່ເຮົາເຮັດແບບນັ້ນ. ຄຳພີໄບເບິນບອກວ່າ: “ພະເຢໂຫວາຊັງຄົນທີ່ມີເລ່ລ່ຽມ ແຕ່ເພິ່ນເປັນໝູ່ສະໜິດກັບຄົນທີ່ເຮັດສິ່ງທີ່ຖືກຕ້ອງ.”—ສຸພາສິດ 3:32

2. ເຮົາຈະສັດຊື່ໃນເລື່ອງໃດແດ່?

ພະເຢໂຫວາຢາກໃຫ້ເຮົາ “ເວົ້າຄວາມຈິງຕໍ່ກັນ.” (ເຊຄາຣີຢາ 8:16, 17) ນີ້ໝາຍຄວາມວ່າແນວໃດ? ບໍ່ວ່າເຮົາຈະເວົ້າກັບຄົນໃນຄອບຄົວ ໝູ່ຢູ່ບ່ອນເຮັດວຽກ ພີ່ນ້ອງຄລິດສະຕຽນ ຫຼືເຈົ້າໜ້າທີ່ບ້ານເມືອງ ເຮົາຈະບໍ່ເວົ້າຕົວະຫຼືໃຫ້ຂໍ້ມູນທີ່ບໍ່ແມ່ນຄວາມຈິງ. ຄົນສັດຊື່ຈະບໍ່ລັກຫຼືສໍ້ໂກງຄົນອື່ນ. (ອ່ານສຸພາສິດ 24:28 ແລະເອເຟໂຊ 4:28) ແລະເຂົາເຈົ້າຈະຈ່າຍພາສີຄົບທຸກກີບຕາມທີ່ກົດໝາຍກຳນົດໄວ້. (ໂຣມ 13:5-7) ບໍ່ວ່າຈະເປັນເລື່ອງໃດກໍຕາມ ເຮົາຈະ “ປະພຶດໂຕສັດຊື່ໃນທຸກເລື່ອງ.”—ເຮັບເຣີ 13:18

3. ການເປັນຄົນສັດຊື່ມີປະໂຫຍດຫຍັງແດ່?

ຖ້າຄົນອື່ນຮູ້ວ່າເຮົາເປັນຄົນສັດຊື່ ເຂົາເຈົ້າກໍຈະໄວ້ໃຈເຮົາ. ເຮົາຈະຊ່ວຍໃຫ້ທຸກຄົນໃນປະຊາຄົມຮູ້ສຶກປອດໄພ ຄືກັບໄດ້ຢູ່ໃນຄອບຄົວທີ່ຮັກກັນ. ການເປັນຄົນສັດຊື່ເຮັດໃຫ້ເຮົາຮູ້ສຶກສະບາຍໃຈ. ນອກຈາກນັ້ນ ຖ້າເຮົາເປັນຄົນສັດຊື່ ເຮົາກໍຈະເຮັດໃຫ້ “ຄຳສອນຂອງພະເຈົ້າຜູ້ຊ່ວຍໃຫ້ລອດຂອງພວກເຮົາໄດ້ຮັບການຍົກຍ້ອງໃນທຸກດ້ານ” ແລະເຮັດໃຫ້ຄົນອື່ນຢາກຮູ້ຈັກພະເຢໂຫວານຳ.—ຕີໂຕ 2:10

ຮຽນຮູ້ຫຼາຍຂຶ້ນ

ໃຫ້ເຮົາມາເບິ່ງວ່າການເປັນຄົນສັດຊື່ຈະເຮັດໃຫ້ພະເຢໂຫວາຮູ້ສຶກແນວໃດ ເຈົ້າເອງຈະໄດ້ຮັບປະໂຫຍດຫຍັງ ແລະເຈົ້າຈະເປັນຄົນສັດຊື່ໃນສະຖານະການຕ່າງໆໄດ້ແນວໃດ.

4. ພະເຢໂຫວາມັກຄົນທີ່ສັດຊື່

ອ່ານເພງສັນລະເສີນ 44:21 ແລະມາລາກີ 3:16 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເປັນຫຍັງເຮົາບໍ່ຄວນຄິດວ່າເຮົາຈະປິດບັງບາງເລື່ອງໄວ້ໄດ້?
ເຈົ້າຄິດວ່າພະເຢໂຫວາຈະຮູ້ສຶກແນວໃດຖ້າເຮົາເລືອກທີ່ຈະເວົ້າຄວາມຈິງ ເຖິງວ່າບາງຄັ້ງການເຮັດແບບນັ້ນອາດຈະບໍ່ງ່າຍ?

ເດັກນ້ອຍຜູ້ຍິງຄົນໜຶ່ງລົມກັບພໍ່ທີ່ກຳລັງຄູ້ເຂົ່າແນມເບິ່ງລາວ. ຈອກນ້ຳໝາກໄມ້ລົ້ມແລະນ້ຳໝາກໄມ້ໄຫຼລົງທາງຂ້າງໂຕະ. — ເມື່ອລູກເວົ້າຄວາມຈິງ ພໍ່ແມ່ກໍມີຄວາມສຸກ. ເມື່ອເຮົາເວົ້າຄວາມຈິງ ພະເຢໂຫວາກໍມີຄວາມສຸກ

5. ເປັນຄົນສັດຊື່ຕະຫຼອດເວລາ

ຫຼາຍຄົນຄິດວ່າເປັນໄປບໍ່ໄດ້ທີ່ຄົນເຮົາຈະສັດຊື່ໃນທຸກເລື່ອງ. ແຕ່ໃຫ້ເຮົາມາເບິ່ງວ່າເປັນຫຍັງເຮົາຕ້ອງເປັນຄົນສັດຊື່ຕະຫຼອດເວລາ. ເປີດວິດີໂອ.

ວິດີໂອ: ສິ່ງໃດທີ່ເຮັດໃຫ້ມີຄວາມສຸກ?—ໃຈຮູ້ຜິດຮູ້ຖືກທີ່ສະອາດ (2:32)

ສາກໜຶ່ງຈາກວິດີໂອ ‘ສິ່ງໃດທີ່ເຮັດໃຫ້ມີຄວາມສຸກ?—ໃຈຮູ້ຜິດຮູ້ຖືກທີ່ສະອາດ.’ ຫຼັງຈາກທີ່ເບັນສາລະພາບກັບຫົວໜ້າວ່າລາວເຮັດຜິດພາດເຊິ່ງເຮັດໃຫ້ເກີດຄວາມເສຍຫາຍຫຼາຍ ເຂົາເຈົ້າຈັບມືກັນ.

ອ່ານເຮັບເຣີ 13:18 ແລ້ວລົມກັນວ່າເຮົາຈະສັດຊື່ໄດ້ແນວໃດ . . .

ກັບຄົນໃນຄອບຄົວ.
ຢູ່ບ່ອນເຮັດວຽກຫຼືຢູ່ໂຮງຮຽນ.
ໃນໂອກາດອື່ນໆ.

6. ເຮົາໄດ້ຮັບປະໂຫຍດຈາກການເປັນຄົນສັດຊື່

ການເປັນຄົນສັດຊື່ອາດຈະເຮັດໃຫ້ເຮົາຕ້ອງເຈິກັບບັນຫາແດ່. ແຕ່ໃນທີ່ສຸດ ເຮົາຈະໄດ້ຮັບປະໂຫຍດແນ່ນອນ. ອ່ານເພງສັນລະເສີນ 34:12-16 ແລ້ວລົມກັນກ່ຽວກັບຄຳຖາມຕໍ່ໄປນີ້: