ບົດຮຽນ 11
ຄົນເຫຼົ່ານີ້ຂຽນເລື່ອງຂອງພະເຍຊູ
ໃນໜ້ານີ້ລູກເຫັນຮູບໃຜແດ່?— ໃນນີ້ມີ ມັດທາຍ ມາລະໂກ ລືກາ ໂຢຮັນ ຢາໂກໂບ ຢູດາ ເປໂຕແລະໂປໂລ. ຄົນເຫຼົ່ານີ້ມີຊີວິດຢູ່ໃນສະໄໝດຽວກັບພະເຍຊູແລະເຂົາເຈົ້າໄດ້ຂຽນເລື່ອງຂອງພະເຍຊູ. ໃຫ້ເຮົາມາຮຽນຮູ້ເລື່ອງຂອງເຂົາເຈົ້ານຳກັນຕື່ມອີກເນາະ.
ລູກຮູ້ຈັກເລື່ອງຂອງຄົນເຫຼົ່ານີ້ບໍ?
ມີສາມຄົນໃນພວກເຂົາເຈົ້າເປັນອັກຄະສາວົກທີ່ໄປປະກາດກັບພະເຍຊູ. ລູກຮູ້ສາມຄົນນີ້ບໍ?— ມີມັດທາຍ ໂຢຮັນ ແລະເປໂຕ. ອັກຄະສາວົກມັດທາຍ ແລະໂຢຮັນຮູ້ຈັກພະເຍຊູເປັນຢ່າງດີ ແລະເຂົາເຈົ້າໄດ້ຂຽນເລື່ອງຊີວິດຂອງພະເຍຊູ. ອັກຄະສາວົກໂຢຮັນຍັງຂຽນອີກພະທຳໜຶ່ງທີ່ເອີ້ນວ່າຄຳປາກົດແລະຈົດໝາຍອີກສາມສະບັບທີ່ເອີ້ນວ່າ ໜຶ່ງໂຢຮັນ ສອງໂຢຮັນ ແລະສາມໂຢຮັນ. ອັກຄະສາວົກເປໂຕໄດ້ຂຽນຈົດໝາຍສອງສະບັບໃນຄຳພີໄບເບິນເຊິ່ງເອີ້ນວ່າ ໜຶ່ງເປໂຕ ແລະສອງເປໂຕ. ໃນຈົດໝາຍສະບັບທີສອງ ເປໂຕໄດ້ຂຽນ ຕອນທີ່ພະເຢໂຫວາໄດ້ເວົ້າຈາກສະຫວັນແລະບອກກັບພະເຍຊູວ່າ: ‘ຜູ້ນີ້ເປັນລູກຊາຍທີ່ເຮົາຮັກ ແລະເຮົາພູມໃຈຫຼາຍໃນຕົວລາວ.’
ໂດຍທາງພະທຳຕ່າງໆທີ່ເຂົາເຈົ້າໄດ້ຂຽນໄວ້ ຍັງມີຄົນອື່ນໆອີກໃນຮູບນີ້ທີ່ບອກເຮົາໃຫ້ຮູ້ເລື່ອງຂອງພະເຍຊູ. ຜູ້ໜຶ່ງໃນນັ້ນກໍແມ່ນມາລະໂກ ບາງທີລາວອາດເປັນຜູ້ໜຶ່ງທີ່ຢູ່ກັບພະເຍຊູຕອນທີ່ພະອົງຖືກຈັບແລະລາວໄດ້ເຫັນສິ່ງຕ່າງໆທີ່ໄດ້ເກີດຂຶ້ນກັບພະອົງ. ອີກຄົນໜຶ່ງກໍແມ່ນລືກາເຊິ່ງເປັນທ່ານໝໍແລະອາດຈະມາເປັນຄລິດສະຕຽນພາຍຫຼັງທີ່ພະເຍຊູເສຍຊີວິດ.
ອີກສອງຄົນທີ່ຂຽນຄຳພີໄບເບິນທີ່ລູກເຫັນໃນຮູບແມ່ນນ້ອງຊາຍຂອງພະເຍຊູ. ລູກຮູ້ຈັກຊື່ຂອງເຂົາເຈົ້າບໍ?— ຜູ້ໜຶ່ງຊື່ຢາໂກໂບແລະອີກຜູ້ໜຶ່ງຊື່ຢູດາ. ທຳອິດເຂົາເຈົ້າບໍ່ເຊື່ອໃນພະເຍຊູ ແລະຄິດວ່າພະອົງເປັນບ້າ ແຕ່ໃນພາຍຫຼັງເຂົາເຈົ້າໄດ້ປ່ຽນຄວາມຄິດແລະມີຄວາມເຊື່ອ ແລະໄດ້ເຂົ້າມາເປັນຄລິດສະຕຽນ.
ຄົນສຸດທ້າຍທີ່ຂຽນຄຳພີໄບເບິນທີ່ລູກເຫັນແມ່ນໂປໂລ ກ່ອນທີ່ຈະມາເປັນຄລິດສະຕຽນລາວມີຊື່ວ່າໂຊໂລ. ລາວຊັງຄລິດສະຕຽນຫຼາຍຈົນໄດ້ທຳຮ້າຍຮ່າງກາຍຂອງເຂົາເຈົ້າ. ລູກຮູ້ບໍວ່າເປັນຫຍັງໂປໂລຈຶ່ງເຂົ້າມາເປັນຄລິດສະຕຽນ?— ມື້ໜຶ່ງໃນຂະນະທີ່ໂປໂລກຳລັງເດີນທາງ ທັນທີທັນໃດນັ້ນລາວກໍໄດ້ຍິນສຽງຄົນໜຶ່ງເວົ້າກັບລາວຈາກສະຫວັນ ຜູ້ນັ້ນແມ່ນພະເຍຊູ ພະອົງຈຶ່ງຖາມໂປໂລວ່າ: ‘ເປັນຫຍັງເຈົ້າຈຶ່ງເຮັດໂຫດຮ້າຍກັບລູກສິດຂອງຂ້ອຍແທ້?’ ຫຼັງຈາກນັ້ນໂປໂລຈຶ່ງໄດ້ປ່ຽນຄວາມຄິດຂອງໂຕເອງແລະເຂົ້າມາເປັນຄລິດສະຕຽນ. ໂປໂລໄດ້ຂຽນ 14 ພະທຳໃນຄຳພີໄບເບິນ ຕັ້ງແຕ່ພະທຳໂລມຈົນຮອດພະທຳເຫບເລີ.
ເຮົາໄດ້ອ່ານຄຳພີໄບເບິນທຸກໆມື້ບໍ?— ໂດຍການອ່ານຄຳພີໄບເບິນ ເຮົາໄດ້ຮຽນຮູ້ຫຼາຍສິ່ງຫຼາຍຢ່າງກ່ຽວກັບພະເຍຊູ. ລູກຢາກຮູ້ເລື່ອງຂອງພະເຍຊູຫຼາຍຂຶ້ນບໍ?—