ໄວໜຸ່ມທັງຫຼາຍ ເຈົ້າຈະກຽມຕົວແນວໃດສຳລັບການຮັບບັບເຕມາ?
‘ໂອ້ພະເຈົ້າເຈົ້າຂ້າ ຂ້ານ້ອຍມີຄວາມຍິນດີຈະກະທຳການຕາມທີ່ຊອບໃຈພະອົງ.’—ຄຳເພງ 40:8
ເພງ: 51, 58
1, 2. (ກ) ຂໍໃຫ້ອະທິບາຍວ່າເປັນຫຍັງການຮັບບັບເຕມາຈຶ່ງເປັນເລື່ອງທີ່ຈິງຈັງ. (ຂ) ກ່ອນທີ່ຄົນໃດຄົນໜຶ່ງຈະຮັບບັບເຕມາ ລາວຕ້ອງແນ່ໃຈໃນເລື່ອງໃດ ແລະຍ້ອນຫຍັງ?
ເຈົ້າເປັນໄວໜຸ່ມທີ່ຕ້ອງການຈະຮັບບັບເຕມາບໍ? ຖ້າແມ່ນ ເລື່ອງນີ້ກໍເປັນກຽດທີ່ຍິ່ງໃຫຍ່ທີ່ສຸດທີ່ເຈົ້າຈະມີໄດ້. ດັ່ງທີ່ໄດ້ກ່າວໄປແລ້ວໃນບົດຄວາມກ່ອນ ການຮັບບັບເຕມາເປັນການຕັດສິນໃຈທີ່ຈິງຈັງ. ການເຮັດເຊັ່ນນີ້ຈະສະແດງໃຫ້ຄົນອື່ນຮູ້ວ່າເຈົ້າໄດ້ອຸທິດຕົວເອງໃຫ້ແກ່ພະເຢໂຫວາແລ້ວ ນັ້ນໝາຍຄວາມວ່າເຈົ້າໄດ້ສັນຍາຕໍ່ພະອົງວ່າຈະຮັບໃຊ້ພະອົງຕະຫຼອດໄປ ແລະການເຮັດຕາມຈຸດປະສົງຂອງພະອົງເປັນສິ່ງສຳຄັນທີ່ສຸດໃນຊີວິດຂອງເຈົ້າ. ເນື່ອງຈາກການເຮັດເຊັ່ນນີ້ເປັນຄຳສັນຍາທີ່ຈິງຈັງຕໍ່ພະເຢໂຫວາ ດັ່ງນັ້ນ ເຈົ້າຄວນຮັບບັບເຕມາເມື່ອເຈົ້າມີຄວາມເປັນຜູ້ໃຫຍ່ຢ່າງເຕັມທີ ເມື່ອເຈົ້າມີຄວາມປາຖະໜາເອງໃນການເຮັດເຊັ່ນນັ້ນ ແລະເມື່ອເຈົ້າເຂົ້າໃຈຄວາມໝາຍຂອງການອຸທິດຕົວໃຫ້ແກ່ພະເຈົ້າ.
2 ຢ່າງໃດກໍຕາມ ເຈົ້າອາດຮູ້ສຶກວ່າເຈົ້າຍັງບໍ່ພ້ອມທີ່ຈະຮັບບັບເຕມາ ຫຼືເຈົ້າອາດຮູ້ສຶກວ່າເຈົ້າພ້ອມແລ້ວ ແຕ່ພໍ່ແມ່ພັດຄິດວ່າເຈົ້າຄວນຈະລໍຖ້າຈົນກວ່າເຈົ້າໃຫຍ່ກວ່ານີ້ແລະມີປະສົບການໃນຊີວິດຫຼາຍຕື່ມອີກ. ເຈົ້າຄວນເຮັດແນວໃດ? ຢ່າໝົດກຳລັງໃຈ. ແທນທີ່ຈະຮູ້ສຶກເຊັ່ນນັ້ນ ໃຫ້ໃຊ້ເວລານີ້ທຳຄວາມກ້າວໜ້າ ເພື່ອວ່າອີກບໍ່ດົນເຈົ້າກໍຈະມີຄຸນສົມບັດທີ່ຈະຮັບບັບເຕມາໄດ້. ໃນຂະນະທີ່ຕັ້ງໃຈເຮັດເຊັ່ນນັ້ນ ເຈົ້າສາມາດຕັ້ງເປົ້າໝາຍໃນສາມຂອບເຂດຄື: (1) ຄວາມເຊື່ອໝັ້ນ ຫຼືຄວາມເຊື່ອຂອງເຈົ້າ (2) ການກະທຳຂອງເຈົ້າ ແລະ (3) ຄວາມຮູ້ບຸນຄຸນຂອງເຈົ້າ.
ຄວາມເຊື່ອໝັ້ນຂອງເຈົ້າ
3, 4. ຄົນທີ່ເປັນໄວໜຸ່ມສາມາດໄດ້ບົດຮຽນຫຍັງຈາກຕົວຢ່າງຂອງຕີໂມເຕ?
3 ໃຫ້ຄິດກ່ຽວກັບວິທີທີ່ເຈົ້າຈະຕອບຄຳຖາມເຫຼົ່ານີ້ຄື: ເປັນຫຍັງຂ້ອຍຈຶ່ງເຊື່ອວ່າພະເຈົ້າມີຢູ່ຈິງ? ເປັນຫຍັງຂ້ອຍຈຶ່ງໝັ້ນໃຈໄດ້ວ່າຄຳພີໄບເບິນມາຈາກພະເຈົ້າ? ເປັນຫຍັງຂ້ອຍຈຶ່ງເຊື່ອຟັງຄຳສັ່ງຂອງພະເຈົ້າແທນທີ່ຈະຮຽນແບບມາດຕະຖານທາງດ້ານສິນລະທຳຂອງໂລກນີ້? ຄຳຖາມເຫຼົ່ານີ້ສາມາດຊ່ວຍເຈົ້າໃຫ້ເຮັດຕາມຄຳແນະນຳທີ່ໃຫ້ຜ່ານທາງໂປໂລທີ່ວ່າ: ‘ຈົ່ງເຮັດໃຫ້ແນ່ໃຈວ່ານ້ຳໃຈຂອງພະເຈົ້າເປັນອັນດີແລະເປັນທີ່ຊອບໃຈແລະສົມບູນພ້ອມ.’ (ໂລມ 12:2) ເປັນຫຍັງເຈົ້າຄວນເຮັດແບບນັ້ນ?
ຕີໂມເຕຍອມຮັບເອົາຄວາມຈິງຍ້ອນວ່າລາວຫາເຫດຜົນໃນສິ່ງທີ່ລາວໄດ້ຮຽນຮູ້ແລະທີ່ໄດ້ຮັບການຊ່ວຍໃຫ້ເຊື່ອໝັ້ນ
4 ຕົວຢ່າງຂອງຕີໂມເຕສາມາດຊ່ວຍເຈົ້າໄດ້. ຕີໂມເຕມີຄວາມຮູ້ໃນພະຄຳພີເປັນຢ່າງດີເພາະວ່າແມ່ແລະແມ່ຕູ້ໄດ້ສອນພະຄຳພີໃຫ້ລາວ. ຢ່າງໃດກໍຕາມ ໂປໂລໄດ້ບອກຕີໂມເຕວ່າ: ‘ຈົ່ງເຮັດຕາມສິ່ງທີ່ເຈົ້າໄດ້ຮຽນຮູ້ແລະທີ່ເຈົ້າໄດ້ຮັບການຊ່ວຍໃຫ້ເຊື່ອໝັ້ນ.’ (2 ຕີໂມເຕ 3:14, 15) ໃນນີ້ຄຳວ່າ “ເຊື່ອໝັ້ນ” ໝາຍຄວາມວ່າ “ໝັ້ນໃຈແລະແນ່ໃຈວ່າບາງສິ່ງເປັນຄວາມຈິງ.” ດັ່ງນັ້ນ ຕີໂມເຕຕ້ອງໝັ້ນໃຈວ່າລາວສາມາດພົບຄວາມຈິງໃນພະຄຳພີໄດ້. ລາວຍອມຮັບວ່າສິ່ງທີ່ໄດ້ຮຽນຮູ້ນັ້ນເປັນຄວາມຈິງ ບໍ່ແມ່ນຍ້ອນວ່າແມ່ຫຼືແມ່ຕູ້ບອກໃຫ້ລາວຍອມຮັບເອົາ ແຕ່ຍ້ອນວ່າລາວຫາເຫດຜົນໃນສິ່ງທີ່ລາວໄດ້ຮຽນຮູ້ແລະທີ່ໄດ້ຮັບການຊ່ວຍໃຫ້ເຊື່ອໝັ້ນ.—ອ່ານໂລມ 12:1
5, 6. ເປັນຫຍັງຈຶ່ງສຳຄັນທີ່ເຈົ້າຄວນຮຽນຮູ້ທີ່ຈະໃຊ້ “ຄວາມສາມາດໃນການໃຊ້ເຫດຜົນ” ຕັ້ງແຕ່ເຈົ້າຍັງນ້ອຍ?
5 ແລ້ວເຈົ້າເດ? ເຈົ້າອາດຮູ້ຈັກຄວາມຈິງເປັນເວລາດົນແລ້ວ. ຖ້າເປັນແນວນັ້ນ ໃຫ້ເຈົ້າຕັ້ງເປົ້າໝາຍທີ່ຈະຄິດເຖິງເຫດຜົນຕ່າງໆທີ່ເຮັດໃຫ້ເຈົ້າເຊື່ອແບບນັ້ນ. ການເຮັດເຊັ່ນນັ້ນຈະຊ່ວຍໃຫ້ຄວາມເຊື່ອຂອງເຈົ້າເຂັ້ມແຂງຂຶ້ນແລະໃຫ້ຫຼີກລ່ຽງການຕັດສິນໃຈຕ່າງໆທີ່ຜິດພາດຍ້ອນຄວາມກົດດັນຂອງຄົນໃນໄວດຽວກັນ ຄວາມຄິດຂອງຄົນໃນໂລກນີ້ ຫຼືແມ່ນແຕ່ຄວາມຮູ້ສຶກຂອງເຈົ້າເອງ.
6 ຖ້າເຈົ້າຮຽນຮູ້ທີ່ຈະໃຊ້ “ຄວາມສາມາດໃນການໃຊ້ເຫດຜົນ, ລ.ມ.” ໃນຂະນະທີ່ເຈົ້າຍັງໜຸ່ມຍັງນ້ອຍ ເຈົ້າຈະສາມາດຕອບຄຳຖາມຕ່າງໆທີ່ຄົນໃນໄວດຽວກັນຖາມ ເຊັ່ນ: ‘ເຈົ້າແນ່ໃຈໄດ້ແນວໃດວ່າມີພະເຈົ້າ? ຖ້າພະເຈົ້າຮັກເຮົາ ເປັນຫຍັງພະອົງຈຶ່ງຍອມໃຫ້ມີສິ່ງທີ່ບໍ່ດີເກີດຂຶ້ນ? ເປັນໄປໄດ້ແນວໃດວ່າພະເຈົ້າມີຊີວິດຢູ່ຕະຫຼອດເວລາ?’ ເມື່ອເຈົ້າກຽມຕົວໃຫ້ພ້ອມ ຄຳຖາມເຫຼົ່ານີ້ຈະບໍ່ເຮັດໃຫ້ເຈົ້າຄິດສົງໄສໃນໃຈ ແຕ່ຈະກະຕຸ້ນເຈົ້າໃຫ້ສຶກສາຄຳພີໄບເບິນຫຼາຍຂຶ້ນ.
7-9. ຂໍໃຫ້ອະທິບາຍວ່າບົດຄວາມຊຸດສຳລັບຄູ່ມືການສຶກສາທີ່ມີໃນອິນເຕີເນັດເຊິ່ງຊື່ວ່າ “ຄຳພີໄບເບິນສອນຫຍັງ?” ສາມາດຊ່ວຍເສີມສ້າງຄວາມເຊື່ອໝັ້ນຂອງເຈົ້າໃຫ້ເຂັ້ມແຂງຂຶ້ນໄດ້.
7 ການສຶກສາສ່ວນຕົວຢ່າງລະອຽດສາມາດຊ່ວຍເຈົ້າໃຫ້ຕອບຄຳຖາມຕ່າງໆ ກຳຈັດຂໍ້ສົງໄສໃດໆກໍຕາມ ແລະເສີມສ້າງຄວາມເຊື່ອໝັ້ນຂອງເຈົ້າ. (ກິດຈະການ 17:11) ພວກເຮົາມີສັບພະໜັງສືມາກມາຍທີ່ສາມາດຊ່ວຍເຮົາໃຫ້ເຮັດເຊັ່ນນັ້ນໄດ້. ຫຼາຍຄົນເຫັນວ່າເປັນປະໂຫຍດທີ່ຈະສຶກສາຈຸນລະສານຕົ້ນກຳເນີດຊີວິດ—ຫ້າຄຳຖາມທີ່ໜ້າຄິດ (ພາສາໄທ) ແລະປຶ້ມພະຜູ້ສ້າງໃຝ່ພະໄທໃນຕົວຄຸນມີໄໝ? (ພາສາໄທ) ນອກຈາກນັ້ນ ໜຸ່ມສາວຫຼາຍຄົນຍັງມ່ວນແລະໄດ້ຮັບປະໂຫຍດຈາກບົດຄວາມຊຸດທີ່ມີຊື່ວ່າ “ຄຳພີໄບເບິນສອນຫຍັງ?” ໃນເວັບໄຊ jw.org/th ເຊິ່ງຢູ່ໃນຫົວຂໍ້ “ຄຳສອນຂອງຄຳພີໄບເບິນ.” ຄູ່ມືການສຶກສາແຕ່ລະຢ່າງທີ່ຢູ່ໃນບົດຄວາມຊຸດນີ້ອອກແບບມາເພື່ອຊ່ວຍເສີມສ້າງຄວາມເຊື່ອໝັ້ນຂອງເຈົ້າກ່ຽວກັບເລື່ອງໃນຄຳພີໄບເບິນ.
8 ເນື່ອງຈາກເປັນນັກສຶກສາຄຳພີໄບເບິນ ດັ່ງນັ້ນ ເຈົ້າອາດຮູ້ຄຳຕອບຢູ່ແລ້ວສຳລັບຄຳຖາມບາງຂໍ້ທີ່ມີຢູ່ໃນຄູ່ມືການສຶກສານີ້. ແຕ່ເຈົ້າໝັ້ນໃຈໃນຄຳຕອບຂອງເຈົ້າບໍ? ຄູ່ມືການສຶກສານີ້ຈະຊ່ວຍເຈົ້າໃຫ້ຄິດຢ່າງລະອຽດກ່ຽວກັບຂໍ້ພະຄຳພີຕ່າງໆ ແລ້ວຈາກນັ້ນກໍຈະກະຕຸ້ນເຈົ້າໃຫ້ຂຽນເຫດຜົນຕ່າງໆກ່ຽວກັບຄວາມເຊື່ອຂອງເຈົ້າ. ການເຮັດເຊັ່ນນັ້ນຈະຊ່ວຍເຈົ້າໃຫ້ຮູ້ວິທີອະທິບາຍກັບຄົນອື່ນກ່ຽວກັບຄວາມເຊື່ອຂອງເຈົ້າ. ຖ້າເຈົ້າເຂົ້າໄປເບິ່ງບົດຄວາມຊຸດທີ່ມີໃນອິນເຕີເນັດເຊິ່ງຊື່ວ່າ “ຄຳພີໄບເບິນສອນຫຍັງ?” ເຈົ້າກໍຈະສາມາດໃຊ້ໃນການສຶກສາສ່ວນຕົວເພື່ອຊ່ວຍເສີມສ້າງຄວາມເຊື່ອໝັ້ນຂອງເຈົ້າໃຫ້ເຂັ້ມແຂງຂຶ້ນ.
9 ເຈົ້າຕ້ອງພິສູດດ້ວຍຕົວເອງວ່ານີ້ແມ່ນຄວາມຈິງ ເພາະສິ່ງນັ້ນຈະຊ່ວຍເຈົ້າໃຫ້ກຽມຕົວສຳລັບການຮັບເຕມາ. ພີ່ນ້ອງຍິງຄົນໜຶ່ງທີ່ເປັນໄວຮຸ່ນເວົ້າວ່າ: “ກ່ອນຕັດສິນໃຈທີ່ຈະຮັບບັບເຕມາ ຂ້ອຍໄດ້ສຶກສາຄຳພີໄບເບິນແລະໄດ້ເຫັນວ່ານີ້ແມ່ນສາສະໜາແທ້ ແລະການດຳລົງຊີວິດໃນແຕ່ລະມື້ເຮັດໃຫ້ຄວາມເຊື່ອໝັ້ນຂອງຂ້ອຍເຂັ້ມແຂງຂຶ້ນ.”
ການກະທຳຂອງເຈົ້າ
10. ເປັນຫຍັງຈຶ່ງມີເຫດຜົນທີ່ຈະຄາດໝາຍວ່າຄລິດສະຕຽນທີ່ຮັບບັບເຕມາແລ້ວຈະເຮັດຕາມຄວາມເຊື່ອ?
10 ຄຳພີໄບເບິນກ່າວວ່າ: “ຄວາມເຊື່ອ . . . ຖ້າບໍ່ມີກິດຈະການ ຄວາມເຊື່ອນັ້ນກໍຕາຍແລ້ວ.” (ຢາໂກໂບ 2:17) ຖ້າເຈົ້າມີຄວາມເຊື່ອໝັ້ນທີ່ໝັ້ນຄົງ ເຈົ້າຈະສະແດງອອກໂດຍທາງການກະທຳຂອງເຈົ້າ. ເຈົ້າຈະມີສິ່ງທີ່ຄຳພີໄບເບິນເອີ້ນວ່າ ການ “ກະທຳການບໍລິສຸດແລະ [ກະທຳ] ການຕາມຄວາມນັບຖືພະເຈົ້າ.”—ອ່ານ 2 ເປໂຕ 3:11
11. ຂໍໃຫ້ອະທິບາຍຄຳວ່າ ການ “ກະທຳການບໍລິສຸດ.”
11 ການ “ກະທຳການບໍລິສຸດ” ໝາຍເຖິງຫຍັງ? ຖ້າເຈົ້າມີການກະທຳທີ່ບໍລິສຸດ ເຈົ້າກໍສະອາດທາງດ້ານສິນລະທຳ. ຕົວຢ່າງເຊັ່ນ: ໃຫ້ຄິດກ່ຽວກັບຫົກເດືອນທີ່ຜ່ານມາ. ຕອນທີ່ຖືກລໍ້ໃຈໃຫ້ເຮັດບາງສິ່ງທີ່ຜິດ ເຈົ້າໄດ້ຄິດຢ່າງຖີ່ຖ້ວນກ່ຽວກັບສິ່ງທີ່ຖືກແລະສິ່ງທີ່ຜິດບໍ? (ເຫບເລີ 5:14) ເຈົ້າຈື່ຕອນໃດຕອນໜຶ່ງສະເພາະບໍທີ່ເຈົ້າບໍ່ຍອມແພ້ຕໍ່ການລໍ້ໃຈຫຼືຄວາມກົດດັນຈາກຄົນໃນໄວດຽວກັນ? ຢູ່ທີ່ໂຮງຮຽນ ເຈົ້າເປັນຕົວຢ່າງທີ່ດີໃຫ້ຄົນອື່ນບໍ? ເຈົ້າຮັກສາຄວາມສັດຊື່ຕໍ່ພະເຢໂຫວາບໍ ຫຼືເຈົ້າພະຍາຍາມທີ່ຈະເປັນຄືກັບໝູ່ໃນຫ້ອງເພື່ອເຂົາເຈົ້າຈະບໍ່ເວົ້າກວນເຈົ້າ? (1 ເປໂຕ 4:3, 4) ແນ່ນອນວ່າທຸກຄົນເປັນຄົນທີ່ບໍ່ສົມບູນແບບ. ຫຼາຍຄັ້ງ ແມ່ນແຕ່ຄົນທີ່ຮັບໃຊ້ພະເຢໂຫວາມາເປັນເວລາຫຼາຍປີກໍອາດຮູ້ສຶກອາຍແລະເຫັນວ່າເປັນເລື່ອງຍາກທີ່ຈະເວົ້າກັບຄົນອື່ນກ່ຽວກັບຄວາມເຊື່ອຂອງເຂົາເຈົ້າ. ແຕ່ຜູ້ທີ່ໄດ້ອຸທິດຕົວໃຫ້ແກ່ພະເຢໂຫວາແລ້ວຈະພູມໃຈທີ່ໄດ້ເປັນພະຍານພະເຢໂຫວາຄົນໜຶ່ງ ແລະລາວສະແດງໃຫ້ເຫັນສິ່ງນີ້ໂດຍການປະພຶດທີ່ສະອາດ.
12. ການ “[ກະທຳ] ການຕາມຄວາມນັບຖືພະເຈົ້າ” ລວມມີຫຍັງແດ່ ແລະເຈົ້າຄວນມີທັດສະນະແນວໃດຕໍ່ສິ່ງເຫຼົ່ານັ້ນ?
12 ການ “[ກະທຳ] ການຕາມຄວາມນັບຖືພະເຈົ້າ” ໝາຍເຖິງຫຍັງ? ສິ່ງນີ້ໝາຍລວມເຖິງກິດຈະກຳຕ່າງໆໃນປະຊາຄົມ ເຊັ່ນ: ການໄປປະຊຸມແລະການປະກາດ. ແຕ່ໃນນີ້ກໍຍັງລວມເຖິງກິດຈະກຳຕ່າງໆທີ່ຄົນອື່ນບໍ່ສາມາດເຫັນ ເຊັ່ນ: ການອະທິດຖານສ່ວນຕົວເຖິງພະເຢໂຫວາ ແລະການສຶກສາສ່ວນຕົວ. ຄົນທີ່ອຸທິດຊີວິດໃຫ້ແກ່ພະເຢໂຫວາຈະບໍ່ຄິດວ່າກິດຈະກຳເຫຼົ່ານີ້ເປັນພາລະ. ລາວຈະຮູ້ສຶກຄ້າຍຄືກະສັດດາວິດທີ່ເວົ້າວ່າ: ‘ໂອ້ພະເຈົ້າເຈົ້າຂ້າ ຂ້ານ້ອຍມີຄວາມຍິນດີຈະກະທຳການຕາມທີ່ຊອບໃຈພະອົງ ແລະພະບັນຍັດຂອງພະອົງສະຖິດຢູ່ພາຍໃນໃຈຂ້ານ້ອຍ.’—ຄຳເພງ 40:8
ເຈົ້າອະທິດຖານຢ່າງເຈາະຈົງບໍ ແລະຄຳອະທິດຖານເຫຼົ່ານັ້ນສະແດງວ່າເຈົ້າຮັກພະເຢໂຫວາຫຼາຍສ່ຳໃດ?
13, 14. ມີສິ່ງໃດທີ່ສາມາດຊ່ວຍເຈົ້າໃຫ້ “[ກະທຳ] ການຕາມຄວາມນັບຖືພະເຈົ້າ” ແລະໄວໜຸ່ມບາງຄົນໄດ້ຮັບປະໂຫຍດແນວໃດຈາກການຈັດຕຽມນີ້?
13 ເພື່ອຈະຊ່ວຍເຈົ້າໃຫ້ຕັ້ງເປົ້າໝາຍ ພວກເຮົາມີແບບສອບຖາມໃນໜ້າ 308 ແລະ 309 ໃນປຶ້ມຄຳຖາມທີ່ໜຸ່ມສາວຖາມຄຳຕອບທີ່ໄດ້ຜົນ ເຫຼັ້ມ 2 (ພາສາໄທ). ໃນແບບສອບຖາມນັ້ນ ເຈົ້າສາມາດຂຽນຄຳຕອບຂອງເຈົ້າສຳລັບຄຳຖາມຕ່າງໆເຊັ່ນ: “ເຈົ້າອະທິດຖານຢ່າງເຈາະຈົງບໍ ແລະຄຳອະທິດຖານເຫຼົ່ານັ້ນສະແດງວ່າເຈົ້າຮັກພະເຢໂຫວາຫຼາຍສ່ຳໃດ?” “ເຈົ້າເຮັດຫຍັງແດ່ໃນການສຶກສາສ່ວນຕົວ?” “ຖ້າພໍ່ແມ່ບໍ່ໄດ້ອອກໄປປະກາດ ເຈົ້າໄປບໍ?” ນອກຈາກນັ້ນ ແບບສອບຖາມຍັງມີບ່ອນວ່າງໃຫ້ເຈົ້າຂຽນເປົ້າໝາຍຕ່າງໆທີ່ເຈົ້າຕັ້ງໄວ້ສຳລັບຕົວເອງໃນເລື່ອງການອະທິດຖານ ການສຶກສາສ່ວນຕົວ ແລະການປະກາດ.
14 ໄວໜຸ່ມຫຼາຍຄົນທີ່ຄິດກ່ຽວກັບການຮັບບັບເຕມາ ເຂົາເຈົ້າເຫັນວ່າແບບສອບຖາມນີ້ເປັນເຄື່ອງມືທີ່ມີຄ່າ. ພີ່ນ້ອງຍິງໜຸ່ມຄົນໜຶ່ງຊື່ທິວດາໄດ້ເວົ້າວ່າ: “ຂ້ອຍໃຊ້ແບບສອບຖາມນີ້ເພື່ອຕັ້ງເປົ້າໝາຍໃຫ້ຕົວເອງ. ຂ້ອຍສາມາດບັນລຸເປົ້າໝາຍເຫຼົ່ານັ້ນເທື່ອລະຢ່າງ ແລະປະມານໜຶ່ງປີຕໍ່ມາຂ້ອຍກໍພ້ອມຈະຮັບບັບເຕມາ.” ພີ່ນ້ອງຊາຍໜຸ່ມຄົນໜຶ່ງຊື່ແພັດທຣິກກໍປະສົບຜົນສຳເລັດຄ້າຍໆກັນ ລາວເວົ້າວ່າ: “ຂ້ອຍຮູ້ເປົ້າໝາຍຂອງຂ້ອຍແລ້ວ ແຕ່ການຂຽນເປົ້າໝາຍນັ້ນເຮັດໃຫ້ຂ້ອຍອອກຄວາມພະຍາຍາມຫຼາຍຂຶ້ນອີກເພື່ອຈະບັນລຸເປົ້າໝາຍເຫຼົ່ານັ້ນ.”
ເຈົ້າຈະຍັງຮັບໃຊ້ພະເຢໂຫວາບໍ ຖ້າພໍ່ແມ່ຂອງເຈົ້າບໍ່ໄດ້ຮັບໃຊ້? (ເບິ່ງຂໍ້ 15)
15. ຂໍໃຫ້ອະທິບາຍເຫດຜົນທີ່ວ່າການອຸທິດຕົວຄວນເປັນການຕັດສິນໃຈສ່ວນຕົວ.
15 ຄຳຖາມໜຶ່ງທີ່ຢູ່ໃນແບບສອບຖາມນັ້ນແມ່ນ: “ເຈົ້າຈະຍັງຮັບໃຊ້ພະເຢໂຫວາບໍ ຖ້າພໍ່ແມ່ແລະໝູ່ຂອງເຈົ້າເຊົາຮັບໃຊ້ພະອົງ?” ເມື່ອເຈົ້າອຸທິດຊີວິດໃຫ້ພະເຢໂຫວາແລະຮັບບັບເຕມາແລ້ວ ເຈົ້າຈະມີສາຍສຳພັນເປັນສ່ວນຕົວກັບພະອົງ. ດັ່ງນັ້ນ ສິ່ງທີ່ເຈົ້າເຮັດສຳລັບພະເຢໂຫວາບໍ່ຄວນຂຶ້ນກັບພໍ່ແມ່ຫຼືຄົນອື່ນໆ. ການກະທຳທີ່ບໍລິສຸດຂອງເຈົ້າແລະການກະທຳຕາມຄວາມນັບຖືພະເຈົ້າສະແດງໃຫ້ເຫັນວ່າເຈົ້າເຊື່ອໝັ້ນວ່າເຈົ້າມີຄວາມຈິງແລະຕ້ອງການເຮັດຕາມມາດຕະຖານຂອງພະເຈົ້າ. ຖ້າເຮັດໄດ້ເຊັ່ນນັ້ນ ອີກບໍ່ດົນເຈົ້າກໍຈະມີຄຸນສົມບັດທີ່ຈະຮັບບັບເຕມາໄດ້.
ຄວາມຮູ້ບຸນຄຸນຂອງເຈົ້າ
16, 17. (ກ) ສິ່ງໃດຄວນກະຕຸ້ນບາງຄົນໃຫ້ເຂົ້າມາເປັນຄລິດສະຕຽນ? (ຂ) ຈະຍົກຕົວຢ່າງແນວໃດກ່ຽວກັບຄວາມຮູ້ຄຸນຄ່າສຳລັບຄ່າໄຖ່?
16 ມື້ໜຶ່ງ ມີຜູ້ຊາຍຄົນໜຶ່ງທີ່ຮູ້ຈັກກົດໝາຍຂອງໂມເຊເປັນຢ່າງດີໄດ້ຖາມພະເຍຊູວ່າ: “ພະບັນຍັດຂໍ້ອັນໃດເປັນຂໍ້ໃຫຍ່?” ພະເຍຊູໄດ້ຕອບວ່າ: “ເຈົ້າຈົ່ງຮັກພະເຢໂຫວາຜູ້ເປັນພະເຈົ້າຂອງເຈົ້າ ເຈົ້າຈົ່ງຮັກດ້ວຍສຸດໃຈ ແລະດ້ວຍສຸດຈິດ ແລະດ້ວຍສຸດຄວາມຄຶດຂອງເຈົ້າ.” (ມັດທາຍ 22:35-37) ພະເຍຊູອະທິບາຍວ່າຄວາມຮັກທີ່ມີຕໍ່ພະເຢໂຫວາຄວນເປັນເຫດຜົນທີ່ເຮັດໃຫ້ບາງຄົນຮັບບັບເຕມາແລະເຂົ້າມາເປັນຄລິດສະຕຽນ. ວິທີໜຶ່ງເຊິ່ງດີທີ່ສຸດທີ່ຈະເສີມສ້າງຄວາມຮັກທີ່ເຈົ້າມີຕໍ່ພະເຢໂຫວາກໍແມ່ນການຄິດຢ່າງຖີ່ຖ້ວນກ່ຽວກັບຄ່າໄຖ່ເຊິ່ງເປັນຂອງຂວັນທີ່ຍິ່ງໃຫຍ່ທີ່ສຸດສຳລັບມະນຸດ. (ອ່ານ 2 ໂກລິນໂທ 5:14, 15; 1 ໂຢຮັນ 4:9, 19) ເມື່ອເຮັດແບບນັ້ນ ເຈົ້າກໍຈະຕ້ອງການສະແດງຄວາມຮູ້ຄຸນຄ່າສຳລັບຂອງຂວັນທີ່ພິເສດນີ້.
17 ຄວາມຮູ້ຄຸນຄ່າທີ່ເຈົ້າມີຕໍ່ຄ່າໄຖ່ສາມາດອະທິບາຍໄດ້ດັ່ງນີ້: ໃຫ້ນຶກພາບເບິ່ງວ່າເຈົ້າກຳລັງຈະຈົມນ້ຳແລະມີບາງຄົນໄດ້ມາຊ່ວຍຊີວິດເຈົ້າ. ເຈົ້າຈະພຽງແຕ່ກັບເມືອເຮືອນ ເຊັດໂຕໃຫ້ແຫ້ງ ແລະກໍລືມສິ່ງທີ່ຄົນນັ້ນໄດ້ເຮັດສຳລັບເຈົ້າບໍ? ບໍ່! ເຈົ້າຈະສຳນຶກສະເໝີວ່າເປັນໜີ້ບຸນຄຸນຄົນນັ້ນທີ່ໄດ້ຊ່ວຍຊີວິດເຈົ້າ! ຄ້າຍຄືກັນ ເຮົາຄວນສຳນຶກເຖິງບຸນຄຸນຂອງພະເຢໂຫວາແລະພະເຍຊູສຳລັບຄ່າໄຖ່. ເຮົາເປັນໜີ້ຊີວິດພວກເພິ່ນ! ພວກເພິ່ນໄດ້ຊ່ວຍເຮົາໃຫ້ພົ້ນຈາກບາບແລະຄວາມຕາຍ. ເນື່ອງຈາກພວກເພິ່ນຮັກເຮົາ ຕອນນີ້ພວກເຮົາຈຶ່ງມີຄວາມຫວັງທີ່ຈະມີຊີວິດຕະຫຼອດໄປໃນໂລກທີ່ເປັນອຸທິຍານ!
18, 19. (ກ) ເປັນຫຍັງເຈົ້າບໍ່ຄວນຢ້ານທີ່ຈະອຸທິດຕົວໃຫ້ແກ່ພະເຢໂຫວາ? (ຂ) ການຮັບໃຊ້ພະເຢໂຫວາເຮັດໃຫ້ຊີວິດຂອງເຈົ້າດີຂຶ້ນຄືແນວໃດ?
18 ເຈົ້າຮູ້ສຶກເປັນໜີ້ບຸນຄຸນໃນສິ່ງທີ່ພະເຢໂຫວາໄດ້ເຮັດສຳລັບເຈົ້າບໍ? ຖ້າເປັນແນວນັ້ນ ການອຸທິດຕົວແລະການຮັບບັບເຕມາກໍເປັນສິ່ງທີ່ຖືກຕ້ອງທີ່ຄວນຈະເຮັດ. ການອຸທິດຕົວຂອງເຈົ້າແມ່ນການສັນຍາກັບພະເຈົ້າວ່າເຈົ້າຈະເຮັດຕາມຈຸດປະສົງຂອງພະອົງຕະຫຼອດໄປ. ເຈົ້າຄວນຢ້ານບໍທີ່ຈະເຮັດຕາມຄຳສັນຍາແບບນັ້ນ? ບໍ່ຄວນຢ້ານ! ພະເຢໂຫວາຕ້ອງການໃຫ້ເຈົ້າໄດ້ສິ່ງທີ່ດີທີ່ສຸດ ແລະພະອົງຈະໃຫ້ລາງວັນສຳລັບຄົນທີ່ເຮັດຕາມຈຸດປະສົງຂອງພະອົງ. (ເຫບເລີ 11:6) ເມື່ອເຈົ້າອຸທິດຊີວິດໃຫ້ແກ່ພະເຢໂຫວາແລະຮັບບັບເຕມາ ຊີວິດຂອງເຈົ້າຈະບໍ່ຊົ່ວຮ້າຍລົງ ແຕ່ວ່າຈະດີຂຶ້ນ! ພີ່ນ້ອງຊາຍຄົນໜຶ່ງທີ່ອາຍຸ 24 ປີ ເຊິ່ງໄດ້ຮັບບັບເຕມາກ່ອນທີ່ຈະເປັນໄວຮຸ່ນ ລາວເວົ້າວ່າ: “ຂ້ອຍອາດຈະມີຄວາມເຂົ້າໃຈທີ່ເລິກເຊິ່ງກວ່າຖ້າຂ້ອຍເປັນຜູ້ໃຫຍ່ກວ່ານັ້ນ ແຕ່ການຕັດສິນໃຈທີ່ຈະອຸທິດຕົວເອງໃຫ້ແກ່ພະເຢໂຫວາໄດ້ປົກປ້ອງຂ້ອຍຈາກການແລ່ນຕິດຕາມໂລກນີ້.”
ຊາຕານເຫັນແກ່ຕົວແລະມັນບໍ່ໄດ້ເປັນຫ່ວງເຈົ້າ
19 ພະເຢໂຫວາຕ້ອງການໃຫ້ເຈົ້າໄດ້ຮັບສິ່ງທີ່ດີທີ່ສຸດ. ແຕ່ຊາຕານເຫັນແກ່ຕົວແລະມັນບໍ່ໄດ້ເປັນຫ່ວງເຈົ້າ. ມັນບໍ່ສາມາດໃຫ້ສິ່ງທີ່ດີແກ່ເຈົ້າຖ້າເຈົ້າຕິດຕາມມັນ. ຊາຕານຈະເອົາສິ່ງທີ່ມັນບໍ່ມີມາໃຫ້ເຈົ້າໄດ້ແນວໃດ? ມັນບໍ່ມີຂ່າວດີ ແລະມັນບໍ່ມີຄວາມຫວັງໃດໆເລີຍ. ສິ່ງທີ່ຊາຕານຈະໃຫ້ເຈົ້າໄດ້ແມ່ນມີພຽງອະນາຄົດທີ່ມືດມົນເທົ່ານັ້ນ ເພາະມັນເອງຈະມີອະນາຄົດແບບນັ້ນ!—ຄຳປາກົດ 20:10
20. ຄົນທີ່ເປັນໄວໜຸ່ມສາມາດເຮັດຫຍັງເພື່ອຈະທຳຄວາມກ້າວໜ້າຈົນເຖິງຂັ້ນອຸທິດຕົວແລະຮັບບັບເຕມາ? (ຂໍໃຫ້ເບິ່ງຂອບ “ສິ່ງທີ່ຊ່ວຍເຈົ້າໃຫ້ທຳຄວາມກ້າວໜ້າ”)
20 ການອຸທິດຊີວິດໃຫ້ແກ່ພະເຢໂຫວາເປັນການຕັດສິນໃຈທີ່ດີທີ່ສຸດທີ່ເຈົ້າເຄີຍເຮັດ. ເຈົ້າພ້ອມບໍທີ່ຈະເຮັດແບບນັ້ນ? ຖ້າພ້ອມ ເຈົ້າກໍບໍ່ຕ້ອງຢ້ານທີ່ຈະເຮັດຕາມຄຳສັນຍານັ້ນ. ແຕ່ຖ້າຮູ້ສຶກວ່າຍັງບໍ່ພ້ອມ ໃຫ້ເຈົ້າໃຊ້ຄຳແນະນຳໃນບົດຄວາມນີ້ເພື່ອຈະທຳຄວາມກ້າວໜ້າຕໍ່ໆໄປ. ໂປໂລບອກພີ່ນ້ອງໃນເມືອງຟີລິບວ່າໃຫ້ທຳຄວາມກ້າວໜ້າຕໍ່ໆໄປ. (ຟີລິບ 3:16) ຖ້າເຈົ້າເຮັດຕາມຄຳແນະນຳນັ້ນ ອີກບໍ່ດົນເຈົ້າກໍຈະຕ້ອງການທີ່ຈະອຸທິດຊີວິດໃຫ້ແກ່ພະເຢໂຫວາແລະຮັບບັບເຕມາ.