ບົດຮຽນ 8
ເປັນຫຍັງພະເຈົ້າຍອມໃຫ້ມີຄວາມຊົ່ວແລະຄວາມທຸກລຳບາກ?
1. ຄວາມຊົ່ວຮ້າຍເລີ່ມຕົ້ນແນວໃດ?
ພະເຈົ້າໄດ້ຍອມໃຫ້ມະນຸດປົກຄອງຕົນເອງດົນພຽງພໍເພື່ອພິສູດວ່າເຂົາເຈົ້າບໍ່ສາມາດແກ້ໄຂບັນຫາຕ່າງໆຂອງມວນມະນຸດ
ຄວາມຊົ່ວຮ້າຍເລີ່ມຕົ້ນຕອນທີ່ຊາຕານເວົ້າຕົວະເທື່ອທຳອິດ. ແຕ່ເດີມ ຊາຕານເປັນທູດສະຫວັນທີ່ດີພ້ອມ ແຕ່ວ່າມັນ “ບໍ່ໄດ້ຕັ້ງຢູ່ໃນຄວາມຈິງ.” (ໂຢຮັນ 8:44) ມັນໄດ້ພັດທະນາຄວາມປາຖະໜາຢາກໄດ້ການນະມັດສະການທີ່ເປັນຂອງພະເຈົ້າພຽງຜູ້ດຽວ. ຊາຕານຈຶ່ງໄດ້ຕົວະເອວາຜູ້ຍິງຄົນທຳອິດ ແລະໄດ້ຊັກຊວນລາວໃຫ້ຟັງມັນເອງ ແທນທີ່ຈະເຊື່ອຟັງພະເຈົ້າ. ອາດາມໄດ້ເຂົ້າຮ່ວມກັບເອວາໃນການບໍ່ເຊື່ອຟັງພະເຈົ້າ. ການຕັດສິນໃຈແບບນັ້ນຂອງອາດາມໄດ້ເຮັດໃຫ້ເກີດຄວາມທຸກລຳບາກແລະຄວາມຕາຍ.—ອ່ານຕົ້ນເດີມ 3:1-6, 19
ເມື່ອຊາຕານໂນ້ມນ້າວໃຫ້ເອວາບໍ່ເຊື່ອຟັງພະເຈົ້າ ເຂົາເຈົ້າຈຶ່ງໄດ້ເລີ່ມຕົ້ນຂັດຂືນການປົກຄອງ ຫຼືຖານະທີ່ຍິ່ງໃຫຍ່ສູງສຸດຂອງພະເຈົ້າ. ມະນຸດສ່ວນຫຼາຍໄດ້ເຂົ້າສົມທົບກັບຊາຕານໃນການປະຕິເສດພະເຈົ້າທີ່ປົກຄອງພວກເຂົາ. ດັ່ງນັ້ນ ຊາຕານຈຶ່ງກາຍເປັນ “ເຈົ້ານາຍແຫ່ງໂລກນີ້.”—ອ່ານໂຢຮັນ 14:30; 1 ໂຢຮັນ 5:19
2. ສິ່ງທີ່ພະເຈົ້າສ້າງບົກພ່ອງບໍ?
ຜົນງານທັງໝົດຂອງພະເຈົ້າບໍ່ມີຂໍ້ບົກພ່ອງ. ມະນຸດແລະທູດສະຫວັນທີ່ພະເຈົ້າສ້າງສາມາດເຊື່ອຟັງພະອົງໄດ້ໝົດທຸກເລື່ອງ. (ພະບັນຍັດ 32:4, 5) ພະເຈົ້າສ້າງມະນຸດໃຫ້ມີເສລີພາບທີ່ຈະເລືອກເຮັດດີຫຼືເຮັດຊົ່ວ. ເສລີພາບນັ້ນເປີດໂອກາດໃຫ້ເຮົາສະແດງຄວາມຮັກຕໍ່ພະເຈົ້າ.—ອ່ານຢາໂກໂບ 1:13-15; 1 ໂຢຮັນ 5:3
3. ເປັນຫຍັງພະເຈົ້າປ່ອຍໃຫ້ມີຄວາມທຸກລຳບາກຈົນເຖິງທຸກມື້ນີ້?
ພະເຢໂຫວາຍອມໃຫ້ຜູ້ກະບົດຕໍ່ການປົກຄອງຂອງພະອົງມີຢູ່ໄລຍະໜຶ່ງ. ເປັນຫຍັງ? ກໍເພື່ອໃຫ້ເຫັນວ່າມະນຸດປົກຄອງຕົນເອງໂດຍບໍ່ເພິ່ງພະອົງຈະບໍ່ປະສົບຜົນສຳເລັດ. (ຜູ້ເທສະໜາປ່າວປະກາດ 7:29; 8:9) ປະຫວັດສາດ 6.000 ປີ ທີ່ຜ່ານມາຂອງມະນຸດເປັນຫຼັກຖານທີ່ຊີ້ໃຫ້ເຫັນແຈ້ງແລ້ວວ່າ ຜູ້ປົກຄອງທີ່ເປັນມະນຸດບໍ່ສາມາດກຳຈັດສົງຄາມ ອາດຊະຍາກຳ ຄວາມບໍ່ຍຸຕິທຳ ຫຼືໂລກໄພໄຂ້ເຈັບ.—ອ່ານເຢເຣມີ 10:23; ໂລມ 9:17
ບໍ່ຄືກັບການປົກຄອງຂອງມະນຸດ ການປົກຄອງຂອງພະເຈົ້າເປັນປະໂຫຍດຕໍ່ຜູ້ທີ່ຍອມຮັບເອົາການປົກຄອງນັ້ນ. (ເອຊາອີ 48:17, 18) ອີກບໍ່ດົນ ພະເຢໂຫວາຈະເຮັດໃຫ້ການປົກຄອງຂອງມະນຸດເຖິງຈຸດຈົບ. ຜູ້ທີ່ເລືອກເອົາການປົກຄອງຂອງພະເຈົ້າເທົ່ານັ້ນຈະໄດ້ຢູ່ໃນໂລກຕໍ່ໄປ.—ອ່ານດານຽນ 2:44
ເບິ່ງວິດີໂອ ເປັນຫຍັງພະເຈົ້າຈຶ່ງຍອມໃຫ້ມີຄວາມທຸກ?
4. ຄວາມອົດທົນຂອງພະເຈົ້າເປີດໂອກາດໃຫ້ເຮົາເຮັດຫຍັງ?
ຊາຕານອ້າງວ່າບໍ່ມີໃຜຮັບໃຊ້ພະເຈົ້າຢ່າງບໍ່ເຫັນແກ່ຕົວ. ທ່ານຈະພິສູດວ່າຄຳອ້າງນັ້ນບໍ່ຈິງໄດ້ບໍ? ໄດ້! ຄວາມອົດທົນຂອງພະເຈົ້າເປີດໂອກາດໃຫ້ເຮົາສະແດງວ່າເຮົາຕ້ອງການໃຫ້ພະເຈົ້າປົກຄອງເຮົາ ຫຼືວ່າໃຫ້ມະນຸດປົກຄອງເຮົາ. ດັ່ງນັ້ນ ວິທີທີ່ເຮົາດຳເນີນຊີວິດຈຶ່ງບອກເຖິງການເລືອກຂອງເຮົາ.—ອ່ານໂຢບ 1:8-12; ສຸພາສິດ 27:11
5. ເຮົາຈະເລືອກໃຫ້ພະເຈົ້າປົກຄອງເຮົາໄດ້ແນວໃດ?
ສິ່ງທີ່ເຮົາເລືອກເປີດເຜີຍວ່າເຮົາຕ້ອງການໃຫ້ພະເຈົ້າເປັນຜູ້ປົກຄອງເຮົາຫຼືບໍ່
ເຮົາເລືອກໃຫ້ພະເຈົ້າປົກຄອງເຮົາໂດຍການສະແຫວງຫາແລະປະຕິບັດການນະມັດສະການແທ້ທີ່ອາໄສຄຳພີໄບເບິນພະຄຳຂອງພະເຈົ້າເປັນຫຼັກ. (ໂຢຮັນ 4:23) ຄືກັບທີ່ພະເຍຊູເຄີຍເຮັດ ເຮົາກໍສາມາດປະຕິເສດການປົກຄອງຂອງຊາຕານໂດຍບໍ່ມີສ່ວນໃນການເມືອງແລະສົງຄາມ.—ອ່ານໂຢຮັນ 17:14
ຊາຕານໃຊ້ອຳນາດຂອງມັນສົ່ງເສີມການຜິດສິລະທຳ ກິດປະຕິບັດທີ່ເປັນອັນຕະລາຍ. ເມື່ອເຮົາປະຕິເສດການກະທຳແບບນີ້ ໝູ່ເພື່ອນແລະຍາດພີ່ນ້ອງອາດຈະເຍາະເຍີ້ຍຫຼືຕໍ່ຕ້ານເຮົາ. (1 ເປໂຕ 4:3, 4) ດັ່ງນັ້ນ ເມື່ອເຮົາຕ້ອງເລືອກແນວໃດແນວໜຶ່ງ. ເຮົາຈະເລືອກຄົບຫາສະມາຄົມກັບຜູ້ທີ່ຮັກພະເຈົ້າບໍ? ເຮົາຈະເລືອກເຊື່ອຟັງກົດໝາຍທີ່ດີພ້ອມຂອງພະອົງບໍ? ຖ້າເຮົາເລືອກ ເຮົາກໍຈະສະແດງວ່າຊາຕານເປັນຜູ້ຕົວະ ມັນອ້າງວ່າ ເມື່ອເຮົາຕົກຢູ່ພາຍໃຕ້ການກົດດັນຈະບໍ່ມີໃຜເຊື່ອຟັງພະເຈົ້າ.—ອ່ານ 1 ໂກລິນໂທ 6:9, 10; 15:33
ຄວາມຮັກທີ່ພະເຈົ້າມີຕໍ່ມະນຸດເປັນສິ່ງຄ້ຳປະກັນວ່າຄວາມຊົ່ວແລະຄວາມທຸກລຳບາກຈະໝົດໄປ. ຜູ້ທີ່ສະແດງຄວາມເຊື່ອຢ່າງນີ້ກໍຈະມີຊີວິດຕະຫຼອດໄປເທິງແຜ່ນດິນໂລກ.—ອ່ານໂຢຮັນ 3:16