ບົດຮຽນ 2
ເລເບກາຢາກເຮັດໃຫ້ພະເຢໂຫວາດີໃຈ
ເລເບກາເປັນຜູ້ຍິງທີ່ຮັກພະເຢໂຫວາ. ຜົວຂອງລາວຊື່ອີຊາກ. ອີຊາກກໍຮັກພະເຢໂຫວາຄືກັນ. ເລເບກາພົບກັບອີຊາກໄດ້ແນວໃດ? ເລເບກາສະແດງໃຫ້ເຫັນແນວໃດວ່າລາວຢາກເຮັດໃຫ້ພະເຢໂຫວາດີໃຈ? ເຮົາມາຮຽນເລື່ອງຂອງເລເບກາຕື່ມອີກເນ.
ພໍ່ຂອງອີຊາກຊື່ອັບລາຫາມ ແລະແມ່ຊື່ຊາລາ. ອີຊາກກັບພໍ່ແມ່ອາໄສຢູ່ແຜ່ນດິນການາອານ ເຊິ່ງຜູ້ຄົນຢູ່ຫັ້ນບໍ່ໄດ້ນະມັດສະການພະເຢໂຫວາ. ແຕ່ອັບລາຫາມຢາກໃຫ້ອີຊາກແຕ່ງດອງກັບຜູ້ຍິງທີ່ນະມັດສະການພະເຢໂຫວາ. ເນື່ອງຈາກອັບລາຫາມຍັງມີຍາດພີ່ນ້ອງຈຳນວນໜຶ່ງທີ່ອາໄສຢູ່ເມືອງຄາຣານ ດັ່ງນັ້ນ ລາວຈຶ່ງສົ່ງຄົນຮັບໃຊ້ໄປຊອກເມຍໃຫ້ອີຊາກຢູ່ຫັ້ນ. ຄົນຮັບໃຊ້ຜູ້ນັ້ນອາດແມ່ນເອລີເອເຊນ.
ເລເບກາເຕັມໃຈເຮັດວຽກໜັກເພື່ອຕັກນ້ຳໃຫ້ຝູງອູດກິນ
ເອລີເອເຊນເດີນທາງໄປກັບຄົນຮັບໃຊ້ຄົນອື່ນໆຂອງອັບລາຫາມ ເຊິ່ງເປັນການເດີນທາງທີ່ໄກ. ເຂົາເຈົ້າເອົາອູດໄປນຳສິບໂຕເຊິ່ງໃຊ້ເພື່ອຂົນອາຫານແລະຂອງຂວັນ. ເອລີເອເຊນຈະຮູ້ໄດ້ແນວວ່າຈະເລືອກຜູ້ຍິງຄົນໃດໃຫ້ອີຊາກ? ເມື່ອເອລີເອເຊນແລະຄົນຮັບໃຊ້ຄົນອື່ນໆມາຮອດເມືອງຄາຣານ ເພາະລາວຮູ້ວ່າອີກຈັກໜ້ອຍຈະມີຄົນອອກມາຕັກນ້ຳ ເຂົາເຈົ້າຈຶ່ງຢຸດຢູ່ແຄມນ້ຳສ້າງ. ຈາກນັ້ນ ລາວຈຶ່ງອະທິດຖານເຖິງພະເຢໂຫວາແລະເວົ້າວ່າ ‘ຖ້າຂ້ານ້ອຍຂໍກິນນ້ຳຈາກຜູ້ຍິງຄົນໜຶ່ງ ແລະຖ້າລາວເອົານ້ຳໃຫ້ທັງຂ້ານ້ອຍແລະໃຫ້ອູດກິນ ຂ້ານ້ອຍຈະຮູ້ວ່າຜູ້ຍິງຄົນນັ້ນແມ່ນຜູ້ທີ່ພະອົງໄດ້ເລືອກໄວ້.’
ຈາກນັ້ນເລເບກາກໍມາຕັກນ້ຳສ້າງ. ຄຳພີໄບເບິນບອກວ່າລາວເປັນຜູ້ຍິງທີ່ງາມຫຼາຍ. ເອລີເອເຊນຈຶ່ງຂໍກິນນ້ຳນຳເລເບກາແລະລາວຕອບວ່າ: ‘ໄດ້ ຂ້ອຍຈະຕັກເອົານ້ຳໃຫ້ທ່ານກິນແລະຈະໃຫ້ອູດຂອງທ່ານກິນນຳ.’ ລູກຄຶດເບິ່ງແມ! ອູດທີ່ຫິວນ້ຳ ຈະກິນນ້ຳຫຼາຍໄດ໋ ສະນັ້ນເລເບກາຕ້ອງແລ່ນກັບໄປກັບມາຫຼາຍເທື່ອເພື່ອຕັກນ້ຳ. ລູກເຫັນໃນຮູບບໍວ່າລາວເຮັດວຽກໜັກສ່ຳໃດ?— ເອລີເອເຊນຮູ້ສຶກງຶດງໍ້ໃນວິທີທີ່ພະເຢໂຫວາຕອບຄຳອະທິດຖານຂອງລາວ.
ເອລີເອເຊນເອົາຂອງຂວັນຫຼາຍຢ່າງທີ່ງາມໆໃຫ້ເລເບກາ. ເລເບກາເຊີນເອລີເອເຊນກັບຄົນຮັບໃຊ້ຜູ້ອື່ນໆໃຫ້ມາພັກເຊົາຢູ່ເຮືອນຂອງລາວ. ເອລີເອເຊນໄດ້ບອກເຫດຜົນວ່າເປັນຫຍັງອັບລາຫາມຈຶ່ງສົ່ງລາວມາເມືອງນີ້ ແລະພະເຢໂຫວາໄດ້ຕອບຄຳອະທິດຖານຂອງລາວແນວໃດ. ພໍ່ແມ່ຂອງເລເບກາຈຶ່ງຍິນດີຍອມໃຫ້ລາວແຕ່ງດອງກັບອີຊາກ.
ເລເບກາໄປທີ່ການາອານກັບເອລີເອເຊນແລະແຕ່ງດອງກັບອີຊາກ
ລູກຄຶດວ່າເລເບກາຢາກແຕ່ງດອງກັບອີຊາກບໍ?— ເລເບກາຮູ້ວ່າພະເຢໂຫວາເປັນຜູ້ສົ່ງເອລີເອເຊນມາ. ດັ່ງນັ້ນ ເມື່ອພໍ່ແມ່ຖາມເລເບກາວ່າຢາກໄປການາອານແລະແຕ່ງດອງກັບອີຊາກບໍ ລາວຈຶ່ງຕອບວ່າ ‘ລູກຢາກໄປ.’ ເລເບກາກໍໄປກັບເອລີເອເຊນທັນທີເລີຍ. ເມື່ອມາຮອດການາອານ ລາວກໍໄດ້ແຕ່ງດອງກັບອີຊາກ.
ເນື່ອງຈາກເລເບກາເຮັດໃນສິ່ງທີ່ພະເຢໂຫວາຕ້ອງການໃຫ້ລາວເຮັດ ພະອົງຈຶ່ງໃຫ້ລາງວັນແກ່ລາວ. ຫຼາຍປີຕໍ່ມາ ພະເຍຊູໄດ້ເກີດຈາກເຊື້ອສາຍຂອງເລເບກາ! ຖ້າລູກເປັນຄືກັບເລເບກາແລະເຮັດໃຫ້ພະເຢໂຫວາດີໃຈ ພະອົງກໍຈະໃຫ້ລາງວັນແກ່ລູກຄືກັນ.