ບົດທີ 39
ຂ້ອຍຈະບັນລຸເປົ້າໝາຍຂອງຂ້ອຍໄດ້ແນວໃດ?
ໃນສິ່ງຕໍ່ໄປນີ້ເຈົ້າຢາກມີອັນໃດ?
◻ ມີຄວາມໝັ້ນໃຈຫຼາຍຂຶ້ນ
◻ ມີໝູ່ຫຼາຍຂຶ້ນ
◻ ມີຄວາມສຸກຫຼາຍຂຶ້ນ
ທີ່ຈິງແລ້ວ ເຈົ້າສາມາດມີໄດ້ທັງສາມຢ່າງ! ເຈົ້າຕ້ອງເຮັດແນວໃດ? ໂດຍການຕັ້ງເປົ້າໝາຍແລະພະຍາຍາມບັນລຸເປົ້າໝາຍນັ້ນ. ຂໍໃຫ້ພິຈາລະນາຄຳແນະນຳຕໍ່ໄປນີ້
ມີຄວາມໝັ້ນໃຈຫຼາຍຂຶ້ນ. ເມື່ອຕັ້ງເປົ້າໝາຍນ້ອຍໆແລະເຮັດໄດ້ສຳເລັດ ເຈົ້າຈະມີຄວາມໝັ້ນໃຈຫຼາຍຂຶ້ນໃນການເຮັດຕາມເປົ້າໝາຍທີ່ໃຫຍ່ກວ່າ. ເຈົ້າຈະຮູ້ສຶກໝັ້ນໃຈຫຼາຍຂຶ້ນນຳອີກເມື່ອປະເຊີນບັນຫາໃນແຕ່ລະວັນເຊັ່ນ ເມື່ອຕ້ອງຕໍ່ສູ້ກັບຄວາມກົດດັນຈາກຄົນຮຸ່ນດຽວກັນ.
ມີໝູ່ຫຼາຍຂຶ້ນ. ຄົນເຮົາມັກຢູ່ກັບຄົນທີ່ມີເປົ້າໝາຍທີ່ສົມເຫດສົມຜົນ ຄືຮູ້ວ່າຕົນເອງຕ້ອງການຫຍັງແລະຕັ້ງໃຈເພື່ອຈະບັນລຸເປົ້າໝາຍນັ້ນ.
ມີຄວາມສຸກຫຼາຍຂຶ້ນ. ຂໍໃຫ້ຍອມຮັບຄວາມຈິງໃນເລື່ອງນີ້ ການຮູ້ສຶກເບື່ອໜ່າຍຫຼືຕ້ອງລໍຖ້າໃຫ້ມີບາງຢ່າງເກີດຂຶ້ນໃນຊີວິດບໍ່ແມ່ນເລື່ອງທີ່ມ່ວນ. ແຕ່ເມື່ອຕັ້ງເປົ້າໝາຍ ແລະເຮັດຕາມເປົ້າໝາຍນັ້ນໄດ້ ເຈົ້າຈະຮູ້ສຶກພູມໃຈ. ເຈົ້າພ້ອມທີ່ຈະເລີ່ມຕົ້ນແລ້ວບໍ? ໜ້າຕ່າງໆຕໍ່ໄປນີ້ຈະຊ່ວຍໄດ້!a
✔ 1 ກຳນົດເປົ້າໝາຍ
1. ຄິດເຖິງເປົ້າໝາຍທຸກຢ່າງເທົ່າທີ່ຈະຄິດອອກໄດ້. ຂໍໃຫ້ມ່ວນກັບຂັ້ນຕອນນີ້! ຢ່າຟ້າວວິເຄາະ ພຽງແຕ່ຂຽນເປົ້າໝາຍຕ່າງໆໃຫ້ຫຼາຍທີ່ສຸດເທົ່າທີ່ຈະເຮັດໄດ້. ລອງເບິ່ງດູວ່າເຈົ້າຈະຄິດອອກຈັກ 10 ເປົ້າໝາຍໄດ້ບໍ.
2. ປະເມີນຄ່າເປົ້າໝາຍ. ເປົ້າໝາຍຂໍ້ໃດທີ່ເປັນຕາໜ້າຕື່ນເຕັ້ນທີ່ສຸດ? ຂໍ້ໃດທ້າທາຍຫຼາຍທີ່ສຸດ? ຂໍ້ໃດທີ່ເຈົ້າຈະພູມໃຈເປັນພິເສດຖ້າເຮັດໄດ້ສຳເລັດ? ຂໍໃຫ້ຈື່ໄວ້ວ່າ ເປົ້າໝາຍທີ່ດີທີ່ສຸດກໍຄືເປົ້າໝາຍທີ່ມີຄ່າຫຼາຍທີ່ສຸດສຳລັບເຈົ້າ.
3. ຈັດລຳດັບຄວາມສຳຄັນ. ໃຫ້ເຈົ້າໃສ່ຕົວເລກຕາມລຳດັບທີ່ຢາກຈະເຮັດໃຫ້ສຳເລັດ.
✔ 2 ວາງແຜນ
ສຳລັບເປົ້າໝາຍແຕ່ລະຢ່າງທີ່ເຈົ້າເລືອກ ຂໍໃຫ້ເຮັດສິ່ງຕໍ່ໄປນີ້
ຂຽນເປົ້າໝາຍຂອງເຈົ້າ.
ຮຽນພາສາອັງກິດ
ກຳນົດເວລາ. ເພາະເປົ້າໝາຍທີ່ບໍ່ມີກຳນົດເວລາກໍເປັນພຽງແຕ່ຄວາມຝັນ!
ວັນທີ 1 ກໍລະກົດ
ກຳນົດຂັ້ນຕອນຕ່າງໆທີ່ກ່ຽວຂ້ອງ.
ຂັ້ນຕອນ
1. ຊອກຄູ່ມືສົນທະນາພາສາອັງກິດ.
2. ຮຽນຄຳສັບໃໝ່ອາທິດລະສິບຄຳ.
3. ຟັງຄົນອື່ນເວົ້າພາສາອັງກິດ.
4. ຂໍໃຫ້ຜູ້ໃດຜູ້ໜຶ່ງກວດເບິ່ງຫຼັກໄວຍະກອນແລະການອອກສຽງ.
ອຸປະສັກທີ່ອາດເກີດຂຶ້ນ. ຄິດຫາວິທີເອົາຊະນະອຸປະສັກເຫຼົ່ານັ້ນ.
ອຸປະສັກທີ່ອາດເກີດຂຶ້ນ
ບໍ່ມີຄົນທີ່ເວົ້າພາສາອັງກິດຢູ່ໃກ້ໆ
ຕັ້ງໃຈ. ສັນຍາກັບຕົວເອງວ່າຈະພະຍາຍາມສຸດຄວາມສາມາດເພື່ອບັນລຸເປົ້າໝາຍນັ້ນ. ຈາກນັ້ນໃຫ້ເຊັນຊື່ແລະຂຽນວັນທີ.
ວິທີເອົາຊະນະອຸປະສັກ
ດາວໂຫຼດບັນທຶກສຽງການອ່ານໜັງສືພາສາອັງກິດຈາກ www.jw.org.
․․․․․ ․․․․․
ເຊັນຊື່ ວັນທີ
✔ 3 ລົງມືປະຕິບັດ!
ໃຫ້ເລີ່ມຕົ້ນທັນທີໂລດ. ໃຫ້ຖາມຕົວເອງວ່າ ‘ມື້ນີ້ຂ້ອຍຈະເຮັດອັນໃດແດ່ເພື່ອຈະເລີ່ມໄປໃຫ້ເຖິງເປົ້າໝາຍ?’ ແມ່ນຢູ່ ເຈົ້າອາດຍັງບໍ່ທັນກຳນົດລາຍລະອຽດທຸກຢ່າງ ແຕ່ຢ່າຍອມໃຫ້ສິ່ງນີ້ຖ່ວງດຶງບໍ່ໃຫ້ເລີ່ມຕົ້ນ. ດັ່ງທີ່ຄຳພີໄບເບິນກ່າວໄວ້ທີ່ວ່າ: “ຖ້າທ່ານລໍຖ້າໃຫ້ລົມແລະອາກາດເໝາະກ່ອນ ທ່ານກໍຈະບໍ່ໄດ້ປູກຝັງແລະໄດ້ເກັບກ່ຽວຫຍັງຈັກເທື່ອ.” (ຜູ້ເທສະໜາປ່າວປະກາດ 11:4, ທ.ປ.) ໃຫ້ຊອກຫາໃນສິ່ງທີ່ເຈົ້າເຮັດໄດ້ນັບຕັ້ງແຕ່ມື້ນີ້ ເຖິງແມ່ນວ່າຈະເປັນສິ່ງເລັກນ້ອຍກໍໃຫ້ເຮັດທັນທີໂລດ.
ທົບທວນເປົ້າໝາຍທຸກມື້. ໃຫ້ເຕືອນຕົວເອງວ່າເປັນຫຍັງເປົ້າໝາຍແຕ່ລະຢ່າງສຳຄັນສຳລັບເຈົ້າ. ສຳຫຼວດຄວາມກ້າວໜ້າຂອງເຈົ້າໂດຍໃຫ້ໝາຍ ✔ (ຫຼືຂຽນວັນທີທີ່ເຮັດສຳເລັດ) ໃສ່ກັບຂັ້ນຕອນແຕ່ລະຂໍ້ເມື່ອເຮັດສຳເລັດແລ້ວ.
ໃຊ້ຈິນຕະນາການ. ໃຫ້ເຈົ້າຄິດລ່ວງໜ້າແລະວາດພາບວ່າຕົວເອງບັນລຸເປົ້າໝາຍນັ້ນ. ຈາກນັ້ນໃຫ້ຄິດຫວນຄືນເພື່ອນຶກພາບແຕ່ລະຂັ້ນຕອນ. ສຸດທ້າຍ ໃຫ້ນຶກເຖິງພາບຕົວເອງເຮັດສຳເລັດຕາມຂັ້ນຕອນເທື່ອລະຂັ້ນນັ້ນ ແລະຈິນຕະນາການວ່າເຈົ້າຮູ້ສຶກພູມໃຈສ່ຳໃດທີ່ໄດ້ບັນລຸເປົ້າໝາຍຂອງເຈົ້າ. ຕອນນີ້ໄດ້ເວລາທີ່ຕ້ອງລົງມືເຮັດແລ້ວ!
[ຂໍ້ຄວາມໄຂເງື່ອນ]
a ຄຳແນະນຳເຫຼົ່ານີ້ໃຊ້ໄດ້ກັບເປົ້າໝາຍໄລຍະສັ້ນ ແຕ່ຫຼັກການເຫຼົ່ານີ້ຍັງໃຊ້ໄດ້ກັບເປົ້າໝາຍໄລຍະຍາວນຳອີກ.
ຂໍ້ພະຄຳພີຫຼັກ
“ຄວາມຄຶດທັງຫຼາຍຂອງຄົນອຸດສາກໍນຳໄປເຖິງຄວາມບໍລິບູນ.”—ສຸພາສິດ 21:5.
ຄຳແນະນຳ
ຢ່າກັງວົນກ່ຽວກັບການຍຶດຕິດກັບແຜນການ. ໃຫ້ເປັນຄົນທີ່ພ້ອມຈະປັບປຸງໄດ້ ແລະໃຫ້ປັບຕົວເມື່ອເລີ່ມກ້າວໄປສູ່ເປົ້າໝາຍ.
ເຈົ້າຮູ້ບໍ . . .?
ແຮ່ງມີເປົ້າໝາຍໃຫຍ່ສ່ຳໃດ ແຮ່ງປະສົບຄວາມພໍໃຈຍິນດີຫຼາຍສ່ຳນັ້ນເມື່ອເຈົ້າເຮັດບັນລຸຜົນສຳເລັດ!
ເຈົ້າຄິດວ່າແນວໃດ?
• ເປັນໄປໄດ້ບໍທີ່ຈະມີເປົ້າໝາຍຫຼາຍໂພດໃນເວລາດຽວກັນ?—ຟີລິບ 1:10.
• ການຕັ້ງເປົ້າໝາຍແມ່ນການກຳນົດແຜນການທຸກນາທີໃນຊີວິດຂອງເຈົ້າບໍ?—ຟີລິບ 4:5.
[ຈຸດເດັ່ນໜ້າ 283]
“ອາດທໍ້ແທ້ໃຈໄດ້ງ່າຍຖ້າບໍ່ມີຈຸດມຸ່ງໝາຍຫຼືບໍ່ມີສິ່ງໃດໃຫ້ລໍຄອຍ. ແຕ່ເມື່ອຕັ້ງເປົ້າໝາຍແລະເຮັດຕາມເປົ້າໝາຍນັ້ນໄດ້ ເຈົ້າຈະຮູ້ສຶກດີຕໍ່ຕົວເອງ.”—ທ້າວ ຣິດ
[ກອບ/ຮູບພາບໜ້າ 283]
ຕົວຢ່າງເປົ້າໝາຍ
ມິດຕະພາບ ຊອກຫາໝູ່ຕ່າງໄວຈັກຄົນໜຶ່ງ. ຮື້ຟື້ນມິດຕະພາບເກົ່າໆ.
ສຸຂະພາບ ອອກກຳລັງກາຍໃຫ້ໄດ້ຢ່າງໜ້ອຍອາທິດລະ 90 ນາທີ. ນອນໃຫ້ໄດ້ຄືນລະແປດຊົ່ວໂມງ.
ໂຮງຮຽນ ເຮັດຄະແນນໃຫ້ດີຂຶ້ນໃນວິຊາຄະນິດສາດ. ບໍ່ຍອມແພ້ຖ້າໝູ່ກົດດັນໃຫ້ເຮັດສິ່ງທີ່ຜິດ.
ສາຍສຳພັນກັບພະເຈົ້າ ອ່ານຄຳພີໄບເບິນມື້ລະ 15 ນາທີ. ໃນອາທິດນີ້ ບອກຄວາມເຊື່ອໃຫ້ໝູ່ຄົນໜຶ່ງຟັງເຊິ່ງຮຽນຢູ່ຫ້ອງດຽວກັນ.
[ຮູບພາບໜ້າ 284, 285]
ເປົ້າໝາຍເປັນຄືກັບແຜນຜັງ ຕ້ອງໃຊ້ຄວາມພະຍາຍາມເພື່ອຈະກາຍເປັນຮູບເປັນຮ່າງໄດ້