ບົດທີ 43

ໃຜແມ່ນອ້າຍເອື້ອຍນ້ອງຂອງເຮົາ?

ມີຄັ້ງໜຶ່ງຄູຜູ້ຍິ່ງໃຫຍ່ຖາມຄຳຖາມທີ່ເຮັດໃຫ້ແປກໃຈ. ຄຳຖາມນັ້ນກໍຄື “ໃຜເປັນແມ່ແລະເປັນນ້ອງຂອງເຮົາ?” (ມັດທາຍ 12:48) ລູກຕອບຄຳຖາມນັ້ນໄດ້ບໍ?— ລູກອາດຈະຮູ້ວ່າແມ່ຂອງພະເຍຊູຊື່ມາລີ. ແຕ່ລູກຮູ້ຊື່ພວກນ້ອງຊາຍຂອງພະອົງບໍ?— ພະອົງມີນ້ອງສາວນຳບໍ?—

ຄຳພີໄບເບິນບອກວ່ານ້ອງຊາຍຂອງພະເຍຊູຊື່ວ່າ “ທ່ານຢາໂກໂບ ແລະທ່ານໂຢເຊບແລະທ່ານຊີໂມນແລະທ່ານຢູດາ.” ແລະພະເຍຊູມີນ້ອງສາວເຊິ່ງມີຊີວິດຢູ່ຕອນທີ່ພະອົງກຳລັງເຮັດວຽກງານການປະກາດສັ່ງສອນ. ເນື່ອງຈາກພະເຍຊູເປັນລູກກົກ ພະອົງຈຶ່ງມີອາຍຸຫຼາຍກວ່າພວກນ້ອງທຸກຄົນ.—ມັດທາຍ 13:55, 56; ລືກາ 1:34, 35.

ພວກນ້ອງຊາຍຂອງພະເຍຊູກໍເປັນສາວົກບໍ?— ຄຳພີໄບເບິນບອກວ່າຕອນທຳອິດເຂົາເຈົ້າ “ບໍ່ໄດ້ເຊື່ອໃນພະອົງ.” (ໂຢຮັນ 7:5) ແນວໃດກໍຕາມ ຕໍ່ມາທ່ານຢາໂກໂບແລະທ່ານຢູດາໄດ້ກາຍມາເປັນສາວົກຂອງພະອົງ ແລະເຂົາເຈົ້າແມ່ນແຕ່ໄດ້ຂຽນພະທຳຕ່າງໆໃນຄຳພີໄບເບິນ. ລູກຮູ້ບໍວ່າເຂົາເຈົ້າຂຽນພະທຳຫຍັງແດ່?— ແມ່ນແລ້ວ ພະທຳຢາໂກໂບແລະຢູເດ.

ເຖິງແມ່ນວ່າບໍ່ມີຊື່ນ້ອງສາວຂອງພະເຍຊູຢູ່ໃນຄຳພີໄບເບິນ ແຕ່ເຮົາຮູ້ວ່າພະອົງມີນ້ອງສາວຢ່າງໜ້ອຍສອງຄົນ. ແຕ່ກໍອາດມີຫຼາຍກວ່ານັ້ນ. ພວກນ້ອງສາວເຫຼົ່ານັ້ນໄດ້ເຂົ້າມາເປັນຜູ້ຕິດຕາມພະເຍຊູບໍ?— ຄຳພີໄບເບິນບໍ່ໄດ້ເວົ້າເຖິງເລື່ອງນີ້ ສະນັ້ນເຮົາບໍ່ຮູ້. ແຕ່ລູກຮູ້ບໍວ່າເປັນຫຍັງພະເຍຊູຈຶ່ງຖາມຄຳຖາມທີ່ວ່າ: “ໃຜເປັນແມ່ແລະເປັນນ້ອງຂອງເຮົາ?”— ໃຫ້ເຮົາຊອກຫາຄຳຕອບນຳກັນ.

ໃນລະຫວ່າງທີ່ພະເຍຊູກຳລັງສອນສາວົກຂອງພະອົງ ມີຜູ້ໃດຜູ້ໜຶ່ງເວົ້າຂຶ້ນມາວ່າ: “ແມ່ກັບນ້ອງທັງຫຼາຍຂອງພະອົງກໍຢືນຢູ່ພາຍນອກຊອກຫາຈະໄດ້ປາກກັບພະອົງ.” ດັ່ງນັ້ນ ພະເຍຊູຈຶ່ງໃຊ້ໂອກາດທີ່ເໝາະເຈາະນັ້ນເພື່ອສອນບົດຮຽນສຳຄັນໂດຍຕັ້ງຄຳຖາມທີ່ເຮັດໃຫ້ແປກໃຈທີ່ວ່າ “ໃຜເປັນແມ່ແລະເປັນນ້ອງຂອງເຮົາ?” ພະອົງຊີ້ໄປທາງພວກສາວົກແລ້ວຕອບວ່າ: “ຈົ່ງເບິ່ງ ແມ່ແລະນ້ອງທັງຫຼາຍຂອງເຮົາເຖີ້ນ.”

ຈາກນັ້ນ ພະເຍຊູໄດ້ອະທິບາຍວ່າພະອົງໝາຍຄວາມວ່າແນວໃດເມື່ອກ່າວວ່າ: “ເຫດວ່າຄົນທຸກຄົນທີ່ຈະກະທຳຕາມນ້ຳໃຈແຫ່ງພະບິດາຂອງເຮົາຜູ້ຢູ່ໃນສະຫວັນ ຜູ້ນັ້ນເປັນນ້ອງຊາຍແລະນ້ອງສາວແລະແມ່ຂອງເຮົາ.” (ມັດທາຍ 12:47-50) ເລື່ອງນີ້ສະແດງໃຫ້ເຫັນວ່າພະເຍຊູໃກ້ຊິດກັບພວກສາວົກຂອງພະອົງຫຼາຍສ່ຳໃດ. ພະອົງກຳລັງສອນເຮົາວ່າສາວົກຂອງພະອົງເປັນຄືກັບອ້າຍເອື້ອຍນ້ອງແລະແມ່ຄີງໆຂອງພະອົງ.

While Jesus teaches his disciples, a man tells him that his mother and brothers are outside — ພະເຍຊູອະທິບາຍວ່າໃຜແມ່ນອ້າຍເອື້ອຍນ້ອງຂອງພະອົງ?

ໃນເວລານັ້ນພວກນ້ອງຂອງພະເຍຊູ ເຊິ່ງກໍຄືຢາໂກໂບ ໂຢເຊບ ຊີໂມນແລະຢູດາ ບໍ່ເຊື່ອວ່າພະເຍຊູເປັນລູກຊາຍຂອງພະເຈົ້າ. ເຂົາເຈົ້າຄົງຈະບໍ່ເຊື່ອເລື່ອງທີ່ທູດສະຫວັນຄາບລຽນໄດ້ບອກແມ່ຂອງເຂົາເຈົ້າ. (ລືກາ 1:30-33) ດັ່ງນັ້ນພວກເຂົາເຈົ້າອາດຈະບໍ່ໃຈດີຕໍ່ພະເຍຊູ. ໃຜກໍຕາມທີ່ເຮັດແບບນັ້ນກໍບໍ່ໄດ້ເປັນອ້າຍເອື້ອຍນ້ອງທີ່ແທ້ຈິງ. ລູກຮູ້ຈັກໃຜບາງຄົນທີ່ບໍ່ໃຈດີຕໍ່ອ້າຍເອື້ອຍນ້ອງຂອງຕົນເອງບໍ?—

ຄຳພີໄບເບິນກ່າວເຖິງທ້າວເອຊາອຶແລະທ້າວຢາໂຄບ ແລະສາເຫດທີ່ເອຊາອຶຮູ້ສຶກໃຈຮ້າຍຫຼາຍຈົນເຖິງຂັ້ນເວົ້າວ່າ: “ເຮົາຈະຂ້າຢາໂຄບນ້ອງຊາຍເຮົາ.” ນາງເລເບກາຜູ້ເປັນແມ່ຮູ້ສຶກຢ້ານຫຼາຍຈົນເຖິງຂັ້ນສົ່ງຢາໂຄບໃຫ້ໄປຢູ່ບ່ອນອື່ນເພື່ອເອຊາອຶຈະຂ້າລາວບໍ່ໄດ້. (ຕົ້ນເດີມ 27:41-46) ແນວໃດກໍຕາມ ຫຼາຍປີຕໍ່ມາເອຊາອຶໄດ້ປ່ຽນທັດສະນະ ແລະລາວໄດ້ກອດແລະຈູບຢາໂຄບ.—ຕົ້ນເດີມ 33:4.

ຕໍ່ມາຢາໂຄບມີລູກຊາຍ 12 ຄົນ. ແຕ່ພວກລູກຊາຍໃຫຍ່ຂອງຢາໂຄບບໍ່ຮັກນ້ອງຊາຍຂອງຕົນທີ່ຊື່ໂຢເຊບ. ເຂົາເຈົ້າອິດສານ້ອງຊາຍເພາະລາວເປັນລູກທີ່ໂປດປານຫຼາຍຂອງພໍ່. ດັ່ງນັ້ນ ພວກອ້າຍຈຶ່ງຂາຍໂຢເຊບໃຫ້ພໍ່ຄ້າທາດເຊິ່ງກຳລັງເດີນທາງໄປປະເທດເອຢິບ. ຈາກນັ້ນ ເຂົາເຈົ້າບອກກັບພໍ່ວ່າໂຢເຊບຖືກສັດປ່າກັດກິນ. (ຕົ້ນເດີມ 37:23-36) ມັນໂຫດຮ້າຍແມ່ນບໍ?—

ຕໍ່ມາພວກອ້າຍຂອງໂຢເຊບເສຍໃຈກັບສິ່ງທີ່ພວກຕົນໄດ້ເຮັດ. ດັ່ງນັ້ນໂຢເຊບຈຶ່ງໃຫ້ອະໄພເຂົາເຈົ້າ. ລູກເຫັນບໍວ່າໂຢເຊບຄ້າຍຄືກັບພະເຍຊູແນວໃດ?— ພວກສາວົກຂອງພະເຍຊູພາກັນປົບໜີເມື່ອພະອົງປະສົບຄວາມຍາກລຳບາກ ແລະເປໂຕເຖິງຂັ້ນປະຕິເສດວ່າບໍ່ຮູ້ຈັກພະອົງ. ແຕ່ເຊັ່ນດຽວກັບໂຢເຊບ ພະເຍຊູໃຫ້ອະໄພເຂົາເຈົ້າໝົດທຸກຄົນ.

Cain walks away from his dead brother Abel — ບົດຮຽນອັນໃດທີ່ເຮົາຄວນຮຽນຈາກສິ່ງທີ່ທ້າວກາອີນເຮັດຕໍ່ທ້າວອາເບນ?

ແລະກໍມີສອງອ້າຍນ້ອງທີ່ຊື່ກາອີນແລະອາເບນ. ເຮົາສາມາດຮຽນເອົາບົດຮຽນຈາກເຂົາເຈົ້າໄດ້ເຊັ່ນກັນ. ພະເຈົ້າເບິ່ງເຫັນຫົວໃຈຂອງກາອີນວ່າລາວບໍ່ໄດ້ຮັກນ້ອງຊາຍຂອງຕົນເອງແທ້ໆ. ດັ່ງນັ້ນພະເຈົ້າຈຶ່ງບອກກາອີນວ່າລາວຄວນປ່ຽນແປງແນວທາງຂອງຕົນ. ຖ້າກາອີນຮັກພະເຈົ້າແທ້ໆ ລາວກໍຄວນຈະເອົາໃຈໃສ່ຮັບຟັງ. ແຕ່ລາວບໍ່ໄດ້ຮັກພະເຈົ້າ. ມີມື້ໜຶ່ງກາອີນນເວົ້າກັບອາເບນວ່າ: ‘ໃຫ້ເຮົາໄປໃນທົ່ງນາດ້ວຍກັນ.’ ອາເບນກໍໄປກັບກາອີນ. ໃນຂະນະທີ່ເຂົາເຈົ້າຢູ່ທົ່ງນາຕາມລຳພັງ ກາອີນໄດ້ເອົາໄມ້ຄ້ອນຟາດນ້ອງຊາຍແຮງໆຈົນຕາຍ.—ຕົ້ນເດີມ 4:2-8.

ຄຳພີໄບເບິນບອກເຮົາວ່າມີບົດຮຽນພິເສດທີ່ເຮົາຄວນຮຽນຈາກເລື່ອງນັ້ນ. ລູກຮູ້ບໍວ່າແມ່ນບົດຮຽນອັນໃດ?— “ເຫດວ່າອັນນີ້ເປັນຄຳສັ່ງສອນທີ່ທ່ານທັງຫຼາຍໄດ້ຍິນຕັ້ງແຕ່ຕົ້ນເດີມ ຄືວ່າໃຫ້ເຮົາທັງຫຼາຍຮັກກັນແລະກັນ ບໍ່ໃຊ່ເໝືອນທ່ານກາອີນທີ່ໄດ້ມາແຕ່ຜູ້ຮ້າຍ.” ດັ່ງນັ້ນ ອ້າຍເອື້ອຍນ້ອງຄວນມີຄວາມຮັກຕໍ່ກັນແລະກັນ. ເຂົາເຈົ້າບໍ່ຄວນເປັນຄືກັບກາອີນ.—1 ໂຢຮັນ 3:11, 12.

ເປັນຫຍັງຈຶ່ງບໍ່ດີທີ່ຈະເປັນຄືກັບກາອີນ?— ເພາະຄຳພີໄບເບິນບອກວ່າລາວ “ມາແຕ່ຜູ້ຮ້າຍ” ເຊິ່ງກໍຄືຊາຕານພະຍາມານ. ເນື່ອງຈາກກາອີນປະພຶດຄືກັບພະຍາມານ ນັ້ນກໍຄືກັບວ່າພະຍາມານເປັນພໍ່ຂອງລາວ.

ລູກເຫັນບໍວ່າເປັນຫຍັງຈຶ່ງສຳຄັນທີ່ຈະຮັກອ້າຍເອື້ອຍນ້ອງຂອງຕົນເອງ?— ຖ້າລູກບໍ່ຮັກເຂົາເຈົ້າ ລູກກໍກຳລັງຮຽນເອົາແບບຢ່າງຂອງໃຜ?— ລູກຂອງພະຍາມານ. ລູກບໍ່ຢາກເປັນແບບນັ້ນແມ່ນບໍ?— ດັ່ງນັ້ນລູກຈະພິສູດໄດ້ແນວໃດວ່າລູກຢາກເປັນລູກຂອງພະເຈົ້າ?— ນັ້ນກໍຄືໂດຍການຮັກອ້າຍເອື້ອຍນ້ອງຂອງລູກຢ່າງແທ້ຈິງ.

ແຕ່ຄວາມຮັກຄືຫຍັງ?— ຄວາມຮັກຄືຄວາມຮູ້ສຶກອັນເລິກເຊິ່ງທີ່ຢູ່ທາງໃນຕົວເຮົາເຊິ່ງຢາກໃຫ້ເຮົາເຮັດສິ່ງທີ່ດີເພື່ອຜູ້ອື່ນ. ເຮົາສະແດງວ່າເຮົາຮັກຜູ້ອື່ນເມື່ອເຮົາມີຄວາມຮູ້ສຶກທີ່ດີຕໍ່ເຂົາເຈົ້າແລະເມື່ອເຮົາເຮັດສິ່ງທີ່ດີເພື່ອເຂົາເຈົ້າ. ແລະໃຜຄືອ້າຍເອື້ອຍນ້ອງທີ່ເຮົາຄວນຮັກ?—ຂໍໃຫ້ຈື່ໄວ້ວ່າ ພະເຍຊູສອນວ່າເຂົາເຈົ້າຄືຜູ້ທີ່ປະກອບເປັນຄອບຄົວຄລິດສະຕຽນຂະໜາດໃຫຍ່.

A boy shares a snack with his brother — ລູກຈະສະແດງໃຫ້ເຫັນໄດ້ແນວໃດວ່າຮັກພີ່ນ້ອງຂອງລູກ?

ການຮັກພີ່ນ້ອງຄລິດສະຕຽນສຳຄັນຂະໜາດໃດ?— ຄຳພີໄບເບິນບອກວ່າ: “ຜູ້ທີ່ບໍ່ຮັກພີ່ນ້ອງແຫ່ງຕົນທີ່ຕາເຫັນ ຈະຮັກພະເຈົ້າທີ່ຕາບໍ່ເຫັນຢ່າງໃດໄດ້.” (1 ໂຢຮັນ 4:20) ດັ່ງນັ້ນ ເຮົາບໍ່ຄວນຮັກພຽງແຕ່ບາງຄົນໃນຄອບຄົວຄລິດສະຕຽນ. ເຮົາຕ້ອງຮັກໝົດທຸກຄົນ. ພະເຍຊູກ່າວວ່າ: “ຄົນທັງປວງຈະຮູ້ຈັກວ່າທ່ານທັງຫຼາຍເປັນລູກສິດຂອງເຮົາດ້ວຍການນີ້ ຄືວ່າຖ້າທ່ານທັງຫຼາຍມີຄວາມຮັກໃນທ່າມກາງພວກທ່ານ.” (ໂຢຮັນ 13:35) ລູກຮັກພີ່ນ້ອງຊາຍຍິງຄລິດສະຕຽນໝົດທຸກຄົນບໍ?— ຂໍໃຫ້ຈື່ໄວ້ວ່າ ຖ້າລູກບໍ່ຮັກເຂົາເຈົ້າ ລູກກໍບໍ່ສາມາດຮັກພະເຈົ້າໄດ້ຢ່າງແທ້ຈິງ.

ເຮົາຈະສະແດງໃຫ້ເຫັນແນວໃດວ່າເຮົາຮັກພີ່ນ້ອງຊາຍຍິງແທ້ໆ?— ທີ່ຈິງ ຖ້າເຮົາຮັກເຂົາເຈົ້າ ເຮົາຄົງຈະບໍ່ຫຼົບໜ້າເຂົາເຈົ້າເນື່ອງຈາກບໍ່ຢາກເວົ້າລົມນຳ. ເຮົາຈະເປັນມິດກັບເຂົາເຈົ້າໝົດທຸກຄົນ. ເຮົາຈະເຮັດສິ່ງທີ່ດີຕໍ່ເຂົາເຈົ້າສະເໝີແລະເຕັມໃຈທີ່ຈະແບ່ງປັນສິ່ງທີ່ດີກັບເຂົາເຈົ້າ. ແລະຖ້າເຂົາເຈົ້າປະສົບຄວາມຍາກລຳບາກ ເຮົາກໍຈະຊ່ວຍເຫຼືອເຂົາເຈົ້າ ເພາະທີ່ຈິງແລ້ວເຮົາເປັນຄອບຄົວໃຫຍ່.

ເມື່ອເຮົາຮັກທຸກຄົນທີ່ເປັນພີ່ນ້ອງຊາຍຍິງຂອງເຮົາຢ່າງແທ້ຈິງ ນັ້ນພິສູດເຖິງຫຍັງ?— ພິສູດວ່າເຮົາເປັນລູກສິດຂອງພະເຍຊູຄູຜູ້ຍິ່ງໃຫຍ່. ແລະນັ້ນແມ່ນສິ່ງທີ່ເຮົາຢາກເປັນບໍ່ແມ່ນບໍ?—

ມີການພິຈາລະນາເລື່ອງການສະແດງຄວາມຮັກຕໍ່ອ້າຍເອື້ອຍນ້ອງໃນພະທຳຄາລາຊີ 6:10 ແລະ 1 ໂຢຮັນ 4:8, 21. ລູກຢາກເປີດຄຳພີໄບເບິນຂອງລູກແລະອ່ານຂໍ້ຄວາມເຫຼົ່ານັ້ນບໍ?