ບົດທີ 35
ຂ້ອຍຈະເຊົາໃຊ້ຢາເສບຕິດໄດ້ແນວໃດ?
ເຈົ້າຕິດຢາເສບຕິດບໍ? ເຈົ້າອາດຮູ້ວ່າການຕິດຢາເສບຕິດຈະທຳລາຍສະໝອງແລະຮ່າງກາຍ. ເຈົ້າແມ່ນກະທັ່ງອາດເຄີຍພະຍາຍາມທີ່ຈະເຊົານິດໄສນີ້ ແຕ່ແລ້ວກໍກັບໄປໃຊ້ຢາເສບຕິດອີກ. ຖ້າເປັນເຊັ່ນນັ້ນ ຢ່າຟ້າວໝົດຫວັງ. ຄົນອື່ນໆສາມາດເອົາຊະນະນິດໄສການຕິດຢາເສບຕິດໄດ້ ແລະເຈົ້າກໍສາມາດເຮັດໄດ້ຄືກັນ! ເພື່ອເປັນຕົວຢ່າງ ຂໍໃຫ້ພິຈາລະນາໃນສິ່ງທີ່ສາມຄົນເຊິ່ງມາຈາກພູມຫຼັງທີ່ແຕກຕ່າງກັນຢ່າງສິ້ນເຊີງ ເວົ້າເຖິງວິທີທີ່ເຂົາເຈົ້າສາມາດເຊົາໄດ້.
ຊື່ ນາງ ມາທາ
ພູມຫຼັງ ແມ່ບໍ່ໄດ້ແຕ່ງດອງເມື່ອຂ້ອຍເກີດ ສະນັ້ນຂ້ອຍກັບນ້ອງສາວຈຶ່ງເຕີບໃຫຍ່ຂຶ້ນມາໂດຍທີ່ບໍ່ມີພໍ່. ນັບຕັ້ງແຕ່ອາຍຸປະມານ 12 ປີ ຂ້ອຍເລີ່ມໄປເຕັ້ນດິດສະໂກກັບນ້າສາວເຊິ່ງເປັນຄົນທີ່ມັກເຕັ້ນ. ຂ້ອຍເປັນຄົນມັກສັງຄົມຫຼາຍແລະບໍ່ດົນກໍເຂົ້າໄປພົວພັນກັບຄົນທີ່ມີນິດໄສບໍ່ດີ. ຂ້ອຍເລີ່ມທົດລອງໃຊ້ຢາເສບຕິດຕອນອາຍຸ 13 ປີ. ນອກຈາກນັ້ນ ກໍເລີ່ມຕົ້ນໃຊ້ໂຄເຄນ. ທຳອິດ ຂ້ອຍເພີດເພີນກັບການໃຊ້ຢາເສບຕິດ ແຕ່ຕໍ່ຈາກນັ້ນບໍ່ດົນ ຂ້ອຍເລີ່ມເຫັນພາບລວງຕາແລະຢ້ານທຸກຢ່າງ. ແລະເມື່ອຢາໝົດລິດ ຂ້ອຍມີແຕ່ຄິດເລື່ອງການຂ້າຕົວຕາຍ. ຂ້ອຍຕ້ອງການເຊົາໃຊ້ຢາເສບຕິດ ແຕ່ວ່າບໍ່ມີຄວາມຕັ້ງໃຈທີ່ຈະເຮັດ.
ວິທີທີ່ຊ່ວຍໃຫ້ເຊົາໄດ້ ຂ້ອຍເລີ່ມຕົ້ນຄິດຫາພະເຈົ້າແລະແມ່ນແຕ່ໄປໂບດສອງສາມເທື່ອ. ແຕ່ກໍແຮ່ງທໍ້ແທ້ໃຈຫຼາຍຂຶ້ນ. ຕອນອາຍຸໄດ້ 18 ປີ ຂ້ອຍໄປຢູ່ກິນກັບແຟນແລະເຮົາມີລູກນຳກັນຄົນໜຶ່ງ. ການມີລູກຊາຍແຮ່ງເຮັດໃຫ້ຂ້ອຍຢາກປ່ຽນແປງຮູບແບບຊີວິດຂອງຕົນເອງ. ໝູ່ເກົ່າຄົນໜຶ່ງຍ້າຍມາຢູ່ເຮືອນກົງກັນຂ້າມກັບເຮືອນທີ່ຂ້ອຍຢູ່. ລາວມາຢາມແລະຖາມວ່າຂ້ອຍເປັນແນວໃດ. ຂ້ອຍລະບາຍທຸກຢ່າງໃນໃຈສູ່ລາວຟັງ. ລາວບອກວ່າລາວໄດ້ກາຍມາເປັນພະຍານພະເຢໂຫວາແລະສະເໜີການສຶກສາຄຳພີໄບເບິນກັບຂ້ອຍ. ຂ້ອຍຍອມຮັບເອົາການສຶກສາ.
ຂ້ອຍຮຽນຮູ້ວ່າພະເຈົ້າບໍ່ພໍໃຈກັບຮູບແບບຊີວິດຂອງຂ້ອຍ ແລະຍ້ອນແນວນັ້ນຂ້ອຍຕ້ອງເຊົາໃຊ້ຢາເສບຕິດແລະເຊົາສູບຢາ. ແຕ່ຂ້ອຍຍັງເຊົາໃຊ້ຢາເສບຕິດບໍ່ໄດ້. ຂ້ອຍຈຶ່ງອ້ອນວອນຫາພະເຢໂຫວາພະເຈົ້າມື້ລະຫຼາຍໆຄັ້ງເພື່ອຊ່ວຍໃຫ້ຫລຸດພົ້ນຈາກນິດໄສທີ່ບໍ່ດີ. ຂ້ອຍຕ້ອງການເຮັດໃຫ້ພະອົງພໍໃຈ. (ສຸພາສິດ 27:11) ຫຼັງຈາກສຶກສາພະຄຳພີໄດ້ຫົກເດືອນແລະຄົບຫາກັບພະຍານພະເຢໂຫວາ ຂ້ອຍສາມາດເຊົາໃຊ້ຢາເສບຕິດ. ຕອນນີ້ຊີວິດຂ້ອຍມີຄວາມໝາຍຫຼາຍຂຶ້ນ. ຂ້ອຍບໍ່ໄດ້ໂສກເສົ້າອີກຕໍ່ໄປ. ຂ້ອຍພົບກັບພີ່ນ້ອງຊາຍຄລິດສະຕຽນທີ່ດີຫຼາຍແລະແຕ່ງດອງກັບລາວ. ຂ້ອຍລ້ຽງລູກຊາຍໂດຍອາໄສຫຼັກການຕ່າງໆໃນຄຳພີໄບເບິນ. ຂ້ອຍຂອບໃຈແທ້ໆທີ່ພະເຢໂຫວາຟັງຄຳອະທິດຖານຂອງຂ້ອຍແລະຊ່ວຍຂ້ອຍ!
ຊື່ ທ້າວ ມາຊີໂອ
ພູມຫຼັງ ຂ້ອຍເຕີບໃຫຍ່ຂຶ້ນຢູ່ເຂດນອກເມືອງຊານຕູອານເດຣ ເຊິ່ງເປັນເມືອງທີ່ມີພົນລະເມືອງໜາແໜ້ນໃນລັດຊາວປາວໂລ ປະເທດເບຣຊີນ. ຂ້ອຍສູບຢາ ໃຊ້ຢາເສບຕິດ ແລະປຸ້ນເຄື່ອງຂອງຕັ້ງແຕ່ຍັງນ້ອຍໆ. ໝູ່ຂອງຂ້ອຍຫຼາຍຄົນກ່ຽວຂ້ອງກັບການລັກລົດໃຫຍ່ແລະການຄ້າຢາເສບຕິດ. ຄົນໜຶ່ງໃນຈຳນວນໝູ່ເຫຼົ່ານັ້ນສະເໜີຢາເສບຕິດລ້າໆໃຫ້ກັບໜຸ່ມສາວທີ່ອາໄສຢູ່ເຂດບ້ານຂອງພວກເຮົາ. ເມື່ອພວກເຂົາເຈົ້າຕິດແລ້ວ ກໍຈຳເປັນຕ້ອງຊື້ຢາເສບຕິດຈາກລາວ.
ຕຳຫຼວດລາດຕະເວນຢູ່ເຂດອາໄສບ້ານຂອງພວກເຮົາຕະຫຼອດເວລາ ແລະຂ້ອຍຖືກຈັບຫຼາຍຄັ້ງເນື່ອງຈາກຄວາມຜິດເລັກໆນ້ອຍໆ ແລະຄັ້ງໜຶ່ງຖືກຕັ້ງຂໍ້ຫາຄ້າຢາເສບຕິດ. ຫຼາຍຄັ້ງຂ້ອຍເອົາເຄື່ອງທີ່ກຸ່ມນັກເລງລັກມາແລະປືນຂອງເຂົາເຈົ້າໄວ້ຢູ່ເຮືອນຂອງຂ້ອຍ.
ຜູ້ຄົນພາກັນຢ້ານຂ້ອຍ. ຕາຂອງຂ້ອຍແດງກ່ຳແລະຂ້ອຍບໍ່ເຄີຍຍິ້ມຈັກເທື່ອ. ທີ່ຈິງແລ້ວ ຂ້ອຍມີສີໜ້າທີ່ໂຫດຮ້າຍຢູ່ຕະຫຼອດເວລາ. ຂ້ອຍຖືກຕັ້ງຊື່ຫຼິ້ນວ່າ “ທູຟາວ” (ພະຍຸໄຕ້ຝຸ່ນ) ເພາະບ່ອນໃດກໍຕາມທີ່ໄປ ຂ້ອຍສ້າງບັນຫາໂລດ. ນອກຈາກນັ້ນ ຂ້ອຍຍັງດື່ມໜັກແລະໃຊ້ຊີວິດແບບຜິດສິລະທຳ. ໝູ່ຂອງຂ້ອຍຫຼາຍຄົນເສຍຊີວິດຫຼືບໍ່ຊັ້ນກໍຖືກຄຸກ. ຂ້ອຍເສົ້າໃຈອີ່ຫຼີຈົນເຖິງຂັ້ນວ່າເອົາເຊືອກໄປມັດງ່າໄມ້ແລະພະຍາຍາມທີ່ຈະຜູກຄໍຕາຍ.
ວິທີທີ່ຊ່ວຍໃຫ້ເຊົາໃຊ້ຢາເສບຕິດ ຂ້ອຍຂໍພະເຈົ້າໃຫ້ຊ່ວຍຂ້ອຍ. ໃນທີ່ສຸດ ຂ້ອຍກໍພົບກັບພະຍານພະເຢໂຫວາແລະເລີ່ມຕົ້ນສຶກສາຄຳພີໄບເບິນ. ຂ້ອຍຮຽນຮູ້ວ່າພະເຈົ້າມີຊື່ສະເພາະ ນັ້ນຄືເຢໂຫວາ ແລະພະອົງໃສ່ໃຈແລະຊ່ວຍຜູ້ທີ່ພະຍາຍາມຢ່າງໜັກທີ່ຈະດຳເນີນຊີວິດຕາມາດຕະຖານຂອງພະອົງ. (ຄຳເພງ 83:18; 1 ເປໂຕ 5:6, 7) ຂ້ອຍມີຫຼາຍສິ່ງຫຼາຍຢ່າງທີ່ຕ້ອງປ່ຽນແປງ. ສິ່ງໜຶ່ງທີ່ຍາກທີ່ສຸດກໍຄືການຍິ້ມ.
ຂ້ອຍຂໍຄວາມຊ່ວຍເຫຼືອຈາກພະເຢໂຫວາຕະຫຼອດ ແລະຂ້ອຍເອົາຄຳແນະນຳໃນຄຳພີໄບເບິນໄປໃຊ້. ຕົວຢ່າງເຊັ່ນ ຂ້ອຍເຊົາຄົບຫາກັບໝູ່ເກົ່າ ແລະຫຼີກລ່ຽງທີ່ຈະບໍ່ໄປບາຂາຍເຫຼົ້າ. ແທນທີ່ຈະເຮັດແນວນັ້ນ ຂ້ອຍເລືອກທີ່ຈະຄົບຫາກັບຄົນທີ່ດຳເນີນຊີວິດຕາມມາດຕະຖານຂອງຄຳພີໄບເບິນ. ເປັນການຕໍ່ສູ້ທີ່ຍາກ ແຕ່ຂ້ອຍບໍ່ໄດ້ເປັນຂີ້ລັກຫຼືເປັນຕົວສ້າງບັນຫາອີກຕໍ່ໄປແລ້ວ. ແລະຕອນນີ້ເປັນເວລາຫຼາຍກວ່າສິບປີແລ້ວທີ່ຂ້ອຍບໍ່ໄດ້ແຕະຕ້ອງຢາເສບຕິດເລີຍ.
ຊື່ ທ້າວ ກະເລັກ
ພູມຫຼັງ ຂ້ອຍເຕີບໃຫຍ່ຂຶ້ນຢູ່ໃນຟາມຢູ່ລັດຊື່ຊາວອົດສະຕຣາລີ. ພໍ່ເປັນຂີ້ເຫຼົ້າ. ພໍ່ກັບແມ່ແຍກທາງກັນຕອນຂ້ອຍອາຍຸແປດປີ. ແມ່ແຕ່ງດອງໃໝ່ແລະຂ້ອຍຢູ່ກັບແມ່ຈົນຮອດອາຍຸ 17 ປີ. ໃນປີນັ້ນເອງຂ້ອຍຮຽນຕັດຂົນແກະແລະເລີ່ມໃຊ້ຊີວິດກັບກຸ່ມຄົນຕັດຂົນແກະເຊິ່ງເດີນທາງໄປບ່ອນໃດກໍຕາມທີ່ຈະໄດ້ວຽກ. ຂ້ອຍເລີ່ມຕົ້ນໃຊ້ຢາເສບຕິດຫຼາກຫຼາຍປະເພດແລະດື່ມເຫຼົ້າໜັກ. ຂ້ອຍຈົ່ງຜົມຍາວ ໃສ່ນ້ຳມັນໃຫ້ເຫຼື້ອມແລະເປຍຜົມທີ່ຮ້ອຍໝາກຕຸ້ມໃສ່. ຂ້ອຍກາຍເປັນຄົນຂີ້ອິດສາ ຫຍາບຄາຍ ແລະອາລົມຮ້ອນ. ຂ້ອຍຕິດຄຸກຫຼາຍກວ່າໜຶ່ງຄັ້ງ.
ຂ້ອຍຍ້າຍໄປຢູ່ທີ່ເມືອງນ້ອຍໆຢູ່ລັດເວສະເຕີນອົດສະຕຣາລີ ແລະຢູ່ກິນກັບແຟນເຊິ່ງເຮັດວຽກເສີບເຫຼົ້າຢູ່ໃນໂຮງແຮມຂອງທ້ອງຖິ່ນ. ພວກເຮົາທັງສອງສູບຢາແລະດື່ມເຫຼົ້າ ແລະປູກກັນຊາເອງ.
ວິທີທີ່ຊ່ວຍໃຫ້ເຊົາໃຊ້ຢາເສບຕິດ ພວກເຮົາຫາກໍເກັບກ່ຽວກັນຊາເມື່ອພະຍານພະເຢໂຫວາເຄາະປະຕູເຮືອນທີ່ເກົ່າໆຂອງເຮົາ. ຂ້ອຍບໍ່ໄດ້ຍອມຮັບເອົາງ່າຍໆໃນສິ່ງທີ່ເຂົາເຈົ້າເວົ້າ. ເມື່ອເວລາຜ່ານໄປຂ້ອຍພິສູດໃຫ້ຕົວເອງເຫັນວ່າສິ່ງທີ່ຄຳພີໄບເບິນເວົ້າເປັນຄວາມຈິງ. ຈາກນັ້ນເທື່ອລະຂັ້ນ ຂ້ອຍຕໍ່ສູ້ກັບບັນຫາແຕ່ລະຢ່າງຂອງຂ້ອຍ.
ໃນຕໍ່ມາອີກບໍ່ດົນຂ້ອຍກໍເຊົານິດໄສສູບກັນຊາ. ນັ້ນກ່ຽວຂ້ອງກັບການເຮັດຫຍັງແດ່? ຂ້ອຍອອກແຮງພະຍາຍາມເອົາແທ້ເອົາວ່າໃນການປູກກັນຊາ ດັ່ງນັ້ນ ທຳອິດຄິດວ່າຈະເອົາທັງໝົດໄປໃຫ້ຄົນອື່ນ. ແຕ່ຂ້ອຍຕັດສິນໃຈວ່ານັ້ນບໍ່ແມ່ນທາງແກ້ທີ່ດີ ສະນັ້ນຈຶ່ງທຳລາຍຕົ້ນກັນຊາ. ການອະທິດຖານມີບົດບາດສຳຄັນໃນການຊ່ວຍໃຫ້ເອົາຊະນະການໃຊ້ຢາເສບຕິດແລະການດື່ມເຫຼົ້າໜັກ. ຂ້ອຍຂໍໃຫ້ພະວິນຍານຂອງພະເຈົ້າຊ່ວຍໃຫ້ຊະນະການຕໍ່ສູ້ນີ້. ນອກຈາກນັ້ນ ຂ້ອຍກໍເຊົາຄົບຫາກັບຜູ້ທີ່ສົ່ງເສີມນິດໄສທີ່ບໍ່ດີ. ໃນຂະນະທີ່ຮຽນຮູ້ແລະນຳໃຊ້ຄຳສອນຕ່າງໆໃນຄຳພີໄບເບິນ ຂ້ອຍໄດ້ຮັບຄວາມປອດໄພທາງດ້ານອາລົມທີ່ຈຳເປັນຕ້ອງມີເພື່ອເອົາຊະນະນິດໄສໃຈຄໍບາງຢ່າງທີ່ບົກພ່ອງ. ແຟນຂອງຂ້ອຍກໍສຶກສາຄຳພີໄບເບິນແລະປ່ຽນແປງນິດໄສແລະຮູບແບບຊີວິດຂອງລາວ. ພວກເຮົາແຕ່ງດອງກັນ. ເປັນເວລາ 21 ປີແລ້ວທີ່ພວກເຮົາມີຄວາມສຸກກັບການມີສຸຂະພາບທີ່ດີກວ່າ ແລະຕອນນີ້ພວກເຮົາຍິນດີໃນການລ້ຽງລູກຊາຍສອງຄົນ. ຂ້ອຍຂົນລຸກທີ່ຈະຄິດວ່າຊີວິດຈະເປັນແນວໃດຖ້າຂ້ອຍບໍ່ໄດ້ຮັບການຊ່ວຍເຫຼືອຈາກພະເຢໂຫວາໃນການປ່ຽນແປງຮູບແບບຊີວິດ.
ຂໍ້ພະຄຳພີຫຼັກ
“ພະເຢໂຫວາເປັນເຫື່ອແຮງແລະເປັນກຳລັງຂອງຂ້ອຍ.”—ເອຊາອີ 12:2, ລ.ມ.
ຄຳແນະນຳ
ຖ້າເປັນໄປໄດ້ໃຫ້ຫຼີກລ່ຽງຜູ້ຄົນ ສະຖານທີ່ ແລະສິ່ງຕ່າງໆທີ່ກ່ຽວຂ້ອງກັບຜູ້ທີ່ເຈົ້າເຄີຍໃຊ້ຢາເສບຕິດນຳ. ການຄົ້ນຄວ້າສະແດງໃຫ້ເຫັນວ່າພຽງແຕ່ເຫັນສິ່ງໃດສິ່ງໜຶ່ງໃນຈຳນວນສິ່ງເຫຼົ່ານີ້ກໍສາມາດເຮັດໃຫ້ເຈົ້າຢາກໃຊ້ຢາເສບຕິດອີກ.
ເຈົ້າຮູ້ບໍ . . .?
ການໃຊ້ຢາເສບຕິດສາມາດປ່ຽນແປງໂຄງສ້າງການເຮັດວຽກຂອງມັນສະໝອງໃຫ້ຜິດປົກກະຕິ.
ແຜນພາກປະຕິບັດ!
ຖ້າຫວນກັບຄືນໄປໃຊ້ຢາເສບຕິດອີກ ຂ້ອຍຈະ ․․․․․
ສິ່ງທີ່ຂ້ອຍຢາກຖາມພໍ່ (ແມ່) ກ່ຽວກັບເລື່ອງນີ້ແມ່ນ ․․․․․
ເຈົ້າຄິດວ່າແນວໃດ?
• ເປັນຫຍັງຄົນເຮົາອາດຈຳເປັນຕ້ອງເຮັດການປ່ຽນແປງຮູບແບບຊີວິດຢ່າງຫຼວງຫຼາຍ ຖ້າວ່າຕ້ອງການເຊົາໃຊ້ຢາເສບຕິດ?
• ການຮຽນຮູ້ຄວາມຈິງກ່ຽວກັບພະເຈົ້າສາມາດຊ່ວຍໄດ້ແນວໃດ?
[ຈຸດເດັ່ນໜ້າ 253]
“ໂດຍການດຳເນີນຊີວິດຕາມມາດຕະຖານອັນສູງສົ່ງຂອງຄຳພີໄບເບິນ ຕອນນີ້ຂ້ອຍພົບກັບຊີວິດທີ່ມີຄວາມສຸກແລະມີຄວາມໝາຍ.”—ນາງ ມາທາ
[ຮູບພາບໜ້າ 256]
ການເອົາຊະນະນິດໄສຕິດຢາເສບຕິດເປັນຄືກັບການໜີພົ້ນຈາກເຮືອນທີ່ກຳລັງຖືກໄຟໄໝ້ ນັ້ນຄືຕ້ອງປະຖິ້ມບາງຢ່າງໄວ້ ແຕ່ເຈົ້າຈະຮັກສາຊີວິດຕົວເອງໄວ້