ບົດຊາວ
ສຳນຶກເຖິງວັນຂອງພະເຢໂຫວາຢູ່ສະເໝີ
1. ຕອນທຳອິດເມື່ອໄດ້ຮຽນຮູ້ວ່າການຊ່ວຍໃຫ້ລອດຈາກຄວາມເຈັບປວດໃຈທີ່ມີໃນລະບົບເກົ່ານີ້ໃກ້ເຂົ້າມາແລ້ວ ທ່ານຮູ້ສຶກຢ່າງໃດ?
ໜຶ່ງໃນສິ່ງທຳອິດທີ່ເຮົາໄດ້ຮຽນຈາກຄຳພີໄບເບິນ ແມ່ນພະປະສົງຂອງພະເຢໂຫວາທີ່ຈະເຮັດໃຫ້ແຜ່ນດິນໂລກກາຍເປັນອຸທິຍານ. ໃນໂລກໃໝ່ ສົງຄາມ, ອາດຊະຍາກຳ, ຄວາມທຸກຍາກ, ຄວາມເຈັບປ່ວຍ, ຄວາມທຸກທໍລະມານ, ແລະຄວາມຕາຍຈະບໍ່ມີຕໍ່ໄປ. ແມ່ນແຕ່ຄົນຕາຍກໍຈະກັບຄືນມາມີຊີວິດອີກ. ເປັນຄວາມຫວັງທີ່ວິເສດແທ້ໆ! ສິ່ງດັ່ງກ່າວເຫຼົ່ານີ້ຈະເກີດຂຶ້ນໃນເວລາອີກບໍ່ດົນຍ້ອນຫຼັກຖານທີ່ສະແດງວ່າ ການປະທັບຂອງພະຄລິດໃນຖານະກະສັດປົກຄອງທີ່ບໍ່ສາມາດເຫັນດ້ວຍຕາໄດ້ເລີ່ມຕົ້ນແລ້ວຕັ້ງແຕ່ປີ 1914 ແລະນັບຕັ້ງແຕ່ນັ້ນມາ ເຮົາກໍໄດ້ກ້າວເຂົ້າສູ່ສະໄໝສຸດທ້າຍຂອງລະບົບຊົ່ວນີ້. ໃນຕອນທ້າຍຂອງສະໄໝສຸດທ້າຍນີ້ ພະເຢໂຫວາຈະທຳລາຍລະບົບປັດຈຸບັນແລະຈະນຳເອົາໂລກໃໝ່ທີ່ສັນຍາໄວ້ເຂົ້າມາແທນ!
2. “ວັນຂອງພະເຢໂຫວາ” ແມ່ນຫຍັງ?
2 ຄຳພີໄບເບິນເອີ້ນເວລາແຫ່ງການທຳລາຍທີ່ຈະມາຮອດນີ້ວ່າ “ວັນຂອງພະເຢໂຫວາ.” (2 ເປໂຕ 3:10, ລ.ມ.) ເປັນ “ວັນແຫ່ງຄວາມຄຽດຂອງພະເຢໂຫວາ” ຕໍ່ໂລກທັງໝົດຂອງຊາຕານ. (ໂຊໂຟນີ 2:3) ວັນນີ້ຈະເຖິງຈຸດສຸດຍອດໃນ “ການເສິກໃນວັນອັນໃຫຍ່ຂອງພະເຈົ້າຜູ້ມີລິດເດດອັນໃຫຍ່ທີ່ສຸດ . . . ເອີ້ນຊື່ໃນພາສາເຫບເລີວ່າ ອະລະມະເຄໂດນ” ເຊິ່ງເປັນວັນທີ່ “ກະສັດທັງຫຼາຍທົ່ວແຜ່ນດິນໂລກທີ່ຄົນອາໄສ” ຈະຖືກກຳຈັດໃຫ້ໝົດສິ້ນ. (ຄຳປາກົດ 16:14, 16) ແນວທາງຊີວິດຂອງທ່ານສະແດງໃຫ້ເຫັນວ່າທ່ານເຊື່ອໝັ້ນວ່າ ‘ວັນຂອງພະເຢໂຫວາ’ ມາໃກ້ແລ້ວບໍ?—ໂຊໂຟນີ 1:14-18; ເຢເຣມີ 25:33.
3. (ກ) ວັນຂອງພະເຢໂຫວາຈະມາເມື່ອໃດ? (ຂ) ການທີ່ພະເຢໂຫວາບໍ່ໄດ້ບອກ “ວັນກຳນົດກັບໂມງກຳນົດ” ນັ້ນເປັນປະໂຫຍດແນວໃດ?
3 ຄຳພີໄບເບິນບໍ່ໄດ້ບົ່ງບອກວັນທີທີ່ພະເຍຊູຄລິດຈະມາໃນຖານະຜູ້ປະຕິບັດໂທດຂອງພະເຢໂຫວາຕໍ່ລະບົບຂອງຊາຕານ. ພະເຍຊູກ່າວວ່າ “ວັນກຳນົດກັບໂມງກຳນົດນັ້ນບໍ່ມີຜູ້ໃດຮູ້ຈັກ ແມ່ນພວກທູດສະຫວັນກໍດີ ບຸດມະນຸດກໍດີ ກໍບໍ່ຮູ້ຈັກ ຮູ້ຈັກແຕ່ພະບິດາອົງດຽວ.” (ມາລະໂກ 13:32) ຖ້າໃຜບໍ່ຮັກພະເຢໂຫວາແທ້ໆ ເຂົາເຈົ້າຈະບໍ່ເອົາຫົວຊາຕໍ່ວັນຂອງພະອົງແລະຈະຫັນໄປຕິດຕາມແນວທາງຂອງໂລກ. ສ່ວນຄົນເຫຼົ່ານັ້ນທີ່ຮັກພະເຢໂຫວາແທ້ໆ ຈະຮັບໃຊ້ພະອົງດ້ວຍສິ້ນສຸດຈິດວິນຍານ ບໍ່ວ່າອະວະສານຂອງລະບົບນີ້ຈະມາເມື່ອໃດກໍຕາມ.—ຄຳເພງ 37:4; 1 ໂຢຮັນ 5:3.
4. ພະເຍຊູໄດ້ກ່າວເຕືອນຢ່າງໃດ?
4 ເພື່ອເຕືອນຜູ້ທີ່ຮັກພະເຢໂຫວາ ພະເຍຊູກ່າວວ່າ “ຈົ່ງເຝົ້າລະວັງແລະອ້ອນວອນຢູ່ ເຫດວ່າທ່ານທັງຫຼາຍບໍ່ຮູ້ຈັກເວລານັ້ນຈະມາເຖິງເມື່ອໃດ.” (ມາລະໂກ 13:33-37) ພະອົງເຕືອນເຮົາວ່າຢ່າໃຫ້ການກິນແລະການດື່ມຫຼື “ຄວາມອຸກໃຈແຫ່ງໂລກນີ້” ດຶງຄວາມສົນໃຈເຮົາໄປຫຼາຍໂພດຈົນເຮັດໃຫ້ເຮົາເບິ່ງບໍ່ເຫັນຄວາມສຳຄັນຂອງຍຸກສະໄໝນີ້.—ລືກາ 21:34-36; ມັດທາຍ 24:37-42.
5. ດັ່ງທີ່ເປໂຕອະທິບາຍ ໃນວັນຂອງພະເຢໂຫວາຈະມີສິ່ງໃດເກີດຂຶ້ນ?
5 ເປໂຕກໍໄດ້ແນະນຳເຮົາເຊັ່ນດຽວກັນໃຫ້ສຳນຶກເຖິງ “ວັນຂອງພະເຈົ້າ ເພາະເຫດວັນນັ້ນ ຟ້າອາກາດຈະເປື່ອຍດ້ວຍໄຟໄໝ້ ແລະດວງໃນຟ້າອາກາດ [“ທາດຕ່າງໆ,” ລ.ມ.] ຈະເປື່ອຍດ້ວຍໄຟອັນຮ້ອນລົ້ນ.” ລັດຖະບານທັງໝົດຂອງມະນຸດເຊິ່ງກໍຄື “ຟ້າອາກາດ” ຈະຖືກທຳລາຍ ແລະສັງຄົມມະນຸດທີ່ຊົ່ວຮ້າຍທັງໝົດເຊິ່ງກໍຄື “ແຜ່ນດິນໂລກ” ພ້ອມທັງ “ທາດຕ່າງໆ” ຂອງມັນເຊິ່ງກໍຄືແນວຄິດແລະການກະທຳຕ່າງໆ ຂອງໂລກຊົ່ວຮ້າຍນີ້ ເຊັ່ນ ແນວຄິດທີ່ບໍ່ໝາຍເພິ່ງພະເຈົ້າ, ການດຳເນີນຊີວິດທີ່ຜິດສິນລະທຳ, ແລະການນິຍົມວັດຖຸກໍຈະຖືກທຳລາຍໝົດສິ້ນ. ສິ່ງທັງໝົດເຫຼົ່ານີ້ຈະຖືກປ່ຽນແທນດ້ວຍ “ຟ້າອາກາດໃໝ່ [ລາຊະອານາຈັກທາງພາກສະຫວັນຂອງພະເຈົ້າ] ແລະແຜ່ນດິນໂລກໃໝ່ [ສັງຄົມມະນຸດໃໝ່ທາງແຜ່ນດິນໂລກ]” ທີ່ເຊິ່ງ ‘ຄວາມຊອບທຳຈະຕັ້ງຢູ່.’ (2 ເປໂຕ 3:10-13) ເຫດການທີ່ສະທ້ານໂລກເຫຼົ່ານີ້ຈະເກີດຂຶ້ນຢ່າງກະທັນຫັນໃນເວລາທີ່ບໍ່ໄດ້ຄາດຄິດ.—ມັດທາຍ 24:44.
ຈົ່ງຕື່ນຕົວຢູ່ສະເໝີຕໍ່ໝາຍສຳຄັນ
6. (ກ) ຄຳຕອບທີ່ພະເຍຊູໃຫ້ກັບເຫຼົ່າສາວົກໃຊ້ໄດ້ກັບອະວະສານຂອງລະບົບຢິວເຖິງຂອບເຂດໃດ? (ຂ) ສ່ວນໃດຂອງຄຳຕອບທີ່ພະເຍຊູໃຫ້ ເນັ້ນເຖິງເຫດການແລະເຈຕະຄະຕິຕ່າງໆ ທີ່ມີມາຕັ້ງແຕ່ປີ 1914?
6 ເມື່ອສຳນຶກເຖິງສະໄໝທີ່ເຮົາມີຊີວິດຢູ່ນີ້ ເຮົາຄວນຈະຮູ້ຈັກລາຍລະອຽດຕ່າງໆ ທີ່ປະກອບກັນເປັນໝາຍສຳຄັນເຊິ່ງຊີ້ບອກເຖິງສະໄໝສຸດທ້າຍຫຼື “ໄລຍະສຸດທ້າຍແຫ່ງລະບົບນີ້.” ຂໍໃຫ້ຄິດເຖິງຕອນທີ່ພະເຍຊູຕອບຄຳຖາມຂອງເຫຼົ່າສາວົກເຊິ່ງບັນທຶກໄວ້ໃນມັດທາຍ 24:3 (ລ.ມ.) ບາງເຫດການທີ່ພະອົງໄດ້ບອກໄວ້ໃນຂໍ້ 4 ເຖິງ 22 ໄດ້ສຳເລັດເປັນຈິງໃນຂອບເຂດນ້ອຍໆ ກັບລະບົບຂອງພວກຢິວລະຫວ່າງປີ 33 ເຖິງປີ 70 ສາກົນສັກກະຫຼາດ. ແຕ່ຄຳພະຍາກອນນີ້ມີຄວາມສຳເລັດເປັນຈິງຄັ້ງໃຫຍ່ນັບຕັ້ງແຕ່ປີ 1914 ເປັນຕົ້ນມາ ເຊິ່ງເປັນເວລາແຫ່ງ “ການປະທັບ” ຂອງພະຄລິດແລະເປັນ “ໄລຍະສຸດທ້າຍແຫ່ງລະບົບນີ້.” ມັດທາຍ 24:23-28 ບອກເຖິງສິ່ງທີ່ຈະເກີດຂຶ້ນນັບແຕ່ປີ 70 ສາກົນສັກກະຫຼາດ ໄປຈົນຮອດເວລາແຫ່ງການປະທັບຂອງພະຄລິດ. ເຫດການຕ່າງໆ ທີ່ໄດ້ກ່າວໄວ້ໃນມັດທາຍ 24:29-25:46 ເກີດຂຶ້ນໃນລະຫວ່າງເວລາອະວະສານນີ້ເອງ.
7. (ກ) ເປັນຫຍັງເຮົາເອງຄວນຕື່ນຕົວຕໍ່ວິທີທີ່ສະພາບການຕ່າງໆ ໃນປັດຈຸບັນໄດ້ສຳເລັດເປັນຈິງຕາມໝາຍສຳຄັນ? (ຂ) ໃນການຕອບຄຳຖາມຕ່າງໆ ທີ່ຢູ່ຕອນທ້າຍຂອງວັກນີ້ ກະລຸນາສະແດງໃຫ້ເຫັນວິທີທີ່ໝາຍສຳຄັນໄດ້ສຳເລັດເປັນຈິງຕັ້ງແຕ່ປີ 1914.
7 ເຮົາເອງຄວນສັງເກດເບິ່ງເຫດການແລະເຈຕະຄະຕິຕ່າງໆ ເຊິ່ງໄດ້ສຳເລັດເປັນຈິງຕາມໝາຍສຳຄັນນັ້ນ. ການເຊື່ອມໂຍງສິ່ງເຫຼົ່ານີ້ເຂົ້າກັບຄຳພະຍາກອນໃນຄຳພີໄບເບິນຈະຊ່ວຍເຮົາໃຫ້ສຳນຶກເຖິງວັນຂອງພະເຢໂຫວາຢູ່ສະເໝີ. ນອກຈາກນັ້ນ ເລື່ອງນີ້ຍັງເຮັດໃຫ້ເຮົາໂນ້ມໃຈຄົນອື່ນໄດ້ ເມື່ອເຕືອນເຂົາເຈົ້າວ່າວັນນັ້ນໃກ້ເຂົ້າມາແລ້ວ. (ເອຊາອີ 61:1, 2) ເມື່ອຄິດເຖິງເປົ້າໝາຍເຫຼົ່ານີ້ ຂໍໃຫ້ເຮົາທົບທວນຄຳຖາມຕໍ່ໄປນີ້ທີ່ເນັ້ນເຖິງສ່ວນຕ່າງໆ ຂອງໝາຍສຳຄັນ ເຊິ່ງບັນທຶກໄວ້ໃນມັດທາຍ 24:7 ແລະລືກາ 21:10, 11.
ດັ່ງທີ່ໄດ້ບອກໄວ້ລ່ວງໜ້າວ່າ “ພວກປະເທດຈະຢືນຂຶ້ນຕໍ່ສູ້ພວກປະເທດ ແລະແຜ່ນດິນຕໍ່ສູ້ແຜ່ນດິນ” ນັ້ນເລີ່ມສຳເລັດເປັນຈິງຕັ້ງແຕ່ປີ 1914 ໃນທາງທີ່ພົ້ນເດັ່ນຢ່າງໃດ? ກ່ຽວກັບເລື່ອງສົງຄາມ ມີຫຍັງເກີດຂຶ້ນນັບແຕ່ນັ້ນເປັນຕົ້ນມາ?
ໃນປີ 1918 ໂລກລະບາດຫຍັງທີ່ໄດ້ສັງຫານຊີວິດຄົນເຮົາຫຼາຍກວ່າການຕາຍໃນສົງຄາມໂລກຄັ້ງທີ 1? ເຖິງແມ່ນວ່າມະນຸດມີຄວາມຮູ້ທາງການແພດ ພະຍາດອັນໃດທີ່ຍັງເຮັດໃຫ້ຫຼາຍລ້ານຄົນເສຍຊີວິດ?
ເຖິງແມ່ນວ່າມີຄວາມກ້າວໜ້າທາງວິທະຍາສາດຕັ້ງແຕ່ສະຕະວັດທີ່ຜ່ານມາ ການກັນດານອາຫານມີຜົນກະທົບຕໍ່ແຜ່ນດິນໂລກເຖິງຂະໜາດໃດ?
ສິ່ງໃດເຮັດໃຫ້ທ່ານໝັ້ນໃຈວ່າ 2 ຕີໂມເຕ 3:1-5; 13 ບໍ່ໄດ້ກ່າວເຖິງວິຖີຊີວິດທີ່ຜ່ານມາ ແຕ່ພັດແມ່ນສະພາບອັນຊົ່ວຮ້າຍທີ່ນັບມື້ນັບຈະຮ້າຍແຮງຂຶ້ນໃນຂະນະທີ່ເຮົາກ້າວເຂົ້າສູ່ອະວະສານຂອງສະໄໝສຸດທ້າຍນີ້?
ການແຍກຄົນ
8. (ກ) ເຫດການອັນໃດອີກທີ່ພະເຍຊູໄດ້ກ່າວໄວ້ໃນມັດທາຍ 13:24-30, 36-43 ເຊິ່ງພະອົງເຊື່ອມໂຍງເຂົ້າກັບໄລຍະສຸດທ້າຍແຫ່ງລະບົບນີ້? (ຂ) ອຸປະມາຂອງພະເຍຊູໝາຍຄວາມວ່າຢ່າງໃດ?
8 ພະເຍຊູໄດ້ເຊື່ອມໂຍງເຫດການສຳຄັນອື່ນໆ ອີກເຂົ້າກັບໄລຍະສຸດທ້າຍແຫ່ງລະບົບນີ້. ໜຶ່ງໃນນັ້ນແມ່ນການແຍກ “ລູກທັງຫຼາຍແຫ່ງແຜ່ນດິນຂອງພະເຈົ້າ” ອອກຈາກ “ລູກທັງຫຼາຍຂອງຜູ້ຊົ່ວຮ້າຍ.” ພະເຍຊູກ່າວເຖິງເລື່ອງນີ້ໃນອຸປະມາເລື່ອງນາເຂົ້າສາລີເຊິ່ງສັດຕູໄດ້ຫວ່ານເຂົ້ານົກລົງໄປ. “ເມັດດີ” ໃນອຸປະມາຂອງພະອົງໝາຍເຖິງຄລິດສະຕຽນແທ້ທີ່ໄດ້ຮັບການເຈີມ. “ເຂົ້ານົກ” ແມ່ນຄົນເຫຼົ່ານັ້ນທີ່ອ້າງວ່າເປັນຄລິດສະຕຽນແຕ່ປາກົດວ່າເປັນ “ລູກທັງຫຼາຍຂອງຜູ້ຊົ່ວຮ້າຍ” ເນື່ອງຈາກເຂົາເຈົ້າຕິດສະໜິດຢູ່ກັບໂລກທີ່ພະຍາມານເປັນຜູ້ປົກຄອງ. ຄົນເຫຼົ່ານັ້ນຈຶ່ງຖືກແຍກຈາກ “ລູກທັງຫຼາຍແຫ່ງແຜ່ນດິນຂອງພະເຈົ້າ” ແລະຖືກໝາຍໄວ້ສຳລັບການທຳລາຍ. (ມັດທາຍ 13:24-30, 36-43) ການແຍກນີ້ໄດ້ເກີດຂຶ້ນແລ້ວບໍ?
9. (ກ) ພາຍຫຼັງສົງຄາມໂລກຄັ້ງທີ 1 ມີການແຍກທີ່ຍິ່ງໃຫຍ່ອັນໃດເກີດຂຶ້ນກັບທຸກຄົນທີ່ອ້າງວ່າເປັນຄລິດສະຕຽນ? (ຂ) ຄລິດສະຕຽນຜູ້ຖືກເຈີມໃຫ້ຫຼັກຖານຢ່າງໃດວ່າເຂົາເຈົ້າເປັນຜູ້ຮັບໃຊ້ທີ່ແທ້ຈິງຂອງລາຊະອານາຈັກ?
9 ຫຼັງຈາກສົງຄາມໂລກຄັ້ງທີ 1 ມີການແຍກທຸກຄົນເຊິ່ງອ້າງວ່າເປັນຄລິດສະຕຽນອອກເປັນສອງຈຳພວກ: (1) ນັກເທດນັກບວດແຫ່ງຄລິດສາສະໜາຈັກແລະຜູ້ຕິດຕາມເຂົາເຈົ້າ ເຊິ່ງໃຫ້ການສະໜັບສະຫນູນຢ່າງແຮງກ້າຕໍ່ອົງການສັນນິບາດຊາດ (ປັດຈຸບັນແມ່ນອົງການສະຫະປະຊາຊາດ) ໃນຂະນະທີ່ຍັງຍຶດໝັ້ນຢ່າງພັກດີຕໍ່ຊາດຂອງຕົນ ແລະ (2) ຄລິດສະຕຽນແທ້ໃນຍຸກຫຼັງສົງຄາມ ເຊິ່ງໃຫ້ການສະໜັບສະຫນູນຢ່າງເຕັມທີຕໍ່ລາຊະອານາຈັກເມຊີຂອງພະເຈົ້າ ບໍ່ແມ່ນຕໍ່ຊາດຕ່າງໆ ຂອງໂລກນີ້. (ໂຢຮັນ 17:16) ຄົນເຫຼົ່ານັ້ນໄດ້ພິສູດວ່າຕົນເອງເປັນຜູ້ຮັບໃຊ້ທີ່ແທ້ຈິງແຫ່ງລາຊະອານາຈັກຂອງພະເຈົ້າໂດຍປະກາດ “ຂ່າວປະເສີດເລື່ອງອານາຈັກສະຫວັນ” ໄປທົ່ວແຜ່ນດິນໂລກ. (ມັດທາຍ 24:14, ທ.ປ.) ການເຮັດເຊັ່ນນັ້ນເກີດຜົນຢ່າງໃດ?
10. ຜົນທຳອິດທີ່ໄດ້ຈາກວຽກງານການປະກາດລາຊະອານາຈັກແມ່ນຫຍັງ?
10 ສິ່ງທຳອິດ ມີການຮິບໂຮມຊົນທີ່ເຫຼືອແຫ່ງຜູ້ຖືກເຈີມໂດຍທາງພະວິນຍານຂອງພະເຈົ້າ ເຊິ່ງມີຄວາມຫວັງຈະຮ່ວມປົກຄອງກັບພະຄລິດໃນຖານະເປັນສ່ວນໜຶ່ງແຫ່ງລາຊະອານາຈັກທາງພາກສະຫວັນ. ແມ່ນວ່າຄົນເຫຼົ່ານີ້ກະຈັດກະຈາຍໄປທ່າມກາງນານາຊາດ ແຕ່ເຂົາເຈົ້າໄດ້ຖືກນຳພາເຂົ້າສູ່ຄວາມເປັນເອກະພາບທີ່ມີລັກສະນະເປັນອົງການ. ການຄັດເລືອກຜູ້ຖືກເຈີມໃກ້ຈະຄົບຖ້ວນແລ້ວ.—ຄຳປາກົດ 7:3, 4.
11. (ກ) ວຽກຮິບໂຮມອັນໃດທີ່ຍັງມີຕໍ່ໆ ໄປ ແລະສອດຄ່ອງກັບຄຳພະຍາກອນໃດ? (ຂ) ຄວາມສຳເລັດເປັນຈິງຂອງຄຳພະຍາກອນນີ້ສະແດງເຖິງສິ່ງໃດ?
11 ຕໍ່ຈາກນັ້ນ ພາຍໃຕ້ການຊີ້ນຳຂອງພະເຍຊູ ມີການຮິບໂຮມ “ຝູງຄົນເປັນອັນມາກ . . . ມາແຕ່ທຸກປະເທດ, ແລະທຸກຕະກູນ, ແລະທຸກຊາດ, ແລະທຸກພາສາ.” ຄົນເຫຼົ່ານີ້ຈະປະກອບກັນເປັນ “ແກະອື່ນ” ຜູ້ເຊິ່ງຈະລອດຜ່ານ “ຄວາມທຸກທໍລະມານມາກຫຼາຍ” ເຂົ້າສູ່ໂລກໃໝ່ຂອງພະເຈົ້າ. (ຄຳປາກົດ 7:9, 14; ໂຢຮັນ 10:16, ທ.ປ.) ວຽກງານການປະກາດກ່ຽວກັບເລື່ອງລາຊະອານາຈັກຂອງພະເຈົ້າກ່ອນອະວະສານຈະມາເຖິງກໍຍັງດຳເນີນມາຈົນເຖິງທຸກວັນນີ້. ຝູງຄົນເປັນອັນມາກແຫ່ງແກະອື່ນເຊິ່ງຕອນນີ້ມີຈຳນວນຫຼາຍລ້ານຄົນ ກຳລັງຊ່ວຍຊົນທີ່ເຫຼືອແຫ່ງຜູ້ຖືກເຈີມປະກາດຂ່າວສານສຳຄັນກ່ຽວກັບເລື່ອງລາຊະອານາຈັກດ້ວຍຄວາມພັກດີ. ຂ່າວສານນີ້ໄດ້ແພ່ກະຈາຍໄປເຖິງທຸກໆ ຊາດ.
ມີສິ່ງໃດລໍຖ້າຢູ່ທາງໜ້າ?
12. ກ່ອນວັນຂອງພະເຢໂຫວາຈະມາເຖິງ ວຽກງານການປະກາດຈະຕ້ອງເຮັດອີກຫຼາຍປານໃດ?
12 ຫຼັກຖານທັງໝົດທີ່ກ່າວໄວ້ຂ້າງເທິງນີ້ສະແດງໃຫ້ເຫັນວ່າເຮົາຢູ່ໃກ້ອະວະສານຂອງສະໄໝສຸດທ້າຍ ແລະວັນຂອງພະເຢໂຫວາກໍຫຍັບເຂົ້າມາໃກ້ແລ້ວ. ແຕ່ວ່າ ຍັງມີຄຳພະຍາກອນອື່ນໆ ອີກທີ່ຕ້ອງສຳເລັດເປັນຈິງກ່ອນວັນອັນໜ້າຢ້ານກົວນີ້ຈະເລີ່ມຕົ້ນບໍ? ມີແທ້. ເລື່ອງໜຶ່ງກໍຄື ການແຍກຄົນກ່ຽວກັບປະເດັນເລື່ອງລາຊະອານາຈັກຍັງບໍ່ທັນສຳເລັດ. ໃນບາງບ່ອນທີ່ມີການຕໍ່ຕ້ານຢ່າງຮຸນແຮງເປັນເວລາຫຼາຍປີ ຕອນນີ້ກໍມີຄົນໃໝ່ຕື່ມເຂົ້າມາ. ແມ່ນແຕ່ບ່ອນທີ່ຄົນປະຕິເສດຂ່າວດີ ຄວາມເມດຕາຂອງພະເຢໂຫວາກໍໄດ້ປາກົດໃຫ້ເຫັນໂດຍການທີ່ເຮົາໃຫ້ຄຳພິຍານ. ສະນັ້ນ ຂໍໃຫ້ເຮົາເຮັດວຽກນີ້ຕໍ່ໆ ໄປ! ພະເຍຊູຮັບຮອງກັບເຮົາວ່າເມື່ອວຽກນີ້ສຳເລັດແລ້ວອະວະສານກໍຈະມາເຖິງໂລດ.
13. ດັ່ງທີ່ບັນທຶກໄວ້ໃນ 1 ເທຊະໂລນີກ 5:2, 3 ເຫດການທີ່ເປັນຕາໜ້າສັງເກດອັນໃດຈະຕ້ອງເກີດຂຶ້ນ ແລະເລື່ອງນີ້ຈະມີຄວາມໝາຍແນວໃດສຳລັບເຮົາ?
13 ຄຳພະຍາກອນທີ່ເດັ່ນອີກຂໍ້ໜຶ່ງໃນຄຳພີໄບເບິນບອກລ່ວງໜ້າວ່າ “ໃນເວລາໃດເຂົາຈະເວົ້າວ່າ ຄວາມສຸກສຳລານແລະຄວາມຢູ່ສຳບາຍ. ໃນເວລານັ້ນຄວາມຈິບຫາຍຈະມາເຖິງເຂົາໂດຍເລວ ເໝືອນດັ່ງການເຈັບປວດມາເຖິງຜູ້ຍິງທີ່ທົງຄັບ ແລະເຂົາຈະປົບໜີໃຫ້ພົ້ນກໍບໍ່ໄດ້.” (1 ເທຊະໂລນີກ 5:2, 3) ການປະກາດເລື່ອງ “ຄວາມສຸກສຳລານແລະຄວາມຢູ່ສຳບາຍ” ຈະມາໃນຮູບແບບໃດເຮົາຍັງຕ້ອງຖ້າເບິ່ງຕໍ່ໄປ. ແນ່ນອນ ມັນຈະບໍ່ໄດ້ໝາຍຄວາມວ່າບັນດາຜູ້ນຳຂອງໂລກສາມາດແກ້ບັນຫາຂອງມະນຸດໄດ້ຢ່າງແທ້ຈິງ. ສຳລັບຜູ້ທີ່ສຳນຶກເຖິງວັນຂອງພະເຢໂຫວາຢູ່ສະເໝີຈະບໍ່ຫຼົງໄປກັບຄຳປະກາດນັ້ນ ແຕ່ເຂົາເຈົ້າຮູ້ວ່າຫຼັງຈາກນັ້ນການທຳລາຍຈະມາທັນທີ.
14. ເຫດການໃດແດ່ຈະເກີດຂຶ້ນໃນລະຫວ່າງຄວາມທຸກທໍລະມານຢ່າງໜັກ ແລະຈະເປັນໄປຕາມລຳດັບຢ່າງໃດ?
14 ໃນຕອນເລີ່ມຕົ້ນຂອງຄວາມທຸກທໍລະມານຢ່າງໜັກ ຜູ້ປົກຄອງຕ່າງໆ ຈະປ່ຽນມາຕໍ່ຕ້ານບາບີໂລນໃຫຍ່ຈັກກະພັດໂລກແຫ່ງສາສະໜາປອມແລະຈະທຳລາຍມັນ. (ມັດທາຍ 24:21; ຄຳປາກົດ 17:15, 16) ຈາກນັ້ນ ຊາດຕ່າງໆ ຈະມຸ່ງໜ້າມາຕໍ່ສູ້ຄົນເຫຼົ່ານັ້ນທີ່ສະໜັບສະຫນູນສິດທິສູງສຸດໃນການປົກຄອງຂອງພະເຢໂຫວາ ເຊິ່ງຈະເປັນການຍົວະໃຫ້ພະເຢໂຫວາຄຽດຮ້າຍຕໍ່ລັດຖະບານຂອງໂລກນີ້ແລະຜູ້ທີ່ສະໜັບສະຫນູນເຂົາເຈົ້າ ເຊິ່ງຈະເປັນເຫດເຮັດໃຫ້ເຂົາເຈົ້າຖືກທຳລາຍຈົນໝົດສ້ຽງ. ນັ້ນຈະເປັນສົງຄາມອະລະມະເຄໂດນເຊິ່ງເປັນຈຸດສຸດຍອດຂອງຄວາມທຸກທໍລະມານຢ່າງໜັກ. ຈາກນັ້ນ ຊາຕານແລະຜີປີສາດຂອງມັນຈະຖືກຂັງໄວ້ໃນເຫວເລິກ ແລະຈະບໍ່ສາມາດຊັກຈູງມະນຸດຊາດອີກຕໍ່ໄປ. ເລື່ອງນີ້ຈະເປັນເຫດການສຸດທ້າຍໃນວັນຂອງພະເຢໂຫວາ ເມື່ອຊື່ຂອງພະອົງກໍຈະໄດ້ຮັບການເຊີດຊູ.—ເອເຊກຽນ 38:18, 22, 23; ຄຳປາກົດ 19:11-20:3.
15. ເປັນຫຍັງຈຶ່ງບໍ່ແມ່ນເລື່ອງສະຫຼາດທີ່ຈະຫາເຫດຜົນວ່າວັນຂອງພະເຢໂຫວາຍັງຢູ່ອີກໄກ?
15 ອະວະສານຂອງລະບົບນີ້ຈະມາກົງຕາມເວລາກຳນົດຂອງພະເຈົ້າ. ວັນນັ້ນຈະບໍ່ຊ້າເລີຍ. (ຫາບາກຸກ 2:3) ຈົ່ງຈື່ໄວ້ວ່າ ການທຳລາຍເມືອງເຢຣຶຊາເລມໃນປີ 70 ສາກົນສັກກະຫຼາດມາຢ່າງກະທັນຫັນ ເມື່ອພວກຢິວບໍ່ໄດ້ຄາດຄິດເພາະເຂົາເຈົ້າຄິດວ່າອັນຕະລາຍໄດ້ຜ່ານໄປແລ້ວ. ສ່ວນເມືອງບາບີໂລນບູຮານເດ? ເມືອງນັ້ນມີອຳນາດແລະຄວາມໝັ້ນໃຈແລະຍັງມີກຳແພງທີ່ແໜ້ນໜາເປັນເຄື່ອງປ້ອງກັນ. ຢ່າງໃດກໍຕາມ ເມືອງນັ້ນກໍຖືກທຳລາຍພາຍໃນຄືນດຽວ. ດັ່ງນັ້ນ ຄວາມພິນາດກໍຈະມາເຖິງລະບົບຊົ່ວປັດຈຸບັນແບບກະທັນຫັນຄືກັນ. ເມື່ອວັນນັ້ນມາເຖິງ ຂໍໃຫ້ພະອົງພົບວ່າເຮົາເປັນເອກະພາບໃນການນະມັດສະການແທ້ ໂດຍສຳນຶກເຖິງວັນຂອງພະເຢໂຫວາ.
ການພິຈາລະນາທົບທວນ
• ເປັນຫຍັງການສຳນຶກເຖິງວັນຂອງພະເຢໂຫວາຢູ່ສະເໝີຈຶ່ງສຳຄັນ? ເຮົາຈະເຮັດເຊັ່ນນັ້ນໄດ້ແນວໃດ?
• ການແຍກຜູ້ຄົນເຊິ່ງກຳລັງດຳເນີນຢູ່ນີ້ສົ່ງຜົນກະທົບຕໍ່ເຮົາເປັນສ່ວນຕົວຢ່າງໃດ?
• ກ່ອນວັນຂອງພະເຢໂຫວາຈະມາເຖິງ ມີສິ່ງໃດລໍຖ້າຢູ່ທາງໜ້າ? ສະນັ້ນ ເຮົາແຕ່ລະຄົນຄວນຈະເຮັດຫຍັງ?
[ຮູບພາບໜ້າ 180]
ອີກບໍ່ດົນສະໄໝສຸດທ້າຍຈະສິ້ນສຸດລົງດ້ວຍການທຳລາຍລະບົບຂອງຊາຕານ