ໃຊ້ປຶ້ມ “ມາຮູ້ຈັກພະຄຳຂອງພະເຈົ້າ” ເພື່ອເລີ່ມຕົ້ນການລົມກັນ
1. ເຮົາມີເຄື່ອງມືໃໝ່ອັນໃດສຳລັບການປະກາດ?
1 ໃນການປະຊຸມພາກປີ 2014 ເຮົາໄດ້ຮັບປຶ້ມມາຮູ້ຈັກພະຄຳຂອງພະເຈົ້າ. ເມື່ອກຽມຕົວສຳລັບການປະກາດ ເຮົາຈະໃຊ້ເຄື່ອງມືໃໝ່ນີ້ແນວໃດ? ແຕ່ລະຄຳຖາມມີການຍົກພະຄຳພີຫຼາຍຂໍ້ທີ່ເປັນຄຳຕອບ ເຊິ່ງຊ່ວຍໃຫ້ງ່າຍຂຶ້ນໃນການເວົ້າລົມກັບຜູ້ຄົນ.
2. ເຮົາອາດໃຊ້ປຶ້ມມາຮູ້ຈັກພະຄຳຂອງພະເຈົ້າ ໃນການປະກາດໄດ້ແນວໃດ?
2 ເຮົາອາດໃຊ້ຄຳຖາມທີ 8 ແລະເວົ້າວ່າ “ພວກເຮົາກຳລັງເວົ້າລົມກັບຄົນແຖວນີ້ ເພາະຫຼາຍຄົນສົງໄສວ່າ ‘ພະເຈົ້າເຮັດໃຫ້ເກີດຄວາມທຸກບໍ?’ [ໃນບາງເຂດ ການເປີດຄຳຖາມໃຫ້ເບິ່ງອາດໄດ້ຜົນດີກວ່າ] ເຈົ້າຄຶດແນວໃດ? [ໃຫ້ລາວຕອບ] ຄຳພີໄບເບິນມີຄຳຕອບທີ່ໜ້າພໍໃຈສຳລັບຄຳຖາມນີ້.” ອ່ານຈາກພະຄຳພີຈັກໜຶ່ງຂໍ້ຫຼືຫຼາຍກວ່ານັ້ນ ແລ້ວລົມກັນກ່ຽວກັບສິ່ງທີ່ອ່ານ. ຖ້າຄົນທີ່ລົມນຳສະແດງຄວາມສົນໃຈ ເຮົາອາດໃຫ້ລາວເບິ່ງ 20 ຄຳຖາມໃນໜ້າທຳອິດ ແລະໃຫ້ລາວເລືອກໜຶ່ງຄຳຖາມເພື່ອຈະລົມກັນເທື່ອໜ້າ ຫຼືອາດເອົາໜັງສືໃຫ້ລາວເຊິ່ງມີຂໍ້ມູນເພີ່ມເຕີມກ່ຽວກັບຄຳຖາມທີ່ຫາກໍລົມກັນ.
3. ໃນເຂດທີ່ຄົນບໍ່ໄດ້ນັບຖືສາສະໜາຄລິດສະຕຽນ ເຮົາຈະໃຊ້ປຶ້ມມາຮູ້ຈັກພະຄຳຂອງພະເຈົ້າ ແນວໃດ?
3 ຄຳຖາມທີ 4 ແລະ 13-17 ອາດໃຊ້ໄດ້ດີຫຼາຍໃນເຂດທີ່ຄົນບໍ່ໄດ້ນັບຖືສາສະໜາຄລິດສະຕຽນ. ຕົວຢ່າງເຊັ່ນ: ເຮົາອາດໃຊ້ຂໍ້ພະຄຳພີຈາກຄຳຖາມທີ 17 ແລະເວົ້າວ່າ: “ພວກເຮົາກຳລັງແວ່ຢາມຄົນແຖວນີ້ເພື່ອແບ່ງປັນເລື່ອງທີ່ດີກ່ຽວກັບຄອບຄົວ. ເຈົ້າເຫັນດີນຳບໍ ຄອບຄົວໃນທຸກມື້ນີ້ເຈິກັບບັນຫາຫຼາຍຢ່າງ? [ໃຫ້ລາວຕອບ] ຜົວເມຍຫຼາຍຄູ່ເຫັນວ່າຄຳແນະນຳນີ້ເປັນປະໂຫຍດ ທີ່ບອກວ່າ “ເມຍ [ຄວນ] . . . ຢ້ານຢຳຜົວແຫ່ງຕົນ.” [ບໍ່ຈຳເປັນຕ້ອງບອກວ່າຂໍ້ຄວາມນີ້ມາຈາກ ເອເຟດ 5:33. ຖ້າລົມກັບຜູ້ຍິງ ກໍໃຫ້ຍົກຂໍ້ຄວາມຈາກ ເອເຟດ 5:28] ຖ້າເອົາຄຳແນະນຳນີ້ໄປໃຊ້ ເຈົ້າຄຶດວ່າຈະເປັນປະໂຫຍດໃນຊີວິດຄອບຄົວບໍ?”
4. ເມື່ອລົມກັບຄົນທີ່ບໍ່ໄດ້ນັບຖືສາສະໜາຄລິດສະຕຽນ ເຮົາອາດເຮັດຫຍັງກ່ອນຈະເມືອ?
4 ກ່ອນຈະເມືອ ໃຫ້ນັດເພື່ອຈະລົມກັນອີກເທື່ອໜ້າ. ບາງເທື່ອອາດວາງແຜນທີ່ຈະເວົ້າກ່ຽວກັບຂໍ້ພະຄຳພີອີກໜຶ່ງຂໍ້ຈາກຄຳຖາມທີ່ໃຊ້ລົມກັນ. ຖ້າເຫັນວ່າຄົນນັ້ນຍອມຮັບໄດ້ ກໍໃຫ້ບອກວ່າຄຳແນະນຳທີ່ດີເຫຼົ່ານີ້ມາຈາກຄຳພີໄບເບິນ. ອີງໃສ່ສິ່ງທີ່ເວົ້າລົມກັນແລະທັດສະນະຂອງລາວຕໍ່ກັບຄຳພີໄບເບິນ ໃຫ້ສະເໜີໜັງສືທີ່ຄຶດວ່າລາວຈະສົນໃຈອ່ານ.—ເບິ່ງໃບແຊກພະລາຊະກິດຂອງເຮົາ ເດືອນທັນວາ 2013