ບົດທີ 51
ເຈົ້າຈະເວົ້າໃນແບບທີ່ເຮັດໃຫ້ພະເຢໂຫວາພໍໃຈໄດ້ແນວໃດ?
ເມື່ອພະເຢໂຫວາສ້າງເຮົາ ເພິ່ນເຮັດໃຫ້ເຮົາມີຄວາມສາມາດທີ່ຈະເວົ້າ. ນີ້ເປັນຂອງຂວັນທີ່ສຸດຍອດຫຼາຍ. ແຕ່ເພິ່ນສົນໃຈບໍວ່າເຮົາຈະໃຊ້ຂອງຂວັນນີ້ແນວໃດ? ເພິ່ນສົນໃຈແນ່ນອນ! (ອ່ານຢາໂກໂບ 1:26) ຖ້າເປັນແນວນັ້ນ ເຮົາຈະເວົ້າໃນແບບທີ່ເຮັດໃຫ້ພະເຢໂຫວາພໍໃຈໄດ້ແນວໃດ?
1. ເຮົາຈະໃຊ້ຂອງຂວັນທີ່ເຮົາໄດ້ຮັບຈາກພະເຢໂຫວາໃຫ້ເປັນປະໂຫຍດໄດ້ແນວໃດ?
ຄຳພີໄບເບິນບອກໃຫ້ເຮົາ “ໃຫ້ກຳລັງໃຈກັນແລະເສີມສ້າງກັນໃຫ້ເຂັ້ມແຂງຢູ່ສະເໝີ.” (1 ເທຊະໂລນິກ 5:11) ເຈົ້າຮູ້ຈັກໃຜບໍທີ່ຕ້ອງການກຳລັງໃຈ? ເຈົ້າຈະເຮັດແນວໃດເພື່ອຊ່ວຍໃຫ້ເຂົາເຈົ້າຮູ້ສຶກດີຂຶ້ນ? ເຈົ້າອາດຈະບອກວ່າ ເຈົ້າເປັນຫ່ວງເຂົາເຈົ້າຫຼາຍ ຫຼືບອກວ່າເຈົ້າເຫັນຂໍ້ດີຫຍັງແດ່ໃນໂຕເຂົາເຈົ້າ. ນອກຈາກນັ້ນ ເຈົ້າອາດຈະຄິດເຖິງຂໍ້ຄຳພີຈັກຂໍ້ໜຶ່ງທີ່ຈະເຮັດໃຫ້ຄົນທີ່ເຈົ້າຮູ້ຈັກໄດ້ຮັບກຳລັງໃຈ. ມີຂໍ້ຄຳພີຫຼາຍຂໍ້ທີ່ຈະໃຊ້ເພື່ອໃຫ້ກຳລັງໃຈເຂົາເຈົ້າໄດ້ ແລະຂໍໃຫ້ຈື່ໄວ້ວ່າ ວິທີທີ່ເຈົ້າເວົ້າຈະໃຫ້ກຳລັງໃຈຄົນອື່ນໄດ້ຫຼາຍຄືກັນ. ດັ່ງນັ້ນ ຂໍໃຫ້ພະຍາຍາມເວົ້າດີໆແລະເວົ້າມ່ວນໆກັບຄົນອື່ນສະເໝີ.—ສຸພາສິດ 15:1
2. ຄຳເວົ້າແບບໃດທີ່ເຮົາບໍ່ຄວນເວົ້າ?
ຄຳພີໄບເບິນບອກວ່າ: “ຢ່າໃຫ້ຄຳຫຍາບຄາຍອອກມາຈາກປາກຂອງພວກເຈົ້າ.” (ອ່ານເອເຟໂຊ 4:29) ນີ້ໝາຍຄວາມວ່າເຮົາຕ້ອງບໍ່ເວົ້າຄຳຫຍາບ ບໍ່ເວົ້າສຽດສີ ຫຼືບໍ່ເວົ້າຫຍັງກໍຕາມທີ່ອາດເຮັດໃຫ້ຄົນອື່ນຮູ້ສຶກເສຍໃຈ ແລະເຮົາກໍຈະບໍ່ເວົ້າຊຸບຊິບນິນທາຫຼືເວົ້າໃສ່ຮ້າຍຄົນອື່ນນຳ.—ອ່ານສຸພາສິດ 16:28
3. ເຮົາຕ້ອງເຮັດຫຍັງເພື່ອຈະເວົ້າໃຫ້ກຳລັງໃຈຄົນອື່ນໄດ້?
ສິ່ງທີ່ເຮົາເວົ້າຈະເຮັດໃຫ້ຄົນອື່ນຮູ້ວ່າເຮົາຄິດຫຍັງແລະຮູ້ສຶກແນວໃດແທ້ໆ. (ລູກາ 6:45) ດັ່ງນັ້ນ ເຮົາຕ້ອງຝຶກໂຕເອງໃຫ້ຄິດແຕ່ເລື່ອງດີໆຄື ເລື່ອງທີ່ຖືກຕ້ອງ ເລື່ອງທີ່ບໍລິສຸດ ເລື່ອງທີ່ໜ້າຮັກ ແລະເລື່ອງທີ່ໜ້າຍົກຍ້ອງ. (ຟີລິບປອຍ 4:8) ເພື່ອຈະເຮັດແບບນັ້ນໄດ້ ເຮົາຕ້ອງເລືອກຄວາມບັນເທີງທີ່ດີແລະເລືອກໝູ່ທີ່ດີ. (ສຸພາສິດ 13:20) ນອກຈາກນັ້ນ ເຮົາຕ້ອງຄິດກ່ອນວ່າເຮົາຈະເວົ້າຫຍັງແລະຈະເວົ້າແບບໃດ ແລະຄິດເບິ່ງນຳວ່າສິ່ງທີ່ເຮົາເວົ້າຈະເຮັດໃຫ້ຄົນອື່ນຮູ້ສຶກແນວໃດ. ຄຳພີໄບເບິນບອກວ່າ: “ຄຳເວົ້າທີ່ບໍ່ຄິດເປັນຄືກັບດາບທີ່ສຽບແທງ ແຕ່ຄຳເວົ້າຂອງຄົນສະຫຼາດຈະຊ່ວຍປິ່ນປົວໄດ້.”—ສຸພາສິດ 12:18
ຮຽນຮູ້ຫຼາຍຂຶ້ນ
ເຮົາຈະເວົ້າໃນແບບທີ່ເຮັດໃຫ້ພະເຢໂຫວາພໍໃຈແລະໃຫ້ກຳລັງໃຈຄົນອື່ນໄດ້ແນວໃດ.
4. ຄວບຄຸມຄຳເວົ້າຂອງເຈົ້າ
ບາງເທື່ອສິ່ງທີ່ເຮົາເວົ້າອອກໄປອາດເຮັດໃຫ້ເຮົາເສຍໃຈພາຍຫຼັງ. (ຢາໂກໂບ 3:2) ອ່ານຄາລາເຕຍ 5:22, 23 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເພື່ອເຈົ້າຈະຄວບຄຸມຄຳເວົ້າຂອງໂຕເອງ ເຈົ້າຈະອະທິດຖານຂໍຄຸນລັກສະນະຫຍັງຈາກພະເຢໂຫວາ? ເຈົ້າຄິດວ່າຄຸນລັກສະນະເຫຼົ່ານີ້ຈະຊ່ວຍເຈົ້າໄດ້ແນວໃດ?
ອ່ານ 1 ໂກຣິນໂທ 15:33 ແລ້ວລົມກັນກ່ຽວກັບຄຳຖາມຕໍ່ໄປນີ້:
ໝູ່ຂອງເຈົ້າແລະຄວາມບັນເທີງທີ່ເຈົ້າເລືອກອາດມີຜົນຕໍ່ວິທີທີ່ເຈົ້າເວົ້າແນວໃດ?
ອັນໃດອາດມີຜົນຕໍ່ວິທີທີ່ເຈົ້າເວົ້າກັບຄົນອື່ນ?
ອ່ານປັນຍາຈານ 3:1, 7 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເຈົ້າຄິດວ່າຕອນໃດທີ່ຄວນງຽບຫຼືຕອນໃດທີ່ຄວນລໍຖ້າໃຫ້ເຖິງເວລາທີ່ເໝາະສົມກ່ອນຈຶ່ງຄ່ອຍເວົ້າ?
5. ເວົ້າເຖິງຄົນອື່ນໃນທາງທີ່ດີ
ເຮົາຈະເວົ້າເຖິງຄົນອື່ນໃນທາງທີ່ດີຫຼືບໍ່ວິພາກວິຈານເຂົາເຈົ້າໄດ້ແນວໃດ? ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
ໃນວິດີໂອ ເປັນຫຍັງພີ່ນ້ອງຊາຍຈຶ່ງຢາກປ່ຽນວິທີທີ່ລາວເວົ້າເຖິງຄົນອື່ນ?
ລາວເຮັດຫຍັງເພື່ອປ່ຽນແປງໂຕເອງ?
ອ່ານປັນຍາຈານ 7:16 ແລ້ວລົມກັນກ່ຽວກັບຄຳຖາມຕໍ່ໄປນີ້:
ບາງເທື່ອເຮົາອາດຮູ້ສຶກຢາກຈະເວົ້າເຖິງຄົນອື່ນໃນທາງທີ່ບໍ່ດີ ແຕ່ຄຳແນະນຳໃນຂໍ້ຄຳພີນີ້ຈະຊ່ວຍເຮົາໄດ້ແນວໃດ?
ອ່ານປັນຍາຈານ 7:21, 22 ແລ້ວລົມກັນກ່ຽວກັບຄຳຖາມຕໍ່ໄປນີ້:
ຖ້າມີບາງຄົນເວົ້າເຖິງເຈົ້າໃນທາງທີ່ບໍ່ດີ ຂໍ້ຄຳພີນີ້ຈະຊ່ວຍເຈົ້າບໍ່ໃຫ້ໃຈຮ້າຍໄດ້ແນວໃດ?
6. ເວົ້າດີໆກັບຄົນໃນຄອບຄົວຂອງເຈົ້າ
ພະເຢໂຫວາຢາກໃຫ້ເຮົາເວົ້າດີໆແລະເວົ້າມ່ວນໆກັບຄົນໃນຄອບຄົວ. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
ອັນໃດຈະຊ່ວຍໃຫ້ເຈົ້າເວົ້າດີໆແລະເວົ້າມ່ວນໆກັບຄົນໃນຄອບຄົວ?
ອ່ານເອເຟໂຊ 4:31, 32 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເຮົາຄວນເວົ້າແນວໃດເພື່ອເຮັດໃຫ້ຄົນໃນຄອບຄົວຮູ້ສຶກວ່າເຮົາຮັກເຂົາເຈົ້າ?
ພະເຢໂຫວາບອກວ່າ ເພິ່ນຮັກພະເຢຊູລູກຊາຍຂອງເພິ່ນຫຼາຍ. ອ່ານມັດທາຍ 17:5 ແລ້ວລົມກັນກ່ຽວກັບຄຳຖາມຕໍ່ໄປນີ້:
ເມື່ອເຈົ້າລົມກັບຄົນໃນຄອບຄົວ ເຈົ້າຈະຮຽນແບບພະເຢໂຫວາໄດ້ແນວໃດ?
ຫາໂອກາດທີ່ຈະຊົມເຊີຍຄົນອື່ນ
ບາງຄົນເວົ້າວ່າ: “ຂ້ອຍເປັນຄົນເວົ້າກົງໆ. ຖ້າບໍ່ມັກກໍຊ່ວຍບໍ່ໄດ້.”
ເຈົ້າເຫັນດີນຳບໍ? ຍ້ອນຫຍັງ?
ສະຫຼຸບ
ສິ່ງທີ່ເຮົາເວົ້າອາດເຮັດໃຫ້ຄົນອື່ນໄດ້ກຳລັງໃຈຫຼືເສຍໃຈກໍໄດ້. ເຮົາຕ້ອງຄິດໃຫ້ດີກ່ອນວ່າຈະເວົ້າຫຍັງ ຈະເວົ້າຕອນໃດ ແລະຈະເວົ້າແນວໃດ.
ຄຳຖາມທົບທວນ
ເຈົ້າຈະເວົ້າໃຫ້ກຳລັງໃຈຄົນອື່ນໄດ້ແນວໃດ?
ຄຳເວົ້າແບບໃດທີ່ເຈົ້າບໍ່ຄວນເວົ້າ?
ເຮົາຕ້ອງເຮັດຫຍັງເພື່ອຈະເວົ້າດີໆກັບຄົນອື່ນສະເໝີແລະໃຫ້ກຳລັງໃຈເຂົາເຈົ້າໄດ້?
ເບິ່ງເພີ່ມເຕີມ
ອັນໃດຈະຊ່ວຍໃຫ້ເຮົາເວົ້າໃນແບບທີ່ໃຫ້ກຳລັງໃຈຄົນອື່ນໄດ້?
ອັນໃດຈະຊ່ວຍໃຫ້ເຈົ້າບໍ່ເວົ້າຫຍາບຄາຍ?
ເຈົ້າຈະບໍ່ເວົ້າຊຸບຊິບນິນທາຄົນອື່ນໄດ້ແນວໃດ?
ເມື່ອຜູ້ຊາຍຄົນໜຶ່ງໄດ້ຮຽນຄຳພີໄບເບິນແລະຮູ້ຈັກພະເຢໂຫວາ ລາວເຊົາເວົ້າຫຍາບຄາຍໄດ້ແນວໃດ.
“ຂ້ອຍເລີ່ມຄິດເຖິງເປົ້າໝາຍຂອງຊີວິດຢ່າງຈິງຈັງ” (ຫໍສັງເກດການ1 ສິງຫາ 2013)