ບົດທີ 46

ເປັນຫຍັງເຈົ້າຄວນອຸທິດໂຕແລະຮັບບັບເຕມາ?

ສະບັບພິມ

ກ່ອນທີ່ເຈົ້າຈະຮັບບັບເຕມາໄດ້ ເຈົ້າຕ້ອງອຸທິດໂຕໃຫ້ກັບພະເຢໂຫວາໂດຍການອະທິດຖານສັນຍາກັບເພິ່ນວ່າ ເຈົ້າຈະນະມັດສະການເພິ່ນຜູ້ດຽວແລະໃຫ້ຄວາມຕ້ອງການຂອງເພິ່ນເປັນເລື່ອງສຳຄັນທີ່ສຸດໃນຊີວິດ. (ເພງສັນລະເສີນ 40:8) ແລະຕອນທີ່ເຈົ້າຮັບບັບເຕມາ ເຈົ້າກໍກຳລັງເຮັດໃຫ້ຄົນອື່ນຮູ້ວ່າເຈົ້າໄດ້ອຸທິດໂຕໃຫ້ພະເຢໂຫວາແລ້ວ. ການອຸທິດໂຕໃຫ້ກັບພະເຢໂຫວາເປັນເລື່ອງສຳຄັນຫຼາຍ. ແຕ່ອັນໃດຄວນເປັນສິ່ງທີ່ເຮັດໃຫ້ເຈົ້າຢາກອຸທິດໂຕໃຫ້ເພິ່ນ?

1. ເປັນຫຍັງເຮົາຈຶ່ງຢາກອຸທິດໂຕໃຫ້ກັບພະເຢໂຫວາ?

ເຮົາຮັກພະເຢໂຫວາ ເຮົາເລີຍຢາກອຸທິດໂຕໃຫ້ກັບເພິ່ນ. (1 ໂຢຮັນ 4:10, 19) ຄຳພີໄບເບິນບອກວ່າ: “ເຈົ້າຕ້ອງຮັກພະເຢໂຫວາພະເຈົ້າຂອງເຈົ້າສຸດຫົວໃຈ ສຸດຊີວິດ ສຸດຄວາມຄິດ ແລະສຸດກຳລັງຂອງເຈົ້າ.” (ມາຣະໂກ 12:30) ເຮົາສະແດງໃຫ້ເຫັນວ່າເຮົາຮັກພະເຢໂຫວາບໍ່ແມ່ນຈາກຄຳເວົ້າຂອງເຮົາເທົ່ານັ້ນແຕ່ຈາກການກະທຳຂອງເຮົານຳ. ຄືກັບຜູ້ຊາຍຜູ້ຍິງຄູ່ໜຶ່ງທີ່ຮັກກັນຫຼາຍ ເຂົາເຈົ້າບໍ່ໄດ້ພຽງແຕ່ບອກຮັກກັນເທົ່ານັ້ນ ແຕ່ເຂົາເຈົ້າຈະຕັດສິນໃຈແຕ່ງດອງກັນ. ຖ້າເຮົາຮັກພະເຢໂຫວາແທ້ໆເຮົາຄືຊິບໍ່ໄດ້ພຽງແຕ່ບອກວ່າເຮົາຮັກເພິ່ນ ແຕ່ເຮົາຈະຕັດສິນໃຈອຸທິດໂຕໃຫ້ເພິ່ນແລະຮັບບັບເຕມານຳ.

2. ພະເຢໂຫວາສັນຍາວ່າຈະໃຫ້ສິ່ງດີໆຫຍັງແດ່ກັບຄົນທີ່ຮັບບັບເຕມາ?

ເມື່ອເຈົ້າຮັບບັບເຕມາ ເຈົ້າກໍຈະໄດ້ເຂົ້າມາຢູ່ໃນຄອບຄົວຂອງພະເຢໂຫວາທີ່ມີຄວາມສຸກ. ພະເຢໂຫວາຈະເປັນພໍ່ຂອງເຈົ້າ ເຈົ້າຈະໄດ້ເຫັນວ່າເພິ່ນຮັກເຈົ້າຫຼາຍແລະເຈົ້າກໍຈະແຮ່ງໃກ້ຊິດກັບເພິ່ນຫຼາຍຂຶ້ນ. (ອ່ານມາລາກີ 3:16-18) ນອກຈາກນັ້ນ ໃນຄອບຄົວນີ້ຍັງມີພີ່ນ້ອງຄລິດສະຕຽນທົ່ວໂລກທີ່ຮັກພະເຢໂຫວາແລະເຂົາເຈົ້າກໍຮັກເຈົ້ານຳ. (ອ່ານມາຣະໂກ 10:29, 30) ແຕ່ເຈົ້າຕ້ອງເຮັດບາງຢ່າງກ່ອນເພື່ອຈະຮັບບັບເຕມາໄດ້. ເຈົ້າຕ້ອງຮຽນຮູ້ເລື່ອງພະເຢໂຫວາ ຮັກເພິ່ນ ເຊື່ອໃນພະເຢຊູ ແລະອຸທິດໂຕໃຫ້ກັບພະເຢໂຫວາ. ເມື່ອເຈົ້າເຮັດສິ່ງເຫຼົ່ານີ້ທັງໝົດແລ້ວ ເຈົ້າກໍສາມາດຮັບບັບເຕມາໄດ້ ແລ້ວເຈົ້າກໍຈະມີໂອກາດມີຊີວິດທີ່ມີຄວາມສຸກຕະຫຼອດໄປ. ຄຳພີໄບເບິນບອກວ່າ: “ການຮັບບັບເຕມາຊ່ວຍພວກເຈົ້າໃຫ້ລອດ.”—1 ເປໂຕ 3:21

ຮຽນຮູ້ຫຼາຍຂຶ້ນ

ເປັນຫຍັງຈຶ່ງເປັນເລື່ອງສຳຄັນທີ່ເຈົ້າຈະອຸທິດໂຕໃຫ້ກັບພະເຢໂຫວາແລະຮັບບັບເຕມາ.

3. ເຮົາທຸກຄົນຕ້ອງເລືອກວ່າຈະນະມັດສະການໃຜ

ຄົນອິດສະຣາເອນບາງຄົນໃນສະໄໝກ່ອນຄິດວ່າເຂົາເຈົ້າຈະນະມັດສະການພະເຢໂຫວາແລະນະມັດສະການພະບາອານທີ່ບໍ່ແມ່ນພະເຈົ້າທ່ຽງແທ້ໄປພ້ອມໆກັນໄດ້. ແຕ່ພະເຢໂຫວາສົ່ງຜູ້ພະຍາກອນເອລີຢາໃຫ້ໄປບອກເຂົາເຈົ້າວ່າສິ່ງທີ່ເຂົາເຈົ້າຄິດບໍ່ຖືກຕ້ອງ. ອ່ານ 1 ກະສັດ 18:21 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຄົນອິດສະຣາເອນຕ້ອງຕັດສິນໃຈເລື່ອງຫຍັງ?

ຄືກັບຄົນອິດສະຣາເອນ ເຮົາກໍຕ້ອງຕັດສິນໃຈວ່າຈະນະມັດສະການໃຜ. ອ່ານລູກາ 16:13 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເປັນຫຍັງເຮົາຕ້ອງນະມັດສະການພະເຢໂຫວາຜູ້ດຽວ?
ເຮົາຈະເຮັດໃຫ້ພະເຢໂຫວາເຫັນໄດ້ແນວໃດວ່າເຮົາເລືອກທີ່ຈະນະມັດສະການເພິ່ນ?

4. ຂໍໃຫ້ຄິດເບິ່ງວ່າພະເຢໂຫວາຮັກເຈົ້າຫຼາຍສ່ຳໃດ

ຮູບ: ຜູ້ຊາຍຄົນໜຶ່ງກຳລັງຄິດວ່າພະເຈົ້າໃຫ້ສິ່ງດີໆຫຍັງກັບລາວແດ່. 1. ຄວາມຮັກ ຮູບພາບຂອງແມ່ທີ່ອູ້ມລູກນ້ອຍດ້ວຍຄວາມຮັກ. 2. ອາຫານທີ່ແຊບໆ ຮູບພາບຂອງຜັກແລະໝາກໄມ້ຫຼາກຫຼາຍຊະນິດ. 3. ຄຳພີໄບເບິນ. 4. ຄ່າໄຖ່ທີ່ມາຈາກການເສຍສະລະຊີວິດຂອງພະເຢຊູຄລິດ.

ພະເຢໂຫວາໃຫ້ຂອງຂວັນທີ່ດີຫຼາຍຢ່າງກັບເຮົາ. ແຕ່ເຮົາຈະເຮັດຫຍັງໄດ້ເພື່ອສະແດງວ່າເຮົາຂອບໃຈເພິ່ນ? ເປີດວິດີໂອ.

ວິດີໂອ: ໃຫ້ຂອງຂວັນທີ່ເຈົ້າມີກັບພະເຈົ້າ (3:04)

ພະເຢໂຫວາສະແດງຄວາມຮັກຕໍ່ເຈົ້າແນວໃດແດ່? ອ່ານເພງສັນລະເສີນ 104:14, 15 ແລະ 1 ໂຢຮັນ 4:9, 10 ແລ້ວລົມກັນກ່ຽວກັບຄຳຖາມຕໍ່ໄປນີ້:

ມີຂອງຂວັນຫຍັງແດ່ທີ່ມາຈາກພະເຢໂຫວາທີ່ເຈົ້າປະທັບໃຈເປັນພິເສດ?
ແລ້ວຂອງຂວັນດີໆເຫຼົ່ານີ້ເຮັດໃຫ້ເຈົ້າຮູ້ສຶກແນວໃດກັບພະເຢໂຫວາ?

ຖ້າມີຄົນເອົາຂອງຂວັນມາໃຫ້ເຮົາແລະເຮົາກໍມັກຂອງຂວັນນັ້ນຫຼາຍ ເຮົາຄືຊິຢາກເຮັດບາງຢ່າງເພື່ອສະແດງວ່າເຮົາຂອບໃຈລາວແທ້ໆ. ອ່ານພະບັນຍັດ 16:17 ແລ້ວລົມກັນກ່ຽວກັບຄຳຖາມຕໍ່ໄປນີ້:

ພະເຢໂຫວາເຮັດຫຼາຍຢ່າງເພື່ອເຈົ້າ ເມື່ອຮູ້ແບບນີ້ແລ້ວເຈົ້າຢາກຈະເຮັດຫຍັງເພື່ອເພິ່ນ?

5. ເຈົ້າຈະໄດ້ຮັບພອນຫຼາຍຖ້າເຈົ້າອຸທິດໂຕໃຫ້ກັບພະເຢໂຫວາ

ຫຼາຍຄົນຄິດວ່າການມີຊື່ສຽງ ວຽກອາຊີບທີ່ດີ ຫຼືເງິນຄຳຈະເຮັດໃຫ້ເຂົາເຈົ້າມີຄວາມສຸກ. ແຕ່ເປັນແບບນັ້ນແທ້ບໍ? ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ກິລາເຕະບານເຄີຍເປັນສິ່ງສຳຄັນທີ່ສຸດໃນຊີວິດຂ້ອຍ (5:45)

ຮູບ: ສາກຈາກວິດີໂອ ‘ກິລາເຕະບານເຄີຍເປັນສິ່ງສຳຄັນທີ່ສຸດໃນຊີວິດຂ້ອຍ.’ 1. ອັນເດຣກັບມາຮຽນຄຳພີໄບເບິນອີກເທື່ອໜຶ່ງ. 2. ເອັນເດຣກັບລູກສາວໄປປະກາດ.

ອັນໃດເຮັດໃຫ້ນັກເຕະບານຄົນໜຶ່ງທີ່ມີຊື່ສຽງຫຼາຍເຊົາຫຼິ້ນເຕະບານ?
ແທນທີ່ລາວຈະທຸ່ມເທທັງຊີວິດໃຫ້ກັບກິລາເຕະບານ ແຕ່ລາວພັດຕັດສິນໃຈອຸທິດຕົວໃຫ້ກັບພະເຢໂຫວາ. ເຈົ້າຄິດວ່າລາວຕັດສິນໃຈຖືກບໍ? ເປັນຫຍັງເຈົ້າຈຶ່ງຄິດແບບນັ້ນ?

ກ່ອນທີ່ອັກຄະສາວົກໂປໂລຈະເຂົ້າມາເປັນຄລິດສະຕຽນ ລາວເປັນຄົນທີ່ມີໜ້າມີຕາໃນສັງຄົມ ແລະລາວຍັງເຄີຍຮຽນກົດໝາຍຂອງຄົນຢິວກັບອາຈານທີ່ມີຊື່ສຽງຫຼາຍນຳ. ແຕ່ລາວຍອມຖິ້ມສິ່ງເຫຼົ່ານີ້ເພື່ອຈະເຂົ້າມາເປັນຄລິດສະຕຽນ. ໂປໂລເສຍດາຍບໍທີ່ລາວເຮັດແບບນັ້ນ? ອ່ານຟີລິບປອຍ 3:8 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເປັນຫຍັງໂປໂລບອກວ່າສິ່ງທີ່ລາວເຄີຍມີກ່ອນຈະເຂົ້າມາເປັນຄລິດສະຕຽນເປັນຄືກັບ “ຂີ້ເຫຍື້ອ”?
ເມື່ອໂປໂລສະລະສິ່ງເຫຼົ່ານັ້ນ ລາວໄດ້ຫຍັງທີ່ມີຄ່າຫຼາຍ?
ເຈົ້າຄິດວ່າເຈົ້າຈະມີຊີວິດທີ່ມີຄວາມສຸກຫຼາຍຂຶ້ນບໍຖ້າເຈົ້າຕັດສິນໃຈຮັບໃຊ້ພະເຢໂຫວາ? ເປັນຫຍັງເຈົ້າຈຶ່ງຄິດແບບນັ້ນ?